O Ka Buke a Helamana

He mooolelo o ko Nepai poe. A me ko lakou mau kaua a me na paio, a me ko lakou mau ku e. a me na wanana hoi o no kaula hemolele he nui, mamua o ka hiki ana mai o Kristo, mamuli o ka mooolelo a Helamana, oia no ke keiki a Helamana, a mamuli o na mooolelo a na keiki ana, a hiki loa i ka hiki ana mai o Kristo. A ua nui hoi na mea o ko Lamana poe i hoohulihia’i. He mooolelo o ko lakou huli ana. He mooolelo o ka pono o ko Lamana poe, a me na hewa a me na mea hoopailua o ko Nepai poe, mamuli o ka mooolelo a Helamana a me kana mau keiki, a hiki loa i ka hiki ana mai o Kristo, oia no ka i kapaia ka buke a Helamana, a pela aku.

1 [mokuna 1, paukū 1] Ano hoi, eia kekahi, ma ka makamua o ka makahiki kanaha o ke au o na Lunakanawai maluna iho o ka poe kanaka o Nepai, hoomaka ae la kekahi hihia nui mawaena o ka poe kanaka o ko Nepai.

2 No ka mea hoi, ua make aku la o Pahorana, a hele aku la i ke ala o ko ka honua a pau; nolaila, hoomaka ae la ka paio nui no ka mea nona ka noho hookolokolomawaena o na hoahanau, ka poe keiki a Pahorana.

3 Ano, eia no ko lakou mau inoa, ka poe i paio no ka noho hookolokolo, ka poe hoi nana i hoopaio aku i na kanaka; o Pahorana, o Paanaki, a me Pacumeni.

4 Ano, aole o lakou nei wale no ka pau o ka poe keikikane a Pahorana, (no ka mea, he nui kana mau keiki,) aka o lakou nei no ka poe i paio ai no ka noho hookolokolo; nolaila, ua mahele ai lakou i na kanaka i mau mahele ekolu.

5 Aka hoi, eia kekahi, ua waeia’e o Pahorana e ka leo o kanaka e lilo i Lunakanawai Nui, a i Kiaaina hoi, maluna iho o ka poe kanaka o Nepai.

6 [m 1, p 2] A eia kekahi, o Pacumeni, ia ia i ike ai ua hiki ole ia ia ke loaa ka noho hookolokolo, hui pu ae la oia me ka leo o kanaka.

7 Aka hoi, ua huhu loa o Paanaki, a me kela hapa o na kanaka, ka poe i makemake ai i kiaaina oia no lakou; nolaila, e kokoke ana oia e hoomalimaliaku i ua poe la e ala’e, ma ke kipi aku i ko lakou poe haohanau.

8 [m 1, p 3] A eia kekahi, ia ia i kokoke ai e hana i keia, aia hoi, ua hopuia oia, a ua hookolokoloia’ku e like me ka leo o na kanaka, a hoohewaia e make; no ka mea, ua ala ae la oia ma ke kipi, a imi ae la e hoopau mai i ke ku okoa ana o na kanaka.

9 Ano, i ka wa a ua poe la, ka poe i makemake ai i kiaaina oia no lakou, i ike mai ai ua hoohewaia’ku oia e make, ua huhu lakou, a, aia hoi, hoouna ae la lakou i kekahi kanaka, o Kisakumena, i ka noho hookolokolo o Pahorana, a pepehi ae la ia Pahorana me ia i noho ai maluna iho o ka noho hookolokolo.

10 A ua alualuia’ku oia e na kauwa a Pahorana; aka hoi, no ka mahuka kiki o Kisakumena, aole i hiki i kekahi kanaka ke loaa ia.

11 A hele ae la oia i ua poe la nana ia i hoouna mai, a komo iho la lakou a pau iloko o kahi berita, he oiaio, e hoohiki ana ma ka Mea mau loa nana lakou i hana, aole lakou e hai aku i kekahi kanaka ua pepehi ae o Kisakumena ia Pahorana;

12 Nolaila, aole i ikea o Kisakumena mawaena o ka poe kanaka o Nepai, no ka mea, ua hoopahaohaoia oia i ka wa ana i pepehi ae ai ia Pahorana. A hui pu ae la o Kisakumena, a me kona poe, ka poe i hana berita pu ai me ia, mawaena o na kanaka, mamuli o ke ano i hiki ole ai ke loaa lakou a pau; aka, o ka poe a pau i loaa ua hoohewaia’ku e make.

13 Ano hoi, ua hoonohoia’e o Pacumeni, mamuli o ka leo o na kanaka, e lilo i Lunakanawai Nui a i Kiaaina, maluna iho o na kanaka, e noho luna ai ma ka hakahaka o kona kaukuaana Pahorana; a ua like ia me kona pono. A ua hanaia keia a pau, ma ka makahiki kanaha o ke au o na Lunakanawai; a pau ae la no ia.

14 [m 1, p 4] A eia kekahi, ma ka makahiki kanahakumamakahi o ke au o na Lunakanawai, ua houluulu ae la ko Lamana poe i ka poe koa lehulehu i hiki ole ke heluia, a kahiko ae la ia lakou me na pahikaua, a me na pahikaua pokole, a me na kakaka, a me na pua, a me na pale-poo, a me na pale-umauma, a me kela ano keia ano o na pale-kino a pau;

15 A iho hou mai la lakou e hiki ia lakou ke hoouka mai i ko Nepai poe. A ua alakaiia mai lakou e kekahi kanaka, o Corianatuma kona inoa; a he mamo ia na Zarahemela; a he mea ku e oia nana i haalele mai i ko Nepai poe; a he kanaka nunui a ikaika hoi oia;

16 Nolaila, o ke Alii o ko Lamana poe, o Tubalota kona inoa, oia ke keiki a Amorona, e manao ana oia o Corianatuma, he kanaka ikaika no oia, ua hiki ke kupaa imua o ko Nepai poe, no kona ikaika a me kona akamai nui, a ma ka hoouna mai ana ia ia nei, e loaa auanei ia ia la ka mana maluna iho o ko Nepai poe;

17 Nolaila, hookonokono ae oia ia lakou e huhu, a houluulu ae la oia i na puali ona, a hoonoho iho la oia ia Corianatuma i alihi kaua no lakou, a kena ae la ia lakou e iho ilalo i ka aina o Zarahemela, e kaua mai i ko Nepai poe.

18 [m 1, p 5] A eia kekahi, no ka nui o ka paio a me ka nui o ka pilikia ma ke aupuni, aole lakou i hoonoho ai i na kiai lawa pono ma ka aina o Zarahemela; no ka mea, ua manao iho la lakou aole i aa ko Lamana poe e komo mai mawaena konu o na aina o lakou e hoouka mai i kela kulanakauhale nui o Zarahemela.

19 Aka eia kekahi, hele mai la o Corianatuma ma ke alo o kona poe lehulehu loa, a hiki mai la maluna iho o ko ke kulanakauhale, a no ka emo ole loa o ko lakou hele ana, aole o ko Nepai poe manawa e houluulu ae i na puali o lakou;

20 Nolaila, ooki ae la ilalo Corianatuma i ka poe kiai ma ka puka o ke kulanakauhale, a hele ae la me kona poe kaua a pau iloko o ke kulanakauhale, a pepehi ae la lakou i kela mea keia mea i ku e aku ia lakou, a loaa iho la ia lakou ke kulanakauhale a pau.

21 A eia kekahi, hee ae la o Pacumeni, oia no ka Lunakanawai nui, imua o Corianatuma, a hiki i na pa o ke kulanakauhale. A eia kekahi, hahau ae la o Corianatuma ia ia ma ka pa, a make aku la ia. A pela i pau ai na la o Pacumeni.

22 [m 1, p 6] Ano, ia Corianatuma i ike ai ua loaa ia ia ke kulanakauhale Zarahemela, a ike ai ua hee aku ko Nepai poe imua o lakou, a ua pepehiia, a ua hopuia, a ua hahaoia iloko o ka halepaahao, a ua loaa ia ia ka wahi ikaika loa ma ka aina a puni, hooikaikaia iho la kona naau, a no ia mea, e kokoke ana oia e hele ae e ku e i ka aina a pau.

23 Ano, aole oia i noho ai ma ka aina o Zarahemela, aka, hele ae la oia me ka poe koa he nui, i ke kulanakauhale o Momona; no ka mea, o kona manao paa ia e hele ae a e ooki mai i kona ala mawaena me ka pahikaua, e hiki ia ia ke loaa na wahi ma ka akau o ka aina;

24 A e manao ana mawaena konu o ka aina ko lakou ikaika nui loa, nolaila, hele ae la oia, e haawi ole ana ia lakou i ka manawa e houluulu mai ia lakou iho, ma na poe uuku wale no; a ma keia ano lakou la i haule mai ai maluna iho o lakou nei a ooki mai la ia lakou nei ilalo i ka honua.

25 Aka hoi, haawi mai la keia hele ana o Corianatuma ma mawaena konu o ka aina, i ka pomaikai nui ia Morohiha maluna o lakou, me ka nui loa nae o ko Nepai poe i pepehiia mai;

26 No ka mea hoi, ua manao o Moroniha aole o ko Lamana poe aa e komo mai mawaena konu o ka aina, aka, e hoouka mai lakou la i na kulanakauhale a puni ma na palena, me lakou la i hono mai ai mamua aku; nolaila, ua kena ae la o Moroniha i na puali ikaika o lakou e malama i kela mau wahi a puni ma na palena.

27 Aka hoi, aole i hoomakauia’ku ko Lamana poe me ia i makemake ai, aka ua hele mai lakou mawaena konu o ka aina, a ua hoopio mai i ke kulanakauhale nui, oia no ke kulanakauhale Zarahemela, a e hele ana mawaena o na wahi nui o ka aina, e luku ana i na kanaka me ka luku nui, i na kane, i na wahine, a me na keiki no hoi, e loaa ana na kulanakauhale he nui a me na wahi paa he nui.

28 Aka, ia Moroniha i ike ai i keia mea, hoouna koke ae la oia ia Lehi me kekahi poe e alai ia lakou, mamua o ko lakou hiki ana i ka aina Momona.

29 A pela oia i hana’i; a alai ae la oia ia lakou , mamua o ko lakou hiki ana i ka aina Momona, a hoouka aku la oia ia lakou, a hoomaka ae la lakou e hee ae ihope i ka aina o Zarahemela.

30 A eia kekahi, alai ae la o Moroniha ia lakou i ko lakou hee hope ana, a hoouka aku la ia lakou, a lilo ae la ia i kaua koko nui loa; he oiaio, ua nui loa ka poe i pepehiia, a mawaena o ka poe i pepehiia, ua loaa no hoi o Corianatuma.

31 Ano hoi, ua hiki ole i ko Lamana poe ke hee ae i kela ala i keia ala; aole ma ka akau, aole hoi ma ka hema, aole ma ka hikina, aole ma ke komohana, no ka mea, ua hoopuniia lakou ma na aoao a pau e ko Nepai poe:

32 A pela ua hoolei mai la o Corianatuma i ko Lamana poe mawaena konu o ko Nepai poe, a no ia mea, maloko lakou o ka mana o ko Nepai poe, a ua pepehiia’ku oia iho, a hookuu mai la ko Lamana poe ia lakou iho iloko o na lima o ko Nepai poe.

33 [m 1, p 7] A eia kekahi, loaa hou mai la ia Moroniha ke kulanakauhale o Zarahemela, a kena aku la i ko Lamana poe, ka poe i hoopioia’ku ai e hele aku mawaho o ka aina me ka maluhia.

1 [mokuna 1, paukū 8] A eia kekahi, ma ka makahiki kanahakumamalua o ke au o na Lunakanawai, mahope iho o ko Moroniha hookupaa hou ana i ka maluhia mawaena o ko Nepai poe a me ko Lamana poe, aia hoi, aohe mea e noho ma ka noho hookolokolo; nolaila, hoomaka hou ae la he paio mawaena o na kanaka no ka mea nana e noho ma ka noho hookolokolo.

2 A eia kekahi, ua waeia’e o Helamana, oia no ke keiki a Halamana, e noho ai i ka noho hookolokolo, e ka leo o na kanaka;

3 Aka hoi, hoohalua ae la o Kisakumena, nana i pepehi ai Pahorana, e pepehi mai ia Helamana no hoi a make; a ua kokuaia oia e kona poe, ka poe i komo ai iloko o ka berita i ike ole ai kekahi mea i kona ino;

4 No ka mea, aia kekahi Gadianatona he mea i akamai nui loa ma na olelo he nui, a ma kona maalea, e hana i ka hana malu o ka pepehi kanaka a me ka powa; nolaila, lilo iho la oia i pookela no ka poe o Kisakumena;

5 Nolaila, hoomalimali ae la oia ia lakou, a me Kisakumena no hoi, ina e hoonoho iho lakou ia ia ma ka noho hookolokolo, nana e ae aku i na mea i huiia me kona poe e hoonohoia i poe mana a i poe luna mawaena o ka poe kanaka; nolaila, imi mai la o Kisakumena e pepephi mai ia Helamana a make.

6 [m 1, p 9] A eia kekahi, me ia i hele ae ai i ka noho hookolokolo, e pepehi mai ia Helamana a make, aia hoi, o kekahi o na kauwa a Helamana, mawaho oia ma ka po, a ua loaa ia ia ma o ka hoopahaohao ana la ka ike no kela mau manao kuka i hooholoia’e e keia poe e pepehi ia Helamana a make.

7 A eia kekahi, halawai ae la oia me Kisakumena, a haawi aku la oia i hoailona ia ia; no ia mea, ua hoike ae la o Kisakumena ia ia i ka mea ana i makemake ai, e makemake ana ia ia nei e alakai ae ia ia i ka noho hookolokolo, e hiki ia ia ke pepehi loa ia Helamana;

8 A i ka wa e ke kauwa a Halamana i ike ai i ka naau a pau o Kisakumena, a no kona manao paa e pepehi kanaka, a i ka manao paa no hoi ia o na mea a pau i huiia i kona poe, e pepehi kanaka, a e powa, a e loaa ka mana, (a o keia no ko lakou manao kuka malu, a me ko lakou hui pu ana,) olelo ae la ke kauwa a Helamana ia Kisakumena, Ea, e hele kaua i ka noho hookolokolo.

9 Ano, hoolealea nui loa keia ia Kisakumena, no ka mea, ua manao oia e hooko aku auanei oia i kona mea i manao ai; aka hoi, me laua e hele ana i ka noho hookolokolo, hou ae la ke kauwa a Helamana ia Kisakumena i ka puu wai, a haule iho la oia a make aku la me ka uhu ole. A holo ae la oia a hai mai la ia Helamana i na mea a pau ana i ike aku ai, a i lohe ai, a i hana’i.

10 [m 1, p 10] A eia kekahi, hoouna ae la o Helamana e hopu aku i na poe powa a pepehi kanaka malu nei, e pepehiia’ku ai lakou mamuli o ke kanawai.

11 Aka hoi, ia Gadianatona i ike ai aole o Kisakumena i hoi aku, hopohopo iho la oia o pepehiia’ku oia, nolaila, kena ae la oia i kona poe e hahai ae ia ia. A mahuka aku la lakou mawaho o ka aina ma kekahi ala huna, iloko o ka waonahele; a pela ia Helamana i hoouna aku ai e hopu aku ia lakou la, aole e hiki ke loaa lakou la ma ka huli ana.

12 A e olelo hou ia aku auanei no ua Gadianatona nei. A pela i pau ai ka makahiki kanahakumamalua o ke au o na Lunakanawai maluna iho o ka poe kanaka o Nepai.

13 Aia hoi, ma ka hopena o keia buke, e ike auanei oukou ua lilo ua Gadianatona nei i mea e hoohiolo ai, he oiaio, kokoke i ka anai loa ia’na o ka poe kanaka Nepai.

14 Aia hoi, aole au i olelo no ka hopena o ka buke a Helamana, aka, no ka hopena o ka buke a Nepai ka’u e olelo nei, ua lawe mai au i ka mooolelo a pau mailaila mai, oia ka’u i kakau ai.

1 [mokuna 2, paukū 1] Ano, eia kekahi, ma ka makahiki kanahakumamakolu o ke au o na Lunakanawai, aohe paio mawaena o ka poe kanaka Nepai, he haaheo uuku wale no ma ka ekalesia, he kumu no ia no na ku e uuku mawaena o na kanaka, a ua hooponoponoia keia mau mea ma ka hopena o ka makahiki kanahakumamakolu.

2 Aohe no he paio mawaena o na kanaka ma ka makahiki kanahakumamaha; aohe no he nui ka paio ma makahiki kanahakumamalima.

3 A eia kekahi, ma ke kanahakumamaono, he oiaio, ua nui ka paio a me na ku e he nui; ma ua mau mea nei ua nui loa ka poe i haalele mai i ka aina o Zarahemela, a hele aku la mawaho iloko o ka aina akau, e noho ai ma ka aina;

4 A hele loihi loa ae la lakou, a hiki aku la lakou i na moanawai nui, a me na muliwai he nui;

5 He oiaio, a hoolaha ae la lakou iloko o na wahi a pau o ka aina, iloko o kela wahi keia wahi i hooneanea ole ia, a i hoonele ole ia ka ululaau, no ka nui o na kamaaina i noho e ai mamua ma ka aina.

6 Ano, aohe wahi o ka aina i oneanea, koe o kahi laau ole wale no a me ia mea’ku; aka, no ka nui o ka anaiia’na o na kanaka, ka poe i noho mua ai ma ka aina ua kapaia o oneanea.

7 Ua uuku ka laau ma ka ili o ka aina, lilo iho la nae ka poe kanaka i hele aku ai, i poe akamai ma ka hana ana i ka lepo pipili; nolaila, kukulu iho la lakou i na hale lepo pipili, a iloko o ua mau hale la lakou i noho ai.

8 [m 2, p 2] A eia kekahi, mahuahua ae la lakou a hoolaha aku la, a hele aku la mai ka aina hema i ka aina akau, a kawowo aku la a hoomaka ae la e uhi i ka ili o ka honua a pau, mai ke kai hema, i ke kai akau, mai ke kai komohana, i ke kai hikina.

9 A noho iho la na kanaka ma ka aina akau, ma na halelole, a ma na hale lepo pipili, a kuu aku la lakou i kela laau keia laau i ulu ai maluna iho o ka aina, e ulu loa ia, i loaa’i ia lakou mahope ka laau e kukulu iho i ko lakou mau hale, he oiaio, i ko lakou mau kulanakauhale, a i ko lakou mau luakini, a i ko lakou mau hale pule, a i ko lakou mau hale laa, a i kela ano i keia ano o ko lakou mau hale.

10 [m 2, p 3] A eia kekahi, no ke kakaikahi loa o ka laau ma ka aina akau, hoouna aku la lakou he nui wale ma na moku;

11 A pela lakou i kokua ai i na kanaka ma ka aina akau, i kukulu iho ai lakou la i na kulanakauhale he nui, o ka laau a me ka lepo pipili no hoi.

12 A eia kekahi, ua nui loa na mea o ka poe kanaka o Amona, no ko Lamana poe lakou ma ka hanau ana, i hele aku ai iloko o ua aina nei.

