O Ka Buke a Moroni

MOKUNA 1

1 [mokuna 1, paukū 1] Ano, owau, o Moroni, mahope iho o ko’u hoopau ana i ka hoopokole ana i ka mooolelo o ka poe kanaka a Iareda, ua manao iho la au a kakau hou ole iho, aka, aole au i make a hiki i keia manawa; a ke hoike ole aku nei au ia’u iho i ko Lamana poe, o pepehi mai lakou ia’u.

2 No ka mea, ua ikaika ino ko lakou mau kaua mawaena o lakou iho; a no ko lakou inaina, ke pepehi mai la lakou i kela Nepai i keia Nepai, ka mea aole e hoole aku i ke Kristo.

3 A, aole au, o Moromi, e hoole aku i ke Kristo; nolaila, ke auwana nei au i kela wahi i keia wahi kahi a’u i hiki ai, no ka maluhia o ko’u ola iho.

4 Nolaila, ke kakau iho nei au i na mea hou he uuku, aole e like me ka mea a’u i manao ai; no ka mea, ua manao au e kakau hou ole iho; aka, ke kakau iho nei au i na mea hou he kakaikahi, i lilo ai paha auanei ia mau mea i mea minamina i ko’u poe hoahanau, i ko Lamana poe, ma kekahi la aku, e like me ka makemake o ka Haku.

MOKUNA 2

1 [mokuna 2, paukū 1] O na olelo a Kristo ana i olelo mai ai i kana poe haumana, i ka poe Umikumamalua ana i wae mai ai, me ia i kau iho ai i kona mau lima maluna o lakou.

2 A hea ae la oia ia lakou ma ka inoa, i ka i ana, E hea aku oukou i ka Makua ma ko’u inoa, ma ka pule ikaika; a mahope iho o ka oukou hana ana i keia, e loaa ia oukou ka mana e haawi aku i ka Uhane Hemolele, i ka mea maluna iho ona oukou e aku iho ai i ko oukou mau lima; a ma ko’u inoa e haawi aku ai oukou ia mea, no ka mea, pela ka hana a ka’u poe aposetolo.

3Ano, olelo mai la o Iesu i keia mau olelo ia lakou i ka manawa o kona ike mua ia’na; a lohe ole ae la ka lehulehu ia mea, aka o ka poe haumana ka i lohe ia mea; a haule iho la ka Uhane Hemolele maluna iho o ka poe a pau, a lakou i kau iho ai i ko lakou mau lima.

MOKUNA 3

1 [mokuna 3, paukū 1] O ke ano a ka poe haumana, ka poe i kapaia na Lunakahiko o ka ekalesia, i hoolilo aku au i na Kahuna a me na Kumu.

2 Mahope iho o ka lakou pule ana i ka Makua ma ka inoa o Kristo, kau iho la lakou i ko lakou mau lima maluna o ia poe, a i aku la,

3 Ma ka inoa o Iesu Kristo ke hoolilo aku nei au ia oe i Kahuna; (a ina paha he Kumu ia,) ke hoolilo aku nei au ia oe i Kumu, e hai aku i ka mihi a me ke kalaia’na o na hala ma o Iesu Kristo la, ma ka hoomau ana o ka manaoio ma kona inoa a hiki wale i ka hopena. Amene.

4 A mamuli o ia ano lakou i hoolilo ai i na Kahuna a me na Kumu, e like me na haawina a me na hea ana o ke Akua i na kanaka; a hoolilo aku la lakou ia poe ma ka mana o ka Uhane Hemolele iloko o lakou.

MOKUNA 4

1 [mokuna 4, paukū 1] O ke ano o ka lawelawe ana o ko lakou poe Lunakahiko a poe Kahuna hoi i ka io a me ke koko o Kristo i ka ekalesia. A lawelawe ae la lakou ia mea e like me na kauoha a Kristo; nolaila, ua ike makou ua oiaio ke ano; a na ka Lunakahiko, a i ole, ia na ke Kahuna ia mea e lawe lawe aku.

2 A kukuli iho la lakou ilalo me ka ekalesia, a pule aku la i ka Makua ma ka inoa o Kristo, i ka i ana,

3 E ke Akua, ka Makua Mau Loa, ke noi aku nei makou ia oe, ma ka inoa o kau keiki o Iesu Kristo, e hoopomaikai a e hoolaa mai i keia berena i na uhane o ka poe a pau e ai ana ia mea, i ai ai lakou ma ka hoomanao i ke kino o kau Keiki, a e hoike aku ia oe, e ke Akua, ka Makua Mau Loa, e ae ana lakou e lawe maluna iho o lakou i ka inoa o kau Keiki, a e hoomanao mau ia ia, a e malama i kana mau kauoha, ana i haawi mai ai ia lakou, i loaa mau ai ia lakou kona Uhane e noho pu me lakou. Amene,

MOKUNA 5

1 [mokuna 5, paukū 1] O ke ano o ka lawelawe ana i ka waina. Aia hoi, lalau aku la lakou i ke kiaha, a i aku la,

2 E ke Akua, ka Makua Mau Loa, ke noi aku nei makou ia oe, ma ka inoa o kau Keiki o Iesu Kristo, e hoopomaikai a e hoolaa mai i keia waina i na uhane o ka poe a pau e inu ana ia mea, i hana ai lakou ia mea ma ka hoomanao i ke koko o kau Keiki, i hookaheia’i no lakou, i hoike aku ai lakou ia oe, e ke Akua ka Makua Mau Loa, e hoomanao mau ana lakou ia ia, i loaa ai ia lakou kona Uhane e noho pu me lakou. Amene.

MOKUNA 6

1 [mokuna 6, paukū 1] Ano, ke olelo aku nei au no ka bapetizo ana. Aia hoi, o na Lunakahiko, no Kahuna, a me na Kumu ua bapetizoia lakou; a na bapetzo ole ai lakou, ina aole lakou i hoohua mai i ka hua ku pono ia mea ia lakou;

2 Aole hoi lakou i hookipa i na kanaka ma ka bapetizo ana, ke ole lakou e hele mai me ka naau pepe a me ka uhane mihi, a hoike mai i ka Ekalesia e mihi io ana lakou i ko lakou mau hewa a pau.

3 Aole i hookipaia na kanaka i ka bapetizo ana, ke ole lakou e lawe maluna iho o lakou i ka inoa o Kristo, me ka manao paa e hookauwa aku nana, a hiki wale aku i ka hopena.

