O Ka Buke a Etera

Ka mooolelo o ka poe Iareda, i laweia mai na papa he iwakaluakumamaha mai, i loaa i ka poe kanaka o Limai ma na la o ke Alii Mosia.

1 [mokuna 1, paukū 1] Ano, ke hoomaka nei au, o Moroni, e kakau iho i kahi mooolelo o kela poe kamaaina kahiko, ka poe i anaiia mai ai e ka lima o ka Haku ma ka ili o keia aina akau.

2 A ke lawe nei au i ka’u mooolelo mai na papa he iwakaluakumamaha mai, a ka poe kanaka o Limai i loaa ai, oia no ka i kapaia ka buke a Etera.

3 A me a’u i manao ai o ka hapa mua o keia mooolelo, e olelo ana no ka hanaia’na o ke ao nei, a o Adamu no hoi, a he mooolelo mai ia manawa mai a hiki wale mai i ka halepakui nui, a me na mea i hanaia’i mawaena o na keiki a kanaka a hiki mai ia manawa, aia no mawaena o na poe Iudaio,

4 Nolaila, aole au i kakau i kela mau mea i hanaia’i mai na la o Adamu mai a hiki wale i kela manawa; aka, aia no ia mau mea maluna iho o na papa; a o ka mea e loaa ana ia mau mea, nona hoi ka mana e hiki ia ia ke loaa ka mooolelo a pau.

5 Aka hoi, ke kakau ole nei au i ka mooolelo a pau, aka, he hapa wale no ka’u e kakau nei, mai ka halepakui mai a hiki i ka wa i anaiia’i lakou a pau.

6 A penei wau e kakau iho nei i ka mooolelo. O ka mea nana i kakau iho i ua mooolelo nei, oia o Etera, a he mamo ia na Corianatora;

33 A o keia Iareda hele mai la ia me kona kaikaina, a me ko laua mau ohana, me kekahi poe e ae me ko lakou mau ohana, mai ka halepakui nui mai, i ka manawa a ka Haku i hookahuli ai i ka olelo a na kanaka, a hoohiki ma kona huhu, e hoopuehuia’ku ai lakou maluna iho o ka ili a pau o ka honua; a e like me ka olelo a ka Haku, ua hoopuehuia’ku na kanaka.

34 A he kanaka nui a ikaika ke kaikaina o Iareda, a he kanaka i kokua nui ia e ka Haku; no ka mea, i ae la o Iareda, kona kaikuaana, ia ia, E hea aku i ka Haku, i ole ai oia e hookahuli mai ia kaua i lohe ole ai kaua i ka kaua mau olelo.

35 A eia kekahi, hea aku la ke kaikaina o Iareda i ka Haku, a aloha mai la ka Haku ia Iareda; nolaila, aole oia i hookahuli mai i ka olelo a Iareda; a o Iareda laua me kona kaikaina ua hookahuli ole ia.

36 Alaila, i ae la o Iareda i kona kaikaina, E hea hou aku i ka Haku, a malia paha e hoohuli ae oia i kona huhu mai ko kaua poe makamaka ae, i ole ai oia e hookahuli i ka lakou olelo.

37 A eia kekahi, hea aku la ke kaikaina o Iareda i ka Haku, a aloha mai la ka Haku i ka laua poe makamaka, a me ko lakou mau ohana no hoi, i ole hookahuliia lakou.

38 A eia kekahi, olelo hou ae la o Iareda i kona kaikaina, i ka i ana, E hele a e ninau aku i ka Haku, ina paha e kipaku mai oia ia kakou mailoko ae o ka aina, a ina e kipaku mai oia ia kakou mailoko ae o ka aina, e hea aku ia ia kahi e hele aku ai kakou. A owai la ke ike anoai e hali aku la ka Haku ia kakou i kahi aina i maikai loa mamua o ka honua a pau. A ina pela, e malama loa kakou i ka Haku, i loaa’i ia i hooilina no kakou.

39 [m 1, p 2] A eia kekahi, hea aku la ke kaikaina o Iareda i ka Haku, e like me ka mea i oleloia’i e ka waha o Iareda.

40 A hoolohe mai la ka Haku i ke kaikaina o Iareda, a aloha mai la ia ia, a olelo mai la ia ia,

41 O hele a e houluulu iho i kou mau pua holoholona, o ke kane a me ka wahine, o kela ano i keia ano; a i na hua no hoi o ka honua o kela ano keia ano, a me kou mau ohana; a o Iareda no hoi, kou kaikuaana, a me kona ohana; a o kou poe makamaka a me ko lakou mau ohana, a me ka poe makmaka o Iareda a me ko lakou mau ohana.

42 A ia oe e hana’i i keia mea, e hele aku no oe ma ke alo o lakou ilalo iloko o ke awaawa, aia ma ka akau ia. A malaila au e halawai pu ai me oe, a e hele aku no au imua ou iloko o kekahi aina i maikai loa mamua o ka aina a pau o ka honua nei.

43 A malaila au e hoopomaikai aku ia oe a me kau poe hua, a e hoala mai na’u o kau poe hua, a o ka poe hua a kou kaikuaana, a me ka poe e hele pu ana me oe, he lahuikanaka nui. A e kela ole aku kekahi mamua o ka lahuikanaka a’u e hoala ai na’u o kau poe hua, maluna iho o ka ili a pau o ka honua nei. A pela hoi au e hana’i ia oe, no ka mea, o keia manawa loihi ua hea mai oe ia’u.

1 [mokuna 1, paukū 3] A eia kekahi, iho aku la o Iareda, a me kona kaikaina, a me ka laua mau ohana, a me ka poe makamaka no hoi a Iareda a me kona kaikaina, ilalo iloko o ke awawa ma ka akau, (a o Nimeroda ka inoa o ka awawa, ua kapaia mamuli o ke kanaka koa i ka hahai holoholona,) me na pua holoholona a lakou i houluulu iho ai, o ke kane a me ka wahine, o kela ano keia ano.

2 A hoomoe iho la lakou i na pahele, a hoopahele ae la i na manu o ka lewa, a hoomakaukau iho la no hoi lakou i wahi ipu, a iloko olaila lakou i hali ai i na ia o na wai;

3 A hali pu ae la no hoi lakou i ka desereta me lakou, me ka hoohalike ana, he nalo meli ia; a pela lakou i hali pu ai me lakou i na poe lehulehu o na nalo meli, a me na ano a pau o na mea maluna o ka ili o ka aina, o na anoano o kela ano keia ano.

4 A eia kekahi, ia lakou i hiki ai ilalo iloko o ke awawa o Nimeroda, iho mai la ka Haku a kamailio pu mai la me ke kaikaina o Iareda; a iloko oia o kekahi ao, a ike ole aku la ke kaikaina o Iareda ia ia.

5 A eia kekahi, kauoha mai la ka Haku ia lakou, e hele aku lakou iloko o ka waonahele, he oiaio, iloko o kela hapa kahi a na kanaka i hele ole ai mamua. A eia kekahi, hele aku la ka Haku imua o lakou, a kamailio pu mai la me lakou ia ia i ku ai iloko o kahi ao, a kuhikuhi mai la i kahi a lakou e hele aku ai.

6 [m 1, p 4] A eia kekahi, hele aku la lakou ma ka waonahele, a kapili iho la i na moku, a iloko o ia mau mea lakou i holo mai ai i keia kapa o na wai he nui wale, ua kuhikuhi mau ia lakou e ka lima o ka Haku.

7 A, aole ka Haku e ae mai i noho ai lakou ma kela aoao o ke kai ma ka waonahele, aka, ua makemake oia i hele mai lakou a hiki i ka aina olelo mua ia’i, i maikai loa mamua o na aina e ae a pau, a ka Haku ke Akua i malama ai no kekahi lahuikanaka pono;

8 A ua hoohiki mai i kona huhu i ke kaikaina o Iareda, o na mea e loaa ana ia lakou keia aina i olelo mua ia’i, mai ia manawa aku a mau loa aku, a e hookauwa aku lakou nana, na ke Akua oiaio hookahi, a i ole ia, e kahiliia’ku lakou i ka wa e iho mai ai ka nui o kona inaina maluna iho o lakou.

9 Ano, ua hiki ia kakou ke ike i na olelo ku paa a ke Akua no keia aina, he aina ia o ka pomaikai, a o ka lahuikanaka e loaa ana ia ia lakou, na lakou e hoomana aku i ke Akua, a i ole ia, e kahiliia’ku auanei lakou i ka wa e iho mai ai ka nui o kona inaina maluna iho o lakou. A e hiki mai ana ka nui o kona inaina maluna iho o lakou, i ka wa i oo ai lakou ma ka hewa;

10 No ka mea hoi, he aina keia i maikai loa mamua o na aina e ae a pau; nolaila, o ka mea e loaa ana ia ia ia, e hookauwa no oia na ke Akua, a i ole ia e kahiliia’ku oia; no ka mea, oia no ka olelo kupaa mau loa a ke Akua. A, aole e kahiliia’ku na keiki o ka aina, a hiki aku i ka wa i piha ai ka hewa o lakou.

11 A e hiki ana keia ia oukou, i ka poe Genetile, i hiki ia oukou ke ike i na olelo kupaa a ke Akua, i hiki ai ia oukou ke mihi, a e hoomau ole ma ko oukou mau hewa a hiki wale i ka wa i piha ai, i lawe ole ai oukou i ka nui o ka inaina o ke Akua ilalo maluna iho o oukou, e like me ka poe kamaaina o ka aina i hana’i mamua aku.

12 Aia hoi, he aina waeia keia, a o ka lahuikanaka e loaa ana ia aina, e hookuuia lakou mai ka noho luhi ana ae, a mai ka noho pio ana ae, a mai na lahuikanaka a pau malalo iho o ka lani, ina e hookauwa aku lakou na ke Akua o ka aina, oia no o Iesu Kristo, ka mea i hoikeia aku ai e na mea a makou i palapala ai.

13 [m 1, p 5] Ano, ke hoomau aku nei au me ka’u mooolelo; no ka mea, eia kekahi, lawe mai la ka Haku ia Iareda a me kona poe hoahanau i kela kai nui e hookaawale ana i na aina. A me lakou i hiki ai i ke kai, kukulu iho la lakou i ko lakou mau halelewa; a kapa iho la lakou i ka inoa o ia wahi o Morianacuma; a noho iho la lakou ma na halelewa: a noho iho la ma na halelewa ma ke kahakai no na makahiki eha.

14 A eia kekahi, i ka pau ana o na makahiki eha, hele hou mai la ka Haku i ke kaikaina o Iareda, a ku iho la maloko o kahi ao a kamailio mai la me ia. A no na hora ekolu kamailio mai la ka Haku me ke kaikaina o Iareda, a paipai ikaika mai la ia ia no kona hoomanao ole ana e hea aku i ka inoa o ka Haku.

15 A mihi iho la ke kaikaina o Iareda i ka ino ana i hana’i, a hea aku la i ka inoa o ka Haku no kona poe hoahanau pu me ia. A i mai la ka Haku ia ia, E kala aku no au ia oe a i kou poe hoahanau, i ko lakou mau hala; aka, mai lawehala hou oe ma keia hope, no ka mea, e hoomanao oe aole e paio mau ko’u Uhane me kanaka; nolaila, ina e lawehala oukou a hiki aku i ka oo loa ana, e hookiia’ku auanei oukou mai ke alo aku o ka Haku. A oia no ko’u mau manao maluna o ka aina a’u e haawi aku ai ia oukou i hooilina no oukou; no ka mea, he aina maikai ia mamua o na aina e ae a pau.

16 A i mai la ka Haku, E hele e hana, a e kapili, mamuli o ke ano o na moku a oukou i hana’i mamua aku nei. A eia kekahi, hana aku la ke kaikaina o Iareda, a me kona poe hoahanau no hoi, a kapili iho la i na moku mamuli o ke ano a lakou i kapili e ai, e like me na ao ana o ka Haku. A ua uuku ua mau moku nei a ua mama maluna o ke kai, e like me ka mama o kahi manu maluna o ke kai;

17 A ua kapiliia ia mau moku mamuli o kahi ano, i pilipaa loa ai lakou, i hiki ai ia lakou ke hoopihaia me ka wai e like me ka bola; a ua pilipaa kolalo e like me kahi bola; a o na aoao olaila ua pilipaa e like me kahi bola; a he ihu lua lakou; a ua pilipaa koluna e like me kahi bola; a o ka loihi oia hoi ka loihi o kekahi laau; a o ka puka olaila, i kona wa i paniia’i, ua pilipaa e like me kahi bola.

18 [m 1, p 6] A eia kekahi, hea aku la ke kaikaina o Iareda i ka Haku, i ka i ana, E ka Haku ua hoopaa au i ka hana au i kauoha mai ai ia’u, a ua hana au i na moku e like me oe i kuhikuhi mai ai ia’u.

19 A, aia hoi, e ka Haku e, aohe o lakou malamalama iloko, e ike i kahi a makou e hookele ai. A e make auanei no hoi makou, no ka mea, ua hiki ole ia makou ke hanu aku, koe wale no ka ea iloko o lakou; nolaila, e make auanei makou.

20 A i mai la ka Haku i ke kaikaina o Iareda, Aia hoi, nau e hana i kekahi puka ma koluna olaila, a ma kolalo no hoi olaila; a i ka wa ou e pilikia ai no ka ea ole, nau e wehe i ka pani o ka puka olaila, a e loaa ka ea. A ina paha e komo ke kai iloko maluna iho ou, alaila, nau e pani i ka puka olaila, i ole ai oukou e make ma ke kai.

21 A eia kekahi, hana iho la ke kaikaina o Iareda pela, e like me ka ka Haku i kauoha mai ai.

22 A hea aku la oia i ka Haku, i ka i ana, E ka Haku, ua hana au me oe i kauoha mai ai ia’u; a ua hoomakaukau au i na moku no ko’u poe kanaka, a aia, aohe he malamalama iloko o lakou. Aka hoi, e ka Haku, e ae mai anei oe i holo aku ai makou i kela kapa o keia moana nui ma ka pouli?

