Ka Buke a Mosia

1 [mokuna 1, paukū 1] Ano, aole paio hou ma ka aina a puni o Zarahemela, mawaena o ko ke Alii Beniamina poe kanaka, no ia mea, ua maluhia mau ke koena a pau o kona mau la.

2 Eia kekahi, aia he mau keikikane kana ekolu; a kapa aku la oia i ko lakou mau inoa, o Mosia, a o Heloruma, a me Helamana. A nana i kauoha i aoia lakou ma ka olelo a pau o kona poe kupuna, i lilo lakou ma ia mea i mau kanaka ike; i ike lakou no na wanana i oleloia’i e na waha o ko lakou poe kupuna, i haawiia mai ai ia lakou e ka lima o ka Haku.

3 A ao aku la hoi oia ia lakou no na mooolelo i kahakahaia ma na papa keleawe, i ka i ana, E a’u mau keiki, ke makemake nei au e hoomanao oukou, ina aole no keia mau papa, me keia mau mooolelo a me keia mau kauoha iloko, alaila, ua noho pilikia kakou iloko o ka naaupo, ma keia manawa, e ike ole ana i na mea pohihihi o ke Akua:

4 No ka mea, he mea i hiki ole ai i ko kakou kupuna kane o Lehi ke hoomanao i keia mau mea a pau, e ao mai i kana poe keiki, ina aole no ke kokua ana o keia mau papa: no ka mea, ua aoia oia ma ka olelo a ko Aigupita, nolaila, ua hiki ia ia ke heluhelu i na kaha nei, a e ao mai ia mau mea i kana poe keiki, i hiki ia lakou ma ia mea ke ao mai i ka lakou poe keiki, a pela e hooko ana i na kauoha a ke Akua, a hiki loa no i keia manawa.

5 Ke i aku nei au ia oukou, e a’u mau keiki, ina aole no keia mau mea, i malamaia a hoolaia e ka lima o ke Akua, i hiki ia kakou ke heluhelu a ke hoomaopopo i kona mau mea pohihihi, a i loaa mau ai kana mau kauoha imua o ko kakou mau maka, ina no ua emi iho no hoi ko kakou poe kupuna iloko o ka hoomaloka, a alikealike kakou me ko kakou poe hoahanau, o ko Lamana poe, ka poe i ike ole no keia mau mea, aole hoi i manaoio ia mau mea, i ka wa i aoia’ku ai ia mau mea ia lakou, no na mooolelo pololei ole o ko lakou poe kupuna.

6 E a’u mau keiki, ke makemake nei au e hoomanao oukou he oiaio ua mau olelo nei; a he oiaio no hoi ua mau mooolelo nei. A me na papa no hoi a Nepai, aia no iloko o lakou na mooolelo a me na olelo a ko kakou poe kupuna, mai ka manawa a lakou i haalele ai ia Ierusalema, a hiki i keia manawa; a he oiaio no ia mau mea; a ua hiki ia kakou ke ike i ko lakou oiaio, no ka mea, aia no lakou imua o ko kakou mau maka.

7 Ano, e a’u mau keiki, ke makemake nei au e hoomanao oukou e huli ia mau mea me ka molowa ole, i pomaikai ai oukou ma ia mea; a ke makemake nei au e malama oukou i na kauoha a ke Akua, i hoopomaikaiia’i oukou ma ka aina e like me na olelo i olelo mua ia’i, a ka Haku i hana mai ai i ko kakou poe kupuna.

8 A ua nui loa na mea e ae a ke Alii Beniamina i ao aku ai i kana mau keiki, i palapala ole ia iloko o keia buke.

9 [m 1, p 2] Eia kekahi, mahope iho o ka pau ana o ka ke Alii Beniamina ao ana i kana mau keiki, mahuahua iho la kona elemakule ana; a ike iho la ia e hele koke auanei oia i ke ala o ko ka honua a pau; nolaila, manao iho la ia he mea e pono ai, e hooili aku i ke aupuni maluna iho o kekahi o kana poe keiki.

10 Nolaila, nana i kai mai ia Mosia imua ona; a eia no na olelo ana i olelo aku ai ia ia, i ka i ana: E ka’u keiki, ke makemake nei au ia oe e kukala aku i olelo hoolaha a puni o keia aina a pau, mawaena o keia poe kanaka a pau, o ka poe kanaka o Zarahemela no ia, a me ka poe kanaka o Mosia no hoi e noho nei ma ka aina, i houluuluia mai ai lakou ma o ua mea la: no ka mea, i ka la apopo e kukala aku au i keia poe kanaka mai kuu waha iho aku, ooe ke Alii, a me ka luna maluna o keia poe kanaka, a ka Haku ke Akua i haawi mai ai ia kaua.

11 A eia hoi, e haawi aku no au i keia lahuikanaka i inoa, i kaulana ai lakou ma o ua inoa la mamua o na kanaka a pau, a ka Haku a ke Akua i lawe mai ai mailoko mai o ka aina o Ierusalema; a ke hana nei au i keia, no ka mea, he poe kanaka molowa ole lakou ma ka malama ana i na kauoha a ka Haku.

12 A ke haawi aku nei au i inoa ia lakou, i holoi ole ia auanei a mau loa aku, ke ole ma o ka lawehala la.

13 He oiaio, a eia hoi, ke i aku nei au ia oe, ina e haule aku keia poe kanaka i hoopomaikai loa ia o ka Haku iloko o ka lawehala, a e lilo i lahuikanaka hewa a moe kolohe, na ka Haku no e hookuu aku ia lakou, i lilo ai lakou ma o ua mea la i nawaliwali, e like me ko lakou poe hoahanau; aole oia e hoola hou ia lakou, ma o kona mana kupanaha a like ole hoi, me ia i hoola mai ai i ko kakou poe kupuna mamua aku.

14 No ka mea, ke i aku nei au ia oe, ina aole oia i o mai la i kona lima ma ka hoopakele ana i ko kakou poe kupuna, ina ua haule aku lakou iloko o na lima o ko Lamana poe, a lilo lakou i poe make i ko lakou inaina.

15 [m 1, p 3] Eia kekahi, mahope o ka pau ana o keia mau olelo a ke Alii Beniamina i kana keiki, kauoha aku la oia ia ia no na mea a pau o kona aupuni.

16 A eia hoi, kauoha aku la oia ia ia no na olelo i kahakahaia ma na papa keleawe; a me na papa o Nepai no hoi; a me ka pahikaua hoi a Labana, a me ka mea poepoe, o ka mea kuhikuhi no ia, o ka mea i alakai mai ai i ko makou poe kupuna mawaena o ka waonahele, i hoomakaukauia e ka lima o ka Haku, i alakaiia lakou ma o ua mea la, o kela mea keia mea e like me ka hoolohe a me ka molowa ole o lakou ia ia.

17 Nolaila, me lakou i malama ole ai, aole lakou i pomaikai, aole hoi i holo ma ko lakou hele ana, aka ua hoihoiia lakou ihope, a loaa ia lakou ka huhu o ke Akua maluna o lakou; a, nolaila la, ua hahauia lakou me ka wi a me na popilikia eha, e hoeueu ia lakou ma ka hoomanao i ko lakou mea pono ke hana.

18 [m 1, p 4] Ano, eia kekahi, hele aku la o Mosia, a hana iho la me ka kona makua i kauoha mai ai ia ia, a kukala aku la i na kanaka a pau ma ka aina o Zarahemela, i hiki ia lakou ke hoakoakoa ia lakou iho, e pii aku i ka luakini, e hoolohe aku i na olelo a kona makuakane e olelo aku ai ia lakou.

1 [mokuna 1, paukū 5] Eia kekahi, mahope iho o ka Mosia hana ana me ka kona makuakane i kauoha mai ai ia ia, a ua kukala aku i kahi olelo hoolaha ma ka aina a puni, hoakoakoa mai la na kanaka ia lakou iho mawaena o ka aina a pau, i hiki ia lakou ke pii aku i ka luakini, e hoolohe i na olelo a ke Alii Beniamina e olelo aku ai ia lakou.

2 A he lehulehu loa lakou, a no ka nui loa aole o lakou i helu aku ia lakou; no ka mea, ua laha nui loa aku la lakou, a paapu ma ka aina.

3 A lalau aku la hoi lakou i na hanau mua o ko lakou pua holoholona, e hiki ia lakou ke kaumaha iho i mohai a me na mohai kuni e like me ka ke kanawai o Mose;

4 A i hiki hoi ia lakou ke hoalohaloha aku i ka Haku, i ko lakou Akua, nana i lawe mai ia lakou mailoko mai o ka aina o Ierusalema, a nana i hoopakele mai ia lakou i na lima o ko lakou poe enemi, a i wae ai i poe kanaka pono i poe kumu no lakou; a i kekahi kanaka pono i alii no lakou, nana i hookupaa i ka maluhia ma ka aina o Zarahemela, a nana i ao aku ia lakou e malama i na kauoha a ke Akua, i hiki ia lakou ke hauoli, a e hoopihaia me ke aloha i ke Akua, a me na kanaka a pau.

5 [m 1, p 6] Eia kekahi, ia lakou i hiki aku ai iluna i ka luakini, kukulu iho la lakou i ko lakou mau halelewa a puni, o kela kanaka keia kanaka e like me kona ohana, o kana wahine ia, a me kana mau keikikane, a me kana mau kaikamahine, a me ka lakou mau keikikane, a me ka lakou mau kaikamahine, mai ka hiapo a hiki i ka panina, o kela ohana keia ohana i kaawale, kekahi mai kekahi ae;

6 A kukulu iho la lakou i ko lakou mau halelewa a puni o ka luakini, o ko kela kanaka keia kanaka halelewa me ka puka ona e huli ana i ka luakini, i hiki ai ia lakou ke noho iloko o ko lakou mau halelewa, a e hoolohe aku i na olelo a ke Alii Beniamina e olelo mai ai ia lakou;

7 No ka mea, no ka lehulehu nui wale, ua hiki ole i ke Alii Beniamina ke ao aku ia lakou a pau iloko o na paia o ka luakini; nolaila, kauoha ae la oia e kukuluia’i kekahi hale kiekie, i hiki i kona poe kanaka ma o ua mea la ke hoolohe i na olelo, ana e olelo aku ai ia lakou.

8 [m 1, p 7] Eia kekahi, hoomaka iho la oia e olelo aku i kona poe kanaka mai ka hale kiekie; a ua hiki ole ia lakou ke lohe i kana mau olelo a pau, no ke lehulehu o na kanaka; nolaila, kauoha ae la ia e palapalaia na olelo ana i olelo aku ai, a e hoounaia’ku i ka poe lohe ole i ka pae ana o kona leo, i loaa no hoi ia lakou kana mau olelo.

9 A eia na olelo ana i olelo aku ai a i kauoha aku ai e palapalaia, i ka i ana, E ko’u poe hoahanau, o oukou a pau i hoakoakoa mai ia oukou iho, ka poe i hiki ke hoolohe ma i ka’u mau olelo, a’u e olelo aku ai ia oukou i keia la: no ka mea, aole au i kauoha aku ia oukou e pii mai maanei e paani me na olelo a’u e olelo aku ai, aka i hoolohe mai ai oukou ia’u, a hoohamama i ko oukou mau pepeiao i lohe oukou, a i ko oukou naau i hoomaopopo oukou, a i ko oukou manao i weheia mai na mea pohihihi o ke Akua i ko oukou ike.

10 Aole au i kauoha aku ia oukou e pii mai maanei, i makau mai ai oukou ia’u, aole hoi i manao ai oukou ua kela aku au, mamua o ke kanaka e make ana;

11 Aka ua like au me oukou iho, e noho ana malalo iho o kela ano keia ano o ka nawaliwali ma ke kino, a me ka naau no hoi; aka me au i kohoia mai ai e keia poe kanaka, a hoolaaia mai ai e ko’u makuakane, a aeia mai ai e ka lima o ka Haku, i lilo ai au i luna, a i alii hoi maluna iho o keia poe kanaka; a ua malamaia mai a hoolaia mai e kona mana like ole, e hookauwa nau me ka mana, naau, a me ka ikaika a pau a ka Haku i haawi mai ai ia’u;

12 Ke i aku nei au ia oukou, me au i aeia mai ai e hoopau aku i ko’u mau la ma ka oukou hana, e hiki loa i keia manawa, me ka imi ole i ke gula, aole hoi i ke kala, aole no hoi i kela ano i keia ano o ka waiwai mai ia oukou mai;

13 Aole hoi au i ae aku e hoopaaia’ku oukou iloko o na halepaahao ino, aole hoi i hoolilo ae oukou ia oukou i kauwa hooluhi kekahi na kekahi, aole hoi e pepehi kanaka oukou, aole e powa, aole e aihue, aole e moe kolohe, aole hoi ae aku i hana aku ai oukou i kela ano keia ano o ka hewa; a ua ao aku ia oukou he mea pono no oukou ke malama i na kauoha a ka Haku, ma na mea a pau ana i kauoha mai ai ia oukou;

14 A owau hoi, owau iho, ua hana me ko’u mau lima ponoi, i hiki ia’u ke kokua ia oukou, a i hookaumaha ole ia’i oukou me na aufau, a i ole ai i hiki mai kekahi mea maluna o oukou he luhi ke halihali; a no keia mau mea a pau a’u i olelo ai, he mau hoike oukou i keia la.

15 Aka, e ko’u poe hoahanau, aole au i hana i keia mau mea i hiki ia’u ke kaena, aole au i hai aku i keia mau mea i hiki ia’u ma ia mea ke hoohewa ia oukou; aka ke hai aku nei au i keia mau mea, i ike oukou ua hiki ia’u ke hoike aku i ka naau maemae imua o ke Akua i keia la.

16 Aia hoi, ke i aku nei au ia oukou, no kuu i ana ia oukou ua hoopau aku au i ko’u mau la ma ka oukou hana, aole au makemake e kaena, no ka mea, ma ka hana a ke Akua wale no au.

17 [m 1, p 8] Aia hoi, ke hai aku nei au ia oukou i keia mau mea, i loaa ia oukou ka ike; i ike ai oukou i ka wa a oukou e noho ai ma ka hana o ko oukou poe hoa noho, aia ma ka hana a ko oukou Akua wale no oukou.

18 Aia hoi, ua kapa mai oukou ia’u, o ko oukou alii; a ina owau nei, a oukou i kapa mai ai o ko oukou alii, e hana e kokua ia oukou, alaila, aole anei e pono no oukou ke hana e kokua i kekahi i kekahi?

19 Aia hoi, ina owau, a oukou i kapa mai ai o ko oukou alii, ka mea i hoopau aku i kona mau la ma ka oukou hana, ma ka hana nae a ke Akua, e hoalohalohaia mai i oukou e pono ai, E! pehea la ko oukou pono e hoalohaloha aku ai i ko oukou alii lani!

20 Ke i aku nei au ia oukou, e o’u poe hoahanau, ina e haawi aku oukou i ke aloha a me ka hoonani a pau i hiki i ko oukou uhane a pau ke loaa’i, i kela Akua nana i hana mai ia oukou, a i malama mai, a i hoola mai ia oukou, a i hoohauoli mai ia oukou, a i ae mai hoi i noho oukou ma ka maluhia kekahi me kekahi;

21 Ke i aku nei au ia oukou, ina e hookauwa aku oukou na ka mea nana oukou i hana mai mai kinohou, a e hoola ana ia oukou ia la aku ia la aku, ma ka haawi ana ia oukou i ea, i ola oukou a hele, a hana e like me ko oukou makemake iho, a e hanai ana ia oukou mai kekahi minute aku i kekahi; ke i aku nei au ia oukou, ina paha e hookauwa aku oukou nana me ko oukou mau uhane a pau, he poe kauwa nae oukou e waiwai ole aku ai.

22 Aia hoi, o ka malama i kana mau kauoha, oia wale no ka mea ana i makemake ai ia oukou; a ua olelo hoopomaikai mai oia ia oukou, ina e malama oukou i kana mau kauoha, e hoopomaikaiia oukou ma ka aina; aole ia e lauwili ae mai ka mea ana i olelo mai ai; nolaila, ina e malama ana oukou i kana mau kauoha, e hoopomaikai ana oia ia oukou, a e hoolako ana ia oukou.

23 [m 1, p 9] Ano, eia ka mua, ua hana mai oia ia oukou, a haawi mai la ia oukou i ko oukou ola, no ia mea, ua aie aku oukou ia ia.

24 A eia ka lua: ke makemake mai nei oia e hana oukou me ia i kauoha mai ai ia oukou, no ia mea, ina hana oukou, e hoopomaikai koke ana oia ia oukou; a nolaila, ua uku mai oia ia oukou. A ua aie nae oukou ia ia; i keia manawa, a ia manawa aku, a mau loa aku a mau loa aku; nolaila, o ka mea hea la ka oukou e kaena ai?

25 Ano, ke ninau nei au, e hiki anei ia oukou ke olelo iki no oukou iho? Ke pane aku nei au ia oukou, Aole. Aole i hiki ia oukou ke olelo he lepo o ka honua oukou: aka, ua hanaia nae oukou no ka lepo o ka honua: aka hoi, nana no ia, na ka mea i hana mai ia oukou.

26 A owau, owau nei hoi, a oukou i kapa mai ai o ko oukou alii, aole au i maikai loa aku mamua o oukou; no ka lepo hoi au. A ke ike nei oukou ua elemakule au, a kokoke au e kuu ae i keia kino make i kona lepo makua;

27 Nolaila, me au i i aku ai ia oukou ua hookauwa aku no au na oukou, e hele ana me ka naau maemae imua o ke Akua, pela au i kauoha aku ai i hoakoakoa mai oukou ia oukou iho, i loaa hewa ole au, a i hooili ole ia ko oukou koko maluna o’u, ia’u e ku ai e hookolokoloia e ke Akua no na mea ana i kauoha mai ai ia’u no oukou.

28 Ke i aku nei au ia oukou, ua kauoha aku au i hoakoakoa ae oukou ia oukou iho, i hiki ia’u ke hoomaemae aku i ko’u mau aahu i ko oukou koko, ma kea manawa ai’u i kokoke ai e iho ilalo i ko’u lua kupapau, i hiki ia’u ke iho ilalo me ka malu, a i pii aku ai ko’u uhane palaho ole e hui pu me ka poe mele iluna ma ka hoolea ana i ke Akua pono.

29 A eia hoi, ke i aku nei au ia oukou, ua kauoha aku au i hoakoakoa oukou ia oukou iho, i hiki ia’u ke hai aku ia oukou, ua hiki ole ia’u ke noho hou i kumu no oukou, aole hoi i alii no oukou;

30 No ka mea, aia no e haalulu nui loa ana ko’u kino a puni i keia manawa, oiai au e hoao ana e olelo aku ia oukou; aka, ke kokua mai nei ka Haku ke Akua ia’u, a ua ae mai ia’u e olelo aku au ia oukou, a ua kauoha mai ia’u e hai aku au ia oukou i keia la, he alii a he luna ka’u keiki o Mosia, maluna iho o oukou.

31 [m 1, p 10] Ano, e ko’u poe hoahanau, ke makemake nei au e hana oukou me ka oukou i hana mua’i. Me ka oukou i malama’i i ka’u mau kauoha, a me na kauoha hoi a ko’u makuakane, a i hoopomaikaiia, a i hoopakeleia hoi i haule ole oukou iloko o na lima o ko oukou poe enemi, pela hoi ina e malama oukou i na kauoha a ka’u keiki, a i na kauoha a ke Akua, e haawiia auanei ia oukou e ia, e hoopomaikaiia oukou ma ka aina, aole no he mana ko oukou poe enemi maluna o oukou.

32 Aka, e ko’u poe kanaka, e malama o ala mai auanei na paio mawaena o oukou, a e haliu oukou e hoolohe i ka uhane ino, i oleloia mai ai e ko’u makuakane Mosia.

33 No ka mea, aia hoi, ua hookauia mai kahi poino maluna o ka mea nana e haliu e hoolohe i ua uhane la; no ka mea, ina e haliu oia e hoolohe ia ia la, a e noho a e make iloko o kona mau hewa, oia ke inu i ka hoohewaia o kona uhane iho; no ka mea, e loaa ana ia ia kekahi hoopai mau loa i uku nona, ua lawehala i ke kanawai o ke Akua, me ke ku e i kona ike iho.

34 Ke i aku nei au ia oukou, aole kekahi mea mawaena o oukou, o ka oukou mau keiki uuku wale no koe, i ao ole ia no keia mau mea; i ike ole ai he poe aie mau loa oukou i ko oukou makua i ka lani, e haawi aku ai ia ia i na mea a pau o oukou a me oukou pu kekahi, a i aoia hoi no na mooolelo i piha’i me na wanana i oleloia’i e na kaula hemolele, a hiki loa i ka wa a ko kakou kupuna kane a Lehi i haalele aku ai ia Ierusalema;

35 A me na mea a pau no hoi i olelo ia’i e ko kakou poe kupuna, a hiki i keia manawa. Aia hoi, olelo mai la hoi lakou i na mea i kauohaia mai ai ia lakou e ka Haku; nolaila, ua oiaio a pololei ia mau mea.

36 [m 1, p 11] Ano, ke i aku nei au ia oukou, e ko’u poe hoahanau, mahope iho o ko oukou ike ana a ao ana i keia mau mea a pau, ina e lawehala oukou, a e hele me ke ku e i ka mea i oleloia’i, i hoonee aku ai oukou ia oukou iho mai ka Uhane o ka Haku aku, i ole no kela kau wahi iloko o oukou e alakai ia oukou iloko o na alanui o ka naauao, i hoopomaikaiia oukou, i hoolakoia, a i hoolaia hoi,

37 Ke i aku nei au ia oukou, o ke kanaka e hana ana i keia, oia kekahi e kipi ana ma ke akea i ke Akua; nolaila, e haliu ana oia e hoolohe i ka uhane ino, a e lilo ana i enemi i ka pono a pau, nolaila, aole no ka Haku kau wahi iloko ona, no ka mea, aole oia e noho ana iloko o na luakini hemolele ole.

38 Nolaila, ina e mihi ole ana kela kanaka, a e noho ana, a e make ana i enemi i ke Akua, e hoala ana ke koi ana o ko ke Akua hoopai i kona uhane make ole i ka ike lea i kona hewa pohoi, a he mea keia e emi aku ai ia ia mai ke alo aku o ka Haku, a e hoopiha ai i kona naau me ka hewa, a me ka eha, a me ka walania loa, a ua like ia me ke ahi poi ole, nona na lapalapa e pii ae ana ia ao aku ia ao aku.

39 Ano, ke i aku nei au ia oukou, aole o ke aloha kuleana maluna o ua kanaka la; nolaila, o ka noho ma ka ehaeha pau ole ka hoopai hope ona.

40 [m 1, p 12] E, auhea oukou, e na elemakula a pau, a me oukou hoi, e na kanaka hou, a me oukou hoi, e na keiki uuku, ka poe i hiki ke hoomaopopo mai i ka’u mau olelo, (no ka mea, ua olelo akaka au ia oukou, i hiki ia oukou ke hoomaopopo,) ke noi nei au e ala oukou i ka hoomanao i ka noho weliweli ana o ka poe i haule iloko o ka hala;

41 A eia hoi, ua makemake au e noonoo oukou ma ka noho pomaikai a hauoli ana o ka poe i malama’i i na kauoha a ke Akua. No ka mea, aia hoi, ua hoopomaikaiia lakou ma na mea a pau, o ko ke kino a me ko ka uhane hoi; a ina e hoomau pono lakou a hiki i ka hopena, ua hookipaia aku lakou ma ka lani, i hiki ai ia lakou ke noho pu me ke Akua ma kekahi noho ana o ka pomaikai pau ole. E hoomanao, e hoomanao he oiaio keia mau mea; no ka mea, ua olelo mai ka Haku ke Akua ia mea.

1 [mokuna 1, paukū 13] A eia hou, e o’u poe hoahanau, ke makemake nei au e maliu mai oukou, no ka mea, he mau mea hou ka’u e olelo aku ai ia oukou: no ka mea, aia hoi, he mau mea ka’u e hai aku ai ia oukou, no na mea e hiki mai ana;

2 A o na mea a’u e hai aku ai ia oukou, ua hoikeia mai ia’u, e kekahi anela mai ke Akua mai. A i mai la oia ia’u, E ala; a ala ae la au, a aia, e ku ana oia imua o’u.

3 A i mai la oia ia’u, E ala, a e hoolohe mai i na olelo a’u e hai aku ai ia oe: no ka mea, ua hiki mai nei au e hai aku ia oe i na olelo olioli e hauoli nui ai.

4 No ka mea, ua lohe no ka Haku i kau mau pule, a ua hoopono mai i kou pono, a ua hoouna mai ia’u e hai ia oe i hauoli ai oe; a i hai aku ai oe i kou poe kanaka, i hoopihaia no hoi lakou me ka hauoli.

5 No ka mea, aia hoi, e hiki mai ana ka manawa, aole e liuliu aku ia, e iho mai mai ka lani mai me ka mana, ka Haku Mana kiekie loa, ka mea e noho alii ana, ka mea mamua, a eia hoi ano mai ia ao aku ia ao aku a mau loa aku, mawaena o na keiki a kanaka, a e noho iloko o kahi halllewa lepo, a e hele aku no mawaena o na kanaka, e hana ana i na hana mana nui, e like me ka hoola ana i na mea mai, e hoala ana i na mea make, e hoohele ana i na mea oopa, e haawi ana i ka ike i na mea makapo, a me ka lohe i na kuli, a e hoola ana i kela ano i keia ano o na mai;

6 A nana e mahiki aku ai i na daimonio, oia hoi na uhane ino e noho ana iloko o na naau o na keiki a kanaka.

7 Aia hoi, e loaa no ia ia na hoowalewale, a me ka eha o ke kino, ka pololi, ka makewai, a me ka luhi, e nui aku ana mamua o ka mea i hiki i ke kanaka ke hoomanawanui ai, ke make ole ia: no ka mea, aia hoi, e puka mai ana ke koko mai kela makalua keia makalua, pela ka nui o kona ehaeha no ka hewa a me na mea ino o kona poe kanaka.

8 [m 1, p 14] A e kapaia oia o Iesu Kristo, ke Keiki a ke Akua, ka Makua o ka lani a me ka honua, ka Mea nana i hana i na mea a pau, mai kinohi mai; a o kona makuwahine e kapaia oia o Maria.

9 Aia hoi, e hiki mai ana ia i kona poe iho, i hiki mai ai ke ola i na keiki a kanaka, ma o ka manaoio la ma kona inoa; a mahope iho o keia mau mea a pau, e manao nae lakou he kanaka ia, a e olelo aku he daimonio kona, a e hahau aku ia ia, a e kau aku ia ia ma ke kea.

10 A e alahou no oia i ke kolu o ka la mai ka make mai; aia hoi, e ku ana oia e hookolokolo i ko ke ao nei. A, aia hoi, ua hanaia keia mau mea a pau, i hiki mai ai ka hooponopono pololei maluna o na keiki a kanaka.

11 No ka mea, ke kala nei kona koko i na hewa o ka poe i haule ma o ka lawehala la o Adamu, ka poe i make, e ike ole ana i ka makemake o ke Akua no lakou, oia hoi ka poe i hana hewa me ka ike ole.

12 Aka, auwe, auwe ka mea e ike ana e kipi ana oia i ke Akua: no ka mea, aole e hiki mai ke ola i ka poe e like me ia, ma o ka mihi a me ka manaoio i ka Haku, ia Iesu Kristo wale no.

13 A ua hoouna mai ka Haku ke Akua i kana poe kaula hemolele mawaena o na keiki a pau a kanaka, e hai aku i keia mau mea i kela ohana i keia ohana, i ko kela aupuni i ko keia aupuni, a i kela olelo i keia olelo, i hiki i ka mea manaoio i ka hiki ana mai o Kristo, ke loaa ke kalaia’na o ko lakou mau hala, a e hauoli me ka olioli nui loa, me he mea la ua hiki mai oia ia wa mawaena o lakou.

14 Aka, ike mai la ka Haku ke Akua he poe kanaka ai oolea kona poe kanaka, a hookau mai la oia i kanawai, oia hoi ke kanawai o Mose.

15 A he nui na ouli, a me na mea kupanaha, a me na hoailona, a me na aka, ana i hoike mai ai ia lakou, no kona hiki ana mai; a olelo ae la no hoi na kaula hemolele ia lakou no kona hiki ana mai: aka hoopaakiki aku la nae lakou i ko lakou mau naau, a hoomaopopo ole he mea e pono ole ai ke kanawai o Mose, ke ole ma o ke kalahala ana la o kona koko;

16 A ina paha he mea e hiki ai i na keiki uuku ke hana hewa, aole e hiki ia lakou ke hoolaia; aka ke i aku nei au ia oe, ua pomaikai lakou; no ka mea, e like me ma o Adamu la, a ma ke ano maoli lakou i haule ai, pela no e kalahala’i ke koko o Kristo no ko lakou mau hewa.

17 [m 1, p 15] A eia hoi, ke i aku nei au ia oe, aole e haawiia mai kekahi inoa e ae, aole hoi kekahi ala e ae, aole hoi mea ma o na la e hiki ai ke ola i na keiki a kanaka, maloko a ma o ka inoa la wale no o Kristo, ka Haku Mana kiekie loa.

18 No ka mea, e hookolokolo ana oia, a ua pololei kona hooponopono ana, a e make ole ana ke keiki uuku, ka mea i make ma kona wa uuku; aka o na kanaka e inu ana lakou i ka hoohewaia o ko lakou uhane iho, ke hoohaahaa ole lakou ia lakou iho, a e lilo e like me na keiki uuku, a e manaoio aia no ke ola mamua, a i keia manawa, a e hiki mai ana, iloko a ma o ke koko kalahala la o Kristo, ka Haku Mana kiekie loa:

19 No ka mea, he enemi no ke kanaka ma kona ano maoli i ke Akua, a ua like pela, mai ka haule ana o Adamu mai, a pela aku ia ao aku ia ao aku a mau loa aku; aka, ina e ae aku oia i ke komo ana o ka Uhane Hemolele, a e waiho aku i ko ke kanaka ano maoli, a e lilo i mea hoano, ma o ke kalahala ana la o Kristo, ka Haku, a e lilo a like me he keiki la, e malama ana, e akahai, e haahaa, e ahonui, piha me ke aloha, e ae ana e noho malalo iho o na mea a pau a ka Haku i ike ai he pono ke hooili iho maluna ona, me he keiki la hoi e hoolohe ana i kona makuakane.

