Ka Buke a Omanai

MOKUNA 1

1 [mokuna 1, paukū 1] Aia hoi, ua kauohaia mai au, o Omanai, e ko’u makuakane i Iaroma, e kakau iho i kekahi mau mea maluna o keia mau papa, i mea i malama’i i ko makou kuauhau;

2 Nolaila, ma ko’u mau la, ua makemake au i ike oukou ua kaua nui aku au me ka pahikaua, e hoopakele i ko’u poe kanaka, i ko Nepai poe, i haule ole iloko o na lima o ko lakou poe enemi, i ko Lamana poe. Aka hoi, owau la, he kanaka hewa au, a ua malama ole au i na kanawai a me na kauoha a ka Haku, me ka mea o’u e pono ai.

3 [m 1, p 2] Eia kekahi, ua hala aku la na makahiki elua haneri kanahikukumamaono, a ua loaa ia makou na kau maluhia he nui loa; a he nui wale na kau kaua kaumaha a hookahe koko ana. He oiaio hoi, ua hala aku la elua haneri kanawalu a me na makahiki keu elua, a ua malama au i keia mau papa e like me na kauoha a ko’u mau kupuna; a haawi aku la au ia mau mea i ka’u keiki o Amarona. A ke hooki nei au.

4 [m 1, p 3] Ano, ke kakau iho nei au, o Amarona, i na mea a’u a kakau ai, he kakaikahi nae ia mau mea, iloko o ka buke a ko’u makuakane.

5 Eia hoi kekahi, ua hala aku la ekolu haneri makahiki a me iwakalua, a ua lukuia ka poe hewa loa o ko Nepai poe:

6 No ka mea, aole ka Haku e ae aku , mahope iho o koua alakai ana ia lakou mailoko mai o ka aina o Ierusalema, a malama a hoopakele hoi ia lakou i haule ole ai lakou iloko o na lima o ko lakou poe enemi: he oiaio, aole oia e ae aku i hooiaio ole ia’i na olelo, aua i olelo mai ai i ko makou poe kupuna, i ka i ana, Ina aole oukou e malama pono i ka’u mau kauoha, aole e hoopomaikaiia’ku oukou ma ka aina.

7 Nolaila, ua hele mai ka Haku ia lakou me ka hoopai nui; aka hoi, ua hookoe mai oia i ka poe pono, i make ole lakou, aka ua hoopakele mai oia ia lakou mailoko mai o na lima o ko lakou poe enemi.

8 Eia kekahi, ua haawi aku la au i na papa i ko’u kaikaina ia Kemisa.

9 [m 1, p 4] Ano, ke kakau nei au, o Kemisa, i na mea kakaikahi a’u e kakau ai, iloko o ka buke hookahi me ko’u kaikuaana: no ka mea, ua ike au i ka mea hope ana i kakau ai, nana ia i kakau me kona lima iho; a ua kakauia e ia ma ka la ana i haawi mai ai ia mau mea ia’u. A mamuli o keia ano ke malama nei makou i ko makou mau mooolelo, no ka mea, ua like ia me na kauoha a ko makou poe kupuna. A ke hooki nei au.

10 [m 1, p 5] Aia hoi, he keiki no au, o Abinadoma, na Kemisa. Aia hoi, ua ike au i ke kaua a me ka paio he nui mawaena o ko’u poe kanaka, ko Nepai poe, a me ko Lamana poe; a ua kaili aku la au, me ka’u pahikaua iho, i na ola o na mea he nui o ko Lamana poe, i ka hoomalu ana i ko’u poe hoahanau.

11 Aia hoi, ua kahakahaia ka mooolelo o keia poe kanaka maluna o na papa aia no i na ’lii, e like me na hanauna; aole au i ike i kekahi hoikeana i kakau ole ia, aole hoi i kekahi wanana; nolaila, ua lawa na mea i kakauia. Ke hooki nei au.

12 [m 1, p 6] Aia hoi, he keiki no au, o Amaleki, na Abinadoma. Aia hoi, e olelo aku no au i kekahi mau mea ia oukou no Mosia, ka mea i hooliloia’i i Alii maluna o ka aina o Zarahemela: no ka mea, aia hoi, ua aoia oia e ka Haku e mahuka aku mailoko aku o ka aina o Nepai, a o ka poe i hoolohe aku i ka leo o ka Haku, e hele pu lakou me ia, iloko o ka waonahele.

13 Eia kekahi, hana iho la oia me ke kauoha a ka Haku ia ia. A hele aku la lakou mawaho o ka aina iloko o ka waonahele, o ka poe i hoolohe aku i ka leo o ka Haku: a ua alakaiia lakou e na hai olelo a me na wanana. A ua ao mau ia lakou e ka olelo a ke akua; a ua alakaiia lakou e ka mana o kona lima, mawaena o ka waonahele, a hiki aku lakou iloko o ka aina i kapaia o ka aina o Zarahmela.

14 A loaa iho la ia lakou kekahi lahuikanaka, i kapaia o ka poe kanaka o Zarahemela. Ano, ua nui ka hauoli ana iwaena o ka poe kanaka o Zarahemela; a o Zarahemela hoi kekahi i hauoli nui loa, no ka mea, ua hoouna mai la ka Haku i ko Mosia poe me na papa keleawe, aia iloko o lakou ka mooolelo o ka poe Iudaio.

15 [m 1, p 7] Aia hoi, ike aku la o Mosia ua puka mai la ko Zarahemela poe, mai Ierusalema mai, ka wa i lawe pio ia’ku ai o Zedekia, ke Alii o Iuda, ma Babulona.