13 [m 2, p 4] Ano, ua nui na mooolelo i kakauia’i no na hana ana a keia poe kanaka, e na mea he nui wale o ua poe kanaka nei, a ua maikai a nui loa hoi, e pili ana ia lakou;

14 Aka hoi, aole i hiki i ka hapa-haneri o na hana ana a ua poe kanaka nei, he oiaio, o ka mooolelo o ko Lamana poe, a o ko Nepai poe, a me ko lakou mau kaua, a me na paio, a me na ku e, a me ka lakou hai olelo ana, a me ka lakou mau wanana, a me ko lakou mau moku, a me ka lakou kapili ana i na moku, a me ka lakou kukulu ana i na luakini, a i na hale pule, a me ko lakou mau hale laa, a me ko lakou pono, a me ko lakou hewa, a me ko lakou pepehi kanaka ana, a me ko lakou powa ana, a me ko lakou hao ana, a me kela ano keia ano o na mea hoopailua a moe kolohe, ke hookomoia iloko o ua buke nei;

15 Aka hoi, ua nui na buke a nui na mooolelo o kela ano keia ano, a ua kakauia ka nui o ia mau mea e ko Nepai poe;

16 A ua haawiia mai ia mau mea mai kekahi hanauna aku i kekahi, e ko Nepai poe, a hiki i ka wa a lakou i haule iho ai iloko o ka lawehala ana, a i pepehiia’i, powaia’i, a alualuia’i, a kipakuia’i, a lukuia’i, a hoopuehuia’i, maluna o ka ili o ka honua, a hui pu ia’i me ko Lamana poe a kapa hou ole ia’i ko Nepai poe, e lilo ana i poe ino, a i poe hihiu, a i poe hae, he oiaio, e lilo ana i ko Lamana poe.

17 [m 2, p 5] Ano, ke hoi hou nei au i ko’u mooolelo iho; nolaila, o ka’u i olelo aku ai ua hala ia mahope iho o na paio nui, a me na haunaele, a me na kaua, a me na ku e mawaena o ka poe kanaka o Nepai.

19 A eia kekahi, ua nui nae na paio i keia manawa ma ka aina, he oiaio, ma ka makahiki kanahakumamahiku, a i ka makahiki kanahakumamawalu hoi;

20 Aka hoi, ua noho iho la o Helamana ma ka noho hookolokolo me ka hoopono a me ka pololei; he oiaio, ua hoolohe ae la oia e malama i na olelo kupaa, a me na hoopono, a me na kauoha a ke Akua; a hana mau aku la oia i ka mea i pono imua o ke Akua; a hele ae la oia mahope o na aoao o kona makuakane, a hoopomaikaiia’e la oia ma ka aina.

21 A eia kekahi, he mau keikikane elua kana. A haawi ae la oia i ka makahiapo i ka inoa o Nepai, a i ka muli i ka inoa o Lehi. A hoomaka ae la laua e ulu ae ma ka Haku.

22 A eia kekahi, hoomaka ae la na kaua a me na paio e hooki, ma kekahi mau mea, mawaena o ka poe kanaka o ko Nepai, ma ka hopena o ka makahiki kanahakumamawalu o ke au o na Lunakanawai maluna iho o ka poe kanaka o Nepai.

23 A eia kekahi, ma ka makahiki kanahakumamaiwa o ke au o na Lunakanawai, ua hookupaaia ka maluhia mau ma ka aina, koe wale no na hui pu malu ana o Gadianatona, ka powa, i hookupaa ai, ma na wahi noho nui ia’i o ka aina.

24 [m 2, p 6] A eia kekahi, ma ua makahiki hookahi nei, ua nui ka pomaikai ma ka ekalesia, a ua hui mai na tausani ia lakou iho i ka ekalesia, a ua bapetizoia i ka mihi;

25 A no ka mahuahua nui o ka ekalesia, a no ka nui o na me pomaikai i nininiia mai ai maluna iho o na kanaka, ua nui loa aku ka pihoihoi o ka poe kahuna nui a me na kumu.

26 A eia kekahi, pomaikai iho la ka hana a ka Haku ma ka bapetizo a ma ka hui ana i na mea he nui wale i ka ekalesia o ke Akua, he oiaio, i na umi o na tausani.

27 Pela kakou i ike ai ua aloha mai ka Haku i ka poe a pau e kahea aku ana, ma ka oiaio o ko lakou mau naau, i kona inoa hemolele;

28 He oiaio, pela kakou i ike ai ua hamama ae la ka puka o ka lani i na mea a pau, i ka poe i manaoio ma ka inoa o Iesu Kristo, oia no ke Keiki a ke Akua;

29 He oiaio, ke ike nei kakou o ka mea nana e lalau aku i ka olelo a ke Akua, ka mea ola a mana, ka mea e mahele aku i ka maalea a pau, a me na pahele, a me na hoopunipuni o ka diabolo, a e alakai mai i ke kanaka o Kristo ma kekahi ala pololei a ololi i kela aoao o ke awawa o ka poino, i hoomakaukauia’i e ale iho i ka poe hewa,

30 A e hoopae ai i ko lakou poe uhane, he oiaio, i ko lakou poe uhane make ole ma ka lima akau o ke Akua, ma ke aupuni o ka lani, e noho pu ilalo me Aberahama, a me Isaaka, a me Iakoba, a me ko kakou poe kupuna hemolele a pau, i puka hou ole aku ai mawaho.

31 A ma ua makahiki nei he hauoli mau ana ma ka aina o Zarahemela, a ma na wahi e kokoke ana a puni, ma ka aina a pau i nohoia’i e ko Nepai poe.

32 A eia kekahi, he maluhia a me ka olioli nui loa ana ma ke koena o ka makahiki kanahakumamaiwa: he oiaio, a he maluhia mau a me ka olioli nui loa ma ka makahiki kanalima o ke au o na Lunakanawai.

33 A he maluhia no hoi, i ka makahiki kanalimakumamakahi o ke au o na Lunakanawai, koe wale no ka haaheo i hoomaka’i e komo iloko o ka ekalesia; aole iloko o ka ekalesia o ke Akua, aka, iloko o na naau o na kanaka, ka poe i hookohukohu no ka ekalesia o ke Akua lakou;

34 A ua hookiekieia lakou iluna ma ka haaheo, i ka hoomaau ae i na mea he nui o ko lakou poe hoahanau. Ano, he mea ino nui keia, a he kumu no ia e loaa ai i ka poe haahaa o kanaka na hoomaau mai a nui, a e auhele nawaena o ka popilikia nui;

35 Aka hoi, ua hooke ai a pule pinepine lakou, a mahuahua ikaika a ikaika aku ma ko lakou haahaa, a onipaa a onipaa aku ma ka manaoio o Kristo, i ka hoopiha ana i ko lakou mau uhane me ka olioli a me ka mea e oluolu ai, he oiaio, i ka hoomaemaeia’na a me ka hoolaaia’na o ko lakou mau naau, a i hiki mai ana keia hoolaa ana no ko lakou haawi ana i na naau o lakou i ke Akua.

36 A eia kekahi, pau ae la ka makahiki kanalimakumamalua ma ka maluhia no hoi, koe wale no ka haaheo nui loa i komo ai iloko o na naau o na kanaka; a no ko lakou waiwai nui loa ia, a me ko lakou pomaikai ma ka aina, a ulu ae la ia maluna iho o lakou, ia la aku ia la aku.

37 [m 2, p 7] A eia kekahi, ma ka makahiki kanalimakumamakolu o ke au o na Lunakanawai, make aku la o Helamana, a hoomaka ae la kana makahiapo-kane, o Nepai, e noho alii ma kona hakahaka. A eia kekahi, hoopiha ae la ia i ka noho hookolokolo me ka hoopono a me ka pololei: he oiaio, malama aku la oia i na kauoha a ke Akua, a hele ae la ma na aoao o kona makuakane.

1 A eia kekahi, ma ka makahiki kanalimakumamaha, ua nui na ku e ma ka ekalesia, a he paio hoi kekahi mawaena o na kanaka, a no ia mea, ua nui ke koko i hookaheia’i;

2 A o ka poe kipi ua pepehiia a make loa, a hooauheeia’ku hoi iwaho o ka aina, a hele aku la lakou i ke ’Lii la o ko Lamana poe.

3 [mokuna 2, paukū 8] A eia kekahi, hoao ae la lakou e hookonokono aku i ko Lamana poe e kaua mai i ko Nepai poe; aka hoi, ua makau nui loa ko Lamana poe, a aole lakou e hoolohe ae i na olelo a ua poe ku e la.

4 Aka eia kekahi, ma ka makahiki kanalimakumaono o ke au o na Lunakanawai, ua pii aku kekahi poe ku e mai ko Nepai aku i ko Lamana poe la; a o lakou nei me kela poe e ae ua pomaikai i ka hookonokono ana ia lakou e huhu mai i ko Nepai poe; a e hoomakaukau ana lakou ia makahiki a pau no ke kaua.

5 A i ka makahiki kanalimakumamahiku, iho mai la lakou i ko Nepai poe e kaua, a hoomaka ae la lakou i ka hana o ka make; he oiaio, a ma ka makahiki kanalimakumamawalu o ke au o na Lunakanawai, olaa aku la ia lakou la ka aina o Zarahemela; he oiaio, a me na aina a pau no hoi, a hiki aku i ka aina e kokoke ana i ka aina Momona;

6 A ua hooauheeia mai ko Nepai poe, a me na puali o Moroniha, a hiki aku iloko o ka aina o Momona;

7 A malaila lakou i kukulu iho ai i na pa kaua e ku e i ko Lamana poe, mai ke kai komohana, a hiki i ka hikina; o ko ka la hookahi hele ana ia no kekahi o ko Nepai, ma ka palena a lakou i hana paa ai a ia hoonoho ai i na puali o lakou, e hoomalu aku i ko lakou aina akau.

8 A pela ua loaa i ua poe ku e la o ko Nepai poe, me ke kokua o kekahi poe koa lehulehu o ko Lamana poe, ka aina hooilina o ko Nepai poe ma ka aina hema. A ua hanaia keia a pau ma na makahiki kanalimakumamawalu a iwa o ke au o na Lunakanawai.

9 [m 2, p 9] A eia kekahi, ma ka makahiki kanaono o ke au o na Lunakanawai, pomaikai iho la o Moroniha a me na puali ona i ka loaa ana na wahi he nui o ka aina; he oiaio, hoopaa iho la lakou i na kulanakauhale he nui i haule iho ai iloko o na lima o ko Lamana poe.

10 [m 2, p 10] A eia kekahi, ma ka makahiki kanaonokumamakahi o ke au o na Lunakanawai, pomaikai ae la lakou i ka hoopaa ana i ka hapalua o ko lakou hooilina a pau.

11 Ano, ua hiki ole mai keia lilo nui o ko Nepai poe, a me ka luku nui mawaena o lakou, ina aole no ko lakou hewa a me ka lakou hana ino mawaena o lakou; he oiaio, a mawaena no hoi ia o ka poe i hookohukohu no ka ekalesia o ke Akua lakou;

12 A no ka haaheo o ko lakou mau naau ia, no ko lakou waiwai nui loa, he oiaio, no ko lakou hooluhi hewa ana i ka poe hune ia mea, e aua ana i ka lakou ai i ka poe pololi, e aua ana i ko lakou kapa i ka poe kapa ole, a e papai ana i ko lakou poe hoahanau haahaa ma ka papalina, e hoomaewaewa ana i na mea laa, e hoole ana i ka Uhane o ka wanana a i ka Uhane o ka hoikeana, e pepehi kanaka ana, e powa ana, e wahahee ana, e aihue ana, e moe kolohe ana, e ala ana ma na paio nui, a e mahuka aku ana iloko o ka aina o Nepai, mawaena o ko Lamana poe;

13 A no keia ko lakou hewa nui, a me ko lakou kaena ana ma ko lakou ikaika iho, ua waihoia ae lakou i ko lakou ikaika iho; nolaila, aole lakou i hoopomaikaiia aku, aka ua hoopilikiaia ae a hahauia ae, a hooauheeia ae imua o ko Lamana poe, a hiki i ka wa i aneane lilo aku ai ko lakou mau aina a pau.

14 Aka hoi, hai ae la o Moroniha i na mea he nui wale i na kanaka, no ko lakou hewa, a hai ae la o Nepai laua me Lehi no hoi, o laua no na keiki a Helamana, i na mea he nui wale i na kanaka; he oiaio, a wanana ae la i na mea he nui ia lakou no na hala o lakou, a me na mea e hiki mai maluna iho o lakou ina aole lakou e mihi i ko lakou mau hewa.

15 A eia kekahi, mihi iho la lakou, a ia lakou i mihi ai, hoomaka iho la lakou e hoopomaikaiia mai;

16 No ka mea, ia Moroniha i ike ai ua mihi lakou, aa aku la oia e alakai ae ia lakou mai ia wahi aku ia wahi aku, a mai ia kulanakauhale aku ia kulanakauhale aku, a hiki i ka wa a lakou i hoopaa iho ai i ka hapalua o ko lakou waiwai, a me ka hapalua o ko lakou mau aina a pau.

18 [m 2, p 11] A eia kekahi, ma ka makahiki kanaonokumamalua o ke au o na Lunakanawai, ua hiki ole ia Moroniha ke loaa hou na aina hooilina mai ko Lamana poe mai;

19 Nolaila, haalele aku la lakou i ko lakou manao e loaa ke koena o ko lakou mau aina, no ka mea, no ka lehulehu loa o ko Lamana poe, ua lilo i mea hiki ole i ko Nepai poe ke loaa ka mana hou maluna iho o lakou; nolaila, hoohana ae la o Moroniha i kona mau puali a pau i ka malama ana i kela mau wahi ana i lawe hou mai ai.

20 [m 2, p 12] A eia kekahi, no ka lehulehu loa o ko Lamana poe, ua weliweli ko Nepai poe, o hoopioia mai auanei lakou, a e hahiia mai ilalo, a e pepehi loa ia mai, a e anaiia mai;

21 He oiaio, hoomaka ae la lakou e hoomanao i na wanana a Alama, a me na olelo hoi a Mosia; a ike iho la lakou he poe kanaka ai oolea lakou, a ua hoowahawaha aku la lakou i na kauoha a ke Akua;

22 A ua hoololi ae la a hahi iho la lakou malalo iho o ko lakou mau kapuai, i na kanawai o Mosia, oia hoi na kanawai a ka Haku i kauoha mai ai ia ia e haawi ae i na kanaka; a e ike ana pela ua lilo ko lakou mau kanawai i ino, a ua lilo iho la lakou i poe kanaka hewa, a ua hewa lakou e like me ko Lamana poe.

23 A no ko lakou hala, ua hoomaka ae la ka ekalesia e emi iho; a hoomaka iho la lakou e hoomaloka i ka Uhane o ka wanana, a i ka Uhane o ka hoikeana; a e haka pono mai ana na hoopai o ke Akua ia lakou ma ka maka.

24 A ike aku la lakou ua lilo iho la lakou i nawaliwali, e like me ko lakou poe hoahanau, ko Lamana poe, a e hoopakele hou ole mai ana ka Uhane o ka Haku ia lakou; he oiaio, ua haalele mai ia ia lakou, no ka mea, aole e noho ana ka Uhane o ka Haku iloko o na luakini hemolele ole;

25 Nolaila, hooki mai la ka Haku e hoopakele ma ia lakou ma kona mana kupaianaha a keu loa, no ka mea, ua haule iho lakou iloko o ka noho hoomaloka a hewa weliweli: a ike aku la lakou ua lehulehu loa ko Lamana poe mamua o lakou, a ke ole hoo;ili aku lakou i ka Haku i ko lakou Akua, e make loa lakou me ka hiki ole ke pale ae.

26 No ka mea, ua ike lakou ua like ka nui o ka ikaika o ko Lamana poe me ko lakou ikaika, he kanaka no he kanaka. A pela lakou i haule iho ai iloko o keia lawehala nui; he oiaio, pela lakou i lilo ai i poe nawaliwali, no ko lakou lawehala ana, ma na makahiki aohe he nui.

1 [mokuna 2, paukū 13] A eia kekahi, ma ua makahiki la, aia hoi, haawi ae la o Nepai i ka noho hookolokolo, i kekahi kanaka o Cezorama kona inoa.

2 No ka mea, me ko lakou mau kanawai a me ko lakou poe hoomalu i hoonohoia’i e ka leo o no kanaka, a ua oi aku ka nui o ka poe e koho ino ana mamua o ka poe e koho maikai ana, nolaila, e oo ana lakou no ka luku, no ka mea, o na kanawai ua lilo iho la i ino;

3 He oiaio, aole o keia wale no; he poe kanaka ai oolea lakou, a ua hiki ole ia lakou ke hoomaluia e ka kanawai aole hoi e ka hoopono, ke ole ia i ko lakou lukuia’na.

4 [m 2, p 14] A eia kekahi, ua luhi iho la o Nepai no ko lakou hala; a haawi ae la oia i ka noho hookolokolo, a lawe ae la maluna iho ona e hai aku i ka olelo a ke Akua i ke koena a pau o kona mau la, a o kona kaikaina o Lehi no hoi, i ke koena a pau o kona mau la;

5 No ka mea, hoomanao iho la laua i na olelo a ko laua makuakane i olelo mai ai ia laua. A eia na olelo ana i olelo mai ai:

6 Aia hoi, e ka’u mau keiki, ke makemake nei au ia olua e hoomanao e malama i na kauoha a ke Akua; a ke makemake nei au e hai aku olua i na kanaka i ua mau olelo nei, aia hoi, ua haawi aku au ia olua i na inoa o na kupuna mua o kakou, na mea i hele mai ai mailoko mai o ka aina o Ierusalema; a o keia ka’u i hana’i, e hiki ia olua i ka wa a olua e hoomanao ai i ko olua mau inoa, ke hoomanao ia laua: a ia olua e hoomanao ai ia laua, e hiki ia olua ke hoomanao i ka laua mau hana; a ia olua e hoomanao ai i ka lauan mau hana, e hiki ia olua ke ike ua oleloia, a palapalaia no hoi, ua maikai ia mau mea;

7 Nolaila, e ka’u mau keiki, ke makemake nei au ia olua e hana aku i ka mea i maikai, i oleloia’i auanei no olua, a palapalaia’i no hoi, me ia i oleloia’i a palapalaia’i no laua.

8 ano, e ka’u mau keikie, aia hoi, he mea hou ka’u e makemake ia olua, a ua makemake nei eia no ia, i hana ole ai olua i keia mau mea i mau mea e kaena aku ai olua, aka i hana’i olua i keia mau mea e hoahu ae no olua iho i ka waiwai ma ka lani, he oiaio, i mau loa, a i mae ole ai; he oiaio, i loaa’i ia olua kela haawina maikai loa o ke ola mau loa, ka mea a kakou i manao ai me ke kumu pono ua haawiia mai i ko kakou poe kupuna.

9 [m 2, p 15] E hoomanao, e hoomanao, e ka’u mau keiki, i na olelo a ke Alii Beniamina i olelo mai ai i kona poe kanaka; he oiaio, e hoomanao aole kekahi ala e ae, aole hoi kekahi mea o ke kanaka e hiki ai ke hoolaia, ma o ke koko kala hala ana la wale no o Iesu Kristo, ka mea nana e hele mai ana; he oiaio, e hoomanao ke hele mai la oia e hoolapanai mai i ko ke ao nei.

10 A e hoomanao hoi i na olelo a Amuleka i olelo ae ai ia Zezeroma, ma ke kulanakauhale o Amoniha; no ka mea, i ae la oia ia ia, E hele oiaio mai auanei ka Haku e hoolapanai mai i kona poe kanaka; aka, aole oia e hele mai e hoolapanai mai ia lakou iloko o ko lakou mau hala, aka i hoolapanai mai ia lakou mai ko lakou mau hala ae.

