O Ka Buke a Moramona

MOKUNA 1

1 [mokuna 1, paukū 1] Ano, ke kakau nei owau, o Moramona, i mooolelo o na mea a’u i ike ai a i lohe ai no hoi, a kapa aku ia ka buke a Moromona.

2 Ua kokoke i ka manawa a Amarona i huna iho ai i na mooolelo no ka Haku, hele mai la oia io’u nei, (he umi paha o’u makahiki; a ua hoomaka au e aoia mai ma kekahi mau mea, mamuli o ke ano o ka aoia’na o ko’u poe kanaka,) a i mai la o Amarona ia’u, Ke ike nei au he keiki kuoo oe, a ua hiki wawe ma ka ike;

3 Nolaila, ia oe e kokoke ai i ka iwakaluakumamaha makahiki, ke makemake nei au nau e hoomanao i na mea au e ike ai no keia lahuikanaka; a ia oe e loaa’i ia makahiki, e hele aku oe i ka aina Anatuma, i kekahi puu, e kapaia no ie o Sima; a malaila wau i waiho iho ai i ka Haku, i na kaha laa a pau no keia lahuikanaka.

4 A aia hoi, e lawe oe i na papa a Nepai iou la, a o na mea i koe nau e waiho ma kahi o ia mau mea e waiho nei; a nau e kahakaha ma na papa a Nepai, i na mea a pau au i ike ai no keia lahuikanaka.

5 A he mamo no wau, o Moramona, na Nepai, (a o ka inoa o ko’u makuakane o Moramona no ia,) hoomanao iho la au i na mea a Amarona i kauoha mai ai ia’u.

6 A eia kekahi, ma ka umikumamakahi makahiki o’u, ua haliia’e la au e ko’u makuakane iloko o ka aina hema, a hiki i ka aina o Zarahemela;

7 Ua uhiia’e la ka ili a pau o ka aina me na hale, a ua aneane lehulehu loa na kanaka, me he mea la me ke one o ke kai.

8 A eia kekahi ma keia makahiki, hoomaka ae la kekahi kaua mawaena o ko Nepai poe, o lakou no ko Nepai, a me ko Iakoba, a me ko Iosepa, a me ko Zorama; a o keia kaua mawaena ia o ko Nepai poe, a me ko Lamana poe, a me ko Lemuela, a me ko Isemaela.

9 Ano, o ko Lamana, a me ko Lemuela, a me ko Isemaela, ua kapaia ko Lamana poe, a o na aoao elua oia ko Nepai poe a me ko Lamana poe.

10 A eia kekahi, hoomaka ae la ke kaua mawaena o lakou ma na mokuna o Zarahemela, ma na wai o Sidona.

11 [m 1, p 2] A eia kekahi, ua houluulu ae la ko Nepai poe i na kanaka he nui loa i kahi hookahi, ua oi aku ko lakou nui mamua o na tausani he kanakolu. A ma makahiki hookahi nei ua nui na kaua a lakou i loaa’i, a ua lanakila ae la ko Nepai poe maluna o ko Lamana poe, a luku aku la he nui loa o lakou.

12 A eia kekahi, haalele iho la ko Lamana poe i ko lakou manao, a ua maluhia iho la ka aina, a ua mau ka maluhia no na makahiki eha paha, i hookahe ole ia’i ke koko.

13 Aka, lanakila ae la ka hewa maluna iho o ka ili o ka aina a puni, a no ia mea, lawe aku la ka Haku i kana poe haumana alohaia, a oki iho la ka hana ana i na hana mana a me ka hoola ana, no ka hewa o na kanaka.

14 A ua ole na haawina mai ka Haku mai, aole hoi hiki mai ka Uhane Hemolele maluna iho o kekahi mea, no ko lakou hewa a hoomaloka.

15 A he umikumamalima makahiki o’u, a he naau kuoo ko’u ma kekahi mau mea, nolaila, ua ikeia au e ka Haku, a hoao aku la, a ike iho la i ka lokomaikai o Iesu.

16 A hoao aku la au e hai aku i ka olelo i keia lahuikanaka, aka, ua papaniia mai la kuu waha, a ua papaia mai au ma ka hai aku ia lakou; no ka mea hoi, ua kipi paakiki aku la lakou i ko lakou Akua, a ua laweia’ku ka poe haumana alohaia mailoko aku o ka aina, no ka hewa o lakou.

17 Aka, kali iho la au mawaena o lakou, aka, ua papaia mai au e hai ole aku ia lakou, no ka paakiki o ko lakou mau naau; a no ka paakiki o ko lakou mau naau, ua hoopoinoia ka aina no lakou.

18 A hoopilikia iho la ua poe powa Gadianatona nei, e noho ana mawaena o ko Lamana poe, i ka aina, a hoomaka ae la ko ka aina e huna iho i ko lakou mau waiwai ma ka honua; a lilo iho la ia mau mea i pahee, no ka mea, ua hoopoino ka Haku i ka aina, i hiki ole ai ia lakou ke hoopaa ia mau mea, aole hoi loaa hou aku ia mau mea.

19 A eia kekahi ma ka aina, o na anaana, a me na hoopiopio, a me na hana o na uhane hoopunipuni; a ua hanaia ka mana o ka mea ino maluna iho o ka ili a pau o ka aina, i ka hooko ana i na olelo a pau a Abinadi, a o Samuela, ka Lamana no hoi.

MOKUNA 2

1 [mokuna 1, paukū 3] A eia kekahi, ma ua makahiki hookahi la, hoomaka ae la ke kaua hou mawaena o ko Nepai poe a me ko Lamana poe. A ua opiopio au, aka nunui nae ko’u kino, nolaila, hoonoho mai la ka poe kanaka o Nepai ia’u, i luna no lakou, a i alihi kaua o ko lakou poe kaua.

2 Nolaila, ma ka umikumamaono makahiki o’u, hele aku la au ma ke alo o kekahi poe kaua o ko Nepai poe, e ku e aku i ko Lamana poe; nolaila, ua hala aku la na makahiki ekolu haneri iwakaluakumamaono.

3 A eia kekahi, ma ka makahiki ekolu haneri iwakaluakumamahiku, hele mai la ko Lamana poe io makou la me ka ikaika nui loa, a hooweliweli mai la lakou i ka poe kaua o’u; nolaila, aole lakou e kaua aku, a hoomaka ae la lakou e auhee aku i na aina akau.

4 A eia kekahi, hiki aku la makou i ke kulanakauhale o Anagola, a komo aku la makou iloko o ke kulanakauhale, a hoomakaukau iho la e hoomalu ia makou iho i ko Lamana poe. A wia kekahi, hana paa iho la makou i ke kulanakauhale me ko makou ikaika; aka, me na hana paa a pau a makou, hele mai la no nae ko Lamana poe maluna iho o makou, a hooauhee mai la ia makou mailoko aku o ke kulanakauhale.

5 A hooauhee mai la no hoi lakou ia makou mailoko aku o ka aina o Davida.

6 A hele aku la makou a hiki aku la i ka aina o Iosua, ma na mokuna komohana, ma ke kahakai.

7 A eia kekahi, houluulu mai la makou i ko makou poe kanaka me ka hiki wawe i hiki ai, i hiki ai makou ke hoakoakoa ia lakou i kahi hookahi.

8 Aka hoi, ua piha ka aina me na powa a me ko Lamana poe; a me ka luku nui e kaulia’na maluna ae o ko’u poe kanaka, aole nae lakou mihi i ka lakou mau hana ino, nolaila, ua laha aku ke koko a me ka luku maluna o ka ili a pau o ka aina, ma ka aoao o ko Nepai poe, a me ka aoao o ko Lamana poe no hoi: a he hookahuli loa mawaena o ka aina a pau.

9 Ano, he Alii ko ko Lamana poe, a o Aarona kona inoa; a hele mai la oia e ku e mai ia makou me ka poe kaua he kanahakumamaha tausani. A ku e aku la au ia ia me hookahi kanaha a me kumamalua tausani. A eia kekahi, lanakila ae la au maluna iho ona me ko’u poe kaua, a hee aku la kela imua o’u. Aia hoi, ua hanaia keia a pau, a ua hala aku la ekolu haneri a me kanakolu makahiki.

10 [m 1, p 4] A eia kekahi. Hoomaka ae la ko Nepai poe e mihi i ko lakou hewa, a hoomaka ae la e kahea aku e like me ia e wananaia’i e Samuela ke kaula; no ka mea hoi, aole kanaka i hiki ke hoopaa i ka mea nona ponoi, no na aihue, a me na powa, a me na mea pepehi kanaka, a me ka hana uhane hoopunipuni, a me ka anaana ma ka aina.

11 Pela i hoomaka ai ka uwe ana a me ka kanikau ana ma ka aina a pau, no keia mau mea; a ua nui la aku mawaena o ka poe kanaka o Nepai.

12 A eia kekahi, i ka wa a’u, o Moramona, i ike ai i ko lakou kanikau ana, a me ko lakou uwe ana, a me ko lakou kaumaha imua o ka Haku, hoomaka ae la kuu naau e hauoli iloko o’u, e ike ana i na lokomaikai a me ke ahonui o ka Haku, nolaila, e manao ana e aloha mai no oia ia lakou, i lilo hou ai lakou i lahuikanaka pono.