23 A i mai la ka Haku i ke kaikaina o Iareda, Heaha la kou makemake na’u e hana aku ai, i loaa’i ia oukou ka malamalama iloko o ko oukou mau moku? No ka mea, aole e hiki ia oukou ke loaa na puka aniani, no ka mea e ulupa liilii ia ia mau mea; aole no hoi e lawe pu i ke ahi me oukou, no ka mea, aole oukou e hele ma ka malamalama o ke ahi;

24 No ka mea hoi, e like auanei oukou me he kohola la mawaena konu o ke kai; no ka mea, e lele aku auanei na ale nui maluna iho o oukou. Aka hoi, e lawe hou no au ia oukou iluna noloko mai o na hohonu o ke kai; no ka mea, ua puka aku la na makani noloko aku o ko’u waha, a o na ua a me na wai nui no hoi ka’u i hoouna aku ai.

25 A, aia hoi, ke hoomakaukau nei au ia oukou no keia mau mea; no ka mea, ea, ua hiki ole ia oukou ke hele aku i kela kapa o keia hohonu nui, ke hoomakaukau ole au ia oukou no na ale o ke kai, a me na makani i puka aku ai, a me na wai nui e hiki mai ana. Nolaila, heaha la kou makemake na’u e hoomakaukau iho ai no oukou, i loaa’i ia oukou ka malamalama, ia oukou e aleia’i iloko o na hohonu o ke kai?

1 [mokuna 1, paukū 7] A eia kekahi, hele aku la ke kaikaina o Iareda, (ano, ewalu no ka nui o na moku i hoomakaukauia’i,) i ka mauna, a lakou i kapa aku ai o mauna Selema, no ke kiekie loa ona, a hoohehee iho la noloko mai o kahi pohaku i na pohaku uuku he umikumamaono; a ua keokeo a moakaka ia mau mea, e like me ka aniani moakaka lea; a hali ae la oia ia mau mea ma kona mau lima maluna o ka piko o ka mauna, a hea hou aku la i ka Haku, i ka i ana,

2 E ka Haku, ua olelo mai la oe, e hoopuniia mai makou a puni e na wai nui e pono ai. Ano hoi, e nana mai oe, e ka Haku, a e huhu ole mai oe i kau kauwa nei no kona nawaliwali imua ou; no ka mea, ua ike makou ua hemolele oe, a e noho ana ma na lani; a ua pono ole makou imua ou; no ka haule ana, ua lilo ko makou ano maoli i ino mau; aka hoi, e ka Haku, ua haawi mai la oe i kauoha na makou e kahea aku ia oe, i loaa mai ai ia makou mai ia oe mai, e like me ko makou mau makemake.

3 Aia hoi, e ka Haku, ua hahau mai oe ia makou no ko makou hala, a ua kipaku mai ia makou, a no keia mau makahiki he nui iloko o ka waonahele makou; ua lokomaikai mai nae ia makou. E ka Haku e, e nana mai ia’u me ke aloha, a e hoohuli ae oe i kou huhu mai keia poe kanaka aku ou, a e ae ole mai na lakou e hele aku i kela kapa o keia hohonu ooloku ma ka pouli, aka, e nana mai i keia mau mea a’u i hoohehee iho ai noloko mai o ka pohaku.

4 A ua ike au, e ka Haku, nou no ka mana a pau, a ua hiki ke hana i kela mea i keia mea au i makemake ai no ka pomaikai o ke kanaka; nolaila, e hoopa mai i keia mau pohaku, e ka Haku, me kou manamana lima, a hoomakaukau ia mau mea i alohi mai ai ia mau mea iloko o ka pouli; a e alohi mai ia mau mea ia makou iloko o na moku a makou i hoomakaukau ai, i loaa’i ka malamalama ia makou, oiai makou e hele ana i kela kapa o ke kai.

5 Aia hoi, e ka Haku, ua hiki ia oe ke hana i keia. Ua ike makou ua hiki ia oe ke hoike mai i ka mana nui, ka mea uuku i ka nana aku i ka hoomaopopo ana o na kanaka.

6 [m 1, p 8] A eia kekahi, i ka wa a ke kaikaina o Iareda i olelo aku ai i keia mau olelo, aia hoi, o mai la ka Haku i kona lima a hoopa pakiahi iho la i na pohaku, me kona manamana lima; a ua weheia ka paku mailuna ae o na maka o ke kaikaina o Iareda, a ike aku la oia i ka manamana lima o ka Haku; a ua like ia me ka manamana lima o ke kanaka, e like me ka io a me ke koko; a hina iho la ke kaikaina o Iareda ilalo imua o ka Haku, no ka mea, ua loohia oia me ka eehia.

7 A ike mai la ka Haku ua hina iho ke kaikaina o Iareda i ka honua; a i mai la ka Haku ia ia, E ala’e, no ke aha la oe i hina’i?

8 A i aku la oia i ka Haku, Ua ike aku la au i ka manamana lima o ka Haku, a maku iho la au o hahau mai oia ia’u; no ka mea, aole au i ike he io a me ka iwi ko ka Haku.

9 A i mai la ka Haku ia ia, No kou manaoio ua ike oe e lawe mai auanei au maluna iho o’u i ka io a me ke koko; a, aole loa i hele e mai kekahi kanaka imua o’u me ka manaoio loa e like me oe nei; no ka mea, i ole pela, ua hiki ole ia oe ke ike mai i ko’u manamana lima. Ike mai la anei oe i na mea e ae i oi aku i keia?

11 A i mai la ka haku ia ia, E manaoio ana anei oe i na olelo a’u e olelo aku ai?

12 A pane aku la oia, Ae, e ka Haku, ua ike au e olelo ana oe i ka oiaio, no ka mea, he Akua oe o ka oiaio, a ua hiki ole ke wahahee mai.

13 A ia ia i olelo aku ai i keia mau olelo, aia hoi, hoike mai la ka Haku ia ia iho ia ia, a i mai la, No kou ike ana i keia mau mea, ua hoolaia mai oe mai ka haule ana mai; nolaila, ua lawe hou ia mai oe iloko imua o ko’u alo; nolaila, ke hoike aku nei au ia’u iho ia oe.

14 Aia hoi, owau no ka mea i hoomakaukauia’i mai ka hookumuia ana mai o ke ao nei e hoolapanai aku i ko’u poe kanaka. Aia hoi, owau no o Iesu Kristo. Owau no ka Makua a me ke Keiki. Iloko o’u e loaa’i i na kanaka a pau ka malamalama, a oia mau loa, oia ka poe e manaoio ma ko’u inoa; a e lilo auanei lakou i poe keikikane na’u a i poe kaikamahine na’u.

15 A, aole loa au i hoike e aku ia’u iho i kanaka a’u i hana’i, no ka mea, aole loa he kanaka i manaoio e mai iloko o’u e like me oe nei. Ke ike mai nei anei oe ua hanaia aku oe mamuli o ko’u ano like? He oiaio, ua hanaia’ku na kanaka a pau ma kinohou, mamuli o ko’u ano like ponoi.

16 Aia hoi, o keia kino, au e ike mai nei, oia no ke kino o ko’u uhane; a ua hana au i kanaka mamuli o ke kino o ko’u uhane; a e like me au e ikea nei e oe ma ka uhane, pela no au e ikea e ko’u poe kanaka ma ka io.

17 [m 1, p 9] Ano, e like me au, o Moroni nei, i olelo aku ai, ua hiki ole ia’u ke kakau iho i mooolelo a pau o na mea i kakauia’i, nolaila, ua lawa na’u e olelo, ua hoike mai la o Iesu ia ia iho ia ua kanaka nei ma ka uhane, mamuli o ke ano a i ka like ana o ke kino hookahi, e like me ia i hoike mai ai ia ia iho i ko Nepai poe;

18 A lawelawe mai la oia ia ia, me ia i lawelawe mai ai i ko Nepai poe; a o keia a pau, i ike ai ua kanaka nei oia ke Akua, no ka nui wale o na hana nui a ka Haku i hoike mai ai ia ia.

19 A no ka ike o ua kanaka nei, ua hiki ole ke alalaiia oia mai ka nana ana aku iloko o ka paku; a ike aku la oia i ka manamana lima o Iesu, a, ia ia i ike aku ai ia mea, hina iho la oia me ka makau; no ka mea, ike iho la oia o ka manamana lima no ia o ka Haku; a, aohe ona manaoio hou, no ka mea, ua ike oia, me ke kanalua ole;

20 Nolaila, me keia ike lea i ke Akua, ua hiki ole ke alalaiia oia mailoko ae o ka paku; nolaila, ike aku la oia ia Iesu, a lawelawe mai la oia ia ia.

21 [m 1, p 10] A eia kekahi, olelo ma la ka Haku i ke kaikaina o Iareda, Aia hoi, mai hookuu aku i keia mau mea au i ike mai ai a i lohe ai, e hele aku i ko ke ao nei, a hiki aku i ka manawa na’u e hoonani aku i kuu inoa ma ka io; nolaila, nau e hoahu iho i na mea au i ika ai a i lohe ai, a e hoike ole aku i kekahi kanaka.

22 A, aia hoi, ia oe e hele mai ai io’u nei, nau e kakau iho ia mau mea a e sila aku ia mau mea, i hiki ole ai i kekahi mea ke hoike mai i ke ano o ia mau mea; no ka mea, nau e kakau iho ia mau mea ma ka olelo i hiki ole ai ke heluheluia ia mau mea.

23 A aia, o keia mau pohaku elua ka’u e haawi aku nei ia oe, a e sila iho oe ia laua no hoi, me na mea au e kakau iho ai.

24 No ka mea, o ka olelo au e kakau iho ai, ua hookauli aku au; nolaila, na’u e hana i ko’u manawa ku pono iho, i hoonui ai ua mau pohaku nei, i na maka o na kanaka, i na mea au e kakau iho ai.

25 A i ka wa a ka Haku i olelo aku ai i keia mau olelo, hoike mai la oia i ke kaikaina o Iareda i ko ka honua a pau i hala aku la, a me ka poe a pau e hiki mai ana; a aua ole oia ia lakou mai kona ike ana aku, a hiki loa aku i na welau o ka honua;

26 No ka mea, ua i mai la oia ia ia mamua, ina e manaoio oia iloko ona, ua hiki ia ia ke hoike mai ia ia i na mea a pau – e hoikeia mai no ia ia ia; nolaila, ua hiki ole i ka Haku ke aua mai i kekahi mea mai ona aku; no ka mea, ua ike oia ua hiki i ka Haku ke hoike mai ia ia i na mea a pau.

27 A i mai la ka Haku ia ia, E kakau iho i ua mau mea nei a e sila iho, a na’u e hoike aku ia mau mea ma ko’u manawa ku pono iho i na keiki a kanaka.

28 [m 1, p 11] A eia kekahi, kauoha mai la ka Haku ia ia nana e sila iho i ua mau pohaku la elua ana i loaa’i, a e hoike ole aku, a hiki i ka wa a ka Haku e hoike aku ai ia mau mea i na keiki a kanaka.

1 [mokuna 1, paukū 11] A eia kekahi, kauoha mai la ka Haku i ke kaikaina o Iareda e iho ilalo mailuna iho o ka mauna, mai ke alo ae o ka Haku, a e kakau iho i na mea ana i ike ai; a ua papaia ia mau mea e hiki mai i na keiki a kanaka, a hiki aku i ka wa mahope iho o kona kaulia’na maluna iho o ke kea; a no keia mea malama iho la ke ’Lii Mosia ia mau mea, i ole ai e hiki i ko ke ao nei, a hiki aku i ka wa mahope iho o ko Kristo hoike ana ia ia iho i kona poe kanaka.

2 A mahope iho o ko Kristo hoike io ana ia ia iho i kona poe kanaka, kauoha mai la ia e hoikeia mai ia mau mea.

3 Ano, mahope iho o ko lakou emi ana iho iloko o ka hoomaloka, a aohe he kanaka, koe wale no ko Lamana poe, a ua hoomalau mai lakou i ka euanelio o Kristo; nolaila, ua kauohaia mai au e huna hou iho au ia mau mea iloko o ka honua.

4 Aia hoi, ua kakau iho au maluna iho o keia mau papa, i ua mau mea la, a ke kaikaina o Iareda i ike ai; a, aole loa i hoikeia mai na mea i oi aku, i na mea i hoikeia mai i ke kaikaina o Iareda;

5 Nolaila, ua kauoha mai la ka Haku ia’u e kakau iho ia mau mea; a ua kakau iho no au ia mau mea. A kauoha mai la oia ia’u e sila aku au ia mau mea; a ua kauoha mai la no hoi oia e sila aku au i ke ano o ia mau mea, no ia mea, ua sila aku au i na mea hoike i ke ano o na olelo, e like me ke kauoha a ka Haku.

6 No ka mea, i mai la ka Haku ia’u, Aole e hele aku ia mau mea i ka poe Genetile la, a hiki aku i ka la a lakou e mihi ai i ko lakou hewa, a e lilo i maemae imua o ka Haku;

7 A ma ia la la a lakou e hana ai me ka manaoio iloko o’u, wahi a ka Haku, e like me ke kaikaina o Iareda i hana’i, e hiki ia lakou ke hoomaemaeia iloko o’u, alaila, na’u e hoike aku ia lakou i na mea a ke kaikaina o Iareda i ike ai, oia, i ka wehewehe ana ia lakou i ko’u mau hoikeana a pau, wahi a Iesu Kristo, ke Keiki a ke Akua, ka Makua o na lani a o ka honua, a me na mea a pau olaila i piha’i.

8 A o ka mea nana e paio ku e mai i ka Haku, e hoomainoinoia oia; a o ka mea nana e hoole mai i keia mau mea, e hoomainoinoia oia; no ka mea, ia lakou wau e hoike ole aku ai i na mea nui ae, wahi a Iesu Kristo, no ka mea, owau no ia ka me nana e olelo nei;

9 A ma ka’u kauoha ua weheia a ua paniia na lani; a ma ka’u olelo, e haalulu ananei ka honua; a ma ka’u kauoha, e hala aku auanei ka poe kamaaina ona, me ha mea la ma o ke ahi la;

10 A o ka mea e manaoio ole ana i ka’u mau olelo, e manaoio ole ana oia i ka’u poe haumana; a ina aole wau ke olelo nei, e noonoo pono mai oukou; no ka mea, e ike auanei oukou owau no ka mea e olelo ana , ma ka la hope.