4 A mahope iho o ka hookipaia ana o lakou i ka bapetzo ana, a ua hanaia’e a hoomaemaeia e ka mana o ka Uhane Hemolele, ua helu pu ia lakou mawaena o ka poe kanaka o ka Ekalesia o Kristo, a ua laweia ko lakou mau inoa, i hiki ke hoomanaoia’i lakou a e hanaiia’i e ka olelo maikai a ke Akua, e hoomau ia lakou ma ke ala pololei, e hoomakaala mau ia lakou i ka pule, e paulele ana maluna o na pono wale no o Kristo, oia no ka mea nana i hookumu a me ka mea hoi nana i hoopaa i ko lakou manaoio.

5 A halawai pinepine ae la ka Ekalesia ma kahi hookahi, e hookeai a e pule, a e olelo pu kekahi me kekahi no ka pomaikai o ko lakou mau uhane;

6 A halawai pinepine ae la lakou i kahi hookahi e ai i ka berena a e inu i ka waina, ma ka hoomanao i ka Haku o Iesu;

7 A ua ikaika lakou e ike i ole ai he hewa mawaen o lakou; a o na mea i loaa e hana hewa ana, a hoohewa ae la kekahi mau hoike ekolu o ka Ekalsia ia lakou imua o na Lunakahiko; a ina aole lakou i mihi, aohe hoi i hai mai i ko lakou mau hewa, ua holoiia’ku ko lakou mau inoa, a ua helu pu ole ia lakou mawaena o ka poe kanaka o Kristo;

8 Aka, e like me ka nui o na wa a lakou i mihi ai, a imi i ke kalaia’na, me ka makemake io, ua kalaia’ku lakou.

9 A ua alakaiia’e ko lakou mau halawai e ka Ekalesia, mamuli o ke ano o na hana ana o ka Uhane, a ma o ka mana la o ka Uhane Hemolele; no ka mea, e like me ka mana o ka Uhane Hemolele i alakai ai ia lakou, ina paha e hai olelo, a e hooikaika paha, e pule paha, e noi aku paha, a e himeni paha, pela no ia i hanaia’i.

MOKUNA 7

1 [mokuna 7, paukū 1] Ano, ke kakau iho nei au, o Moroni, i kekahi mau olelo he kakaikahi a ko’u makua Moramona, ana i olele mai ai no ka Manaoio, ka Manaolana a me ke Aloha; no ka mea, mamuli o keia ano oia i olelo mai ai i na kanaka, me ia i ao mai ai ia lakou ma ka halehalawai a lakou i kukulu iho ai, i wahi e hoomana ai.

2 Ano, ke olelo aku nei owau, o Moramona, ia oukou, e ko’u poe hoahanau aloha; a ma ka lokomaikai o ke Akua, ka Makua, a me ko kakou Haku o Iesu Kristo, a me kona makemake hemolele, no ka haawina o kona hea ana ia’u, i aeia mai au e olelo aku ia oukou i keia manawa;

3 Nolaila, ke ake nei au e olelo aku ia oukou, e ka poe o ka Ekalesia, ka poe e hahai malie ana ia Kristo, a i loaa no hoi ka manaolana ku pono, ma ia mea i hiki ai ia oukou ke komo iloko o ka maha o ka Haku, mai keia manawa aku, a hiki wale aku i ka wa e maha pu ai oukou me ia ma ka lani.

4 Ano, e kuu poe haohanau, ke manao nei ai i keia mau mea no oukou, no ko oukou hele malie ana me na keiki a kanaka;

5 No ka mea, ke hoomanao nei au i ka olelo a ke Akua, e olelo ana, Ma ka lakou mau hana e ike ai oukou ia lakou; no ka mea, ina he maikai ka lakou mau hana, alaila, ua maikai no hoi lakou.

6 No ka mea, aia hoi, ua olelo mai ke Akua, O ke kanaka i ino, ua hiki ole ke hana i ka mea maikai; no ka mea, ina e alana ana oia he makana, a e pule ana paha i ke Akua, ke ole oia e hana ia mea me ka makemake io, e pomaikai ole ana oia ia mea.

7 No ka mea, aole i manaoia ia mea ia ia no ka pono.

8 No ka mea, ina he kanaka i ino, e haawi ana i ka makana, e hana ana oia ia mea me ke aua; nolaila, ua manao like ia ia mea ia ia, me he mea la ua aua oia i ka makana; nolaila, ua manaoia oia me ka mea ino imua o ke Akua.

9 A pela hoi i manaoia he ino i ke kanaka, ina e pule aku oia, a me ka makemake ole io o ka naau; he oiaio, a e pomaikai ole ana oia ia mea; no ka mea, i hookipa ole ana ke Akua i na mea me ia;

10 Nolaila, o ke kanaka i ino, ua hiki ole ia ia ke hana i ka mea i maikai; aohe no hoi oia e haawi ae i ka makana maikai.

11 No ka mea, ua hiki ole i ka punawai awaawa ke puapuai mai i ka wai maikai; aohe no hoi i hiki i ka punawai maikai ke puapuai mai i ka wai awaawa; nolaila, o ke kanaka e noho kauwa ana na ka diabolo, ua hiki ole ke hahai aku ia Kristo; a ina e hahai aku oia ia Kristo, ua hiki ole ia ia ke noho kauwa aku na ka diabolo.

12 [m 7, p 2] Nolaila, o na mea a pau i maikai, e hiki mai ana ia mau mea mai ke Akua mai; a o ka mea i ino, e hiki mai ana ia mai ka diabolo mai; no ka mea, he enemi no ka diabolo i ke Akua, a e kaua ku e mau aku ana oia ia ia, a e kono mai ana a e hoowalewale mai ana e lawe hala, a e hana mau i ka mea i ino.

13 Aka hoi, o ka mea no ke Akua, e kono mai ana a e hoowalewale mai ana ia e hana maikai mau; nolaila, o kela mea keia mea e kono mai ana a e hoowalewale mai ana e hana maikai, a e aloha aku i ke Akua, a e hookauwa aku nana, ua hoouluhiaia e ke Akua.

14 Nolaila, e makaala, e ko’u poe hoahanau aloha, i manao ole ai oukou i ka mea i ino, no ke Akua mai ia, a i ka mea maikai a no ke Akua hoi, no ka diabolo mai ia.

15 No ka mea, e o’u poe hoahanau, ua haawiia mai ia oukou e noonoo pono, i ike ai oukou i ka maikai mai ka ino ae; a ua like ke akaka o ka hana e noonoo pono ai, e ike ai oukou me ka ike paka, me ka malamalama o ka la mai ka po pouli ae.

