Ka Buke a Iaroma

MOKUNA 1

1 [mokuna 1, paukū 1] Ano hoi, ke kakau nei au, o Iaroma, i mau olelo kakaikahi, e like me ke kauoha o ko’u makuakane o Enosa, i malamaia ko makou kuauhau.

2 A he uuku no keia mau papa, a ua kakauia keia mau mea no ka manao e pomaikai ai i ko makou poe hoahanau, i ko Lamana poe, nolaila, he mea e pono ai na’u ke kakau uuku; aka aole au e kakau i na mea o ka’u wanana ana, aole hoi o ko’u mau hoikeana. No ka mea, heaha la ka kea nui aku i hiki ia’u ke kakau mamua o na mea a ko’u mau kupuna i kakau ai? No ka mea, aole anei lakou i hoike mai i ke kumu manao o ke ola? Ke i aku nei au ia oukou, Ae; a ua lawa keia no’u.

3 [m 1, p 2] Aia hoi, he mea e pono ai ke hanaia na mea he nui iwaena o keia lahuikanaka, no ka paakiki o ko lakou mau naau, a me ke kuli o ko lakou mau pepeiao, a me ka makapo o ko lakou mau naau, a me ke oolea o ko lakou ai; aka hoi, ua lokomaikai nui mai ke Akua ia lakou, a, aole oia i kahili aku ia lakou a hiki i keia wa, mai ka ili aku o ka aina.

4 A nui wale na mea iwaena o makou i loaa’i na hoikeana he nui: no ka mea, aole lakou a pau he poe ai oolea. A o ka poe a pau i ai oolea ole, a i loaa ka manaoio, he kohu ko lakou me ka Uhane Hemolele, ka mea e hoike mai ana i na keiki a kanaka e like me ko lakou manaoio.

5 [m 1, p 3] Ano hoi, ua hala ae la na makahiki elua haneri, a ua mahuahua ikaika ae la ko Nepai poe ma ka aina. Ua malama aku la lakou i ke kanawai o Mose, a me ka la Sabati hoano i ka Haku. Aole lakou i hoohiki ino; aole no hoi i kuamuamu. A ua ikaika loa na kanawai o ka aina. A ua luluia lakou maluna o ka ili he nui o ka aina; a me ko Lamana poe hoi. A ua lehulehu aku lakou mamua o ka poe o ko Nepai; a o ka lakou muni ka pepehi kanaka, a inu hoi i ke koko o na holoholona.

7 [m 1, p 4] Eia kekahi, hele mai la lakou i na manawa he nui e ku e mai ia makou, i ko Nepai poe, me ke kaua. Aka he poe kanaka ikaika ko makou mau alii a me ko makou mau alihi kaua me ka manaoio i ka Haku: a ao mai la lakou i na kanaka i na aoao o ka Haku; nolaila, ua ku e makou i ko Lamana poe, a kahili aku la ia lakou mailoko aku o ko makou aina, a hoomaka ae la makou e paku aku i ko makou mau kulanakauhale, a me kela wahi keia wahi o ko makou hooilina.

8 A mahuahua nui loa iho la makou, a hele palahalaha aku la ma ke ili o ka aina, a lilo iho la i poe wiawai loa ma ke gula, a me ke kala, a ma na mea maikai, a me ka hana nani o ka laau, i na hale, a i na mea wili, a i ka hao no hoi, a me ke keleawe ulaula, a me ke keleawe, a me ke kila, e hana i na mea paahana o kela ano keia ano e mahiai i ka aina, a me na mea kaua; he oiaio, i ka pau maka oi, a me ka aa pua, a me ka ihe liilii, a me ka iha, a me na mea hoomakaukau a pau no ke kaua;

9 a pela i hoomakaukauia’i e kaua aku me ko Lamana poe, aole o lakou lanakila mai ia makou. Aka, ua hooiaioia ka olelo a ka Haku ana i olelo mai ai i ko kakou poe kupuna, i ka i ana, Ina e malama pono oukou i ka’u mau kauoha, e hoopomaikaiia oukou ma ka aina.

10 [m 1, p 5] Eia kekahi, hooweliweli iho la na kaula a ka Haku i ka poe kanaka o Nepai, e like me ka olelo a ke Akua, Ina aole lakou a malama i kana mau kauoha, aka e haule iloko o ka hewa, e lukuia’ku lakou mai ka ili aku o ka aina;

11 Nolaila, ua hana ikaika na kaula, a me na kahuna, a me na kumu, e hooikaika ana me ke ahonui, i na kanaka e molowa ole; e ao ana i ke kanawai o Mose, a me ke kumu o ka haawiia’na o ia mea; e hoohuli ana ia lakou e nana imua i ka Mesia, a e manaoio ia ia e hiki mai ana, me he mea la ua hiki mai oia. A mamuli o keia ano ao aku la lakou ia lakou la.

12 Eia kekahi, ma o ka hana ana pela, ua hookoe lakou ia lakou la i luku ole ia’i lakou la maluna o ka ili o ka aina; no ka mea, ua o aku la lakou i ko lakou la mau naau me ka olelo, e hooeueu mau ana ia lakou i ka mihi.

13 [m 1, p 6] Eia kekahi, ua hala aku la elua haneri kanakolukumamawalu makahiki, mamuli o ke ano o na kaua a me na paio, a me na ku e, no ka wa loihi.

14 A, aole au, o Iaroma, e kakau hou aku, no ka mea, ua uuku na papa. Aka hoi, e o’u poe hoahanau, ua hiki ia oukou ke hele i na papa e ae o Nepai: no ka mea, aia hoi, maluna o lakou ua kahakahaia ka mooolelo o ko makou kaua, e like me na palapala ana o na ’lii, oia hoi na palapala a lakou i kauoha aku ai e palapalaia’i.

15 A ke haawi aku nei au i keia mau papa iloko o na lima o ka’u keiki o Omanai, i malamaia lakou a like me na kauoha a ko’u mau kupuna.