20 A eia hoi, ke i aku nei au ia oe, e hiki mai ana ka manawa, e hoolahaia’ku ka ike o ka Mea e ola’i mawaena o ko kela aina ko keia aina, a me na ohana, a me na olelo, a e na kanaka.

21 Aia hoi, a hiki mai ia manawa, aole e loaa hewa ole kekahi imua o ke Akua, koe nae na keiki uuku, eia wale no ma ka mihi a me ka manaoio ma ka inoa o ka Haku ke Akua Mana kiekie loa;

22 A i keia manawa hoi, ia oe e ao aku ai i kou poe kanaka i na mea a ka Haku ke Akua i kauoha mai ai ia oe, alaila hoi, e loaa hou ole lakou me ka hewa ole ma ka nana mai o ke Akua, ina aole ku like me na olelo a’u i olelo aku ai ia oe.

23 [m 1, p 16] Ano, ua olelo aku au i na olelo a ka Haku ke Akua i kauoha mai ai ia’u.

24 A penei wahi a ka Haku: E ku auanei ua mau olelo nei me he hoike huali la e ku e i keia poe kanaka, me ka la hookolokolo; no ia mea, e hookolokolo auanei lakou, o kela kanaka keia kanaka, e like me kana mau hana, ina paha he pono ia mau mea, a ina paha he hewa ia mau mea;

25 Ina he hewa ia mau mea, e waihoia’i lakou i ka ike weliweli i ko lakou hewa a hana ino ponoi, a he kumu ia e emi makau ai lakou mai ke alo aku o ka Haku, iloko o kahi o ka poino a me ka ehaeha pau ole, mai laila mai i hiki ole ai lakou ke hoi mai: nolaila, ua inu lakou i ka hoohewaia o ko lakou uhane iho.

26 Nolaila, ua inu lakou noloko mai o ke kiaha o ka inaina o ke Akua, ka mea i hiki ole ai i ka hoopono ke hoole ia lakou, e like me ka hiki ole ona ke hoole i ka haule ana o Adamu, no kona ai ana i ka hua i papaia; nolaila, aole o ke aloha kuleana hou maluna o lakou a mau loa aku.

27 A o ko lakou eha me he loko ahi la a me ke kukae pele ia, nona na lapalapa e pio ole ana, a nona ka uahi e punohu ana ia ao aku ia ao aku. Pela ka ka Haku i kauoha mai ai ia’u. Amene.

1 [mokuna 2, paukū 1] Ano, eia kekahi, i wa a ke Alii o Beniamina i hoopau aku ai i ka olelo ana i na olelo i haawiia mai ai ia ia, e ka anela o ka Haku, alawa ae la oia i kona mau maka a puni maluna o ka lehulehu o kanaka, a, aia hoi, ua haule iho lakou i ka honua, no ka mea, ua hiki mai ka makau o ka Haku maluna o lakou;

2 A ua nana lakou ia lakou iho ma ko lakou noho kino ana, he uuku loa mamua o ka lepo o ka honua. A hooho aku la lakou me ka leo hookahi, i ka i ana, E aloha mai, a e hoopili mai i ke koko kalahala o Kristo, i loaa mai ia makou ke kalaia’na o ko makou mau hala, a i hoomaemaeia’i i ko makou mau naau: no ka mea,a ke manaoio nei makou iloko o Iesu Kristo, ke Keiki a ke Akua, nana i hana mai i ka lani a me ka honua, a me na mea a pau: ka mea e iho mai ana mawaena o ua keiki a kanaka.

3 [m 2, p 2] Eia kekahi, mahope iho o ka lakou olelo ana i keia mau olelo, hiki mai la ka uhane o ka Haku maluna o lakou, a ua hoopihaia lakou me ka hauoli, me ke kalaia’na o ko lakou mau hala, a me ka mohala o ko lakou manao, no ka manaoio nui loa o lakou iloko o Iesu Kristo, ka mea e hele mai ana, e like me na olelo a ke Alii o Beniamina i olelo mai ai ia lakou.

4 A oaka hou ae la o Beniamina ke Alii i kona waha, a hoomaka ae la e olelo ia lakou, i ka i ana, E o’u poe hoaloha a me o’u poe hoahanau, o’u ohana a me o’u poe kanaka, ke makemake hou nei au e maliu mai oukou, i lohe oukou a i hoomaopopo i ke koena o ka’u mau olelo a’u e olelo aku ai ia oukou:

5 No ka mea, aia hoi, ina ua hoala mai ka ike o ka lokomaikai o ke Akua ia oukou i neia manawa e ike i ko oukou ole, a me ko oukou noho haule a maikai ole ana;

6 Ke i aku nei au ia oukou, ina ua hiki oukou i ka ike i ka lokomaikai o ke Akua, a me kona mana like ole, a me kona naauao, a me kona ahonui, a me kona hoomanawanui i na keiki a kanaka, a i ke kalahala hoi i hoomakaukauia mai mai ka hookumuia ana o ka honua nei, i hiki ke ola ma o ia mea la i ka mea e paulele ana i ka Haku, a e molowa ole ana ma ka malama ana i kana mau kauoha, a e hoomau ma ka manaoio a hiki i ka hopena o kona ola; ke pili nei ka’u i ke ola o ke kino make;

7 Ke i aku nei au, o keia no ke kanaka e loaa ana ke ola, ma o ke kalahala la i hoomakaukauia mai mai ka hookumuia ana o ke ao nei, no na kanaka a pau, ka poe i ola mahope mai o ka haule ana o Adamu, a e ola nei no hoi, a e ola ana paha ma neia hope aku, a hiki loa i ka hopena o ke ao nei;

8 A ma o keia mau mea la e hiki mai ana ke ola. Aole kekahi ola e ae, o keia wale no, ka mea i oleloia’i; aole hoi kekahi hana e ae ma o ia mea la i hiki i ke kanaka ke hoolaia, koe wale no ka hana a’u i hai aku ai ia oukou.

9 E manaoio i ke Akua; e manaoio ke ola la oia, a ua hana mai oia i na mea a pau, ma ka lani a ma ka honua no hoi; e manaoio nona ka naauao a pau, a me ka mana a pau, ma ka lani a ma ka honua no hoi; e manaoio hoi aole ke kanaka i hoomaopopo i na mea a pau i hiki ai ka Haku ke hoomaopopo.

10 [m 2, p 3] A eia hou: E manaoio he mea e pono ai ke mihi i ko oukou mau hewa, a e haalele aku ia mau mea a e hoohaahaa ia oukou iho imua o ke Akua; a e noi aku me ka oiaio o ka naau nana e kala mai ai ka oukou: ano, ina e manaoio oukou i keia mau mea a pau, e makaala oukou a e hana ia mau mea.

11 A ke i hou aku nei au ia oukou me au i i aku ai mamua, e like me ko oukou hiki ana i ka ike i ka nani o ke Akua, a ina ua ike oukou i kona lokomaikai, a i hoao aku ai i kona aloha, a i loaa’i ke kalaia’na o ko oukou mau hala, ka mea e hookomo ana i neia hauoli nui loa iloko o ko oukou mau naau, pela no au e makemake ai ia oukou e hoomanao, a e hoopaa naau i hoomanao mau ai, i ka nui o ke Akua, a me ko oukou ole, a i kona lokomaikai a hoomanawanui ia oukou ka poe pono ole, a e hoohaahaa ia oukou iho i haahaa loa, e kakhea ana i ka inoa o ka Haku i kela la i keia la, a e ku paa naueue ole ana ma ka manaoio i ka mea e hiki mai ana, i oleloia’i e ka waha o ka anela;

12 Aia hoi, ke i aku nei au ia oukou, ina e hana oukou i keia, e hauoli mau no oukou, a e hoopihaia me ke aloha i ke Akua, a e loaa ke kala mau ia’na o ko oukou mau hala; a e mahuahua aku oukou ma ka ike i ka nani o ka mea nana oukou i hana, a ma ka ike i ka mea i pololei a i oiaio hoi.

13 Aole hoi o oukou makemake e hana ino aku kekahi i kekahi, aka e noho maluhia, a e haawi aku i kela kanaka i keia kanaka, e like me ka mea ku pono ia ia.

14 Aole no oukou e ae aku i ka oukou mau keiki, e hele pololi lakou, a me ke kapa ole; aole hoi o oukou e ae aku e lawehala’i lakou i na kanawai o ke Akua, a e paio a e hakaka kekahi me kekahi, a e hookauwa na ka diabolo, oia no ka haku o ka hewa, oia hoi ka uhane ino i oleloia’i e ko kakou poe kupuna; he enemi ia i ka pono a pau;

15 Aka e ao aku no oukou ia lakou e hele ma na aoao o ka oiaio a me ke kuoo; e ao aku no oukou ia lakou e aloha aku i kekahi i kekahi, a e kokua aku i kekahi i kekahi;

16 A o oukou iho no kekahi e kokua aku no i ka poe i ku pono e kokuaia’ku ai e oukou; e manawlea aku oukou i ko oukou waiwai i ka mea nele; aole no oukou e ae aku i ka mea ilihune e noi mai ia oukou me ka loaa ole aku, a e hookuke aku ia ia e make.

17 Malia paha e i mai oe, Ua hooili ae la ke kanaka i kona poino maluna ona iho, nolaila, e aua au i kuu lima, aole au e haawi aku i ka’u ai ia ia, aole hoi au e manawalea aku ia ia i ko’u waiwai, i ole ai e pilikia oia, no ka mea, ua pono kona hoopaiia ana.

18 Aka ke i aku nei au ia oe, e ke kanaka, o ka mea e hana ana i keia, he kumu nui kona e mihi ai; a ke mihi ole oia i ka mea ana i hana’i, e make mau loa ana oia, a, aole ona kuleana ma ke Akua.

19 [m 2, p 4] No ka mea, aia hoi, aole anei he poe noi kakou a pau? Aole anei kakou a pau e hilinai ana maluna o ka mea hookahi, oia ke Akua, no ka lako a pau a kakou i loaa’i; no ka ai a me ke kapa, a no ke gula, a no ke kala, a no ka waiwai a pau a kakou i loaa’i o kela ano keia ano?

20 Aia hoi, ma keia manawa hoi, e kahea ana oukou i kona inoa, a e noi ana no ke kalaia’na o ko oukou mau hala. A ua ae mai anei oia i noi aku oukou me ka make hewa? Aole; ua ninini mai la oia i kona uhane maluna o oukou, a ua hoopiha mai la i ko oukou mau naau me ka hauoli, a ua papani mai i ko oukou mau waha, i hiki ole ia oukou ke ekemu, no ka nui loa o ko oukou hauoli.

21 Ano, ina o ke Akua, nana i hana mai ia oukou, maluna ona oukou e hilinai nei no ko oukou ola, a no na mea a pau a oukou i loaa’i a me oukou no hoi, ke haawi mai nei ia oukou i ka mea i pono a oukou i noi aku ai, me ka manaoio, e manaoio ana i ka loaa ana, E, aole anei e pono no oukou ke manawalea aku i ka waiwai a oukou i loaa’i, kekahi i kekahi?

22 A ina e hookolokolo oukou i ke kanaka nana e noi ia oukou no ko oukou waiwai, i make ole oia, a e hoohewa aku ia ia, e nui aku ana ka pono o ko oukou hoohewaia’na, no ko oukou aua ana i ko oukou waiwai, ka mea aole na oukou, aka na ke Akua, ka mea nana no hoi ko oukou ola; a, aole nae oe i pule aku, aole hoi mihi i ka mea au i hana’i.

23 Ke i aku nei au ia oukou, auwe kela kanaka, no ka mea, e make pu kona waiwai me ia; ano, ke i aku nei au i keia mau mea i ka poe i waiwai, mamuli o na mea o keia ao.

24 A eia hou, ke i aku nei au i ka poe hune, ka poe i nele i ka lako nui, aka i lako nae i ke ola no oukou mai kekahi la aku i kekahi la; ke olelo nei au no oukou a pau ka poe e hoole ana i ka mea noi, no ka nele o oukou; ke makemake nei au e nalu iho oukou iloko o ko oukou mau naau, ke haawi ole nei au no kuu nele; aka ina he lako wau, ina ua haawi aku au.

25 Ano, ina e nalu iho oukou i keia iloko o ko oukou mau naau, ua hewa ole oukou, a i ole ia, ua hoohewaia oukou, a ua pono ko oukou hoohewaia ana: no ka mea, ke kuko nei oukou i ka mea a oukou i loaa ole ai.

26 [m 2, p 5] Ano, no ka pomaikai o keia mau mea a’u i olelo aku ai ia oukou; oia hoi, no ka pomaikai o ka loaa ana ke kalaia’na o ko oukou mau hala ia la aku ia la aku, i hele hewa ole oukou imua o ke Akua. Ke makemake nei au e manawalea aku oukou i ko oukou waiwai i ka poe ilihune, o kela kanaka keia kanaka e like me ka mea i loaa ia ia, me neia, e hanai ana i ka poe pololi, e hoaahu ana i ka poe kapa ole, a hele ana e ike i na mai, e kokua ana i maha lakou, ma ko ka uhane a ma ko ke kino, e like me ko lakou nele,

27 A e ike e hanaia keia mau mea a pau ma ka naauao a me ka pololei: no ka mea, aole he mea e pono ai no ke kanaka e holo kiki mamua o kona ikaika. A eia hou: He mea e pono ai ke ikaika oia, i hiki ia ia ma ia mea ke loaa ka uku; nolaila, e hanaia na mea a pau ma ka pololei e pono ai.

28 A ke makemake nei au e hoomanao oukou, o ka mea mawaena o oukou e noi lilo ole ana i kona hoalauna, he mea pono ke hoihoi hou aku oia i kona mea i noi lilo ole ai, e like me kana olelo, a i ole ia, e hana hewa ana oe, a malia paha e lilo oe i kumu no kou hoalauna e hana hewa ai no hoi.

29 A eia ka hope, ua hiki ole ia’u ke hai aku ia oukou i na mea a pau e hewa’i oukou: no ka mea, ua nui loa na aoao a me na kumu, a no ka nui ua hiki ole ia’u ke helu ia mau mea.

30 Aka o keia ua hiki ia’u ke hai ia oukou, ina aole oukou e kiai ia oukou iho, a me ko oukou mau manao, a i ka oukou mau olelo, a me ka oukou mau hana, a e malama i na kauoha a ke Akua, a e hoomau ma ka manaoio a oukou i lohe ai no ka hiki ana mai o ko kakou Haku, a hiki loa i ka hopena o ko oukou mau ola, e make io no oukou. Ano, e ke kanaka, e hoomanao, a e make ole ai.

1 [mokuna 3, paukū 1] Ano, eia kekahi, i ka wa a ke Alii o Beniamina i olelo aku ai pela i kona poe kanaka, hoouna aku la oia iwaena o lakou, e makemake ana e ike no kona poe kanaka mai, ina ua manaoio lakou i na olelo ana i olelo aku ai ia lakou.

2 A hooho aku la lakou me ka leo hookahi, i ka i ana, Ae, ke manaoio nei makou i na olelo a pau au i olelo mai ai ia makou; a ua ike makou no ke ku paa a oiaio o ia mau mea, na ka Uhane o ka Haku Mana kiekie loa, i hoololi mana mai i koloko o makou, oia hoi ko makou naau, i ole makou makemake hou e hana ino, aka e hana mau i ka pono.

3 A o makou hoi, ma o ka lokomaikai mana loa la o ke Akua, a me na hoikeana o kona uhane, ua loaa ia makou iho ka ike nui i na mea e hiki mai ana; a ina he mea e pono ai, ua hiki ia makou ke wanana aku no na mea a pau.

4 A o ka manaoio a makou i loaa’i no na mea a ko makou Alii i olelo mai ai ia makou, oia ka i lawe mai ia makou i keia ike nui, ma ia mea ke hauoli nei makou me keia olioli nui loa;

5 A ke ae aku nei makou e komo iloko o kahi berita me ko makou Akua, e hana i kona makemake, a e hoolohe i kana mau kauoha, ma na mea a pau ana i kauoha mai ai ia makou, i ke koena a pau o ko makou mau la, i ole ai makou e hooili mai maluna o makou iho i ka ehaeha pau ole, me ia i oleloia’i e ka anela, i ole makou e inu noloko mai o ke kiaha o ka inaina o ke Akua.

6 [m 3, p 2] Ano, o keia no na olelo a ke Alii o Beniamina i makemake ai ia lakou; a nolaila i aku la oia ia lakou, Ua olelo mai oukou i na olelo a’u i makemake ai; a o ka berita a oukou i hana’i, he berita pono ia.

7 Ano, no keia berita a oukou i hana’i, e kapaia oukou na keiki a Kristo, o kana poe keikikane, a me kana poe kaikamahine: no ka mea, aia hoi, i keia la ua hanau mai oia ia oukou ma ka uhane; no ka mea, ke i mai nei oukou ua hoano e ia mai ko oukou mau naau ma o ka manaoio la i kona inoa; nolaila, ua hanauia mai oukou nana, a ua lilo oukou i poe keikikane a i poe kaikamahine nana.

8 A malalo iho o keia inoa, ua hookuuia mai oukou; aohe e hiki ia oukou ke hookuuia’e ma o kekahi inoa e ae la. Aohe e haawiia mai kekahi inoa e ae, ma o na la e hiki mai ai ke ola; nolaila, ke makemake nei au ia oukou e lawe maluna o oukou i ka inoa o Kristo, e ka poe a pau i komo iloko o ka berita me ke Akua, e hoolohe oukou a hiki i ka hopena o ko oukou mau ola.

9 A e hiki mai keia, o ka mea e hana i keia, e loaa no auanei oia ma ka lima akau o ke Akua, no ka mea, e ike no oia i ka inoa ona i kapaia mai ai: no ka mea, e kapaia oia ma ka inoa o Kristo.

10 [m 3, p 3] Ano, e hiki mai keia, o ka mea e lawe ole maluna one i ka inoa o Kristo, e kapaia no oia ma kekahi inoa e ae; nolaila, e loaa ana oia ia ia iho ma ka lima hema o ke Akua.

11 A ke makemake nei au e hoomanao hoi oukou, o keia no ka inoa a’u i olelo aku ai e haawi ana au ia oukou, e holoi ole ia’na a mau loa aku ke lawehala ole; nolaila, e malama oukou i lawehala ole ai, i holoi ole ia keia inoa mai ko oukou mau naau aku.

12 Ke i aku nei au ia oukou, ke makemake nei au e hoomanao oukou e hoopaa i ka inoa i kakau mau ia ma ko oukou mau naau, i ole ai i loaa oukou ma ka lima hema o ke Akua, aka i lohe oukou a i ike i ka leo o oukou e kaheaia mai ai, a i ka inoa hoi ana e kapa mai ai ia oukou:

13 No ka mea, pehea la i ike ai kahi kanaka i ka haku ana i hookauwa ole aku ai, a he malihini hoi ia ia, a i mamao aku mai na manao a me na makemake o kona naau aku?

14 A eia hou, ke lawe nei anei kekahi kanaka i kahi hoki o kona hoalauna, a malama ia ia? Ke i aku nei au ia oukou, Aole; aole hoi oia e ae aku e ai ia mawaena o kona mau pua holoholona, aka e hooemu aku no ia ia, a e hookuke aku ia ia mawaho. Ke i aku nei au ia oukou, pela no ia auanei mawaena o oukou, ina aole oukou e ike i ka inoa o oukou i kapaia mai ai.

15 Nolaila, ke makemake nei au e kupaa a e naueue ole oukou, e lawa mau ana ma na hana maikai, i sila’i o Kristo, ka Haku ke Akua Mana kiekie loa, ia oukou nona, i laweia’i oukou i ka lani, i loaa ia oukou ka hoolaia a me ke ola mau loa, ma o ka naauao la, a me ka mana, a me ka hoopono, a me ke aloha ona, nana i hana i na mea a pau, ma ka lani a ma ka honua, oia no ke Akua maluna o na mea a pau. Amene.

1 [mokuna 4, paukū 1] Ano, manao iho la o ke Alii o Beniamina he mea e pono ai, mahope iho o ka hoopau ana o ka olelo i na kanaka, nana e lawe i na inoa o ka poe a pau i komo iloko o ka berita me ke Akua, e malama i kana kauoha.

2 Eia kekahi, aole kekahi mea i komo ole iloko o ka berita, a i lawe ole maluna o lakou i ka inoa o Kristo, o na keiki uuku wale no i koe.

3 A eia hou kekahi; i ka wa a ke Alii o Beniamina i hoopau ai i keia mau mea a pau, a ua hoolaa i kana keiki ia Mosia, i luna a i alii maluna o kona poe kanaka, a i haawi aku ia ia i na kauoha a pau no ke aupuni, a i wae ai no hoi i na kahuna e ao aku i na kanaka, i hiki ia lakou ke hoolohe a ke ike i na kauoha a ke Akua, a e hooeueu ia lakou e hoomanao i ka hoohiki a lakou i hana’i, hookuu ae la oia i na kanaka, a hoi aku la lakou, kela mea keia mea e like me ko lakou mau ohana, i ko lakou mau hale iho.

4 [m 4, p 2] A hoomaka ae la o Mosia e noho alii ma ko kona makuakane hakahaka. A hoomaka ae la oia e noho alii ma kona makahiki kanakolu, ina hui pu ia a pau loa, kokoke eha haneri kahahikukumamaono makahiki mai ka wa a Lehi i haalele ai ia Ierusalema.

6 A eia kekahi, hele aku la o ke Alii, o Mosia, ma na aoao o ka Haku, a ua hoolohe oia i kana mau olelo ku paa, a me kona mau kanawai, a ua malama i kana mau kauoha, ma na mea a pau ana i kauoha mai ai ia ia.

7 [m 4, p 3] A kauoha ae la ke Alii o Mosia i kona poe kanaka e mahiai lakou i ka honua. A ua mahiai oia no hoi i ka honua, i hiki ia ia ma ia mea ke lilo i mea hookaumaha ole i kona poe kanaka, i hiki ia ia ke hana mamuli o ka mea a kona makuakane i hana’i, ma na mea a pau. A ua paio ole mawaena o kona poe kanaka a pau, no na makahiki ekolu.

1 mokuna 5, paukū 1] Ano, eia kekahi, mahope iho o ka loaa ana i ke Alii Mosia ka maluhia mau, no na makahiki ekolu, ua makemake oia e ike no na kanaka i pii ai i ka aina o Lehi-Nepai, oia hoi i ke kulanakauhale o Lehi-Nepai: no ka mea, aole kona poe kanaka i lohe i kekahi mea no lakou, mai ka wa a lakou i haalele ai i ka aina o Zarahemela; nolaila, hooluhi aku lakou ia ia me ko lakou noi nui ana.

2 [m 5, p 2] Eia kekahi, ae aku la ke ’Lii Mosia i na kanaka he umikumamaono o ko lakou poe kanaka ikaika e pii aku i ka aina o Lehi-Nepai, e imi no ko lakou poe hoahanau.

3 Eia hoi kekahi ia la ae, ala ae la lakou e pii aku a aia pu me lakou kekahi mea i kapaia o Amona, a he kanaka ikaika a mana hoi ia, a he mamo ia na Zarahemela; a o ko lakou luna hoi ia.

4 Ano, aole o lakou i ike i ke ala a lakou e hele aku ai ma ka waonahele, e pii aku i ka aina o Lehi-Nepai: nolaila, auwana lakou i na la he nui ma ka waonahele, he oiaio, i hookahi kanaha la ko lakou auwana ana.

5 A ia lakou i auwana’i i na la he kanaha, hiki aku la lakou i kahi puu, aia no ia ma ka akau o ka aina o Sailoma, a malaila lakou i kukulu ai i ko lakou mau halelewa.

6 A lawe aku la o Amona i na hoahanau ekolu ona, o Amaleki, o Helema, a me Hema ko lakou mau inoa, a iho aku la lakou iloko o ka aina o Nepai;

7 A, aia hoi, halawai ae la lakou me ke Alii o ka poe kanaka, i noho ai ma ka aina o Nepai, a ma ka aina o Sailoma; a ua hoopuniia lakou e ko ke ’Lii poe koa, a hopuia, a nakinakiia, a hahaoia iloko o ka halepaahao.

8 A eia kekahi, ia lakou i noho ai ma ka halepaahao i elua la, ua lawe hou ia lakou imua o ke Alii, a weheia’e la ko lakou mau mea i paa ai; a ku ae la lakou imua o ke Alii, a ua aeia, e aho ke olelo ua kauohaia lakou, e pane aku i na niele ana e ninau mai ai ia lakou.

9 A i aku la oia ia lakou, aia hoi, Owau no o Limai, ke keiki a Noa, oia ke keiki a Zenifa, ka mea i pii mai ai mailoko mai o Zarahemela e loaa keia aina, o ka aina ia o ko lakou poe kupuna, a i hooliloia mai i Alii e ka leo o na kanaka.

10 Ano, ke makemake nei au e ike i ke kumu o ko oukou aa ana e hookokoke mai i na pa o ke kulanakauhale, oiai au me ko’u poe koa, mawaho o ka puka?

11 Ano, no keia mea ua ae aku au e hoolaia oukou, i hiki ia’u ke ninau aku ia oukou, i ole keia ua ae aku au i ko’u poe koa e pepehi ia oukou a make. Ua aeia oukou e olelo mai.

12 [m 5, p 3] Ano, ia Amona i ike ai ua aeia mai oia e olelo, hele aku la ia a kulou iho la imua o ke Alii; a i ke ala ana’e i aku la oia, E ke Alii, ke aloha nui aku nei au imua o ke Akua i keia la, no ko’u ola ana i keia manawa, a i aeia mai au e olelo; a e hoao no au e olelo me ka wiwo ole:

13 No ka mea, ua ike paka au ina ua ike mai oukou ia’u, aole oe i ae mai ia’u e hele me keia mau mea i paa ai. No ka mea, owau no o Amona, a he mamo no na Zarahemela, a ua pii mai nei au mai ka aina o Zarahemela mai, e imi i ko makou poe hoahanau, a Zenifa i lawe mai ai mailoko mai o kela aina.

14 [m 5, p 4] Ano, eia kekahi, mahope iho o ko Limai lohe ana i na olelo a Amona, ua olioli nui loa ia, a i mai la, Ano, ua ike oiaio au e ola ana i keia manawa, ko’u poe hoahanau, ka poe i noho ai ma ka aina o Zarahemela. Ano, e hauoli no au; a i ka la apopo, e hoohauoli au i ko’u poe kanaka.

15 No ka mea, aia hoi, ua hooluhiia mai makou e ko Lamana poe, a ua auhauia mai i kekahi auhau kaumaha e hali ai. A, ano hoi, e hoopakele mai no ko makou poe hoahanau ia makou mailoko mai o ko makou luhi, a mailoko aku o na lima o ko Lamana poe, a e lilo makou i poe kauwa na lakou: no ka mea, ua maikai loa ko makou lilo ana i poe kauwa na ko Nepai poe, mamua o ka hookupu ana’ku i ka waiwai i ke Alii o ko Lamana poe.

16 [m 5, p 5] Ano, kauoha aku la ke Alii, o Limai, i kona poe koa mai nakiikii hou lakou ia Amona, aole hoi i kona mau hoahanau, aka, kena aku la ia lakou e hele i ka puu ma ka akau o Sailoma, a e lawe mai i ko lakou poe hoahanau iloko o ke kulanakauhale, e hiki ia lakou ke ai, a ke inu, a ke hoomaha ia lakou iho i ka luhi o ko lakou hele ana; no ka mea, ua loaa ia lakou na mea he nui wale: ua loaa ia lakou ka pololi, ka makewai, a ma ka luhi.

17 [m 5, p 6] Ano, eia kekahi ia la ae, hoouna ae la ke Alii, o Limai, i olelo hoolaha mawaena o kona poe kanaka a pau, e hiki ia lakou ke hoakoakoa ia lakou iho i ka luakini, e hoolohe i na olelo ana e olelo aku ai ia lakou.

18 A eia kekahi, ia lakou i hoakoakoa mai ai, olelo aku la oia ia lakou peneia, i ka i ana, E, auhea oukou, e ko’u poe kanaka, e ea mai oukou i ko oukou mau poo a e hooluoluia: no ka mea, aia hoi, ua kokoke mai ka manawa, aole loihi aku, ia kakou e noho hou ole ai malalo iho o ko kakou poe enemi, me ka nui loa nae o ko kakou aumeume ana me ka make hewa; aka, ke manaolana nei au ke koe nei i hookahi aumeume ikaika ku pono e hanaia.

19 Nolaila, e ea mai oukou i ko oukou mau poo, a e hauoli, a e paulele aku i ke Akua, i kela Akua oia no ke Akua o Aberahama, a o Isaaka, a me Iakoba; A i ua Akua la nana i lawe mai i na mamo a Iseraela mailoko mai o ka aina o Aigupita, a i hoohele ia lakou mawaena o ke Kaiula ma ka aina maloo, a i hanai mai ia lakou i ka mane, i make ole lakou ma ka waonahele; a he nui na mea e ae ana i hana mai ai no lakou.

20 A eia hou: Ua lawe mai la ua Akua hookahi la i ko kakou poe kupuna mailoko mai o ka aina o Ierusalema, a ua malama a ua hoola mai i kona poe kanaka, a hiki loa ia nei. A, aia hoi, no ka kakou hana hewa a me na hana ino, kona lawe ana mai ia kakou iloko o ka hana luhi.