16 No ka mea, aia hoi, ua haawiia mai ka Uhane o Kristo i kela kanaka i keia kanaka, i ike ai lakou i ka maikai mai ka ino ae; nolaila, ea, ke hoike aku nei au ia oukou i ka hana e noonoo pono ai; no ka mea, o kela mea keia mea e kono mai ana e hana i ka maikai, a e ao hoohuli mai e manaoio ia Kristo, ua hoounaia mai ia e ka mana a me ka haawina o Kristo; nolaila, ua hiki ia oukou ke ike me ka ike paka, no ke Akua mai ia;

17 Aka, o ka mea e hoohuli ana i na kanaka e hana ino, a e manaoio ole ia Kristo, a e hooli aku ia ia, a hookauwa ole aku na ke Akua, alaila, ua hiki ia oukou ke ike me ka ike paka, no ka diabolo mai ia, no ka mea, mamuli o keia ano e hana ana ka diabolo, no ka mea, aole e hoohuli ana oia i na kanaka e hana maikai, aole loa i hookahi; aole no hoi kana poe anela; aole no hoi ka poe e hookauwa ana ia lakou iho nana.

18 [m 7, p 3] Ano, e o’u poe hoahanau, i ka ike ana ua ike oukou i ka malamalama i hiki ai ia oukou ke noonoo pono, a o ua malamalama nei oia no ka malamalama o Kristo, e makaala i ole ai oukou e manao hewa ai; no ka mea, me ka manao ino a oukou e manao ino aku ai, pela hoi e manao ino ia mai ai oukou.

19 Nolaila, ke noi aku nei au ia oukou, e na hoahanau, e imi ikaika oukou i ka malamalama o Kristo, i ike ai oukou i ka maikai mai ka ino ae; a ina e hopu aku oukou i kela mea maikai i keia mea maikai, a e hoohewa ole aku ia mea, e lilo oiaio no oukou i keiki na Kristo.

20 Ano, e ko’u poe hoahanau, pehea la e hiki ai ia oukou ke hopu i kela mea maikai i keia mea maikai?

21 Ano, ke hiki nei au i ua Manaoio la, ka mea a’u i i aku ai ia oukou na’u e olelo aku; a na’u e hai aku ia oukou i ke ala, i hiki ai ia oukou ke hopu aku i kela mea maikai i keia mea maikai.

22 No ka mea, aia hoi, e ike ana ke Akua i na mea a pau, a mau loa ana oia ia ao aku ia ao aku, aia hoi, hoouna mai la oia i na anela e lawelawe mai i na keiki a kanaka, e hoike mai no ka hiki ana mai o Kristo; a iloko o Kristo e hiki mai kela mea maikai keia mea maikai.

23 A hai mai la no hoi ke Akua i na kaula, ma kona waha iho, e hiki mai auanei o Kristo.

24 A, aia hoi, ua nui no na ano o kona hoike ana mai i na mea i na keiki a kanaka i na mea maikai; a o na mea a pau i maikai, e hiki mai ana ia mau mea mai ia Kristo mai, i ole ia ua haule iho na kanaka, a ua hiki ole i kekahi mea maikai ke hele mai io lakou la.

25 Nolaila, ma ka lawelawe ana o na anela, a ma kela olelo keia olelo i puka mai ai noloko mai o ka waha o ke Akua, hoomaka ae la na kanaka e hana me ka manaoio iloko o Kristo; a pela ma ka manaoio, hopu aku la lakou i kela mea maikai i keia mea maikai; a pela no ia a hiki aku i ka hiki ana o Kristo.

26 A mahope mai o ka wa ana i hiki mai ai, hoolaia mai no hoi na kanaka ma ka manaoio ma kona inoa; a ma ka manaoio, lilo iho la lakou i poe keiki na ke Akua. A he oiaio me Kristo e ola nei, olelo mai la oia i keia mau olelo i ko kakou poe kupuna, i ka i ana mai, O kela mea keia mea a oukou e noi aku ai i ka Makua ma ko’u inoa, i maikai, ma ka manaoio e manaoio ana i ka loaa ana ia oukou, aia hoi, e hanaia mai ia ia oukou.

27 Nolaila, e o’u poe hoahanau alohaia, ua oki ae la anei na hana mana, no ka pii ana o Kristo iloko o ka lani, a ua noho ilalo ma ka lima akau o ke Akua, e noi aku i ka Makua i kona mau pono o ka lokomaikai, ana i loaa’i maluna o na keiki a kanaka?

28 No ka mea, ua hooko ae oia i na kumu o ke kanawai, a e koi ana i ka poe a pau nona ka manaoio iloko ona; a o ka poe nona ka manaoio iloko ona, e hoopili mau no lakou i kela mea maikai i keia mea maikai; nolaila, ke kokua nei oia i ka aoao o na keiki a kanaka; a ke noho mau loa la oia ma na lani.

29 A no kana hana ana i keia, e o’u poe hoahanau, ua oki ae la anei na hana mana? Aia hoi, ke i aku nei au ia oukou, aole; aole no hoi i oki ae la na anela e lawelawe mai i na kaiki a kanaka.

30 No ka mea hoi, malalo iho lakou ona, e lawelawe ae e like me ka olelo o kana kauoha, e hoike ana ia lakou iho i ka poe o ka manaoio ikaika a me ka naau naueue ole, ma kela ano keia ano o na mea o ke Akua.

31 A o ka hana a ko lakou oihana, oia no e kahea aku i na kanaka i ka mihi, a e hooko a e hana i ka hana o no berita a ka Makua, ana i hana mai ai i na keiki a kanaka, e hoomakaukau mai i ke ala mawaena o na keiki a kanaka, ma ka hai ana i ka olelo a Kristo i no ipu i waeia e ka Haku, i hoike aku ai lakou nona;

32 A ma ka hana ana pela, e hoomakaukau ana ka Haku ke Akua i ke ala, i loaa’i i ke koena o na kanaka ka manaoio iloko o Kristo, i loaa’i i ka Uhane Hemolele i wahi haawale ma ko lakou mau naau, e like me ka mana ona; a mamuli o keia ano e hooko mai ana ka Makua i na berita, ana i hana mai ai i na keiki a kanaka.

33 A ua i mai la o Kristo, Ina e manaoio mai oukou ia’u, e loaa auanei ia oukou ka mana e hana aku i kela mea i keia mea i ku pono ia’u.

34 A i mai la ia, E mihi oukou, e ko na welau a pau o ka honua, a e hele mai io’u nei a e bapetizoia ma ko’u inoa, a e manaoio mai ia’u, i hoolaia’i oukou.