13 Aka hoi, ua make hewa ua hauoli nei o’u, no ka mea, o ko lakou kaniuhu ana aole ia i ka mihi, no ka lokomaikai o ke Akua, aka, o ke kaniuhu ana ia o ka poe hoohewaia, no ka ae mau ole mai o ka Haku ia lakou e loaa ka olioli ma ka hewa.

14 A, aole lakou i hele mai io Iesu la me na naau pepe a me na uhane mihi, aka, hoino aku la lakou i ke Akua, a ake ae la e make. Aka e aumeume no nae lakou me ka pahikaua no ko lakou ola.

15 A eia kekahi, hoi hou mai la ko’u kaumaha io’u nei, a ike iho la au ua hala ka la lokomaikai me lakou, ma ko ke kino a ma ko ka uhane no hoi, no ka mea, ike aku la au i na tausani o lakou i kuaia ilalo ma ke kipi akea ana i ko lakou Akua, a hoahuia me he lepo la maluna o ka ili o ka aina. A pela i hala aku ai ekolu haneri makahiki a me kanahakumamaha.

16 [m 1, p 5] A eia kekahi, ma ka makahiki ekolu haneri kanahakumamalima, hoomaka ae la ko Nepai poe e hee aku imua o ko Lamana poe, a ua alualuia lakou a hiki wale aku lakou i ka aina o Iasona, mamua o ka hiki ana ke hooki ia lakou i ko lakou hee ana.

17 A ua kokoke ke kulanakauhale o Iasona i ka aina, kahi a Amarona i waiho iho ai i na mooolelo i ka Haku, i ole ai e hoopauia ia mau mea. A, aia hoi, ua hele aku au e like me ka olelo a Amarona, a lawe mai la i na papa a Nepai, a kakau iho la au i mooolelo e like me na olelo a Amarona.

18 A kakau iho la au i mooolelo nui maluna iho o na papa a Nepai o ka hewa a me na mea ino a pau; aka, maluna iho o keia mau papa aole au i kakau i mooolelo nui o ko lakou hewa a mau mea ino, no ka mea, e mau loa ana ka hewa a me na mea ino imua o ko’u mau maka mai kuu wa i hiki ai ke nana i na aoao o kanaka.

19 A auwe au, no ko lakou hewa, no ka mea, ua hoopihaia kuu naau me ke kaumaha no ko lakou hewa, i ko’u mau la a pau; aka hoi, ua ike au e hookiekieia auanei au iluna ma ka la hope.

20 [m 1, p 6] A eia kekahi, ma ua makahiki nei ua imi hou ia ka poe kanaka, o Nepai, a hooauheeia aku. A ua hooauheeia aku makou a hiki wale aku makou i ka akau, i ka aina i kapaia o Sema.

21 A eia kekahi, hana paa iho la makou i ke kulanakauhale o Sema, a hoakoakoa mai la makou i ko makou poe kanaka, i ka poe a pau i hiki, i hoola’i paha makou ia lakou i ka lukuia’na.

22 A ma ka makahiki ekolu haneri kanahakumamaono, hoomaka ae la lakou e hele hou mai maluna iho o makou.

23 A eia kekahi, olelo aku la au i ko’u poe kanaka, a kauleo aku la ia lakou me ka ikaika nui, e ku wiwo ole imua o ko Lamana poe a e kaua aku no ka lakou mau wahine, a me ka lakou mau keiki, a me ko lakou mau hale, a me ko lakou mau wahi i noho ai.

24 A hooeueu ae la ka’u mau olelo ia lakou i ka ikaika ma kekahi mau mea, a hee ole aku la lakou imua o ko Lamana poe, aka, ku iho la me ka wiwo ole e ku e aku ia lakou.

25 A kaua aku la makou me ka poe koa he kanakolu tausani, e ku e aku ana i ka puali koa he kanalima tausani. A ku paa iho la makou imua o lakou me ka naueue ole, a hee aku la lakou imua o makou.

26 A eia kekahi, ia lakou i hee aku ai, alualu aku la makou ia lakou me na poe kaua o makou, a hoouka hou ae la me lakou, a lanakila ae la maluna iho o lakou; aka hoi, aole me makou pu ka ikaika o ka Haku; he oiaio, ua waihoia mai makou o makou wale iho, i noho pu ole ai ka Uhane o ka Haku iloko o makou; nolaila, ua lilo iho la makou i poe nawaliwali, e like me ko makou poe hoahanau.

27 A kaniuhu iho la kuu naau no keia poino nui o ko’u poe kanaka; no ko lakou hewa a me ko lakou mau mea ino. Aka hoi, hele aku la makou e ku e aku i ko Lamana poe, a me ka poe powa o Gadianatona, a hiki aku i ka wa i loaa hou ai ia makou na aina o ko makou hooilina.

28 A ua hala aku la ka makahiki ikolu haneri a me kanahakumamaiwa. A ma ka makahiki ekolu haneri a me kanalima, hana iho la makou i ke kuikahi me ko Lamana poe a me ka poe powa o Gadianatona, maloko o ia mea ua maheleia ko makou mau aina hooilina.

29 A haawi mai la ko Lamana poe i ka aina akau ia makou; he oiaio, a hiki wale aku i ka puali ololi e hiki aku ana iloko o ka aina hema. A haawi aku la makou i ko Lamana poe i ka aina hema a pau.

MOKUNA 3

1 [mokuna 1, paukū 7] A eia kekahi, aole ko Lamana poe i hele mai e kaua hou a hala aku la na makahiki hou he umi. A, aia hoi, ua hoohana au i ko’u poe kanaka, ko Nepai poe, ma ka hoomakaukau ana i ko lakou mau aina a me ko lakou mau mea kaua, no ka wa kaua.

2 A eia kekahi, olelo mai la ka Haku ia’u, i mai la, E hea aku i keia poe kanaka, e mihi oukou, a e hele mai io’u nei, a e bapetizoia oukou, a e kukulu hou iho i ko’u ekalesia, a e hookoeia auanei oukou.

3 A hea aku la au i keia poe kanaka, aka, ua makehewa, a ua hoomaopopo ole no ka Haku lakou i hookoe mai, a haawi mai la ia lakou i manawa e mihi ai. A, aia hoi, hoopaakiki iho la lakou i ko lakou mau naau e ku e i ka Haku, i ko lakou Akua.

4 A eia kekahi, mahope iho o ka hala ana o keia mau makahiki he umi, oia hoi ke huiia, ekolu haneri makahiki a me kanaono mai ka hiki ana mai o Kristo, hoouna mai la ke Alii o ko Lamana poe i episetole io’u nei, e hoike ana ua episetole nei ia’u e hoomakaukau ana lakou e hele hou mai e kaua mai ia makou.

5 A eia kekahi, kena ae la au i ko’u poe kanaka e hoakoakoa ia lakou iho ma kahi hookahi ma ka aina Neoneo, i kekahi kulanakauhale ma na mokuna, ma ka puali ololi e hiki aku ana iloko o ka aina hema.

6 A malaila makou i hoonoho ai i ko makou poe kaua, i hiki ai makou ke hooki i na poe kaua o ko Lamana poe, i loaa ole ai ia lakou kekahi o ko makou mau aina; nolaila, hana paa iho la makou e ku e aku ia lakou me ko makou ikaika a pau.

7 [m 1, p 8] A eia kekahi, ma ka makahiki ekolu haneri kanaonokumamakahi, iho mai la ko Lamana poe i ke kulanakauhale o Neoneo, e kaua ku e mai ia makou; a eia kekahi ma ua makahiki la, lanakila ae la makou maluna iho o lakou, a hoi hou ae la lakou i ko lakou mau aina iho.

8 A ma ka makahiki ekolu haneri a me kanaonokumamalua, iho hou mai la lakou e kaua. A lanakila hou ae la makou maluna iho o lakou, a luku nui aku la ia lakou, a ua hooleiia’ku ko lakou poe make iloko o ke kai.

9 Ano, no keia mea nui a ko’u poe kanaka, a ko Nepai poe, i hana’i, hoomaka ae la lakou e kaena aku ma ko lakou ikaika iho, a hoomaka ae la hoi e hoohiki imua o na lani, e hoopai aku lakou i ke koko o ko lakou poe hoahanau, ke poe i lukuia e ko lakou poe enemi.

10 A hoohiki lakou ma na lani, a ma ka noho alii no hoi o ke Akua, e pii aku lakou e kaua ku e aku i ko lakou poe enemi, a e hooki aku ia lakou mai ka ili aku o ka aina.

11 [m 1, p 9] A eia kekahi, hoole loa aku la wau, o Moramona, ma neia hope iho, e noho alihi kaua a i luna no keia poe kanaka, no ko lakou hewa a ino hoi.

12 Aia hoi, ua alakai ae la au ia lakou, me ko lakou hewa nae, ua alakai au ia lakou i na manawa he nui e kaua, a ua aloha aku ia lakou, e like me ke aloha o ke Akua iloko o’u, me kuu naau a pau; a ua nininiia iho kuu naau me ka pule i ko’u Akua a pau ae la ka la, no lakou; aka, me ka manaoio ole nae, no ka paakiki o ko lakou mau naau.