11 [m 1, p 12] Aka, o ka mea e manaoio ana i keia mau mea a’u i olelo aku ai, e hele aku au io na la me na hoikeana o ko’u Uhane; a e ike no oia a e hoike aku. No ka mea, no ko’u Uhane, e ike auanei no oia ua oiaio keia mau mea; no ka mea, e ao hoohuli ana ia i na kanaka e hana maikai;

12 O ka mea e ao hoohuli ama i na kanaka e hana maikai, no’u nei no ia; no ka mea, e hiki ole ana ka maikai mai kekahi mea e ae aku, aka mai o’u wale aku nei no.Owau no ka mea hookahi e alakai ana i na kanaka e hana i ka maikai a pau; o ka mea e manaoio ole mai i ka’u mau olelo, aole oia e manaoio mai ia’u, owau no e ola nei; a o ka mea manaoio ole mai ia’u, aole oia e manaoio mai i ka Makua nana au i hoouna mai. No ka mea hoi, owau no ka Makua, owau no ka malamalama, a me ke ola, a me ka oiaio o ke ao nei.

13 E hele mai oukou io’u nei, e ka poe Genetile, a e hoike aku no au ia oukou i na mea nui ae, i ka ike i hunaia iho no ka manaoio ole.

14 E hele mai oukou io’u nei, e ko ka hale o Iseraela, a e hoikeia’ku auanei ia oukou ka nani o na mea nui a ka Makua i hoahu iho ai no oukou, mai ka hookumuia’na mai o ke ao nei; a ua hiki ole mai ia ia oukou, no ka manaoio ole.

15 Aia hoi, i ka wa i nahae ai ia oukou kela paku o ka manaoio ole, ka mea e kaohi ana ia oukou e noho ma ko oukou noho weliweli o ka naau hewa a paakiki; a me ka makapo o ka hoomaopopo ana, alaila, e hoikeia aku na mea nui a kupanaha, i hunaia’i mai ka hookumuia’na mai o ke ao nei mai o oukou ae; he oiaio, i ka wa a oukou e hea aku ai i ka Makua ma ko’u inoa, me ka naau pepe a me ka uhane mihi, alaila, e ike nooukou ua hoomanao no ka Makua i ka berita ana i hana aku ai i ko oukou poe kupuna, e ko ka hale o Iseraela;

16 A, alaila, e weheweheia’ku ka’u mau hoikeana, a’u i kauoha aku ai e palapalaia e ka’u kauwa o Ioane, ma na maka o na kanaka a pau. E hoomanao, i ka wa a oukou e ike ai i keai mau mea, e ike no oukou us kokoke mai ka manaw e hoikeia’ku ia mau mea ma ka hana io;

17 Nolaila, i ka wa a oukou e loaa’i keia mooolelo, ua hiki ia oukou ke ike ua hoomaka ae la ka hana a ka Makua maluna iho o ka ili a pau o ka aina.

18 Nolaila, e mihi oukou, e ko na welau a pau o ka honua, a e hele mai io’u nei, a e manaoio i ko’u euanelio, a e bapetizoia ma ko’u inoa; no ka mea, o ka mea e manaoio ana, a bapetizoia, e hoolaia oia; aka, o ka mea e manaoio ole ana, e hoohewaia oia; a e hahai no na ouli i ka poe manaoio mai i ko’u inoa.

19 A pomaikai oia ka mea e loaa e onipaa ana i ko’u inoa, ma ka la hope, no ka mea, e hookiekieia’e oia iluna e noho ma ke aupuni i hoomakaukauia’i nona mai ka hookumuia ana mai o ke ao nei. A, aia hoi, owau no ka mea nana i olelo aku i keia mea. Amene.

1 [mokuna 2, paukū 1] Ano, ua kakau iho au, o Moroni nei, i na olelo i kauohaia mai ai ia’u, e like me ko’u hoomanao ana; a ua hai aku au ia oe i na mea a’u i sela aku ai; nolaila, mai noho a hoopa aku ia mau mea, e hiki ia oe ke unuhi; no ka mea, ua papaia mai ia mea ia oe, ke ole he mea naauao ia mahope i ke Akua.

2 A, aia hoi, ua aeia no oe, nau e hoike aku i na papa i kela poe, ka poe e kokua auanei e hoopuka mai i keia hana;

3 A e hoikeia’ku auanei ia mau mea i na mea ekolu e ka mana o ke Akua; nolaila, e ike no lakou me ka oiaio, he oiaio no ua mau mea nei.

4 A ma ka waha o na mea ike maka ekolu, e hookupaaia keia mau mea; a o ka hoike ana o na mea ekolu, a me keia hanam, iloko o ia mea e hoikeia’ku ai ka mana o ke Akua, a me kana olelo no hoi, ka mea a ka Makua, a me ke Keiki, a me ka Uhane Hemolele e hoike aku ana; a e ku auanei keia mau mea a pau i mea hoike e ku e aku i ko ke ao nei, ma ka la hope.

5 A ina paha e mihi lakou, a e hele aku i ka Makua la ma ka inoa o Iesu, e hookipaia no lakou iloko o ke aupuni o ke Akua. Ano, ina aohe o’u mana no keia mau mea, e noonoo pono oukou, no ka mea, e ike auanei oukou he mana ko’u, ia oukou e ike mai ai ia’u, a e ku iho kakou imua o ke akua ma ka la hope. Amene.

1 [mokuna 3, paukū 1] Ano, ke hoomau nei au, o Moroni, e kakau iho i ka mooolelo o Iareda a me kona kaikaina.

2 No ka mea, eia kekahi, mahope mai o ka ka Haku hoomakaukau ana i na pohaku a ke kaikaina a Iareda i hali aku ai iloko o ka mauna, a kau iho la oia i na pohaku iloko o na moku i hoomakaukauia’i, kekahi mamua, kekahi mahope; a, aia hoi, hoomalamalama mai la lakou i na moku olaila.

3 A pela ka Haku i hoomakaukau mai ai i na pohaku e alohi mai iloko o ka pouli, e hoomalamalama mai i na kanaka, i na wahine, a me na keiki, i ole ai lakou e holo aku i kela kapa o na kai nui ma ka pouli.

4 [m 3, p 2] A eia kekahi, ia lakou i hoomakaukau iho ai i na ano a pau o ka ai, i hiki ia lakou ma ia mea ke ola maluna o ke kai, a me ka ai no hoi no ko lakou mau pua a mau ohana holoholona, a me kela holoholona keia holoholona a o na manu a lakou e hali pu ai me lakou. A eia kekahi, ia lakou i hana’i i keia mau mea a pau, ee aku la lakou maluna o ko lakou mau moku, a hookuu aku la iloko o ke kai, e haawi ana ia lakou iho i ka Haku, i ko lakou Akua.

5 A eia kekahi, hoonou iho la ka Haku ke Akua i ka makani ikaika loa maluna iho o ka ili o no kai, i ka aina i olelo mua ia’i; a pela lakou i oalaia’i maluna o na ale o ke kai imua o ka makani.

6 A eia kekahi, ua kanuia lakou i na manawa he nui wale iloko o na hohonu o ke kai, no na ale nui i popoi ae maluna iho o lakou, a me na ino huhu nui a weliweli i hanaia e ka ikaika loa o ka makani.

7 [m 3, p 3] A eia kekahi, ia lakou i kanuia’i iloko o ka hohonu, aohe he kai i hiki ke hoopilikia mai ia lakou, ua pilipaa ko lakou mau moku me he bola la, a ua pilipaa no hoi na moku e like me ka halelana o Noa; nolaila, ia lakou i hoopuniia’i a puni e na kai he nui, hea aku la lakou i ka Haku, a lawe hou ae la oia ia lakou maluna o ka ili o na kai.

8 A eia kekahi, aole i oki iki ka pa ana o ka makani i ka aina i olelo mua ia’i, oiai lakou maluna o na kai; a pela lakou i puhiia’i imua o ka makani;

9 A himeni aku la lakou i na himeni hoolea i ka Haku; he oiaio, himeni aku la ke kaikaina o Iareda i na himeni hoolea i ka Haku, a aloha aku la a hoolea aku la oia i ka Haku a pau ae la ka la; a i ka po ana, aole lakou i hooki iho i ka hoolea aku i ka Haku.

10 A pela lakou i puhiia mai ai; a, ua hiki ole i na kupu nui o ke kai ke wawahi mai ia lakou, aole hoi i hiki i ke kohola ke hana ino mai ia lakou; a he malamalama mau ko lakou, ina maluna o ke kai paha, a i ole malalo paha.

11 A pela lakou i puhiia mai ai, ekolu haneri a me hookahi kanahakumamaha la maluna o ke kai;

12 A pae iuka lakou ma ke kahakai o ka aina i olelo mua ia’i. A i ka wa a lakou i ku iho ai i ko lakou mau wawae maluna o kahakai o ka aina i olelo mua ia’i, kulou iho la lakou ma ka ili o ka aina, a hoohaahaa iho la ia lakou iho imua o ka Haku, no ka nui loa o kona mau lokomaikai aloha maluna o lakou.

13 [m 3, p 4] A eia kekahi, hele aku la lakou maluna o ka ili o ka aina, a hoomaka ae la e mahiai i ka honua.

14 A na Iareda na keikikane eha; a ua kapaia lakou o Iacoma, a o Gilega, a o Maha, a me Oriha.

15 A ua hanau ae la no keikikane a me na kaikamahine na ke kaikaina o Iareda no hoi.

16 A o na makamaka o Iareda me kona kaikaina, he iwakaluakumamalua o lakou; a hanau mai la no hoi na keikikane a me na kaikamahine na lakou, mamua o ko lakou hiki ana i ka aina i olelo mau ia’i; a nolaila, hoomaka ae la lakou e lilo i poe nui.

17 A ua aoia’e lakou e hele haahaa imua o ka Haku; a ua aoia no hoi lakou mailuna mai.

18 [m 3, p 5] A eia kekahi, hoomaka ae la lakou e kawowo aku maluna iho o ka ili o ka aina, a e hoonui a e mahiai i ka honua; a mahuahua ae la lakou i ikaika ma ka aina.

19 A hoomaka ae la ke kaikaina o Iareada e elemakule, a ike iho la e iho koke ana no oia i ka lua kupapau; no ia mea, i ae la oia ia Iareda, Ina kaua e houluulu mai i ko kaua poe kanaka i kahi hookahi, e hiki ia kaua ke helu aku ia lakou, e hiki ai ia kaua ke lohe i ka lakou mea e makemake mai ai ia kaua, mamua o ko kaua iho ana i ko kaua mau lua kupapau.

20 A nolaila ua houluuluia mai la na kanaka i kahi hookahi. Ano, he iwakaluakumamalua no ka nui o na keikikane a me na kaikamahine a ke kaikaina o Iareda; a he umikumamalua ka nui o na keikikane a me na kaikamahine a Iareada, o na keikikane ana eha o lakou.

21 A eia kekahi, helu ae la laua i ko laua poe kanaka; a mahope mai o ko laua helu ana ia lakou, ninau ae la laua ia lakou i na mea a lakou i makemake ai na laua e hana, mamua o ko laua iho ana i ko laua mau lua kupapau.

22 A eia kekahi, makemake mai la na kanaka ia laua, e poni iho laua i kekahi o ka laua mau keikikane i alii maluna iho o lakou.

23 Ano hoi, he mea eha keia ia laua. Aka, i aku la ke kaikaina o Iareda ia lakou, He oiaio, e alakai ana keia mea iloko o ka noho pio ana.

24 Aka i ae la o Iareda i kona kaikaina, E ae aku ia lakou e loaa’i i alii no lakou; a nolaila, i aku la oia ia lakou, E koho mai oukou mailoko ae o ka maua mau keikikane i alii, oia, i ka mea a oukou e makemake ai.

25 [m 3, p 6] A eia kekahi, koho ae la lakou i ka makahiapo a ke kaikama o Iareda; a o Pagaga kona inoa. A eia kekahi, hoole aku la oia, aole hoi e lilo i alii no lakou. A makemake mai la na kanaka i kona makuakane e koi ae ia ia; aka, makemake ole kona makuakane ia mea; a kauoha aku la oia ia lakou, Mai noho a koi aku i kekahi kanaka e lilo i alii no lakou.

26 A eia kekahi, koho ae la lakou i na kaikaina a pau o Pagaga, a, aole o lakou makemake.

27 A eia kekahi, aole no hoi o na keikikane a Iareda, o lakou a pau, koe hookahi wale no; a o Oriha, ua poniia oia i alii maluna o na kanaka.

28 A hoomaka ae la oia e noho alii, a hoomaka ae la na kanaka e pomaikai; a lilo iho la lakou i poe waiwai loa.

30 A eia kekahi, hele haahaa ae la o Oriha imua o ka Haku, a ua hoomanao iho la i na mea nui a ka Haku i hana mai ai i kona makuakane, a ao aku la no hoi i kona poe kanaka i na mea nui a ka Haku i hana mai ai i ko lakou poe makuakane.

1 [mokuna 3, paukū 7] A eia kekahi, hana iho la o Oriha i ka hoopono maluna o ka aina me ka pololei i kona mau la a pau, a ua nui loa no hoi kona mau la.

2 A hanau ae la na keikikane a me na kaikamahine nana; he oiaio, hanau ae la he kanakolukumamakahi nana, a mawaena o lakou he iwakaluakumamakolu keikikane.

3 A eia kekahi, hanau ae la o Kiba nana i kona wa elemakule. A noho alii iho la o Kaba ma kona hakahaka; a hanau ae la o Corihora na Kiba.

4 A i ka makahiki kanakolukumamalua o Corihora, kipi ae la oia i kona makuakane, a hele ae la a noho iho la ma ka aina o Nehora; a hanau ae la na keikikane a me na kaikamahine nana; a lilo iho la lakou i poe maikai loa ma ka helehelena; nolaila, kauo ae la o Corihora i na kanaka he nui mahope ona.