35 [m 7, p 4] Ano, e o’u poe hoahanau alohaia, ina pela iho la he oiaio keia mau mea a’u i olelo aku nei ia oukou, a e hoike mai no ke Akua ia oukou me ka mana a me ka nani nui ma ka la hope, he oiaio ia mau mea; a ina he oiaio ia mau mea, ua oki ae la anei ka la o na hana mana?

36 A ua oke ae la anei na anela e ikeia e na keiki a kanaka? A ua aua aku anei oia i ka mana o ka Uhane Hemolele, mai o lakou ae? A e hana anei oia pela, oiai e mau ana ka manawa, a e ku ka honua, a e noho ana kekahi kanaka maluna iho o ka ili ona e hoolaia’i?

37 Aia hoi, ke i aku nei au ia oukou, aole, no ka mea, ma ka manaoio i hanaia’i na hana mana; a ma ka manaoio no i ikeia na anela a e lawelawe mai i na kanaka; nolaila, ina ua oki ae la ua mau mea nei, aawe na keiki a kanaka, no ka mea, no ka manaoio ole no ia mea, a ua makehewa na mea a pau;

38 No ka mea, aole hiki i kekahi kanaka ke hoolaia mai, e like me na olelo a Kristo, ke ole he manaoio ko lakou ma kona inoa: nolaila, ina ua oki ae la keia mau mea, alaila, ua oki ae la no hoi ka manaoio; a weliweli no ka noho ana o kanaka; no ka mea, me he mea la lakou aole i hanaia ka hoolapanai.

39 Aka hoi, e o’u poe hoahanau alohaia, ke manao nei au i na mea maikai nui ae no oukou, no ka mea, ke menao nei au he manaoio ko koukou ia Kristo no ko oukou akahai; no ka mea, ina aole o oukou manaoio iloko ona, alaila, aole ku pono oukou ke helu pu ia mawaena o ka poe kanaka o kona ekalesia.

40 A eia hou, e o’u poe hoahanau aloha, ke makemake nei au e olelo aku ia oukou no ka manaolana. Pehea la i hiki ai ia oukou ke loaa ka manaoio, ke ole he manaolana ko oukou?

41 A heaha ka mea a oukou e manaolana’i? Aia hoi, ke i aku nei au ia oukou, e manaolana oukou ma o ke kalahala ana la o Kristo a me ka mana o kona alahouana, e hoalaia i ke ola mau loa; a o keia mea no ko oukou manaoio ia ia e like me ka olelo hoolana;

42 Nolaila, ina he manaoio ko ke kanaka, he manaolana no hoi kona e pono ai; no ka mea, me ka manaoio ole aole loa ha manolana kekahi.

43 A eia hou, ke i aku nei au ia oukou, aole e hiki ia ia ke loaa ka manaoio a me ka manaolana, ke ole akahai oia, a haahaa ma ka naau;

44 Ina pela, ua makehewa kona manaoio a manaolana, no ka mea, aole aponoia kekahi mea imua o ke Akua, o ka poe akahai a haahaa ma ka naau wale no, a ina akahai ke kanaka, a haahaa ma ka naau, a e hai ana ma ka mana o ka Uhane Hemolele, o Iesu no ke Kristo, he aloha kona e pono ai; no ka mea, ina aole he aloha kona, ua ole oia; nolaila, he aloha kona e pono ai.

45 O ke aloha ua hoomanawanui, a ua lokomaikai, a ua paonioni ole, a ua haakei ole, e imi ole ana i kona mea iho, aole hoohuhu hiki wawe ia, aole noonoo ino, aole e hauoli ana ma ka hewa, aka, e hauoli ana ma ka pono, ua ahonui i na mea a pau, ua manaoio i na mea a pau, ua manaolana i na mea a pau, ua hoomanawanui i na mea a pau;

46 Nolaila, e o’u poe hoahanau alohaia, ina aole he aloha ko oukou, ua ole oukou, no ka mea, e pau ole ana ke aloha. Nolaila, e hoopili aku i ka aloha, oia no ka mea nui loa o na mea a pau, no ka mea, e pau ana na mea a pau;

47 Aka, o keia aloha o ke aloha maemae no ia o Kristo, a e mau loa ana no ia no ka wa pau ole; a o na mea i loaa me ia mea pu ma ka la hope, e pomaikai auanei lakou.

48 Nolaila, e o’u poe hoahanau, e pule aku i ka Makua me ka ikaika a pau o ka naau, e hoopihaia oukou me keia aloha ana i haawi mai ai maluna iho o ka poe hahai oiaio a pau i kana Keiki, o Iesu Kristo, i lilo ai oukou i poe keiki na ke Akua, a i kona wa i ikea mai ai, e like auanei kakou me ia; no ka mea, e ike kakou ia ia i kona ano maoli, i loaa’i ia kakou keia manaolana, e hoomaemaeia’i kakou e like me kona maemae. Amene.

MOKUNA 8

1 [mokuna 8, paukū 1] O kekahi episetole a ko’u makuakane o Moramona, i palapala mai ai ia’u, o Moroni nei; a ua palapalaia ia ia’u, i ka wa kokoke mahope iho o ko’u kaeaia’na i ka oihana kahuna pule. A menei oia i palapala mai ai ia’u, i ka i ana,

2 E ka’u keiki aloha, e Moroni e, ke hauoli nui loa nei au no ka malama o kou Haku, o Iesu Kristo, ia oe, a ua kahea ae ia oe i kana oihana kahuna, a i kana hana hemolele.

3 Ke hoomanao nei au ia oe i na manawa a pau ma ka’u mau pule, e pule mau ana i ke Akua, i ka Makua, ma ka inoa o kana keiki hemolele, o Iesu, i malama mai ai oia, ma o kona aloha a lokomaikai nui loa la, ia oe, ma o ka hoomau ana la o ka manaoio ma kona inoa, a hiki i ka hopena.

4 [m 8, p 2] Ano, e ka’u keiki, ke olelo aku nei au ia oe no ka mea e hoeha nui loa ana ia’u; no ka mea, e hoeha ana ia’u ka ea ana o na hoopaapaa mawaena o oukou.

5 No ka mea, ina ua lohe au i ka oiaio, e hoopaapaa ana mawaena o oukou no ka bapetizoia’na o ko oukou mau keiki uuku.

6 Ano, e ka’u keiki, ke makemake nei au e hana ikaika oe, i hoopauia’ku ai keia hewa nui maiwaena aku o oukou; no ka mea, no keia manao ua palapala iho au i keia episetole.