13 A pakolu ko’u hoopakele ana ia lakou, mailoko mai o na lima o ko lakou poe enemi, a ua mihi ole lakou i ko lakou mau hewa.

14 A ia lakou i hoohiki ai ma na mea a pau i papaia mai ia lakou, e ko kakou Haku a me ka Mea e Ola’i o Iesu Kristo, E pii aku lakou i ko lakou poe enemi e kaua, a e hoopai aku lakou i ke koko o ko lakou poe hoahanau, aia hoi, pae mai la ka leo o ka Haku ia’u, i ka i ana,

15 No’u no ka hoopai aku, na’u no e uku aku; a no ka mihi ole ana o keia poe kanaka mahope iho o ko’u hoopakele ana ia lakou, aia hoi, e hookiia’ku auanei lakou mai ka ili aku o ka honua.

16 A eia kekahi, hoole loa aku la au e pii ku e aku i ko’u poe enemi; a hana iho la no au me ka ka Haku i kauoha mai ai ia’u; a ku iho la au me he ike maka hana ole la e hoike aku i ko ke ao nei i na mea a’u i ike ai a i lohe ai, e like me na hoike ana mai o ka Uhane, ka mea i hoike mai ai no na mea e hiki mai ana.

17 Nolaila, ea, ke palapala aku nei au ia oukou, e ka poe Genetile, a ia oukou no hoi, e ko ka hale o Iseraela, i ka wa e hoomaka ai ka hana, e kokoke ana oukou e hoomakaukau e hoi i ka aina o ko oukou hooilina;

18 He oiaio, aia hoi, ke palapala aku nei au i ko na welau a pau o ka honua; he oiaio, ia oukou hoi, e na ohana he umikumamalua o Iseraela, ka poe e hookolokoloia auanei, e like me ka oukou mau hana, e ka poe umikumamalua a Iesu i wae ai e lilo i poe haumana nana ma ka aina o Ierusalema.

19 A ke palapala aku nei no hoi au i ke koena o keia poe kanaka, ka poe e hookolokoloia auanei no hoi e ka poe umikumamalua a Iesu i wae mai ai ma keia aina; a e hookolokoloia auanei lakou nei e ka poe umikumamalua e ae a Iesu i wae ai ma ka aina o Ierusalema.

20 A ke hoike mai nei ka Uhane i keia mau mea ia’u; nolaila, ke palapala aku nei au ia oukou a pau. A no keia kumu ke palapala aku nei au ia oukou, i ike ai oukou e ku auanei oukou a pau imua o ka noho hookolokolo o Kristo, he oiaio, o kela mea keia mea e pili ana i ka ohana ano kanaka a pau a Adamu; a e ku auanei oukou e hookolokoloia no ka oukou mau hana, ina paha he maikai ia mau mea, ina paha he ino;

21 A i manaoio ai no hoi oukou i ka euanelio o Iesu Kristo, ka mea a oukou e loaa’i auanei mawaena o oukou; i loaa’i hoi ka poe Iudaio, ka poe kanaka berita o ka Haku, he hoike e ae, okoa ka mea a lakou i ike ai a i lohe ai, O Iesu ka mea a lakou i pepehi ai, oia no ke Kristo oiaio, a me ke Akua oiaio;

22 A ua makemake au i hiki ia’u ke hoohuli mai ia oukou a pau, e ko na welau o ka honua, e mihi a e hoomakaukau e ku imua o ka noho hookolokolo o Kristo.

MOKUNA 4

1 [mokuna 2, paukū 1] Ano, eia kekahi ma ka makahiki ekolu haneri a me kanaonokumamakolu, pii aku la ko Nepai poe me na poe kaua o lakou e kaua aku i ko Lamana poe mawaho o ka aina Neoneo.

2 A ua hooauhee hou ia aku na poe kaua o ko Nepai poe ihope i ka aina Neoneo. A oiai lakou i maloeloe, hele mai la he poe kaua hou o ko Lamana poe maluna iho o lakou; a he kaua ino ko lakou, a loaa iho la i ko Lamana poe ke kulanakauhale Neoneo, a luku iho la i na mea he nui wale o ko Nepai poe, a lawe pio ae la i na mea he nui;

3 A hee aku la ke koena a hui iho la me ka poe noho ma ke kulanakauhale Teanacuma. Ano, e waiho ana ke kulanakauhale Teanacuma ma na mokuna ma ke kahakai; a ua kokoke no hoi ia i ke kulanakauhale Neoneo.

4 A no ka pii ana’ku o na poe kaua o ko Nepai poe i ko Lamana poe la, ka hoomaka ana o lakou e hahauia; no ka mea, ina aole ia mea, ina ua hiki ole i ko Lamana poe ke loaa ka mana maluna o lakou.

5 Aka hoi, e loaa auanei ka poe hewa i na hoopai o ke Akua; a ma o ka poe hewa la, i hoopaiia’ku ai ka poe hewa: no ka mea, na ka poe hewa no i hooeueu ae i na naau o na keiki a kanaka i ka hookahe koko ana.

6 A eia kekahi, hoomakaukau iho la ko Lamana poe e hele mai e ku e i ke kulanakauhale Teanacuma.

7 [m 2, p 2] A eia kekahi ma ka makahiki ekolu haeri a me kanaonokumamamaha, hele mai la ko Lamana poe e ku e mai i ke kulanakauhale Teanacuma, i hiki ia lakou ke loaa ke kulanakauhale Tanacuma no hoi.

8 A ua kipakuia aku lakou a hooauheeia’ku e ko Nepai poe. A i ka wa a ko Nepai poe i ike ai ua hooauhee aku lakou i ko Lamana poe, kaena hou aku la lakou no ko lakou ikaika; a hele aku la lakou ma ko lakou ikaika iho, a loaa hou iho la ke kulanakauhale Neoneo.

9 Ano, ua hanaia keia mau mea a pau, a ua nui na tausani i lukuia ma na aoao elua, o ko Nepai poe a me ko Lamana poe no hoi.

10 A eia kekahi, ua hala aku la na makahiki ekolu haneri kanaonokumamaono, a hele hou mai la ko Lamana poe i ko Nepai poe e kaua; aole nae ko Nepai poe i mihi i ka ino a lakou i hana’i, aka hoopaakiki mau iho la ma ko lakou hewa.

11 A ua hiki ole i ka elelo ke ha’i aku, aole hoi i ke kanaka ke kakau, i ka mooolelo a pau loa o ka mea weliweli o ke koko a me ka luku mawaena o na kanaka; o ko Nepai poe a me ko Lamana poe no hoi; a ua hoopaakikiia iho kela naau keia naau, a lealea iho la lakou ma ka hookahe mau ana i ke koko.

12 Aole loa he hewa nui mamua mawaena o ka poe mamo a Lehi, aole no hoi mawaena o ko ka hale a pau o Iseraela, e like me na olelo a ka Haku, me keia mawaena o keia poe kanaka.

13 [m 2, p 3] A eia kekahi, loaa iho la i ko Lamana poe ke kulanakauhale Neoneo, a o keia mea no ka nui loa aku o ko lakou poe mamua o ko ko Nepai poe.

14 A hele ae la no hoi lakou e ku e i ke kulanakauhale Teanacuma, a hooauhee ae la i ka poe mailoko aku ona, a lawe ae la i na pio he nui, o na wahine a me na keiki no hoi, a kaumaha aku la ia lakou i mau mohai i ko lakou mau akua kii.

15 A eia kekahi ma ka makahiki ekolu haeri a me kanaonokumamahiku, ua huhu ko Nepai poe no ka mohai ana o ko Lamana poe i ko lakou poe wahine a me ka lakou poe keiki, a hele aku la lakou e ku e aku i ko Lamana poe me ka inaina nui, a lanakila hou ae la lakou maluna iho o ko Lamana poe, a hooauhee aku la ia lakou mailoko aku o ko lakou mau aina;

16 A aole no i hele hou mai ko Lamana poe e ku e i ko Nepai poe, a hiki wale aku i ka makahiki ekolu haneri a me kanahikukumamalima.

17 A ma ua makahiki nei iho mai la lakou e ku e i ko Nepai poe me ko lakou ikaika a pau; a ua helu ole ia lakou no ka nui loa o lakou.

18 A ma ia hope aku aole i loaa hou i ko Nepai poe ka mana maluna o ko Lamana poe, aka hoomaka ae la e kahiliia’e e lakou la e like me ka hau imua o ka la.

19 A iho mai la ko Lamana poe e ku e i ke kulanakauhale Neoneo; a ua kauaia he kaua ino nui loa ma ka aina Neoneo, a ua lanakila ae la lakou ma ua kaua nei maluna o ko Nepai poe.

20 A hee hou aku la lakou imua o lakou la, a hiki aku la lakou i ke kulanakauhale Boaza; a malaila lakou i ku paa e ku e i ko Lamana poe me ka wiwo ole nui, a lanakila ole ko Lamana poe maluna iho o lakou a hiki i ka lua o ka manawa a lakou i hele mai ai.