5 A ia ia i houluulu iho ai he puali kaua, pii mai la oia i ka aina o Morona, kahi a ke alii i noho ai, a lawe ae la ia ia i pio, a ma ia mea ko ae la ka olelo a ke kaikaina a Iareda, e laweia’i auanei lakou iloko o ka noho pio ana.

6 Ano, o ka aina o Morona, kahi a ke alii i noho ai, ua kokoke ia i ka aina i kapaia o Neoneo e ko Nepai poe.

7 A eia kekahi, noho pio iho la o Kiba, a me kona poe kanaka, malalo iho o Corihora kana keiki, a hiki wale aku i kona wa elemakule loa; aka hoi, hanau ae la o Sule na Kiba, ma kona wa elemakule, oiai oia e noho pio ana.

8 [m 3, p 8] A eia kekahi, ua huhu iho la o Sule me kona kaikuaana; a mahuahua ae la o Sule i ikaika, a lilo i mea mana, mamuli o ka ikaika o ke kanaka; a ua mana no hoi ia i ka hooponopono.

9 Nolaila, hele ae la oia i ka puu Eperaima, e hoohehee iho la noloko mai o ka puu, a hana iho la i na pahikaua o ke kila na ka poe ana i kauo mai ai me ia; a mahope iho o kona kahiko ana ia lakou me na pahikaua, hoi ae la oia i ka kulanakauhale Nehora, a hoouka aku la i ke kaua i kona kaikuaana Corihora, a ma ia mea loaa iho la ia ia ke aupuni, a hoihoi hou ae la ia mea i kona makuakane, ia Kiba.

10 Ano, no keia mea a Sule i hana’i, hooili mai la kona makuakane i ke aupuni maluna iho ona; nolaila, hoomaka ae la oia e noho alii ai ma ka hakahaka o kona makuakane.

11 A eia kekahi, hana iho la oia i ka hoopono ma ka pololei; a hoopalahalaha aku la i kona aupuni maluna iho o ka ili a pau o ka aina, no ka mea, ua lilo ka poe kanaka i lehulehu loa.

12 A eia kekahi, hanau ae la na keikikane a me na kaikamahine he nui na Sule no hoi.

13 A mihi iho la o Corihora i na mea ino he nui ana i hana’i; nolaila, haawi ae la o Sule ia ia i mana ma kona aupuni.

14 A eia kekahi, na Corihora na keikikane a me na kaikamahine he nui. A aia mawaena o na keikikane a Corihora kekahi, o Noa kona inoa.

15 [m 3, p 9] A eia kekahi, kipi aku la o Noa ia Sule, ke alii, a me kona makuakane Corihora no hoi, a kauo ae la ia Cohoro, i kona hoahanau ponoi, a me kona poe hoahanau a pau a me kekahi poe he nui o na kanaka.

16 A hoouka mai oia i ke kaua ia Sule, ke alii, a ma ia mea loaa iho la ia ia ka aina o ko lakou hooilina mua; a lilo iho la oia i alii maluna o kela hapa o ka aina.

17 A eia kekahi, hoouka hou mai oia i ke kaua ia Sule, ke alii; a lawe aku la oia ia Sule, ke alii, a hali pio ae la ia ia i Morona.

18 A eia kekahi, ia ia e kokoke ana e pepehi mai ia ia, nihi ae la na keiki a Sule iloko o ka hale o Noa ma ka po, a pepehi aku la ia ia, a wawahi ae la i ka pani o ka halepaahao, a kai ae la i ko lakou makuakane mawaho, a hoonoho ioh la ia ia maluna iho o kona noho alii ma kona aupuni iho.

19 Nolaila, kukulu iho la ke keiki a Noa i kona aupuni ma kona hakahaka; aole nae lakou i loaa hou ka mana maluna o Sule ke alii; a o ka poe kanaka malalo iho o ka noho alii ana o Sule, ke alii, ua pomaikai nui loa iho la lakou a mahuahua ikaika ae la.

20 A ua maheleia ka aina; a he mau aupuni elua, o ke aupuni o Sule, a me ke aupuni o Cohora, ke keiki a Noa.

21 A kena ae la o Cohora, ke keiki a Noa, i kona poe kanaka e kaua mai ia Sule, a ma ua kaua nei ua lanakila aku la o Sule maluna o lakou, a ua pepehi aku la ia Cohora a make.

22 Ano, he keikikane ka Cohora i kapaia o Nimeroda; a haawi mai la o Nimeroda i ke aupuni o Cohora ia Sule, a loaa ia ia ke aloha ma na maka o Sule; no ia mea, haawi ae la o Sule i na lokomaikai nui maluna iho ona, a hana aku la oia ma ke aupuni o Sule e like me kona mau makemake;

23 A ma ke au ia Sule no hoi hele mai la na kaula mawaena o na kanaka, he poe i hoounaia mai mai ka Haku mai, e wanana ana e lawe ana ka hewa a me ka hoomana kii ana o na kanaka he poino maluna iho o ka aina, a e lukuia lakou, ina aole lakou e mihi.

24 [m 3, p 10] A eia kekahi, kuamuamu na kanaka i ka poe kaula, a hoomaewaewa ae la ia lakou. A hoopai aku la ke Alii Sule i ua poe la a pau, ke poe i kuamuamu mai i ka poe kaula;

25 A kau iho la oia i kekahi kanawai mawaena o ka aina a puni, e haawi ana ia kanawai i ka mana i ka poe kaula, i hele aku ai lakou i kela wahi keia wahi a lakou e makemake ai; a ma o keia mea la ua kaiia mai na kanaka i ka mihi.

26 A no ka mihi ana o na kanaka i ko lakou mau hewa a mau hoomana kii ana, hookoe mai la no ka Haku ia lakou, a hoomaka ae la lakou e pomaikai hou ma ka aina. A eia kekahi, hanau mai la na keikikane a me na kaikamahine na Sule i kona wa elemakule.

27 A, aole kaua hou ma na la o Sule; a hoomanao iho la oia i na mea nui a ka Haku i hana mai ai no kona poe kupuna i ka lawe ana mai ia lakou mai kela kapa o ka hohonu nui, iloko o ka aina i olelo mua ia’i, nolaila, hana iho la oia i ka hoopono ma ka pololei i kona mau la a pau.

1 [mokuna 3, paukū 11] A eia kekahi, hanau ae la o Omera nana, a noho alii ae la o Omera ma kona hakahaka. A hanau ae la o Iareda no Omera; a hanau ae la na keikikane a me na kaikamahine na Iareda.

2 A kipi mai la o Iareda i kona makuakane, a hele ae la a noho iho la ma ka aina o Heta. A eia kekahi, hoomalimali ae la oia i na kanaka he nui wale, no na olelo maalea ana, a hiki i ka wa i loaa ka hapalua o ke aupuni ia ia.

3 A ia ia i loaa’i ka hapalua o ke aupuni, kaua mai la oia i kona makuakane, a lawe ae la oia i kona makuakane iloko o ka noho pio ana, a hookauwa mai la ia ia ma ka noho pio ana.

4 Ano, ma na la o ke au ia Omera, e noho pio ana oia i ka hapalua o kona mau la. A eia kekahi, hanau ae la na keikikane a me na kaikamahine nana, a mawaena o lakou o Eseroma a me Corianatuma;

5 A ua huhu nui loa laua no na hana a Iareda, ko laua kaikuaana, a houluulu ae la laua i puali kaua, a kaua aku la ia Iareda. A eia kekahi, kaua aku la laua ia ia ma ka po.

6 A ia laua i luku aku ai i ka poe kaua o Iareda, ua kokoke laua e pepehi aku ia ia no hoi; a noi ae la oia ia laua e pepehi ole mai ia ia, a nana no e haawi mai i ke aupuni i kona makuakane. A hookuu aku la laua i kona ola ia ia.

7 Ano, kaumaha nui loa iho la o Iareda no ka lilo o ke aupuni, no ka mea, ua kau iho la oia i kona naau maluna o ke aupuni, a maluna o ka hanohano o ke ao nei.

8 Ano, ua akamai loa ke kaikamahine a Iareda, a e ike ana i na kaumaha o kona makuakane, manao iho la oia e imi i mea e hiki ai ia ia ke hoihoi hou i ke aupuni i kona makuakane.

9 Ano, ua maikai loa ka helehelena o ke kaikamahine a Iareda. A eia kekahi, kamakamailio ae la oia me kona makuakane; a i ae la ia ia, Ma o ke aha la la ke kaumaha nui o ko’u makuakane me neia? Aole anei oia i heluhelu i ka mooolelo a ko kakou poe kupuna i lawe mai ai, mai kela kapa o ka hohonu nui? Ano hoi, aole anei he mooolelo kekahi no ka poe o ka wa kahiko, na lakou ma o ko lakou mau manao kuka malu la i loaa’i no aupuni a me ka hanohano nui?

10 Ano la, e hoouna aku ko’u makuakane ia Akisa, ke keiki a Kimanora; a, aia hoi, ua maikai au, a e haa no au imua ona, a e hoolealea aku au ia ia, i makemake mai ai oia ia’u i wahine nana; nolaila, ina e noi mai oia ia oe nau e haawi aku ia’u i wahine nana, alaila, nau e olelo aku, E haawi aku no au ia ia, ina e lawe mai oe io’u nei i ke poo o ko’u makuakane, o ke alii.

11 [m 3, p 12] A, he hoaaloha O Omera no Akisa, nolaila, ia Iareda i hoouna ae ai ia Akisa, haa ae la ke kaikamahine a Iareda imua ona, a lealea iho la oia ia ia la, a makemake iho la oia ia ia i wahine nana. A eia kekahi, i ae la oia ia Iareda, E haawi mai oe ia ia ia’u, i wahine na’u.

12 A i aku la o Iareda ia ia, E haawi aku no au ia ia ia oe, ina e lawe mai oe io’u nei i ke poo o ko’u makuakane, ke alii.

13 A eia kekahi, hoakoakoa ae la o Akisa iloko i ka hale o Iareda i kona poe hoahanau a pau, a i ae la ia lakou, E hoohiki mai anei oukou ia’u e onipaa mai oukou ia’u, ma ka mea a’u e noi aku ai ia oukou?

14 A eia kekahi, hoohiki ae la lakou a pau ia ia, ma ke Akua o ka lani, a ma na lani no hoi, a ma ka honua hoi, a ma ko lakou mau poo iho, o ka mea e hoano e mai ke kokua ana ae a Akisa e noi ai, e lilo kona poo; a o ka mea e hai aku i ka mea a Akisa e hoike ae ai ia lakou, oia ke kailiia’ku kona ola.

15 A eia kekahi, pela lakou i hui pu ai me Akisa. A hana ae la o Akisa ia lakou i na hoohiki i haawiia mai e ka poe o ka wa kahiko, ka poe nana i imi no hoi i ka mana, i haawiia mai ai maluna nei, mai ia Kaina mai, he pepehi kanaka ia mai kinohi mai.

16 A ua malamaia ia mau mea e ka mana o ka diabolo e lawelawe aku i keia mau hoohiki i na kanaka, e hoopaa iho ia lakou ma ka pouli, e kokua i ka poe e imi ana i ka mana, e loaa’i ka mana, a e pepehi kanaka, a e powa, a e wahahee, a e hana i na ano a pau o ka hewa a me na moe kolohe.

17 A o ke kaikamahinea Iareda no ka mea nana i hookomo iho iloko o kona naau e imi aku i ua mau mea nei o ka wa kahiko; a hahao ae la o Iareda ia mea iloko o ka naau o Akisa; nolaila, hana ea la o Akisa ia mea i kona poe hoahanau a poe makamaka, e alakai ana ia lakou, ma o na olelo malimali la, e hana i kela mea k keia mea ana i makemake ai.

18 A eia kekahi, hana iho la lakou i kekahi hui malu pu ana, e like me ka poe o ka wa kahiko; a o keia hui malu pu ana he mea hoopailua a hewa ia maluna ae o na mea a pau, ma ka maka o ke Akua;

19 No ka mea, aole e hana ana ka Haku ma na hui malu pu ana, aole hoi ona makemake e hookahe aku kanaka i ke koko, aka, ma na mea a pau ua papa mai la ia mea, mai ka makamua mai o na kanaka.

20 [m 3, p 13] Ano, aole au, o Moroni, i kakau i ke ano o ko lakou mau hoohiki a mau hui pu ana, na ka mea, ua hoikeia mai ia’u aia no keia mau mea mawaena o na kanaka a pau, a aia no ia mau mea mawaena o ko Lamana poe,

21 Ma o ua mau mea la i hiki mai ai ka anaiia’na o keia poe kanaka, ka poe a’u e olelo nei, a me ka anaiia’na no hoi o ka poe kanaka o Nepai;

22 A o ka lahuikanaka e kokua ana i na hui malu pu ana me ia, e loaa ai ka mana a me ka waiwai, a hiki i ka wa e laha aku ai ia mau mea maluna o ka lahuikanaka, aia hoi, a anaiia’ku auanei lakou, no ka mea, aole e ae aku ka Haku i ke koko o kona poe hoano, ka mea e hookaheia aku auanei e lakou, e hea mau aku ia ia mai ka lepo ae no ka hoopai maluna o lakou, me ka hoopai ole ae ona no lakou;

23 Nolaila, e ka poe Genetile, he mea naauao i ke Akua i hoikeia’ku ai keia mau mea ia oukou, i hiki ia oukou ma ia mea ke mihi i ko oukou mau hewa, a e ae ole aku i keia hui pu malu pepehi kanaka ana e kau mai maluna iho o oukou, na mea i kokoluia iho ai e loaa ka mana a me ka waiwai, a i ka hana hoi, he oiaio, i ka hana hoi o ka luku e hiki mai maluna iho o oukou; he oiaio, o ka pahikaua o ka hoopai o ke Akua mau loa, e haule iho maluna o oukou, i ko oukou hoohioloia’na a lukuia’na, ina e ae aku oukou i keia mau mea e hanaia;

24 Nolaila, ke kauoha aku nei ka Haku ia oukou, i ka wa a oukou e ike ai i keia mau mea e hiki mai mawaen o oukou , e ala’e no oukou e ike i ko oukou noho weliweli ana, no keia hui malu pu ana mawaena auanei o oukou, a i ole, auwe ia mea, no ke koko o ka poe i pepehiia; no ka mea, e hea ae ana lakou mai ka lepo ae no ka hoopai maluna iho o ia mea, a maluna iho no hoi o ka poe nana ia mea e kukulu iho.