21 A he poe hoike oukou a pau i keia la, o Zenifa, ka mea i hooliloia i Alii maluna o keia poe kanaka, ua makemake ikaika loa oia e loa ka aina o kona poe kupuna, nolaila, i hoopunipuniia’i e ke akamai a me ka maalea o ke Alii Lamana, nana i hana i ke kuikahi me ke Alii Zenifa, a ua haawi mai la ma na lima ona i na okana o kekahi hapa o ka aina, oia no ke kulanakauhale o Lehi-Nepai, a me ke kulanakauhale o Sailoma; a me ka aina a punu;

22 A ua hana oia i keia a pau, me ka manao nui e lawe aku i keia lahuikanaka malalo iho ona, a iloko o ka noho luhi ana. A, aia hoi, ke hookupu aku nei kakou i ka waiwai i ke Alii o ko Lamana poe, i ka hapalua o ko kakou kurina, a me ko kakou bale, a me ko kakou hua liilii a pau, o kela ano o keia ano, a me ka hapalua o ka mahuahua o ko kakou mau pua, a me ko kakou mau ohana holoholona; he oiaio, i ka hapalua hoi o na mea a pau a kakou i loaa’i, oia ka ke Alii o ko Lamana poe e kii mai nei, a i ole ia, i ko kakou ola.

23 Ano, aole anei keia he mea kaumaha e hali ai? A, aole anei he nui ko kakou popilikia nei? Ano hoi, he kumu nui ko kakou e kaniuhu ai.

24 [m 5, p 7] He oiaio, ke i aku nei au ia oukou, ua nui ko kakou mau kumu e kaniuhu ai: no ka mea, aia hoi, he nui loa o ko kakou poe hoahanau ka i pepehiia, a i hookahe wale ia ko lakou koko, a o keia a pau no ka hewa.

25 No ka mea, ina aole o keia poe kanaka i haule iloko o ka hala, ina ua ae ole mai ka Haku i ili mai ai keia ino nui maluna o lakou. Aka hoi, aole o lakou i hoolohe i kana mau olelo; aka, ala ae la na paio mawaena o lakou, a no ia mea hookahe ae la lakou i ke koko mawaena o lakou iho.

26 A ua pepehi aku la lakou i kekahi kaula a ka Haku; he oiaio, he kanaka waeia e ke Akua, nana i hai ae la ia lakou i ka lakou mau hana hewa a hana ino, a wanana mai la no na mea he nui e hiki mai ana, he oiaio, no ka hiki ana mai o Kristo.

27 A no kana i ana’e ia lakou, o Kristo no ka Akua, ka Makua o na mea a pau, a i aku la hoi nana e lawe maluna iho ona i ke ano o kanaka, a o ke ano ia o ke kanaka i hanaia’i i kinohi; oia hoi, i aku la oia ua hanaia ke kanaka mamuli o ke ano o ke Akua, a e iho mai auanei ke Akua mawena o na keiki a kanaka, a e lawe maluna iho ona i ka io a me ke koko, a e hele aku ma ka ili o ka honua;

28 Ano, no kana olelo ana i keia, pephi ae la lakou ia ia a make; a he nui na mea e ae a lakou i hana’i, i lawe mai ai ilalo nei i ka inaina o ke Akua maluna iho o lakou. Nolaila, owai la ka mea e kahaha ana no ko lakou noho luhi ana, a no ko lakou hanauia’na me na popilikia eha?

29 No ka mea, aia hoi, ua i mai la ka Haku, Aole au e kokua aku i ko’u poe kanaka i ka la o ko lakou lawehala ana; aka e keakea aku no au i ko lakou mau ala, i pomaikai ole lakou; a e lilo ka lakou mau hana me he mea hina la imua o lakou.

30 A eia hou, ke i mai nei oia, Ina e lulu aku ko’u poe kanaka i ka paumaele, e ohi auanei lakou i ka opala ona, ma ka puahiohio; a o ka hope ona, o ka awaawa make no ia.

31 A eia hou, ke i mai nei oia, Ina e lulu aku ko’u poe kanaka i ka paumaele, e ohi no auanei lakou i ka makani hikina, ka mea e lawe mai ana i ka make koke.

33 Aka ina e huli ae oukou i ka Haku me ka manao ikaika o ka naau, a e paulele aku ia ia, a e hookauwa aku nana me ka molowa ole o ka manao: ina e hana oukou i keia, nana no, e like me kona makemake a oluolu iho, e hoopakele mai ia oukou mailoko mai o ka noho luhi ana.

1 [mokuna 5, paukū 8] Eia kekahi, mahope iho o ka pau ana o ka ke Alii Limai olelo ana i kona poe kanaka, no ka mea, olelo aku la oia i na mea he nui wale ia lakou, a he kakaikahi wale no ia mau mea ka’u i kaku ai ma keia buke,—hai aku la oia i kona poe kanaka i na mea a pau no ko lakou poe hoahanau, ma ka aina o Zarahemela;

2 A hooku ae la oia ia Amona imua o ka ahakanaka, nana e hai aku ia lakou i na mea a pau a ko lakou poe hoahanau i loaa mai ai, mai ka wa a Zenifa i pii mai ai mailoko mai o ka aina, a hiki i kona wa i pii mai ai mailoko mai o ka aina.

3 A hai aku la hoi oia ia lakou i na olelo hope a ke Alii Beniamina i ao mai ai ia lakou, a wehewehe aku la ia mau mea i na kanaka o ke Alii Limai, i hiki ia lakou ke hoomaopopo i na olelo a pau ana i olelo mai.

4 A eia kekahi, mahope iho o kana hana ana i keia a pau, hookuu ae la o ke Alii Limai i ka ahakanaka, a kauoha ae la e hoi aku lakou, o kela mea keia mea i kona hale iho.

5 [m 5, p 9] Eia kekahi, kauoha ae la oia e laweia mai na papa, kahi i kakauia’i ka mooolelo o kona poe kanaka, mai ka manawa a lakou i haalele aku ai i ka aina o Zarahemela, imua o Amona, nana e heluhelu ia mau mea.

6 Ano, ia Amona i heluhelu ai i ka mooolelo, ninau mai la ke Alii ia ia, e ike ina ua hiki paha ia ia ke unuhi i na olelo. A hai aku la o Amona ia ia ua hiki ole ia ia.

7 A i mai la ke Alii ia ia, Ua kaumaha iho la au no na pilikia o ko’u poe kanaka, a hoouna aku la au i hookahi kanaka a me na mea keu ekolu o ko’u poe kanaka, e hele aku iloko o ka waonahele, e hiki ia lakou ma ia mea ke loaa ka aina o Zarahemela; i hiki ia makou ke hoopii i ko makou poe huahanau e hoopakele mai ia makou, mailoko aku o ka noho luhi ana;

8 A ua hili lakou ma ka waonahele, no na la he nui wale, aka ua molowa ole lakou, aole nae i loaa ka aina o Zarahemela, aka hoi hou mai la i keia aina, ua hele aku la ma kahi aina mawaena o na wai nui wale; ua loaa kahi aina i uhiia me na iwi o na kanaka, ao na holoholona, a pela aku, a ua uhiia me na koena o na hale o kela ano o keia ano: ua loaa kekahi aina i hoopiha e ia mamua me kekahi poe kanaka i kinikini e like me na lehulehu o ka Iseraela.

9 A i mea e hoike ai he mau mea oiaio ka lakou i olelo mai ai, ua lawe mai lakou i na papa he iwakaluakumamaha, i hoopihaia me na kaha; a he gula maemae ia mau mea.

10 Aia hoi, ua lawe mai hoi lakou i na pale umauma, a ua nunui; a he keleawe melemele, a me ke kekawe ulaula ia mau mea, a, aohe kina iki.

11 A eia hou, ua lawe mai lakou i na pahikaua, ua popopo na au o ia mau mea, a ua hoinoia hoi na pahi me ke kukae; aole kekahi mea ma ka aina i hiki ke unuhi mai i ka olelo a me na kaha maluna o na papa. Nolaila, i aku ai au ia oe, E hiki anei ia oe ke unuhi?

12 A ke i hou aku nei au ia oe, ke ike nei anei oe i kekahi mea e hiki ke unuhi? No ka mea, ua makemake au e unuhiia keia mau mooolelo iloko o ka kakou olelo. No ka mea, malia paha e haawi mai no ia mau mea i ka ike, no kekahi koena o keia poe kanaka i lukuia, mai ia lakou mai keia mau mooolelo; a i ole ia, e haawi mai paha ia mau mea i ka ike no keia poe kanaka iho, ka poe i lukuia; a ua makemake au e ike i ke kumu o ko lakou lukuia’na.

13 [m 5, p 10] Ano, i aku la o Amona ia ia, ua hiki io ia’u ke hai aku ia oe, e ke Alii, no kekahi kanaka i hiki ke unuhi i na mooolelo; no ka mea, nona na mea i hiki ai ia ia ke nana, a ke unuhi i na mooolelo a pau o ka wa kahiko: a he haawina ia mai ke Akua mai. A ua kapaia keia mau mea he mau mea unuhi olelo: aole e hiki i kekahi kanaka ke nana iloko o laua, ke kauoha ole ia oia, o nana oia no ka mea e pono ole ai ia ia, a e make oia. A o ka mea i kauohaia mai e nana iloko o laua, ua kapaia oie, He mea nana-Urima.

14 Aia hoi, o ke Alii o na kanaka ma ka aina o Zarahemela, oia no ke kanaka i kauohaia e hana i keia mau mea, a nana keia haawina kiekie mai ke Akua mai.

16 A i aku la o Amona, O ka mea nana-Urima he mea hoike oia, a he kaula hoi: aole e hiki i ke kanaka, ke loaa ka haawina nui ae, ke ole loaa ia ia ka mana o ke Akua, ka mea e hiki ole ai i ke kanaka; aka e hiki no i ke kanaka ke loaa ka mana nui e haawiia mai ia ia mai ke Akua mai.

17 Aka o ka mea nana-Urima ua hiki ia ia ke ike i na mea i hala, a i na mea hoi e hiki mai ana; a ma o lakou la e hoikeia mai na mea a pau, e aho e olelo, e hoikeia mai na mea huna, a e puka mai i ka malamalama na mea nalo, a o na mea i ike ole ia, e hoikeia mai auanei e lakou; a e hoikeia mai no hoi na mea e lakou, aole e hiki ke ikeia ke ole lakou.

18 Pela ke Akua i hoomakaukau ai i ala i hiki i ke kanaka, ma o ka manaoio la, ke hana i na hana mana nui: nolaila, e lilo ana oia i mea e pomaikai nui ai i kona poe hoa noho.

19 [m 5, p 11] Ano, ia Amona i hoopau ai i ka olelo ana i keia mau olelo, hauoli nui loa iho la ke Alii, a hoalohaloha aku la i ke Akua, me ka i ana, He oiaio no paha, aia no he mea pohihihi nui iloko o neia mau papa; a he oiaio no, ua hoomakaukauia keia mau mea unuhi olelo no ka wehewehe ana i na mea pohihihi a pau me neia i na keiki a kanaka.

20 E! kupanaha na hana a ka Haku, a loihi kona hoomanawanui ana me kona poe kanaka; he oiaio, nui ka makapo a me ka paakiki o ka hoomaopopo o na keiki a kanaka: no ka mea, aole o lakou e imi i ka naauao, aole hoi lakou e makemake e noho alii oia maluna o lakou.

21 He oiaio, ua like lakou me he pua hihiu la, e mahuka ana mai ke kahu hipa aku, a e hele liilii ana, a i hoaia, a i aiia e na holoholona o ka ululaau.

Ka Mooolelo a Zenifa – He mooolelo o kona poe kanaka, mai ka wa a lakou i haalele aku ai i ka aina o Zarahemela, a hiki i ka wa i hoopakeleia’i lakou mailoko aku o na lima o ko Lamana poe.

1 [mokuna 6, paukū 1] Owau, o Zenifa, ua aoia au ma ka olelo a pau a ko Nepai poe, a ua loaa e ia’u ka ike no ka aina o Nepai, o ka aina hooilina mau o ko makou poe kupuna, a ua hoounaia au me he kiu la mawaena o ko Lamana poe, na’u e hoomaka’kiu i ko lakou poe koa, i hiki i ko makou poe koa ke lele maluna o lakou a e luku aku ia lakou; aka ia’u i ike ai i ka mea pono mawaena o lakou, ua makemake au e pepehi ole ia lakou;

2 Nolaila, paio aku la au me ko’u poe hoahanau ma ke waonahele; no ka mea, ua makemake au i ka luna o makou e hana i kuikahi me lakou. Aka he kanaka makona a puni koko no oia, kauoha mai la ia e pepehiia au; aka ua hoopakeleia au ma ka hookahe nui ia’na i ke koko: no ka mea, kaua aku la ka makuakane i ka makuakane, a me ka hoahanau i ka hoahanau, a, lukuia ka nui o ko makou poe koa ma ka waonahele; a hoi hou aku la makou, ka poe o makou i hookoeia, i ka aina o Zarahemela, e hai aku ia mooolelo i ka lakou poe wahine, a me ka lakou poe keiki.

3 Aka ua makemake ikaika loa nae au e loaa ka aina o ko makou poe kupuna, a houluulu ae la au i na mea a pau e makemake ana e pii aku e loaa ka aina, a hele hou aku la ma ko makou hele ana ma ka waonahele, e pii aku i ka aina; aka ua hahauia mai makou me ka wi a me na popilikia eha: no ka mea, ua lohi makou e hoomanao i ka Haku ko makou Akua.

4 Aka hoi, mahope iho o ka auwana ana i na la he nui ma ka waonahele, kukulu aku la makou i ko makou mau halelewa ma kahi o ko makou poe hoahanau i pepehiia’i, a ua kokoke ia i ka aina o ko makou poe kupuna.

5 [m 6, p 2] Eia kekahi, hele hou aku la au me na kanaka o’u eha, iloko o ke kulanakauhale, iloko i ke alii la, i ike ai au i ke ano o ko ke alii manao, a i ike ai hoi au ina paha e hiki ia’u ke hele iloko me ko’u poe kanaka, a e loaa ka aina me ka maluhia.

6 A hele aku la au iloko i ke alii la, a hana berita mai la oia me au, e lilo ia’u ka aina o Lehi-Nepai, a me ka aina o Sailoma.

7 A kauoha aku la no hoi oia i kona poe kanaka e hele aku mawaho o ka aina, a hele aku la au me ko’u poe kanaka iloko o ka aina, i noho ai makou ia aina.

8 A hoomaka aku la makou e kukulu aku i na hale, a e hana hou i na pa o ke kulanakauhale, he oiaio, i na pa o ke kulanakauhale o Lehi-Nepai, a me ke kulanakauhale o Sailoma.

9 A hoomaka ae la makou e kanu i ka honua, he oiaio, me kela ano keia ano o na anoano, me ke anoano o ke kurina, a o ka huita, a o ka bale, a me ka neasa, a me ka seuma, a me kela ano keia ano o na anoano o na hua; a hoomaka aku la makou e mahuahua a e hoopomaikaiia mai ma ka aina.

10 Ano, no ka maalea a me ke akamai o ke Alii Lamana, e lawe mai ai i ko’u poe kanaka iloko o ka noho luhi ana, kona haawi ana mai i ka aina, e noho ai makou.

11 Nolaila, eia kekahi mahope iho o ko makou noho ana ma ka aina no na makahiki he umikumamalua, hoomaka ae la ko ke Alii Lamana oluolu ole, o mahuahua paha ko’u poe kanaka a ikaika ma ka aina, a e hiki ole ia lakou ke lanakila maluna o lakou nei a e hooluhi mai ia lakou nei.

12 Ano, he poe molowa a hoomanakii lakou: nolaila, ua makemake lakou e hooluhi mai ia makou, e hiki ia lakou ke hoopiha ia lakou iho me ka hana a ko makou mau lima, he oiaio, e hiki ia lakou ke hoomaona ia lakou iho ma na pua holoholona o ko makou kula.

13 [m 6, p 4] Nolaila, eia kekahi, hoomaka ae la ke Alii, o Lamana, e hookonokono i kona poe kanaka, i paio mai ai lakou me ko’u poe kanaka; nolaila, hoomaka aku la na kaua a me na paio ma ka aina.

14 No ka mea, i ka makahiki umikumamakolu o ka noho alii o’u ma ka aina o Nepai, ma o ma ke kukulu hema o ka aina o Sailoma, i ka wa a ko’u poe kanaka e hoohainu ana a e hanai ana i ko lakou mau pua holoholona, a e mahiai ana i ko lakou mau aina, hiki mai la kekahi poe kaua he lehulehuy o ko Lamana poe maluna o lakou, a hoomaka ae la e pepehi ia lakou a make, a e lawe aku i ko lakou mau pua holoholona, a me ke kurina o ko lakou mau kihapai.

15 He oiaio, a auhee mai la lakou, ka poe a pau i hopu ole ia, iloko o ke kulanakauhale o Nepai, a noi mai la ia’u i ka maluhia.

16 [m 6, p 5] Eia kekahi, kahiko aku la au ia lakou me na kakaka, a me na pua, me na pahikaua, a me na pahikaua pokole, me na mewa, a me na maa, a me kela ano keia ano o na mea kaua i hiki ia makou ke hana, a hele aku la au me ko’u poe e ku e aku i ko Lamana poe ma ke kaua:

17 He oiaio, ma ka ikaika o ka Haku makou i hele aku ai e kaua aku i ko Lamana poe: no ka mea, kahea ikaika aku la au me ko’u poe kanaka i ka Haku, nana e hoopakele mai ia makou mailoko mai o na lima o ko makou poe enemi, no ka mea, ua hoalaia mai makou e hoomanao o ka hoopakeleia’na o ko makou poe kupuna.

18 A lohe mai la ke Akua i ka makou hea ana, a hooko mai la i ka makou mau pule; a hele aku la makou ma kona ikaika. He oiaio, hele aku la no makou e ku e i ko Lamana poe; a i ka la a me ka po hookahi, ua pepehi aku la makou i ekolu tausani a me kanahakumamakolu; a pepehi aku la makou ia lakou, a hiki i ka wa a makou i hooauhee aku ai ia lakou mawaho o ka aina o makou.

19 A owau hoi, ua kokua au ma kuu mau lima iho, e kanu i ko lakou poe make. Aia hoi, i ko makou kaumaha a kupinai nui, ua pepehiia elua haneri a me kanahikukumamaiwa o ko makou poe hoahanau.

1 [mokuna 6, paukū 6] Eia kekahi, hoomaka hou aku la makou e hookupaa i ke aupuni; a hoomaka hou makou e noho ma ka aina me ka malu. A kauoha ae la au e hanaia kela ano keia ano o na mea kaua, e hiki ia’u ma ia mea ke loaa na mea kaua no ko’u poe kanaka, no ka wa e hele hou mai ko Lamana poe e kaua mai i ko’u poe kanaka.

2 A hoonoho iho la au i na mea kiai a puni o ka aina, i hiki ole ai i ko Lamana poe ke lele hou mai maluna o makou me ka ike ole ia’ku, a e luku mai ia makou; a pela au i kiai ai i ko’u poe kanaka, a me ko’u mau pua holoholona, a hoola ia lakou mai ka haule ana iloko o na lima o ko makou poe enemi.

3 [m 6, p 7] Eia kekahi, noho iho la makou i ka aina o ko makou poe kupuna, no na makahiki he nui; he oiaio, no na makahiki he iwakaluakumamalua.

4 A kauoha ae la au i na kanaka e mahiai i ka honua, a e hooulu i na ano a pau o na hua liilii, a i na hua laau a pau, o kela ano keia ano.

5 A na’u i kauoha aku e milo na wahine, a e hooikaika a hana, a e hana i na ano a pau o ka ie makalii: he oiaio, a me ka lole o kela ano keia ano, e hiki ia makou ke hooaahu i ko makou olohelohe; a pela makou i pomaikai ai ma ka aina; a pela no hoi makou i loaa’i ka maluhia mau ma ka aina no na makahiki he iwakaluakumamalua.

6 [m 6, p 8] Eia kekahi, make aku la ke Alii Lamana, a hoomaka ae la kana keiki e noho alii ma kona hakahaka. A hoomaka ae la oia e hooeu i kona poe kanaka i ke kipi ku e i ko’u poe kanaka; nolaila, hoomaka mai la lakou e hoomakaukau no ke kaua, a e pii mai e kaua i ko’u poe kanaka.

7 Aka ua hoouna e aku au i ko’u poe kiu mawaho a puni o ka aina o Semalona, i loaa’i ia’u ka ike no ko lakou hoomakaukau ana, i pale aku ai au ia lakou, i hiki ole ai lakou maluna o ko’u poe kanaka a e luku mai ia lakou.

8 [m 6, p 9] Eia kekahi, pii mai la lakou ma ka akau o ka aina o Sailoma, me ko lakou poe kaua he lehulehu, o na kanaka i kahikoia me na kakaka, a me na pua, a me na pahikaua, a me na pahikaua pokole, a me na ala, a me na maa, a ua koleia ko lakou mau poo, i olohelohe lakou; a kakooia me kekahi kaei ili a puni o ko lakou mau puhaka.

9 [m 6, p 10] Eia kekahi, kauoha aku la au e hunaia na wahine a me na keiki a ko’u poe kanaka ma ka waonahele; a kauoha aku la hoi au i na elemakule a pau o’u i hiki ke hali i na mea kaua, a me ko’u poe kanaka hou hoi i hiki ke hali i na mea kaua, e houluulu ia lakou iho e hele e kaua aku i ko Lamana poe; a hoonoho papa ae la au ia lakou, kela kanaka keia kanaka e like me kona mau makahiki.

10 [m 6, p 11] Eia kekahi, pii aku la makou e kaua i ko Lamana poe. A owau hoi, i ko’u wa elemakule, owau kekahi i pii aku ai e kaua i ko Lamana poe. Eia kekahi, pii aku la makou ma ka ikaika o ka Haku, e kaua.

11 [m 6, p 12] Ano, aole o ko Lamana poe i ike i kekahi mea no ka Haku, aole no hoi i ka ikaikak o ka Haku; nolaila, paulele aku la lakou i ko lakou ikaika iho. Aka, he poe kanaka ikaika lakou, ma ka ikaika o kanaka:

12 He poe hihiu, a hae, a puni koko lakou e manaoio ana i ka mooolelo a ko lakou poe kupuna, eia ia:—E manaoio ana ua kipakuia mai lakou mailoko mai o ka aina o Ierusalema, no na hewa o ko lakou poe kupuna, a ua hoolawehalaia lakou ma ka waonahele e ko lakou poe hoahanau; a ua hoolawehalaia no hoi lakou, oiai e holo mai ana ma ke kai.

13 A eia hou: Ua hoolawehalaia lakou oiai ma ko lakou aina hooilina mua, mahope iho o ko lakou hiki ana mai ma keia aoao o ke kai: a o keia mau mea a pau, no ka oi ana o ko Nepai ikaika ma ka malama ana i na kauoha a ka Haku; nolaila, ua lokomaikaiia mai oia e ka Haku, no ka mea, lohe ka Haku i kana mau pule a hooko mai la ia mau mea, a oia no ka mea alakai ma ko lakou hele ana ma ka waonahele.

14 A ua huhu kona mau hoahanau ia ia, no ka mea, aole o lakou i hoomaopopo i na hana a ka Haku; ua huhu no hoi lakou ia ia maluna o na kai, no ka mea, ua hoopaakiki iho la lakou i ko lakou mau naau e ku e i ka Haku.

15 A eia hou: Ua huhu lakou ia ia, ia lakou i hiki mai ai i ka aina i olelo mau ia’i, no ka mea, i mai la lakou ua lawe aku oia i ke alii ana maluna o na kanaka mailoko aku o ko lakou mau lima; a imi aku la lakou e pepehi ia ia.

16 A eia hou: Ua huhu lakou ia ia, no kona haalele ana, a me ka hele ana iloko o ka waonahele me ka Haku i kauoha mai ai ia ia, a lawe pu ana i na mooolelo i kahakahaia ma na papa keleawe; no ka mea, i mai la lakou ua hao mai la oia ia lakou.

17 A pela lakou i ao ai i ka lakou poe mamo, e inaina mai ai lakou ia lakou nei, a e pepehi mai ai lakou ia lakou nei, a e powa mai ai lakou a e hao mai ia lakou nei, a e hana ai lakou i na mea hiki a pau e anai mai ai lakou nei; nolaila, he inaina mau loa ko lakou i na mamo a Nepai.

18 No keia kumu ua hoopunipuni mai ke Alii Lamana, ma kona maalea a akamai wahahee, a me kana olelo malimali ia’u, i lawe mai ai au i ko’u poe kanaka nei, maluna iloko o keia aina, e hiki ia lakou ke luku mai ia lakou mei; he oiaio, a ua pilikia iho la makou i keia mau makahiki he nui ma ka aina.

19 [m 6, p 13] Ano, owau, o Zenifa, mahope iho o ka’u hai ana i keia mau mea a pau i ko’u poe kanaka no ko Lamana poe, hooikaika aku la au ia lakou e hele e kaua me ko lakou ikaika a pau, e paulele ana i ka Haku; nolaila, paio aku la makou me lakou, he maka no, he maka.

20 A eia kekahi, hooauhee hou aku la makou ia lakou mawaho o ko makou aina; a pepehi aku la makou ia lakou me ka luku nui, a no ka nui loa aole makou i helu ia lakou.

21 [m 6, p 14] Eia kekahi, hoi hou aku la makou i ko makou aina iho, a hoomaka hou ae la ko’u poe kanaka e malama i ko lakou mau pua holoholona, a e mahiai i ka honua.

22 Ano, ua elemakule au, a hooili aku la au i ke aupuni maluna o kekahi o ka’u mau keiki; nolaila, aole au e olelo hou aku. A na ka Haku e hoopomaikai i ko’u poe kanaka. Amene.

1 [mokuna 7, paukū 1] Eia kekahi, hooili iho la o Zenifa i ke aupuni maluna o Noa, kekahi o kana mau keikikane; nolaila, i hoomaka’i o Noa e noho alii ma kona hakahaka; aole ia i hele ma na aoao o kona makuakane.

2 No ka mea hoi, aole oia i malama i na kauoha a ke Akua, aka hele aku la oia mamuli o na makemake o kona naau iho. A he nui na wahine a me na haiawahine ana. A he kumu oia no kona poe kanaka e hana’i i ka hewa, a e hana’i i ka mea hoopailua ma ke alo o ka Haku. He oiaio, a ua hana lakou o na moe kolohe, a me na ano a pau o ka hewa.

3 A kau mai la oia i ka auhau hapalima o na mea a pau a lakou; i ka hapalima o ko lakou gula a o ko lakou kala, a i ka hapalima o ko lakou zifa, o ko lakou keleawe ulaula, a o ko lakou keleawe melemele a me ko lakou hao; a i ka hapalima o ko lakou mau holoholona kupaluia; a i ka hapalima hoi o ko lakou hua liilii.

4 A ua lawe oia i keia mau mea a pau, e hanai ia ia iho, a i kana mau wahine, a i kana mau haiawahine, a i kana poe kahuna, a i ka lakou mau wahine, a i ka lakou mau haiawahine; pela oia i hoololi ai i na oihana o ke aupuni.

5 No ka mea, hoopau ae la oia i na kahuna a pau i hoolaaia e kona makuakane, a hoolaa ae la i na mea hou ma ko lakou hakahaka, i na mea i hookiekieia ma ka haaheo o ko lakou mau naau.

6 He oiaio no, a pela lakou i hanaiia’i ma ko lakou palaualelo ana, a ma ko lakou hoomana kii ana, a ma ko lakou moe kolohe ana, ma o na auhau la a ke ’Lii a Noa i kau mai ai maluna o kona poe kanaka; pela i hana ikaika ai na kanaka, e hana i ka hewa.

7 He oiaio, o lakou hoi ka i lilo i poe haamana kii, no ka mea, ua hoopunipuniia e na olelo haakei a malimali a ke Alii a me na kahuna: no ka mea, ua olelo ae la lakou i na mea malimali ia lakou.

8 [m 7, p 2] Eia kekahi, kukulu iho la o ke Alii Noa i na hale nani a akea he nui wale; a hoonani ae la oia i ua mau hale nei me ka hana maikai o ka laau, a me na ano a pau o na mea maikai loa, o ke gula, a o ke kala, a o ka hao, a o ke keleawe melemele, a o ka zifa, a o ka keleawe ulaula;

9 A kukulu no hoi oia i hale alii akea nona, a i noho alii mawaena konu olaila, o keia mau mea a pau o ka laau maikai ia, a ua hoonaniia me ke gula, a me ke kala, a me na mea maikai loa.

10 A kauoha ae la no hoi oia i kana poe paahana e hana i na ano a pau o ka hana maikai iloko o na paia o ka luakini, o ka laau maikai, a o ke keleawe ulaula, a o ke keleawe melemele;

11 A o na noho i hookaawaleia’i no na kahuna nui, maluna o na noho e ae a pau, oia kana i hoonani aku ai me ke gula maemae: a nana i kauoha e hanaia kekahi papa umauma imua o lakou; i wahi no lakou e hilinai ai i ko lakou mau kino a me ko lakou mau lima maluna, oiai lakou e olelo aku ai i na olelo wahahee a haakei i kona poe kanaka.

12 [m 7, p 3] Eia kekahi, kukulu iho la oia i hale kiai kokoke i ka luakini; he oiaio, i kahi hale kiai kiekie loa, a no ke kiekie ua hiki ia ia ke ku maluna olaila, a ke nana aku i ka aina o Sailoma, a i ka aina o Semalona hoi, kahi a ko Lamana poe i noho ai; a ua hiki ia ia ke nana aku maluna o ka aina a puni.

13 [m 7, p 4] Eia kekahi, kauoha ae la oia i na hale he nui e kukuluia ma ka aina o Sailoma; a nana i kauoha i kekahi hale kiai nui e kukuluia ma ka puu aia ma ka akau o ka aina Sailoma, kahi a ka poe keiki a Nepai i hele nui ai, ma ka manawa a lakou i auhee aku ai mailoko aku o ka aina; a pela oia i hana’i me ka waiwai ana i loaa’i ma ka auhau ana i kona poe kanaka.

14 [m 7, p 5] Eia kekahi, kau aku la oia i kona naau maluna o kona waiwai, a hoomaunauna aku oia i kona manawa, ma ka noho uhauha ana me kana poe wahine a me kana poe haiawahine; a pela hoi kana poe kahuna i hoomaunauna aku ai i ko lakou manawa, me na wahine hookamakama.