21 A ia lakou i hiki mai ai i ka lua o ka manawa, ua hooauheeia aku a lukuia ko Nepai poe me ka luku nui loa; a o ko lakou poe wahine a me ka lakou poe keiki ua mohai hou ia’ku i na akua kii.

22 A eia kekahi, hee hou ae la ko Nepai poe imua o lakou la, e lawe ana i ka poe noho a pau me lakou, no na kulanakauhale a me na kauhale no hoi.

23 Ano, e ike ana wau, o Moramona, ua kokoke ko Lamana poe e lanakila maluna iho o ka aina, nolaila, hele aku la au i ka puu Sima, a lawe ae la i na mooolelo a pau a Amarona i huna iho ai i ka Haku.

MOKUNA 5

1 [mokuna 2, paukū 4] A eia kekahi, hele aku la au mawaena o ko Nepai poe, a mihi iho la i ka hoohiki a’u i hana ai, I kokua hou ole ai au ia lakou; a haawi hou mai la lakou ia’u i ka noho alihi kaua ana o ko lakou poe kaua; no ka mea, nana mai la lakou ia’u me he mea la ua hiki ia’u ke hoopakele aku ia lakou i ko lakou mau popilikia.

2 Aka hoi, ua nele au i na manaolana, no ka mea, ua ike au i na hoopai o ka Haku e hiki mai ana maluna iho o lakou; no ka mea, aole lakou i mihi i ko lakou mau hala, aka, aumeume aku la no ko lakou mau ola, me ke kahea ole aku i kela Mea nana lakou i hana.

3 A eia kekahi, hele mai la ko Lamana poe e ku e ia makou i ka wa a makou i hee aku ai i ke kulanakauhale o Ioredane; aka hoi, ua hooauheeia’ku lakou ihope, i ole ai lakou i hoopio i ke kulanakauhale ia manawa.

4 A hele hou mai la lakou e ku e ia makou, a malama iho la makou i ke kulanakauhale. A ua malamaia no hoi na kulanakauhale e ae he nui e ko Nepai poe, a keakea aku la ua mau wahi paa nei ia lakou, i hiki ole ai ia lakou ke komo iloko o ka aina e waiho ana imua o makou, e luku mai ka poe noho o ko makou aina.

5 Aka, o kela aina o keia aina a makou i kaalo ai, a hoakoakoa ole ia mai ke poe noho olaila, ua lukuia e ko Lamana poe, a o ko lakou mau kulanakauhale, a me na kauhale, a me na kulanakauhale paa i ka pa, ua puhiia me ke ahi; a pela i hala aku ai ka makahiki ekolu haneri kanahikukumamaiwa.

6 [m 2, p 5] A eia kekahi, ma ka makahiki ekolu haneri kanawalu, hele hou mai la ko Lamana poe ia makou e kaua, a ku e aku makou ia lakou me ka wiwo ole; aka, ua make hewa a pau, no ka mea, no ka nui loa o ko lakou poe, hehi mai la lakou i ka poe kanaka o ko Nepai malalo iho o ko lakou mau wawae.

7 A eia kekahi, hee hou aku la makou, a o ka poe i oi aku ka mama o ka holo mamua o ko ko Lamana poe, pakele aku la lakou, a o ka poe i oi ole aku ka mama mamua o ko ko Lamana poe, ua kahiliia’e ilalo a lukuia.

8 Ano hoi, aole au o Moramona, makemake e hoowalania’ku i na naau o na kanaka, ma ka hoike ana imua o lakou i ka ike weliweli o ke koko a me ka luku, me ia i waihoia mai ai imua o ko’u mau maka, aka, e ike ana au e hoike oiaio ia’ku auanei keia mau mea, a e hoikeia’ku na mea a pau i hunaia maluna iho o na kua o na hale,

9 A e hiki io ana no hoi ka ike no keia mau mea i ke koena o keia poe kanaka, a i ka poe Genetile no hoi, ka poe a ka Haku i olelo mai ai e hoopuehu ae auanei i keia poe kanaka, a e manaoia ua poe kanaka nei me he mea ole la mawaena o lakou, nolaila, ke kakau nei au he mooolelo uuku i hoopokoleia, e aa ole ana e kakau iho i ka mooolelo a pau o na mea a’u i ike ai, no ke kauoha a’u i loaa’i, i loaa ole ai no hoi ia oukou ke kaniuhu nui loa no ka hewa o keia poe kanaka.

10 [m 2, p 6] Ano hoi, o keia ka’u e olelo aku nei i ka lakou poe hua, a i ka poe Genetile no hoi, ka poe e manao ana no ko ka hale o Iseraela, e hoomaopopo ana a e ike ana i kahi a ko lakou mau mea pomaikai e hele mai ai.

11 No ka mea hoi, ua ike au o ka poe me neia e kaniuhu lakou no ka poino o ko ka hale o Iseraela; he oiaio, e kaniuhu no lakou no ka lukuia’na o keia poe kanaka; e kaniuhu no lakou no ka mihi ole ana o keia poe kanaka, i hiki ka apoia mai ai lakou nei ma na lima o Iesu.

12 Ano, ua palapalaia’ku ua mau mea nei i ke koena o ko ka hale o Iakoba; a ua palapalaia’ku mamuli o keia ano, no ka mea, ua ikeia e ke Akua aole e hoopuka ae ka hewa ia mau mea ia lakou la; a e hunaia iho ia mau mea i ka Haku, i hiki ai ia mau mea ke puka ae ma kona manawa ku pono.

13 A oia no ke kauoha a’u i loaa’i; a, aia hoi, e puka mai no ia mau mea mamuli o ke kauoha a ka Haku, ia ia e ike ai he pono, ma kona naauao.

14 A, aia hoi, e hele aku no ia mau mea i ka poe hoomaloka la o ka poe Iudaio; a no keia kumu e hele aku auanei ia mau mea; i hoohuliia’i lakou e manaoio o Iesu no ke Kristo, ke Keiki a ke Akua ola; i hooko mai ai ka Makua, ma o kona mea aloha loa ia, i kona manao nui a mau loa, ma ka hoihoi hou ana i ka poe Iudaio, oia hoi i ko ka hale o Iseraela a pau, i ko lakou aina hooilina, a ka Haku ko lakou Akua i haawi mai ai ia lakou, i ka hooko ana i kana berita,

15 A i manaoio loa ai no hoi ka poe hua a keia poe kanaka i kona euanelio, ka mea e hele mai auanei ia lakou mai ka poe Genetile mai; no ka mea, e hoopuehuia’ku keia poe kanaka, a e lilo auanei i lahuikanaka haulaula, ekaeka a hoopailuaia, e oi aku ana mamua o ke ano o ka mea i ikeia ai mawaena o makou maimua loa mai; he oiaio, mamua o ka mea i ikeia’i mawaena o ko Lamana poe; a o keia no ko lakou hoomaloka a hoomana kii.

16 No ka mea hoi, o ka Uhane o ka Haku ua oki kona paio ana i keia manawa me ko lakou poe kupuna, a aia no lakou aole o Kristo a me ke Akua me lakou ma ke ao nei, a ua lauwiliia lakou i o a ia nei e like me ka opala imua o ka makani.

17 He lahuikanaka e olioli ai lakou i kekahi manawa, a ia lakou o Kristo i Kahuhipa no lakou; he oiaio, ua alakaiia lakou e ke Akua, ka Makua.

18 Aka, ano hoi, ua alakaiia’ku lakou i o ia nei e Satana, e like me ka opala i puhiia imua o ka makani, a me he moku la i alealeia i o a ia nei maluna iho o na ale, me ka pea a heleuma ole, a i ole ia, me ka ole o kekahi mea e hookele ai ia ia; a e like me ua moku nei, pela no hoi lakou.

19 A, aia hoi, ua hoano e ka Haku i na mea e pomaikai ai o lakou, na mea a lakou i hiki ai ke loaa ma ka aina, no ka poe Genetile, ka poe e loaa’i auanei ka aina.

20 Aka hoi, e hiki mai auanei keia, e hoaia’ku a e hoopuehuia’ku lakou e ka poe Genetile; a mahope iho o ko lakou hoaia’na a hoopuehuia’na e ka poe Genetile, aia hoi, alaila e hoomanao no ka Haku i ka berita ana i hana mai ai ia Aberahama, a i ko ka hale o Iseraela a pau.

21 A e hoomanao no hoi ka Haku i na pule a ka poe pono, i puleia’ku ai ia ia no lakou nei.

22 Alaila, e ka poe Genetile e, pehea la e hiki ai ia oukou ke ku imua o ka mana o ke Akua, ke ole oukou e mihi a e huli mai, mai ko oukou mau aoao ino mai!

23 Aole anei oukou i ike aia no oukou ma na lima o ke Akua? Aole anei oukou i ike aia no ia ia ka mana a pau, a ma kana kauoha nui e owiliia auanei ka honua nei me he pepa la?

24 Nolaila, ea, e mihi oukou, a e hoohaahaa ia oukou iho imua ona, o puka mai auanei oia ma ka hoopai ia oukou; o hele ae auanei he koena o ka poe mamo e Iakoba mawaena o oukou me he liona la, a e haehae liilii ia oukou, a, aole mea e hoopakele ai.