25 No ka mea, e hiki mai ana keia, o ka mea nana ia mea e kukulu iho, e imi ana oia e hoohiolo aku i ke ku okoa ana o na aina, na lahuikanaka a me na aukanaka a pau; a e lawe mai ana ia i ka anaiia’na o na kanaka a pau, no ka mea, ua kukuluia iho e ka diabolo, oia no ka makua o na wahahee a pau; oia hookahi no ua mea wahahee la nana i hoowalewale i ko kakou mau kupuna mau; he oiaio, oia no ua mea wahahee hookahi la nana i hookonokono aku i na kanaka e pepehi kanaka, mai kinohi mai; nana i hoopaakiki iho i na naau o na kanaka, i pepehi aku ai lakou i ka poe kaula, a hailuku ia lakou, a hookuke mai ia lakou mawaho, mai kinohi mai.

26 No ia mea, ua kauohaia au, o Moroni, e kakau iho i keia mau mea, i hoopauia’ku ai ka hewa, a i hiki mai ai ka manawa, i ole ai o Satana he mana maluna iho o na naau o na keiki a kanaka, aka, i ao hoohuliia’i lakou e hana maikai mau, i hele mai ai lakou i ka punawai o ka pono a pau, a e hoolaia.

1 [mokuna 4, paukū 1] Ano, ke hoomau aku nei wau, o Moroni, me ka’u mooolelo. Nolaila hoi, eia kekahi no ka hui malu pu ana o Akisa a me kona poe makamaka, aia, hoohiolo ae la lakou i ke aupuni o Omera;

2 Aka hoi, ua aloho mai la ka Haku ia Omera, a i kana poe keikikane a i kana poe kaikamahine, ka poe i imi ole ai i kona make.

3 A ao mai la ka Haku ia Omera ma ka moe uhane, e hele aku oia mailoko aku o ka aina; nolaila, haalele aku la o Omera me kona ohana i ka aina, a hele aku la i na la he nui wale, a hiki ae la a kaalo ae la ma ka puu o Sima, a hiki ae la ma kahi o ko Nepai poe ia anaiia’i, a mailaila aku i ka hikina, a hiki aku la i kahi i kapaia o Abaloma, ma ke kahakai, a malaila oia i kukulul iho ai i kona halelewa, a me kana poe keikikane a me kana poe kaikamahine, a me kokona hale a pau, koe o Iareda a me kona ohana.

4 [m 4, p 2] A eia kekahi, ua poniia’e la o Iareda i alii maluna o na kanaka, e ka lima o ka hewa; a haawi ae la oia ia Akisa i kana kaikamahine i wahine nana.

5 A eia kekahi, imi iho la o Akisa i ke ola o kona makuahonowaikane; a noi aku la oia i ua poe la, ana i hoohiki ai ma ka hoohiki o ka poe o ka wa kahiko, a loaa iho la ia lakou ke poo o kona makuahonowaikane, me ia i noho ai maluna o kona noho alii, e hoolohe ana i ka na kanaka;

6 No ka mea, no ka nui o ke kawewo ana o keia kuikahi malu a hewa, ua hoino iho ia mea i na naau o na kanaka a pau; nolaila, ua pepehiia o Iareda maluna iho o kona noho alii, a noho alii iho la o Akisa ma kona hakahaka.

7 A eia kekahi, hoomaka ae la o Akisa e manao ino ae i kana keikikane, nolaila, hoopaa aku la oia ia ia iloko o ka halepaahao, a maluna uuku aku la ia ia i kahi ai, a hiki aku i ka make ana ona.

8 Ano, ua huhu ke kaikaina o ka mea i make, (a o Nimara kona inoa,) i kona makuakane, no ka mea a kona makuakane i hana mai ai i kona kaikuaana

9 A eia kekahi, houluulu ae la o Nimara i kekahi poe kanaka he uuku, a holo aku la oia mailoko aku o ka aina, a hele ae la a noho pu iho la me Omera.

10 A eia kekahi, hanau ae la na keikikane e ae na Akisa, a loaa iho la ia lakou na naau o na kanaka, me ka hoohiki e ana nae o lakou ia ia e hana aku i na ano a pau o ka hewa, e like me ka mea ana e makemake ai.

11 Ano, ua puniwaiwai ka poe kanaka o Akisa, e like me Akisa i puni mana’i; no ia mea, haawi ae la na keiki a Akisa ia lakou i ke kala, a ma o ua mea la alakai ae la lakou i ka nui loa o na kanaka mamuli o lakou;

12 A hoomaka ae la ke kaua mawaena o na keiki a Akisa a me Akisa, a mau ae la ia no na makahiki he nui; he oiaio, i ka lukuia’na aneane e pau loa na kanaka o ke aupuni; he oiaio, ua pau loa, he kanakolu wale no i koe, a me ka poe i holo pu aku ai me ko ka hale o Omrea;

14 A eai kekahi, hoomaka ae la ka elemakule ana o Omera, aka hoi, ma kona wa elemakule hanau ae la o Emera nana; a poni iho la oia ia Emera, e noho alii ma kona hakahaka.

15 A mahope iho o kona poni ana ia Emera i alii, ike aku la oia i ka maluhia ma ka aina no na makahiki elua, a make aku la ia, ua ike oia i na la he nui loa, i piha me ke kaniuhu. A eia kekahi, noho alii iho la o Emera ma kona hakahaka, a hoopiha iho la i na kapuai o kona makuakane.

16 [m 4, p 3] A hoomaka hou ae la ka Haku e lawe aku i ka poino mai ka aina aku, a pomaikai nui loa iho la ko ka hale o Emera malalo iho o ke au ia Emera; a ma na makahiki kanaonokumamalua, ua lilo iho la lakou i ikaika loa, a lilo iho la i waiwai loa,

17 Me na ano a pau o ka hua, a o na hua liilii, a o na kilika, a o ka ie nani, a o ke gula, a o ke kala, a o na mea maikai,

18 A me na ano a pau no hoi o na holoholona, o na bipi kane, a me na bipi wahine, a o na hipa, a me na puaa, a o na kao, a me na ano e ae he nui wale no hoi o na holoholona i pono ke aiia e kanaka;

19 A he poe lio no hoi ko lakou, e me na hoki, a he poe elepani kekahi, a me na cureloma, a me na cumoma; a he mau mea pono keia mau mea a pau no kanaka, a ua oi loa aku ke pono o na elepani, a me na cureloma, a me na cumoma.

20 A pela ka Haku i ninini mai ai i kona mau mea pomaikai maluna o keia aina, i maikai loa maluna o na aina e ae a pau; a kauoha mai la oia o ka mea nana e loaa ia aina, e loaa ia mea i ka Haku, a i ole e anaiia lakou i ka wa a lakou i oo ai ma ka hewa; no ka mea, maluna o ka poe me neia, wahi a ka Haku, e nonono iho au i ka piha o ko’u inaina.

21 A hana aku la o Emera i ka hoopono ma ka pololei, i kona mau la a pau, a hanau ae la na keikikane a me na kaikamahine nana; a hanau ae la o Corianatuma nana; a poni iho la oia ia Corianatuma e noho alii ma kona hakahaka.

22 A mahope iho o kona poni ana ia Corianatuma e noho alii ma kona hakahaka, ola ae la ia i na makahiki eha, a ike aku la oia i ka maluhia ma ka aina; he oiaio, ike ae la ia i ke Keiki a ka pono, a hauoli iho la a kaena ae la ma kona la; a make aku la ia ma ka maluhia.

23 A eia kekahi, hele ae la o Corianatuma ma na kapuai o kona makuakane, a kukulu iho la i na kulanakauhale kaulana he nui, a lawelawe ae la i ka mea i maikai i kona poe kanaka, i kona mau la a pau. A eia kekahi, aohe ana keiki, a hiki wale i kona wa elemakule loa.

24 A make aku la kana wahine, a hookahi haneri kumamalua makahiki ona. A lawe ae la o Corianatuma i kekahi wahine puupaa opio, i wahine nana, ma kona wa elemakule, a hanau ae la na keikikane a me na kaikamahine nana; nolaila, ola aku la oia a hiki aku i ka hookahi haneri kanahakumamalua makahiki ona.

25 A eia kekahi, hanau ae la o Coma nana, a noho alii iho la o Coma ma kona hakahaka; a noho alii iho la ia hookahi kanaha a me na makahiki keu eiwa, a hanau ae la o Heta nana; a hanau ae la na keikikane a me na kaikamahine e ae no hoi nana.

26 A ua laha hou aku la na kanaka maluna iho o ka ili o ka aina, a hoomaka hou ae la he hewa nui wale maluna o ka ili o ka aina, a hoomaka ae la o Heta e apo hou aku i na mea malu o ka wa kahiko, e pepehi iho ai i kona makuakane.

27 A eia kekahi, kaili aku la oia i ka noho alii o kona makuakane; no ka mea, pepehi ae la oia ia ia a make loa me kana pahikaua iho; a noho alii iho la oia ma kona hakahaka.

28 A hiki hou mai la na kaula ma ka aina, e hea ana i ka mihi ia lakou; e hoomakaukau iho no lakou i ke alanui no ka Haku, a i ole e hiki mai kekahi poin maluna iho o ka ili o ka aina; he oiaio, e hiki mai ka wi nui, a ma ia mea e lukuia’i lakou, ina aole lakou e mihi.

29 Aka, manaoio ole iho la na kanaka i na olelo a ka poe kaula, aka, hookuke ae la lakou i ua poe kaula la mawaho; a hoolei ae la lakou i kekahi poe o ua poe la iloko o na lua, a haalele ae la ia lakou e make. A eia kekahi, hana ae la lakou i keia mau mea a pau mamuli o ke kauoha a ke alii Heta.

30 [m 4, p 4] A eia kekahi, hoomaka ae la ka wi nui maluna o ka aina, a hoomaka ae la ka poe kamaaina e luku emo ole loa ia, no ka wi; no ka mea, aohe he ua maluna iho o ka ili o ka honua;

31 A puka mai la na nahesa niho awa no hoi maluna iho o ka ili o ka aina, a hoomake mai la i na kanaka he nui. A hoomaka ae la ko lakou mau pua holoholona e holo aku imua o na nahesa niho awa, i ka aina hema, i kapaia e ko Nepai poe, o Zarahemela.

32 A eia kekahi, ua nui na mea o lakou i make ma ke ala; aka hoi, ua holo aku kekahi poe iloko o ka aina hema.

33 A hooki iho la ka Haku i na nahesa i alualu hou ole ai ia lakou, aka, i alalai mai ai lakou i ke ala, i hiki ole ai i na kanaka ke maalo ae; i haule iho ai ka mea e hoao ana e maalo ae, ma o na nahesa nohi awa la.

34 A eia kekahi, hahai aku la na kanaka i ke ala o na holoholona, a ai iho la i na heana o ka poe i haule iho ma ke ala, a pau ae la ua poe heana la i ka aiia e lakou. Ano, i ka wa a na kanaka i ike ai e make ana lakou, hoomaka ae la lakou e mihi i ko lakou mau hewa, a hea aku i ka Haku.

35 A eia kekahi, ia lakou i hoohaahaa nui ai ia lakou iho imua o ka Haku, hoouna mai la ia i ka ua maluna iho o ka ili o ka honuia, a hoomaka ae la na kanaka e ola hou, a hoomaka ae la ka hua e hoohuaia mai ma na aina akau, a ma na aina a pau a puni. A hoike mai la ka Haku i kona mana ia lakou, ma ka hoola ana ia lakou i ka wi.

1 A eia kekahi, o Seza, he mamo ia na Heta, no ka mea, ua make o Heta ma ka wi, a me ko kona hale a pau, koe o Seza wale no; nolaila, hoomaka ae la o Seza e kukulu hou i kekahi lahuikanaka i mokumokuia.

2 A eia kekahi, hoomanao iho la o Seza i ka lukuia’na o kona poe kupuna, a kukulu iho la ia i kekahi aupuni pono, no ka mea, hoomanao iho la ia i ka mea a ka Haku i hana’i, ma ka lawe ana ia Iareda a me kona kaikaina mai kela kapa o ka hohonu; a hele aku la oia ma na aoao o ka Haku, a hanau ae la na keikikane a me na kaikamahine nana.

3 A kipi ae la kana keikikane mua, o Seza kona inoa, ia ia; aka hoi, ua hahauia o Seza e ka lima o kekahi powa, no kona waiwai nui loa, a lawe hou mai la ia mea i ka maluhia i kona makuakane.

4 A kukulu iho la kona makuakane i na kulanakauhale he nui maluna iho o ka ili a pau o ka aina. A ola ae la o Seza a elemakule loa iho la; a hanau ae la o Ripalakisa nana, a make aku la ia. A noho iho la o Ripalakisa ma kona hakahaka.

5 [m 4, p 5] A eia kekahi, aole o Ripalakisa i hana i ka mea i pono ma ka maka o ka Haku, no ka mea, he nui na wahine a me na haiawahine ana, a kau aku la i ka mea maluna iho o na poohiwi o kanaka i kaumaha ke haliia’e; he oiaio, auhau aku la oia ia lakou me na auhau kaumaha; a kukulu iho la oia i na hale akea he nui me na auhau.