7 No ka mea, emo ole mahope iho o ko’u lohe ana i keia mau mea ia oe, ninau aku la au i ka Haku no ia mea. A hiki mai la ka olelo a ka Haku io’u nei, ma o ka mana la o ka Uhane Hemolele, i ka i ana,

8 E hoolohe mai i na olelo a Kristo, kou Mea Hoolapanai, kou Haku a me kou Akua. Aia hoi, hele mai la au iloko o ke ao nei aole e hea aku i ka poe pono, aka, i ka poe hewa i ka mihi; aole no ka poe ola ke kahuna lapaau, aka, no ka poe mai no; nolaila, ua ola na keiki uuku, no ka mea, ua hiki ole ia lakou ke hana hewa; no ia mea, ua laweia’ku ka poino o Adamu mai o lakou ae iloko o’u, i ole ai ia he mana maluna o lakou; a ua hoopauia’ku ke kanawai o ka okipoepoe ana iloko o’u.

9 A mamuli o keia ano i hoike mai ai ka Uhane Hemolele i ka olelo a ke Akua ia’u; nolaila, e ka’u keiki alohaia, ua ike au he hoomaewaewa kohu loa no ia imua o ke Akua, ke bapetizo aku oukou i na keiki uuku.

10 Aia hoi, ke i aku nei au ia oe, o keia kau e ao aku ai, o ka mihi a me ka bapetizo ana i ka poe ku i ka hookolokoloia a hiki hoi ke hana hewa; he oiaio, e ao aku i na makua e mihi lakou a e bapetizoia e pono ai, a e hoohaahaa ia lakou iho me ka lakou poe keiki uuku, a e hoolaia auanei lakou a pau me ka lakou poe keiki uuku;

11 Aohe e pono ka mihi o ka lakou poe keiki, aohe hoi ka bapetizoia’na. Aia hoi, o ka bapetizo ana, ea, i ka mihi no ia i ka hooko ana i na kauoha i ke kalaia’na o no hala.

12 Aka, ua ola na keiki uuku iloko o Kristo, mai ka hookumuia’na mai o ke ao nei; ina aole pela, he Akua lawe kapaikahi ke Akua, a he Akua lolilua no hoi, a he mea manao nui i ko na kanaka helehelena; no ka mea, ehia la ka nui o na keiki uuku i make me ka bapetizo ole ia.

13 Nolaila, ina ua hiki ole i na keiki uuku ke hoolaia me ka bapetizo ole ia, alaila ua hele aku ua poe nei i ke gehena pau ole.

14 Aia hoi, ke i aku nei au ia oe, o ka mea e manao ana he mea e pono ai e bapetizoia na keiki uuku, aia no ia ma ke au o ka awaawa, a ma na mea paa o ka hewa; aole ona manaoio, manaolana, aohe no hoi he aloha; nolaila, ina paha e hookiia’ku oia oiai oia ma ia manao, e iho aku no oia ilalo i Gehena.

15 No ka mea, he weliweli no ka hewa e manao e hoola ana ke Akua i kekahi keiki no ka bapetizo ana, a e make ana kekahi no kona bapetizo ole ia’na.

16 Auwe ka mea nana e hookapae ae i na aoao o ka Haku mamuli o keia ano, no ka mea, e make auanei lakou, ke mihi ole lakou. Aia hoi, ke olelo aku nei au me ka wiwo ole, me ka mana mai ka Akua mai; a ke makau ole nei au i ka mea i hiki ai i kanaka ke hana; no ka mea, ke kipaku aku nei ke aloha oiaio i ka makau a pau;

17 A ua hoopihaia au me ke aloha io, oia no ke aloha mau loa; nolaila, ua like na keiki a pau ia’u; nolaila, ke aloha aku nei au i na keiki uuku me ke aloha oiaio; a ua alikealike lakou a pau, a he poe hoaloaa hoi o ke ola mau lau.

18 [m 8, p 3] No ka mea, ua ike au aole he Akua kapaikahi ke Akua, aohe no hoi he mea lolilua; aka, ua luli ole oia ia ao aku ia ao aku a mau loa aku.

19 Ua hiki ole i na keiki uuku ke mihi; nolaila, he hewa weliweli e hoole i na lokomaikai maemae o ke Akua ia lakou, no ka mea, ua ola lakou a pau iloko ona no kona lokomaikai.

20 A o ka mea e olelo ana, e bapetizoia na keiki uuku e pono ai, ke hoole la oia i na lokomaikai o Kristo, a e hoolilo ana i kona kalahala ana a me ka mana o kona hoolapanai ana, i mea ole.

21 Auwe ka poe e like me ia, no ka mea, e kokoke ana lakou i ka make, i gehena, a i ka eha pau ole. Ke olelo wiwo ole aku nei au ia mea, ua kauoha mai la ke Akua ia’u. E hoolohe mai ia mau mea a e malama, i ole e ku ku e ia mau mea ia oukou ma ka noho hookolokolo o Kristo.

22 No ka mea, aia hoi, ua ola na keiki uuku a pau iloko o Kristo, a me ka poe a pau no hoi me ke kanawai ole. No ka mea, e hiki mai ana ka mana o ka hoolapanai maluna o ka poe a pau me ke kanawai ole; nolaila, o ka mea i hoohewa ole ai, a, aole hoi malalo iho o ka hoohewaia ana, ua hiki ole ke mihi; a i ka poe me neia aole he mea e pomaikai ai ka bapetizo ana.

23 Aka, he hoomaewaewa ia imua o ke Akua, e hoole ana i na lokomaikai o Kristo, a me ka mana o kona Uhane Hemolele, a e paulele ana ma na hana make.

24 Aia hoi, e ka’u keiki, he mea e pono ole ai keia; no ka mea, o ka mihi, ea, no ka poe ia malalo iho o ka hoohewaia’na, a malalo iho hoi o ka poino o kekahi kanawai i uhaiia.

25 A o na hua mua o ka mihi oia no ka bapetizo ana; a e hiki ana ka bapetizoia ma o ka manaoio la, i ka hooko ana i na kauoha; a e lawe mai ana ka hooko ana i na kauoha i ke kalaia ana o na hala;

26 A e lawe mai ana ke kalaia’na o na hala i ke akahai, a me ka haahaa o ka naau, a no ke akahai, a me ka haahaa o ka naau, i hiki mai ana ka hoomaikaiia ana o ka Uhane Hemolele, a e hoopiha ana keia kokua me ka manaolana a me ka aloha oiaio, a e hoomau ana ua aloha nei ma ka ikaika i ka pule, a hiki mai ka hopena, i ka wa e noho pu ai ka poe hoano a pau me ke Akua.