MOKUNA 6

1 [mokuna 3, paukū 1] Ano, ke hana nei au a pau kuu mooolelo no ka luku ia’na o ko’u poe kanaka, ko Nepai poe. A eia kekahi, hele aku la makou imua o ko Lamana poe.

2 A palaplala iho la wau, O Moramona, i episetole i ke Alii o ko Lamana poe, a noi aku la ia ia e ae mai oia ia makou i houluulu ai makou i ko makou poe kanaka i ka aina o Cumora, ma kahi puu i kapaia o Cumora, a malaila makou e kaua aku ai ia lakou.

3 A eia kekahi, ae mai la ke Alii o ko Lamana poe ia’u i ka mea a’u i noi aku ai.

4 A hele aku la makou i ka aina o Cumora, a kukulu iho la makou i ko makou mau halelewa a puni o ka puu Cumora; a ma kahi aina ia o na wai, na kahawai a me na punawai he nui; a maanei makou i manaolana’i e loaa ka lanakila maluna iho o ko Lamana poe.

5 A i ka wa i hala aku ai na makahiki ekolu haneri kanawalukumamaha, ua houluulu mai makou i ke koena a pau o ko makou poe kanaka i ka aina Cumora.

6 [m 3, p 2] A eia kekahi, ia makou i houluulu mai ai i ko makou poe kanaka a pau i hookahi, i ka aina o Cumora, aia hoi, e elemakule ana owau, o Moramona; a e ike ana o ke aumeume hope ana keia o ko’u poe kanaka, a ua kauohaia mai au e ka Haku e ae ole aku i na mooolelo i haawiia mai ai e ko makou poe kupuna, na mea i laa, e haule iho iloko o na lima o ko Lamana poe, (no ka mea, e hoopau no ko Lamana poe ia mau mea,) nolaila, kaku iho la au i keia mooolelo noloko mai o na papa a Nepai, a huna iho la iloko o ka puu Cumora, i na mooolelo i waihoia mai ai ia’u e ka lima o ka Haku, koe nae keia mau papa a’u i haawi aku ai i ka’u keiki Moroni.

7 A eia kekahi, ike aku la ko’u poe kanaka, me ka lakou poe wahine a me ka lakou poe keiki, i na poe kaua o ko Lamana e hele mai ana io lakou nei; a me kela makau weliweli o ka make e hoopiha ana i na naau o ka poe hewa a pau, lakou i kakali ai e hoouka aku ia lakou la.

8 A hele mai la lakou e kaua mai ia makou, a ua hoopihaia kela mea keia mea me ka weliweli, no ka lehulehu loa o lakou.

9 A eia kekahi, lele mai la lakou maluna iho o ko’u poe kanaka me ka pahikaua, a me ke kakaka, a me ka pua, a me ke koi lipi, a me na ano a pau o na mea kaua.

10 A ua kuaia ko’u poe kanaka ilalo, he oiaio, o ko’u umi tausani ka poe pu me au, a hina eha au iwaena konu; a maalo ae la lakou ia’u i ole ai lakou i hooki mai i kuu ola.

11 A ia lakou i hele ai mawaena a kua iho la i ko’u poe kanaka a pau ilalo, koe wale no he iwakaluakumamaha o makou, (a o ka’u keiki Moroni kekahi mawaena o na poe nei,) a ua ola makou mahope o ka make ana o ko makou poe kanaka, a ike aku la ia la ae, i ka wa i hoi aku ai o ko Lamana poe i ko lakou mau wahi i hoomoana’i, mai ka piko ae o ka puu Cumora, i ka umi tausani o ko’u poe kanaka ka poe i kuaia ilalo, i alakaiia’ku ma ke alo e au;

12 A ike aku la no hoi makou i na tausani he umi o ko’u poe kanaka ka poe i alakaiia’ku e ka’u keiki Moroni.

13 A, aia hoi, ua hina iho la ka umi tausani o Gidigidona, a oia hoi kekahi mawaena konu;

14 A ua hina iho la o Lama me kona umi tausani; a ua hina iho la o Gilegala me kona umi tausani; a ua hina iho la o Limaa me kona umi tausani; ua hina iho la o Ioneama me kona umi tausani; a o Kameniha, a me Moroniha, a o Anationuma, a me Sibaloma, a o Sema, a me Iosa, ua hino iho me ko lakou umi tausani pakahi.

15 [m 3, p 3] A eia kekahi, ua hina iho la na mea e ae he umi ma ka pahikaua, me ko lakou umi tausani pakahi; he oiaio, o ko’u poe kanaka a pau, koe nae ua iwakaluakumamaha la pu me au, a me kekahi poe he uuku no hoi, ka poe i pakele aku la iloko o na aina hema, a me kekahi poe he uuku, ka poe i haalele mai a hele aku la i ka aoao o ko Lamana poe, ua hina iho la, a me ko lakou io, a me ka iwi, a me ke koko e moe la ma ka ili o ka honua, i waihoia e na lima o ka poe nana lakou i luku mai, e palaho ma ka aina, a e popopo a e hoi hou i ko lakou makuwahine la, o ka honua.

16 A ua haehaeia ko’u naau me ka eha nui, no ka poe i make o ko’u poe kanaka, a hea ae la au,

17 E ka poe maikai, kai ka hiki o oukou ke haalele aku i na aoao o ka Haku! E ka poe maikai, kai ka hiki o oukou ke hoomalau i kela Iesu, nana i ku me na lima hohola e apo mai ia oukou!

18 Aia hoi, ina ua hana ole oukou i keia, ina ua hina ole oukou. Aka hoi, ua hina iho oukou, a ke uwe nei au i ko oukou make ana!

19 E na keikikane a me na kaikamahine maikai, e na makuakane a me na makuwahine, e na kane a me na wahine, e ka poe maikai e, kai ka hiki o oukou ke haule iho!

20 Aka hoi, ua hala aku la oukou, a ua hiki ole i ke kaniuhu ana o’u ke hoihoi hou mai ia oukou;

21 A e hele koke mai ana ka la e hookomo ana ko oukou make i ka make ole, a o keia mau kino e popopo ana ma ka palaho e lilo koke no i mau kino palaho ole; alaila, e ku oukou imua o ka noho hookolokolo o Kristo, e hookolokoloia e like me ka oukou mau hana; a ina paha he poe pono oukou, alaila, ua pomaikai pu oukou me ko oukou poe kupuna, ka poe i hele e aku mamua o oukou.

22 E! Ina ua mihi e oukou mamua o ka hiki ana o keia luku nui maluna iho o oukou. Aka hoi, ua hele aku oukou, a ke ike la ka Makua, he oiaio, o ka Makua mau loa o ka lani, i ko oukou noho ana; a ke hana la oia me oukou mamuli o kona pololei a aloha.

MOKUNA 7

1 [mokuna 3, paukū 4] Ano hoi, he makemake ko’u e olelo aku i ke kahi mau mea i ke koena o keia poe kanaka, ka poe i hoolaia mai, ina paha e haawi aku ke Akua ia lakou i ka’u mau olelo, i ike ai lakou no na mea o ko lakou poe kupuna; he oiaio, ke olelo aku nei au ia oukou, e ke koena o ko ka hale o Iseraela; a eia na olelo a’u e olelo aku nei,

2 E ike oukou no ko ka hale o Iseraela oukou.

3 E ike oukou e hele mai oukou i ka mihi e pono ai, a i ole ia, ua hiki ole ia oukou ke hoolaia.

4 E ike oukou e waiho iho oukou i ko oukou mau mea kaua ilalo e pono ai, a e lealea hou ole aku ma ka hookahe ana i ke koko, a e lalau hou ole aku ia mau mea, ke ole kauoha mai auanei ke Akua ia oukou.

5 E ike oukou e hiki aku oukou i ka ike o ko oukou poe kupuna e pono ai, a e mihi i ko oukou mau hala a hewa a pau, a e manaoio ia Iesu Kristo, oia no ke Keiki a ke Akua, a ua pepehiia oia e ka poe Iudaio, a ma o ka mana la o ka Makua ua ala hou ae, a ma ia mea ua loaa ia ia ka lanakila maluna iho o ka lua kupapau; a iloko ona hoi ua aleia ka hope awa o ka make.

6 A e lawe mai ana oia i ka alahouana o ka poe make, a me ia mea e hoalaia’e ke kanaka e ku imua o kona noho hookolokolo.

7 A ua lawe mai oia i ka hoolapanaiia ana o ko ke ao nei, a ma ia mea o ka mea i loaa hewa ole imua ona ma ka la hookolokolo, ua haawiia mai ia ia e noho ma ke alo o ke Akua ma kona aupuni, e memele aku i na hoolea pau ole me ka poe mele maluna, i ka Makua, a i ke Keiki, a i ka Uhane Hemolele oia hookahi Akua, a ma ka noho ana o ka pomaikai aole e pau.

8 Nolaila, e mihi, a e bapetizoia ma ka inoa o Iesu, a e apo mai i ka euanelio o Kristo, e hoikeia ae auanei imua o oukou, aole ma keia mooolelo wale no, aka, ma ka mooolelo no hoi e hiki i ka poe Genetile mai ka poe Iudaio ae, a ua mooolelo nei e hiki auanei ia mai ka poe Genetile ae ia oukou.