6 A kukulu iho la oia nona iho i kekahi noho alii nani loa, a kukulu iho la oia i na halepaahao he nui, a o ka mea ae ole aku e noho malalo iho o na auhau, hoolei aku la oia ia ia iloko o ka halepaahao; a o ka mea hiki ole ke hookupu aku i na auhau, hoolei aku la no oia ia ia iloko o ka halepaahao; a kena ae la oia e hana mau lakou no ko lakou ola; a o ka mea e hoole ana e hana, kena ae la oia e pepehiia;

7 Nolaila, loaa iho la ia ia kana hana nani a pau; he oiaio, o kona gula maikai oia kana i kena aku ai e hoomaemaeia iloko o ka halepaahao, a me na ano a pau o ka hana nani oia hoi kana i kena aku ai e hanaia iloko o ka halepaahao.A eia kekahi, hoopopilikia iho la oia i na kanaka me kona mau moe kolohe ana a mau mea hoopailua;

8 A ia ia i noho alii ai no na makahiki hookahi kanahakumamlua, ala ae la na kanaka ma ke kipi aku ia ia, a hoomaka ae la ke kaua hou ma ka aina, a ua pepehiia o Ripalakisa, a ua kipakuia’e kana poe mamo mailoko aku o ka aina.

9 [m 4, p 6] A eia kekahi, mahope mai o na makahiki he nui, houluulu ae la o Morianatona, (he mamo ia na Ripalakisa,) i kekahi puali o na aea, a hele aku la a kaua aku la i ka poe kanaka; a loaa iho la ia ia ka mana maluna iho o na kulanakauhale he nui wale; a lilo iho la ke kaua i eha loa, a mau ia no na makahiki he nui wale, a loaa iho la ia ia ka mana maluna o ka aina a pau, a hoonoho iho la oia ia ia iho i alii maluna o ka aina a pau.

10 A mahope iho o kona hoonoho ana ia ia iho i alii, hoomaka ae la oia i ke kaumaha o na kanaka, a ma ia mea loaa ia ia ka lokomaikai ma na maka o na kanaka, a poni iho la lakou ia ia i alii no lakou.

11 A hana aku la oia i ka pono i na kanaka, aole nae ia ia iho, no ka nui o na poe kolohe ana ona; nolaila, ua kookiia aku oia mai ke alo o ka Haku.

12 A eia kekahi, kukulu iho la o Morianatona i na kulanakauhale he nui wale, a lilo iho la na kanaka i poe waiwai loa malalo iho o kona au, ma na hale, a me ke gula, a me ke kala, a me ka hooulu ana i na hua liilii, a ma na pua a me na ohana holoholona, a ma na mea i hoihoi hou ia mai ia lakou.

13 A ola ae la o Morinatona a elemakule loa, alaila, hanau ae la o Kima nana: a noho alii iho la o Kima ma ka hakahaka o kona makuakane; a noho alii iho la oia no na makahiki ewalu, a make aku la kona makuakane. A eia kekahi, aole o Kima i noho alii ma ka pono, nolaila, aole oia i kokuaia e ka Haku.

14 A ala ae la kona kaikaina a kipi ae la ia ia, a ma keia kipi ana lawe ae la ua kaikaina nei ia ia iloko o ka noho pio ana; a noho pio iho la oia i kona mau la a pau; a hanau ae la na keikikane a me na kaikamahine nana ma ka noho pio ana; a i kona wa elemakule hanau ae la o Levi nana, a make aku la ia.

15 [m 4, p 7] A eia kekahi, hookauwa ae la o Levi ma ka noho pio ana mahope iho o ka make ana o kona makuakane, no na makahiki hookahi kanahakumamalua. A kaua ae la ia i ke alii o ka aina, a ma ua kaua la loaa iho la ia ia iho ke aupuni.

16 A mahope iho o kona loaa ana ia ia iho ke aupuni, hana aku la oia i ka mea pololei ma ka maka o ka Haku, a hoopomaikaiia iho la na kanaka ma ka aina, a ola ae la oia a elemakule maikai iho la, a hanau ae la na keikikane a me na kaikamahine nana; a hanau ae la no hoi oia ia Coroma, ka mea ana i poni iho ai i alii ma kona hakahaka.

17 A eia kekahi, hana aku la o Coroma i ka mea i maikai ma ka maka o ka Haku, i kona mau la a pau; a hanau ae la na keikikane a me na kaikamahine he nui nana; a mahpoe iho o kona ike ana i na la he nui wale, hala aku la oia, e like me ke koena o ko ka honua; a noho alii iho la o Kisa ma kona hakahaka.

18 A eia kekahi, hala aku la no hoi o Kisa, a noho alii iho la o Liba ma kona hakahaka.

19 A eia kekahi, hana iho la no hoi o Liba i ka mea i maikai ma ka maka o ka Haku. A ma na la o Liba ua lukuia na nahesa niho awa; nolaila, hele aku la lakou ma ka aina hema, e imi i na mea no ka poe kanaka o ka aina e ai ai; no ka mea, ua uhiia ka aina me na holoholona o ka ululaau. A lilo iho la no hoi o Liba i mea koa i ka hahai holoholona.

20 A kukulu iho la lakou i kekahi kulanakauhale nui ma ka puali ololi o ka aina, ma kahi a ke kai i hookaawale ai i ka aina.

21 A malama iho la lakou i ka aina hema i nahelehele, e loaa’i na holoholona hihiu. A ua uhiia ka ili a pau o ka aina akau me na kanaka;

22 A ua ikaika loa lakou ma ka hana, a kuai mai a kuai aku lakou, a kalepa ae la lakou kekahi me kekahi, i hiki ia lakou ke loaa ka waiwai.

23 A hana aku la lakou ma na ano a pau o na mea i eliia, a hana aku la lakou i ke gula, a me ka kala, a me ka hao, a me ke keleawe, a me kela ano keia ano o na mea hiki ke hooheheeia; a eli iho la lakou ia mea noloko mai o ka honua; nolaila, hooi i ae la lakou i na puu kiekie o ka lepo e loaa’i ka mea e hoohehee ai, o ke gula, a me ke kala, a o ka hao, a me ke keleawe ulaula. A hana iho la lakou i na ano a pau o ka hana nani.

24 A ia lakou na kilika, a me ka ie milo nani ia; a hana aku la lakou i na ano a pau o ka lole, i hiki ia lakou ke hoaahu mai ia lakou iho i ko lakou olohelohe.

25 A hana aku la lakou i na ano a pau o na mea paahana e mahiai i ka honua, a palau a e lulu, e ohi i ka hua a e kope i ka lepo, a e hahau i ka hua no hoi.

26 A hana aku la lakou i na ano a pau o na mea paahana, a me ua mau mea nei lakou i hoohana’i i ko lakou mau holoholona.

27 A hana aku la lakou i na ano a pau o na mea kaua. A hana aku la lakou i na ano a pau o ka hana me ka hana akamai loa.

28 Aole loa i hiki i kekahi lahuikanaka ke hoopomaikai nui loa ia mamua o lakou, a ke hoomahuahua loa ia e ka lima o ka Haku. A maloko lakou o kekahi aina maikai loa maluna o na aina a pau, no ka mea, ua olelo mai la ka Haku ia mea.

29 A eia kekahi, ola ae la o Liba i na makahiki he nui wale, a hanau ae la na keikikane a me na kaikamahine nana; a hanau ae la no hoi o Hearatoma nana;

30 A eia kekahi, noho alii iho la o Hearatoma ma ka hakahaka o kona makuakane. A ia Hearatoma i noho alii ai i na makahiki he iwakaluakumamaha, aia hoi, ua kailiia’e la ke aupuni mai ona aku la. A hookauwa ae la oia i na makahiki he nui ma ka noho pio ana; he oiaio, i ke koena a pau o kona mau la.

31 A hanau ae la o Heta nana, a noho pio iho la o Heta i kona mau la a pau. A hanau ae la o Aarona na Heta, a noho pio iho la o Aarona i kona mau la a pau; a nana o Amanigada, a noho pio iho la no hoi o Amanigada i kona mau la a pau; a nana o Corianatuma, a noho pio iho la o Corianatuma i kon mau la a pau; a hanau ae la o Coma nana.

32 A eia kekahi, kauo ae la o Coma i ka hapalua o ke aupuni. A noho alii iho la oia maluna o ka hapalua o ke aupuni hookahi kanahakumamalu makahiki; a hele aku la oia e kaua aku i ke Alii Amagida, a kaua ae la laua no na makahiki he nui wale, a ma ia manawa loaa iho la ia Coma ka mana maluna iho o Amagida, a loaa iho la ka mana maluna o ke koena o ke aupuni.

33 A ma na la o Coma hoomaka ae la na powa e ikeia ma ka aina; a lawe ae la lakou i na mea kuka kahiko, a lawelawe ae la i na hoohiki mamuli o ke ano o ko ka poe kahiko, a imi hou iho la e hoopau i ke aupuni.

34 Ano, kaua ku e nui aku la o coma ia lakou; aole nae oia i lanakila maluna o lakou.

1 A hele mai la no hoi ma na la o Coma na kaula he nui, a wanana mai la no ka lukuia’na o kela poe kanaka nui, ke ole lakou e mihi a huli aku i ka Haku, a e haalele aku i ko lakou mau pepehi kanaka ana a me ka hana hewa.

2 [m 4, p 8] A eia kekahi, ua hoomalauia’e ka poe kaula e na kanaka, a holo mai la lakou io Coma la no ka maluhia, no ka mea, imi ae la na kanaka e pepehi ia lakou;

3 A wanana mai la lakou ia Coma i na mea he nui; a ua hoopomaikaiia iho la oia ma ke koena a pau o kona mau la.

4 A ola ae la oia a elemakule maikai iho la, a hanau ae la o Sibaloma nana; a noho alii iho la o Sibaloma ma kona hakahaka. A kipi ae la ka hoahanau ponoi o Sibaloma ia ia; a hoomaka ae la kekahi kaua nui loa ma ka aina a pau.

5 [m 4, p 9] A eia kekahi, kena ae la ka hoahanau o Sibaloma, e pepehiia a make na kaula a pau, ka poe i wanana’i no ka lukuia’na o na kanaka;

6 A he popilikia nui ma ka aina a pau, no ka mea, ua hoike ae la lakou e hiki mai auanei ka poino nui loa aku maluna o ka aina, a maluna iho no hoi o na kanaka, a e nui loa auanei ka luku mawaena o lakou, he mea i ike ole e ia kona like maluna iho o ka ili o ka aina; a e lilo ko lakou mau iwi me he mau puu lepo la maluna iho o ka ili o ka honua, ke ole lakou e mihi i ko lakou hewa.

7 A hoolohe ole aku la lakou i ka leo o ka Haku, no ko lakou mau hui hewa pu ana; nolaila, hoomaka ae la na kaua a me na paio ma ka aina a pau, a me na wi a me na ahulau no hoi, a ua nui loa ka lukuia ana, he mea i ike ole e ia kona like maluna iho o ka ili o ka honua, a hiki mai la keia a pau ma na la o Sibaloma.

8 A hoomaka ae la na kanaka e mihi i ko lakou hewa; a ia lakou i hana’i ia mea, aloha mai la ka Haku ia lakou.

9 [m 4, p 10] A eia kekahi, ua pepehiia o Sibaloma a make, a laweia’e la o Seta iloko o ka noho pio ana; a noho pio iho la oia i kona mau la a pau.

10 A eia kekahi, loaa iho la ia Aha, kana keiki, ke aupuni; a noho alii iho la oia maluna o ka poe kanaka i kona mau la a pau. A hana iho la oia i na ano a pau o ka hewa ma kona mau la, a ma ua mea la oia i hookahe aku ai i ke koko a nui loa; a ua kakaikahi kona mau la.

11 A o Etema, he mamo ia no Aha, loaa iho la ia ia ke aupuni; a hana aku la no hoi oia i ka mea i hewa ma kona mau la.

12 A eia kekahi, ma na la o Etema, hele mai la na kaula he nui, a wanana hou mai la i na kanaka; he oiaio, wanana mai la lakou, e anai loa mai auanei ka Haku ia lakou la mai ka ili aku o ka honua, ke ole lakou e mihi i ko lakou mau hewa.

13 A eia kekahi, hoopaakiki iho la na kanaka i ko lakou mau naau, aole no e hoolohe aku i ka lakou nei mau olelo; a kaniuhu iho la ka poe kaula, a haele aku la maiwaena aku o na kanaka.

14 [m 4, p 11] A eia kekahi, hana aku la o Etema i ka malama aupuni ma ka hewa ma kona mau la a pau; a hanau ae la o Morona nana. A noho iho la o Morona ma kona hakahaka; a hana iho la o Morona i ka mea i hewa imua o ka Haku.

15 A eia kekahi, ala ae la kekahi kipikipi ana mawaena o na kanaka, no kela hui malu pu ana i kukuluia e loaa’i ka mana a me ka waiwai; a ala ae la kekahi kanaka ikaika ma ka hewa mawaena o lakou, a kaua ae la ia Morona, a ma kela kaua hoohiolo ae la i ka hapalua o ke aupuni; a malama iho la oia i ka hapalua o ke aupuni no na makahiki he nui.

17 A eia kekahi, ala ae la kekahi kanaka ikaika hou; a he mamo ia na ke kaikaina o Iareda.

18 A hoohiolo ae la oia ia Morona a loaa iho la ke aupuni ia ia; nolaila, noho pio iho la o Morona i ka koena a pau o kona mau la: a hanau ae la o Corianatora nana.

20 A ma na la o Corianatora hele mai la no hoi na kaula he nui, a wanana mai la no na mea nui a kupanaha, a hea ae la i ka mihi i na kanaka, a i ole lakou e mihi, e hoopai mai ka Haku ia lakou i ko lakou luku loa ia’na;

21 A na ka Haku hoi e hoouna mai a e lawe mai i kekahi lahuikanaka hou e noho ma ka aina, ma o kona mana la, mamuli o ke ano ana i lawe mai ai i ko lakou poe kupuna.

22 A hoomalau aku la lakou i na olelo a pau a ka poe kaula, no ko lakou hui pu malu a mau mea hoopailua ino.

23 A eia kekahi, hanau ae la o Etera no Corianatora, a make aku la ia; ua noho pio oia i kona mau la a pau.

1 [mokuna 5, paukū 1] A eia kekahi, aia no na la o Etera ma na la o Corianatuma: a o Corianatuma no ke alii maluna iho o ka aina a pau.

