KA HOIKEANA A NA MEA IKEMAKA EKOLU.

E ike na lahuikanaka, na ohana, na olelo, a me na kanaka ma kahi e hiki ai auanei keia buke, o makou nei ma ka lokomaikai o ke Akua ka Makua, a me ko kakou Haku o Iesu Kristo, ua ike makou i na papa maluna iho olaila i kakauia’i keia mooolelo, he mooolelo ia o ko Nepai poe, a o ko Lamana poe no hoi, na hoahanau o lakou, a o ko Iareda poe hoi, ka poe i hele mai mai ua halepakui la, mai ka mea i oleloia; a ua ike no hoi makou ua unuhiia ia ma ka haawina a me ka mana o ke Akua, no ka mea, na kona leo i hai mai pela ia makou; nolaila, ua ike maoli makou me ka maopopo, he oiaio ua bike nei. A ke hoika aku nei no hoi makou, au ike makou i na kaha maluna iho o na papa; a ua hoikeia mai la ia mau mea ia makou ma ka mana o ke Akua, aole ma ko ke kanaka. A ke hai aku nei makou me ka oiaio no, ua iho mai la kekahi anela o ke Akua mai ka lani mai, a ua lawe mai la oia a kau mai la imua o ko makou mau maka, a nana aku la makou a ike i na papa, a me ke kahakaha ana maluna iho olaila; a ua ike makou ma ka lokomaikai o ke Akua ka Makua, a me ko kakou Haku o Iesu Kristo, ko makou ike ana, a me ko makou hoikeana’ku i ka oiaio o keia mau mea; a he mea kupanaha ia i ko makou mau maka, aka hoi, na ka leo o ka Haku makou i kauoha mai e hoike aku no keia mea; nolaila, ke hoike aku nei makou no keia mau mea, i malamaia’i na kauoha a ke Akua. A ua ike no hoi makou ina e hoomau pono makou iloko o Kristo, e hoomaemae aku makou i ko makou mau aahu i ke koko o na kanaka a pau, a e loaa me ke kina ole imua o ka noho hookolokolo o Kristo, a e noho pu mau loa auanei me ia ma na lani. A no ka Makua, a me ke Keiki, a me ka Uhane Hemolele ka hoonaniia, a o ke Akua hookahi no ia. Amene.

Oliver Cowdery,

David Whitmer,

Martin Harris.

KA HOIKEANA A NA MEA IKEMAKA EWALU.

E ike na lahuikanaka, na ohana, na olelo, a me na kanaka ma kahi e hiki ai auanei keia buke, ua hoike mai o Iosepa Samika, Opio, ka mea nana keia buke i unuhi, ia makou i na papa, na mea i oleloia’i, a ua like me ke kula i ka nana aku; a o na aoao a pau a ua Samika nei i unuhi ai, ua haha makou me ko makou mau lima; a ua ike no hoi makou i na kaha maluna olaila, a i ka nana aku i ua mau mea nei a pau he hana ia o ka wa kahiko, a o ka hana akamai. A o keia ka makou e hoika aku nei me ka oiaio no, ua hoika mai ua Samika nei ia makou, no ka mea, ua ike makou a haha no hoi, a ike maoli me ka maopopo, ua loaa i ua Samika nei na papa a makou i olelo aku nei. A ke haawi aku nei makou i ko makou mau inoa i ko ke ao nei, e hoike aku i ko ke ao nei i na mea a makou i ike aku ai; a ua wahahee ole makou, ke hoike nei ke Akua no ka oiaio o ia mea.

Christian Whitmer, Hiram Page,

Jacob Whitmer, Joseph Smith, Makua,

Peter Whitmer, Opio, Hyrum Smith,

John Whitmer, Samuel H. Smith.