11 A he mana no kona i haawiia mai ai mai ka Makua mai, e hoolapanai mai ia lakou mai ko lakou mau hala ae, no ka mihi; nolaila, ua hoouna mai la oia i kona mau anela e hai mai i na olelo no na kanawai o ka mihi, na mea e lawe ana i ka mana o ka Mea Hoolapanai, i ka hoola ana i na uhane o lakou.

12 Ano, e ka’u mau keiki, e hoomanao, e hoomanao, maluna iho o ka pohaku o ko kakou Mea Hoolapanai, oia no o Kristo, ke Keiki a ke Akua, olua e kukulu iho ai i ko olua kahua e pono ai, i mana ole ai ka diabolo i ka wa ana e hoouna mai ai i kona mau makani ikaika; he oiaio, i kona mau pua ma ka puahiohio; he oiaio, i ka wa a kona hua hekili a pau a me kona makani ino mai ai maluna iho o olua, i mana ole ai ia maluna iho o olua, e kauo iho ia olua ilalo i ke awawa o ka pilikia nui a me ka poino pau ole, no ka pohaku maluna iho ona oukou i kukuluia’i, oia no he kahua oiaio, he kahua ina e kukulu iho na kanaka malua iho ona, aole e hiki lakou ke hina.

13 [m 2, p 16] A oia na olelo a Helamana i ao mai ai i kana mau keiki; he oiaio, ao mai la oia ia laua i na mea he nui i palapala ole ia’i, a me na mea he nui no hoi i palapalaia’i.

14 A hoomanao iho la laua i kana mau olelo; a nolaila, hele ae la laua, e malama ana i na kauoha a ke Akua, e ao aku i ka olelo a ke Akua mawaena o ka poe kanaka a pau o Nepai, e hoomaka ana ma ke kulanakauhale Momona;

15 A mailaila aku i ke kulanakauhale o Gida; a mai ke kulanakauhale o Gida aku i ke kulanakauhale o Muleka;

16 A mai kekahi kulanakauhale aku i kekahi, a pau loa ka poe kanaka o Nepai i ke kaaheleia’ku mawaena e laua, ka poe e noho ana ma ka aina hema; a mai laila aku iloko o ka aina o Zarahemela, mawaena o ko Lamana poe.

17 [m 2, p 17] A eia kekahi, hai aku la laua me ka mana nui, a hoohoka aku la laua i na mea he nui o ua poe ku e la, ka poe i hele aku ai mai ko Nepai poe aku, a hele mai la lakou a hai mai la i ko lakou mau hewa, a ua bapetizoia i ka mihi, a hoi koke mai la i ko Nepai poe, e hoao iho e papani mai la lakou nei i na lawehala a lakou i hana’i.

18 A eia kekahi, hai olelo aku la o Nepai laua me Lehi i ko Lamana poe me ka mana a me ka makaukau nui, no ka mea, he mana a he makaukau ko laua i haawiia mai ai ia laua e hiki ia laua ke olelo: a ua haawiia mai hoi ia laua i ka mea e pono ai no laua ke olelo aku;

19 Nolaila, olelo aku la laua me ke kahaha nui mai o ko Lamana poe, i ka hoomaopopoia’na o lakou, a ua bapetizoia i ka mihi ewalu tausani o ko Lamana poe, ka poe e noho ana ma ka aina o Zarahemela a e kokoke ana a puni, a ua hoomaopopoia no ka hewa o na mooolelo a ko lakou poe kupuna.

20 [m 2, p 18] A eia kekahi, naue aku la o Nepai laua me Lehi mailaila aku e hele i ka aina o Nepai.

21 A eia kekahi, ua hopuia mai laua e kekahi poe koa o ko Lamana, a hahaoia laua iloko o ka halepaahao; he oiaio, iloko o ua halepaahao hookahi la a Amona a me kona poe hoahanau i hahaoia’i e na kauwa a Limai.

22 A mahope iho o ko laua hahaoia’na iloko o ka halepaahao i na la he nui me ka ai ole, aia hoi, hele mai la lakou iloko o ka halepaahao e hopu mai ia laua, i hiki ia lakou ke pepehi mai ia laua a make.

23 A eia kekahi, ua hoopuniia’e la o Nepai laua me Lehi me he mea la e ke ahi, a, aole lakou i aa e kau mai i ko lakou mau lima maluna iho o laua, no ka makau, o wela auanei lakou.Aka hoi, aole o Nepai laua me Lehi i wela; a me he mea la e ku ana laua mawaena konu o ke ahi, a ua wela ole.

24 A ia laua i ika ai ua hoopuniia laua a puni me kekahi kea ahi, a ua wela ole mai ia mea ia laua, hooikaikaia iho la ko laua mau naau.

25 No ka mea, ua ike laua ua aa ole ko Lamana poe e kau mai i ko lakou mau lima maluna iho o laua; aole hoi lakou i aa e hookokoke mai ia laua, aka ku iho la me he mea la ua loohia lakou me ka leo ole me ke kahaha.

26 [m 2, p 19] A eia kekahi, ku iho la o Nepai laua me Lehi, a hoomaka ae la e olelo aku ia lakou, i ka i ana, Mai makau, no ka mea, aia hoi, o ke Akua no ia nana oukou i hoike i keia mea kupanaha, ma ia mea ua hoike aku ia oukou, ua hiki ole ia oukou ke kau mai i ko oukou mau lima maluna iho o maua e pepehi loa mai ia maua.

27 Aia hoi, ia laua i olelo aku ai i ua mau olelo nei, haalulu nui loa iho la ka honua, a haalulu ae la na paia o ka halepaahao, me he mea la e kokoke ana ia mau mea e hiolo iho i ka honua; aka hoi, aole nae ai mau mea i hiolo iho. A, aia hoi, o ka poe iloko o ka halepaahao, no ko Lamana lakou, a me na mea ku e i haalele mai i ko Nepai poe.

28 A eia kekahi, ua uhiia lakou me kahi ao panopano, a hiki ae la ka makau weliweli, a eehia maluna iho o lakou.

29 A eia kekahi, pae mai la kekahi leo me he mea la maluna ae ia o ke ao panopano, i ka i ana, E mihi oukou, e mihi oukou, a mai imi hou e pepehi i ka’u mau kauwa, a’u i hoouna aku ai ia oukou e hai aku i na olelo maikai.

30 [m 2, p 20] A eia kekahi, ia lakou i lohe ai i keia leo, a ike aku la aole ia he leo o ka hekili; aole hoi ia he leo o ka wawa nui; aka hoi, he leo malie ia, o ka oluolu loa, me he mea la he hawanawana ia, a hou iho la ia iloko loa o ka naau.

31 A me ka oluolu o ka leo nae, aia hoi, ua haalulu nui loa ka honua, a naueue hou ae la na paia o ka halepaahao, me he mea la e kokoke ana ia mau mea e hiolo iho i ka honua; a, aia hoi, o ke ao panopano ka mea i uhi iho ia lakou, aole ia i puehu aku.

32 Aia hoi, pae hou mai la ka leo, i ka i ana, E mihi oukou, e mihi oukou, no ka mea, ua kokoke mai ke aupuni o ka lani; a mai imi hou e pepehi i ka’u mau kauwa. A eia kekahi, haalulu hou iho la ka honua, a naueue ae la na paia;

33 A pae hou mai la no hoi ka leo i ke kolu o ka manawa, a olelo mai la i na olelo kupaianaha i hiki ole ke ekemuia’e e kanaka; a naueue hou ae la na paia, a haalulu iho la ka honua me he mea la e kokoke ana ia e kaawale aku.

34 [m 2, p 21] A eia kekahi, ua hiki ole i ko Lamana poe ke holo aku, no ke ao panopano i uhi ai ia lakou; he oiaio, a ua oni ole no hoi lakou, no ka makau i hiki ae ai maluna iho o lakou.

35 Ano, aia kekahi mawaena o lakou he Nepai ma ka hanau ana, no ka ekalesia o ke Akua oia mamua, aka ua ku e a haalelel mai ia lakou.

36 A eia kekahi, huli ae la oia, a aia hoi, ike mai la oia mawaena o ke ao panopano i na maka o Nepai laua me Lehi; a, aia hoi, alohi nui loa laua, e like me na maka o na anela la. A ike mai la oia e leha ana laua i ko laua mau maka i ka lani; a e ku ana laua me he mea la e kamailio aku ana, a e hookiekie ana i ko laua mau leo i kekahi mea a laua i ike aku ai.

37 [m 2, p 22] A eia kekahi, hea ae la ua kanaka nei i na kanaka, e hiki ia lakou ke huli ae a nana. A, aia hoi, ua haawiia’e he mana ia lakou, i huli ae lakou a nana mai la; a ike mai la lakou i na maka o Nepai laua me Lehi.

38 A i ae la lakou i ua kanaka la, Aia hoi, heaha la ke ano o keia mau mea a pau? A owai la ka mea a keia mau kanaka e kamailio pu nei?

39 Ano, o ko ke kanaka inoa o Aminidaba ia. a i aku la o Aminadabe ia lakou, ke kamailio nei laua me na anela o ke Akua.

40 A eia kekahi, i ae la ko Lamana poe ia ia, Heaha ka makou e hana’i, e hooneeia’ku ua ao panopano nei i uhi ole mai ia mea ia makou?

41 A i aku la o Aminadaba ia lakou, E mihi oukou e pono ai, a e hea aku i ka leo, a e loaa ia oukou ka manaoio ia Kristo, ka mea i aoia’ku ia oukou e Alama, a me Amuleka, a me Zezeroma; alaila, e hooneeia’ku ia i uhi ole mai ia oukou.

42 [m 2, p 23] A eia kekahi, hoomaka ae la lakou a pau e hea aku i ka leo o ka mea nana i hoohaalulu mai i ka honua; he oiaio, hea aku la lakou a hiki i ka wa i hoopuehuia’i ke ao panopano.

43 A eia kekahi, ia lakou i alawa ae ai i na maka o lakou a puni, a ike ae la ua hoopuehuia’ku ke ao panopano mailuna aku o lakou, a, aia hoi, ike ae la lakou ua hoopuniia’e a puni, he oiaio, o kela mea keia mea, e kekahi kia ahi.

44 A o Nepai a me Lehi mawaena konu laua o lakou; he oiaio, ua hoopuniia’e a puni; he oiaio, me he mea la lakou mawaena konu o kekahi ahi e lapalapa ana, aole nae ia i hoeha mai ia lakou, aole hoi ia i ai aku i na paia o ka halepaahao; a ua hoopihaia lakou me ia olioli hiki ole ke haiia’ku a piha me ka nani.

45 Aia hoi, iho mai la ka Uhane Hemolele o ke Akua ilalo mai ka lani mai, a komo ae la iloko o na naau o lakou, a ua hoopihaia’e la lakou me he mea la me ke ahi, a ua hiki ia lakou ke olelo aku i na olelo kupanaha.

46 [m 2, p 24] A eia kekahi, pae mai la kekahi leo ia lakou, he oiaio, he leo oluolu me he mea la he hawanawana ia, i ka i ana,

47 He maluhia, he maluhia ia oukou, no ko oukou manaoio i ko’u mea aloha nui ia, a mai ka hookumuia’na mai o ke ao nei ia.

48 Ano ia lakou i lohe ai i keia, leha ae la lakou i ko lakou mau maka, me he mea la e ike aku i kahi a ka leo i pae mai ai; a, aia hoi, ike aku la lakou i na lani hamama; a iho mai la na anela mailoko mai o ka lani, a lawelawe mai la ia lakou.

49 A ua kokoke ekolu haneri paha ka poe i ike a i lohe i ua mau mea nei; a ua kauohaia’e lakou e hele aku a kahaha ole, aole hoi lakou e kanalua.

50 A eia kekahi, hele aku la lakou a lawelawe ae la i na kanaka, e hai aku ana mawaena o na wahi e kokoke ana a puni, i na mea a pau a lakou i lohe ai a i ike ai, a ua hoohuliia ka nui loa o ko Lamana poe e lakou, no ka nui o na mea e hooiaio ana, a lakou i loaa’i;

51 A o ka poe a pau i hoohuliia, waiho iho la lakou ilalo i ko lakou mau mea kaua, a me ko lakou inaina hoi, a me ka mooolelo a ko lakou poe kupuna.

52 A eia kekahi, haawi ae la lakou i ko Nepai poe, i ko lakou mau aina hooilina.

1 [mokuna 2, paukū 25] A eia kekahi, i ka wa i pau ai ka makahiki kanaonokumamalua o ke au o na Lunakanawai, ua hiki keia mau mea a pau, a ua lilo iho la ko Lamana poe, o ka nui o lakou, i poe kanaka pono, a, oi aku la ko lakou pono mamua o ko ko Nepai poe, no ko lakou naueue ole, a me ko lakou onipaa ma ka manaoio.

2 No ka mea hoi, ua nui wale ka poe o ko Nepai i lilo iho i poe paakiki, a i palaka, a i ino loa, a hoomalau mai lakou i ka olelo a ke Akua, a me ka hai olelo ana a me ka wanana ana a pau i hiki mai ai mawaena o lakou.

3 Aka hoi, ua loaa i ko ka ekalesia ka olioli nui, no ka huli ana o ko Lamana poe; he oiaio, no ka ekalesia o ke Akua, i hoonohonohoia’i mawaena o lakou la. A launa ae la lakou kekahi me kekahi, a ua hauoli kekahi me kekahi, a ua nui ka olioli.

4 A eia kekahi, ua nui na mea o ko Lamana poe i iho mai ai ilalo iloko o ka aina o Zarahemela, a hai ae la i ka poe kanaka o ko Nepai i ke ano o ko lakou huli ana, a kauleo ae la hoi ia lakou nei i ka manaoio a me ka mihi;

5 He oiaio, a ua nui na mea i hai aku me ka mana a makaukau, ma ka hoohaahaa ana i na mea he nui o lakou nei ilalo o ka haahaa loa, e lilo ae i poe hahai haahaa i ke Akua a me ke Keikihipa.

6 [m 2, p 26] A eia kekahi, ua nui na mea o ko Lamana poe i hele aku i ka aina akau: a hele aku la no hoi o Nepai laua me Lehi iloko o ka aina akau, e hai olelo aku i na kanaka. A pela i pau ai ka maka hiki kanaonokumamakolu.

7 A, aia hoi, he maluhia ma ka aina a puni, a hele ae la ko Nepai poe iloko o kela wahi keia wahi o ka aina a lakou i makemake ai, ina mawaena o ko Nepai poe a ina paha mawaena o ko Lamana poe.

8 A eia kekahi, hele ae la no hoi ko Lamana poe i kahi a lakou i makemake ai, ina mawaena o ko Lamana poe, a ina paha mawaena o ko Nepai poe; a pela lakou i launa pu me ke keakea ole ia kekahi me kekahi, e kuai mai a e kuai aku, a e loaa ka waiwai, e like me ko lakou makemake.

9 [m 2, p 27] A eia kekahi, lilo iho la lakou i poe waiwai loa, o ko Lamana poe a me ko Nepai poe hoi; a ia lakou ke gula a nui loa, a me ke kala, a me kela ano keia ano o na mea maikai i eliia’i, ma ka aina hema, a ma ka aina akau no hoi.

10 Ano, o ka aina hema ua kapaia’ku ia o Lehi, a o ka aina akau ua kapaia’ku ia o Muleka, oia mamuli o na keiki a Zedekia; no ka mea, kai mai la ka Haku ia Muleka iloko o ka aina akau, a ia Lehi hoi iloko o ka aina hema.

11 A, aia hoi, ma keia mau aina elua ua nui loa ke gula o kela ano keia ano a pau, a o ke kala, a o ka mea maikai i eliia o kela ano keia ano: a he poe kanaka hana akamai no hoi, ka poe i hana i kela ano i keia ano o na mea i eliia, a hoomaemae ae la ia; a pela lakou i lilo ai i poe waiwai.

12 Hooulu ae la lakou i na hua liilii a nui loa, ma ka akau a ma ka hema no hoi; a ulu nui loa ae la lakou ma ka akau a ma ka hema hoi. A hoolaha ae la lakou a mahuahua ikaika loa ma ka aina. A hoolaha ae la lakou i na pua a me na ohana holoholona he nui wale, he oiaio, i na mea kupaluia he nui loa.

13 Aia hoi, hana aku la a wili lope na wahine o lakou, a hana iho la i kela ano keia ano o ka lole, o ka ie wili makalii ia, a me ka lole o kela ano keia ano, e kahiko ai i ko lakou olohelohe. A pela i hala aku ai ka makahiki kanaonokumamaha ma ka maluhia.

14 A ma ka makahiki kanaonokumamalima, ua loaa ia lakou no hoi ka olioli nui a me ka maluhia; he oiaio, ka hai olelo nui ana, a me na wanana he nui wale no na mea e hiki mai ana. A pela i hala aku ai ka makahiki kanaonokumamalima.

15 [m 2, p 28] A eia kekahi, ma ka makahiki kanaonokumamaono o ke au o na Lunakanawai, aia hoi, ua pepehi loa ia o Cezorama e kekahi lima i ike ole ia, me ia i noho ai maluna iho o ka noho hookolokolo. A eia kekahi, ma ia makahiki no, o kana keiki, ka mea i hoonohoia’i e na kanaka ma kona hakahaka, ua pepehi lao ia no hoi. A pela i pau ai ka makahiki kanaonokumamaono.

16 A i ka makamua o ka makahiki kanaonokumamahiku, hoomaka ae la na kanaka e mahuahua hou ma ka hewa loa.

17 No ka mea hoi, ua hoopomaikai loihi mai ka Haku ia lakou me ka waiwai o ko ke ao nei, ua hookonokono ole ia lakou e huhu, e kaua, aole hoi e hookahe aku i ke koko; nolaila, hoomaka ae la lakou e kau aku i ko lakou mau naau maluna iho o ko lakou waiwai; he oiaio, hoomaka ae lakou e imi aku e loaa ka waiwai, i hiki ia lakou ke hookiekieia iluna kekahi maluna ae o kekahi; nolaila, hoomaka ae la lakou e pepehi kanaka malu, a e powa, a e hao wale, i loaa’i ia lakou ka waiwai.

18 Ano hoi, o ua poe pepehi kanaka la a me ka powa he poe lakou i hoohuiia e Kisakumena a em Gadianatona. Ano, eia kekahi, ua nui wale na mea mawaena o ko Nepai poe no ko Gadianatona. Aka hoi, ua nui loa aku ka nui o lakou mawaena o ka hapa hewa loa o ko Lamana poe. A ua kapaia’ku lakou o ko Gadianatona poe powa a pepehi kanaka;

19 A o lakou no ka poe i pepehi ai i ka Lunakanawai Nui o Cezorama, a me kana keiki, oiai ma ka noho hookolokolo; a, aia hoi, aole lakou i loaa.

20 [m 2, p 29] Ano, eia kekahi, i ka wa a ko Lamana poe i ike ai aia he poe powa mawaena o lakou, ua kaumaha nui loa lakou; a hana lakou me ko lakou ikaika a pau, e hoopau loa aku ia lakou la mai ka ili o ka honua aku.

21 Aka hoi, hookonokono ae la o Satana i na naau o ka nui loa o ko Nepai poe, a hui ae la lakou me ua poe powa la, a komo ae la lakou iloko o na berita o lakou la, a me na hoohiki o lakou la, e hoomalu ai e hoopakele ai lakou kekahi i kekahi, i kela wahi pilikia i keia wahi pilikia a lakou e hoonohoia’i, i ole ai lakou e hoopilikiaia no na pepehi kanaka o lakou, a me na powa ana o lakou, a me na aihue ana o lakou.