9 No ka mea hoi, ua palapalaia keia i kumu i manaoio ai oukou i kela; a ina e manaoio oukou i kela, e manaoio no oukou i keia no hoi; a ina e manaoio oukou i keia, e ike oukou no ko oukou poe kupuna, a me na hana kupanaha no hoi i hanaia’i e ka mana o ke Akua mawaena o lakou;

10 A e ike no hoi oukou he koena oukou o ka poe hua a Iakoba; nolaila, ua helu pu ia oukou mawaena o ka poe kanaka o ka berita mua; a ina paha a manaoio aku oukou ia Kristo, a bapetizoia, me ka wai mamua, alaila, me ke ahi a me ka Uhane Hemolele, e hahai ana i ke kumu like o ko kakou Mea e Ola’i, e like me ka mea ana i kauoha mai ai ia kakou, alaila, e pono auanei oukou me ka la hookolokolo. Amene.

MOKUNA 8

1 [mokuna 4, paukū 1] Aia hoi, owau, o Moroni ke hana nei a pau i ka mooolelo a ko’u makuakane Moramona. Aia hoi, he mau mea kakaikahi wale no ka’u e palapala ai, a o ua mau mea nei ka’u i kauohaia mai ai e ko’u makuakane.

2 Ano, eia kekahi, mahope iho o ke kaua nui a weliweli ma Cumora, ua imiia’e ko Nepai poe, ka poe i pakel aku ai iloko o ka aina hema, e ko Lamana poe, a pau loa ae la lakou i ka lukuia;

3 A ua pepehiia no hoi ko’u makuakane e lakou; a owau hoi, ke koe wale nei no i kakau i ka mooolelo kaumaha no ka lukuia’na o ko’u poe kanaka. Aka hoi, ua hala aku lakou, a ke hooko nei au i ke kauoha a ko’u makuakane. A ina paha e pepehi mai lakou ia’u, aole au i ike;

4 Nolaila, e kakau iho no au a e huna iho i na mooolelo iloko o ka honua, a kahi a’u e hele aku ai he mai ole ia.

5 Aia hoi, ua hana iho ko’u makuakane i keia mooolelo, a ua kakau oia i ke kumu o ia mea. A, aia hoi, i kakau no au ia mea no hoi, ina he wahi kaawale ko’u ma na papa; aka, aole pela; a ua nele au i ka mea e hooheheeia, no ka mea, owau wale iho la no; ua pepehiia ko’u makuakane ma ke kaua, a me ko’u poe hanauna a pau, a, aole o’u makamaka aohe hoi kahi e hele aku ai; a o ka loihi o ka ka Haku ae ana ia’u e ola, aole au i ike.

6 Aia hoi, ua hala aku la eha haneri makahiki mai ke hiki ana mai o ko kakou Haku a Mea e Ola’i.

7 A, aia hoi, ua imi ae la ko Lamana poe i ko’u poe kanaka, i ko Nepai, ia kulanakauhaleaku ia kulanakauhale aku, a ia wahi aku ia wahi aku, a pau loa ae la lakou; a nui ko lakou haule ana: he oiaio, he nui a he kupanaha hoi ka lukuia’na o ko’u poe kanaka, ko Nepai poe.

8 A, aia hoi, o ka lima o ka Haku nana ia mea i hana. A, eia hoi kekahi, ka kaua pu nei ko Lamana poe kekahi me kekahi; a ma ka ili a pau o keia aina e kaa mau ana ka pepehi kanaka a me ka hookahe koko; aole kekahi mea i ike i ka hope o ke kaua.

9 Ano hoi, aole au e olelo hou no lakou, no ka mea, aohe kekahi mea, ke ole ko Lamana poe a me ka poe powa, e ola ana maluna iho o ka ili o ka aina;

10 Aohe kekahi mea i ike i ke Akua oiaio, koe wale no na haumana a Iesu, ka poe i noho ma ka aina a hiki i ka wa i nui loa ai ka hewa o na kanaka, i ae ole ai ka Haku ia lakou e noho me na kanaka; a ina paha lakou maluna iho o ka ili o ka aina, aole kekahi kanaka i ike.

11 Aka hoi, ua ike au maua me ko’u makuakane ia lakou, a ua lawelawe mai la lakou ia maua.

12 A o ka mea e loaa ana keia mooolelo, a e hoohewa ole auanei ia mea no na mea hemahema iloko o ia mea, oia ke ike auanei i na mea nui aku i keia mau mea. Aka hoi, owau no o Moroni; a ina ua hiki, ina e hoike aku au i na mea a pau ia oukou.

13 [m 4, p 2] Aia hoi, ke hana nei au a pau ka’u olelo ana no keia poe kanaka. Owau no ke keiki a Moramona, a he mamo ko’u makuakane na Nepai;

14 A owau no hoi ka mea nana e huna iho i keia mooolelo i ka Haku; a he mea waiwai ole na papa o ia mea, no ke kauoha a ka Haku. No ka mea, e olelo oiaio ana oia, aole e loaa i kekahi mea ia mau mea e loaa’i ka waiwai; aka, o ka mooolelo maluna iho o ia mau mea he mea maikai loa ia; a o ka mea nana e hoopuka mai ia mea i ka malamalama, ia ia ka Haku e hoopomaikai ai.

15 No ka mea, e hiki ole i kekahi mea ke loaa ka mana e hoopuka mai ia mea i ka malamalama, ke ole e haawiia mai ia ia e ke Akua; no ka mea, e makemake ana ke Akua e hanaia auanei ia mea me ka manao i kona hoonaniia wale no, a i ka pomaikai o ka poe kanaka berita, kahiko, a hoopuehu loihi ia o ka Haku.

16 A pomaikai oia ka mea nana e hoopuka mai auanei i keia mea i ka malamalama; no ka mea, e hoopukaia mai auanei ia noloko mai o ka pouli i ka malamalama, e like me ka olelo a ke Akua; he oiaio, e hoopukaia mai auanei ia mea noloko mai o ka honua, a e alohi mai auanei noloko mai o ka pouli, a hiki i ka ike o na kanaka; a e hanaia auanei ia mea e ka mana o ke Akua;

17 A ina he mau hemahema kekahi, he mau hemahema ia mau mea no ke kanaka. Aka hoi, aole makou i ike i kekahi hemahema. Ua ike nae ke Akua i na mea a pau; nolaila, o ka mea e hoohewa mai ana, e makaala oia o lilo auanei oia i ke ahi Gehena.

18 A o ka mea e olelo ana, E hoike mai ia’u, a i ole e hahauia oe; e makaala oia o kena ana oia i ka mea i papaia e ka Haku.

19 No ka mea, o ka mea e hooewa wikiwiki aku ana, e hoohewa wikiwiki hou ia mai auanei oia; no ka mea, e like me kana mau hana, pela auanei kona uku; nolaila, o ka mea e hahau aku ana, e hahau hou ia mai auanei oia e ka Haku.

20 E nana i ka mea a ka palapala hemolele i olelo mai ai, Mai hahau ke kanaka, a mai hoohewa aku no hoi; no ka mea, na’u no ka hoohewa ana, wahi a ka Haku; a na’u no hoi ka hoopai ana, a na’u no e uku aku.

21 A o ka mea nana e ha aku i ka inaina a me na paio e ku e i ka hana a ka Haku, a e ku e i ka poe kanaka berita o ka Haku, no ko ka hale o Iseraela, a e olelo ae auanei, E hoopau aku no makou i ka hana a ka Haku, a e hoomanao ole ka Haku i kana berita ana i hana’i i ko ka hale o Iseraela, oia ke hookokoke ana e kuaia ilalo a e hooleiia’ku iloko o ke ahi;

22 No ka mea, e olokaa aku no na manao paa mau loa o ka Haku, a hiki i ka hookoia ana o kana mau olelo hoopomaikai a pau.

23 E imi iho i na wanana a Isaia. Aia hoi, aole hiki ia’u ke kakau iho ia mau mea. He oiaio, aia hoi, ke i aku nei au ia oukou, o kela poe hoano, ka poe i hala aku la mamua o’u, ka poe i noho ma keia aina, e hea aku auanei lakou; he oiaio, mai ka lepo ae lakou e hea aku ai i ka Haku; a ma ke ola o ka Haku, e hoomanao no oia i ka berita ana i hana ai me lakou.

24 A ua ike oia i ka lakou mau pule, ua puleia’ku no ko lakou poe hoahanau. A ua ike oia i ko lakou manaoio; no ka mea, ma kona inoa ua hiki ia lakou ke hooneenee aku i na mauna; a ma kona inoa ua hiki ia lakou ke hoohaalulu i ka honua; a ma ka mana o kana olelo ua hoohiolo aku lakou i na halepaahao i ka honua; he oiaio, aole i hiki i ka umu ahi ke hoeha ia lakou; aole hoi i na holoholona hihiu, aole hoi i na nahesa niho aua, no ka mana o kana olelo.