15 Eia kekahi, kanu iho la oia i na malawaina a puni ma ka aina; a kukulu iho la oia i na wahi kaomi waina, a hana oia i ka waina a nui loa; a nolaila, lilo iho la oia i mea pakele waina, a me kona poe kanaka no hoi.

16 [m 7, p 6] Eia kekahi, hoomaka ae la ko Lamana poe e hele mai mailuna o kona poe kanaka, maluna o na mea he kakaikahi, a e pepehi ia lakou a make ma ko lakou mau kihapai, a oiai lakou e malama ana i ko lakou mau pua holoholona.

17 A hoonoha aku la o ke Alii Noa i na koa a puni ka aina e pale aku ia lakou: aka aole ia hoouna aku i ua poe koa nei a lawa, a hiki mai la ko Lamana poe maluna iho o lakou, a pepehi ae la ia lakou a make, a hoa iho la i na pua holoholona he nui o lakou mailoko aku o ka aina: pela i hoomaka ai ko Lamana poe e luku mai ia lakou, a e hoopai mai i ko lakou inaina maluna o lakou nei.

18 [m 7, p 7] Eia kekahi, hoouna aku la ke Alii Noa i kona poe kaua e ku e ia lakou la, a ua hooauheeia lakou la, oia hoi, hooauhee lakou ia lakou la ihope no kekahi manawa; nolaila, hoi hou ae la lakou e hauoli ana ma ko lakou waiwai pio.

19 Ano, no keia lanakila nui, ua hookiekieia lakou ma ka haaheo o ko lakou mau naau; a kaena aku la lakou ma ko lakou ikaika iho, me ka i ana, ua hiki i ko lakou kanalima ke ku e aku i na tausani o ko Lamana poe; a pela lakou i kaena ai, a olioli i ke koko, a i ka hookahe ana i ke koko o ko lakou poe hoahanau, a o keia mea no ka hewa o ko lakou alii a me na kahuna hoi.

20 [m 7, p 8] Eia kekahi, mawaena o lakou kekahi kanaka, o Abinadi kona inoa; a hele aku la oia iwaena o lakou, a hoomaka iho la e wanana, i ka i ana, Aia hoi, penei wahi a ka Haku, a peneia oia i kauoha mai ai ia’u, i ka i ana, E hele aku a e olelo aku i keia poe kanaka, penei wahi a ka Haku: auwe keia poe kanaka, no ka mea, ua ike au i ko lakou mau mea ino, a me ko lakou mau hewa, a me ko lakou mau moe kolohe; a ke mihi ole lakou, e hele aku au io lakou la ma kuu inaina.

21 A ke mihi ole lakou, a huli i ka Haku i ko lakou Akua, aia hoi, e haawi aku au ia lakou iloko o na lima o ko lakou poe enemi: he oiaio, a e laweia aku lakou iloko o ka noho luhi ana; a e hoopilikiaia lakou e ka lima o ko lakou poe enemi.

22 A e hiki mai keia, e ike auanei lakou owau no ka Haku ko lakou Akua, a he Akua lili, e hoopai ana i na hala a ko’u poe kanaka.

23 A e hiki mai no hoi keia, ke mihi ole keia poe kanaka a e huli i ka Haku i ko lakou Akua, e laweia lakou iloko o ka noho luhi ana: aole loa kekahi mea e hoopakele ia lakou, o ka Haku ke Akua Mana loa wale no.

24 He oiaio, e hiki mai keia i ka wa a lakou e kahea mai ai ia’u, e lohi no au i ka hoolohe i ko lakou hea ana; he oiaio, a e hookuu aku au ia lakou e hahauia lakou e ko lakou poe enemi.

25 A ke mihi ole lakou iloko o ke kapa inoino a me ka lehu, a e kahea ikaika mai i ka Haku i ko lakou Akua, aole au e hoolohe aku i ka lakou mau pule, aole hoi au e hoopakele aku ia lakou mailoko aku o ko lakou mau popilikia; a pela wahi a ka Haku, a pela oia i kauoha mai ai ia’u.

26 [m 7, p 9] Ano, eia kekahi, ia Abinadi i olelo mai ai i keia mau olelo ia lakou, ua huhu lakou ia ia, a imi aku la e kaili aku i kona ola; aka hoopakele aku la no ka Haku ia ia mailoko mai o ko lakou mau lima.

27 Ano, i ka wa a Noa, ke Alii, i lohe ai no na olelo a Abinadi i olelo mai ai i na kanaka, ua huhu no hoi oia; a i aku la oia, Owai la o Abinadi, i hoohewaia mai ai au me ko’u poe kanaka e ia? A owai la ka Haku, nana e hooili mai maluna iho o ko’u poe kanaka i na popilikia nui me neia?

28 Ke kena aku nei au ia oukou e lawe mai ia Abinadi maanei, na’u e pepehi aku ia ia: no ka mea, ua olelo mai la oia i keia mau mea, e hiki ia ia ke hooeueu i ko’u poe kanaka i ka huhu, kekahi me kekahi, a e hoala i na paio mawaena o ko’u poe kanaka; nolaila, e pepehi aku no au ia ia.

29 Ano, ua hoopouliia na maka o na kanaka; nolaila, hoopaakiki iho la lakou i ko lakou mau naau e ku e i na olelo a Abinadi, a imi aku la lakou mai ia manawa aku e hopu ia ia. A hoopaakiki iho la ke Alii Noa i kona naau e ku e i ka olelo a ka Haku; a, aole oia i mihi i kana mau hana ino ana.

1 [mokuna 7, paukū 10] Eia kekahi, mahope iho o na makahiki elua, hele mai la o Abinadi mawaena o lakou me ka pahaohao, i ike ole ai lakou ia ia, a hoomaka ae la e wanana aku mawaena o lakou, i ka i ana, penei ka ka Haku i kauoha mai ai ia’u, i ka i ana: E Abinadi, e hele aku a e wanana aku i ko’u poe kanaka nei, no ka mea, ua hoopaakiki aku la lakou i ko lakou naau i ka’u mau olelo; ua mihi ole lakou i ka lakou mau hana ino; nolaila, e hele no au io lakou la ma kuu inaina, he oiaio, ma kuu inaina wela e hele aku ai au io lakou la ma ko lakou mau hewa a hana hoopailua;

2 He oiaio, auwe keia hanauna. A i mai la ka Haku ia’u, E o aku i kou lima, a e wanana, me ka i ana, penei wahi a ka Haku: E hiki mai keia, e laweia auanei keia hanauna, no ka lakou mau hala, iloko o ka noho luhi ana, a e papaiia ma ka papalina: he oiaio, a e hooauheeia e na kanaka, a e lukuia; a e ai auanei na manu nui o ka lewa, a me na ilio, a me na holoholona hihiu, i ko oukou io.

3 [m 7, p 11] A e hiki mai keia, e manaoia ke ola o ke Alii Noa me he aahu la iloko o kekahi umu wela; no ka mea, e ike no oia owau no ka Haku.

4 Eia kekahi, e hahau aku no au i keia poe kanaka o’u me na popilikia eha; he oiaio, me ka wi a me ke ahulau; a na’u lakou e hoaoa aku a pau ae la ka la.

5 He oiaio, a e hoohaawe aku no au i na ukana kaumaha maluna o ko lakou mau kua; a e hooeueuia lakou imua me ka hahau, me he hoki leo ole la.

6 [m 7, p 12] A e hiki mai keia, e hoouna aku au i ka hua hekili mawaena o lakou, a e pehi ia mea ia lakou; a e papaiia no hoi lakou me ka makani hikina: a e hoopilikia na mea kolo i ko lakou aina hoi, a e ai i ko lakou hua liilii.

7 A e hahauia lakou me kekahi ahulau nui: a e hana au i keia mau mea a pau, no ka lakou mau hala a mau hana hoopailua.

8 [m 7, p 13] A eia kekahi, ke mihi ole lakou, e hoopau loa aku au ia lakou mailuna aku o ka ili o ka honua; aka e waiho iho no lakou i mooolelo mahope iho o lakou, a e hoola aku au ia mea no na lahuikanaka e ae, ka poe e loaa ’uanei ka aina; he oiaio, e hana no au i keia, e hiki ia’u ka hoakaka aku i ka hana hoopailua a keia poe kanaka i na lahuikanaka e. A he nui wale na mea a Abinadi i wanana ku e mai ai i keia poe kanaka.

9 [m 7, p 14] Eia kekahi, huhu iho la lakou ia ia; a hopu aku la lakou ia ia a kaikai paa aku la ia ia imua o ke Alii, a i aku la i ke Alii, Aia hoi, ua lawe mai makou i kekahi kanaka imua ou, nana i wanana iho mai no kou poe kanaka, a ke i mai la e hoopau ana ke Akua ia lakou;

10 A ke wanana mai la no hoi oia i ka ino no kou ola, a ke i mai nei e like auanei kou ola me he aahu la iloko o ka umu ahi.

11 A eia hou, ke i mai nei oia e like auanei oe me he ohe la, oia, me he ohe maloo la o ke kula, i holoia maluna e na holoholona a hahiia ilalo o na wawae.

12 A eia hou, ke i mai nei oia e like auanei oe me na pua o ka puakala, ia ia i oo loa ai, ina e pa mai ana ka makani, ua hoopuehuia’ku ia ma ka ili o ka aina; a ke hookokohu mai nei ia me he mea la na ka Haku i olelo mai ia mea. A ke i mai nei oia e hiki mai keia a pau maluna ou, ke mihi ole oe; a o keia no kau mau hala.

13 [m 7, p 15] Ano, e ke Alii, aia hoi, heaha la ka ino nui au i hana’i, a heaha la hoi na hewa nui a kou poe kanaka i lawehala’i, i hoohewaia kakou e ke Akua, a i hookolokoloia e keia kanaka.

14 Ano, e ke Alii, aia hoi, ua hewa oola makou, a ooe, e ke Alii, ua lawehala ole; nolaila, ua wahahee mai la keia kanaka nou, a ua wanana mai la me ka makehewa.

15 A, aia hoi, ua ikaika kakou, aole no kakou e komo iloko o ka noho luhi ana, aole hoi e lawe pio ia e ko kakou poe enemi; he oiaio, a ua hoopomaikaiia oe ma ka aina, a e hoopomaikaiia auanei oe.

16Aia hoi, eia no ke kanaka, ke haawi aku nei makou ia ia iloko o kou mau lima; nau no e hana me ia me ka mea maikai ia oe.

17 [m 7, p 16] Eia kekahi, kena aku la ke Alii Noa e hooleiia’ku o Abinadi iloko o ka halepaahao; a kauoha ae la oia i na kahuna e hoakoakoa ia lakou iho, e hiki ia ia ke kukakuka pu me lakou i ka mea e pono ai nana e hana me ia.

18 A eia kekahi, i aku la lakou i ke Alii, E lawe mai ia ia maanei, na makou e niele aku ia ia. A kauoha aku la ke Alii e laweia mai oia imua o lakou.

19 A hoomaka ae la lakou e ninaninau ia ia, e hiki ia lakou ke hookue i kana, e hiki ia lakou ke loaa kekahi mea e hoohewa’i ia ia; aka pane aku la oia ia lakou me ka wiwo ole, a pale aku la i ko lakou mau niele a pau, he oiaio, a nui ko lakou kahaha: no ka mea, pane aku la oia ia lakou ma ko lakou mau niele a pau, a hoohoka aku la ia lakou ma ka lakou mau olelo a pau.

20 [m 7m p 17] Eia kekahi, i mai la kekahi o lakou ia ia, Heaha la ke ano o na olelo i palapalaia, a i aoia e ko kakou poe kupuna, i ka i ana:

21 Nani wale ma na mauna na wawae o ka mea e lawe mai ana i ka olelo maikai; ka mea a hoolaha ana i ka malu; ka mea e lawe mai ana i ka olelo maikai o ka olioli; ka mea e hoolaha ana i ke ola; ka mea e olelo ana ia Ziona, ke malama aupuni nei kou Akua;

22 O kou poe kiai e hookiekie auanei lakou i ka leo; me ka leo auanei lakou e hookani pu ai, no ka mea, e ike auanei lakou, he maka no he maka, i ka wa a ka Haku e hoihoi hou mai ai ia Ziona.

23 E hookani olioli; e olioli pu oukou e na wahi neoneo o Ierusalema: no ka mea, ua hoomaha mai ka Haku i kona poe kanaka; ua hoolapanai oia ia Ierusalema.

24 Ua hoike ka Haku i kona lima hemolele imua o na maka o na lahuikanaka a pau; a e ike auanei na kukulu a pau o ka honua i ka hoola ana o ko kakou Akua.

25 Ano, i aku la o Abinadi ia lakou, He poe kahuna anei oukou, a e hookokohu ana e ao i keia poe kanaka, a e hoomaopopo i ka uhane o ka wanana ana, aka e makemake ana nae e ike ia’u i ke ano o keia mau mea?

26 Ke i aku nei au ia oukou, auwe oukou no ka hookapae ana i na aoao o ka Haku. No ka mea, ina oukou e hoomaopopo nei i keia mau mea, aole oukou i ao aku ia mau mea: nolaila, ua hookapae oukou i na aoao o ka Haku.

27 Ua hoopili ole oukou i ko oukou mau naau i ka ike; nolaila, aole oukou i naauao. Nolaila, heaha la ka oukou i ao aku ai i keia poe kanaka?

29 A i hou aku la oia ia lakou, Ina e ao ana oukou i ke kanawai o Mose, no ke aha la oukou i malama ole ai ia? No ke aha la oukou i kau aku ai i ko oukou mau naau maluna o ka waiwai? No ke aha la oukou i moe kolohe ai, a i hoomaunauna’i i ko oukou ikaika me na wahine hookamakama, he oiaio, a lilo i kumu no keia poe kanaka e hana hewa’i, i hoouna mai ai ka Haku ia’u e wanana ku e i keia poe kanaka, he oiaio, i kekahi mea ino nui i keia poe kanaka?

30 Aole anei oukou i ike, ke olelo nei au i ka oiaio? He oiaio, ke ike nei oukou ke olelo nei au i ka oiaio; a he mea e pono ai ke haalulu oukou imua o ke Akua.

31 [m 7, p 18] A e hiki mai keia, e hahauia oukou no ka oukou mau hala: no ka mea, ua i mai oukou, e ao ana oukou i ke kanawai o Mose. A heaha la ka oukou i ike ai no ke kanawai o Mose? E hiki mai ana anei ke ole ma ke kanawai o Mose? Heaha ka oukou e olelo mai?

33 Aka, ano la, i aku la o Abinadi ia lakou, Ua ike au ina e malama oukou i na kauoha a ke Akua, e hoolaia oukou; he oiaio, ina e malama oukou i na kauoha a ka Haku i haawi mai ai ia Mose ma ka mauna o Sinai, i ka i ana:

34 Owau no ka Haku o kou Akua, ka mea nana oe i lawe mai nei mai ka aina o Aibupita mai, mailoko mai hoi o ka hale hooluhi.

36 Mai hana oe i ke kii i kalaiia nou, aole ma ka like ana o kekahi mea i ka lani iluna, a me na mea i ka honua ilalo.

37 Ano, i aku la o Abinadi ia lakou, Ua hana anei oukou i keia mau mea a pau? Ke i aku nei au ia oukou, Aole, aole loa oukou i hana. A ua ao aku anei oukou i keia poe kanaka e hana i keia mau mea a pau? Ke i aku nei au ie oukou, Aole, aole oukou i hana.

1 [mokuna 7, paukū 19] Ano, i ka wa a ke Alii i lohe ai i keia mau olelo i aku la oia i kana poe kahuna, E lawe aku i keia kanaka, a e pepehi ia ia: no ka mea, heaha la ka kakou e hana’i me ia, ua hehena oia.

2 A ku mai la lakou a hoao iho la e kau mai i ko lakou mau lima maluna ona: aka pale aku la oia ia lakou, a i aku la ia lakou,

3 Mai hoopa mai ia’u, no ka mea, e hahau mai no ke Akua ia oukou ina e kau mai oukou i ko oukou mau lima maluna o’u, no ka mea, aole au i hai aku i ka olelo a ka Haku i hoouna mai ai ia’u e hai; aole hoi au i hai aku i ka mea a oukou i makemake ai ia’u e hai; nolaila, aole e ae mai ke Akua e pepehiia au i keia manawa.

4 Aka, e hooko aku au e pono ai i na kauoha a ke Akua, ana i kauoha mai ai ia’u, a no kuu hai ana ia oukou i ka oiaio, ua huhu mai oukou ia’u. A eia hou, no ka’u olelo ana i ka olelo a ke Akua, ua manao mai oukou ua hehena au.

5 [m 7, p 20] Ano, eia kekahi, mahope iho o ka Abinadi olelo ana i keia mau olelo, aole i aa na kanaka o Noa, ke Alii, e kau mai i ko lakou mau lima maluna ona; no ka mea, maluna ona ka uhane o ka Haku; a pua aku la kona maka me ke alohilohi nui, e like me ko Mose, oiai ma ka mauna o Sinai, ia ia i olelo ai me ka Haku.

6 A olelo aku la oia me ka ikaika a me ka mana mai ke Akua mai; a hoomau aku la oia i kana olelo, i ka i ana,

7 Ke ike nei oukou aole oukou mana e pepehi mai ia’u, nolaila, ke hai aku nei au a pau ka olelo a’u i kauohaia mai ai. He oiaio, a ke ike nei au ke hou nei ia mea ia oukou i ko oukou naau, no ka’u hai ana ia oukou i ka oiaio no ka oukou mau hala:

8 He oiaio, a ke hoopiha nei ka’u mau olelo ia oukou me ke kahaha, a me ka pihoihoi, a me ka huhu.

9 Aka ke hai nei au i ka’u olelo a pau a’u i kauohaia mai ai; alaila, he mea ole kahi a’u e hele aku ai, ina e hoolaia au.

10 Aka, eia ka’u e hai aku nei ia oukou: O ka mea a oukou e hana mai ai ia’u, mahope o keia, me he hoailona la ia a he aka hoi o na mea e hiki mai ana.

11 Ano, ke heluhelu aku nei au ia oukou i ke koena o na kauoha a ke Akua, no ka mea, ke ike nei au aole i kakauia lakou ma ko oukou mau naau; ke ike nei au ua noonoo oukou a ao aku la i ka hewa, i ka hapa nui o ko oukou ola.

12 [m 7, p 21] Ano, ke hoomanao nei oukou ua olelo aku la au ia oukou, mai hana oe i ke kii i kalaiia nou, aole ma ka like ana o kekahi mea i ka lani iluna, a me na mea i ka honua ilalo, a maloko hoi o ka wai malalo o ka honua.

13 A eia hou: Mai kulou oe ia oe iho ilalo ia lakou, aole hoi e hookauwa na lakou: no ka mea, owau no ka Haku o kou Akua, he Akua lili, e hoopai ana i ka na makua hala i na keiki, a hiki aku i ke kuakahi a me ke kualua o ka poe e inaina mai ia’u;

14 A e aloha ana i na tausani o ka poe e aloha mai ia’u, a e malama hoi i ko’u mau kanawai.

15 Mai lawe wale oe i ka inoa o ka Haku kou Akua me ke kumu ole: no ka mea, aole loa e hoapono ka Hkau i ka mea e lawe wale ana i kona inoa me ke kumu ole.

18 Aka, i ka hiku o ka la, o ka Sabati ia o ka Haku o kou Akua, aole loa oe e hana i kekahi hana, aole oe, aole hoi ko keikikane, aole hoi ko kaikamahine, aole hoi kau kauwakane, aole hoi kau kauwawahine, aole hoi kou holoholona, aole hoi kou kanaka e ma kou wahi;

19 No ka mea, i na la eono i hana’i o ka Haku i ka lani, a me ka honua, a me ke kai, a me na mea a pau maloko o ia mau mea; nolaila hoi i hoomaikai ai o ka Haku i ka la Sabati, a hoano ai hoi oia ia la.

20 E hoomaikai aku oe i kou makuakane, a me kou makuwahine; i loihi ai kou mau la maluna o ka aina a ka Haku a kou Akua i haawi mai ai ia oe.

24 Mai kuko oe i ka hale o kou hoalauna, mai kuko oe i ka wahine a kou hoalauna, aole hoi i kana kauwakane, aole hoi i kana kauwawahine, aole hoi i kona bipi, aole hoi i kona hoki, aole hoi i kekahi mea a kou hoalauna.

25 [mokuna 8, paukū 1] Eia kekahi, mahope iho o ka hoopau ana o Abinadi i keia mau olelo, i aku la oia ia lakou, Ua ao aku la anei oukou i keia poe kanaka, e hoolohe lakou a e hana i keia mau mea a pau? I malama aku ai i keia mau kanawai?

26 Ke i aku nei au ia oukou, Aole; no ka mea, ina ua ao aku oukou, ina aole ka Haku kauoha mai ia’u e hele mai a e wanana ino no keia poe kanaka.

27 Ano, ua i mai oukou, E hiki mai ana ke ola ma ke kanawai o Mose. Ke i aku nei au ia oukou, he mea e pono ai no oukou e malama i ke kanawai o Mose i keia manawa; aka, ke i aku nei au ia oukou, e hiki mai auanei ka manawa, e pono ole ai ke malama hou i ke kanawai o Mose.

28 A eia hou, ke i aku nei au ia oukou, aole i hiki mai ke ola ma ke kanawai wale no; a ina aole no ke kalahala ana a ke Akua ana iho e hana mai ai, no na hewa a me na hala o kona poe kanaka, ina ua make loa lakou me ka pale ole ae, me ke kanawai o Mose pu nae.

29 Ano, ke i aku nei au ia oukou, he mea i pono ai i haawiia mai i kanawai i ka poe mamo a Iseraela, he oiaio, he kanawai ikaika; no ka mea, he lahuikanaka ai oolea lakou: hiki wawe e hana i ka hewa, a lohi e hoomanao i ka Haku i ko lakou Akua;

30 Nolaila, ua haawiia mai i kanawai ia lakou, he oiaio, he kanawai o na mea e hanaia a me na oihana; he kanawai na lakou e malama ikaika, ia la aku ia la aku, e paipai ia lakou e hoomanao i ke Akua, a me ka lakou hana ia ia.

31 [m 8, p 2] Aka hoi, ke i aku nei au ia oukou, o keia mau mea a pau he mau hoailona lakou o na mea e hiki mai ana.

32 Ano, ua hoomaopopo anei lakou i ke kanawai? Ke i aku nei au ia oukou, Aole, aole lakou a pau i hoomaopopo i ke kanawai; a o keia no ka paakiki o ko lakou mau naau: no ka mea, aole lakou i hoomaopopo aole e hiki i kekahi kanaka ke hoolaia, ke ole ia ma o ka hoolapanai ana la o ke Akua.

33 No ka mea, aia hoi, aole anei o Mose i wanana mai ai ia lakou no ka hiki mai ana o ka Mesia, a na ke Akua e hoola auanei i kona poe kanaka, he oiaio, a o na kaula hoi kekahi a pau, ka poe i wanana mai ai mai ka makamua mai o ke ao nei? Aole anei lakou i olelo mai i uuku paha i nui paha no keia mau mea?

34 Aole anei lakou i olelo mai, E iho mai auanei ke Akua, oia iho, mawaena o na keiki a kanaka, a e lawe ae maluna ona i ke ano o kanaka, a e hele aku ma ka mana ikaika maluna o ka ili o ka honua?

35 He oiaio, aole anei lakou i olelo mai no hoi, nana e lawe mai auanei i ke alahouana o ka poe make, a e hookaumahaia’i a e hoopilikiaia’i oia?

1 He oiaio, aole anei o Isaia hoi i olelo mai, Owai ka mea manaoio i ka makou hoike ana, a ia wai la i hoikeia’ku ai ka lima o ka Haku?

2 No ka mea, e ulu mai no oia imua ona me he oha la, e like hoi me ke aa kupu mailoko mai o ka lepo maloo: aole ona maikai o ke kino, aole ona hanohano; a ia kakou e ike aku ai ia ia, aole ona helehelena maikai i makemake aku ai kakou ia ia.

3 Ua hoowahawahaia oia, a ua haaleleia hoi e na kanaka; he kanaka eha, a ua ike oia i ka popilikia: a huna kakou me he mea la i ko kakou maka mai ona aku; ua hoowahawaha oia, a manao ole hoi kakou ia ia.

4 [mokuna 8, paukū 3] He oiaio no, ua kaikai no oia i ko kakou popilikia, ua halihali no oia i ko kakou hea: aka, manao aku kakou ia ia ua papaiia, ua hahauia e ke Akua, a hookaumahaia.

5 Aka, ua houia oia no ko kakou hewa, ua paopaoia oia no ko kakou hala; maluna ona ka hoopai ana no ko kakou malu; a me kona hahauia’na ua hoolaia mai kakou.

6 Ua hele hewa kakou a pau, e like me na hipa; ua huli kela mea keia mea i kona aoao iho: a ua kau no ka Haku maluna ona i ka hewa o kakou a pau.

7 Ua hoinoia oia, a ua hoopopilikiaia oia, aole nae i ekemu ae kona waha; e like me ke keikihipa, ua ala kaiia oia i ka make, a e like hoi me ka hipa i pane ole imua o ka mea nana ia e ako, pela no oia aole i ekemu ae kona waha.

8 Ua laweia aku la oia, mai ka paa ana, a mai ka hoopaiia hoi: a owai la ka mea e hai i kona hanauna? No ka mea, ua hookiia’ku oia mai ka aina o ka poe ola aku: no ka hewa o ko’u poe kanaka ai i hahauia’i.

9 Hana iho la oia i kona lua kupapau me ka poe hewa, a me ka poe mea waiwai hoi iloko o kona make: no ka mea, aole oia i hana i ka mea hewa, aohe hoi hoopunipuni ma kona waha.

10 [m 8, p 4] Aka, manao no ka Haku e paopao ia ia: ua hoeha oia ia ia: i ka wa e haawi aku ai oe i kona uhane i mohai hala, e ike no oia i kana hua, a e hooloihi no oia i kona mau la, a e pomaikai auanei ka makemake o ka Haku ma kona mau lima.

11 E ike aku no oia no ka luhi ana o kona uhane, a e oluolu oia: ma kona ike ana e hoapono no ka’u kauwa hemolele i na mea he nui; no ka mea, nana no e amo i ko lakou hewa.

12 Nolaila, e mahele aku au nana me ka poe koikoi, a nana no e mahele i ka waiwai pio me ka poe ikaika; no ka me,a ua ninini aku oia i kona uhane i ka make: a ua helu pu ia oia me ka poe lawehala; a lawe no oia i ka hewa o na mea he nui, a uwao aku la oia no ka poe i lawehala.

1 [mokuna 8, paukū 5] Ano, i aku la o Abinadi ia lakou ke makemake nei au e hoomaopopo oukou, e iho mai ke Akua, oia iho, ilalo mawaena o na keiki a kanaka, a e hoola i kona poe kanaka;

2 A no kona noho ana ma ka io, e kapaia auanei oia ke Keiki a ke Akua: a ua hooliloia’ku ka io malalo iho o ka makemake o ka Makua, o ka Makua a me ke Keiki no ia;

3 O ka Makua, no ka mea, ua hoohapaiia oia e ka mana o ke Akua; a o ke Keiki no ka io: pela e lilo ai i Makua a i Keiki:

4 A hookahi Akua laua, he oiaio no, o ka Makua io mau loa o ka lani a o ka honua;

5 A pela ka io i lilo ai malalo iho o ka Uhane, a o ke Keiki malalo iho o ka Makua, o ke Akua hookahi no ia, e loaa ana ka hoowalewale ana, aole nae e ae ana i ka hoowalewale, aka e ae ana oia e hoomaewaewaia, a e hahauia, a e kipakuia mawaho, a e hooleiia e kona poe kanaka.

6 A pau ia hana a pau, mahope iho o ka hana ana i na hana mana nui he nui loa, mawaena o na keiki a kanaka, e alakaiia oia, he oiaio, me Isaia i olelo mai ai, e like me ka hipa i pane ole imua o ka mea nana ia e ako, pela no oia aole i ekemu ae kona waha;

7 He oiaio, pela no ia e alakaiia’i, kaulia’i, a pepehiia’i, o ka io e lilo ana ia malalu iho a hiki i ka make, o ka makemake o ke Keiki i aleia iloko o ka makemake o ka Makua;

8 A pela ke Akua e uhai aku ai i na apo o ka make; me ka loaa ka lanakila maluna o ka make; e haawi ana i ke Keiki i ka mana e uwao no na keiki a kanaka:

9 I pii aku ai iloko o ka lani; ia ia na naau aloha; i hoopihaia me ka lokomaikai i na keiki a kanaka; e ku ana mawaena o lakou a me ka hoopai; i uhai aku i na apo o ka make, a lawe ai maluna ona iho i ko lakou mau hewa a me ka lakou mau hala: i hoolapanai ai ia lakou, a hooko aku ai i na makemake o ka hoopai.

10 Ano, ke i aku nei au ia oukou, owai la ka mea e hai aku i kona hanauna? Aia hoi, ke i aku nei au ia oukou, i kona uhane e lilo ai i mohai hala, e ike oia i kana hua. Ano, heaha la ka oukou e olelo mai ai? A owai la auanei kana hua?

11 Aia hoi, ke i aku nei au ia oukou, o ka mea i lohe i na olelo a na kaula, he oiaio, o ka poe kaula a pau nana i wanana mai no ka hiki mai ana o ka Haku; ke i aku nei au ia oukou, o ka poe a pau i hoolohe i ka lakou mau olelo, a i manaoio na ka Haku no e hoola i kona poe kanaka, a ua nana imua i kela la no ke kalaia ana o ko lakou mau hala, ke i aku nei au ia oukou, o kana hua no keia poe, a o lakou nei no na hooilina o ke aupuni o ke Akua:

12 No ka mea, o lakou nei no ka poe nona na hewa ana i kaikai ai; o lakou nei no ka pea nona ia i make ai, e hoola mai ia lakou i ka lakou mau hala. Ano, aole anei lakou he poe hua nana?