16 A ua hele ae la lakou ma ka waonahele, a ua laweia mai la e ka lima o ka Haku, maluna mai o ka kai nui, i ka aina kahi i loaa’i lakou ia Mosia; a ua noho iho la lakou ilaila ia manawa aku.

17 A i ka manawa i loaa’i lakou ia Mosia, ua lilo lakou i lehulehu loa. Aka hoi, ua loaa ia lakou na kaua a me na paio kaumaha, a ua haule ma ka pahikaua ia manawa aku ia manawa aku: a ua ano e iho la ka lakou olelo; a, aole o lakou i lawe pu mai ai no mooolelo me lakou; a hoole aku la lakou i ke ola ana o ko lakou Mea nana i hana; aole o Mosia, aole hoi o ko Mosia poe, i hiki ke hoomaopopo i ka lakou.

18 [m 1, p 8] Aka eia kekahi, na Mosia i kauoha aku e aoia lakou ma kana olelo. A, mahope iho o ko lakou aoia’na ma ka olelo a Mosia, haawi mai la o Zarahemela i kuauhau o kona poe kupuna, e like me ka mea paa naau ia ia; a ua kakauia ia mau mea, aole nae ma keia mau papa.

19 [m 1, p 9] Eia kekahi, hui pu iho la ka poe kanaka o Zarahemela, a me ko Mosia; a ua waeia’ku o Mosia i Alii no lakou.

20 Eia kekahi, ma na la o Mosia, ua laweia mai kekahi pohaku nui io na la, me na kaha maluna ona; a hoike mai la oia i ke ano o na kaha, ma ka haawina a me ka mana o ke Akua.

21 [m 1, p 10] A haawi mai la ia mau mea i mooolelo o kekahi mea i kapaia o Korianatuma, a me ka poe pepehiia o kona poe kanaka. A ua loaa Korianatuma i ka poe kanaka o Zarahemela; a noho pu iho la oia me lakou, i eiwa mau mahina.

22 A ua olelo mai la ia he mau olelo uuku no kona poe kupuna. A o kona poe kupuna mua ua hele mai la lakou mai ka hale pakui mai, i ka manawa a ka Haku i hookahuli ai i ka olelo a na kanaka; a haule mai la ka inaina o ka Haku maluna o lakou, e like me kona hoopai ana, a ua pono ia; a ke waiho mokaki la ko lakou mau iwi ma ka aina akau.

23 [m 1, p 11] Aia hoi, ua hanau mai la au, o Amaleki, ma na la o Mosia; a ua ola au a ike i kona make ana; a o Beniamina, o kana keiki, ka i noho alii ma kona hakahaka.

24 Aia hoi, ua ike au ma na la o Beniamina ke Alii, i kekahi kaua kaumaha, a me ka hookahe koko nui ana, mawaena o ko Nepai poe a me ko Lamana poe. Aka hoi, ua loaa ka lanakila i ko Nepai poe maluna o lakou; he oiaio, a hiki no i ke Alii ia Beniamina ke kipaku aku ia lakou iwaho o ka aina o Zarahemela.

25 [m 1, p 12] Eia kekahi, hiki mai la ka wa elemakule o’u; a aole au keiki, a e ike ana au he kanaka pono o ke Alii Beniamina imua o ka Haku, nolaila, e haawi aku no au i keia mau papa ia ia, e kauleo ana i na kanaka a pau e hele mai i ka Akua la, i ka Mea Hemolele o ka Iseraela, a e manaoio i ka wanana ana, a i na koikeana, a i ka lawelawe ana o na anela, a i ka haawina o ka olelo ana ma na olelo e, a i ka haawina o ka hoomaopopo ana i ke ano o na olelo, a i na mea a pau i pono: no ka mea, aole kekahi mea i pono, ke hele ole mai ia mea mai ka Haku mai; a o ka mea i hewa, e hele mai ana ia mai ka diabolo mai.

26 [m 1, p 13] Ano, e ko’u poe hoahanau alohaia, ke makemake nei au e hele mai oukou ia Kristo, oia no ka Mea Hemolele o ka Iseraela, a e loaa’i kona ola, a me ka mana o kona hoolapanai anal He oiaio, e hele mai io na la, a e haawi aku i ko oukou uhane a pau me he alana la ia ia, a e hoomau ma ka hooke ai ana a me ka pule ana, a e hoomau a hiki i ka hopena: a ma ke ola o ka Haku, e hoolaia oukou.

27 [m 1, p 14] Ano, ke makemake nei au e olelo aku i kekahi mau mea no kekahi poe i pii aku i ka waonahele, e hoi aku i ka aina o Nepai: no ka mea, ua nui no ka poe i makemake e loaa ko lakou aina hooilina;

28 Nolaila, pii aku la lakou i ka waonahele. A o ko lakou luna he kanaka ikaika a mana ia, a he kanaka ai oolea, nolaila, nana i hookomo i ka paio mawaena o lakou: a ua pepehiia lakou a pau, koe wale no he kanalima, ma ka waonahele, a hoi hou mai la lakou i ka aina o Zarahemela.

29 [m 1, p 15] Eia kekahi, kai aku la hoi lakou i kekahi poe e ae, a nui loa, a hele hou aku la i ka waonahele.

30 A he hoahanau ko’u, o Amaleki, i hele pu hoi me lakou; aole au i lohe hou ia lakou mahope mai. A kokoke au e moe ilalo ma ko’u lua kupapau; a ua piha keia mau papa. A ke hooki nei au i ka’u olelo ana.