25 A, aia hoi, ua pule aku no lakou nona, no ka mea a ka Haku e hookuu mai ai e hoopuka mai i keia mau mea.

26 A he mea e pono ole ai no kekahi e olelo ae, Aole e puka mai ana ia mau mea, no ka mea, e puka io mai no auanei ia mau mea, no ka mea, ua olelo mai ka Haku ia mea; no ka mea, noloko mai o ka honua e puka mai ai auanei ia mau mea, ma o ka lima la o ka Haku, a ua hiki ole i kekahi ke alalai ia mea; a e puka mai no ia mea ma kekahi la i ka wa e oleloia’na, ua hoopauia ae la na hana mana; a e puka mai ai auanei no ia mea me he mea la e olelo ana kekahi mea mai ka make mai.

27 [m 4, p 3] A e puka mai ai no ia mea ma kekahi la i ka wa a ke koko o na mea hoano e kahea aku ai i ka Haku, no na huipu malu ana a me na hana a ka pouli;

28 He oiaio, e puka mai no ia mea ma kekahi la i ka wa e hooleia mai ai ka mana o ke Akua, a o na ekalesia i lilo ai i ka haumea, a e hookiekieia’e ma ka haaheo o ko lakou mau naau; he oiaio, ma kekahi la i ka wa a na luna o na ekalesia, a me na kumu, e hookiekieia’e ai ma ka haaheo o ko lakou mau naau, ma ka paonioni ana i ka poe i komo iloko o ko lakou mau ekalesia;

29 He oiaio, e puka mai ai no ia ma kekahi la i ka wa e loheia’i no na ahi, a me na makani ino, a me na nahu o ka uahi ma na aina e;

30 A e loheia’i no hoi no na kaua, a me na lono o na kaua, a me na olai i keia wahi i kela waui;

31 He oiaio, e puka mai ai no ia ma kekahi la, i ka wa e nui ana na mea haumia maluna iho o ka ili o ka honua; a o na pepehi kanaka kekahi, a me ka powa ana, a me ka wahahee ana, a me na hoopunipuni ana, a me no moe kolohe, a me na ano a pau o na mea hoopailua; i ka wa e olelo ai na mea he nui wale, E hana i keia mea, i kela mea, a he mea ole ia, no ka mea, e kokua no ka Haku i na mea me ia ma ka la hope. Aka, auwe ka poe me ia, no ka mea, aia no lakou iloko o ke au awaawa, a me na mea paa o ka hewa.

32 He oiaio, e puka mai no ia ma kekahi la, i ka wa i kukuluia’i na ekalesia e olelo ae ana, E hele mai io’u nei, a e kalaia ko oukou mau hala no ko oukou kala.

33 E ka poe kanaka hewa, kekee, a ai oolea, no ke aha la oukou i kukulu ai i na ekalesia no oukou iho e loaa’i ka waiwai? No ke aha la oukou i hoano e ai i ka olelo hemolele a ke Akua, i lawe ai oukou i ka hoohewaia’na maluna iho o ko oukou mau uhane? Aia hoi, e nana oukou i na hoike ana a ke Akua. No ka mea hoi, ke hele mai la ka manawa a ma ia la e hookoia’i keia mau mea a pau.

34 [m 4, p 4] Aia hoi, ua hoike mai la ka Haku ia’u i na mea nui a kupanaha no na mea e hiki koke mai ana ma ia la, i ka wa o keia mau mea e puka mai ai mawaena o oukou.

35 Aia hoi, ke olelo aku nei au ia oukou me he mea la eia oukou maanei; aole nae pela. Aka hoi, ua hoike mai la o Iesu Kristo ia oukou ia’u nei, a ua ike au i ka oukou hana ana;

36 A ua ike au ke hele la oukou ma ka haaheo o ko oukou mau naau; a, aohe mea, koe he kakaikahi wale no, i hookiekie ole ai ia lakou iho maluna ma ka haaheo o ko lakou mau naau, ma ke komo ana i ka lole nani loa, ma ka paonioni ana, a me na paio, a me ka lokoino, a me na hoomaau ana, a me na ano a pau o na hewa; a o ko oukou mau ekalesia, he oiaio, o lakou a pau, ua lilo i haumia no ka haaheo o ko oukou mau naau.

37 No ka mea hoi, ke aloha nui nei oukou i ke kala, a me ko oukou waiwai, a me ko oukou lole nani, a me ka hoonani ana i ko oukou mau hale pule, mamua o ko oukou aloha i ka poe hune a me ka poe nele, i ka poe mai a me ka poe pilikia.

38 E ka poe haumia, ka poe hookamani, ka poe kumu, ka poe e kuai ana ia oukou iho no ka mea e ino ana, no ke aha oukou i hoohaumia’i i ke ekalesia hemolele o ke Akua? No ke aha oukou i hilahila ai e lawe maluna iho o oukou i ka inoa o Kristo? No ke aha la oukou i manao ole ai e oi aku ana ka nani o ka pomaikai pau ole, mamua o kela poino e make ole ana, no ka mahalo ana o ko ke ao nei?

39 No ke aha la oukou e hoonani iho ai ia oukou iho me ka mea nona ke ola ole, a e ae aku nae i ka poe pololi, a me ka poe nele, a me ka poe kapa ole, a me ka poe mai, a me ka poe pilikia e maalo ae ma o oukou la, a nana ole aku ia lakou?

40 He oiaio, no ke aha la oukou e kukulu iho ai i ko oukou mau mea ino malu, e loaa’i ka waiwai, a hoouwe ai i na wahinekanemake imua o ka Haku, a me na keiki makua ole hoi e uwe ai imua o ka Haku; a me ke koko no hoi o ko lakou mau makuakane, a me ka lakou mau kane, e hea aku ai i ka Haku mai ka lepo ae, no ka hoopai maluna iho o ko oukou mau poo?

41 Aia hoi, ke kau ae la ka pahikaua o ka hoopai maluna ae o oukou; a e hele koke mai ana ka manawa nana e hoopai iho ai i ke koko o ka poe hoano maluna iho o oukou, no ka mea, aole oia e hoomanawanui hou aku i ko lakou hea ana.

MOKUNA 9

1 [mokuna 4, paukū 5] Ano hoi, ke olelo nei no hoi au no ka poe e manaoio ole ana ia Kristo.

2 Aia hoi, e manaoio anei oukou ma ka la o ko oukou ikeia’na, i ka wa a ka Haku e hiki mai ai; he oiaio, o kela la nui i ka wa o ka honua e owili pu ia’i me he pepa la, a e hehee ai na kumu mua me ka wela loa; he oiaio, ma kela la nui i ka wa a oukou e kaiia ae ai e ku imua o ke Keikihipa a ke Akua, alaila, e olelo anei oukou, Aohe he Akua?

3 Alaila, e hoole hou anei oukou i ke Kristo, a, ua hiki anei ia oukou ke nana aku i ke Keikihipa a ke Akua? Ke manao nei anei oukou e noho pu auanei oukou me ia malalo iho o ka ike paka i ko oukou hewa? Ke manao nei anei oukou ua hiki ia oukou ke olioli e noho pu me kela mea hemolele, i ka wa e hoowalaniaia na uhane o oukou me ka ike paka i ka hewa ma ka oukou hana ino mau ana i kona mau kanawai?

4 Aia hoi, ke i aku nei au ia oukou e oi aku ko oukou poino e noho pu me ke Akua hemolele a pololei, malalo iho o ko oukou ike paka i ko oukou paumaele imua ona, mamua o ka noho pu ana o oukou me na uhane hoohewaia iloko o Gehena.

5 No ka mea hoi, i ka wa a oukou e laweia’e ai e ike i ko oukou olohelohe imua o ke Akua, a me ka nani o ke Akua no hoi, a me ka hemolele o Iesu Kristo, e hoaa no ia mea i ka lapalapa o ke ahi hiki ole ke kinaiia malua iho o oukou.

6 E! nolaila, e ka poe hoomaloka, e huli mai i ka Haku; e hea ikaika aku i ka Makua ma ka inoa o Iesu Kristo, i loaa’i paha oukou, me ke kina ole, maemae, maikai a keokeo, i hoomaemaeia’i e ke koko o ke Keikihipa, ma kela la nui hope.

7 [m 4, p 6] A eia hou ka’u e olelo aku nei ia oukou, ka poe e hoole ana i na hoikeana a ke Akua, a olelo ae, Ua hoopauia ae la ia mau mea, aole no na hoikeana, aole no hoi na wanana, aole hoi na haawina, aole hoi hoola ana, aole hoi olelo ana me na olelo e, a me na hoomaopopo ana i na olelo e.

8 Aia hoi, ke i aku nei au ia oukou, o ka mea e hoole ana i keia mau mea, ua ike ole oia i ka euanelio o Kristo; he oiaio, ua heluhelu ole oia i na palapala hemolele; ina pela, ua hoomaopopo ole oia ia mau mea.

9 No ka mea, aole anei kakou heluhelu, oia like no o ke Akua, inehinei, a i keia la no, a no ka wa pau ole; a iloko ona aole he ano lauwili, aole loa hoi he luli iki.

10 Ano, ina ua noonoo wale oukou ia oukou iho he akua e lauwili ana, a iloko ona he luli iki, alaila, ua noonoo wale oukou ia oukou iho he akua, aole oia he Akua o na hana mana.