13 He oiaio, aole anei na kaula kekahi, o kela mea keia mea i ekemu ae kona waha e wanana, i haule ole ai iloko o ka hewa; ke olelo nei au no na kaula hemolele a pau mai ka makamua mai o ke ao nei? Ke i aku nei au ia oukou o lakou no kana poe hua;

14 A o lakou nei no ka poe nana i hoolaha ai i ka malu, ka poe nana i lawe mai ai i na olelo maikai o ka olioli, ka poe nana i hoolaha ai i ke ola; a i olelo ai ia Ziona, ke malama aupuni nei kou Akua!

16 A eia hou, nani wale ma na mauna na wawae o ka poe e hoolaha ana i ka malu, i keia manawa!

17 A eia hou, e nani wale ma na mauna na wawae o ka poe nana e hoolaha aku ana auanei i ka malu, he oiaio, mai keia manawa aku a mau loa aku.

18 [m 8, p 6] A aia hoi, ke i aku nei au ia oukou, aole o keia mea wale no: No ka mea, E! nani wale ma na mauna na wawae o ka mea e lawe mai ana i ka olelo maikai, ka mea i hookumu ai i ka malu; he oiaio, oia ka Haku, ka mea nana i hoolapanai i kona poe kanaka: he oiaio, o ka mea i haawi mai ai i ke ola i kona poe kanaka:

19 No ka mea, ke ole ka hoolapanai ana, ana i hana mai ai no kona poe kanaka, i hoomakaukauia’i mai ka hookumuia’na mai o ke ao nei; ke i aku nei au ia oukou, ina aole keia, ina ua make loa io no ka kanaka.

20 Aka hoi, e uhaiia’ku auanei na apo o ka make, a ke noho alii nei ke Keiki, a he mana kona maluna o ka poe make; nolaila, e lawe mai ana oia i ke alahouana o ka poe make.

21 A e hiki mai ana kekahi alahouana, he oiaio, he ala mua ana; he oiaio, he alahouana o ka poe i ola, a o ka poe e ola nei, a o ka poe e ola nei, a o ka poe e ola ana auanei, a hiki aku i ka alahouana o Kristo: no ka mea, pela oia e kapaia’i auanei.

22 Ano, o ke alahouana o ka poe kaula hemolele a pau, a o ka poe a pau i manaoio ai ma ka lakou olelo, a oia hoi ka poe a pau nana i malama i na kauoha a ke Akua, e puka mai auanei no lakou ma ke ala mua ana; nolaila, o lakou no ko ke ala mua ana.

23 Ua hoalaia lakou e noho me ke Akua nana i hoola ia lakou: pela lakou i loaa’i ke ola mau loa ma o Kristo la, nana i uhai aku i na apo o ka make.

24 A o lakou nei no ka poe e loaa ke ala mua ana; a o lakou no ka poe i make mamua o ko Kristo hiki mai, ma ko lakou naaupo, me ka hai ole ia’na o ke ola ia lakou. A pela ka Haku e lawe mai ai ka hoolaia’na o keia poe; a ia lakou hoi ke ala mua ana, a me ke ola mau loa, i hoolapanaiia e ka Haku.

26 Aka hoi, e weliweli a e haalulu imua o ke akua; no ka mea, he pono no ko oukou ke haalulu: no ka mea, aole e hoola ana ka Haku i ka mea e kipi ku e ana ia ia, a make iloko o ko lakou mau hewa; he oiaio, o ka poe a pau i make iloko o ko lakou mau hewa mai ka makamua mai o ke ao nei, o ka poe i kipi hookuli i ke Akua, ka poe i ike i na kanawai o ke Akua, aole nae i malama ia mau mea; o lakou no ka poe e loaa ole ai ke ala mua ana.

27 Nolaila, aole anei e pono oukou ke haalulu? No ka mea, aole e hiki mai ana ke ola i ka poe me neia; no ka mea, ua hoolapanai ole ka Haku i ka poe me neia; he oiaio, aole hoi i hiki i ka Haku ke hoolapanai i ka poe me neia: no ka mea, ua hiki ole ia ia ke hooli ia ia iho; no ka mea, ua hiki ole ia ia ke hoole i ka hoopai ina he kuleana kona.

28 [m 8, p 7] Ano, ke i aku nei au ia oukou, e hiki mai auanei ka manawa, e haiia’ku ai ke ola o ka Haku i na lahuikanaka a pau, a me na ohana, i na olelo, a me na kanaka.

29 He oiaio, e ka Haku, e hookiekie auanei kou poe kiai i ko lakou leo; me ka leo auanei lakou e hookani pu ai: no ka mea, e ike auanei lakou he maka no he maka, i ka wa a ka Haku e hoihoi hou mai ai ia Ziona.

30 E hookani olioli, e olioli pu oukou, e na wahi neoneo o Ierusalema: no ka mea, ua hoomaha mai ka Haku i kona poe kanaka, ua hoolapanai oia ia Ierusalema.

31 Ua hoike ka Haku i kona lima hemolele imua o na maka o na lahuikanaka: a e ike auanei na kukulu a pau o ka honua i ka hoola ana o ko kakou Akua.

1 [mokuna 8, paukū 8] Eia kekahi, mahope iho o ka olelo ana a Abinadi i keia mau olelo, o aku la oia i kona lima, a i aku la, E hiki mai auanei ka manawa e ike ai na mea a pau i ka hoola ana o ka Haku; e ike ai na lahuikanaka, a me na ohana, na olelo, a me na kanaka, he maka no he maka, a e hai aku imua o ke Akua ua pololei kona hoopai ana;

2 Alaila e kipakuia’ku ka poe hewa mawaho, a he kumu ko lakou e aoa ai, a e uwe ai, a e kanikau ai, a e uwi ai ko lakou mau niho; a o keia mea no ko lakou hoolohe ole i ka leo o ka Haku; nolaila, e hoolapanai ole ana ka Haku ia lakou,

3 No ka mea, ma ke ano kino a ma ke ano diabolo lakou, a he mana ko ka diabolo maluna o lakou; he oiaio, o kela nahesa kahiko nana i hoowalewale i ko kakou mau kupuna mua, a o ke kumu no ia o ko laua haule; a o ke kumu no ia o ka lilo ana o na kanaka a pau i ko ke kino, i ko ke kuko, a i ko ka diabolo, e ike ana i ka hewa mai ka pono, e hoolilo ana ia lakou iho malalo iho o ka diabolo.

4 Pela i lilo ai na kanaka a pau; a, aia hoi, ua lilo mau loa lakou, ina ua hoolapanai ole ke Akua i kona poe kanaka mai ko lakou wahi haule a make.

5 Aka, e hoomanao, o ka mea e hoomau ana ma ko kona kino ana, e hele ana ma na aoao o ka hewa a me ke kipikipi i ke Akua, e noho ana oia ma kona wahi e haule ai, a aia no i ka diabolo ka mana a pau maluna ona. Nolaila, aia no ia me he mea la i hana ole ia ka hoolapanai; he enemi oia i ke Akua; a o ka diabolo hoi he enemi oiai ke Akua.

6 Ano, ina aole e Kristo i hiki mai iloko o ke ao nei, e olelo ana no na mea e hiki mai ana, me he mea la ua hiki mai i keia manawa, aole loa i hiki mai ka hoolapanai ana.

7 [m 8, p 9] A ina ua ala ole o Kristo mai ka make mai, a i uhai aku ai i na apo o ka make, i ole ai lanakila ka lua kupapau, a i hope awa ole ka make, ina ua hiki ole mai ke alahouana.

8 Aka aia no he alahouana, nolaila, aole o ka lua lanakila ana, a ua aleia ka hope awa o ka make iloko o Kristo:

9 Oia no ka malamalama a me ke ola o ko ke ao nei, he oiaio, he malamalama pau ole, i hiki ole ke hoopouliia a mau loa aku; he oiaio, a he ola pau ole hoi, i ola ai e hiki ka make ma neia hope aku a mau loa aku.

10 He oiaio, e hookomo i keia make i ka make ole, a me keia palaho i ka palaho ole, a e laweia auanei e ku imua o kahi hookolokolo o ke Akua, e hookolokoloia e ia e like me ka lakou mau hana, ina paha he maikai ia mau mea, ina paha he ino ia mau mea.

11 Ina he maikai lakou, i ka alahouana o ke ola a me ka pomaikai pau ole; a ina he ino lakou i ke alahouana o ka poino pau ole; e haawiia’ku i ka diabolo nana i haakauwa ia lakou, oia no ka poino ana;

12 A ua hele e like me ko lakou makemake a iini iho ma ko ke kino; a ua kahea ole aku i ka Haku, oiai na lima o ke aloha i o ia’ku ia lakou, no ka mea, ua o ia na lima o ke aloha ia lakou, aole o lakou i makemake; ua aoia lakou no ka lakou hala, aole nae lakou i haalele aku ia mau mea; a ua kauohaia lakou e mihi, aole nae lakou i mihi.

13 Ano, aole anei e pono ai no oukou ke haalulu, a mihi i ko oukou mau hewa, a e hoomanao iloko a ma o Kristo la wale no e hiki ia oukou ke hoolaia?

14 Nolaila, ina e ao aku ana oukou i ke kanawai o Mose, e ao aku hoi he aka ia o kela mau mea e hiki mai ana;

15 E ao aku ia lakou e hiki mai ana ka hoolapanai ana ma o Kristo la ka Haku, oia no ka Makua io mau loa. Amene.

1 [mokuna 9, paukū 1] Eia kekahi, ia Abinadi i hoopau ai i keia mau olelo, kauoha ae la ke Alii e lawe aku na kahuna ia ia, a e kauoha aku e pepehiia oia.

2 Aka aia kekahi mea mawaena o lakou, o Alama kona inoa, a he mamo hoi ia na Nepai. A he kanaka opiopio no ia, a manaoio iho la oia i na olelo a Abinadi i olelo mai ai, no ka mea, ike aku la oia no ka hewa a Abinadi i hoike ku e mai ai ia lakou; nolaila, hoomaka ae la ia e noi aku i ke Alii e huhu ole aku ia Abinadi, aka e ae aku ia ia e hele aku me ka malu.

3 Aka ua huhu nui ae ke Alii, a kena aku la e kipakuia’ku o Alama maiwaena aku o lakou, a hoouna aku la oia i kana mau kauwa e alualu ia ia, i pepehi aku ai lakou ia ia.

4 Aka holo aku la oia imua o lakou, a pee aku la, a loaa ole oia ia lakou. A ua pee iho la oia no na la he nui, a nana i kakau i na olelo a pau a Abinadi i olelo mai ai.

5 [m 9, p 2] Eia kekahi, kena aku la ke Alii i kona poe koa e hoopuni ia Abinadi, a e hopu ia ia; a hikii lakou ia ia a hahao iho la iloko o ka halepaahao.

6 A mahope iho o na la ekolu, ua kukakuka pu me kana poe kahuna, kena ae la oia e kai hou ia oia imua ona.

7 A i aku la oia ia ia, E Abinadi, ua loaa ia makou i mea e hoohewa’i ia oe, a ua ku pono oe e make.

8 No ka mea, ua i mai oe, e iho mai auanei ke Akua, oia iho, mawaena o na keiki a kanaka; ano, no keia mea e pepehiia oe a make, ke ole oe e hoole i na olelo a pau au i olelo ino mai ai no’u, a no ko’u poe kanaka.

9 [m 9, p 3] Ano, i aku la o Abinadi ia ia: Ke i aku nei au ia oe, aole au e hoole i na olelo a’u i olelo aku ai ia oukou no keia poe kanaka, no ka mea, he oiaio ia mau mea; a ua ae aku au i hopuia mai au a i lilo iloko o ko oukou mau lima, i ike ai oukou he oiaio ia mau mea.

10 He oiaio, a e ae aku au e make au, aole hoi au e hoole i ka’u mau olelo, a e ku no ia mau mea me he hoike ku e la ia oukou. A ina e pepehi mai oukou ia’u, e hookahe no oukou i ke koko hala ole, a e ku no auanei ia mea no hoi i hoike ku e ia oukou, ma ka la hope.

11 [m 9, p 4] Ano, ua kokoke o ke Alii, o Noa, e hookuu aku ia ia, no ka mea, ua makau oia i kana olelo; no ka mea, ua makau oia e hiki mai auanei na hoopai o ke Akua maluna ona.

12 Aka hookiekie aku la na kahuna i ko lakou mau leo e ku e ana ia ia, a hoomaka ae la e hoohewa ia ia, i ka i ana: Ua hoino ae oia i ke Alii. Nolaila, ua hoonaukiukiia ke Alii me ka huhu ia ia, a hookuu aku la oia ia ia, e pepehiia oia a make.

13 [m 9, p 5] Eia kekahi, lalau aku la lakou ia ia a hahau i kona ili me na laau, he oiaio, a hiki aku i ka make.

14 Ano, i ka wa i hoomaka ai ka lapalapa e wela’i oia, kahea aku la oia ia lakou, me ka i ana’e:

15 Aia hoi, e like me ka oukou i hana mai ai ia’u, pela auanei ia na kau hua e pepehi i kekahi poe he nui wale, a e loaa na eha o ka make, ma ke ahi; a o keia mea no ko lakou manaoio ma ka hoola ana o ka Haku, o ko lakou Akua.

16 A e hiki mai keia, e hoopilikiaia oukou me na ano a pau o ka mai, no ka oukou hala.

17 He oiaio, a e hahauia oukou ma kela lima keia lima, a e hooauheeia a e hoopuehuia i o ia nei, me he pua hihiu la i hooauheeia e na holoholona hihiu a hae.

18 A ma ia la e alualuia oukou, a e hopuia oukou e na lima o ko oukou poe enemi, a, alaila e loaa ia oukou, me a’u e loaa nei, na eha o ka make ma ke ahi.

19 Pela ke Akua e hoopai aku ai i ka inaina maluna o ka poe e pepehi ana i kona poe kanaka. E ke Akua, e hookipa aku oe i kuu uhane.

20 Ano, ia Abinadi i olelo aku ai i keia mau olelo, haule iho la ia, ua loaa ka make ma ke ahi; he oiaio, ua pepehiia, no ka mea, aole oia hoole i no kauoha a ke Akua: ua hoopaa aku oia i ka oiaio o kana olelo ma kona make.

1 [mokuna 9, paukū 6] Ano, eia kekahi, o Alama ka mea nana i holo aku mai na kauwa aku a Noa, ke Alii, mihi iho la oia i kona mau hewa a me na hala, a hele malu aku la oia mawaena o na kanaka, a hoomaka ae la e ao aku i na olelo a Abinadi;

2 He oiaio, no na mea e hiki mai ana, a no ke alahouana hoi o ka poe make, a me ka hoolapanai ana i na kanaka, na mea i laweia mai ai ma o ka mana oa, a me ka eha, a me ka make o Kristo, a me kona alahouana a me kona pii ana i ka lani.

3 A o ka poe a pau i hoolohe i kana olelo ua ao aku oia ia lakou. a ao malu aku la oia ia lakou, i hiki ole ai i ke Alii ke ike ia mea. A ua nui loa ka poe manaoio i kana olelo.

4 A eia kekahi, o ka poe a pau i manaoio ia ia, hele aku la lakou i kahi i kapaia’i o Moramona, ua loaa ia wahi kona inoa mai ke alii mai, ma na palena o ka aina i hoopilikia e ia mamua i kekahi manawa, a i kekahi mau kau, e na holoholona hihiu.

5 Ano, aia no ma Moramona he punawai akaka, a hele pinepine aku la o Alama ilaila, aia kokoke ma ka wai he ululaau o na lauu uuku, malaila ia i pee ai ma ka la, mai ka imi ana o ke Alii.

6 Eia kekahi, o ka poe i manaoio ai ia ia, hele aku la lakou ilaila e hoolohe i kana mau olelo.

7 A eia kekahi, mahope iho o na la he nui wale, ua hoakoakoaia na kanaka he nui ma kahi o Moramona, e hoolohe mai i na olelo a Alama. He oiaio, ua hoakoakoaia lakou a pau, ka poe i manaoio ai i kana olelo, e hoolohe mai ia ia. A ao aku la oia ia lakou, a hai aku la i ka mihi ia lakou, a me ka hoolapanai ana, a me ka manaoio i ka Haku.

8 [m 9, p 7] A eia kekahi, i aku la oia ia lakou, Eia no hoi na wai o Moramona; no ka mea, pela ia wai i kapaia’i. A, ano, me oukou i makemake ai e komo iloko o ka pa o ke Akua, a e kapaia kona poe kanaka, a ua ae aku e kaikai kekahi i ko kekahi mau mea kaumaha, i mama lakou;

9 He oiaio, a ua ae aku e uwe iho me ka poe e uwe ana; he oiaio, a e hooluolu i ka poe ku pono e hooluoluia’i, a e ku me he poe hoike la no ke Akua i na manawa a pau, a i na mea a pau, a i na wahi a pau a oukou e noho ai, a hiki aku i ka make, i hoolaia mai ai oukou e ke Akua, a i helu pu ia’i me ka poe o ke ala mua ana, i loaa’i ia oukou ke ola mau loa:

10 Ano, ke i aku nei au ia oukou, ina o keia ka makemake o ko oukou mau naau, heaha la ko oukou mea ku e ai i ka bapetizoia’na ma ka inoa o ka Haku, i mea hoike imua ona ua komo oukou iloko o kekahi berita me ia, i hookauwa ai oukou nana, a e malama’i i kana mau kauoha, e hiki ia ia ke ninini mai i kona uhane he nui loa ae maluna o oukou?

11 Ano, i ka wa a na kanaka i lohe ai i keia mau olelo, paipai ae la lakou i ko lakou mau lima no ka olioli, a olelo ae la, Oia no ka makemake o ko makou mau naau.

12 [m 9, p 8] A eia kekahi, lawe aku la o Alama ia Helama, oia no kekahi o na mea mua, a hele ae la a ku iho la iloko o ka wai, a hea aku la, i ka i ana, E ka Haku, e ninini mai oe i kou uhane maluna o kau kauwa, e hiki ia ia ke hana i keia oihana me ka hemolele o ka naau.

13 A ia ia i olelo aku ai i keia mau olelo, aia maluna ona ka uhane o ka Haku, a i ae la ia, E Helama, ke bapetizo aku nei au ia oe, ua loaa ka mana mai ke Akua mana loa mai, i mea hoike ua komo oe iloko o kekahi berita e hookauwa aku ai nana a hiki aku oe i ka make, ma ke kino make; a e nininiia mai ka Uhane o ka Haku maluna iho ou; a nana e haawi mai i ke ola mau loa ia oe, ma o ka hoolapanai ana la o Kristo, ka mea ana i hoomakaukau ai mai ka hookumuia’na mai o ke ao nei.

14 A mahope iho o ka Alama olelo ana i keia mau olelo, ua kanu pu ia o Alama laua me Helama iloko o ka wai; a ala mai la laua, a hele mai la mailoko mai o ka wai e hauoli ana, i hoopihaia me ka uhane.

15 A eia hou, lawe aku la o Alama i kekahi mea e, a hele aku la i ka lua o ka manawa iloko o ka wai, a bapetizo aku la ia ia e like me ka mea mua, aole nae oia kanu hou ia ia iho iloko o ka wai.

16 A mamuli o keia ano oia i bapetizo aku ai i kela mea i keia mea i hele mai ai i kahi o Moramona: a o ka helu o lakou ua kokoke elua haneri a me na mea keu eho; he oiaio no, a ua bapetizoia lakou iloko o na wai o Moramona, a ua hoopihaia me ka lokomaikai o ke Akua:

17 A ua kapaia lakou ka ekalesia o ke Akua, a o ka ekalesia o Kristo, mai ia manawa aku. Eia kekahi, o ka mea i bapetizoia e ka mana a me ka pono o ke Akua, ua hui pu ia i kona ekalesia.

18 [m 9, p 9] Eia kekahi, ua loaa ia Alama ka mana mai ke Akua mai, a hoolilo iho la oia i na kahuna; i hookahi kahuna i kela kanalima i keia kanalima o lakou, oia kana i hoolilo ai e hai olelo ia lakou, a e ao aku ia lakou no na mea e pili ana i ke aupuni o ke Akua.

19 A kauoha aku la oia ia lakou e ao ole aku lakou i kekahi mea, i ole ia he mea ana i ao aku ai, a i oleloia’i no hoi e na waha o na kaula hemolele.

20 Ho oiaio, kauoha aku la oia ia lakou e ao ole aku lakou i kekahi mea, i ka mihi a me ka manaoio i ka Haku wale no, nana i hoolapanai i kona poe kanaka.

21 A kauoha aku la oia ia lakou, mai paio kekahi me kekahi, aka na lakou e nana imua me ka maka hoohahi, me ka manaoio hookahi a me ka bapetizo hookahi; me ko lakou naau i hookuiia’i iloko o ke kuikahi a o ke aloha, kekahi i kekahi.

22 A pela oia i kauoha aku ai ia lakou e hai aku. A pela lakou i lilo ai i poe keiki na ke Akua.

23 A kauoha aku la oia ia lakou e malama lakou i ka la Sabati, a e hoano ia, a e aloha aku no hoi lakou i ka Haku i ko lakou Akua i kela la i keia la.

24 A kauoha aku la oia ia lakou, na na kahuna ana i hoolilo aku ai e hana me ko lakou mau lima ponoi no ko lakou ola;

25 A ua hookaawaleia i hookahi la ma kela hebedoma me keia hebedoma no lakou e houluulu ia lakou iho e ao aku i kanaka, a e hoomana aku i ka Haku i ko lakou Akua, a e hoakoakoa no hoi ia lakou iho i na manawa a pau e hiki ai.

26 Aole no na kahuna e hilinai aku maluna o na kanaka no ko lakou ola; aka, e loaa no ia lakou ka lokomaikai o ke Akua no ka lakou hana, i hiki ai ia lakou ke mahuahua ma ka uhane, me ka ike o ke Akua, i hiki ia lakou ke ao aku me ka mana a me ka pono mai ke Akua mai.

27 A eia hou, kauoha aku la o Alama i na kanaka o ka ekalesia e haawi aku i ko lakou waiwai, kela mea keia mea e like me kona lako; ina he lako nui kona, e haawi nui aku oia; a ina he lako uuku kona, he uuku ke makemakeia mai; a e haawiia’ku i ka mea nele.

28 A pela lakou e haawi aku ai i ko lakou waiwai, no ko lakou aloha maoli iho a me na makemake maikai i ke Akua, a i kela poe kahuna i nele, he oiaio, a i na mea nele, kapa ole a pau.

29 A hai aku la oia ia mea ia lakou, no kona kauohaia’na mai e ke Akua; a hele pololei lakou imua o ke Akua, e haawi ana kekahi i kekahi, ma ko ke kino a ma ko ka uhane no hoi, e like me ko lakou nele a me ko lakou makemake.

30 [m 9, p 10] Ano, eia kekahi, ua hanaia keia mau mea a pau ma Moramona; he oiaio, ma na wai o Moramona, ma ka ululaau kokoke i na wai o Moramona: he oiaio, o kahi o Moramona, o na wai o Moramona, o ka ululaau o Moramona, he nani wale ia mau wahi ma na maka o ka poe i hiki malaila i ka ike i ko lakou Mea Hoolapanai; he oiaio, he nani ko lakou pomaikai, no ka mea, e memele aku lakou me ka hoolea aku ia ia, ia ao aku ia ao aku.

31 A ua hanaia keia mau mea ma na palena o ka aina, i hiki ole ai i ke Alii ke ike ia mau mea.

32 Aka hoi, ua ike aku la ke Alii i ka naele ana mawaena o na kanaka, a hoouna aku la oia i kana poe kauwa e hoomaka’kiu. Nolaila, i ka la a lakou e hoakoakoa ana e hoolohe i ka olelo a ka Haku, ua loaa lakou i ke Alii.

33 Ano, i ae la ke Alii e hookonokono ana o Alama i na kanaka e kipi aku ia ia; nolaila, hoouna mai la oia i kona poe koa e luku mai ia lakou.

34 A eia kekahi, ua aoia mai o Alama, a me ka poe kanaka o ka Haku no ka hele ana mai o ko ke Alii poe koa; nolaila, lawe aku la lakou i ko lakou mau halelewa a me ko lakou mau ohana, a haele aku la iloko o ka waonahele.

1 [mokuna 9, paukū 11] Eia kekahi, hoi aku la ka poe koa o ke Alii, ua imi make hewa no ka poe kanaka o ka Haku.

2 Ano hoi, ua uuku ka poe koa o ke Alii, ua hooemiia, a hoomaka ae la ke ku e mawaena o na koena o na kanaka.

3 A hoomaka ae la he poe uuku e ha aku i na olelo hooweliweli i ke Alii, a hoomaka iho la ka paio nui mawaena o lakou.

4 Ano, mawaena o lakou kekahi kanaka o Gideona kona inoa, a he kanaka ikaika ia, a he enemi i ke Alii, nolaila, unuhi ae la oia i kana pahikaua a hoohiki iho la ma kona inaina, nana e pepehi i ke Alii.

5 A eia kekahi, hakaka aku la oia me ke Alii, a i ke Alii i ike ai ua kokoke ia e lanakila ai maluna ona, hee aku la oia, a holo a pii ae la maluna o ka hale kiai, ua kokoke ia i ka luakini.

6 A alualu ae la o Gideona ia ia a kokoke oia e pii maluna o ka hale kiai e pepehi aku i ke Alii, a alawa ae la ke Alii i kona mau maka i ka aina o Semalona, a, aia ka! ka poe koa o ko Lamana poe iloko o na palena o ka aina.

7 Ano, uwe iho la ke Alii i ka eha o kona uhane, me ka i ana’e, E Gideona e, e hookuu mai ia’u, no ka mea, aia no ko Lamana poe maluna o kakou, a e luku no lakou ia kakou nei; he oiaio, e luku mai no lakou i ko’u poe kanaka.

8 Ano, aole o ke Alii i manao nui i kona poe kanaka, e like me kona ola iho; aka hoi, hookuu aku la o Gideona kona ola.

9 A kauoha ae la ke Alii i na kanaka e hee aku, a hele aku la oia imua o lakou, a hee aku la lakou iloko o ka waonahele me ka lakou poe wahine a me ka lakou mau keiki.

10 A eia kekahi, alualu mai la ko Lamana poe ia lakou, a loaa lakou, a hoomaka iho la e pepehi mai ia lakou.

11 [m 9, p 12] Ano, eia kekahi, kauoha ae la ke Alii ia lakou e haalele aku na kanaka a pau i ka lakou mau wahine a me ka lakou mau keiki, a e auhee aku imua o ko Lamana poe.

12 Ano, ua nui wale ka poe aole e haalele aku ia lakou, aka ua manao e aho ka noho a e make pu me lakou.A o ke koena haalele aku la lakou i ka lakou poe wahine a i ka lakou poe keiki a hee aku la.

13 Eia kekahi, o ka poe i noho ai me ka lakou poe wahine a me ka lakou mau keiki, kauoha ae la lakou i ka lakou mau kaikamahine maikai e ku aku a e noi aku i ko Lamana poe, mai pepehi mai la lakou.

14 Eia kekahi, aloha mai la ko Lamana poe ia lakou, no ka mea, ua hoolealeaia lakou me ka nani o ka lakou poe wahine;

15 Nolaila, hookuu mai la ko Lamana poe i ko lakou mau ola, a lawe pio aku la ia lakou, a kai aku la ia lakou i ka aina o Nepai, a ae mai la ia lakou e noho ma ka aina, ke haawi aku lakou ia Noa, ke Alii, iloko o na lima o ko Lamana poe, a me ko lakou waiwai, oia, i ka hapalua o na mea a pau a lakou; i ka hapalua o ko lakou gula, a i ko lakou kala, a me ko lakou mau mea maikai a pau; a pela lakou e hookupu waiwai aku ai i ke Alii o ko Lamana poe, ia makahiki aku ia makahiki aku.

16 Ano, mawaena o ka poe i lawe pio ia kekahi o na keikikane a ke Alii, o Limai kona inoa.

17 Ano, ua makemake o Limai e pepehi ole ia kona makuakane; aka hoi, aole o Limai i naaupo no na hewa o kona makuakane, no ka mea, he kanaka pono no hoi oia.

18 [m 9, p 13] Eia kekahi, hoouna malu aku la o Gideona i kekahi poe kanaka iloko o ka waonahele, e imi aku i ke Alii, a me ka poe pu me ia. A eia kekahi, halawai aku la lakou me na kanaka a pau ma ka waonahele, koe wale no ke Alii a me kana poe kahuna.

19 Ano, ua hoohiki iho la lakou ma ko lakou mau naau e hoi mai i ka aina o Nepai, a ina ua pepehiia ka lakou poe wahine a me ka lakou mau keiki, a me ka poe hoi i noho pu ai me lakou, alaila e imi iho lakou e hoopai, a e make pu hoi me lakou.

20 A kauoha ae la ke Alii, mai hoi lakou; a ua huhu lakou i ke Alii, a pepehi aku la ia ia, i ka make ma ke ahi.

21A kokoke lakou e lalau i na kahuna hoi a e pepehi ia lakou, a hee aku la lakou la imua o lakou.

22 [m 9, p 14] Eia kekahi, kokoke lakou e hoi mai i ka aina o Nepai, a halawai ae la lakou me na kanaka o Gideona. A hai ae la na kanaka o Gideona ia lakou i na mea a pau i hiki mai ai maluna o ka lakou poe wahine a me na keiki; a no ka ae ana mai o ko Lamana poe i noho ai lakou ma ka aina, ma ka hookupu waiwai ana i ko Lamana poe i ka hapalua o na mea a pau a lakou.

23 A hai mai la ka poe kanaka ina kanaka o Gideona ua pepehi ae la lakou i ke Alii, a ua hee aku la na kahuna ana mai o lakou aku iloko loa o ka waonahele.

24 A eia kekahi, mahope iho o ka pau ana o keia hana, hoi ae la lakou i ka aina o Nepai, e hauoli ana, no ka pepehi ole ia ana o ka lakou poe wahine a me ka lakou mau keiki; a hai ae la lakou ia Gideona i ka mea a lakou i hana’i i ke Alii.