2 A he kaula a ka Haku o Etera; nolaila, hele mai la o Etera ma na la o Corianatuma, a hoomaka ae la e wanana aku i na kanaka, no ka mea, aole e hiki ia ia ke kaohiia no ka Uhane o ka Haku iloko ona;

3 No ka mea, hea aku la oia mai ke kakahiaka, a hiki aku i ka napoo ana o ka la, e kauleo ana i na kanaka e manaoio i ke Akua i ka mihi, o lukuia auanei lakou, i ka i ana ia lakou, Ma ka manaoio ua hookoia mai na mea a pau;

4 Nolaila, o ka mea e manaoio ana i ke Akua, ua hiki ke manaolana me ke kanalua ole no kekahi ao maikai nui ae, he oiaio, he wahi ma ka lima akau o ke Akua, a o ua manaolana nei e hiki mai ana ia no ka manaoio, e lilo ana i heleuma i na uhane o kanaka, e hoolilo ana ia lakou i paa, a e panee ole, e hoomahuahua mau ana ma na hana maikai; i alakaiia e hoonani aku i ke Akua.

5 A eia kekahi, wanana aku la o Etera i na mea nui a kupanaha i na kanaka, i na mea a lakou i manaoio ole ai, no ko lakou ike ole ia mau mea.

6 Ano, ke makemake nei au, o Moroni, e olelo iki aku no keia mau mea; ke makemake nei au e hoike aku i ko ke ao nei, O ka manaoio oia no na mea i manaolanaia’i a i ike ole ia’i; nolaila, mai hoole aku no ko oukou ike ole aku, no ka mea, aole e loaa ana ia oukou ka hoike, a pau ae la ka hoao ana i ko oukou manaoio,

7 No ka mea, ma ka manaoio hoike mai la o Kristo ia ia iho i ko makou poe kupuna, mahope mai o kona ala ana mai ka make mai; a hoike ole mai oia ia ia iho ia lakou, a hiki i ka wa mahope o ko lakou manaoio ana ia ia; nolaila, he mea i pono ai i manaoio kekahi poe ia ia, no ka mea, hoike ole mai oia ia ia iho i ko ke ao nei.

8 Aka, no ka manaoio o na kanaka, ua hoike mai la oia ia ia iho i ko ke ao nei, a hoonani aku la i ka inoa o ka Makua, a hoomakaukau mai la i alanui i hiki ai i na mea e ae ma ia mea, ke lilo i poe hoaloaa o ka haawina lani, i hiki ia lakou ke manaolana no kela mau mea a lakou i ike ole ai;

9 Nolaila, ua hiki no hoi ia oukou ke loaa ka manaolana, a e lilo i poe hoaloaa o ka haawina, ina e manaoio oukou.

10 Aia hoi, ma ka manaoio, ua kaheaia ka poe o ka wa kahiko mamuli o ka aoao hemolele o ke Akua;

11 Nolaila, ma ka manaoio, ua haawiia mai ke kanawai o Mose. Aka, ma ka haawina o kana Keiki, ua hoomakaukau mai ke Akua i ala maikai nui ae; a ma ka manaoio ia mea i hookoia’i;

12 No ka mea, ina aole he manaoio mawaena o ka poe keiki a kanaka, ua hiki ole i ke Akua ke hana mai i hana mana mawaena o lakou; nolaila, ua hoike ole mai oia ia ia iho, a hiki i ka wa mahope o ko lakou manaoio ana.

13 Aia hoi, o ka manaoio no ia o Alama laua me Amuleka ka mea i hoohiolo aku ai i ka halepaahao i ka honua.

14 Aia hoi, o ka manaoio no ia o Nepai laua me Lehi, ka mea i hana’i i ka hoomalule ana maluna o ko Lamana poe, i bapetizoia ai lakou me ke ahi a me ka Uhane Hemolele.

15 Aia hoi, o ka manaoio no ia o Amona a me kona mau hoahanau, ka mea i hana’i i ka hana mana nui mawaena o ko Lamana poe;

16 He oiaio, a o ka poe a pau nana i hana i na hana mana, hana aku la lakou ia mau mea ma ka manaoio, o ka poe mamua o Kristo, a me ka poe no hoi mahope iho.

17 A ma ka manaoio, loaa iho la i na haumana ekolu he olelo hoopomaikai, i ole ai lakou e hoao i ka make; a loaa ole ia lakou ka olelo hoopomaikai a hiki i ka wa mahope iho o ko lakou manaoio ana.

18 Aohe no i hanaia i kekahi manawa na hana mana, a hiki i ka wa mahope iho o ko lakou manaoio ana; nolaila, ua manaoio e lakou i ke Keiki a ke Akua.

19 [m 5, p 2] A ua nui no ka poe, no ka ikaika loa o ko lakou manaoio, he oiaio, mamua o ka hiki ana o Kristo, ua hiki ole ke alalaiia lakou mailoko ae o ka paku, aka, ike oiaio aku la me ko lakou mau maka i na mea a lakou i ike iho ai me ka maka o ka manaoio, a ua olioli lakou.

20 A, aia hoi, ua ike kakou ma keia mooolelo, o kekahi o keia poe oia no ke kaikaina o Iareda; no ka mea, no ka nui o kona manaoio i ke Akua, i ka wa a ke Akua i o mai ai i kona manamana lima, au hiki ole ia ia ke huna iho ia mea mai ka ike ana aku o ke kaikaina o Iareda, no kana olelo ana i olelo mai ai ia ia, a o ua olelo nei ua loaa ia ia ma ka manaoio.

21 A mahope iho o ko ke kaikaina o Iareda ike ana i ka manamana lima o ka Haku, no ka olelo hoopomaikai a ke kaikaina o Iareda i loaa mai ai ma ka manaoio, ua hiki ole i ka Haku ke aua aku i kekahi mea mai kona ike ana aku; nolaila, hoike mai la oia ia ia i na mea a pau, na ka mea, aole e hiki ke alalai hou ia oia mailoko ae o ka paku.

22 A ma ka manaoio i loaa’i i ko’u poe kupuna ka olelo hoopomaikai, E hiki auanei keia mau mea i ko lakou poe hoahanau ma o ka poe Genetile la; nolaila, ua kauoha mai la ka Haku ia’u, he oiaio, o Iesu Kristo.

23 A i aku la au ia ia, E ka Haku, e hoomaewaewa mai auanei ka poe Genetile ma keia mau mea, no ko makou nawaliwali ma ka palapala ana; no ka mea, e ka Haku, ua hana mai oe ia makou i mana ma ka olelo ma o ka manaoio la, aka, aole nae oe i hana mai ia makou i mana ma ka palapala ana; no ka mea, ua hana mai oe i keia poe kanaka a pau i hiki ai ia lakou ke olelo nui aku, no ka Uhane Hemolele au i haawi mai ai ia lakou;

24 A ua hana mai oe ia makou i hiki ai ia makou ke palapala uuku wale iho no, no ka hemahema o ko makou mau lima. Aia hoi, aole no oe i hana mai ia makou i mana ma ka palapala ana e like me ke kaikaina o Iareda, no ka mea, hana mai la oe ia ia, a o na mea ana i palapala iho ai, ua mana e like me oe, i ka lanakila ana maluna o kanaka e heluhelu ana ia mau mea.

25 A ua hana mai oe i ka makou mau huaolelo i mana a i nui, i hiki ole ai ia makou ke palapala iho ia mau mea; nolaila, i ka wa a makou e kakau iho ana, ike iho la makou i ko makou nawaliwali, a hina iho la no ka hoonohonoho ana i ka makou mau huaolelo; a ke makau nei au o hoomaewaewa mai auanei ka poe Genetile ma ka makou mau huaolelo.

26 A ia’u i olelo aku ai i keia, olelo mai la ka Haku ia’u, i ka i ana, E hoomaewaewa ana ka poe lapuwale, aka, e uwe auanei lakou; a ua lawa ko’u lokomaikai no ka poe akahai, i loaa ole ai ia lakou ka lanakila no ko oukou nawaliwali.

27 A ina e hele mai na kanaka io’u nei, na’u no e hoike aku i ko lakou nawaliwali ia lakou. Ke haawi aku nei au i ka nawaliwali i na kanaka, i haahaa ai lakou; a ua lawa ko’u lokomaikai no na kanaka a pau e hoohaahaa ana ia lakou iho imua o’u; no ka mea, ina e hoohaahaa mai lakou ia lakou iho imua o’u, a manaoio mai iloko o’u, alaila, e hoolilo aku au i na mea nawaliwali i ikaika ia lakou.

28 Aia hoi, e hoike aku no au i ka poe Genetile i ko lakou nawaliwali, a e hoike aku no au ia lakou, e lawe mai ana ka manaoio, ka manaolana, a me ke aloha io’u nei—ka punawai o ka pono a pau.

29 [m 5, p 3] A i ka lohe ana o’u, o Moroni, i keia mau olelo, ua hooluoluia mai, a i aku la, E ka Haku, e hanaia kou makemake pono, no ka mea, ua ike au e hana ana oe i na keiki a kanaka e like me ko lakou manaoio;

30 No ka mea, olelo aku la ke kaikaina o Iareda i ka mauna Zerina, E neenee ae, a ua hooneeneeia’e ia. A ina aole he manaoio kona, ina ua neenee ole ae ia; no ia mea, e hana ana oe mahope o ka manaoio ana o na kanaka;

31 No ka mea, pela oe i hoike mai ai ia oe iho i kau poe haumana. No ka mea, mahope iho o ko lakou manaoio ana, a olelo aku la ma kou inoa, ua hoike mai oe ia oe iho ia lakou ma ka mana nui;

32 A ke hoomanao nei no hoi au ua olelo mai oe, ua hoomakaukau iho oe i hale no kanaka; he oiaio, mawaena o na wahi i noho ai o kou Makua, ma ia mea i hiki i kanaka ke loaa ka manaolana maikai nui ae; no ia mea, e manaolana ke kanaka e pono ai, a i ole ia, ua hiki ole ia ia ke loaa ka hooilina, ma kahi au i hoomakaukau iho ai.

33 A eia hou, ke hoomanao nei au ua olelo mai oe, Ua aloha mai oe i ko ke ao nei, a hiki i ka waiho ana i kou ola ilalo no ko ke ao nei, i hiki ia oe ke lawe hou ia mea e hoomakaukau ai i wahi no na keiki a kanaka.

34 Ano, ua ike au o ua aloha nei au i loaa’i no na keiki a kanaka, he aloha io no ia; nolaila, i ole na kanaka i loaa’i ke aloha io, ua hiki ole ia lakou ke loaa ua wahi la au i hoomakaukau ai ma na wahi i noho ai o kou Makua.

35 Nolaila, ua ike au ma ia mea au i olelo mai ai, ina aole ka poe Genetile e loaa ke aloha io, no ko makou nawaliwali, nau no lakou e hoao aku, a kaili aku i ko lakou talena, he oiaio, i ka mea a lakou i loaa’i, a e haawi mai i ka poe nona ka nui loa aku.

36 [m 5, p 4] a eia kekahi, pule aku la au i ka Haku, nana e haawi ae i ka poe Genetile i ka lokomaikai, i loaa’i ia lakou ke aloha io.

37 A eia kekahi, i mai la ka Haku ia’u, Ina aole o lakou aloha io, he mea ole ia ia oe, ua kupaa oe; nolaila, e hoomaemaeia kou mau aahu. A no kou ike ana i kou nawaliwali, e hooikaikaia auanei oe, a hiki aku i ka noho ana ilalo ma kahi a’u i hoomakaukau iho ai ma na wahi i noho ai o ko’u Makua.

38 Ano, ke uwe aloha aku nei owau, o Moroni, i ka poe Genetile, he oiaio, a i kuu poe hoahanau no hoi a’u e aloha nei, a hiki i ka wa e halawai pu kakou imua o ka noho hookolokolo o Kristo, kahi e ike ai na kanaka a pau, aole o ko’u mau aahu i kikokikoia me ko oukou koko;

39 Alaila, e ike no oukou ua ike au ia Iesu, a ua kamailio mai oia ia’u, he maka he maka, a ua hai mai oia ia’u ma ka haahaa moakaka; e like me ke kanaka e hai ana i kona hoa ma kuu olelo iho, no keia mau mea;

40 A he kakaikahi wale no ka’u i kakau iho ai, no kuu nawaliwali ma ke kakau ana.

41 Ano, ua makemake au a kauleo aku ia oukou e imi ia Iesu nei, nona ka poe kaula a me ka poe aposetolo i palapala’i, i noho pu ai a mau loa aku ka lokomaikai o ke Akua ka Makua, a me ka Haku Iesu Kristo no hoi, a me ka Uhane Hemolele, ka mea e hoike mai ana no laua. Amene.

1 [mokuna 6, paukū 1] Ano, ke hoomau aku nei au e hana a pau ka’u mooolelo no ka anaiia’na o ka lahuikanaka nona au e kakau ana.

2 No ka mea, hoomalau mai la lakou i na olelo a pau a Etera; no ka mea, hai io aku la oia ia lakou no na mea a pau, mai ka makamua mai o kanaka; a mahope iho o ka emi ana o na wai mai ka ili o keia aina aku, lilo iho la ia ia aina maikai loa maluna o na aina e ae a pau, he aina waeia e ka Haku; nolaila, ua makemake ka Haku i na kanaka a pau e hookauwa aku nana, ka poe e noho ana maluna iho o ka ili ona;

3 A o kahi no ia o ka Ierusalema Hou, ka mea e iho mai ana mailoko mai o ka lani, a me ka wahilaa hemolele o ka Haku.

4 Aia hoi, ike aku la o Etera i na la o Kristo, a olelo mai la no ia no kekahi Ierusalema Hou maluna iho o keia aina;

5 A olelo mai la no hoi oia no ko ka hale o Iseraela, a me ka Ierusalema kahi a Lehi e hele mai ai; mahope aku o kona anaiia’na, e kukulu ho ia auanei ia i kulanakauhale hemolele i ka Haku; nolaila, ua hiki ole ke kapaia he Ierusalema Hou, no ke mea, he kulanakauhale ia i ka wa kahiko, aka, e kukulu hou ia’na ia, a e lilo iho i kulanakauhale hemolele o ka Haku: a e kukuluia auanei ia i ko ka hale o Iseraela.