22 [m 2, p 30] A eia kekahi, ia lakou i hoailona o lakou, he oiaio, na hoailona malu o lakou, a me na olelo malu o lakou; a o keia mea i hiki ai ia lakou ke hoomaopopo he hoahanau ka mea i komo ai iloko o ka berita, i ole ai kona hoahanau e hoopilikiaia no kela hewa keia hewa ana e hana’i, e kona hoahanau, aole hoi e ka poe i huiia’e i kona poe, ka poe i hoohiki i keia berita;

23 A pela ua hiki ia lakou ke pepehi kanaka, a powa, a aihue, a moe kolohe, a hana i kela ano i keia ano o ka hewa, e ku e ana i na kanawai o ko lakou aina, a i na kanawai hoi o ko lakou Akua;

24 A o ka mea o lakou i huiia’e me ko lakou poe, nana e hoike aku i ko ke ao nei no ka lakou mau hewa a me ka lakou mau mea hoopailua, e hookolokoloia oia, aole mamuli o na kanawai o ko lakou aina, aka, mamuli o na kanawai o ko lakou hewa, i haawiia ae ai e Gadianatona a me Kisakumena.

25 Ano hoi, o keia mau hoohiki a mau berita malu, na mea a Alama i kauoha mai ai i kana keiki, i hele ole aku ai i ko ke ao nei, o lilo auanei ia mau mea i kumu e kai iho ai i na kanaka ilalo i ka anai loa ia ana.

26 Ano hoi, aole i hiki aku ua mau hoohiki a mau berita malu la io Gadianatona la mai na mooolelo aku i haawiia’i ia Helamana; aka hoi, ua hahaoia iloko o ka naau o Gadianatona, e kela mea hookahi nana i hoowalewale i ko kakou mau kupuna mua e ai i ka hua i papaia;

27 He oiaio, o ua mea hookahi la nana i kuka pu ai me Kaina, ina e pepehi loa oia i kona kaikaina, ia Abela, aole loa ia mea e ikeia i ko ke ao nei. A kuka pu iho la oia me Kaina a me ka poe hahai ia ia, mai ia manawa mai.

28 A o ua mea hookahi la no hoi ia nana i hahao iloko o na naau o na kanaka, e kukulu iho i halepakui i lawa ke kiekie no lakou e hiki aku ai i ka lani. A o ua mea hookahi la ia nana i alakai i ka poe kanaka, ka poe i hele mai mai ua halepakui la mai iloko o keia aina; ka poe i hoolaha ae i na hana o ka pouli a o ka hoopailua, maluna iho o ka ili a pau o ka aina, a kauo iho la oia i na kanaka ilalo i ka anai loa ia’na, a i kekahi Gehena mau loa;

29 He oiaio, o ua mea hookahi la ia nana i hahao iho iloko o ka naau o Gadianatona, e hoomau i keia manawa i ka hana o ka pouli, a o ka pepehi kanaka malu; a ua hoopuka mai oia ia mea mai ka makamua o kanaka, a hiki wale mai i keia manawa.

30 A, aia hoi, oia no ke kumu o ka hewa a pau loa. A, aia hoi, ke hoomau la oia i kana mau hana o ka pouli a o ka pepehi kanaka malu, a ke haawi ae la i ko lakou mau mea kuka, a me ko lakou mau hoohiki, a me ko lakou mau berita, a me ko lakou mau kumumanao o ka hewa weliweli, mai kekahi hanauna aku i kekahi hanauna, me ia i hiki ai ke loaa ka mana maluna o na naau o na keiki a kanaka.

31 Ano hoi, ua loaa ia ia ka mana nui, maluna iho o na naau o ko Nepai poe; he oiaio, a ua lilo iho la lakou i poe hewa loa; he oiaio, ua kapae ae la ka nui loa o lakou mawaho o ke ala o ka pono, a hahi iho la ilalo o na kapuai o lakou i na kauoha a ke Akua, a huli ae la i ko lakou mau aoao iho, a kukulu iho la no lakou iho i na kii o ko lakou gula a me ko lakou kala.

32 [m 2, p 31] A eia kekahi, hiki mai la keia mau hala a pau ia lakou, ma na makahiki aohe he nui, a, ua hiki mai ka nui loa o ia me a ia lakou ma ka makahiki kanaonokumamahiku o ke au o na Lunakanawai maluna iho o ka poe kanaka o Nepai.

33 A mahuahua ae la lakou ma na hala o lakou, ma ka makahiki kanaonokumamawalu no hoi, ke kaumaha nui a me ka uwe ana o ka poe pono.

34 A pela kakou i ike ai ua hoomaka ko Nepai poe e emi iho iloko o ka hoomaloka, a e mahuahua ma na mea ino a me na mea hoopailua, oiai ko Lamana poe i hoomaka ai e mahuahua nui loa ma ka ike i ko lakou Akua; he oiaio, hoomaka ae la lakou e malama i kana mau olelo kupaa a mau kauoha, a e hele ma ka oiaio a pololei imua ona.

35 A pela kakou i ike ai ua hoomaka ka Uhane o ka Haku e haalele ae i ko Nepai poe, no ka hewa a me ka paakiki o ko lakou mau naau.

36 A pela kakou i ike ai ua hoomaka ka Haku e ninini mai i kona Uhane maluna iho o ko Lamana poe, no ko lakou oluolu a makemake e manaoio i kana olelo.

37 [m 2, p 32] A eia kekahi, imi ae la ko Lamana poe i ka poe powa o Gadianatona: a hai aku la lakou i ka olelo a ke Akua mawaena o ka poe hewa loa o lakou, a ua hoopau loa ia ua poe powa nei maiwaena aku o ko Lamana poe.

38 A eia kekahi, kukulu paa iho la ko Nepai poe ia lakou la a kokua ia lakou, e hoomaka ana ma ka poe hewa loa o lakou, a hiki i ka wa i uhi ai lakou i ka aina a pau o ko Nepai poe, a i hoowalewale ai i ka nui loa o ka poe pono, a iho ae la lakou e manaoio i ka lakou mau hana, a e loaa ko lakou waiwai pio, a e hui pu me lakou ma ko lakou mau pepehi kanaka malu a me ka hui pu ana.

39 A pela lakou i loaa’i ka hooponopono ana a pau o ke aupuni, a no ia mea, hahi iho la lakou malalo o na kapuai o lakou, a papai ae, a haehae, a huli ae la i na kua o lakou i ka poe hune, a me ka poe akahai, a me ka poe haahaa e hahi ana i ke Akua.

40 A pela kakou i ike ai ma ka noho weliweli ana lakou, a e oo ana no ka luku mau loa.

41 A eia kekahi, pela i pau ai ka makahiki kanaonokumamawalu o ke au o na Lunakanawai maluna iho o ka poe kanaka o Nepai.

Ka Wanana a Nepai, ke keiki a Helamana – Ka olelo hooweliweli a ke Akua i ka poe kanaka o Nepai, nana e hoopaio mai ia lakou ma kona huhu, i ka anai loa ia ana o lakou, ke ole lakou e mihi i ko lakou hewa. No ka hahau ana o ke Akua i ka poe kanaka o Nepai me ke ahulau; mihi iho la lakou a huli ia ia. O Samuela, he Lamana, wanana mai la oia, i ko Nepai poe.

1 [mokuna 3, paukū 1] Ala hoi kekahi, ma ka makahiki kanaonokumamaiwa o ke au o na Lunakanawai maluna iho o ka poe kanaka o Nepai, hoi mai la o Nepai, ke keiki a Helamana, i ka aina o Zarahemela, mai ka aina akau mai:

2 No ka mea, ua kaahele ae la oia mawaena o na kanaka e noho ana ma ka aina akau, a hai aku la i ka olelo a ke Akua ia lakou, a wanana aku la i na mea he nui ia lakou;

3 A hoomalau mai la lakou i kana mau olelo a pau, a hiki ole ia ia ke noho mawaena o lakou, aka, hoi hou mai la oia i kona aina i hanau ai;

4 A e ike ana i na kanaka ma ka noho hewa weliweli ana, a i kela poe poea Gadianatona e noho ana ma na noho hookolokolo; ua lalau wale ka mana a me ka noho luna ana ma ka aina; e waiho ana i na kauoha a ke Akua, a, aole pololei iki imua ona: e hoopono ole ana i na keiki a kanaka;

5 E hoohewa ana i ka poe pono no ko lakou pono; e hookuu ana i ka poe hewa a me ka poe hihia me ka hoopai ole, no ko lakou kala; a menei hou, e hoomauia ma ka oihana ma ke poo o ke aupuni, e noho alii ai a e hana ai e like me ko lakou mau makemake, e hiki ia lakou ke loaa ka waiwai a me ka hanohano o ko ke ao nei; a eia hoi, e hiki ia lakou me ka oluolu loa ke moe kolohe, a aihue, a pepehi a make loa, a hana e like me ko lakou makemake iho.

6 Ano, ua hiki mai keia ino nui maluna iho o ko Nepai poe, ma na makahiki aohe he nui; a ia Nepai i ike ai ia, ua hu ae la kona naau me ke kaumaha maloko o kona opu; a pane aku la oia i ka ehaeha o kona naau,

7 Ina ua hiki ia’u ke loaa ko’u mau la, ma na la a ko’u kupunakane o Nepai i hele mau mai ai mailoko mai o ka aina o Ierusalema, ina ua hiki ia’u ke olioli pu me ia ma ka aina i olelo mua ia’i; ia wa ua oluolu kona poe kanaka e noiia’ku, a onipaa e malama i na kauoha a ke Akua, a lohi e alakaiia’ku e hana hewa; a ua wikiwiki e hoolohe mai i na olelo a ka Haku;

8 He oiaio, ina o ko’u mau la kekahi ma ia mau la, alaila, ua olioli ko’u uhane ma ka pono o ko’u poe hoahanau.

9 Aka hoi, ua hookuuia mai au o keia mau la no ko’u, a e hoopihaia mai ko’u naau me ke kaumaha, no ka hewa nei o ko’u poe hoahanau.

10 Aia hoi, maluna ae o kekahi hale kiai ia, ma ka aina o Nepai, ma ke alaloa e hele ai i kahi kuai nui, ma ke kulanakauhale o Zarahemela; nolaila, ua kulou o Nepai ia ia iho maluna ae o ka hale kiai ma kona kihapai, a ua kokoke no hoi ua hale kiai nei i ka puka kihapai e hele ai ma ke alaloa.

11 [m 3, p 2] A eia kekahi, e maalo ana kekahi mau kanaka, a ike ae la lakou ia Nepai, me ia e ninini ana i kona uhane i ke Akua maluna ae o ka hale kiai, a holo aku la lakou a hai ae la i na kanaka i ka mea a lakou i ike ai, a houluulu paapu mai la na kanaka, e hiki ia lakou ke ike i ke kumu o ka uwe nui ana me neia noka hewa o na kanaka.

12 Ano, ia Nepai i ala ai ike aku la oia i ka lehulehu o na kanaka i houluuluia mai.

13 A eia kekahi, oaka ae la oia i kona waha, a i aku la ia lakou, Aia hoi, no ke aha la oukou i houluulu mai ai ia oukou iho? Na’u anei e hai aku ia oukou no ko oukou mau hewa?

14 He oiaio, no ko’u pii ana maluna ae o ko’u hale kiai, i hiki ia’u ke ninini aku i ko’u uhane i kuu Akua, no ke kaumaha nui loa o ko’u naau, a no ko oukou mau hewa ia?

15 A no ko’u uwe ana a kanikau ana, ua houluulu mai oukou ia oukou iho, a ke kahaha nei; he oiaio, a he kumu nui ko oukou e kahaha ai; he oiaio, a he mea e pono ai no oukou e kahaha, no ko oukou haawiia ana’ku, i loaai’ i ka diabolo ka mana nui maluna iho o ko oukou mau naau;

16 He oiaio, phehea la i hiki ai ia oukou ke ae aku i ka hoowalewale ana o ka mea nana e imi nei e hoolei aku i ko oukou poe uhane ilalo, i ka popilikia mau loa a me ka poino pau ole;

17 E, e mihi oukou, e mihi oukou! No ke aha la oukou e make ai? E huli mai oukou, e huli mai oukou, i ka Haku ko oukou Akua. No ke aha la oia i haalele ai ia oukou?

18 No ko oukou hoopaakiki ana i ko oukou mau naau ia; he oiaio, aole oukou i hoolohe mai i ka leo o ke kahuhipa maikai; he oiaio, ua hoonaukiuki oukou ia ia e huhu ku e ia oukou.

19 A, aia hoi, ma kahi o ka houluulu ana ia oukou, ke ole oukou e mihi, aia hoi, e hoopuehu aku auanei oia ia oukou, i lilo ai auanei oukou i ai na na ilio a me na holoholona hihiu.

20 E! pehea la oukou i hiki ai ke hoopoina iho i ko oukou Akua i kela la hookahi ana i hoopakele mai ai ia oukou?

21 Aka hoi, e loaa ka waiwai ia mea, e mahaloia e na kanaka; he oiaio, a i hiki ia oukou ke loaa ke gula a me ke kala. Aua kau aku oukou i ko oukou mau naau maluna iho o ka waiwai a me na mea lapuwale o ko ke ao nei, no keia mau mea ke pepehi kanaka nei oukou, a powa, a aihue, a hoike wahahee e hewa ai i ko oukou hoalauna, a hana aku i kela ano i keia ano o ka hewa;

22 A no ka mea e hele mai auanei ka poino maluna iho o oukou, ke ole oukou e mihi. No ka mea, ina aole oukou e mihi, aia hoi, o keia kulanakauhale, a me kela mau kulanakauhale nui a pau no hoi, a puni, ma ka aina o ko kakou hooilina, e laweia’ku, i ole ai auanei he kuleana oukou iloko o ia mau wahi, no ka mea, aole ka Haku e haawi ae ia oukou i ka ikaika, me ia i hana’i mamua aku nei, e ku paa imua o ko oukou poe enemi.

23 No ka mea, penei wahi a ka Haku, Aole au e hoike aku i ka poe hewa i ko’u ikaika, i kekahi mamua o kekahi, koe wale no ka poe e mihi ana i ko lakou mau hewa, a hoolohe mai i ka’u mau olelo; ano hoi, ke makemake nei au e ike oukou, e o’u poe hoahanau, e aho no auanei ko Lamana poe mamua o oukou, ke ole oukou e mihi;

24 No ka mea hoi, ua nui loa aku ko lakou pono mamua o ko oukou; no ka mea, aole lakou i lawehala me ke ku e aku i kela ike nui a oukou i loaa’i; nolaila, e aloha auanei ka Haku ia lakou; he oiaio, e hooloihi ai oia i ko lakou mau la a e hoomahuahua ae i ka lakou poe hua, oia, ia oe e hoopau loa ia’i, ke ole oe e mihi;

25 He oiaio, auwe oukou no kela mea hoopailua i hiki mai ai mawaena o oukou; a ua hoopili aku oukou ia oukou iho ia mea, he oiaio, i kela poe malu i hoonohonohoia’i e Gadianatona;

26 He oiaio, e hiki mai auanei ka poino ia oukou, no ia haaheo a oukou i ae aku ai e komo ae iloko o ko oukou mau naau, o ka mea ia i hookiekie ae ai ia oukou maluna ae o ka mea ku pono no ko oukou waiwai nui loa;

28 A ke ole oukou e mihi, e make auanei oukou; he oiaio, e laweia’ku ko oukou mau aina, mai o oukou aku, a e anai loa ia’e oukou mai ka ili o ka honua aku.

29 Aia hoi, aole au i olelo aku e hiki mai auanei keia mau mea, ma o’u iho, no ka mea, aole ma o’u iho a’u i ike ai i keia mau mea; aka hoi, ua ike au he oiaio keia mau mea, no ka mea, ua hoike mai ka Haku ke Akua ia mau mea ia’u; nolaila, ke hoike aku nei au e hiki mau auanei ia mau mea.

1 [mokuna 3, paukū 3] Ano eia kekahi, ia Nepai i olelo aku ai i keia mau olelo, aia hoi kekahi poe he mau lunakanawai, no ka poe hana malu hoi o Gadianatona, a ua huhu lakou, a hea aku lakou me ke ku e ia ia, i ka i ana i na kanaka, No ke aha la oukou e lalau ole nei i keia kanaka a kai mai ia ia, i hoohewaia’ku ai oia e like me ka hewa ana i hana’i.

2 No ke aha la oukou e ike nei i keia kanaka, a e lohe nei ia ia e hoino mai ana i keia poe kanaka, a i ko kakou kanawai?

3 No ka mea, aia hoi, ua olelo aku o Nepai ia lakou no ka ino o ko lakou kanawai; he oiaio, ua nui na mea a Nepai i olelo aku ai i hiki ole ai ke palapalaia iho; a, aohe oia i olelo kekahi mea e ku e ana i na kauoha a ke Akua.

4 A ua huhu ua poe lunakanawai la ia ia no kana olelo maopopo ana ia lakou no ka lakou mau hana malu o ka pouli; aole nae lakou i aa e kau mai i ko lakou mau lima iho maluna ona; no ka mea, ua makau lakou i na kanaka, o kahea auanei lakou nei me ke ku e ia lakou la;

5 Nolaila, kahea ae la lakou i na kanaka, i ka i ana, No ke aha la oukou e ae aku nei i keia kanaka e hoino mai ia kakou? No ka mea, aia hoi; ke hoohewa mai nei oia i keia poe kanaka a pau, i ka anai loa ia ana; he oiaio, a e laweia auanei keia mau kulanakauhale nui o kakou mai o kakou aku, i ole ai o kakou kuleana iloko o ia mau wahi.

6 Ano, ke ike nei kakou he mea hiki ole loa keia; no ka mea, ua mana kakou, a he mau kulanakauhale nui ko kakou; nolaila, aole e hiki i ko kakou poe enemi ke loaa ka mana maluna iho o kakou.

7 [m 3, p 4] A eia kekahi, pela lakou i hookonokono ai i na kanaka e huhu mai ia Nepai, a hoala’i i na paio mawaena o lakou; no ka mea, aia kekahi poe e hea ana, E waiho wale i keia kanaka, no ka mea, he kanaka pono ia, a e hiki io mai auanei kela mau mea ana i olelo mai ai, ke ole kakou e mihi;

8 He oiaio, aia hoi e hiki mai auanei na hoopai a pau maluna iho o kakou ana i hoike mai ai ia kakou; no ka mea, ua ike makou ua hoike pololei mai oia ia kakou no ko kakou mau hala. A, aia hoi, he nui ia mau mea; a ke ike nei oia i na mea a pau e loohia mai auanei ia kakou, me ia i ike ai no ko kakou mau hala;

9 He oiaio, a aia hoi, ina aole oia he kaula ina ua hiki ole ia ia ke hoike mai no kela mau mea.

10 A eia kekahi, o kela poe kanaka, ka poe i imi iho e pepehi mai ia Nepai, ua koiia’ku no ko lakou makau, i kau ole mai ai lakou i ko lakou mau lima maluna iho ona. Nolaila, hoomaka hou oia e olelo aku ia lakou, e ike ana ua loaa ia ia ka oluolu ma na maka o kekahi poe, a no ia mea, makau iho lake koena o lakou.

11 Nolaila, ua koiia oia e olelo hou aku ia lakou, i ka i ana, Aia hoi, e ko’u poe hoahanau, aole anei oukou i heluhelu ua haawi mai la ke Akua i ka mana i kekahi kanaka, ia Mose, e hahau maluna o na wai o ke Kaiula, a kaawale ae la ia mau mea i o a i o , a hele mai la ka Iseraela, o lakou no ko kakou poe kupuna, mawaena ma ka aina maloo, a popoi ae la na wai maluna iho o na puali o ko Aigupita, a ale iho la ia lakou?