25 [m 9, p 15] Eia kekahi, hoohiki mai la ke Alii o ko Lamana poe i kahi hoohiki ia lakou, aole e pepehi mai kona poe kanaka ia lakou.

26 A o Limai hoi, o ke keiki a ke Alii no ia, a ua hooiliia mai ke aupuni maluna one e na kanaka, oia ka i hoohiki aku i kahi hoohiki i ke Alii o ko Lamana poe, na kona poe kanaka e hookupu waiwai aku ia ia, oia, i ka hapalua o na mea a pau a lakou.

27 [m 9, p 16] Eia kekahi, hoomaka ae la o Limai e hookupaa i ke aupuni, a e hookupaa i ka malu mawaena o kona poe kanaka.

28 A hoonoho iho la ke Alii o ko Lamana poe i poe koa a puni o ka aina, i hiki ai ia ia ke malama i na kanaka o Limai iloko o ka aina, i hiki ole ia lakou ke haele aku iloko o ka waonahele; a hanai aku la oia i kona poe koa ma ka waiwai auhau ana i loaa’i mai ko Nepai poe mai.

29 Ano, ua loaa i ke Alii Limai ka malu amau ma kona aupuni, no na makahiki elua, i ole hoopilikia mai ai ko Lamana poe ia lakou, aole hoi i imi e luku mai ia lakou.

1 [mokuna 9, paukū 17] Ano, ma Semalona kekahi wahi, kahi a na kaikamahine a ko Lamana poe i hoakoakoa ai e mele, a e hulahula a e hoolealea ia lakou iho.

2 A eia kekahi, malaila i kekahi la keahi poe he uuku o lakou i hoakoakoaia’i e mele a e hula.

3 Ano, ua hilahila na kahuna a ke Alii Noa e hoi hou i ke kulanakauhale o Nepai, a e makau ana hoi i ka pepehi mai o na kanaka ia lakou, nolaila, aole o lakou i aa e hoi hou i ka lakou poe wahine a i ka lakou poe keiki.

4 A ua noho iho la ma ka waonahele, a ua loaa na kaikamahine a ko Lamana poe ia lakou, pee a hookalakupua iho la lakou ia lakou la;

5 A i ka wa i hoakoakoa ai he poe uuku o lakou e hula, puka ae la lakou iwaho o ko lakou mau wahi i pee ai, a hopu ia lakou a kaikai aku la ia lakou iloko o ka waonahele; he oiaio, he iwakalua a me kumamaha o na kaikamahine a ko Lamana poe lakou i lawe aku ai iloko o ka waonahele.

6 [m 9, p 18] Eia kekahi, i ka wa a ko Lamana poe i ike ai ua nalowale ka lakou mau kaikamahine, huhu iho la lakou i ka poe kanaka o Limai; no ka mea, manao iho la lakou o ka poe kanaka o Limai no ia.

7 Nolaila, hoouna aku la lakou i ko lakou poe koa; he oiaio, o ke Alii kekahi i hele i hele aku la imua o kona poe kanaka; a pii mai la lakou i ka aina o Nepai, e luku mai i na kanaka o Limai.

8 Ano, ua ike aku o Limai ia lakou mai ka hale kiai aku; ua ike aku la oia i ko lakou mau mea makaukau a pau e kaua ai; nolaila, houluulu ae la oia i kona poe kanaka, a hoohalua iho la ia lakou ma na kula, a ma na ululaau.

9 A eia kekahi, i ka wa i hiki mai ai ko Lamana poe, hoomaka ae la ka poe kanaka o Limai e lele maluna o lakou mai ko lakou mai ko lakou mau wahi i pee ai, a hoomaka e pepehi aku ia lakou.

10 [m 9, p 19] Eia kekahi, lilo iho la ke kaua i ikaika nui loa, no ka mea, kaua iho la lakou e like me na liona no ko lakou mea i pio ai.

11 A eia kekahi, hoomaka ae la ka poe kanaka o Limai e hooauhee aku i ko Lamana poe imua o lakou; aka aole i like ka nui o lakou me ko ka hapalua o ko Lamana poe.Aka kaua aku la lakou no ko lakou ola, a no ka lakou poe wahine, a no ka lakou poe keiki; nolaila, hooikaika aku la lakou, a e like me na deragona lakou i kaua ai.

12 [m 9, p 20] Eia kekahi, loaa iho la ia lakou ke Alii o ko Lamana poe mawaena o ko lakou poe make; aole nae i make oia, ua hoehaia a haaleleia ma ka honua, no ka holo kiki o kona poe kanaka.

13 A lawe aku la lakou ia ia a wahi ae la i kona mau eha, a kai ae la ia ia imua o Limai, a i ae la, Aia hoi, eia no ke Alii o ko Lamana poe; a ua loaa ia ia ka eha, a hina iho la mawaena o ka poe make, a ua haalele mai lakou ia ia; a, aia hoi, ua lawe mai makou ia ia imua ou; a, ano, e ae mai oe ia makou e pepehi aku ia ia.

14 Aka i aku la o Limai ia lakou, Mai noho oukou a pepehi ia ia, aka e lawe mai ia ia ia nei, i ike ai au ia ia. A kai ae la lakou ia ia. A i aku la o Limai ia ia, Heaha la ko oukou kumu i pii mai ai e kaua mai i ko’u poe kanaka? Aia hoi, aole o ko’u poe kanaka i uhai aku i ka hoohiki a’u i hoohiki aku ai ia oe; nolaila, no ke aha la oe i uhai mai ai i ka hoohiki au i hoohiki mai ai i ko’u poe kanaka?

15 [m 9, p 21] Ano, i mai la ke Alii, Ua uhai aku au i ka hoohiki, no ke kaikai ana ae o kou poe kanaka i na kaikamahine a ko’u poe kanaka; nolaila, i ko’u huhu ua kena aku au i ko’u poe kanaka e pii mai e kaua i kou poe kanaka.

16 Ano, aole o Limai i lohe e iki no ia mea; nolaila, i aku la oia, E huli aku no au mawaena o ko’u poe kanaka, a o ka mea nana i hana i keia mea e make no oia. Nolaila, kauoha ae la oia e imiia mawaena o kona poe kanaka.

17 Ano, ia Gideona i lohe ai i keia mau mea, a o ko ke Alii kapena no ia, hele ae la ia a i ae la i ke Alii, E, ke noi nei au ia oe e hooki ae, a mai imi i keia poe kanaka, a mai kau i keia mea maluna o lakou.

18 No ka mea, aole anei oe i hoomanao i na kahuna a kou makuakane, ka poe a keia poe kanaka i imi aku ai e pepehi? A, aole anei lakou iloko o ka waonahele? Aole anei lakou ka poe nana i aihue ai i na kaikamahine a ko Lamana poe?

19 Ano hoi, e hai aku i ke Alii no keia mau mea, nana e hai aku i kona poe kanaka, i hoolealeaia mai ai lakou ia kakou; no ka mea, e hoomakaukau ana lakou i keia wa e pii ku e mai ia kakou; a, aia hoi, he kakaikahi wale no kakou.

20 Aia hoi! ke hele mai la lakou me ko lakou puali he lehulehu; a i ole e hoolaulea aku ke Alii ia lakou no kakou e luku io ia no kakou.

21 No ka mea, aole anei i ko ai na olelo a Abinadi, ana i wanana ku e mai ai ia kakou? A o keia a pau no ko kakou hoolohe ole i na olelo a ka Haku, a huli ae mai ka kakou hala aku?

22 Ano, e hoolaulea aku kakou i ke Alii, a e hooko aku kakou i ka hoohiki a kakou i hoohiki aku ai ia ia: no ka mea, e aho kakou e noho iloko o ka luhi, mamua o ka lilo ana o ko kakou mau ola; nolaila la, e hooki aku kakou i ka hookahe nui ana i ke koko me neia.

23 Ano, hai aku la o Limai i na mea a pau no kona makuakane, a me na kahuna i hee aku ai iloko o ka waonahele, a hooili aku la i ka halihali ana’ku o ka lakou mau kaikamahine i ua poe la.

24 [m 9, p 22] Eia kekahi, hoolauleaia iho la ke Alii i kona poe kanaka; a i mai la oia ia lakou, E haele aku kakou e halawai pu me ko’u poe kanaka, me na mea kaua ole; a ke hoohiki nei au ia oukou me ka hoohiki, aole e pepehi mai o’u poe kanaka i kou poe kanaka.

25 Eia kekahi, hahai aku la lakou i ke Alii, a hele aku la me na mea kaua ole e halawai me ko Lamana poe. A halawai aku la lakou me ko Lamana poe; a kulou iho la ke Alii o ko Lamana poe imua o lakou la, a noi aku la ia lakou no ka poe kanaka o Limai.

26 A i ko Lamana poe i ike mai ai i ka poe kanaka o Limai, a, aole o lakou mea kaua, menemene mai la lakou ia lakou nei, a ua hoolauleaia lakou, a hoi aku la me ko lakou Alii me ka malu i ko lakou aina iho.

1 [mokuna 9, paukū 23] Eia kekahi, hoi aku la o Limai a me kona poe kanaka i ke kulanakauhale o Nepai, a hoomaka ae la e noho hou ma ka aina me ka malu.

2 Eia kekahi, mahope iho o na la he nui wale, hoomaka hou ko Lamana poe e hooeuia me ka huhu i ko Nepai poe; a hoomaka lakou e komo mai iloko o na palena o ka aina a puni.

3 Ano, aole o lakou i aa e pepehi mai ia lakou no ka hoohiki a ko lakou Alii i hoohiki aku ai ia Limai; aka, na lakou la i papai mai ia lakou ma na papalina o lakou, a i hookiekie ae maluna o lakou; a i hoomaka ai e kau mai i na ukana kaumaha maluna o ko lakou mau kua, a e hahau mai ia lakou me lakou la i hana ai i kahi hoki leo ole;

5 Ano, ua nui na popilikia o ko Nepai poe; a, aole hoi kekahi ala i hiki ai ia lakou ke hoopakele ia lakou iho mailoko ae o ko lakou la mau lima, no ka mea, ua hoopuni ko Lamana poe ia lakou, ma kela aoao keia aoao.

6 [m 9,p 24] A eia kekahi, hoomaka ae la na kanaka e ohumu me ke Alii no ko lakou popilikia; a hoomaka lakou e makemake e hele ku e aku ia lakou la e kaua. A hoopilikia nui lakou i ke Alii me ko lakou ohumu ana; nolaila, ae aku la oia ia lakou e hana e like me ko lakou makemake.

7 A houluulu hou ae la lakou ia lakou iho, a kahiko mai la i ko lakou mau mea kaua, a hele aku la e ku e i ko Lamana poe, e kipaku aku ia lakou mawaho o ko lakou aina.

8 Eia kekahi, lanakila mai la ko Lamana poe maluna o lakou, a hooauhee mai ia lakou, a pepehi mai la i na mea he nui o lakou.

9 Ano, he uwe a he kanikau nui mawaena o na kanaka o Limai; e uwe ana ka wahinekanemake no kana kane; ke keikikane a me ke kaikamahine e uwe ana no ko laua makuakane; a me na hoahanau i ko lakou poe hoahanau.

10 Ano, he nui na wahinekanemake ma ka aina; a uwe ikaika lakou ia la aku ia la aku, no ka mea, ua hiki mai ka makau nui i ko Lamana poe maluna o lakou.

11 A eia kekahi, ua hoonaukiuki ko lakou uwe ana i ka poe i koe o na kanaka o Limai e huhu aku i ko Lamana poe. A hele hou aku la lakou i ke kaua; aka ua hooauhee hou ia lakou, me ka luku nui.

12 He oiaio, hele hou aku la lakou, i ke kolu o ka manawa, a pela hou hoi i lukuia’i; a o ka poe i pepehi ole ia, hoi hou aku la i ke kulanakauhale o Nepai.

13 A hoohaahaa iho la lakou ia lakou iho ilalo i ka lepo, e hookauwa ana ia lakou iho i ke auamo hooluhi, e ae ana e papaiia, a e hahauia i o ia nei, a e hookaumahaia, mamuli o na makemake o ko lakou poe enemi.

14 A hoohaahaa iho la lakou ia lakou iho iloko o ka haahaa; a ua kahea ikaika aku la lakou i ke Akua; he oiaio, a pau ae la ka la lakou i kahea aku ai i ko lakou Akua nana e hoopakele mai ia lakou mailoko mai o ko lakou mau popilikia.

15 A, ano, ua lohi ka Haku ke hoolohe mai i ko lakou hea ana, no ka lakou mau hala; aka hoi, hoolohe mai nae ka Haku i ka lakou pule ana, a hoomaka ae la e hoopalupalu ae i na naau o ko Lamana poe, i hoomaka’i lakou e hoomama mai i na ukana kaumaha o lakou: aole nae ka Haku i manao he pono ke hoopakele ia lakou mailoko aku o ka noho luhi ana.

16 [m 9, p 25] Eia kekahi, hoomaka lakou e hoopomaikai iki ia ma ka aina, a hoomaka ae la lakou e hooulu i ka hua liilii he nui ae, a me na pua a me na ohana holoholona, i ole lakou i pilikia me ka pololi.

17 Ano, he nui loa na wahine, mamua o na kane; nolaila, kauoha ae la ke Alii o Limai i kela kanaka i keia kanaka e haawi aku no ke ola o na wahinekanemake a me na keiki a lakou, i ole ai lakou e make me ka pololi: a o keia ka lakou i hana’i, no ka nui o ko lakou poe i pepehiia.

18 Ano, ua noho pu iho la ka poe kanaka o Limai i kahi hookahi, me ia i hiki ai ia lakou, me ka malama pu i ko lakou hua liilii, a me ko lakou mau pua holoholona;

19 A o ke Alii hoi aole oia i hele wale aku iwaho o na pa o ke kulanakauhale, ke ole kona poe koa pu me ia, e makau ana o haula oia iloko o na lima o ko Lamana poe.

20 A kauoha ae la oia i kona poe kanaka e kiai i ka aina a puni, i hiki paha ia lakou ke hopu aku i kela poe kahuna, ka poe i hee aku ai iloko o ka waonahele, ka poe nana i aihue i na kaikamahine a ko Lamana poe, a o ka poe hoi i ea mai ai i keia luku nui i hiki maluna o lakou;

21 No ka mea, e makemake ana lakou e hopu aku ia lakou la, i hiki ia lakou ke hoopai aku ia lakou la: no ka mea, ua komo mai lakou la iloko o ka aina o nepai ma ka po, a halihali aku la i ko lakou hua liilii a me na mea he nui o ko lakou mau mea maikai; nolaila, hoomaka’kiu lakou ia lakou la.

22 [m 9, p 26] Eia kekahi, aole haunaele hou mawaena o ko Lamana poe a me ka poe kanaka o Limai, a hiki loa i ka wa a Amona me kona mau hoahanau i komo ai iloko o ka aina.

23 A aia mawaho o na pukapa ke Alii me kona poe koa, a ike aku la oia ia Amona a me kona mau hoahanau; a e kuhi ana oia o na kahuna a Noa lakou, nolaila, kena aku la oia e hopuia lakou, a hikiiia, a hahaoia iloko o ka halepaahao. A ina o lakou na kahuna a Noa, ina ua kauoha aku oia e pepehiia lakou;

24 Aka ia ia i ike ai aole o lakou ka! aka o kona mau hoahanau lakou, a ua hiki mai mai ka aina o Zarahemela mai, ua hoopihaia oia me ka olioli nui loa.

25 Ano, ua hoouna e aku la ke Alii o Limai, mamua o ka hiki ana mai o Amona ma, i kekahi poe kanaka he uuku e imi aku i ka aina o Zarahemela; aka aole i hiki ia lakou ke loaa ia wahi; a ua hili lakou ma ka waonahele.

26 Aka hoi, ua loaa ia lakou kahi aina i piha e i na kanaka; he oiaio, he aina i uhiia me na iwi maloo; he oiaio, i piha e i na kanaka, a i anai e ia mamua; a ua kuhi iho la lakou o ka aina o Zarahemela ia, a hoi hou mai la i ka aina o Nepai, ua hiki e lakou ma na palena o ka aina he mau la uuku mamua o ka hiki ana o Amona ma.

27 A lawe pu mai la lakou i kekahi mooolelo me lakou, he mooolelo hoi ia o ka lahuikanaka nona na iwi a lakou i loaa’i; a ua kahakahaia ia mau mea maluna o na papa gula.

28 Ano, hoopiha hou ia o Limai me ka olioli, ia ia i lohe ai mai ka waha o Amona aia i ke Alii Mosia he haawina mai ke Akua mai, i hiki ia ia ke hoike mai i ke ano o na kaha me neia; he oiaio, o Amona hoi kekahi i hauoli pu.

29 Aka, ua hoopihaia o Amona a me kona poe hoahanau me ka eha, no ka nui loa o ko lakou poe hoahanau i pepehiia’i;

30 A no ka lilo ana hoi o ke Alii Noa a me kana poe kahuna i kumu no na kanaka e hana i na hewa a me na hala he nui wale i ka Akua; a uwe iho la hoi lakou no ka make ana o Abinadi; a no ka hele ana’ku o Alama, a me na kanaka i hele pu me ia, o ka poe i lilo i ekalesia o ke Akua ma ka ikaika a me ka mana o ke Akua, a me ka manaoio i na olelo i oleloia’i e Abinadi;

31 He oiaio, uwe iho la lakou no ko lakou hele ana’ku, no ka mea, aole o lakou i ike i kahi a lakou i holo aku ai. Ano, ina ua hiki ia lakou ke hui pu me lakou la, ina ua olioli, no ka mea, ua komo lakou iho iloko o kahi berita me ke Akua, e hookauwa aku nana, a e malama i kana mau kauoha.

32 Ano, mahope o ka hiki ana o Amona ua komo ke Alii, o Limai, hoi iloko o kahi berita me ke Akua, a me kekahi poe hoi he nui o kona poe kanaka, e hookauwa aku nana, a e malama i kana mau kauoha.

33 [m 9, p 27] Eia kekahi, ua makemake ke Alii, o Limai, a me na kanaka he nui ona e bapetizoia; aka aole kekahi mea ma ka aina ia ia ka mana mai ke Akua mai. A makemake ole o Amona e hana i keia mea, e manao ana ia ia iho he kauwa pono ole;

34 Nolaila,aole lakou i hoolilo ia lakou iho i ekalesea ma ia manawa, e kali ana i ka uhane o ka Haku. Ano, ua makemake lakou e lilo e like me Alama a me kona poe hoahanau, ka poe i holo aku ai iloko o ka waonahele.

35 Ua makemake lakou e bapetizoia, i mea hoike a i mea e akaka’i e ae ana lakou e hookauwa aku na ke Akua me ko lakou mau naau a pau; aka hoi, ua hoopanee aku la lakou i ka manawa: a e haawiia’ku auanei ka mooolelo o ko lakou bapetizoia’na.

36 Ano, e noonoo mau ana o amona a me kona poe kanaka, a me ke Alii Limai a me kona poe kanaka, e hoopakele aku ia lakou iho mailoko aku o na lima o ko Lamana poe, a mai ka noho luhi ana aku.

1 [mokuna 10, paukū 1] Ano, hoomaka ae la o Amona a me ke Alii Limai e kuka pu me na kanaka, no ka mea a lakou e hana’i, e hoopakele aku ia lakou iho, mailoko aku o ka noho luhi ana; a kauoha ae la laua i na kanaka a pau e hoakoakoa ia lakou iho: a ua hana laua i keia i hiki ia laua ke loaa ka leo o na kanaka no ia mea.

2 A eia kekahi, aole i hiki ia lakou ke loaa kekahi mea e hoopakele ai ia lakou iho mailoko aku o ka noho luhi ana, eia wale no, e lawe aku i ka lakou poe wahine a me ka lakou mau keiki, a me na pua a me na ohana holoholona o lakou, a me na halelewa o lakou, a e hele aku iloko o ka waonahele; no ka mea, no ka lehulehu o ko Lamana poe ua hiki ole i ka poe kanaka o Limai ke paio aku me lakou, me ka manao e hoopakele ia lakou iho mailoko aku o ka noho luhi ana, ma o ka pahikaua la.

3 [m 10, p 2] Ano, hele ae la o Gideona a ku iho la imua o ke Alii, a i aku la ia ia, Ano, E ke Alii, ua hoolohe e mai oe mamua i ka’u olelo i na manawa he nui, ia kakou e kaua ana me ko kakou poe hoahanau, me ko Lamana poe .

4 Ano, e ke Alii, ina aole oe i ike mai he kauwa i pono ole au, a ina ua hoolohe iki mai oe i ka’u olelo mamua aku nei, a ua pomaikai oe ia mau olelo, pela au e makemake nei ia oe e hoolohe mai i ka’u olelo i keia manawa, a e lilo au i kauwa nau, a e hoopakele aku i keia poe kanaka mailoko aku o ka noho luhi ana.

6 Aia no ke alahele hope ma ka pa hope, ma ke kua o ke kulanakauhale. Ua ona ko Lamana poe, ka poe koa o ko Lamana, ma ka po; nolaila, e hoouna aku kakou i olelo hoolaha mawaena o keia poe kanaka a pau, na lakou e houluulu mai i na pua a me na ohana holoholona o lakou, e hiki ia lakou ke lawe aku ia lakou la iloko o ka waonahele, ma ka po.

7 A e hele aku au e like me kau kauoha, a e hookupu aku i ka auhau hope o ka waina i ko Lamana poe, a e ona lakou; a na kakou e hele aku ma ke alahele huna aia ma ka hema o kahi hoomoana’i, ia lakou e ona ai a e hiamoe ai;

8 Pela kakou e hele aku ai me ka kakou poe wahine a me ka kakou mau keiki, o na pua holoholona o kakou, a me na ohana holoholona o kakou iloko o ka waonahele; a e hele no kakou mawaho o ka aina o Sailoma.

10 A kauoha aku la ke Alii Limai i kona poe kanaka e houluulu mai i na pua holoholona o lakou; a hoouna aku la oia i ka hookupu o ka waina i ko Lamana poe; a hoouna aku la hoi oia i waina hou ae, i makana ia lakou: a inu nui iho la lakou i ka waina a ke Alii Limai i hoouna aku ai ia lakou.

11 [m 10, p 3] A eia kekahi, hele aku la ka poe kanaka o ke Alii Limai ma ka pe iloko o ka waonahele, me na pua holoholona o lakou, a me na ohana holoholona o lakou, a hele aku la lakou mawaho o ka aina o Sailoma ma ka waonahele, a hele aku la me ka ihu i ka aina o Zarahemela, i alakaiia’i e Amona a me kona poe hoahanau.

12 A ua lawe aku la lakou i ko lakou gula a pau, a me ke kala, a me ko lakou mau mea maikai, i hiki ai ia lakou ke hali; a me ka lakou ai pu no hoi me lakou, iloko o ka waonahele; a nauwe aku la lakou ma ko lakou hele ana.

13 A hala na la he nui wale ma ka waonahele, hiki aku la lakou i ka aina o Zarahemela, a hui pu iho la me ko Mosia poe kanaka, a lilo ae la i poe kanaka malalo iho ona.

14 A eia kekahi, loaa ae la lakou ia Mosia me ka olioli; a loaa ia ia hoi ko lakou mau mooolelo, a me na papa mooolelo hoi a ka poe kanaka o Limai i loaa’i.

15 Ano, eia kekahi, i ka wa i ike ai ko Lamana poe ua haele aku la ka poe kanaka o Limai ma ka po, hoouna aku la lakou i kekahi poe koa iloko o ka waonahele e alualu mai ia lakou nei;

16 A ia lakou i alualu ai i na la elua, aole i hiki ia lakou ke hahai i ko lakou nei mau kapuai; nolaila, ua hili iho la lakou ma ka waonahele.

He mooolelo no Alama a me na kanaka o ka Haku, ka poe i kipakuia mai ai iloko o ka waonahele e ka poe kanaka o Noa, ke Alii.

1 [mokuna 11, paukū 1] Ano, ua aoia o Alama i ka Haku, e hiki mai ana ka poe koa o ke Alii Noa maluna o lakou, a ua ao aku hoi ia mea i kona poe kanaka, nolaila, houluulu ae la lakou i na pua holoholona o lakou, a lawe aku la i ko lakou hua liilii, a haele aku la iloko o ka waonahele imua o ka poe koa o ke Alii Noa.

2 A hooikaika mai la ka Haku ia lakou, i hiki ole ai i ka poe kanaka o ke Alii Noa ke loaa aku lakou, e luku ia lakou.

4 A hiki aku la lakou i kahi aina, he oiaio, i kahi aina oluolu a nani loa; i kahi aina o ka wai maemae.

5 A kukulu iho la lakou i na halelewa o lakou, a hoomaka ae la e mahiai i ka honua, a hoomaka ae la e kukulu i na hale, a ia mea aku ia mea aku; he oiaio, ua molowa ole lakou, a ua hana ikaika loa.

6 A ua makemake na kanaka ia Alama i Alii no lakou, no ka mea, ua alohaia oia e kona poe kanaka.

7 Aka, i aku la oia ia lakou, Aia hoi, aole he mea pono no kakou ke lilo kekahi i Alii; no ka mea, penei wahi a ka Haku: Mai manao oukou i kekahi io mamua o ko kekahi, a mai manao kekahi kanaka ia ia iho maluna o kekahi; nolaila, ke i aku nei au ia oukou, aole ia he mea e pono ai i loaa’i ia oukou he Alii.

8 Aka hoi, ina he mea hiki ia oukou ke loaa mau i na kanaka pono i poe Alii no oukou, ina he mea pono ia no oukou e loaa’i he Alii.

9 Aka e hoomanao i ka hewa o ke Alii Noa a me kana poe kahuna: a owau hoi, ua heiia au iloko o kahi pahele, a hana iho la i na mea hoopailua he nui imua o ka Haku, a he kumu ia no’u i mihi eha’i;

10 Aka hoi, mahope iho o ka pilikia nui, hoolohe mai la ka Haku i ka’u hea ana, a ua hooko mai la i ka’u pule, a ua hoolilo mai ia’u i mea hana ma kona mau lima, i ka lawe ana ia oukou i ka ike i kona oiaio.

11 Aka hoi, aole au i kaena aku ma keia, no ka mea, aole au pono ke kaena aku no’u iho.

12 Ano, ke i aku nei au ia oukou, ua hooluhi hewa ia mai la oukou e ke Alii Noa, a ua noho iloko o ka pio ana ia ia a me klana poe kahuna, a ua laweia iho la iloko oka hewa e lakou: nolaila, ua nakinakiia oukou me na mea i paa ai o ka hewa.

13 [m 11, p 2] Ano, me oukou i hoopakeleia mai, e ka mana o ke Akua, mailoko mai o keia mau mea i paa ai; he oiaio, mailoko mai o na lima o ke Alii, o Noa, a me kona poe kanaka, mailoko mai hoi o na mea i paa ai o ka hewa, pela au i makemake ai e kupaa oukou ma keia paa ole ana a oukou i hookuuia mai ai, a e hilinai ole i kekahi kanaka e alii ai maluna o oukou;

14 A e hilinai ole ana i kekahi mea i kumu no oukou, aole hoi i luna no oukou, ke ole ia he kanaka o ke Akua; e hele ana ma kona mau aoao a e malama ana i kana mau kauoha.

15 Pela o Alama i ao aku ai i kona poe kanaka, e aloha aku kela kanaka keia kanaka i kona hoalauna me ia ia ia iho: i ole ai he paio mawaena o lakou.

16 Ano, o Alama, oia ko lakou Kahuna Nui, oia hoi ka i hookumu ai i ko lakou ekalesia.

17 A eia kekahi, aole i loaa i kekahi ka mana e hai olelo, aole hoi e ao aku, ke ole ma o na la mai ke Akua mai. Nolaila, hoolaa iho la oia i na kahuna a pau o lakou, a me na kumu a pau o lakou, aole i hoolaaia kekahi ke ole lakou he poe kanaka pono.

18 Nolaila, kiai aku la lakou maluna o ko lakou poe kanaka, a ua hanai aku ia lakou me na mea e pili ana i ka pono.

19 A eia kekahi, hoomaka ae la lakou e hoopomaikai nui loa ia ma ka aina; a kapa aku la lakou i ka aina, o Helama.

20 A eia kekahi, mahuahua ae la lakou a hoopomaikai nui loa ia ma ka aina o Helama; a kukulu iho la lakou i kulanakauhale, a lakou i kapa aku ai o ke kulanakauhale o Helama.

21 Aka hoi, he mea ku pono i ko ka Haku manao e paipai mai i kona poe kanaka; he oiaio, e hoao ana oia i ko lakou ahonui a me ko lakou manaoio.

22 Aka hoi, o ka mea i paulele aku ia ia, oia ke hookiekieia iluna ma ka la hope. He oiaio, a pela no ia me keia poe kanaka.

23 No ka mea, e hoike aku no au ia oukou ua laweia lakou iloko o ka noho luhi ana, a, aole i hiki i kekahi mea ke hoopakele ia lakou, o ka Haku ko lakou Akua wale no; he oiaio, o ke Akua o Aberahama, a me Isaaka, a o Iakoba.

24 A eia kekahi, ua hoopakele mai la oia ia lakou, a ua hoike mai la oia i kona mana ikaika ia lakou, a nui ko lakou hauoli ana.

25 [m 11, p 3] No ka mea, aia hoi, oiai lakou ma ka aina o Helama, he oiaio, ma ke kulanakauhale o Helama, oiai e mahiai ana i ka aina a puni, aia ka! he puali o ko Lamana poe ma na palena o ka aina.

26 Ano, eia kekahi, holo aku la na hoahanau o Alama mai ke kihapai o lakou ae, a houluulu mai la lakou ia lakou iho iloko o ke kulanakauhale o Helama; a nui ko lakou makau no ka ea mai ana o ko Lamana poe.