27 Aia hoi, e ka’u keiki, e palapala hou aku au ia oe, ke hele koke ole aku au mawaho e ku e aku i ko Lamana poe. Aia hoi, ua lilo ka haaheo o keia lahuikanaka, ka poe kanaka o ko Nepai, i mea e make ai lakou, ke ole lakou e mihi.

28 E pule aku no lakou, e ka’u keiki, i hiki mai ai ka mihi ia lakou, Aka hoi, ke makau nei au ua hooki paha ka hooikaika ana o ka Uhane me lakou; a ma keia hapa o ka aina e imi ana no hoi lakou e hoohiolo iho i ka mana a pau a me na oihana, e hiki mai ana mai ke Akua mai; a e hoole ana lakou i ka Uhane Hemolele.

29 A mahope iho o ko lakou hoomalau ana i ka ike nui me neia, e ka’u keiki, e make koke io no lakou i ka hooko ana i na wanana i oleloia’i e ka poe kaula, me na olelo ponoi no hoi a ko kakou Mea e Ola’i.

30 Ke uwe aloha nei au, e ka’u keiki, a hiki aku i ka wa a’u e palapala iho ai ia oe, a i ole ia, e halawai hou me oe. Amene.

O ka episetole lua a Moramona i kana keiki Moroni.

O ka mokuna 9.

MOKUNA 9

1 [mokuna 9, paukū 1] E ka’u keiki alohaia, ke palapala hou iho nei au ia oe, i ike ai oe ke ola nei au; aka, ke palapala iho nei au i kekahi mea i eha nui.

2 No ka mea, he kaua eha loa ko’u me ko Lamana poe, ma ia kaua ana aole makou i lanakila; a ua haule iho o Arekeanatusa ma ka pahikaua, a me Lurama laua me Emarona no hoi; he oiaio, a ua lilo he nui wale o ko makou poe kanaka koikoi.

3 Ano hoi, e ka’u keiki, ke makau nei au o luku mai auanei ko Lamana poe i keia poe kanaka, no ka mea, aole o lakou mihi, a e hooeueu mau ana o Satana ia lakou i ka huhu, i kekahi me kekahi.

4 Aia hoi, e hooikaika mau ana au me lakou; a i ka wa a’u i olelo aku ai i ka olelo a ke Akua me ka oi loa, haalulu ae la a huhu mai la lakou ia’u; a i ka wa a’u i hana’i me ka oi ole, ke hoopaakiki nei lakou i ko lakou mau naau e ku e ia mea; nolaila, ke makau nei au ua hooki paha ka hooikaika ana o ka Uhane o ka Haku me lakou.

5 No ka nui loa o ko lakou huhu, me he mea la ia’u aole o lakou makau i ka make; a ua pau aku la ko lakou aloha, kekahi i kekahi; a iini nui lakou mamuli o ke koko a me ka hoopai i na manawa a pau.

6 Ano, e ka’u keiki aloha, me ko lakou paakiki, e hana ikaika nae kaua; no ka mea, ina e hooki aku kaua i ka hana, e laweia mai auanei kaua malalo iho o ka hoohewaia’na; no ka mea, he hana ka kaua e hana’u oiai ma keia halelewa o ka lepo, i lanakila aku ai kaua malua o ka enemi o ka pono a pau, a e hoomaha i ko kaua mau uhane ma ke aupuni o ke Akua.

7 [m 9, p 2] Ano, ke palapala iho nei au i kekahi mau mea no na popilikia o keia poe kanaka. No ka mea, e like me ka ike a’u i loaa’i mai ia Amorona mai, aia hoi, ua nui na mea pio a ko Lamana poe, a lakou i lawe aku ai ma ka hale kiai Seriza; a he poe kane, a poe wahine a me na kamalii lakou.

8 A o na kane a me na makuakane a kela poe wahine la a me na kamalii ka lakou i pepehi ai, a ke hanai nei lakou i na wahine i ka io o ka lakou poe kane, a me na keiki i ka io o ko lakou poe makuakane; he wahi wai uuku loa wale no ka i haawiia ia lakou.

9 Aole e oi aku ana keia mea hoopailua nui o ko Lamana poe, i ko ko kaua poe kanaka ma Morianatuma. No ka mea hoi, ua lawe pio ae la lakou i na kaikamahine he nui wale a ko Lamana poe; a mahope iho o ko lakou hoonele ana ia lakou la ia mea minamina a makemake loa ia maluna iho o no mea a pau, oia no ka puupaa ana a me ka maemae;

10 A pau ae la keia mea i ka hanaia e lakou, pepehi aku la lakou ia lakou la, ma ke ano mainoino loa, e hoehaeha ana i ko lakou la mau kino a hiki i ka make; a mahope iho o ka lakou hana ana i keia, ai iho la lakou i ko lakou la io e like me na holoholona hihiu, no ka paakiki i ko lakou mau naau; a ke hana la lakou ia mea i ouli o ke koa ana.

11 E ka’u keiki alohaia, pehea la e hiki i ka poe kanaka e like me keia, ka poe e noho naauao ole ana;

12 (A ua hala aku la he mau makahiki he uuku wale no, a he poe kanaka noho maie a oluolu lakou;)

13 Aka, e ka’u keiki, pehea la e hiki i ka lahuikanaka me neia, ka poe nona ka lealea ma ka ino nui me neia,

14 Pehea la i hiki ai ia kaua ke manao e hooki ke Akua i kona lima ma ka hoopai mai ia kakou?

15 Aia hoi, ke hea nei kuu naau, Auwe keia poe kanaka. E puka mai ma ka hoopai, e ke Akua, a e huna iho i ko lakou mau hewa, a hana ino, a mau mea hoopailua maimua aku o kou alo.

16 A eia hou, e ka’u keiki, ua nui na wahinekanemake a me ka lakou poe kaikamahine, e noho la ma Seriza; a o kela hapa o ka ai a ko Lamana poe i lawe ole aku ai, aia hoi, ua lawe aku ka poe kaua o Zenepai, a haalele ae la ia lakou e auwana i kela wahi i keia wahi a lakou i hiki ai no ka ai; a nui wale na luahine e maule ana ma ke ala, a make ana.

17 A ua nawaliwali ka poe koa pu me au; a aia na poe kaua o lo Lamana poe mawaena konu o Seriza a me a’u; a o ka poe a pau i holo aku ai i ka poe kaua la o Aarona, ua haule iho la lakou a make i ka lakou hana lokoino weliweli.