12 [m 3, p 5] Ano hoi, ina i haawi mai ke Akua i ua kanaka nei i ka mana me neia, alaila, no ke aha la oukou e hoopaapaa mei mawaena o oukou iho, a i ae aole oia i haawi mai ia’u i ka mana i ike ai au no na hoopai e hiki mai ana maluna iho o oukou ke ole oukou e mihi?

13 Aka hoi, aole o ka’u mau olelo wale no ka oukou e hoole nei, aka ke hoole mai nei no hoi oukou i na olelo a pau i oleloia’i e ko kakou poe kupuna, a me na olelo no hoi i oleloia mai ai e ua kanaka nei, o Mose, ka mea nona ka mana nui i haawiia mai ai ia ia; he oiaio, i na olelo ana i olelo mai ai no ka hiki ana mai o ka Mesia.

14 He oiaio, aole anei oia i hoike mai e hele ma i auanei ke Keiki a ka Akua? A me ia i kau ai iluna i ka nahesa keleawe ma ka waonahele, pela no auanei e kaulia’i i luna ka mea e hele mai ana.

15 A o ka poe a pau i nana aku ai i ua nahesa la e ola no lakou, pela no hoi o ka poe a pau e nana aku ana i ke Keiki a ke Akua, me ka manaoio, a me ka uhane mihi, e hiki ke ola, oia, a hiki aku i kela ola e mau loa aku ana.

16 [m 3, p 6] Ano hoi, aole o Mose wale no ka i hoike mai no keia mau mea, aka o na kaula hemolele a pau, mai kona mau la a hiki aku i na la o Aberahama.

17 He oiaio, ike ae la o Aberahama no kona hiki ana mai, a ua hoopihaia me ka olioli, a hauoli iho la.

18 He oiaio, a ke i aku nei au ia oukou, aole o Aberahama wale no ka i ike no ua mau mea nei, aka, ua nui na mea mamua aku o na la o Aberahama i kaheaia e ka aoao o ke Akua; He oiaio, mamuli o ka aoao o kana Keiki; a o keia i hoikeia mai ai ia mea i na kanaka, i na tausani makahiki he nui mamua o kona hiki ana mai, i hiki mai ai ka hoolapanai ana hoi ia lakou.

19 Ano, ke makemake nei au e ike oukou, ua nui na kaula mahope mai o na la o Aberahama, i hoike mai ai no ua mau mea nei; he oiaio, aia hoi, hoike wiwo ole mai ke kaula Zenosa; a no ia mea ua pepehiia oia a make.

20 A o Zenoka hoi, a o Ezaiasa no hoi, a o Isaia no hoi, a me Ieremia, (o Ieremia oia no ua kaula la nana i hoike mai no ka anai ia ana o Ierusalema.) Ano, ke ike nei kakou ua anaiia o Ierusalema e like me na olelo a Ieremia. No ia mea, ea, no ke aha la e hele ole mai ai ke Keiki a ke Akua, e like me kana wanana?

21 Ano, e hoole anei oukou i ka anaiia’na o Ierusalema? E olelo mai anei oukou aole i pepehiia na keikikane a Zedekia, o lakou a pau, koe o Muleka wale no? He oiaio, aole anei oukou i ike aia no na hua a Zedekia pu me kakou, a ua kipakuia mai, mailoko mai o ka aina o Ierusalema? Aka hoi, aole o keia wale no.

22 Ua kipakuia mai ko kakou kupunakane o Lehi mailoko mai o Ierusalema, no kona hoike ana no ua mau mea nei. O Nepai hoi kekahi nana i hoike mai no ua mau mea nei, a aneane ko kakou poe kupuna a pau hoi, a hiki loa i keia manawa; he oiaio, ua hoike lakou no ka hiki ana mai o Kristo, a ua nana imua, a ua hauoli ma kona la e hiki mai ana.

23 A aia hoi, o ke Akua no ia, a oia pu kekahi me lakou, a ua hoike mai oia ia ia iho ia lakou, i hoolapanaiia’i lakou e ia; a hoonani aku la lakou ia ia, no ka mea e hiki mai ana.

24 Ano, i ko oukou ike ana i keia mau mea, a hiki ole ke hoole mai ia mau mea, ke ole wahahee oukou, nolaila, ma keia mea ua hana hewa oukou, no ka mea, ua hoomalau oukou i keia mau mea a pau, me na mea hoike he nui loa nae a oukou i loaa’i; he oiaio, ua loaa ia oukou na mea a pau, na mea ma ka lani, a me na mea a pau ma ka honua nei no hoi, me he hoike la kela mau mea he oiaio.

25 Aka hoi, ua hoomalau mai oukou i ka oiaio, a kipi mai la i ko oukou Akua hemolele; a i keia manawa hoi, ma haki o ka hoahu ana no oukou iho ka waiwai ma ka lani, kahi e popo ole ai kekahi mea, kahi e komo ole ai kekahi mea pelapela, e hoahu ana oukou no oukou iho i ka inaina no ka la hookolokolo;

26 He oiaio, i keia manawa hoi e oo ana oukou, no ko oukou mau pepehi kanaka ana, a me ko oukou moe kolohe a hana ino, no ka make mau loa; he oiaio, a ke ole oukou e mihi, e hele koke mai ia ia oukou;

27 He oiaio, aia hoi ia ma ko oukou mau puka komo ano; he oiaio, e hele aku oukou i ka noho hookolokolo, a e imi; aia hoi, ua pepehi loa ia ko oukou Lunakanawai, a ke moe la oia ma kona koko; a ua pepehiia’e oia e kona kaikaina, ka mea e imi ana e noho ma ka noho hookolokolo.

28 A, aia hoi, no ko oukou poe hui malu laua a elua, o ko lakou mea nana i hookumu oia o Gadianatona, a me ka mea ino hookahi e imi nei e make na uhane o na kanaka.

1 [mokuna 3, paukū 7] Eia hoi kekahi, i ka wa a Nepai i olelo aku ai i keia mau olelo, holo ae la kekahi poe kanaka e ku ana mawaena o lakou i ka noho hookolokolo; he oiaio, he mau mea elima ka i hele; a i ae la lakou mawaena o lakou iho, me lakou i holo ai,

2 Aia hoi, e ike oiaio kakou ano, ina he kaula keia kanaka, a ua kauoha ae ke Akua ia ia e wanana mai i na mea kupanaha me neia ia kakou. Aole kakou i manaoio ua kauoha mai oia peia; he oiaio, aole kakou i manaoio he kaula ia; aka hoi, ina he oiaio keia mea ana i i mai ai no ka Lunakanawai Nui, ua make oia, alaila e manaoio kakou he oiaio na olelo e ae, ana i olelo mai ai.

3 A eia kekahi, holo ae la lakou ma ko lakou ikaika, a komo ae la iloko i ka noho hookolokolo; a, aia hoi, ua haule iho la ka Lunakanawai Nui i ka honua, a moe iho la ia iloko o kona koko.

4 Ano hoi, ia lakou i ike ai i keia, ua pihoihoi noi loa lakou, a hina iho la i ka honua; no ka mea, ua manaoio ole lakou i na olelo a Nepai i olelo aku ai, no ka Lunakanawai Nui;

5 Aka, ano ia lakou i ike ai manaoio iho la lakou, a hiki mai ka eehia maluna iho o lakou, o hiki mai auanei na hoopai a pau a Nepai i olelo aku ai, maluna iho o na kanaka; nolaila, haalulu ae la lakou, a ua hina iho i ka honua.

6 Ano, emo ole i ka wa o ka Lunakanawai Nui i pepehiia’i; ua houia e kona kaikaina, ma kekahi kapa malu; a mahuka ae la oia, a holo ae la na kauwa, a hai aku la i na kanaka, e hooho ana i ka leo pepehi kanaka mawaena o lakou.

7 Aia hoi, hoakoakoa ae la na kanaka ia lakou iho i kahi o ka noho hookolokolo; a, aia hoi, me ka pihoihoi nui o lakou ike aku la lakou i ua mau kanaka la elima i hina i ka honua.

8 Ano hoi, ua ike ole na kanaka no ka akoakoa paapu ana o na kanaka ma ke kihapai o Nepai; nolaila, i ae la lakou mawaena o lakou iho, o lakou nei no ka poe i pepehi iho ai i ka Lunakanawai, a ua hahau mai ke Akua ia lakou, i hiki ole ai ia lakou ke mahuka aku mai o kakou aku.

9 [m 3, p 8] A eia kekahi, lalau iho la lakou ia lakou la, a hikii ia lakou la, a hahao aku la ia lakou iloko o ka halepaahao. A ua hoounaia’ku kekahi olelo hoolaha, a puni, ua pepehiia ka Lunakanawai, a ua hopuia na mea pepehi, a ua hahaoia iloko o ka halepaahao.

10 A eia kekahi ia la ae, hoakoakoa ae la na kanaka ia lakou iho e uwe a e hooke ai, ma ka hoolewa ana o ka Lunakanawai Nui, ka mea i pepehiia’i.

11 A pela no hoi ua poe lunakanawai la ka poe i ku ma ke kihapai o Nepai, a lohe i kana mau olelo, i hoakoakoaia’i no hoi ma ke kanu ana.

12 [m 3, p 9] A eia kekahi, ninaninau ae la lakou mawaena o na kanaka, i ka i ana, Ai la ihea ua mau mea la elima i hoounaia mai ai e ninau aku no ka Lunakanawai Nui ina paha ua make oia? A pane aku la lakou a i aku la, No keia mau mea elima a oukou e olelo mai nei na oukou i hoouna, aole makou i ike; aka, aia no elime lakou ka poe pepehi kanaka, ua hahaoia e makou iloko o ka halepaahao.

13 A noi ae la na lunakanawai e kaiia mai lakou; a ua kaiiia mai lakou, a, aia hoi, o lakou no na mea elima i hoounaia’ku: aia hoi, ninaninau ae la na lunakanawai ia lakou e ike no ia hana, a hai aku la lakou ia lakou la i na mea a pau a lakou i hana’i, i ka i ana,

14 Holo aku la makou a hiki i kahi hookolokolo, a ia makou i ike ai i na mea a pau, ma ka Nepai i hoike mai ai, ua pihoihoi makou, a hina iho la makou i ka honua; a ia makou i pohala ae ai i ko makou pihoihoi, aia hoi hahao mai lakou nei ia makou iloko o ka halepaahao.

15 Ano, no ka pepehiia’na o ua kanaka nei, aole makou i ike i ka mea nana ia i hana, a o keia wale no ka makou i ike, holo aku la makou a hiki e like me ko oukou makemake, a, aia ua make ka oia e like me na olelo a Nepai.

16 [m 3, p 10] Ano eia kekahi, wehewehe ae la na lunakanawaii ka mea i na kanaka, a hea ae la me ke ku e ia Nepai, i ka i ana, Aia hoi, ua ike makou ua ae like o ua Nepai nei me kekahi mea e pepehi ai i ka Lunakanawai, alaila, i hiki ia ia ke hai mai ia mea ia makou, e hiki ia ia ke hoohuli mai ia makou i kona manaoio, e hiki ia ia ke hookiekie ae ia ia iho i kanaka nui, waeia e ke Akua, a he kaula hoi;

17 Ano hoi, e huai ae makou i ke ano a ua kanaka nei, a nana e hai mai i kona hewa a e hoike mai ia makou i ka mea nana i pepehi i ua Lunakanawai nei.

18 A eia kekahi, ua hookuuia ua mau mea la elima ma ka la o kona kanuia’na. Aka hoi, papa aku la lakou i na lunakanawai ma na olelo a lakou l i olelo ku e mai ai ia Nepai, a hoopaapaa ae la me kela mea keia mea o lakou, a hoohoka aku la lakou ia lakou la.

19 Kena ae la nae lakou la e hopuia o Nepai, a hikiiia mai la a kaiia aku imua o na kanaka, a hoomaka lakou e niele mai ia ia ma na ano he nui, e hiki ia lakou ke hoohihia ma ia ia, e hiki ia lakou ke hoohewa mai ia ia e make:

20 I ka i ana ia ia, Ua hui pu oe; owai la keia kanaka nana i hana mai i keia pepehi ana? Ano, e hai mai oe ia makou, a e hoopuka mai i kou hewa, i ka i ana hoi, Ea, eia no ke kala; a e hookuu ola no hoi makou ia oe ina e hai mai oe ia makou, a e hoopuka mai i ke kuikahi au i hana’i me ia.

21 [m 3, p 11] Aka, i aku la o Nepai ia lakou, E na mea naaupo, ka poe i okipoepoe ole ia o ka naau, ka poe makapo, a poe kanaka ai oolea hoi, ke ike nei anei oukou i ka loihi o ka hookuu ana o ka Haku ko oukou Akua ia oukou, e hele ma ko oukou aoao hewa nei?

22 E, ko oukou mea e pono ai e hoomaka e aoa a e uwe, no ka luku nui e kali nei i keia manawa ia oukou, ke ole oukou e mihi.

23 Aia hoi, ke i mai nei oukou ua kuikahi au me kekahi kanaka, nana e pepehi aku ia Seezorama, i ko kakou Lunakanawai Nui. Aka hoi, ke i aku nei au ia oukou, ua oleloia keia no ko’u hoike ana ia oukou, e hiki ia oukou ke ike no keia mea; ho oiaio, i mea hoike ia oukou, ua ike au no na hewa a me na mea hoopailua mawaena o oukou.

24 A no kuu hana ana i keia, ke i mai nei oukou ua kuikahi au me kekahi kanaka nana e hana i keia mea; he oiaio, no ko’u hoike aku ia oukou i keia hoailona, ua huhu oukou ia’u, a ke imi nei e hoopau mai i kuu ola.

25 Ano hoi, e hoike aku no au i kekahi hoailona hou, a e ike ina paha ma keia mea hoi, oukou e imi ai e hoopau mai ia’u.

26 Aia hoi, ke i aku nei au ia oukou, e hele oukou i ka hale o Seanatuma, oia no ke kaikaina o Seezeroma, a e i aku ia ia,

27 Ua kuikahi anei o Nepai, ka mea e kaena ana me he kaula la, ka mea nana e wanana nei i ka ino nui no keia lahuikanaka, me oe, a ma ia mea ua pepehi olua ia Seezeroma, oia no kou kaikuaana?

30 A e ku malie oia me ka makau, a e ike ole i ka mea e olelo mai. A, aia hoi e hoole mai oia ia oukou; a e hana oia me he mea la ua kahaha oia; aka, e hai mai nae oia ia oukou ua hala ole oia.

31 Aka hoi, na oukou e huli aku ia ia, a e loaa ia oukou ke koko ma na kihi o kona koloka.

32 A ia oukou e ike ai i keia, na oukou e i aku, No hea mai keia koko? Aole anei makou i ike o keia no ke koko o kou kaikuaana?

33 Alaila e haalulu oia, a e mae kona maka, me he mea la ua hiki ae ka make maluna iho ona.

34 Alaila, na oukou e i aku, No keia makau a me keia mae i hiki mai ai maluna o kou maka, aia hoi, ke ike nei makou ua hewa oe.

35 Alaila e hiki ae ka makau nui ae maluna iho ona; alaila e hai mai oia ia oukou, aole hoi e hoole hou aku ua hana oia i keia pepehi ana.

36 Alaila e i mai oia ia oukou, ua ike ole wau nei la, o Nepai, no ia mea, ke ole haawiia mai ia ia’u e ka mana o ke Akua. Alaila, e ike oukou he kanaka pono wau, a ua hoounaia mai au ia oukou mai ke Akua mai.

37 [m 3, p 12] A eia kekahi, hele lakou a hana aku la, e like me ka Nepai i i aku ai ia lakou. A, aia hoi, o na olelo ana i i aku ai, ua oiaio; no ka mea, e like me na olelo, hoole mai la oia; a e like me na olelo, hooia mai la oia.

38 A kaiia oia e hooiaio mai o ka mea pepehi io no oia, a ua hookuuia’e na mea elima; a o Nepai no hoi.

39 A aia no kekahi poe o ko Nepai i manaoio ae i na olelo a Nepai; a aia no kekahi poe no hoi i manaoio ae, no ka hoike o na mea elima, no ka mea, ua hoohuliia lakou oiaia lakou ma ka halepaahao.

41 A aia kekahi poe e olelo ana, Aia hoi, he akua no oia, no ka mea, ina aole oia he akua, ina ua hiki ole ia ia ke ike i na mea a pau. No ka mea hoi, ua hai mai oia i na manao o ko kakou mau naau, a ua hai mai no hoi i na mea ia kakou; a ua hoike mai no hoi oia ia kakou i ka mea nana i pepehi maoli i ko kakou Lunakanawai Nui.

1 [mokuna 3, paukū 13] A eia kekahi, hoomaka ae la ka mokuahana mawaena o na kanaka, a kaawale ae la lakou i o a i o, a hele ae la i ko lakou mau ala, e haalele ana ia Nepai oia wale no, me ia e ku ana maweana konu o lakou.

2 A eia kekahi, hele aku la o Nepai i kona hale iho, e noonoo ana i na mea a ka Haku i hoike mai ai ia ia.

3 A eia kekahi, me ia e noonoo ana pela,—ua hoopoho nui ia ka manao no ka hewa o ka poe kanaka o ko Nepai, a me ka lakou mau hana malu o ka pouli, a me ko lakou mau pepehi kanaka ana, a mau powa ana, a i kela ano keia ano o na hala—a eia kekahi, me ia e noonoo ana pela ma kona naau, aia hoi, pae mai la kekahi leo ia ia, i ka i ana,

4 Pomiakai oe, e Nepai, no kela mau mea au i hana’i; no ka mea, ua ike au ua hai aku oe me ka molowa ole i ka olelo a’u i haawi aku ai ia oe, i keia lahuikanaka. A ua makau ole oe ia lakou, a ua imi ole oe i kou ola iho, aka ua imi mai i ko’u makemake, a e malama mai i ka’u mau kauoha.

5 Ano, no kau hana i keia me ka molowa ole loa, aia hoi, e hoopomaikai aku au ia oe no ka wa pau loe; a e hoolilo aku au ia oe i ikaika ma ka olelo a ma ka hana, ma ka manaoio a ma na hana; he oiaio, e hanaia auanei na mea a pau ia oe e like me kau olelo, no ka mea, aole oe e noi mai i ka mea e ku e ana i ko’u makemake.

6 Aia hoi, ooe no o Nepai, a owau no ke Akua. Aia hoi, ke hai aku nei au ia oe imua o ko’u poe anela, he mana auanei kou maluna iho o keia lahuikanaka, a e hahau iho auanei i ka honua me ka wi, a me ka mai ahulau, a me ka luku, e like me ka hewa o keia lahuikanaka.

7 Aia hoi, ke haawi aku nei au ia oe i ka mana, a o ka mea au a sila ai ma ka honua, e silaia hoi oia ma ka lani: a o ka mea au e hookuu ai ma ka honua, e hookuuia hoi ioa ma ka lani; a pela kou mana mawaena o keia lahuikanaka.

8 A pela hoi, ina e olelo ae oe i keia luakini, E nahae ia mawaena, e hanaia auanei ia.

9 A ina e olelo ae oe i keia mauna, E hoohioloia oe a e lilo i laumania, e hanaia auanei ia.

10 Aia hoi, ina e olelo ae oe, Na ke Akua keia lahuikanaka e hahau mai, e hiki io mai auanei ia.

11 Ano hoi, ke kauoha aku nei au ia oe nau e hele aku a e hai aku i keia lahuikanaka, Penei wahi a ka Haku ke Akua, oia no ka Mea Mana loa, ina aole oukou e mihi, e hahauia oukou, a hiki i ka luku loa ia’na.