27 Ake hele aku la o Alama a ku iho la mawaena o lakou, a kauleo ae la ia lakou aole e pono ke makau, aka, na lakou e hoomanao i ka Haku, i ko lakou Akua, a nana no e hoopakele mai ia lakou;

28 Nolaila, uumi iho la lakou i ko lakou hopohopo, a hoomaka aku la e kahea aku i ka Haku, nana e hoopalupalu ae i na naau o ko Lamana poe, i hookoe mai ai lakou la ia lakou, a me na wahine a lakou, a me na keiki a lakou.

29 A eia kekahi, hoopalupalu ae la ka Haku i na naau o ko Lamana poe. A hele aku la o Alama a me kona poe hoahanau, a haawi aku la ia lakou iho iloko o na lima o lakou la; a loaa iho la i ko Lamana poe ka aina o Helama.

30 Ano, o ka poe koa nana i alualu ai i ka poe kanaka o Limai, ua hili iho la ma ka waonahele no na la he nui wale.

31 Aia hoi, ua loaa ia lakou kela poe kahuna a Noa, ma kau wahi a lakou i kapa aku ai o Amulona; a ua hoomaka ae lakou e noho ma ka aina o Amulona, a ua hoomaka ae la e mahiai i ka honua.

33 A eia kekahi, noi aku la o Amulona i ko Lamana poe; a hoouna aku la oia i na wahine a lakou, a o na kaikamahine hoi lakou a ko Lamana poe, e noi aku i ko lakou poe hoahanau, i luku ole ai lakou la i na kane a lakou.

34 A menemene ae la ko Lamana poe ia Amulona a me kona poe hoahanau, a aole i pepehi aku ia lakou, no ka lakou mau wahine.

35 A hui pu aku la o Amulona a me kona poe hoahanau me ko Lamana poe, a e hele ana lakou ma ka waonahele e imi i ka aina o Nepai, ia lakou i loaa ai ka aina o Helama, i nohoia’i e Alama a me kona poe hoahanau.

36 A eia kekahi, olelo paa mai la ko Lamana poe ia Alama a me kona poe hoahanau, ina e hoike aku lakou i ke ala e hiki aku ai i ka aina o Nepai, alaila e ae mai lakou la i ola lakou a i noho pio ole ai hoi.

37 Aka, mahope iho o ka hoike ana’e o Alama ia lakou la i ke ala e hiki aku ai i ka aina o Nepai, aole ko Lamana poe i malama’i i ka lakou olelo paa; aka, hoonoho mai la lakou la i na koa kiai a puni o ka aina o Helama, maluna o Alama a me kona poe hoahanau.

38 A hele aku la ka poe i koe o lakou i ka aina o Nepai: a hoi hou mai la kekahi poe o lakou i ka aina o Helama, a lawe pu mai la hoi me lakou i na wahine, a me na keiki a ka poe koa kiai i waihoia’i ma ka aina.

39 A ua ae aku ke Alii o ko Lamana poe ia Amulona, e lilo ai i alii a i luna maluna o kona poe kanaka, e noho ana ma ka aina o Helama; aka hoi, aole i loaa’i ia ia ka mana e hana i kekahi mea ku e i ka makemake o ke Alii o ko Lamana poe.

1 [mokuna 11, paukū 4] A eia kekahi, loaa iho la ia Amulona ka oluolu ma na maka o ke Alii o ko Lamana poe; nolaila, ae aku la ke Alii ia ia a me kona poe hoahanau, e hooliloia i poe kumu maluna iho o kona poe kanaka; he oiaio, maluna iho o na kanaka ma ka aina o Semalona, a ma ka aina o Sailoma, a ma ka aina o Amulona:

2 No ka mea, ua loaa i ko Lamana poe ua mau aina nei; nolaila, ua hoonoho iho la ke Alii o ko Lamana poe i mau Alii maluna o ua mau aina nei a pau.

3 Ano, o Lamana ka inoa o ke Alii o ko Lamana poe, i kapaia’i mamuli o ka inoa o kona makuakane; a nolaila, ua kapaia oia o ke Alii Lamana. A he Alii oia maluna o kahi lahuikanaka he kinikini;

4 A hoonoho aku la oia i na kumu o na hoahanau o Amulona, ma kela aina keia aina i nohoia’i e kona poe kanaka: a pela i hoomaka’i ka olelo a Nepai e aoia’i mawaena o na kanaka o ko Lamana poe.

5 A he lahuikanaka oluolu lakou kekahi me keahi; aka hoi, aole lakou i ike i ke Akua; aole hoi i ao aku na hoahanau o Amulona ia lakou i kekahi mea no ka Haku, no ko lakou Akua, aole hoi i ke kanawai o Mose; aole hoi i ao aku ia lakou i na olelo a Abinadi;

6 Ao aku la lakou ia lakou la e kakau i ko lakou la mooolelo, a na lakou la e palapala kekahi i kekahi.

7 A pela ko Lamana poe i hoomaka’i e mahuahua aku ma ka waiwai, a e kuai aku kekahi me kekahi, a mahuahua i nui, a i hoomaka’i e lilo i lahuikanaka maalea a akamai, ma ke akamai o ke ao nei; he oiaio, he lahuikanaka maalea loa; e lealea ana ma kela anokeia ano o ka hewa a me ka hao wale, koe nae mawaena o ko lakou poe hoahanau iho.

8 [m 11, p 5] Eia kekahi, hoomaka ae la o Amulona e hana kaumaha maluna o Alama a me kona poe hoahanau, a hoomaka ae la oia e hoomaau mai ia ia, a hookonokono ae la i kana poe keiki e hoomaau mai i ka lakou poe keiki:

9 No ka mea, ike mai la o Amulona ia Alama, a ike mai la hoi o kekahi o ka ke Alii poe kahuna oia mamua, a nana hoi i manaoio ai i na olelo a Abinadi, a i hooheeia mai ai mai ke alo aku o ke Alii; a nolaila, ua huhu mai la oia ia ia, no ka mea, malalo iho oia o ke Alii Lamana; aka hana kaumaha mai la nae oia maluna o lakou, a kau mai na hana maluna o lakou, a hoonoho mai la i na luna hooluhi maluna o lakou.

10 A eia kekahi, no ka nui o ko lakou mau popilikia, hoomaka ae la lakou e kahea ikaika i ke Akua.

11 A kauoha mai la o Amulona ia lakou e hooki iho i ko lakou hea ana; a hoonoho mai la oia i na koa e makai ia lakou, a o ka mea i loaa’i e kahe ana i ke Akua, e pepehiia oia.

12 A, aole, o Alama a me kona poe kanaka i hookiekie aku i ko lakou mau leo i ka Haku, i ko lakou Akua, aka ninini aku la lakou i ko lakou mau naau ia ia; a ua ike mai la oia i na manao o ko lakou mau naau.

13 [m 11, p 6] Aka, eia kekahi, hiki mai la ka leo o ka Haku ia lakou iloko o na popilikia o lakou, i ka i ana, E, e ea mai i na poo o oukou, a e hoolana maikai oukou, no ka mea, ua ike au i ka berita a oukou i hana mai ai ia’u; a e hana aku au i berita me ko’u poe kanaka, a e hoopakele aku ia lakou mailoko aku o ka noho luhi ana.

14 A e hoomama no hoi au i na ukana kaumaha i kauia maluna iho o ko oukou mau poohiwi, i ole ai e hiki ia oukou ke ike ia mau mea maluna iho o na kua o oukou, oiai oukou iloko o ka luhi; a o keia ka’u e hana’i, i ku auanei oukou i poe hoike no’u, a i ike lea oukou, e hele ana owau, ka Haku ke Akua, i ko’u poe kanaka i ko lakou popilikia.

15 Ano, eia kekahi, u na ukana kaumaha i kauia maluna iho o Alama a me kona poe hoahanau, ua hoomamaia ia mau mea; he oiaio, hooikaika mai la ka Haku ia lakou i hiki ai ia lakou ke hapai aku i ko lakou mau ukana kaumaha me ka oluolu, a ae aku la lakou me ka manaolana a me ke ahonui i ka makemake a pau o ka Haku.

16 Eia kekahi, no ka nui o ko lakou manaoio a me ko lakou hoomanawanui, hiki hou mai la ka leo o ka Haku ia lakou, me ka i ana, E hoolana maikai ia, no ka mea, i ka la apopo, e hoopakele no au ia oukou mailoko aku o ka noho luhi ana.

17 A i aku la oia ia Alama, Nau e hele aku imua o keia poe kanaka, a e hele pu au me oe, a e hoopakele aku i keia poe kanaka mailoko aku o ka noho luhi ana.

18 Ano, eia kekahi, houluulu mai la o Alama a me kona poe kanaka ma ka po, i na pua holoholona o lakou, a i ko lakou hua liilii hoi; he oiaio, a pau ae la ka po e houluulu ana lakou i na pua holoholona o lakou.

19 A i kakahiaka ae, hookau ae la ka Haku i ka hiamoe nui maluna o ko Lamana poe, he oiaio, ua pauhia ko lakou poe luna hooluhi a pau i ka hiamoe loa.

20 A haele aku la o Alama a me kona poe kanaka iloko o ka waonahele; a ia lakou i hele aku ai a pau ae la ka la, kukulu iho la lakou i na halelewa o lakou iloko o kekahi awawa, a kapa aku la lakou ia wahi o ke awawa o Alama, no ka mea, alakai ae la oia ia lakou ma ka waonahele;

21 He oiaio, a ma ke awawa lakou i ninini aku ai i ko lakou aloha i ke Akua, no ka mea, ua lokomaikai mai oia ia lakou, a ua hoomaha mai la i ko lakou mau ukana kaumaha, a ua hoopakele mai la oia ia lakou mailoko aku o ka luhi; no ka mea, iloko o ka noho luhi ana lakou, a, aole i hiki i kekahi mea ke hoopakele mai ia lakou, ke ole ka Haku ko lakou Akua.

22 A aloha aku la lakou i ke Akua, he oiaio, ka poe kane a pau o lakou, a me ka lakou poe wahine a pau, a me ka poe keiki a pau a lakou, i hiki ke olelo, hookiekie ae la i ko lakou mau leo i ka hiilani aku i ko lakou Akua.

23 [m 11, p 8] Ano, i mai la ka Haku ia Alama, E wikiwiki oe a hele aku oe a me keia poe kanaka mawaho o keia aina, no ka mea, ua ala ae la ko Lamana poe, a ke alualu nei ia oe; nolaila, e hele aku oe iwaho o keia aina, a na’u e hooki aku i ko Lamana poe ma ua awawa nei, i alualu hou ole aku ai lakou i keia poe kanaka.

24 A eia kekahi, haele aku la lakou mawaho o ke awawa, a hele aku la iloko o ka waonahele.

25 A ia lakou ma ka waonahele he umikumamalua la, hiki aku la lakou i ka aina o Zarahemela; a hookipa ae la no hoi ke Alii Mosia ia lakou me ka olioli.

2 Ano, aole e like ka nui o na keiki a Nepai, aole hoi e like ka nui o ka poe mamo na Nepai, me ka poe kanaka o Zarahemela, oia no kekahi mamo a Muloka, a me ka poe i hele pu mai me ia ma ka waonahele:

3 A, aole e like ka nui o ka poe kanaka o Nepai a me ka poe kanaka o Zarahemela me ko Lamana poe: he oiaio, aole e like ka nui o lakou me ka hapalua o ko Lamana.

4 Ano, ua hoakoakoaia ka poe kanaka a pau o Nepai, a me ka poe kanaka a pau hoi o Zarahemela, a ua hoakoakoaia lakou i elua poe.

5 [mokuna 11, paukū 9] A eia kekahi, heluhelu ae la o Mosia, a kauoha ae la e heluheluia, na mooolelo o Zenifa i kona poe kanaka, he oiaio, heluhelu ae la oia i na mooolelo o ka poe kanaka o Zenifa, mai ka wa a lakou i haalele ai i ka aina o Zarahemela, a hiki i ka wa a lakou i hoi hou mai ai.

6 A heluhelu ai la oia i ka mooolelo o Alama a me kona poe hoahanau, a me ko lakou mau popilikia a pau, mai ka wa a lakou i haalele mai ai i ka aina o Zarahemela, a hiki aku i ka wa a lakou i hoi hou mai ai.

7 Ano, ia Mosia i hoopau ai i ka heluhelu ana i na mooolelo, ua pau kona poe kanaka i ke kahaha a me ka pihoihoi,

8 No ka mea, aole o lakou i ike i ka mea e manao ai; no ka mea, ia lakou i ike ai i ua poe la i hoopakeleia mai mailoko mai o ka noho luhi ana, ua hoopihaia lakou me ka olioli nui loa.

9 A eia hou, ia lakou i manao ai no ko lakou poe hoahanau, ka poe i pepehiia’i e ko Lamana poe, ua hoopihaia mai lakou me ke kaumaha, a kulu iho la na waimaka he nui o ke kauamaha:

10 A eia hou, ia lakou i manao ai i ka lokomaikai koke o ke Akua, a me kona mana i ka hoopakele ana ia Alama a me kona poe hoahanau, mailoko mai o na lima o ko Lamana, a o ka noho luhi ana hoi, hookiekie ae la lakou i ko lakou mau leo, a hoalohaloha aku la i ke Akua.

11 A eia hou, ia lakou i manao ai i ko Lamana poe, ko lakou poe hoahanau, a i ko lakou noho hewa a haumia ana, ua hoopihaia lakou me ka walania a me ka ehaeha, no ke ola o na uhane o lakou.

12 [m 11, p 10] A eia kekahi, huhu iho la kela poe keiki a Amulona a me kona mau hoahanau, ka poe nana i lawe i na kaikamahine a ko Lamana poe, i mau wahine na lakou, me ka hana a ko lakou mau makuakane, aole o lakou e kapa hou ia e na inoa o ko lakou mau makuakane, nolaila, lawe ae la lakou maluna o lakou iho i ka inoa o Nepai, i hiki ia lakou ke kapaia’e na keiki a Nepai, a e helu pu ia me ka poe i kapaia ko Nepai poe.

13 Ano, ua helu pu ia ka poe kanaka o Zarahemela me ko Nepai poe, a o keia no ka hooili ole ia ’na o ke aupuni maluna o na mea i ole ai lakou he poe mamo a Nepai.

14 [m 11, p 11] A eia kekahi, ia Mosia i hoopau ai i ka olelo ana a i ka heluhelu ana i na kanaka, noi ae la oia ia Alama hoi e olelo aku i na kanaka.

15 A olelo aku la o Alama ia lakou, ia lakou i hoakoakoaia’i ma na aha nui, a hele aku ia mai ia poe aku ia poe aku, e hai ana i na kanaka i ka mihi a ma ka manaoio ma ka Haku.

16 A kauleo aku la oia i ka poe kanaka o Limai a me kona poe hoahanau, i ka poe a pau i hoopakeleia mai ai mailoko mai o ka noho luhi ana, e hoomanao lakou na ka Haku lakou i hoopakele mai.

17 A eia kekahi, mahope iho o ke ao ana aku o Alama i na kanaka i na mea he nui, a i pau ai kana olelo ana ia lakou, ua makemake iho la ke Alii Limai e bapetizoia; a ua makemake kona poe kanaka a pau e bapetizoia hoi lakou.

18 Nolaila, hele aku la o Alama iloko o ka wai, a bapetizo iho la ia lakou; he oiaio, bapetizo aku la oia ia lakou mamuli o ke ano ana i bapetizo ai i kona poe hoahanau, iloko o na wai o Moramona; he oiaio, a o ka poe ana i bapetizo ai ua huiia lakou lakou i ka ekalesia o ke Akua; a o keia no ko lakou manaoio ma na olelo a Alama.

19 [m 11, p 12] A eia kekahi, ae aku la ke Alii Mosia ia Alama, nana e hoonoho aku i na ekalesia mawaena o ka aina a puni o Zarahemela; a haawi aku ia ia i ka mana e hoolilo i na kahuna a me na kumu maluna o kela ekalesia o keia ekalesia.

20 Ano, ua hanaia keia no ka nui loa o na kanaka, i hiki ole ai ia lakou ke hoomaluia e ke kumu hookahi; aole hoi i hiki ia lakou ke hoolohe mai i ka olelo a ke Akua i ke anaina hookahi;

21 Nolaila, lakou i hoakoakoa ai ma na anaina okoa, i kapaia’i na ekalesia; a ua loaa kela ekalesia keia ekalesia ka lakou mau kahuna a me ko lakou mau kumu, a e hai ana kela kahuna keia kahuna i ka olelo e like me ia i haawiia mai ai ia ia ma ka waha o Alama;

22 A pela, me na ekalesia he nui, hookahi ekalesia nae lakou a pau; he oiaio, o ka ekalesia o ke Akua: no ka mea, aole i haiia kekahi mea ma na ekalesia a pau i ole ka mihi a me ka manaoio i ke Akua.

23 Ano, he mau ekalesia ehiku ma ka aina o Zarahemela. A eia kekahi, o na mea e makemake ana e lawe maluna iho o lakou i ka inoa o Kristo, a o ke Akua hoi, hui mai la lakou i na ekalesia o ke Akua;

24 A ua kapaia lakou ko ke Akua poe kanaka. A ninini mai la ka Haku i kona uhane maluna o lakou, a ua pomaikai lakou, a malu ma ka aina.

1 [mokuna 11, paukū 13] Ano, eia kekahi, ua nui na mea o ka hanauna hou i hiki ole ke hoomaopopo mai i na olelo a ke Alii Beniamina, he poe keiki liilii i ka wa ana i olelo ae ai i kona poe kanaka; aole lakou i manaoio i ka mooolelo o ko lakou poe makua.

2 Aole lakou i manaoio i ka mea i oleloia no ke alahouana o ka poe make; aole hoi lakou i manaoio no ka hiki ana mai o Kristo.

3 Ano, no ko lakou hoomaloka, aole i hiki ia lakou ke hoomaopopo mai i ka olelo a ke Akua; a ua hoopakikiia na naau o lakou.

4 A, aole lakou e bapetizoia; aole hoi lakou e hui mai i ka ekalesia. A he poe okoa lakou ma ko lakou manaoio, a noho mau pela a mau loa aku, ma ko lakou noho kino hewa ana; no ka mea, aole lakou i kahea aku i ka Haku, i ko lakou Akua.

5 Ano, ma ke au ia Mosia, aole e like ko lakou nui me ka hapalua o na kanaka o ke Akua; aka, no ka mokuahana mawaena o na hoahanau, ua mahuahua aku lakou.

6 No ka mea, eia kekahi, hoopunipuni ae la lakou i na mea he nui loa me ka lakou mau olelo malimali, i na mea iloko o ka ekalesia, a ma o lakou la lakou i hana’i i na hewa he nui; nolaila, he mea e pono ai e aoia ka poe nana i hana i ka hewa iloko o ka ekalewia, e ka ekalesia.

7 [m 11, p 14] Eia kekahi, ua laweia mai la lakou imua o na kahuna, a haawiia ae la i na kahuna e na kumu; a lawe mai la na kahuna ia lakou imua o Alama, oia no ke Kahuna Nui.

8 Ano, ua haawi aku la ke Alii Mosia ia Alama i ka mana maluna iho o ka ekalesia.

9 Eia kekahi, aole o Alama i ike no lakou; aka ua nui na hoike ku e ia lakou; he oiaio, ku mai la no na kanaka a hoike mai la i ko lakou hala he nui loa.

10 Ano, aole i hiki mai kekahi mea e like me ia mamua, ma ka ekalesia; nolaila, anoninoni iho la o Alama ma kona uhane, a kauoha ae la ia e laweia’e lakou imua o ke Alii.

11 A i ae la oia i ke Alii, Eia hoi kekahi poe he nui a makou i lawe mai ai imua ou, he poe i hoopiiia mai e ko lakou poe hoahanau; he oiaio, a ua loaa lakou ma na hewa he nui. Aole lakou i mihi i ko lakou mau hewa; nolaila, ea, ua lawe mai la makou ia lakou imua ou, nau e hookolokolo ae ia lakou e like me ka lakou mau hewa.

12 Aka i aku la ke Alii Mosia ia Alama, Aia hoi, aole au e hookolokolo aku ia lakou; nolaila, ke haawi aku nei au ia lakou iloko o kou mau lima e hookolokoloia’i.

13 Ano, anoninoni hou iho la ka uhane o Alama; a hele aku la oia, a ninau aku la i ka Haku i ka mea ana e hana’i no ua hana nei, no ka mea, hopohopo iho la oia o hana hewa oia imua o ka maka o ke Akua.

14 [m 11, p 15] Eia kekahi, mahope iho o kona ninini ana i kona uhane a pau i ke Akua, hiki mai la ka leo o ka Haku ia ia, i ka i ana,

15 Pomaikai ooe, e Alama, a pomaikai hoi lakou, ka poe i bapetizoia’i iloko o na wai o Moramona. Ua pomaikai ooe no kou manaoio ikaika loa ma na olelo wale no a ka’u kauwa, a Abinadi.

16 A pomaikai hoi lakou, no ko lakou manaoio ikaika loa ma na olelo wale no au i olelo aku ai ia lakou.

17 A pomaikai ooe no ko kukulu ana i ekalesia mawaena o keia poe kanaka; a e hookupaaia lakou, a e lilo no lakou i poe kanaka no’u.

18 He oiaio, pomaikai iho la no keia poe kanaka, ka poe e ae ana e hali i ko’u inoa: no ka mea, ma ko’u inoa e kapaia’i lakou; a na’u no lakou.

20 Ooe no ka’u kauwa: a ke hana berita nei au me oe, e loaa auanei ia oe ke ola mau loa; a e hookauwa mai no oe na’u, a hele aku ma ko’u inoa; a e houluulu mai i ka’u poe hipa.

21 A o ka mea e hoolohe mai i ko’u leo, he hipa auanei ia na’u; a nau ia e hookipa’e iloko o ka ekalesia; a na’u no hoi ia e hookipa’ku.

22 No ka mea, o keia no ko’u ekalesia: o ka mea e bapetizoia, e bapetizoia oia i ka mihi. A o ka mea au e hookipa’e ai, nana no e manaoio mai i ko’u inoa; a na’u no ia e kala oluolu aku:

23 No ka mea, owau no ka mea e lawe ana maluna o’u i na hewa o ko ke ao nei; no ka mea, owau no ka mea nana i hana ia lakou; a owau no ka mea e haawi ana i ka mea i manaoio ai a hiki aku i ka hopena, i kahi ma kuu lima akau.

24 No ka mea, ma kuu inoa i kapaia’i lakou; a ina i ike lakou ia’u, e puka mai auanei lakou, a e loaa ia lakou kahi mau loa ma kuu lima akau.

25 [m 11, p 16] A e hiki mai keia i ka wa e kani ai ka lua o ka pu, alaila e puka mai ka poe i ike ole mai ia’u, a e ku auanei imua o’u:

26 Alaila e ike no lakou, Owau no ka Haku ko lakou Akua, a owau ko lakou Mea Hoolapanai; aka aole o lakou makemake e hoolapanaiia.

27 Alaila, e hai aku no au ia lakou, aole au i ike ia lakou; a e hele aku no lakou iloko o ke ahi pau ole, i hoomakaukauia’i no ka diabolo a no kona poe anela.

28 Nolaila, ke i aku nei au ia oe, o ka mea e hoolohe ole mai i ko’u leo, mai hookipa aku oukou ia ia iloko o ko’u ekalesia, no ka mea, aole au hookipa aku ia ia ma ka la mahope;

29 Nolaila, ke i aku nei au ia oe, o hele; a o ka mea e hana hewa mai ana ia’u, nau ia e hookolokolo ae e like me na hewa ana i hana’i; a ina e hai mai oia i kona mau hewa imua ou a me a’u nei, a e mihi ma ka oiaio o kona naau, nau ia e kala aku, a e kala aku no hoi au ia ia;

30 He oiaio, a i na manawa a pau a ko’u poe kanaka e mihi ai, e kala aku no au ia lakou i ko lakou lawehala ana ia’u.

31 A e kala aku hoi oukou kekahi i kekahi i ko oukou mau hala: no ka mea, he oiaio ka’u e olelo aku nei ia oe, o ka mea e kala ole ae i ka kona hoalauna lawehala ana, ia ia e olelo ai ua mihi oia, oia ka i lawe ia ia iho malalo iho o ka hoohewaia ana.

32 Ano, ke i aku nei au ia oe, o hele; a o ka mea e mihi ole i kona mau hewa, oia ke helu pu ole ia mawaena o ko’u poe kanaka: a e malamaia keia mea mai keia wa aku.

33 [m 11, p 17] Eia kekahi, ia Alama i lohe ai i keia mau olelo, palapala iho la oia ia mau mea, i paa ua mau mea nei ia ia, a e hiki ia ia ke hookolokolo i na kanaka o ua ekalesia la e like me na kauoha a ke Akua.

34 Eia kekahi, hele aku la o Alama a hookolokolo iho la i ka poe i loaa’i ma ka hewa, e like me ka olelo a ka Haku.

35 A o ka poe i mihi i ko lakou mau hewa a i hai mai ia mau mea, o lakou kana i helu pu ai mawaena o ka poe kanaka o ka ekalesia;

36 A o ka poe i hai ole mai i ko lakou mau hewa a i mihi ole i ka lakou hala, aole lakou i helu pu ia mawaena o ka poe kanaka o ka ekalesia, a ua holoiia’ku na inoa o lakou.

37 A eia kekahi, hooponopono iho la o Alama i na hana a pau o ka ekalesia, a hoomaka hou ae la lakou e loaa ke kuapapa nui a me ka pomaikai nui loa ma na mea o ka ekalesia; e hele pololei ana imua o ke Akua; e loaa ana na mea he nui wale, a e bapetizo ana i na mea he nui wale.

38 Ano, na Alama a me kona poe hoalawehana i hana i ua mau mea nei a pau, ka poe i noho ai maluna iho o ka ekalesia; e hele ana ma ka ikaika a pau; e ao aku ana i ka olelo a ke Akua ma na mea a pau; e loaa ana na ano o na popilikia a pau; i hana ino ia mai e ka poe a pau i hui ole ia me ka ekalesia o ke Akua;

39 A ao aku la lakou i ko lakou poe hoahanau; a o lakou hoi kekahi i aoia mai, kela mea keia mea, e ka olelo a ke Akua, e like me kona mau hewa, a me kona hala ana i hana’i; i kauohaia’i e ke Akua e pule hooki ole, a e hoalohaloha aku ma na mea a pau.

1 Ano, eia kekahi, no ka nui loa o na hana ino i hooiliia mai maluna o ka ekalesia, e na mea hoomaloka, hoomaka ae la ka ekalesia e ohumu, a e hoopii ae i na luna o lakou no ia mea; a hoopii mai la lakou ia Alama. A waiho iho la o Alama i keia mea imua o ko lakou Alii, o Mosia. A kuka pu iho la o Mosia me kana poe kahuna.

2 [mokuna 11, paukū 18] Eia kekahi, hoouna ae la ke Alii Mosia i olelo hoolaha mawaena o ka aina a puni, i hoomaau ole aku ai kekahi o ka poe hoomaloka i kekahi o ka poe i huiia me ka ekalesia o ke Akua;

3 A ua kauoha ikaika ia mawaena o na ekalesia a pau, i ole ai na hoomaau ana mawaena o lakou; i noho like ai na kanaka a pau:

4 I ole ai lakou e ae aku i ka haaheo, a i ka hookiekie hoopau ai i ko lakou maluhia; i manao ai hoi kela kanaka keia kanaka i kona hoalauna me ia ia ia iho, e hana ana me ko lakou mau lima iho no ko lakou ola;

5 He oiaio, a na ko lakou poe kahuna a me ko lakou poe kumu a pau e hana me ko lakou mau lima iho no ko lakou ola, ma na wa a pau, koe wale no ka mai a me ka hune maoli: a i ka hana ana i ua mau mea nei, ua lako lakou ma ka lokomaikai o ke Akua.

6 A hoomaka ae la ka maluhia hou ma ka aina; a hoomaka ae la na kanaka e lehulehu loa aku, a hoomaka ae la e hele palahalaha aku maluna iho o ka ili o ka honua, he oiaio, ma ka akau a ma ka hema, ma ka hikina a ma ke komohana, e kukulu ana i na kulanakauhale nui a me na kauhale ma na kihi a pau o ka aina.

7 A kokua mai la ka Haku ia lakou, a hoopomaikai iho la ia lakou, a lilo lakou i lahuikanaka nui a waiwai.

8 [m 11, p 19] Ano, ua helu pu ia na keiki a Mosia mawaena o na mea hoomaloka; a o kekahi hoi o na keiki a Alama i helu pu ia mawaena o lakou, ua kapaia oia o Alama, mamuli o kona makuakane; aka hoi, lilo iho la oia i kanaka hewa loa a hoomana kii. A he kanaka oia o na olelo he nui wale, a olelo malimali nui aku la oia i na kanaka; nolaila, alakai aku la oia i na mea he nui o na kanaka e hana mamuli o ke ano o kona mau hewa.

9 A lilo iho la oia i mea i alalai nui ai i ka pomaikai o ka ekalesia o ke Akua; e aihue aku ana i na naau o na kanaka; e hookomo ana i ke ku e nui mawaena o na kanaka; e wehe ana i ka puka no ka enemi o ke Akua e hana mai me kona mana maluna o lakou.

10 [m 11, p 20] Ano, eia kekahi, oiai oia e hele aku ana e hoopau i ka ekalesia o ke Akua; no ka mea, hele malu aku la oia me na keikikane a Mosia, e imi ana e hoopau i ka ekalesia, a e alakai hewa i na kanaka o ka Haku, me ke ku e i na kanawai o ke Akua, a o ke Alii no hoi;

11 A me a’u i aku ai ia oukou, ia lakou e hele ana e kipi ana i ke Akua, aia hoi! ikea aku la ka anela a ka Haku e lakou; a iho iho la oia me he mea la iloko o kahi ao; a olelo mai la oia me he mea la o ka leo o ka hekili, a hoonaueue ae la ia i ka honua a lakou i ku ai maluna;

12 A no ka nui loa o ko lakou pihoihoi, hina iho la lakou i ka honua, a hoomaopop ole i na olelo ana i olelo mai ai ia lakou.