11 Aka hoi, e hoike aku no au ia oukou he Akua o na hana mana, oia no ke Akua o Aberahama, a o ke Akua o Isaaka, a o ke Akua o Iakoba; a oia no ka Akua hookahi nana i hana mai i na lani a me ka honua, a me ko lakou mau mea a pau i piha’i.

12 Aia hoi, hana mai la oia ia Adamu; a ma o Adamu la hiki mai la ka haule ana o kanaka. A no ka haule ana o kanaka, hiki mai la o Iesu Kristo, oia no ka Makua a me ke Keiki; a no Iesu Kristo hiki mai la ka hoolapanaiia’na o kanaka.

13 A no ka hoolapanaiia o kanaka, i hiki mai ai ma o Iesu Kristo la, ua lawe hou ia lakou i ka alo o ka Haku; he oiaio, ma keia mea no ka hoolapanaiia o na kanaka a pau, no ka mea, e lawe mai ana ka make o Kristo i ke alahouana, oia ka mea e lawe mai ana i ka hoolapanai ana mai ka hiamoe mau loa mai, a mai ua hiamoe ana la e hoalaia’e auanei na kanaka a pau e ka mana o ke Akua, i ka wa e kani ai ka pu; a e puka mai auanei lakou, o ka poe uuku a me ka poe nui, a e ku auanei lakou a pau imua o kona wahi hookolokolo, ua hoolapanaiia mai a hookuuia mai mai keia apo mau loa mai o ka make, a o ua make nei he make kino ia;

14 Alaila, e hiki mai ana ka hooponopono o ka Mea Hemolele maluna iho o lakou; alaila, e hiki ana ka manawa, o ka mea i paumaele, e mau no kona paumaele; a o ka mea i pono, e mau no kona pono; o ka mea olioli, e mau no kona olioli; a o ka mea olioli ole, e mau no kona olioli ole.

15 [m 4, p 7] Ano, i ka poe a pau i noonoo wale ai ia oukou iho he akua i hiki ole ke hana i na hana mana, ke ninau nei au ia oukou, ua hala aku anei keia mau mea a pau, a’u i olelo ai? Ua hiki mai anei ka hopena i keia manawa? Aia hoi, ke i aku nei au ia oukou, aole; a aole i hooki ke Akua e noho Akua o ka hana mana.

16 Aia hoi, aole anei he kupanaha ma ko kakou mau maka, na mea a ke Akua i hana’i? He oiaio, a owai la ka mea i hiki ke hoomaopopo i na hana kupanaha a ke Akua?

17 Owai la ka mea e olelo ae, Aole he hana mana, i hanaia’i ka lani a me ka honua ma kana olelo; a ma ka mana o kana olelo, ua hanaia ke kanaka o ka lepo o ka honua; a ma ka mana o kana olelo, ua hanaia na hana mana?

18 A owai la ka mea e olelo ae, Aole o Iesu Kristo i hana i na hana mana ikaika he nui wale? A ua nui na hana mana ikaika i hanaia’i e na lima o ka poe aposetolo.

19 A ina ua hanaia na hana mana mamua, alaila, no ke aha la ke Akua i hooki ai i ka noho ana i Akua o na hana mana, a, aole nae oia e loli iki. Aia hoi, ke i aku nei au ia oukou, aole oia e loli ana; ina pela, e pau kona noho Akua ana; aka, aole loa e pau kona noho Akua ana, a he Akua no hoi ia o na hana mana.

20 A o ke kumu o kona hoopau ana e hana i na hana mana mawaena o na keiki a kanaka, no ka emi ana ia o lakou iloko o ka hoomaloka, a haalele ae i ke ala pololei, a ike ole i ke Akua ka mea e pono ai lakou ke paulele aku.

21 Aia hoi, ke i aku nei au ia oukou, o ka mea e manaoio ana ia Kristo, me ke kanalua ole, o kela mea keia mea ana e noi aku ai i ka Makua ma ka inoa o Kristo e haawiia mai ia ia ia; a aia no keia olelo hoolana i na mea a pau, a hiki aku i ko na welau o ka honua.

22 No ka mea hoi, penei wahi a Iesu Kristo i kana mau haumana e kali ana; he oiaio, a i kana poe haumana a pau no hoi, ma ka hoolohe ana o ka lehulehu, E hele aku oukou i na aina a pau, a e hai aku i ka euanelio i na kanaka a pau;

23 A o ka mea e manaoio mai a bapetizoia, e hoolaia oia, aka, o ka mea manaoio ole mai, e hoohewaia oia.

24 A eia no na ouli e pili pu aku i ka poe e manaoio mai ia;u, ma ko’u inoa lakou e mahiki aku ai i na daimonio; e olelo no hoi lakou me na olelo e; e kaikai no lakou i na nahesa; a ina e ino lakou i ka mea make, aole lakou e poino ia mea; e kau no lakou i ko lakou mau lima maluna iho o ka poe mai, a e ola no lakou;

25 A o ka mea e manaoio mai i ko’u inoa, me ka kanalua ole, ia ia au e hooiaio aku ai i ka’u mau olelo a pau, a hiki aku i na welau o ka honua.

26 Ano hoi, owai la ka mea e hiki ke ku e i na hana a ka Haku? Owai la ka mea hiki ke hoole aku i kana mau olelo? Owai la ka mea e ea ku e aku i ka mana loa o ka Haku? Owai la ka mea e hoowahawaha i na hana a ka Haku? Owai la ka mea e hoowahawaha i na keiki a Kristo? Aia hoi, e ka poe e hoowahawaha ana i na hana o ka Haku, no ka mea, e kahaha no oukou a make.

27 Nolaila, ea, mai hoowahawaha, a mai kahaha, aka, e hoolohe i na olelo a ka Haku, a e noi aku i ka Makua ma ka inoa o Iesu no kela mea keia mea a oukou e nele ai. Mai kanalua, aka, e manoio, a e hoomaka e like me na manawa kahiko, a e hele mai i ka Haku Ia me ko oukou naau a pau, a e hooikaika aku i ke ola no oukou iho me ka makau a me ka haalulu imua ona.

28 E naauao oukou ma na la o ko oukou noho ana ma ka honua; e hoomaemae ia oukou iho i na mea paumaele a pau; mai noi aku, e hiki ia oukou ke hoomaunauna iho ia mea maluna o ko oukou mau kuko, aka, e noi aku me ka manao naueue ole, i ae ole aku ai oukou i ka hoowalewale, aka i hookauwa aku ai oukou na ke Akua ola a me ka oiaio.

29 E makaala i bapetizo ole ia’i oukou me ka pono ole; e makaala i ai ole ai oukou i ka ahaaina a ka Haku me ka pono ole; aka, a makaala e hana i na mea a pau ma ka pono, a e hana ia mea ma ka inoa o Iesu Kristo, ke keiki a ke Akua ola; a ina e hana oukou i keia a hoomau aku a hiki wale i ka hopena, aole oukou e hooleiia’ku mawaho.

30 Aia hoi, ke olelo aku nei au ia oukou me he mea la e olelo ana au mai ka make ae; no ka mea, ua ike au e lohe no auanei oukou i ka’u mau olelo.

31 Mai hoohewa mai ia’u no ko’u hemahema; aohe no hoi i kuu makuakane, no kona hemahema; aohe no hoi i ka poe nana i kakau iho mamua aku ona, aka, e oi aku ko oukou pono ke aloha aku i ke Akua no kona hoike ana ia oukou i ko makou mau hemahema, i aoia’i oukou e naauao loa mamua o ko makou.

32 [m 4, p 8] Ano hoi, ua kakau iho makou i keia mooolelo mamuli o ko makou ike i na kaha, i kapaia mawaena o makou ko Aihupita i hooponoponoia, ua haawiia mai mailalo mai a hoano e ia e makou, mamuli o ke ano o ka makou olelo.

33 A ina ua nui pono ko makou mau papa, ina ua kakau iho makou ma ka olelo Hebera; aka, ua hoano e ia no hoi ka olelo Hebera e makou; a ina ua hiki ia makou ke kakau iho ma ka olelo Hebera, alaila, aole loaa ia oukou na hemahema ma ka makou mooolelo.

34 Aka, ua ike no ka Haku i na mea a makou i kakau iho ai, a me ka ike ole no hoi o kekahi lahuikanaka e i ka makou olelo, nolaila, ua hoomakaukau oia i na mea no ka hoike ana i ke ano o ia mau mea.

35 A ua kakauia keia mau mea, i hiki ia makou ke hoomaemae iho i ko makou aahu i ke koko o ko makou poe hoahanau, ka poe i emi iho ai iloko o ka hoomaloka.

36 A, aia hoi, o keia mau mea a makou i noi aku ai no ko makou poe hoahanau, he oiaio, oia no ka hoihoi hou ia ana o lakou i ka ike no Kristo, ua like ia me na pule a ka poe hoano a pau, ka poe i noho mua ai ma ka aina.

37 A na ka Haku, o Iesu Kristo e ae mai e hookoia’i na pule a lakou e like me ko lakou manaoio; a na ke Akua ka Makua e hoomanao mai i ka kerita ana i hana’i me ko ka hale o Iseraela; a nana e hoopomaikai mai ia lakou no ka wa pau ole, ma o ka manaoio la ma ka inoa o Iesu Kristo. Amene.