12 [m 3, p 14] Eia hoi kekahi, i ka wa a ka Haku i olelo mai ai i keia mau olelo ia Nepai. ku iho la oia, aole oia i hoi aku i kona hale iho, aka hoi hou ae la oia i na poe kanaka i hele liilii a puni ma ka ili o ka aina, a hoomaka ae la e hai aku ia lakou i ka olelo a ka Haku, i olelo e ia mai ai ia ia no ko lakou luku ia ana, ina aole lakou e mihi.

13 Ano hoi, me ua hana mana nui la pu a Nepai i hana’i i ka hai ana aku ia lakou no ka make o ka Lunakanawai Nui, hoopaakiki iho la nae lakou i ko lakou mau naau, a hoolohe ole mai i na olelo a ka Haku:

14 Nolaila, hai aku la o Nepai ia lakou i ka olelo a ka Haku, i ka i ana, Ina aole oukou e mihi, penei wahi a ka Haku, e hahauia oukou a hiki i ka luku loa ia ana.

15 A eia kekahi, ia Nepai i hai aku ai ia lakou i ka olelo, aia hoi, hoopaakiki iho la nae lakou i ko lakou mau naau, a, aole i hoolohe mai i kana mau olelo; nolaila, hoino ku e mai la lakou ia ia, a imi iho la e kau mai i ko lakou mau lima maluna iho ona, i hiki ia lakou ke hoolei aku ia ia iloko o ka halepaahao.

16 Aka hoi, me ia pu ka mana o ke Akua, a ua hiki ole ia lakou ke hopu mai ia ia, e hoolei ia ia iloko o ka halepaahao, no ka mea, ua kailiia oia e ka Uhane, a haliia’e la maiwaena aku o lakou.

17 [m 3, p 15] A eia kekahi, pela oia i hele aku ai ma ka Uhane, ia poe aku ia poe aku, e hai ana i ka olelo a ke Akua, a hiki i ka wa i haiia’ku ai ia e ia ia lakou a pau, a hoounaia’ku la ia mawaena o ka poe kanaka a pau.

18 A eia kekahi, aole lakou e hoolohe mai i kana mau olelo; a hoomakaia na paio, a no ia mea mokuahana lakou ia lakou iho, a hoomaka ae la e luku kekahi i kekahi me ka pahikaua.

19 A pela i pau ai ka makahiki kahahikukumamakahi o ke au o na Lunakanawai maluna iho o ka poe kanaka o Nepai.

1 [mokuna 4, paukū 1] Ano, eia kekahi ma ka makahiki kanahikukumamalua o ke au o na Lunakanawai, mahuahua ae la na paio, a no ia mea hiki mai na kaua a puni o ka aina mawaena o ka poe kanaka a pau o Nepai.

2 A na ua poe powa hui malu nei i hana i keia hana o ka luku a me ka hewa. A mau ae la ua kaua nei a pau kela makahiki. a mau ae la no hoi ia ma ka makahiki kanahikukumamakolu.

3 [m 4, p 2] A eia kekahi ma keia makahiki, hea aku la o Nepai i ka Haku, i ka i ana,

4 E ka Haku mai kuu mai oe i keia poe kanaka e lukuia e ka pahikaua; aka e ka Haku, e aho e wi ma ka aina, e hooeu ia lakou ma ka hoomanao i ka Haku i ko lakou Akua, a malia paha e mihi lakou a huli ae ia oe.

5 A pela no ia i hanaia, e like me na olelo a Nepai. A, ala he wi nui maluna o ka aina mawaena o ka poe kanaka a pau o Nepai. A pela ma ka makahiki kanahikukumamaha, mau ae la no ka wi, a oki iho la ka hana luku ma ka pahikaua, aka lilo iho la i eha ma ka wi.

6 A mau ae la no hoi keia hana luku ma ka makahiki kanahikukumamalima. No ka mea, ua hahauia ka honua i maloo loa ai ia, a hoohua ole mai i ka hua liilii ma ke kau hua; a ua hahauia ka honua a puni, oia, mawaena o ko Lamana poe me ia mawaena o ko Nepai poe, a ua hahauia lakou a make lakou ma na tausani, ma na wahi hewa loa o ka aina.

7 [m 4, p 3] A eia kekahi, ike ae la na kanaka ua kokoke lakou e make ma ka wi, a hoomaka ae la lakou e hoomanao i ka Haku ko lakou Akua; a hoomaka lakou e hoomanao i na olelo a Nepai.

8 A hoomaka ae la na kanaka e noi ae i ko lakou poe Lunakanawai Nui a me ko lakou poe luna, na lakou e i mai ia Nepai, Aia hoi, ke ike nei makou he kanaka oe o ke Akua, a nolaila e hea aku i ka Haku i ko makou Akua, nana e hoohuli ae mai ia makou aku i keia wi, o ko auanei na olelo a pau au i olelo mai ai, no ko makou lukuia ana.

9 A eia kekahi, olelo mai la ka poe lunakanawai ia Nepai, e like me na olelo a pau i noiia’e. A eia kekahi, ia Nepai i ike ai ua mihi iho la ka poe kanaka, a e hoohaahaa ana ia lakou iho iloko o ke kapa ino, kahea hou aku la oia i ka Haku, i ka i ana,

10 E ka Haku, aia hoi, ke mihi nei keia poe kanaka; a ua kahili ae la lakou i ko Gadianatona poe hui maiwaena aku o lakou, a ua pio loa iho la lakou la, a ua huna iho la lakou i ko lakou mau mea kuka malu iloko o ka honua.

11 Ano, e ka Haku, no keia haahaa ana o lakou, e hoohuli ae oe anei i kou huhu, a e ae mai i pau kou huhu ma ka lukuia’na o ua poe kanaka hewa la, au i luku mai ai mamua iho nei?

12 E ka Haku, e hoohuli ae anei oe i kou huhu, he oiaio, i kou huhu wela, a e hooki mai i keia wi ma keia aina?

13 E ka Haku, e hoolohe mai anei oe ia’u, a e kauoha mai i hanaia’i ia e like me ka’u mau olelo, a e hoouna mai i ka ua maluna iho o ka ili o ka honua, i hiki ia ia ke hoohua mai i kona hua a me kona hua liilii, ma ke kau hua?

14 E ka Haku, ua hoolohe mai la no oe i ka’u mau olelo ia’u i olelo aku ai, e wi ka aina, i hookiia ke ahulau o ka pahikaua; a ua ike au e hoolohe mai no oe, i keia manawa, i ka’u mau olelo, no ka mea, ua i mai oe, Ina e mihi keia poe kanaka, na’u no e hookoe aku ia lakou;

15 He oiaio, e ka Haku, a ke ike mai nei oe ua mihi iho la lakou, no ka wi, a no ke ahulau, a me ka lukuia ana i hiki mai ai maluna iho o lakou.

16 Ano, e ka Haku, aole anei oe e hoohuli ae i kou huhu, a e hoao hou ina paha e hookauwa aku lakou nau? A ina pela, e ka Haku, ua hiki no ia oe ke hoopomaikai mai ia lakou, e like me kau mau olelo au i olelo mai ai.

17 [m 4, p 4] A eia kekahi, ma ka makahiki kanahikukumamaono, hoohuli ae la ka Haku i kona huhu mai o na kanaka aku, a kauoha ae la i ka ua e haule mai maluna iho o ka honua, a hoohua mai la ia i kona hua ma ke kau hua ona. A hoohua mai la no ia i kona hua liilii, ma ke kau hua liilii ona.

18 A aia hoi, hauoli iho la na kanaka, a hoonani aku la i ke Akua, a ua hoopihaia ka ili o ka aina a pau me ka olioli ana; a, aole lakou imi hou e pehehi mai ia Nepai, aka manao iho la lakou ia ia me ha kaula nui la, a he kanaka o ke Akua, me ka mana a makaukau nui i haawiia mai ai ia ia mai ke Akua mai.

19 A, aia hoi, o Lehi, kona kaikaina, aole oia i emi iki mahope iho ona ma na mea e pili ana i ka pono.

20 A pela i hoomaka ai ka poe kanaka o Nepai e pomaikai hou ma ka aina, a hoomaka ae la e kukulu iho i na wahi neoneo o lakou , hoomaka ae la e hoonui a hoolaha aku, a hiik ia lakou ke uhi i ka ili a puni o ka aina, ma ka akau a ma ka hema no hoi, mai ke kai komohana, a hiki aku i ke kai hikina.

21 A eia kekahi, pau ae la ka makahiki kanahikukumamaono ma ka maluhia. A hoomaka ae la ka makahiki kanahikukumamahiku ma ka maluhia; a laha ae la ka ekalesia mawaena o ka ili o ka aina a puni; a ua huiia ka nui o na kanaka, o ko Nepai poe a me ko Lamana poe no hoi, me ka ekalesia; a ua loaa ia lakou ka maluhia nui loa ma ka aina, a pela i pau ai ka makahiki kanahikukumamahiku.

22 A he maluhia no hoi ko lakou ma ka makahiki kanahikukumamawalu, koe he mau ku e uuku no na mea nui o ke ao ana i haawiia mai ai e na kaula.

23 A ma ka makahiki kanahikukumamaiwa, hoomaka ae la na hoopaapaa nui ana. Aka eia kekahi, o Nepai laua me Lehi, a me na mea he nui wale o ko laua poe hoahanau, ka poe i ike no na mea nui oiaio o ke ao ana, e loaa ana na hoikeana i kela la i keia la, nolaila hai aku la lakou i na kanaka, a no ia mea, hooki iho la lakou i ko lakou la hoopaapaa ana ia makahiki hookahi no.

24 [m 4, p 5] A eia kekahi, ma ka makahiki kanawalu o ke au o na Lunakanawai maluna iho o ka poe kanaka o Nepai, aia kekahi poe o na mea haalele i ko Nepai poe, ka poe i hele aku i kekahi mau makahiki mamua iho nei i ko Lamana poe, a lawe maluna o lakou iho i ka inoa o ko Lamana poe; a me kekahi poe hoi he poe mamo io o ko Lamana, i hookonokonoia’ku i ka huhu e lakou ,oia hoi ua poe haalele la, nolaila hoomaka ae la lakou i ke kaua me ko lakou poe hoahanau.

25 A hana mai lakou i ka pepehi kanaka a me ka powa; alaila, e hee aku lakou iloko o na mauna, a iloko o ka waonahele a me na wahi huna, e huna ana ia lakou iho i hiki ole ke loaa lakou, e loaa ana i kela la i keia la na mea hou e hui me lakou, i ka hele ana o na mea haalele io lakou la;

26 A pela ma kekahi manawa, he oiaio, ma kekahi mau makahiki aole he nui, lilo iho la lakou i poe powa hui he nui loa, a imi iho la lakou i na mea kuka malu a pau o Gadianatona; a pela lakou i lilo ai ka poe powa o Gadianatona.

27 Ano hoi, hana make nui iho la ua poe powa nei, he oiaio, i ka luku nui ana mawaena o ka poe kanaka o Nepai, a mawaena hoi o ka poe kanaka o Lamana.

28 [m 4, p 6] A eia kekahi, he mea e pono ai e hookiia’ku keia hana luku; nolaila, hoouna aku la lakou i kekahi poe kaua o na kanaka ikaika iloko o ka waonahele, a maluna ae o na mauna e imi aku i ua poe powa hui nei, a e luku aku ia lakou.

29 Aka hoi, eia kekahi ma kela makahiki no ua hooauheeia mai lakou a hiki iloko o ko lakou mau aina iho. A pela i pau ai ka makahiki kanawalu o ke au o na Lunakanawai maluna iho o ka poe kanaka o Nepai.

30 [m 4, p 7] A eia kekahi, ma ka makamua o ka makahiki kanawalukumamakahi, hele hou aku la lakou e ku e i ua poe powa hui nei, a luku aku la no i kekahi poe he nui; a lukuia mai no hoi lakou me ka luku nui;

31 A ua koi hou ia lakou e hoi mai mailoko mai o ka wao nahele, a mailoko mai o na mauna, i ko lakou aina iho, no ka nui loa o ka helu o ua poe powa la i noho ai ma na mauna a me ka waonahele.

32 A pela i pau ai ua makahiki nei. A mahuahua ae la nae ka poe powa a lilo maoli i ikaika, a aa mala lakou i ka poe kaua a pau o ko Nepai poe, a o ko Lamana poe no hoi; a ma o lakou la i hiki mai ai ka makau i na kanaka, maluna iho o ka ili a pau o ka aina;

33 He oiaio, no ka mea, hele mai la lakou i na wahi he nui o ka aina, a hana ae la i ka luku nui ia lakou nei; he oiaio, pepehi iho la i na mea he nui, a hali pio aku la i na mea e ae he nui wale iloko o ka waonahele; he oiaio, o ka nui loa oia ka lakou mau wahine a me ka lakou mau keiki.

34 Ano o keia ino nui, ka mea i hiki mai ai i na kanaka no ko lakou hewa, hooeu hou ae la no ia ia lakou i ka hoomanao i ka Haku i ko lakou Akua.

36 A ma ka makahiki kanawalukumamalua, hoomaka hou ae la lakou e hoopoina iho i ka Haku i ko lakou Akua. A ma ka makahiki kanawalukumamakolu, hoomaka ae la lakou e mahuahua ikaika ma ka hewa. A ma ka makahiki kanawalukumamaha, aole lakou hoomaikai i ko lakou mau aoao.

37 A eia kekahi ma ka makahiki kanawalukumamalima, mahuahua ikaika lakou a ikaika loa ae la ma ko lakou haaheo, a ma ko lakou hewa; a pela lakou e oo hou ai no ka lukuia’na. A pela i pau ai ka makahiki kanawalukumamalima.

1 [mokuna 4, paukū 8] A pela ua hiki ia kakou ke ike i ka hoopunipuni a me ka naueue wale no hoi o na naau o na keiki a kanaka; he oiaio, ua hiki ia kakou ke ike na ka Haku ma kona lokomaikai nui loa, i hoalohaloha a hoopomaikai ka poe a pau i paulele aku ia ia;

2 He oiaio, a ua hiki ia kakou ke ike ma ia manawa hookahi ana i hoopomaikai mai ai i kona poe kanaka; he oiaio, ma ka mahuahua o ko lakou mau kihapai, o ko lakou mau pua holoholona, a me ko lakou mau ohana holoholona, a ma ke gula, a ma ke kala, a ma na ano a pau o na mea maikai o ia hana’ku ia hana’ku, a o ke akamai hoi; e hookoe mai ana i ko lakou mau ola, a e hoopakele mai ana ia lakou mailoko ae o na lima o ko lakou poe enemi; e hoopalupalu ana i na naau o na enemi o lakou, i ole ai lakou e kukala mai i na kaua e ku e ia lakou; he oiaio, a e hana ana i na mea a pau no ka maluhia a me ka pomaikai o kona poe kanaka; he oiaio, oia no ka manawa a lakou e hoopaakiki iho ai i ko lakou mau naau, a hoopoina i ka Haku i ko lakou Akua, a hahi ilalo iho o na wawae o lakou i ka Mea Hemolele; he oiaio, a o keia no ko lakou nanea, a me ko lakou pomaikai nui loa aku.

3 A pela kakou i ike ai, ina aole e paipai ka Haku i kona poe kanaka me na popilikia he nui wale, he oiaio, ina aole oia e hoopai mai ia lakou me ka make, a me ka weliweli, a me ka wi, a me na ano a pau o na ahulau, aole lakou e hoomanao ia ia.

4 E! nani ka naaupo, a me ka lapuwale, a me ka ino, a me ke ano diabolo, a nani hoi ka wikiwiki e hana hewa, a lohi e hana pono, o na keiki a kanaka; he oiaio, wikiwiki e hoolohe ae i na olelo a ka mea ino, a e kau aku i ko lakou mau naau maluna iho o na mea lapuwale o ke ao nei;

5 He oiaio, nani ka wikiwiki e hookiekieia iluna ma ka haaheo; he oiaio, nani ka wikiwiki e kaena, a e hana aku i na ano a pau o ka mea i hewa; a nani ka lohi o lakou e hoomanao i ka Haku, i ko lakou Akua, a e haliu i ke pepeiao i kana mau olelo ao; he oiaio, nani ka lohi e hele ma ko ka naauao mau alanui!

6 Aia hoi, aole o lakou makemake na ka Haku ko lakou Akua, nana lakou i hana mai, e hoomalu a e noho alii maluna iho o lakou, me kona lokomaikai nui a me kona aloha nae ia lakou; ke hoowahawaha aku nei lakou i kana mau olelo ao, a, aole o lakou makemake i lilo oia i mea alakai no lakou.

7 E! nani ka ole o na keiki a kanaka; he oiaio, ua uuku iho lakou mamua o na huna lepo o ka honua.

8 No ka mea hoi, ke neenee la na huna lopo o ka honua i o a ia nei, i ka mahele ana a kaawale, ma ke kauoha a ko kakou Akua nui a mau loa;

10 A ma ka mana o kona leo ua hoohioloia’e, a lilo i laumania; he oiaio, e like me he awawa la;

12 He oiaio, ma ka mana o kona leo, ke hooluliluliia la na kumu ona, a hiki iwaena konu;

14 He oiaio, ina e olelo ae oia i ka honua, E hoi ihope oe, i hooloihi ai ia i ka la no na hora he nui, ua hanaia ia;

15 A pela e like me kana olelo, ke hoi la ihope ka honua, a ua ikea e kanaka e ku malie ana ka la; he oiaio, aia hoi, pela io no; no ka mea, he oiaio no o ka honua no ka i kaa ae, aole o ka la.

16 [m 4, p 9] Aia hoi, ina e olelo ae oia i na wai o ka hohonu nui, E hoomalooia oe, ua hanaia ia.

17 Aia hoi, ina e olelo ae oia i keia mauna, E hookiekieia oe, a e hele ae a e haule maluna iho o kela kulanakauhale, i uhiia’i ia, aia hoi ua hanaia ia.

18 A, aia hoi, ina e huna ke kanaka i kekahi waiwai maloko o ka honua, a e olelo ae ka Haku, E hoopoinoia ia, no ka hewa o ka mea nana ia i huna, aia hoi, e hoopoinoia auanei no ia:

19 A ina e olelo ae ka Haku, E hoopoinoia oe, i loaa ole ai oe i kekahi kanaka mai keia manawa aku a mau loa aku, aia hoi, aole e loaa ana i kekahi kanaka ia mea ma ia hope aku a mau loa aku.

20 A, aia hoi, ina e olelo mai ka Haku i kekahi kanaka, No kou mau hala e hoopoinoia oe a mau loa aku, e hanaia auanei ia.

21 A ina e olelo mai ka Haku, No kou mau hala, i hookiia’ku oe mai ko’u alo aku, e kauoha no oia e hanaia auanei no ia pela.

22 A auwe ka mea ia ia oia e olelo ae ai i keia, no ka mea, e oleloia ia i ka mea nana e hana i ka hewa, a e hiki ole ia ia ke hoolaia; nolaila, no keia mea, i hiki i na kanaka ke hoolaia, ua haiia mai ka mihi.

23 Nolaila, pomaikai lakou ka poe e mihi a hoolohe i ka leo o ka Haku o ko lakou Akua; no ka mea, o lakou nei no ka poe e hoolaia auanei.