13 Aka hoi, kahea hou mai la ia, i ka i ana, E Alama, e ala’e a e ku mai, e, no ke aha oe i hoomaau mai ai i ka ekalesia o ke Akua? No ka mea, ua olelo mai ka Hakku, O keia no ko’u ekalesia, a e hookupaa aku ai ia; aole loa kekahi mea e hoohiolo ia, ke ole ia ka hewa o ko’u poe kanaka.

14 A eia hou, i mai la ka anela, aia hoi, ua lohe iho la ka Haku i na pule a kona poe kanaka, a me na pule hoi a kana kauwa a Alama, oia no kou makuakane: no ka mea, ua pule aku la oia me ka manaoio nui nou, i laweia’i oe i ka ike i ka oiaio; nolaila, ea, ua hele mai nei au e hoomaopopo aku ia oe no ka mana a me ka makaukau o ke Akua, i hookoia’i na pule o kana mau kauwa e like me ko lakou manaoio.

15 Ano hoi, e hiki anei ia oe ke hoole mai i ka mana o ke Akua? No ka mea, aia hoi, aole anei ke hoohaalulu nei kuu leo i ka honua? Aole anei oe i ike mai hoi ia’u imua ou? A ua hoounaia mai nei au mai ke Akua mai.

16 Ano, ke i aku nei au ia oe, o hele, a e hoomanao i ka noho pio ana o kou mau makua ma ka aina o Helama a ma ka aina o Nepai; a e hoomanao i na mea nui ana i hana’i no lakou: no ka mea, iloko o ka noho luhi ana lakou, a ua hoopakele iho la oia ia lakou. Ano, ke i aku nei au ia oe, e Alama, e hele aku i kou ala, a e imi hou ole e hoopau aku i ka ekalesia ma neia hope aku, i hookoia’i ka lakou mau pule; a e hana i keia ina paha e makemake ana oe e hooleiia’ku nou iho.

17 [m 11, p 21] Ano, eia kekahi, o ua mau olelo nei oia na olelo hope a ka anela i olelo mai ai ia Alama, a hele aku la.

18 Ano, hina hou iho la o Alama, a me ka poe pu me ia, i ka honua, no ka mea, nui iho la ko lakou pihoihoi: no ka mea, me ko lakou mau maka ponoi ua ike aku la lakou i kahi anela o ka Haku; a o kona leo me he hekili la ia, i hoonaueue ai i ka honua; a ua ike lakou aohe kekahi mea, ke ole ia ka mana o ke Akua, i hiki ai ke hoonaueue i ka honua a e hoohaalulu ia, me he mea la e kaawale aku ia.

19 Ano, no ka nui o ka pihoihoi o Alama, lilo iho la oia i aa, i hiki ole ai ia ia ke hamama i kona waha; he oiaio, a nawaliwali iho la oia, i hiki ole ai ke oni i kona mau lima; nolaila, laweia oia e ka poe pu me ia, a kaikaiia me ka ikaika ole, a hiki aku i kahi ona i waihoia’i imua o kona makuakane.

20 A hai ae la lakou i kona makuakane i na mea a pau i hiki mai ai ia lakou; a hauoli iho la kona makuakane, no ka mea, ua ike oia o ka mana o ke Akua no ia.

21 A houluulu mai la oia i na kanaka he nui loa, i ike ai lakou i ka mea a ka Haku i hana mai ai no kana keiki, a no lakou hoi ka poe i hele pu me ia.

22 A kauoha ae la oia i na kahuna e houluulu mai ia lakou iho; a hoomaka ae la lakou e hooke ai a e pule aku i ka Haku, i ko lakou Akua, nana e hooaka ae i ka waha o Alama, i hiki ai ia ia ke olelo; a i hiki ai hoi i kona mau lala ke loaa ko lakou ikaika, i hookaakaaia’i na maka o na kanaka e ike a e hoomaopopo i ka lokomaikai a me ka nani o ke Akua.

23 [m 11, p 22] Eia kekahi, mahope iho o ko lakou hooke ai ana a pule ana no na la elua a me na po elua, loaa iho la i na lala o Alama ko lakou ikaika, a ku ae la oia iluna a hoomaka ae la e olelo aku ia lakou, e hai ana ia lakou e hoolana maikai:

24 No ka mea, wahi ana, ua mihi iho la au i ko’u mau hewa, a ua hoolapanaiia mai e ka Haku; aia hoi, ua hanau mai au i ka uhane.

25 A i mai la ka Haku ia’u, Mai kahaha kou naau, e hanau hou ia mai na kanaka a pau e pono ai, he oiaio, na kane, a me na wahine, na lahuikanaka, a me na ohana, o na olelo a me na kanaka a pau: he oiaio, hoohanauia mai e ke Akua, hoomaluleia’e mai ko lakou noho kino a haule ana, i ka noho hemolele ana, i hoolapanaiia mai e ke Akua, e lilo ana i poe keikikane a i poe kaikamahine nana;

26 A pela lakou i lilo ai i poe hou; a i ole lakou e hana i keia, aole loa e hiki ia lakou ke loaa aku ke aupuni o ke Akua.

27 Ke i aku nei au ia oukou, i ole ai keia e hanaia, e hooleia’ku lakou e pono ai: a ua ike au i keia, no ka mea, ua kokoke au e hooleiia’ku.

28 Aka hoi, mahope iho o ka auwana ana mawaena o ka popilikia nui, e mihi ana a kokoke i ka make, ma ke aloha ka Haku i ike ai he pono ke kaili mai ia’u mailoko mai o kahi aa mau loa ana, a ua hoohanauia mai au e ke Akua;

29 Ua hoolaia mai kuu uhane i ke au awaawa a i na mea paa o ka hewa. Ma ka lua hohonu pouli loa no au; aka, ano, ke ike nei au i ka malamalama kupaianaha o ke Akua. Ua hoowalaniaia mai la ko’u uhane me ka ehaeha mau loa; aka ua kailiia mai au, aohe i hoowalania hou ia ko’u uhane.

30 Hoomalau aku la au i ko’u Mea Hoolapanai, a hoole aku la i ka mea i oleloia’i e ko kakou poe kupuna; aka, ke ae aku nei ua hiki ia lakou ke ike e mamua a e hiki mai auanei no ia, a ke hoomanao la oia i kela mea i keia mea ana i hana’i, a e hoike mai oia ia a iho i na mea a pau;

31 He oiaio, e kukuli iho no auanei kela kuli keia kuli, a e ae mai auanei kela alelo keia alelo imua ona. He oiaio, ma ka la mahope, i ka wa e ku ai na kanaka e hookolokoloia e ia, alaila, e ae mai lakou oia no ke Akua; alaila, e ae mai lakou, ka poe i noho ai me ke Akua ole ma ke ao nei, ua pono ka hoopai ana o ka hoopai mau loa maluna o lakou; a e naueue, a e haalulu lakou, a e emi iho malalo o ka nana o kona maka ike i na mea a pau.

32 [m 11, p 23] Ano, eia kekahi, hoomaka ae la o Alama ma keia manawa aku, e ao aku i na kanaka, a me ka poe pu me Alama i ka wa i ikea ka anela e lakou: e kaahele ana a puni mawaena o ka aina a pau, e hoolaha ana i na kanaka a pau i na mea a lakou i lohe ai a i ike ai hoi, a e hai ana i ka olelo a ke Akua iloko o ka pilikia nui, i hoomaau nui ia mai ai e ka poe hoomaloka, i papaiia mai ai e na mea he nui o lakou;

33 Aka me ua mau mea nei nae a pau, haawi aku la lakou i ka oluolu nui i ka ekalesia, e hoapaa ana i ko lakou manaoio, a e kauleo ana ia lakou me ke ahonui loihi a me ka hana luhi, e malama i na kauoha a ke Akua.

34 A he mau keiki a Mosia eha o lakou; a o Amona, a me Aarona, a o Omanera, a me Himinai ko lakou mau inoa: oia no na inoa o na keiki a Mosia.

35 A hele aku la lakou mawaena o ka aina a pau o Zarahemela, a mawaena o na kanaka a pau e noho ana malalo iho o ke au o ke Alii Mosia, e hooikaika loa ana e papani hou i na eha a lakou i hana aku ai i ka ekalesia; e hai ana i ko lakou mau hewa, a e hoolaha ana i na mea a pau a lakou i ike ai, a e wehewehe ana i na wanana a me na palapala hemolele i ka poe a pau e makemake ana e hoolohe mai i ua mea nei:

36 A pela lakou i lilo ai i mau mea hana ma na lima o ke Akua, i ka lawe ana mai i na mea he nui i ka ike i ka oiaio, he oiaio, i ka ike i ko lakou Mea Hoolapanai.

37 E, nani ka pomaikai o lakou! No ka mea, hoolaha aku la lakou i ka malu; hoolaha aku la no lakou i ka olelo maikai o ka olioli; a hai aku la lakou i na kanaka e malama aupuni ana ka Haku.

1 [mokuna 12, paukū 1] Ano, eia kekahi, mahope iho o ka hana ana o na keiki a Mosia i keia mau mea a pau, lawe pu aku la lakou i kekahi poe he uuku me lakou, a hoi aku la i ko lakou makuakane la, i ke Alii, a noi ae ia ia e ae mai oia ia lakou, na lakou e hele me ua poe nei a lakou i wae aku ai, e pii aku i ka aina o Nepai, e hiki ia lakou ke hai aku i na mea a lakou i lohe ai, a e hiki ia lakkou ke haawi aku i ka olelo a ke Akua i ko lakou poe hoahanau, i ko Lamana poe,

2 E hiki paha ia lakou ke hoohuli ae ia lakou la i ka ike i ka Haku i ko lakou Akua, a hoomaopopo ia lakou i ka hewa o ko lakou poe kupuna: a e hiki paha ia lakou ke hoopau aku i ko lakou la inaina mai i ko Nepai poe, e hiki hoi ia lakou ke laweia e hauoli iloko o ka Haku ko lakou Akua, e hiki ia lakou ke hoalauna aku a ke hoalauna mai kekahi i kekahi, a e paio hou ole ma ka aina a pau a ka Haku a ko lakou Akua i haawi mai ai ia lakou.

3 Ano, ua makemake lakou e haiia’ku ke ola i kela mea i keia mea, no ka mea, aole loa o lakou oluolu e make kekahi uhane o kanaka; he oiaio, ma ka manao wale ana e loaa paha i kekahi uhane ka ehaeha pau ole, ua naueue a ua haalulu lakou.

4 A pela ka uhane o ka Haku i hana mai ai maluna iho o lakou, no ka mea, he poe hewa loa lakou o na mea hewa. A ike iho la ka Haku ma kona aloha nui loa, he pono ke hookoe ia lakou; aka hoi, pilikia iho la lakou me ka ehaeha o ka naau, no ko lakou mau hewa; a pilikia nui iho la hoi, e hopohopo ana o hooleiia’ku auanei lakou no ka wa pau ole.

5 [m 12, p 2] A eia kekahi, noi aku la lakou i ko lakou makuakane i na la he nui, e pii aku lakou i ka aina o Nepai.

6 A hele aku la ke Alii Mosia a ninau aku la i ka Haku, ina e hookuu aku oia i kana mau keikikane e pii aku mawaena o ko Lamana poe, e hai aku i ka olelo.

7 A i mai la ka Haku ia Mosia, E hookuu aku ia lakou e pii aku, no ka mea, e manaoio na mea he nui i ka lakou mau olelo, a loaa auanei ia lakou ke ole mau loa; a e hoopakele aku au i kau mau keiki mailoko mai o na lima o ko Lamana poe.

8 [m 12, p 3] A eia kekahi, ae aku la o Mosia e hele aku lakou, a e hana e like me ko lakou noi.

9 A hele aku la lakou ma ko lakou hele ana iloko o ka waonahele, e pii aku e hai aku i ka olelo mawaena o ko Lamana poe: a e haawi aku auanei au i ka mooolelo a ka lakou hana.

10 Ano, aole o ke Alii Mosia mea e hooili ai i ke aupuni maluna ona, no ka mea, aole e lawe kekahi o kana mau keiki i ke aupuni;

11 Nolaila, lawe aku la oia i na mooolelo i kahakahaia’i maluna o na papa keleawe, a me na papa a Nepai no hoi, a me na mea a pau ana i malama’i a i hoola’i, e like me na kauoha a ke Akua, mahope iho o kona unuhi ana a kauoha ana e palapalaia na mooolelo i kahakahaia’i maluna iho o na papa gula, a ka poe kanaka o Limai i loaa’i, a i haawiia mai ai ia ia e ka lima o Limai:

12 A ua hana oia i keia, no ka iini o kona poe kanaka, no ka mea, ua makemake nui loa aku lakou, e ike no ua poe kanaka la i lukuia’i.

13 Ano, unuhi ae la oia ia mau mea ma o ua mau pohaku elua la i hoopaaia’i iloko o na poo elua o kekahi mea pio.

14 Ano, ua hoomakaukauia ua mau mea nei mai kinohi mai, a ua haawiia mai mai kekahi hanauna aku a i kekahi hanauna aku, no ka oihana o ka unuhi ana i ke ano o na olelo;

15 A ua malamaia a hoolaia e ka lima o ka Haku, i hoike mai ai oia i kela mea keia mea e loaa’i ka aina, i na hewa a me na mea hoopailua o kona poe kanaka:

16 A o ka mea nana ua mau mea nei, ua kapaia oia he mea nana Urima, mamuli o ke ano o ka wa kahiko.

17 [m 12, p 4] Ano, mahope iho o ka hoopau ana o Mosia i ka unuhi ana i ua mau mooolelo nei, aia hoi, he mooolelo ia o ka poe kanaka i lukuia’i, mai ka manawa o lakou i lukuia’i, a hiki aku i ke kukuluia’na o ka hale pakui nui, i ka manawa a ka Haku i hoookahuli ai i ka olelo a na kanaka; a ua hoopuehu palahalaha ia aku ai lakou maluna o ka ili o ka honua a pau; he oiaio, a mai ia wa hoi a hiki i ka hanaia’na o Adamu.

18 Ano, he kumu ua mooolelo nei no na kanaka o Mosia e uwe nui loa ai; he oiaio, ua hoopihaia lakou me ke kaumaha: aka hoi, haawi mai la ia mooolelo ia lakou i ka ike nui, a ma ia mea lakou i hauoli ai.

19 A e palapalaia ua mau mooolelo nei mahope: no ka mea, aia hoi, he mea e pono ai ia e ike ai na kanaka a pau i na mea i palapalaia’i iloko o ua mooolelo nei.

20 [mokuna 13, paukū 1] Ano, me au i olelo aku ai ia oukou, mahope iho o ka hana ana o ke Alii Mosia i keia mau mea, lawe aku la oia i na papa keleawe, a me na mea a pau ana i malama’i, a haawi aku la ia Alama, oia no ke Keiki a Alama; he oiaio, o na mooolelo a pau, a me na mea unuhi hoi i ke ano o na olelo, a haawi aku la ia mau mea ia ia, a kauoha aku la ia ia e malama a e hoola oia ia mau mea, a e kakau hoi i mooolelo o na kanaka, e haawi aku ana ia mau mea ia hanauna aku ia hanauana aku, e like me ua mau mea nei i haawiia mai ai mai ka manawa a Lehi i haalele aku ai ia Ierusalema.

1 Ano, ia Mosia i hana’i i keia, hoouna aku la oia mawaena o ka aina a pau, mawaena o na kanaka a pau, e iini ana e ike i ko lakou makemake no ka mea e lilo ai i Alii no lakou.

2 A eia kekahi, hiki mai la ka leo o na kanaka, me ka i ana, Ua makemake makou ia Aarona kau keiki, i Alii no makou, a i Luna no makou.

3 Ano, ua pii aku la o Aarona i ka aina o Nepai, nolaila, ua hiki ole i ke Alii ke hooili ai i ke aupuni maluna ona; aole hoi o Aarona e lawe maluna one i ke aupuni; aole hoi e ae ana kekahi o na keiki a Mosia e lawe maluna iho o lakou i ke aupuni,

4 Nolaila, hoouna hou aku la o ke Alii Mosia mawaena o na kanaka, he oiaio, he olelo palapalaia kana i hoouna aku ai mawaena o na kanaka. A eia na olelo i palapalaia’i;—i ka i ana,

5 Aia hoi, e o’u poe kanaka, a me o’u poe hoahanau, no ka mea, ke manao nei au ia oukou pela; ke makemake nei au ia oukou e noonoo i ka mea o oukou i heaia’i e noonoo; no ka mea, ke iini nei oukou e loaa i Alii.

6 Ano, ke hai aku nei au ia oukou, o ka mea nana ke aupuni e pono ai, ua hoole mai, aole e lawe ae maluna iho ona i ke aupuni.

7 [mokuna 13, paukū 2] A, ano, ina e waeia kekahi mea ma kona hakahaka, aia hoi, ke makau nei au e ea mai na paio mawaena o oukou; a owai la ka i ike, e huhu paha auanei ka’u keiki, ka mea nana ke aupuni, a e kauo aku i kekahi poe o keia poe kanaka mahope ona, a he mea ia e hoala’i i na kaua a me na paio mawaena o oukou; a he mea ia e hookahe aku ai i ke koko a nui, a e hookapae ai i ka aoao o ka Haku; he oiaio, a e luku ai i na uhane o na kanaka he nui.

8 Ano, ke i aku nei au ia oukou, e naauao kakou a e noonoo i ua mau mea nei, no ka mea, aole o kakou pono ke hoopoino i ka’u keiki, aole hoi o kakou pono ke hoopoino ia hai, ke waeia’e oia ma kona hakahaka.

9 A ina paha e huli hou ae ka’u keiki i kona haaheo a me na hooilina no ke aupuni, a he mea ia e hoala’i ia ia a me keia poe kanaka hoi e hana i ka hewa he nui.

10 Ano, e naauao kakou, a e nana e imua i ua mau mea nei, a e hana i ka mea e lilo ai no ka malu o keia poe kanaka.

11 Nolaila, owau no ko oukou Alii i ke koena o kuu mau la; aka hoi, e wae aku kakou i na lunakanawai, e hookolokolo i keia poe kanaka e like me ko kakou kanawai, a e hooponopono hou kakou i na oihana o keia poe kanaka, no ka mea, e wae aku no kakou i na kanaka naauao i mau lunakanawai, na lakou a hookolokolo aku i ua poe kanaka nei e like me na kanawai o ke Akua.

12 Ano, e aho ko ke kanaka hookolokoloia’na e ke Akua, mamua o kona e ke kanaka, no ka mea, ua pololei mau na hoopai o ke Akua, aka aole pololei mau na hoopai o kanaka;

13 Nolaila, ina paha e hiki ia oukou ke loaa na kanaka pono i poe Alii no oukou, he poe e hookupaa ana i na kanawai o ke Akua, a e hookolokolo i keia poe kanaka e like me kana mau kauoha; he oiaio, ina paha e hiki ia oukou ke loaa na kanaka i poe Alii no oukou, he poe e hana ana e like me ko’u makuakane o Beniamina i hana’i no keia poe kanaka; ke i aku nei au ia oukou, ina he mea hiki mau keia, alaila, he mea e pono ai ke loaa mau ia oukou na ’Lii e noho alii ai maluna o oukou.

14 A owau hoi, ua hana owau iho me ka mana a pau o na manao a’u i loaa’i, e ao aku ia oukou i na kauoha a ke Akua, a e hookupaa aku i ka malu mawaena o ka aina, i ole na kaua a me na paio hoi, i ole auhue, aole hoi powa ana, aole hoi pepehi kanaka ana, aole hoi kela ano keia ano o na hewa:

15 A o ka mea nana i hana i ka hewa, ia ia wau i hoopai aku ai i ku i ke kanakwai i haawiia mai ai ia kakou i ko kakou poe kupuna.

16 [m 13, p 3] Ano, ke i aku nei au ia oukou, aole i pono na kanaka a pau, nolaila, aole ia he mea e pono ai no oukou e loaa i Alii, a i mau Alii, e noho alii ai maluna o oukou.

17 No ka mea, aia hoi, nui na hewa ma o ke Alii hewa hookahi la e hanaia’i! he oiaio, a nui loa ka lukuia’na!

18 He oiaio, e hoomanao i ke Alii Noa, i kona hewa a me kana hana hoopailua; a me na hewa a me na mea hoopailua hoi o kona poe kanaka. Aia hoi, nui ka luku ana i ili mai maluna iho o lakou; a no ka lakou mau hala hoi, ua laweia lakou iloko o ka noho luhi ana.

19 A ina ua hana ole mai ko lakou Mea naauao loa nana lakou i hana, a o keia no ko lakou mihi io, ina ua noho lakou me ka hiki ole ke pakele iloko o ka noho luhi ana a hiki i keia manawa.

20 Aka hoi, hoopakele mai la oia ia lakou no ko lakou hoohaahaa ana ia lakou iho imua ona; a no ko lakou kahea nui ana ia ia, hoopakele iho la oia ia lakou mailoko aku o ka noho luhi ana: a pela ka Haku e hana’i me kona mana i na manawa a pau mawaena o na keiki a kanaka, e o ana i ka lima o ke aloha i ka poe i paulele aku ia ia.

21 A, aia hoi, ke i aku nei au ia oukou, ua hiki ole ia oukou ke hoonele aku i kekahi Alii hewa i ka noho alii, ke ole ma o ka paio nui ana la, a me ka hookahe ana i ke koko a nui.

22 No ka mea, aia hoi, ia ia he poe makamaka nona ma ka hewa, a e hoonoho ana oia i kona poe koa a puni ia ia; a e hahae ana oia i na kanawai o ka poe i noho alii ai ma ka pono mamua aku ona: a e hehi ana oia malalo iho o kona mau kapuai i na kanakwai o ke Akua;

23 A e hooholo ana oia i na kanakwai, a e hoouna aku ana ia mau kanawai mawaena o kona poe kanaka; he oiaio, i na kanawai mamuli o ke ano o kona hewa iho; a o ka mea i hoolohe ole i kona mau kanawai, nana e kauoha aku e pepehiia; a o ka mea i kipi aku ia ia, nana e hoouna aku i kona poe koa e kaua aku ia lakou, a ina e hiki ia ia, e luku no oia ia lakou; a pela kekahi Alii pono ole i hookapae ai i na aoao o ka pono a pau.

24 Ano hoi, ke i aku nei au ia oukou, aole ia he mea pono ai e hiki mai na mea ino me neia maluna iho o oukou;

25 Nolaila, e koho aku oukou ma ka leo o ua poe kanaka nei, i na lunakanawai, i hookolokoloia’i oukou e like me na kanawai i haawiia mai ia oukou e ko kakou poe kupuna, a ua pololei ua mau kanawai la, a i haawiia mai ia lakou e ka lima o ka Haku.

26 [m 13, p 4] Ano, he mea ike pinepine ole ia, ka leo o na kanaka e makemake ana i kekahi mea i ku e i ka mea pololei; aka he mea ike pinepine ia no ka hapa uuku o na kanaka e makemake i ka mea pololei ole; nolaila, o keia ka oukou e malama’i, a e hooliloia i kanawai no oukou, e hana i ka oukou hana ma o ka leo la o na kanaka.

27 A ina e hiki mai ka manawa na ka leo o na kanaka e koho aku i ka hewa, alaila, oia ka manawa e ili mai ai na hoopai o ke Akua maluna iho o oukou; he oiaio, alaila, oia ka manawa e hoopai mai oia ia oukou me ka luku nui, me ia i hana mai ai mamua aku i ko keia aina.

28 A, ano, ina he mau lunakanawai ko oukou, a, aole o lakou e hookolokolo aku ia oukou e like me ke kanawai i haawiia mai ai, alaila ua hiki ia oukou ke hoopii aku e hookolokoloia’i lakou e kekahi lunakanawai kiekie ae;

29 Ina e hookolokolo ole ko oukou mau lunakanawai kiekie ae i na hookolokolo pololei, alaila e hoakoakoa oukou i kekahi poe he uuku o ko oukou mau lunakanawai haahaa, a na lakou e hookolokolo aku i ko oukou mau lunakanawai kiekie ae, e like me ka leo o na kanaka.

30 A ke kauoha aku nei au ia oukou e hana i ua mau mea nei ma ka makau i ka Haku: a ke kauoha aku nei au ia oukou e hana i ua mau mea nei, a e noho oukou me ke Alii ole: ke hana ua poe kanaka nei i na hewa a me na hala, i hooiliia’i ua mau hewa la maluna iho o ko lakou mau poo iho.

31 No ka mea, aia hoi, ke i aku nei au ia oukou, o na hewa o na kanaka he nui ua hanaia ma o na hala la a ko lakou poe Alii; nolaila, ua hooiliia ka lakou mau hala maluna iho o na poo o ko lakou poe Alii.

32 Ano, ke makemake nei au i pau ai keia like ole ma neia hope aku ma keia aina, a mawaena ka nui o ko’u poe kanaka nei; aka, ke makemake nei au i ua aina nei e lilo ai i aina kauwa ole, i loaa alikealike ai i kela kanaka keia kanaka kona mau mea e pono ai a me na mea e pomaikai ai, i ka manawa a pau a ka Haku e ike ai he pono, no kakou e ola a e noho ma ka aina; he oiaio, i ka manawa a pau a kekahi o ka kakou poe mamo e noho ai ma ka ili o ka aina.

33 A nui na mea e ae a ke Alii Mosia i palapala’i ia lakou, e wehewehe ana ia lakou i na mea hoao a me na pilikia o ke Alii pono; he oiaio, i na mea luhi a pau o ka uhane no ko lakou poe kanaka, a me na ohumu ana a pau o na kanaka i ko lakou Alii; a hoomaopopo aku la oia i ua mau mea la a pau ia lakou.

34 A hai aku la oia ia lakou aole ua mau mea nei he mea e pono ai: aka e ili mai ke kaumaha maluna iho o na kanaka a pau, e luki i kela kanaka keia kanaka ke hapai i kona hapa.

35 A wehewehe aku la no hoi oia ia lakou i na mea e pilikia ai lakou, ma ka noho alii ana o kekahi Alii pono ole maluna o lakou;

36 He oiaio, i kona mau hala a mau mea hoopailua, a i na kaua, a me na paio, a i ka hookahe koko ana, a i ka aihue ana a me ka powa ana, a i ka hana ana i na moe kolohe, a me kela ano keia ano o na hala, i hiki ole ke heluia; e hai ana ia lakou aole ua mau mea nei he mea e pono ai; e ku e ikaika ana ua mau mea la i na kauoha a ke Akua.

37 [m 13, p 5] Ano, eia kekahi, mahope iho o ka hoouna aka’ku o ke Alii Mosia i ua mau mea nei iwaena o na kanaka, ua maopopo ia lakou ka oiaio o kana mau olelo;

38 Nolaila, haalele iho la lakou i ko lakou makemake no ke Alii, a makemake nui loa i alikealike ka pono o kela kanaka keia kanaka mawaena o ka aina a pau; he oiaio, a ae mai la kela kanaka keia kanaka e hoopaiia no kona hewa iho.

39 Nolaila, eia kekahi, hoouluulu aku la lakou ia lakou iho ma na aha a puni o ka aina, e koho aku i ko lakou poe lunakanawai, e hooponopono ia lakou e like me ke kanawai i haawiia mai ai ia lakou; a ua hauoli nui loa iho la lakou, no ua pomaikai la i haawiia mai ai ia lakou.

40 A mahuahua ikaika lakou me ke aloha ia Mosia; he oiaio, ua manao nui aku lakou ia ia mamua o na kanaka e a pau: no ka mea, aole o lakou nana aku ia ia me he mea hooluhi la, e imi ana i ka waiwai, he oiaio, no kela waiwai i hoohaumia’i i ka uhane, no ka mea, aole oia i auhau i ka waiwai ia lakou, aole hoi oia i olioli ma ka hookahe ana i ke koko; aka, ua hookupaa aku oia i ka malu ma ka aina; a ua ae aku la oia i kona poe kanaka e hoopakeleia’ku lakou mai na mea ano luhi aku a pau; nolaila, ua manao nui loa lakou ia ia, he oiaio, i hiki ole ke anaia.

41 A eia kekahi, wae aku la lakou i na lunakanawai e noho luna maluna o lakou, a e hookolokolo iho ia lakou e like me ke kanawai; a o keia ka lakou i hana’i mawaena o ka aina a pau.

42 [m 13, p 6] A eia kekahi, waeia’ku la o Alama i Lunakanawai Nui Kiekie; oia no hoi ke Kahuna Nui; ua hooili mai kona makuakane i ka oihana maluna ona, a i haawi aku ia ia i ka malama ana no na mea a pau no ka ekalesia.

43 Ano, eia kekahi, hele aku la o Alama ma na aoao o ka Haku, a malama aku la oia i kana mau kauoha, a hookolokolo aku la oia i na hoopai pololei; a he maluhia mau mawaena o ka aina;

44 A pela i hoomaka’i ke au o na Lunakanawai mawaena o ka aina a pau o Zarahemela, mawaena o na kanaka a pau i kapaia ko Nepai poe: a o Alama oia no ka Lunakanawai Nui Kiekie.

45 Ano, eia kekahi, make aku la kona makuakane, he kanawalukumamalua kona mau makahiki, ua ola iho la oia e hooko aku i na kauoha a ke Akua.

46 [m 13, p 7] A eia kekahi, make aku la no hoi o Mosia, ma ka makahiki kanakolukumamakolu o kona noho alii ana, a he kanaonokumamakolu kona mau makahiki; ke huiia, elima haneri kumamaiwa makahiki mai ka wa a Lehi i haalele aku ai ia Ierusalema;

47 A pela i pau ai ke au o na ’Lii maluna iho o ka poe kanaka o Nepai: a pela i pau ai na la o Alama, nana no i hookumu ae i ko lakou ekalesia.

© 2008, 2009 Brent Thompson. Limited rights granted as indicated below, except where otherwise indicated.
This work is licensed under the Creative Commons Attribution-Noncommercial-Share Alike 3.0 United States License. To view a copy of this license, visit http://creativecommons.org/licenses/by-nc-sa/3.0/us/ or send a letter to Creative Commons, 171 Second Street, Suite 300, San Francisco, California, 94105, USA.