18 [m 9, p 3] Auwe ka hewa o ko’u poe kanaka! Ua nele lakou i ka pololei a me ke aloha. Aia hoi, he kanaka wale no au, a he ikaika o ke kanaka wale no ko’u, a ua hiki hou ole ia’u ke hooko aku i ka’u mau kauoha;

19 A ua lilo iho la lakou i ikaika ma ko lakou kapae ana; a ua kohu like lakou me ka holoholona, e hookoe ole ana i kekahi, aohe no i ka poe elemakule, aohe no hoi i ka poe opiopio; a ke lealea nei lakou ma na mea a pau, koe wale no na mea maikai; a e oi aku ana na popilikia o ko makou poe wahine, a me ko makou poe keiki, maluna iho o ka ili a pau o keia aina, i na mea a pau; he oiaio, ua hiki ole i ka elelo ke hai aku, aole no hoi i hiki ia ke palapalaia.

20 Ano, e ka’u keiki, aole au e hoomau hou ana ma keia mea ino weliweli. Aia hoi, ua ike oe i ka hewa o keia poe kanaka; ua ike oe aole o lakou manao pololei, a ua pau ke aloha ana; a ua kela aku ko lakou hewa i ko ko Lamana poe.

21 Aia hoi, e ka’u keiki, ua hiki ole ia’u ke hoomaikai aku ia lakou i ke Akua, o hahau mai oia ia’u.

22 Aka hoi, e ka’u keiki, ke hoomaikai aku nei au ia oe i ke Akua, a ke manaolana nei au iloko o Kristo e hoolaia auanei oe; a ke pule nei au i ke Akua nana e hookoe mai i kou ola, e ike i ka hoi hou ana o keia poe kanaka ia ia, a i ole ia, i ko lakou anai loa ia ana; no ka mea, ua ike au e make io no lakou, ke mihi ole lakou a hoi hou aku io na la;

23 A ina e make lakou, alaila e like auanei ia me ko ko Iareda poe, no ka hookuli o ko lakou mau naau, e imi ana i ke koko a me ka hoopai.

24 A ina paha e make lakou, ua ike kaua ua nui wale na hoahanau o kaua i haalele ku e mai a hele aku i ko Lamana poe la, a e nui wale ana na mea e ae e haalele ku e mai auanei no hoi, a hele aku io lakou la; nolaila, e palapala i kekahi mau mea he kakaikahi, ina e hookoeia oe, a make auanei au me ka ike ole aku ia oe, aua, ke lana nei kuu manao e ike koke au ia oe; no ka mea, he mau mooolelo laa ko’u, a’u e makemake nei e haawi aku ia oe.

25 E ka’u keiki, e kupaa iloko o Kristo; a, aole na na mea a’u i palapala ai e hooeha ia oe, e hookaumaha iho ia oe ilalo i ka make, aka, na Kristo oe e haapai ae, a na kona mau popilikia a make, a me ka hoike ana o kona kino i ko kakou poe kupuna, a me kona aloha a hoomanawanui ana, a me ka manaolana o kona nani a o ke ola mau loa, e kau mau iho iloko o kou naau ia ao aku ia ao aku.

26 A no ka lokomaikai o ke Akua ka Makua, nona ka noho alii kiekie ma na lani, a me ko kaua Haku o Iesu Kristo, ka mea e noho ana ma ka lima akau o kona mana, a hiki aku i ka wa e lilo ai na mea a pau malalo iho ona, e noho pu i keia manawa a mau loa aku me oe, ia ao aku ia ao aku. Amene.

MOKUNA 10

1 [mokuna 10, paukū 1] Ano, ke palapala iho nei au, Moroni, i kekahi mau mea maikai i kuu manao; a ke palapala iho nei au i ko’u poe hoahanau, i ko Lamana poe; a ua makemake au e ike oukou ua hala aku na makahiki eha haneri me ka iwakalua a keu aku, mahope iho o ka haawi ana mai o ka hoailona no ka hiki ana mai o Kristo.

2 A ke sila iho nei au i keia mau mooolelo, mahope iho o ka’u olelo ana i kakahi mau olelo ma ka aoao kauleo aku ia oukou.

3 Aia hoi, ke kauleo aku nei au ia oukou, i ka wa a oukou e heluhelu ana i keia mau mea, ina he mea naauao i ke Akua e helohelu ai oukou ia mau mea, e hoomanao oukou i ka nani o ko ka Haku aloha ana i na keiki a kanaka, mai ka hanaia’na mai o Adamu, a hiki wale i ka manawa a oukou e loaa’i keia mau mea, a e noonoo ia mea ma ko oukou naau.

4 A ia oukou e loaa’i keia mau mea, ke ake nei au e kauleo aku ia oukou, e ninau aku oukou i ka akua, i ka Makua mau loa, ma ka inoa o Kristo, ina he oiaio keia mau mea; a ina e ninau aku auanei oukou me ka naau oiaio, ma ka makemake io, ma ka manaoio ia Kristo, nana no e hoike mai i ka oiaio o ia mea ia oukou, ma ka mana o ka Uhane Hemolele;

5 A ma ka mana o ka Uhane Hemolele, ua hiki ia oukou ke ike i ka oiaio o na mea a pau.

6 A o kela mea keia mea i maikai, ua pololei a oiaio hoi; nolaila, aohe mea i maikai e hoole ana i ke Kristo, aka, e hooia ana ke ola la oia.

7 A ua hiki ia oukou ke ike ke ola la oia, ma ka mana o ka Uhane Hemolele; nolaila, ke ake nei au e ao ikaika aku ia oukou, i ole ai oukou e hoole aku i ka mana o ke Akua; no ka mea, e hana ana oia ma o ka mana la, e like me ka manaoio o na keiki a kanaka, oia like i keia la, i ka la apopo, a no ka wa pau ole.

8 A ke ao ikaika hou aku nei au ia oukou, e ko’u poe hoahanau, i ole ai oukou e hoole aku i na haawina o ke Akua, no ka mea, ua nui ia mau mea; a ke hele mai nei ia mau mea mai ia Akua hookahi mai. A ua nui na ano o ka lawelaweia ana o keia mau haawina; aka, o ke Akua hookahi nana e hana nei i na mea a pau; a ua haawiia mai ia mau mea ma na koikeana o ka Uhane o ke Akua i na kanaka, e pono ai lakou.