24 A na ke Akua e ae mai, ma kona piha nui, i kaiia mai ai na kanaka i ka mihi a me na hana pono, i hiki ia lakou ke hoihoi hou ia i ka lokomaikai, no ka lokomaikai i ku i ka lakou mau hana.

25 A ua makemake au e hoolaia no kanaka a pau. Aka ke heluhelu nei kakou, ma ka la nui hope, malaila no kekahi poe e hooleiia’ku ai mawaho; he oiaio, ka poe e hooleiia’ku ai mai ke alo aku o ka Haku;

26 He oiaio, ka poe e hookuuia’ku ai i ka noho poino pau ole ana, e hooko ana i na olelo e i ana, O ka poe i hana pono, e loaa ia lakou ke ola mau loa; a o ka poe i hana ino, e loaa ia lakou ka poino mau loa. A pela io no ia, Amene.

1 [mokuna 5, paukū 1] Ano, eia kekahi, ma ka makahiki kanawalukumamaono, e noho mau ana ko Nepai poe iloko o ka hewa, he oiaio, iloko o ka hewa nui, oiai i eu ikaika ko Lamana poe e malama i na kauoha a ke Akua, e like me ke kanawai o Mose.

2 A eia kekahi ma keia makahiki, aia kekahi kanaka, o Samuela, he Lamana, i hele mai iloko o ka aina o Zarahemela, a hoomaka ae la e hai olelo aku i na kanaka. A eia kekahi, hai olelo aku la oia i na la he nui wale, i ka mihi i na kanaka, a hookuke ae la lakou ia ia iwaho, a kokoke oia e hoi hou i kona aina iho.

3 Aka hoi, hiki mai la ka leo o ka Haku io na la, i hoi hou aku ai oia, a e wanana aku i na kanaka i kela mea keia mea i komo iloko o kona naau.

4 [m 5, p 2] A eia kekahi, aole lakou ae mai ia ia e komo iloko o ke kulanakauhale; nolaila, hele aku la ia a pii ae la maluna iho o ka pa olaila, a o aku la i kona lima a hea ae la me ka leo nui, a wanana ae la i na kanaka i na mea a ka Haku i hahao mai ai iloko o kona naau;

5 A i ae la oia ia lakou, Aia hoi, owau, o Samuela, he Lamana, ke olelo aku nei i na olelo a ka Haku e hahao mai nei iloko o ko’u naau; a, aia hoi, ua hahao mai oia iloko o ko’u naau e i aku i keia poe kanaka, ke kau mai la ka pahikaua o ka hoopai maluna iho o keia poe kanaka; aole e hala ana na haneri makahiki eha ke ole haule mai ka pahikaua o ka hoopai, maluna iho o keia poe kanaka;

6 He oiaio, ke kali la ka luku kaumaha i keia poe kanaka, a e hiki io mai ana ia maluna iho o keia poe kanaka, a, aole e kiki i kekahi mea ke hoola i keia poe kanaka, ke ole ia ka mihi a me ka manaoio ma ka Haku o Iesu Kristo, nana e hele oiaio mai auanei iloko o ke ao nei, a e hoopilikiaia oia ma na mea he nui wale, a e pepehiia a make auanei no kona poe kanaka.

7 Aia hoi, ua hai mai la kekahi anela a ka Haku ia mea ia’u, a lawe mai la ia i na mea olioli i ko’u uhane. A, aia hoi, ua hoounaia mai au io oukou la e hai aku ia mea ia oukou no hoi, i hiki ia oukou ke loaa na mea olioli; aka hoi, aole oukou i hookipa mai ia’u,

8 Nolaila, penei wahi a ka Haku, No ka paakiki o na naau o ka poe kanaka o ko Nepai, ina aole lakou e mihi na’u e lawe ae i ka’u olelo mai o lakou aku, a e kaili ae au i kuu uhane mai o lakou aku, a aole au hoomanawanui hou ia lakou, a e hoohuli ae au i na naau o ko lakou poe hoahanau e ku e aku ia lakou;

9 A, aole e hala aku na haneri makahiki eha, mamua o ko’u kena ana’e e hahauia’ku lakou; he oiaio, e hoopai aku au ia lakou me ka pahikaua, a me ka wi, a me ke ahulau;

10 He oiaio, e hoopai aku au ia lakou ma ko’u huhu wela, a aia kekahi poe o ka ha o ka hanauna, ka poe e ola ana o ko oukou poe enemi, e ike i ko oukou luku loa ia’na; a e hiki io mai auanei keia, ke ole oukou e mihi, wahi a ka Haku: a e hoopai ae ua poe la o ka ha o ka hanauna i ka luku loa ana ia oukou.

11 Aka, ina e mihi oukou a e hoi hou i ka Haku i ko oukou Akua, e hoohuli ae au i ko’u huhu mai o oukou aku, wahi a ka Haku; he oiaio, penei wahi a ka Haku, Pomaikai lakou ka poe e mihi a huli mai io’u nei, aka poino na mea e mihi ole ana:

12 He oiaio, poino keia kulanakauhale nui o Zarahemela nei; no ka mea hoi, no ka poe pono i hookoeia’i oia; he oiaio, poino ua kulanakauhale nui nei, no ka mea, ke ike nei au, wahi a ka Haku, e hoopaakiki ana na mea he nui loa, he oiaio, o ka hapa nui loa o ua kulanakauhale nui nei i ko lakou mau naau e ku e mai ia’u, wahi a ka Haku.

13 Aka pomaikai lakou ka poe e mihi ana, no ka mea, na’u lakou e hookoe aku. Aka hoi, ina aole no ka poe pono e noho la ma ua kulanakauhale nui nei, aia hoi, ina ua kena ae au i ke ahi e haule iho mailoko aku o ka lani, a hoopau loa aku ia wahi.

14 Aka hoi, no ka pono o ka poe pono, i hookoeia ia. Aka hoi, ke hele mai la ka manawa, wahi a ka Haku, ia oukou e hookuke mai ai i ka poe pono maiwaena aka o oukou, alaila e oo oukou no ka lukuia’na; he oiaio, auwe ua kulanakauhale nui nei, no na hewa a me na mea hoopailua iloko ona;

15 He oiaio, a auwe ke kulanakauhale o Gideona, no na hewa a me na mea hoopailua iloko ona;

16 He oiaio, a auwe na kulanakauhale a pau ma ka aina a puni, i nohoia’i e ko Nepai poe, no na hewa a me na mea hoopailua iloko o ia mau wahi;

17 A, aia hoi, e hiki mai auanei no ka poino maluna iho o ka aina, wahi a ka Haku o na Lehulehu, no ko ka poe kanaka e noho la ma ka aina; he oiaio, no ko lakou hewa a me ko lakou mau mea hoopailua.

18 [m 5, p 3] A e hiki mai auanei keia, wahi a ka Haku o na Lehulehu, he oiaio, ko kakou Akua nui a oiaio, o ka mea nana e huna iho i na waiwai iloko o ka honua, e loaa hou ole ai ia mau mea ma ia hope aku, no ka nui o ka poino o ka aina, ke ole ia he kanaka pono, a e huna iho ia mea i ka Haku,

19 No ka mea, ua makemake au wahi a ka Haku, na lakou e huna iho i ko lakou mau waiwai ia’u; a e hoopoinoia lakou ka poe i huna ole i ko lakou mau waiwai ia’u; no ka mea, aole e huna ana kekahi i ko lakou mau waiwai ia’u, ke ole ka poe pono; a o ka mea nana e huna ole i kona mau waiwai ia’u, ua hoopoinoia no ia, a me ka waiwai no hoi, aole e hiki i kekahi ke hoola ia mea no ka poino o ka aina.

20 A e hiki mai no auanei ka la e huna iho lakou i ko lakou mau waiwai, no ka mea, ua kau aku lakou i ko lakou mau naau maluna iho o ka waiwai; a no ko lakou kau ana i ko lakou mau naau maluna iho o ko lakou waiwai, e huna iho no au i ko lakou mau waiwai, i ka wa a lakou e hee aku ai imua o ko lakou poe enemi, no ka mea, aole lakou huna iho ia mau mea ia’u; e hoopoinoia lakou, a me ko lakou mau waiwai no hoi; a ma ia la e hahauia lakou, wahi a ka Haku.

21 E nana mai oukou, e na kanaka o keia kulanakauhale nui, a e hoolohe mai i ka’u mau olelo; he oiaio, e hoolohe mai i na olelo a ka Haku e olelo aku nei; no ka mea hoi, ke i aku nei oia ua hoopoinoia oukou no ko oukou waiwai, a ua hoopoinoia no hoi ko oukou waiwai, no ka mea, ua kau aku oukou i ko oukou mau naau maluna iho o ia mau mea, a ua hoolohe ole i na olelo a ka mea nana oukou i haawi mai ia mau mea.

22 Aole oukou i hoomanao aku i ka Haku ko oukou Akua, ma na mea ana i hoopomaikai ai ia oukou, aka, ke hoomanao mau nei oukou i ko oukou waiwai, aole e aloha aku i ka Haku, i ko oukou Akua no ia mau mea; he oiaio, aole e hu ana ko oukou naau i ka Haku, aka ke pehu nei me ka haaheo nui i ke kaena ana, a i ka haanui ana, i na paonioni ana, i na paio, i ka lokoino, i na hoomaau ana, a me na pepehi kanaka, a i na ano a pau o na hala.

23 No keia mea, ua kauoha mai la ka Haku i hiki mai ai ka poino maluna iho o ka aina, a maluna iho o ko oukou waiwai no hoi; a o keia mea no na hala o oukou;

24 he oiaio, auwe keia poe kanaka, no keia manawa i hiki mai ai, a oukou e hookuke mai nei i na kaula, a hoomaewaewa mai nei ia lakou, a nou mai i na pohaku ia lakou, a pepehi mai ia lakou a make, a hana mai i na ano a pau o ka ino ia lakou, e like me lakou o ka wa kahiko i hana’i.

25 Ano ia oukou i kamailio ai, ke i ae nei oukou, Ina o ko makou mau la pu kekahi ma na la o ko makou poe kupuna o ka wa kahiko, aole oukou i pepehi pu i ka poe kaula a make; aole oukou i hailuku mai ia lakou, a hookuke mai ia lakou mawaho.

26 Aia hoi, ua ino loa aku oukou mamua o lakou; no ka mea, me ka Haku e ola nei, ina e hiki mai kekahi kaula mawaena o oukou, a hai aku ia oukou i ka olelo a ka Haku, ka mea e hoike mai ana no ko oukou mau lawehala a mau hewa, ua huhu oukou ia ia, a hookuke mai ia ia mawaho, a imi aku i kela ano keia ano o na aoao e pepehi mai ia ia; he oiaio, e olelo no oukou he kaula wahahee ia, a he lawehala ia, a no ka diabolo, no ka mea, ke hoike aku nei oia ua ino na hana a oukou.

27 Aka hoi, ina e hele mai kekahi kanaka mawaena o oukou, a e i ae, E hana aku i keia, aole he hewa malaila; e hana aku i kela, aole oukou e loaa ka pilikea; he oiaio, e olelo ae oia, e hele mamuli o ka haaheo o ko oukou mau naau; he oiaio, e hele mamuli o ka haaheo o ko oukou mau maka, a e hana’ku i ka mea a ko oukou naau i makemake ai; a ina e hele mai kekahi kanaka iwaena o oukou a olelo ae i keia, e hookipa ae no oukou ia ia, a e i ae he kaula no ia;

28 He oiaio, e hookiekie no oukou ia ia iluna, a e haawi ae oukou ia ia i kauwahi o ko oukou waiwai; e haawi aku no oukou ia ia i kauwahi o ko oukou gula, a i kauwahi o ko oukou kala, a e hoaahu iho no oukou ia ia me ke kapa kumu kuai nui; a no kana olelo ana’e i na olelo hoomalimali ia oukou, a ke i ae la oia ua malu na mea a pau, alaila aole oukou e hoohewa’e ia ia.

29 [m 5, p 4] E ka hanauna hewa a kekee; ka poe paakiki a ai oolea, pehea ka loihi e manao ai oukou e kuu mai ka Haku ia oukou; he oiaio, pehea ka loihi e hookuu mai oukou ia oukou iho e alakaiia’ku e na mea alakai naaupo a makapo; he oiaio, pehea ka loihi e koho aku ai oukou i ka pouli mamua o ka malamalama;

30 He oiaio, aia hoi, ua hoaaia ka huhu o ka Haku ano e ku e ia oukou; aia hoi, ua hoopoino mai la oia i ka aina, no ko oukou hewa;

31 A, aia hoi, e hiki mai aua ka manawa nana e hoopoino i ko oukou waiwai, i lilo ia i mea pahee, i hiki ole ia oukou ke hoopaa ae ia mau mea; a ma na la o ko oukou ilihune aole e hiki ia oukou ke aua ia mau mea;

32 A ma na la o ko oukou ilihune, e hea aku oukou i ka Haku: a makehewa ko oukou hea ana, no ka mea, ua hiki mai ko oukou hooneoneoia ana ia manawa maluna iho o oukou, a ua hana paa ia ko oukou lukuia’na; alaila, e uwe aku a e aoa aku oukou ma ia la, wahi a ka Haku o na Lehulehu. Alaila e kanikau oukou a i ae,

33 Ina ua mihi au, a aole pepehi i na kaula, a hailuku ia lakou, a hookuke aku ia lakou mawaho; he oiaio, ma ia la la, e olelo ae oukou, Ina ua hoomanao kakou i ka Haku, i ko kakou Akua, ma ka la ana i haawi mai ai ia kakou i ko kakou waiwai, alaila aole no ia mau mea i lilo i pahee, i nalowale aku ai ia mau mea ia kakou; no ka mea hoi, ua lilo aku la ko kakou waiwai mai o kakou aku.

34 Aia hoi, ke waiho aku nei kakou i kahi mea paahana maanei, a ma ia la ae ua lilo ia; a, aia ka, ua laweia’ku na pahikaua a kakou mai o kakou aku, ma ka la a kakou i imi aku ai ia mau mea no ke kaua.

35 He oiaio, ua huna iho kakou i ko kakou mau waiwai, a ua pahee aku ia mau mea mai o kakou aku, no ka poino o ka aina.

36 Ina ua mihi kakou ma ka la i hiki mai ai ka olelo a ka Haku ia kakou; no ka mea hoi, ua hoopoinoia ka aina, a ua lilo na mea a pau i pahee, a ua hiki ole ia kakou ke hoopaa ia mau mea.

37 Aia hoi, ua hoopuniia kakou e na daimonio, he oiaio, ua hoopuniia kakou a puni e na anela o ka mea nana i imi e hoopoino mai i ko kakou mau uhane. Aia hoi, ua nui na hala o kakou. E ka Haku, aole anei e hiki ia oe ke hoohuli ae i kou huhu mai o kakou aku? A o keia no auanei ka oukou olelo ma ua mau la la.

38 Aka hoi, ua hala aku ko oukou mau la o ka noho hoao ana; ua hoopanee aku oukou i ka la o ko oukou ola, a hiki i ka wa i hala aku ai ka manawa pono no ka wa pau ole, a ua hana paa ia ko oukou lukuia’na; he oiaio, no ka mea, ua imi oukou i na la a pau o ko oukou ola ana, no ka mea, i hiki ole ai ia oukou ke loaa; a ua imi oukou i ka pomaikai ma ka hana hewa ana, a e ku e ana ia mea i ke ano o kela pono aia no ia iloko o ko kakou Poo Nui a Mau Loa.

39 E na kanaka o ka aina, ina oukou e hoolohe mai i ka’u mau olelo. A ke pule nei au i hoohuliia’e ka huhu o ka Haku mai o oukou aku, a i mihi oukou a e hoolaia.

1 [mokuna 5, paukū 5] Ano eia kekahi, wanana aku la o Samuela, ka Lamana, i na mea e ae he nui loa aku i hiki ole ke palapalaia.

2 A, aia hoi, i aku la oia ia lakou, Aia hoi, ke haawi aku nei au i hoailona ia oukou: no ka mea, ke hele mai nei na makahiki hou elima, alaila e hiki mai ana ke Keiki a ke Akua e hoolapanai i ka poe a pau e manaoio aku ana ma kona inoa.

3 A, aia hoi, o keia ka’u e haawi aku ia oukou i hoailona ma ka manawa o kona hiki ana mai; no ka mea hoi, ma ka lani auanei na malamalama nui, a no ia mea, ma ka po mamua o kona hiki ana mai aole he pouli, a e ikea auanei ia e kanaka me he mea la he ao ia,

4 Nolaila, hookahi la a me ka po, a me kekahi la hou, me he mea la hookahi la no ia, a aole no he po; a he hoailona auanei keia ia oukou; no ka mea, e ike no oukou i ka puka ana o ka la, a i kona napoo ana no hoi; nolaila, e ike oiaio auanei lakou i elua la a me ka po; aole nae e hoopouliia ka po; a o ka po ia mamua o kona hanau ana.

5 [m 5, p 6] A, aia hoi, e ea mai kekahi hoku hou, he hoku a oukou i ike ole e ai mamua; a he hoailona hoi keia ia oukou.

6 A, aia hoi, aole o keia wale no; ma ka lani auanei na ouli a me na mea kupanaha he nui.

7 A e hiki mai keia, e pihoihoi auanei oukou a pau, a e kahaha, a e hina iho oukou i ka honua.

8 A eia kekahi, o ka mea e manaoio ma ke Keiki a ke Akua, e loaa no ia ia ke ola mau loa.

9 A, aia hoi, pela ka Haku i kauoha mai ai ia’u, ma o kona anela la, i hele mai ai au a hai aku i keia mea ia oukou; he oiaio, ua kauoha mai la e wanana aku au ia mau mea ia oukou, he oiaio, ua i mai oia ia’u, E hea aku i keia poe kanaka, e mihi a e hoomakaukau i ke alanui o ka Haku.

10 Ano, no ka Lamana ana o’u, a me ka’u olelo ana aku ia oukou i na olelo a ka Haku i kauoha mai ai ia’u, a no ke oolea o ia mea e ku ia oukou, ua hihi mai oukou ia’u, a ke imi nei e pepehi mai ia’u, a ua hookuke mai ia’u maiwaena mai o oukou.

11 A e lohe no oukou i ka’u mau olelo, no ka mea, no keia mea ua pii ae au maluna o na pa o keia kulanakauhale, e hiki ia oukou ke lohe a ke ike i na hoopai o ke Akua e kali ana ia oukou no ko oukou mau hala, a i ike no hoi oukou i na kanawai o ka mihi;

12 A i ike no hoi oukou no ka hiki ana mai o Iesu Kristo, ke Keiki a ke Akua, ka Makua o ka lani a me ka honua, ka Mea Hana i na mea a pau, mai kinohi mai: a i ike i na hoailona o kona hiki ana mai, me ka manao e hiki ia oukou ke manaoio aku ma kona inoa.

13 A ina e manaoio oukou ma kona inoa, alaila e mihi no oukou i ko oukou mau hewa a pau, i hiki ia oukou ma ia mea ke loaa ke kalaia’na o ia mau mea ma o kona pono la.

14 A, eia hou, he hoailona hou ka’u e haawi aku nei ia oukou; he oiaio, he hoailona o kona make;

15 No ka mea hoi, he oiaio e make ia e pono ai, i hiki mai ai ke ola; he oiaio, e pono nona, a e lilo ana i mea e pono ai nona e make, e lawe mai ai i ke alahouana o ka poe make, i hiki i na kanaka ma ia mea ke laweia’e imua o ke alo o ka Haku;

16 He oiaio, aia hoi, ke lawe mai la ua make nei i ke alahouana, a ke hoolapanai mai la i na kanaka a pau mai ka make mua mai; kela make uhane no na kanaka a pau, ma o ka haule ana la o Adamu, i hookiia mai ai mai ke alo ae o ka Haku, a manaoia me he make la, ma na mea kino a ma na mea uhane.

17 Aka hoi, ke hoolapanai mai la ke alahouana o Kristo i na kanaka, he oiaio, i na kanaka a pau, a ke hoihoi hou mai la ia lakou imua o ke alo o ka Haku;

18 He oiaio, a ke lawe mai la ia ke kanawai o ka mihi, o ka mea nana i mihi, aole oia i kuaia ilalo a hooleiia’ku iloko o ke ahi; aka o ka mea nana i mihi ole, ua kuaia ilalo a hooleiia iloko o ke ahi, a ke hiki hou ae la maluna iho o lakou he make uhane, he oiaio, he make alua, no ka mea, ua hooki hou ia’ku lakou ma na mea e pili ana i ka pono;

19 Nolaila, ea, e mihi oukou, e mihi oukou, o hookuu aku oukou ia oukou iho, ma ko oukou ike ana i keia mau mea a hana ole ana, e komo malalo iho o ka hoohewaia’na, a ua kaiia’ku oukou ilalo i keia make alua.

20 [m 5, p 7] Aka hoi, me a’u i olelo aku ai ia oukou no kekahi hoailona hou, he hoailona o kona make, aia hoi, ma ua la la ana e loaa’i ka make, e hoopouliia auanei ka la, a e hoole e haawi mai i kona malamalama ia oukou; a me ka mahina no hoi, a me na hoku: a, aole he malamalama maluna o ka ili o ka aina nei, oia, mai ka manawa ana i loaa’i ka make, no na la ekolu, a hiki i ka manawa ana i ala hou ai mai ka make mai;

21 He oiaio, ma ka manawa ana e kuu aku ai i ka uhane, e hekili ana a e uila ana no na hora he nui wale, a e haalulu a naueue ka honua, a o na pohaku maluna iho o ka ili o ua honua nei, aia no maluna ae o ka honua a malalo iho hoi, a oukou e ike nei i keia manawa he paa, a i ole ia, ua paa loa ka hapa nui, e nahaha auanei:

22 He oiaio, e nahaha auanei ia mau mea iwaena konu, e loaa mau ai ma ia hope aku i nakaka a i mawae, a ma na apana nahahaia’i maluna o ka ili o ka honua a pau; he oiaio, maluna ae o ka honua a malalo iho no hoi.

23 A, aia hoi, e hiki mai na makani ino nui, a e hoohaahaaia na mauna he nui wale, e like me he awawa la, a me na wahi he nui wale no hoi, i kapaia ano he mau awawa, e lilo i mau mauna, i kiekie loa.

24 A e nahaha ae na alanui he nui wale, a e lilo na kulanakauhale he nui i neoneo,

25 A e hoohamamaia na ilina he nui wale, a e hookuu mai i na mea he nui o ko ia mau wahi poe make; a e ikeia na mea hoano he nui wale e kekahi poe he nui.

26 Aia hoi, pela i olelo mai ai ka anela ia’u; no ka mea, i mai la oia ia’u, e ikeia’ku na hekili a me na uila no na hora he nui loa;

27 A i mai la hoi oia ia’u, i ka wa o ka hekili a me ka uila, a me ka makani ino, e hiki mai ai keia mau mea, a e uhi no hoi ka pouli i ka ili o ka honua a pau, no na la ekolu.

28 A i mai la ka anela ia’u, e ike no kekahi poe he nui i na mea oi aku mamua o keia mau mea, i mea e hiki ai ia lakou ke manaoio e hiki mai ana keia mau ouli a me keia mau mea kupanaha, maluna iho o ka ili a pau o keia aina; i ole ai he kumu no ka hoomaloka mawaena o na keiki a kanaka.

29 A o keia mea i hiki i na mea manaoio ke hoolaia, a i hiki hoi ke hooiliia’ku ka hoopai pono, maluna iho o ka poe manaoio ole; a ina e hoohewaia’ku hoi lakou, ke lawe la lakou maluna o lakou iho i ko lakou hoohewaia’na iho.

30 Ano, e hoomanao, e hoomanao e o’u poe hoahanau, o ka mea e make ana, e make ana oia ia ia iho; o ka mea e hana ana i ka hewa, e hana ana oia ia mea ia ia iho; no ka mea hoi, ua kaawale oukou; ua aeia mai oukou e hana no oukou iho; no ka mea hoi, ua haawi mai la ke Akua ia oukou i ka ike, a ua hookuu mai la oia ia oukou;

31 Ua haawi mai la oia ia oukou i hiki ia oukou ke ike i ka maikai mai ka ino ae, a ua haawi mai la oia ia oukou i hiki ia oukou ke koho i ke ola, a i ole ia i ka make, a ua hiki ia oukou ke hana i ka pono a e hoihoi hou ia’ku i ka mea i pono, oia hoi, e hoihoi hou ia mai ka mea pono ia oukou; a i ole ia, ua hiki ia oukou ke hana i ka ino, a e hoihoi hou ia’ku ka mea i ino ia oukou.

1 [mokuna 5, paukū 8] Ano, e ko’u poe hoahanau i alohaia, aia hoi, ke hai aku nei au ia oukou ina aoleoukou e mihi, e waihoia auanei ko oukou mau hale i neoneo ia oukou;

2 He oiaio, ina aole oukou e mihi, e loaa auanei i ko oukou poe wahine ke kumu nui e uwe ai ma ka la a lakou i hanai waiu aku ai; no ka mea, e hoao auanei oukou e holo, a, aole wahi e pakele aku ai; he oiaio, auwe ka poe hapai keiki, no ka mea, kaumaha auanei lakou, a hiki ole ke holo; nolaila, e hahiia lakou ilalo, a e haaleleia e make;

3 He oiaio, auwe keia poe kanaka i kapaia ka poe kanaka o Nepai, ke ole lakou e mihi i ka wa a lakou e ike ai i keia mau hoailona a mau mea kupanaha, e hoikeia mai auanei ia lakou; no ka mea hoi, he lahuikanaka lakou i waeia o ka Haku mamua; he oiaio, ua aloha mai oia i ka poe kanaka o Nepai, a ua paipai mai no hoi oia ia lakou; he oiaio, ma na la o ko lakou mau hala ua paipai mai oia ia lakou, no ka mea, ke aloha mai la oia ia lakou.

4 Aka hoi, e o’u poe hoahanau, ua inaina mai oia i ko Lamana poe, no ka mea, ua hewa mau ka lakou mau hana: a o keia mea no ka hewa o na mooolelo a ko lakou poe kupuna. Aka hoi, ua hiki mai la ke ola ia lakou, ma o ka hai olelo ana la o ko Nepai poe; a no keia mea ua hooloihi mai ka Haku i ko lakou mau la.

5 A ke makemake nei au e ike aku oukou aia no ka nui o lakou ma ke ala pono o ka lakou hana, a ke hele pololei la lakou imua o ke Akua, a ke malama la lakou i kana mau kauoha, a me kona mau kanawai, a me kana mau olelo kupaa, e like me ke kanawai o Mose.

6 He oiaio, ke i aku nei au ia oukou, e hana ana ka nui o lakou i keia, a e hooikaika ana lakou, me ka hoomau molowa ole ana, e hiki ia lakou ke kai mai i ke koena o ko lakou poe hoahanau i ka ike i ka oiaio; nolaila, ua nui no ka poe i hui pu ia me lakou i kela la i keia la.

7 Aia hoi, ua ike oukou no oukou iho, no ka mea, ua nana oukou ia mea, o ka poe a pau o lakou i kaiia mai i ka ike i ka oiaio, a e ike i na mooolelo hewa a ino loa a ko lakou poe kupuna, a i kaiia e manaoio i na palapala hemolele, he oiaio, i na wanana a ka poe kaula hemolele i kakauia, ka mea e alakai ana ia lakou i ka manaoio ma ka Haku, a i ka mihi, a e lawe ana keia manaoio a mihi i ke ano hou o ka naau ia lakou;

8 Nolaila, o ka poe a pau i hiki i keia, ua ike oukou no oukou iho, ua naueue ole a onipaa ma ka manaoio, a ma ka mea nana lakou i hookuu mai.

9 A ua ike no hoi oukou ua kanu iho la lakou i ko lakou mau mea kaua, a ke makau la lakou e lawe hou ae ia mau mea, o hana hewa paha lakou; he oiaio, ua hiki ia oukou ke ike ke makau nei lakou i ka hana hewa; no ka mea hoi, e ae aku no lakou e hahiia ilalo a e pepehiia a make e ko lakou poe enemi, aole hoi e hoaka’e i na pahikaua a lakou e ku e ia lakou la; a o keia mea no ko lakou manaoio aku ia Kristo.

10 Ano, no ko lakou onipaa ana i ka wa a lakou i manaoio ai ma ka mea a lakou i manaoio ai; no ka mea, no ko lakou ku paa ana i ka wa a lakou i hoomalamalamaia’i, aia hoi, no ka Haku lakou e hoopomaikai mai a e hooloihi mai i ko lakou mau la, me ko lakou hala nae;

11 He oiaio, ina e emi iho lakou iloko o ka hoomaloka, e hooloihi mai nae ka Haku i ko lakou mau la a hiki mai ka manawa i oleloia’i e ko kakou poe kupuna, a e ka kaula Zenosa hoi, a me na kaula e ae, no ka hoihoi hou ia’na o ko kakou poe hoahanau, ko Lamana poe, i ka ike i ka oiaio;

12 He oiaio, ke i aku nei au ia oukou, ma na la mahope, ua haawiia mai na olelo pomaikai a ka Haku i ko kakou poe hoahanau, i ko Lamana poe; a me na popilikia nae he nui a lakou e loaa’i, a e hoaia lakou i o ia nei maluna iho o ka ili o ka honua, a e alualuia, a e hahauia a e hoopuehuia’ku, me ka loaa ole kahi e pakele ai, e aloha mai auanei nae ka Haku ia lakou;

14 A ua like keia me ka wanana, e laweia auanei lakou i ka ike oiaio, oia no ka ike i ko lakou Mea Hoolapanai, a me ko lakou Kahuhipa nui a oiaio, a e helu pu ia mawaena o kana poe hipa.

14 Nolaila, ke i aku nei au ia oukou, e aho auanei ia no lakou mamua o oukou, ke mihi ole oukou.

15 No ka mea hoi, ina ua hoikeia’ku na hana mana ia lakou i hoikeia mai ai ia oukou; he oiaio, i ka poe i emi iho iloko o ka hoomaloka no na mooolelo a ko lakou poe kupuna, ua hiki ia oukou ke ike no oukou iho, aole lakou i emi hou iho ai ma ia hope aku iloko o ka hoomaloka;

16 Nolaila, wahi a ka Haku, aole au e hoopau loa aku ia lakou, aka na’u e hoihoi hou mai ia lakou io’u nei, ma ka la o ko’u naauoa, wahi a ka Haku.

17 Ano hoi, wahi a ka Haku, no ka poe kanaka o ko Nepai, ina aole lakou e mihi, a e haliu mai e hana i ko’u makemake, e hoopau lao aku au ia lakou, wahi a ka Haku, no ko lakou hoomaloka, me na hana mana nae he nui a’u i hana’i mawaena o lakou; a he oiaio me ka Haku e ola nei, e ko auanei keia mau mea, wahi a ka Haku.

1 [mokuna 5, paukū 9] Ano, eia kekahi, ua nui loa ka poe i lohe i na olelo a Samuela, ka Lamana, ana i olelo aku ai maluna ae o na pa o ke kulanakauhale. A o ka poe a pau i manaoio ma kana olelo, hele aku la a imi ae la ia Nepai; a ia lakou i puka ae ai a loaa ia, hai mai la lakou ia ia i ko lakou mau hewa aole i hoole, e noi ana e bapetizoia’e lakou i ka Haku.

2 Aka o ka poe a pau i manaoio ole ma na olelo a Samuela, ua huhu lakou ia ia; a nou ae la lakou i na pohaku ia ia maluna ae o ka pa, a pana ae la no hoi i na pua he nui ia ia, me ia i ku ai maluna o ka pa; aka, me ia pu ka Uhane o ka Haku, i hiki ole ai ke pa oia i na pohaku a lakou, aole hoi i ku i ka lakou mau pua.

3 Ano, ia lakou i ike ai i keia, i hiki ole ai ke pa a ke ku oia, ua nui loa na mea e ae i manaoio ma kana mau olelo, a hele mai la lakou io Nepai la e bapetizoia.

4 No ka mea, e bapetizo ana, e wanana ana, a e hai olelo ana o Nepai, e hea ana i ka mihi i na kanaka; e hoike ana i na hoailona a me na mea kupanaha; e hana ana i na hana mana mawaena o na kanaka, i hiki ia lakou ke ike e hiki koke io mai ana o Kristo;

5 E hai ana ia lakou no na mea e hele koke io mai ana, i hiki ia lakou ke ike a hoomanao ma ka manawa o ka hiki ana mai o ia mau mea, ua hoikeia mai ia lakou mamua o ka hiki ana, me ka manao i hiki ia lakou ke manaoio; nolaila, o ka poe a pau i manaoio ma na olelo a Samuela, hele ae la lakou io na la e bapetizoia, no ka mea, hele mai la lakou e mihi ana a e hai ana i ko lakou mau hewa.

6 Aka o ka nui loa o na kanaka aole lakou manaoio ma na olelo a Samuela; nolaila, ia lakou i ike ai ua hiki ole ke pa oia i ka lakou mau pohaku, aole hoi ku i ka lakou mau pua, hea ae la lakou i ko lakou poe kapena, i ka i ana, E lalau aku i ua kanaka la a nakinaki ia ia, no ka mea hoi, he daimonio kona; a no ka mana o ka diabolo iloko ona, aole i hiki ia makou ke pa aku a ke ku aku ia ia me ka makou mau pohaku a me ka makou mau pua; nolaila, e lalau aku ia ia a e nakinaki ia ia, a e kai aku ia ia.

7 A ia lakou i hele mai ai e kau mai i ko lakou mau lima maluna iho ona, aia hoi, lehei iho la oia mai ka pa aku, a holo ae la mailoko aku o ko lakou mau aina, he oiaio, i kona aina iho, a hoomaka ae la e hai olelo a e wanana ae mawaena o kona poe kanaka iho.

8 A, aia hoi, aole oia i lohe hou ia ma ia hope iho mawaena o ko Nepai poe; a pela ka noho ana o na kanaka.

9 A pela i pau ai ka makahiki kanawalukumamaono o ke au o na Lunakanawai maluna iho o ka poe kanaka o Nepai.

10 A pela hoi i pau ia ka makahiki kanawalukumamahiku o ke au o na Lunakanawai, o ka nui loa o na kanaka e noho ana ma ko lakou haaheo a hewa, a o ka hapa uuku o lakou e hele pololei ana imua o ke Akua.

11 A o ka noho ana no keia hoi, ma ka makahiki kanawalukumamawalu o ke au o na Lunakanawai.

12 A ua uuku ke ano e ana ma ka noho ana o na kanaka, eia wale no, hoomaka ae la na kanaka e hoopaakiki loa ia’ku ma ka hewa, a e hana nui a nui aku i na mea e ku e ana i na kauoha a ke Akua, iloko o ka makahiki kanawalukumamaiwa o ke au o na Lunakanawai.

13 [m 5, p 10] Aka, eia kekahi ma ke kanaiwa makahiki o ke au o na Lunakanawai, ua haawiia no hoailona nui i na kanaka, a me na mea kupanaha hoi; a noomaka ae la na olelo a na kaula e hookoia;

14 A ikea na anela e na kanaka, e na kanaka naauao, a hai mai la ia lakou i na mea olioli o ka hauoli nui; pela ma ua makahiki nei i hoomaka ai na palapala hemolele e hookoia.

15 Aka, hoomaka ae la nae na kanaka e hoopaakiki iho i ko lakou mau naau, koe wale no ka poe o lakou e manaoio nui ana, o ko Nepai poe, a me ko Lamana poe no hoi, a hoomaka ae la e hilinai aku ma ko lakou ikaika iho, a ma ko lakou naauao iho, i ka i ana,

16 Ua koko pololei paha lakou i kekahi mau mea, mawaena o na mea he nui wale me neia; aka hoi, ua ike kakou aole e hiki i keia mau hana nui a kupanaha i oleloia, ke hookoia.

18 Aole he mea ku i ka pololei i hiki mai ai kekahi mea e liki me Kristo; ina pela, a oia no ke Keiki a ke Akua, ka Makua o ka lani a me ka honua, me ia i oleloia’i, no ke aha la oia e hoike ole mai ai ia ia iho ia kakou, me ia i ka poe e noho ana ma Ierusalema?

19 He oiaio, no ke aha la oia e hoike ole mai ai ia ia iho ma keia aina, me ia hoi ma ka aina o Ierusalema?

20 Aka hoi, ua ike kakou he mooolelo hewa ia, i haawiia mai ai ia kakou e ko kakou poe kupuna, e hoohuli mai ia kakou e manaoio ma kekahi mea nui a kupanaha e hiki mai ana, aole nae mawaena o kakou, aka ma kekahi mea nui a kupanaha e hiki mai ana, aole nae mawaena o kakou, aka ma kekahi aina mamao loa aku, he aina a kakou i ike ole ai; nolaila, ua hiki ia lakou ke waiho aku ia kakou ma ka naaupo, no ka mea, ua hiki ole ia kakou ke ike aku me ko kakou mau maka he oiaio ia mau mea.

21 A na lakou, ma na hana maalea a pohihihi o ka mea ino, e hana i kekahi mea pohihihi nui, i hiki ole ai ia kakou ke hoomaopopo, i mea e hookauwa mai ai ia kakou ilalo i ka lakou mau olelo, a i poe kauwa hoi na lakou, no ka mea, ke hilinai nei kakou ia lakou e ao mai ia kakou i ka olelo; a pela lakou e waiho mai ai ia kakou ma ka naaupo, ina e hookuu aku kakou ia kakou iho ia lakou i na la a pau o ko kakou mau ola.

22 A ua nui na mea e ae a na kanaka i manao wale ai iloko o ko lakou mau naau, he mau mea lapuwale a naaupo; a ua nui ko lakou kupikipikio, no ka mea, e hookonokono ana o Satana ia lakou e hana hewa mau; he oiaio, hele aku la oia i o a ia nei, e hoolaha ana i na lono a me na paio maluna iho o ka ili a pau o ka aina, i hiki ia ia ke hoopaakiki iho i na naau o na kanaka e ku e i ka mea i pono, a e ku e aku i ka mea e hiki mai ana;

23 A me na ouli a me na mea kupanaha i hanaia’i iwaena o ka poe kanaka o ka Haku, a me na hana mana he nui a lakou i hana’i, ua loaa nae ia Satana ka mana nui maluna iho o na naau o na kanaka, ma ka ili o ka aina a pau.

24 A pela i pau ai ka makahiki kanaiwa o ke au o na Lunakanawai maluna iho o ka poe kanaka o Nepai.

25 A pela i pau ai ka buke a Helamana, mamuli o ka mooolelo a Helamana a me kana mau keikikane.

© 2008, 2009 Brent Thompson. Limited rights granted as indicated below, except where otherwise indicated.
This work is licensed under the Creative Commons Attribution-Noncommercial-Share Alike 3.0 United States License. To view a copy of this license, visit http://creativecommons.org/licenses/by-nc-sa/3.0/us/ or send a letter to Creative Commons, 171 Second Street, Suite 300, San Francisco, California, 94105, USA.