9 No ka mea, aia, ua haawiia mai i kekahi e ka Uhane o ke Akua, i ao aku ai oia i ka olelo o ka naauao;

10 A i kekahi, i ao aku ai oia i ka olelo o ka ike ma ka uhane hookahi no;

11 A i kekahi, ka manaoio nui loa; a i kekahi, na haawina o ka hoola ana ma ka uhane hookahi no.

12 A i kekahi hoi, i hana aku ai oia i na hana mana nui;

13 A i kekahi hoi, i wanana aku ai oia no na mea a pau;

14 A i kekahi hoi, ka ike ana i na anela a me na uhane lawelawe;

15 A i kekahi hoi, na ano a pau o na olelo;

16 A i kekahi hoi, ka hoomaopopo ana i na olelo a me kela ano keia ano o na olelo.

17 A ke hele mai nei keia mau haawina a pau ma ka Uhane la o Kristo; a ke hele mai nei keia mau mea i kela kanaka keia kanaka pakahi, e like me ia i makemake ai.

18 A ke ake nei au e ao ikaika aku ia oukou, e ko’u poe hoahanau aloha, e hoomanao oukou e hiki mai ana kela haawina maikai keia haawina maikai no Kristo mai.

19 A ke ake nei au e ao ikaika aku ia oukou, e kuu poe hoahanau alohaia, e hoomanao oukou oia like no ia, i ka la inehinei, i keia la, a no ka wa pau ole, a, aole loa e hoopauia aku keia mau haawina a pau a’u i olelo aku ai, no ko ka uhane ia mau mea, a mau loa aku, oiai e ku ana ke ao nei, aka mamuli o ka hoomaloka o na keiki a kanaka wale no e pau ai.

20 Nolaila, he manaoio e pono ai; a ina he manaoio e pono ai, alaila, he manaolana no hoi e pono ai. A ina he manaolana e pono ai, alaila, he aloha no hoi e pono ai;

21 A ke ole he aloha ko oukou, aole loa e hiki ia oukou ke hoolaia ma ke aupuni o ke Akua; aohe no hoi e hiki ia oukou ke hoolaia ma ke aupuni o ke Akua, ina he manaoio ole ko oukou; aole no hoi e hiki ia oukou ina aole he manaolana ko oukou;

22 A ina aole o oukou manaolana, alaila ua poho loa ko oukou manao; a e hiki ana ka poho loa o ka manao no ka hewa.

23 A olelo oiaio mai la o Kristo i ko kakou poe kupuna, Ina he manaoio ko oukou, ua hiki ia oukou ke hana i na mea a pau i ku pono ia’u.

24 [m 10, p 2] Ano, ke olelo aku nei au i ko na welau a pau o ka honua, ina e hiki mai ka la e hoopauia’e ka mana a me na haawina o ke Akua mawaena o oukou, e hanaia auanei ia mea no ka hoomaloka.

25 A auwe na keiki a kanaka, ina pela ia auanei; no ka mea, aole kekahi mea e hana ana i ka pono mawaena o oukou, aole loa hookahi. No ka mea, ina e hana ana kekahi i ka pono mawaena o oukou, e hana no oia ma ka mana a me na haawina o ke Akua.

26 A auwe ka poe nana e hoopau ae i keia mau mea a make, no ka mea, e make ana lakou iloko o ko lakou mau hewa, a ua hiki ole ia lakou ke hoolaia ma ke aupuni o ke akua; a ke olelo aku nei au ia mea mamuli o na olelo a Kristo, aole o’u wahahee.

27 A ke ao ikaika nei au ia oukou e hoomanao iho i keia mau mea; no ka mea, e hiki koke ana ka manawa e ike ai oukou aole o’u wahahee, no ka mea, e ike auanaei oukou ia’u ma kahi hookolokolo o ke Akua, a e olelo aku ka Haku ke Akua ia oukou, Aole anei au i hai aku i ka’u mau olelo ia oukou, na mea i palapalaia e keia kanaka, e like me kekahi e hea ana mai ka lepo ae? He oiaio, e like me kekahi e olelo ana noloko mai o ka lepo?

28 Ke hai aku nei au i keia mau mea i ka hooloia ana o na wanana. A, aia hoi, e puka mai ia mau mea noloko mai o ka waha o ke Akua mau loa; a e ha ae kana olelo ia hanauna aku ia hanauna aku.

29 A e hoike ae no ke Akua ia oukou, o ka mea a’u i palapala ai, he oiaio ia.

30 A eia hou, ke makemake nei au e ao ikaika ia oukou, e hele mai oukou io Kristo la, a e hopu i kela haawina maikai i keia haawina maikai, a e hoopa ole i ka haawina ino, aohe hoi i ka mea haumia.

31 A e ala, a e ea ae mai ka lepo ae, e Ierusalema; he oiaio, a e komo i kou lole nani, e ke kaikamahine o Ziona, a e hooikaika i kou mau kakia, a e hooakea aku i kou mau mokuna no ka wa pau ole, i hoohoka hou ole ia’i oe, i hookoia’i na berita a ka Makua mau loa, ana i hana mai ai ia oe, e ko ka hale o Iseraela.

32 He oiaio, e hele mai io Kristo la, a e hoohemoleleia iloko ona, a e hoole ia oukou iho i na mea hewa a pau, a ina e hoole ia oukou iho i na mea hewa a pau, a e aloha aku i ke Akua me ko oukou mana, naau, a ikaika a pau, alaila, ua lawa kona lokomaikai no oukou, i hemolele ai oukou ma o kona lokomaikai la iloko o Kristo; a ina ma ka lokomaikai o ke Akua ua hemolele oukou iloko o Kristo, ua hiki ole ia oukou ma kekahi mea ke hoole i ka mana o ke Akua.

33 A eia hou, ina hemolele oukou iloko o Kristo, ma o ka lokomaikai la o ke Akua, aole hoi hoole i kona mana, alaila ua hoomaemaeia oukou iloko o Kristo ma ka lokomaikai o ke akua, ma o ka hookaheia’na la o ke koko o Kristo, oia no ka berita a ka Makua i ka kalaia’na o ko oukou mau hala i lilo ai oukou i hemolele me ke kina ole.

34 Ano, ke uwealoha aku nei au ia oukou a pau. E hele koke ana au e maha ma ka paradaiso o ke Akua, a hiki wale i ka wa e hui pu hou ai kuu uhane a me kuu kino, a lawe lanakila ia aku au ma o ke aouli la, e halawai pu me oukou imua o kahi hookolokolo oluolu o Iehova ka nui, ka Lunakanawai mau loa o ka poe ola a me ka poe make. Amene.