6 A e kukuluia auanei he Ierusalema Hou maluna iho o keia aina, i ke koena o ka poe hua a Iosepa, no keia mau mea aia no he aka;

7 No ka mea, me Iosepa i lawe ae ai i kona makuakane i lalo iloko o ka aina o Aigupita, pela oia i make ai ilaila; nolaila, lawe mai la ka Haku he koena o ka poe hua a Iosepa, mailoko mai o ka aina o Ierusalema, i hiki ai ia ia ke aloha mai i ka poe hua a Iosepa, i ole ai lakou e make, me ia i aloha mai ai i ka makuakane o Iosepa, i make ole oia;

8 Nolaila, e kukuluia auanei ke koena o ko ka hale o Iosepa maluna iho o keia aina; e lilo auanei ia i aina hooilina no lakou; a e kukula iho auanei lakou i kulanakauhale hemolele i ka Haku, e like me Ierusalema o ka wa kahiko; a e hoohoka hou ole ia lakou ma ia hope, a hiki aku i ka hopena, i ka wa o ka honua e hala aku ai.

9 A he lani hou a honua hou auanei; a e like auanei laua me ko ke kahiko, ua hala aku nae na mea kahiko, a ua lilo na mea a pau i hou.

10 Alaila, e hiki mai ana ka Ierusalema Hou; a pomaikai ka poe e noho ana iloko olaila, no ka mea, o lakou no ka poe nona na aahu i keokeo ma o ke koko la o ke Keikihipa; a o lakou no ka poe i helu pu ia mawaena o ke koena o ka poe hua a Iosepa, ka poe no ko ka hale o Iseraela.

11 Alaila, e hiki mai ana no hoi ka Ierusalema o ka wa kahiko; a o ka poe kamaaina ona, ua pomaikai lakou, no ka mea, ua holoiia lakou ma ke koko o ke Keikihipa; a o lakou no ka poe i hoopuehuia’ku ai a i houluuluia mai ai, mai na hiki eha mai o ka honua nei, a mai na aina akau mai, a he poe hoaloaa o ka hookoia ana o ka berita a ke Akua i hana mai ai me ko lakou kupunakane o Aberahama.

12 A i ka wa e hiki mai ai keia mau mea, e hookoia ka palapala hemolele, e olelo ana, Aia no he poe ua mua mamua, e lilo ana auanei i hope; a aia no he poe ua hope mamua, e lilo ana auanei i mua.

13 [m 6, p 2] A e kokoke ana au e kakau hou iho, aka, ua papaia mai au; aka, ua nui a kupanaha no na wanana a Etera, aka, ua manaoia oia e lakou me he ole la, a hookuke mai la ia ia mawaho, a pee iho la oia ma ka lua o kahi pohaku ma ka la, a ma ka po hele aku la oia e nana ana i na mea e hiki mai ana maluna o na kanaka.

14 A me ia i noho ai ma ka lua o kahi pohaku, kakau iho la oia i na mea i koe o keia mooolelo, e nana ana i na luku i hiki mai maluna iho o na kanaka ma ka po.

15 A eia kekahi, ma ua makahiki hookahi la ana i hookukeia mai ai maiwaena ae o na kanaka, hoomaka ae la kekahi kaua nui mawaena o na kanaka, no ka mea, ua nui no na mea i ea ai, he poe kanaka ikaika lakou, a imi ae la e luku ae ia Corianatuma ma o ko lakou mau mea kuka malu la o ka hewa, i olelo e ia’i.

16 Ano, o Corianatuma, ua hoonaauao iho ia ia iho ma na mea akamai a pau o ke kaua, a ma ka maalea a pau o ko ke ao nei, nolaila, kaua aku la oia i ka poe a pau i imi e luku mai ia ia;

17 Aka, aole oia i mihi, aole hoi o kana mau keikikane a mau kaikamahine nani; aole no hoi na keikikane a me na kaikamahine nani a Cohora; aole no hoi na keikikane a me na kaikamahine nani a Corihora; a, aole loa kekahi o na keikikane a me na kaikamahine nani maluna iho o ka ili a pau o ka honua a pau, nana i mihi i ko lakou mau hewa;

18 Nolaila, eia kekahi, ma ka makahiki mua a Etera i noho ai iloko o ka lua o kahi pohaku, ua nui na kanaka i pepehiia e ka pahikaua a kela poe hui pu malu ana e kaua ana ia Corianatuma, i hiki ia lakou ke loaa ke aupuni.

19 A eia kekahi, kaua nui aku la na keikikane a Corianatuma, a kahe nui iho la ke koko.

20 A ma ka makahiki lua, hiki mai la ka olelo a ka Haku io Etera la, nana e hele aku a e wanana aku ia Corianatuma, Ina e mihi oia, a me ko kona hale a pau, e haawi mai no ka Haku ia ia i kona aupuni, a e hookoe mai i na kanaka,

21 A i ole ia, e lukuia auanei lakou, a me ko kona hale a pau, koe oia wale iho no, a e ola wale no oia e ike i ka hookoia ana o na wanana i olelo e ia’i, no kekahi lahuikanaka e ae e loaa ana ka aina i hooilina no lakou; a e kanuia auanei o Corianatuma e lakou; a e lukuia kela mea keia mea, o Corianatuma wale no koe.

22 [m 6, p 3] A eia kekahi, aole o Corianatuma i mihi, aole hoi ko kona hale, aohe hoi na kanaka; a aole oki iho na kaua; a imi ae la lakou e pepehi mai ia Etera, aka, holo aku la oia mai ke alo aku o lakou, a pee hou iho la ma ka lua o ka pohaku.

23 A eia kekahi, ala ae la o Sareda, a kaua mai la no hoi oia ia Corianatuma; a lanakila ae la oia maluna ona, a, ma ke kolu o ka makahiki lawe pio ae la oia la ia ia.

24 A lanakila ae la na keiki a Corianatuma maluna o Sareda, ma ka ha o ka makahiki, a loaa hou mai la ke aupuni no ko lakou makuakane.

25 Ano, hoomaka ae la ke kaua maluna iho o ka ili a pau o ka aina, o kela kanaka keia kanaka me kona poe hui, e kaua ana no ka mea ana i makemake ai.

26 A me na powa kekahi, a me na ano a pau o ka hewa maluna iho o ka ili a pau o ka aina.

27 A eia kekahi, ua huhu nui loa o Corianatuma ia Sareda, a hele ku e aku la oia ia ia me na poe kaua ona, e kaua: a halawai pu lakou me ka huhu nui; a hoouka ae la lakou ma ke awawa o Gilegala; a lilo iho la ke kaua i eha loa.

28 A eia kekahi, kaua ku e mai la o Sereda ia ia no na la ekolu. A eia kekahi, hooauhee aku la o Corianatuma ia ia, a alualu ae la ia ia a hiki aku oia i na kula papu o Hesalona.

29 A eia kekahi, kaua hou mai la o Sareda ia ia ma na kula papu; a, aia lanakila ae la oia maluna o Corianatuma, a hooauhee mai la ia ia ihope i ke awawa o Gilegala.

30 A kaua hou aku la o Corianatuma ia Sareda ma ke awawa o Gilegala, a ma ua kaua nei lanakila ae la oia maluna o Sareda, a pepehi aku la ia ia a make loa.

31 A hoeha ae la o Sareda ia Corianatuma ma kona uha, i hele hou ole ai oia i ke kaua no na makahiki elua, a ma ia manawa e hookahe ana na kanaka a pau maluna iho o ka ili a pau o ka aina i ke koko, a, aohe mea nana lakou e kaohi.

1 Ano, hoomaka ae la he poino nui maluna iho o ka aina a pau, no ka hewa o na kanaka, a ma ia mea, ina e kau aku ke kanaka i kana mea paahana a i kana pahikaua paha ma kona papa, kahi ana i kau iho ai ia mea, aia hoi, ma ia la ae, ua hiki ole ia ia ke loaa ia mea, no ka nui o ka poino maluna iho o ka aina.

2 Nolaila, hoopili aku la kela kanaka keia kanaka i ka mea nona ponoi, me kona mau lima, a, aohe oia e noi ana, aohe no hoi e haawi ana; a hoopaa ae la kela kanaka keia kanaka i ke au o kana pahikaua, ma kona lima akau, ma ka hoomalu ana i kona waiwai a me kona ola iho, a o kana mau wahine a me kana mau keiki.

3 [m 6, p 4] Ano, mahope aku o na makahiki elua, a mahope aku o ka make ana o Sareda, aia hoi, ala ae la ke kaikaina o Sareda, a kaua mai la ia Corianatuma, a ma ua kaua nei hooauhee aku la o Corianatuma ia ia, a alualu ae la ia ia i ka waonahele o Akisa.

4 A eia kekahi, kaua mai la ke kaikain o Sareda ia ia ma ka waonahele o Akisa; a lilo iho la ke kaua i eha loa, a ua nui na tausani i haule ma ka pahikaua.

5 A eia kekahi, pua ae la o Corianatuma i ka waonahele, a hele ae la ke kaikaina o Sareda mailoko ae o ka waonahele ma ka po, a pepehi mai la i kekahi poe o ka poe kaua o Corianatuma, i ko lakou wa i ona’i.

6 A hele ae la oia i ka aina o Morona, a hoonoho iho la ia ia iho maluna iho o ka noho alii o Corianatuma.

7 A eia kekahi, noho iho la o Corianatuma me kona poe kaua ma ka waonahele, no na makahiki elua, a loaa iho la ia ia ka ikaika nui i kona poe kaua.

8 Ano, loaa iho la no hoi i ka kaikaina o Sareda, o Gileada kona inoa, ka ikaika nui i kona poe kaua, no na poe hui pu malu ana.

9 A eia kekahi, pepehi ae la kana Kahuna Nui ia ia, me ia i noho ai maluna iho o kona noho alii.

10 A eia kekahi, pepehi ae la kekahi o ka poe hui pu malu ana ia ia ma kahi alahele malu, a loaa ia ia iho ke aupuni; a o Liba kona inoa; a he kanaka nunui o Liba, i kela aku mamua o na kanaka a pau mawaena o ka poe kanaka.

11 A eia kekahi, ma ka makahiki mua o Liba, pii ae la o Corianatuma i ka aina o Morona, a kaua aku la ia Liba.

12 A eia kekahi, hakaka ae la laua me Liba, a ma ia hakaka ana hahau mai la o Liba maluna iho o kona lima, a ua eha iho la oia; aka hoi, hooikaika aku la imua ka poe kaua o Corianatuma maluna o Liba, a hee aku la oia i na mokuna ma ke kahakai.

13 A eia kekahi, alualu ae la o Corianatuma ia ia; a kaua mai la o Liba ia ia ma ke kahakai.

14 A uhau mai la o Liba i ka poe kaua o Corianatuma, i hee hou aku ai lakou i ka waonahele o Akisa.

15 A eia kekahi, alualu mai la o Liba ia ia, a hiki aku oia i na kula papu o agosa. A ua lawe ae la o Corianatuma i na kanaka a pau me ia, me ia i hee aku ai imua o Liba ma kela hapa o ka aina, kahi ana i hee aku ai.

16 A ia ia i hiki aku ai i na kula papu o Agosa, kaua aku la oia ia Liba, a hahau aku la maluna iho ona a make aku la ia; aka hoi, hele mai la ke kaikaina o Liba e ku e ia Corianatuma ma ka hakahaka ona, a lilo iho la ke kaua i eha ioa, a ma ia kaua ana hee hou aku la o Corianatuma imua o ka poe kaua o ke kaikaina o Liba.

17 [m 6, p 5] Ano, o ka inoa o ke kaikaina o Liba ua kapaia o Siza. A eia kekahi, alualu mai la o Siza mahope o Corianatuma, a hoohiolo iho la oia i na kulanakauhale he nui, a luku iho la i na wahine a me na keiki, a puhi ae la i na kulanakauhale olaila;

18 a kui ae la ka makau no Siza mawaena o ka aina a pau; he oiaio, lonoia’e la ka leo mawaena o ka aina, Owai la ka mea hiki ke ku imua o ka poe kaua o Siza? Aia hoi, ke kahili ae la oia i ka honua imua ona!

19 A eia kekahi, hoomaka ae la na kanaka e houluulu ae ma ka poe kaua, mawaena o ka aina a pau.

20 A ua maheleia lakou, a holo aku la kekahi hapa o lakou i ka poe kaua la o Siza, a kekahi hapa hoi holo ae la lakou i ka poe kaua la o Corianatuma.

21 A no ka nui a me ka loihi o ke kaua, a no ka loihi o ka hookahe koko ana a me ka luku, ua uhiia ka ili a pau o ka aina me na heana o ka poe make;

22 A no ka wikiwiki a me ka hikiwawe o ke kaua, aole i waihoia kekahi mea e kanu iho i ka poe make, aka, hele ae la lakou mai ka hookahe ana aku i ke koko i ka hookahe ana i ke koko, w waiho ana i na heana o na kanaka, na wahine, a me na keiki, haliiliia maluna iho o ka ili o ka aina, e lilo i mea e aiia’i e na ilo o ke kino;

23 A hele ae la ka pilau o ia mau mea maluna o ka ili o ka aina, oia, maluna iho o ka ili a pau o ka aina; nolaila, hoopilikiaia iho la na kanaka ma ka la a ma ka po, no ka pilau olaila;

24 Aole nae o Siza i hooki aku i ke alualu mai ia Corianatuma, no ka mea, ua hoohiki oia e hoopai ae ia Corianatuma no ke koko o kona kaikuaana, ka mea i pepehiia, a me ka olelo a ka Haku i hiki mai ai ia Etera, i haule ole iho ai o Corianatuma ma ka pahikaua.

25 A pela kakou e ike nei ua hoopai mai ka Haku ia lakou ma ka piha o kona inaina, a ua hoomakaukau aku ko lakou hewa a mau mea hoopailua, i ala no ko lakou luku mau loa ia’na.

26 A eia kekahi, alualu mai la o Siza ia Corianatuma i ka hikina, a hiki i ke kahakai, a malaila oia i kaua aku ai ia Siza no na la ekolu;

27 A no ka weliweli o ka luku mawaena o na poe kaua o Siza, ua hoomaka ae la na kanaka e hoomakauia, a hoomaka ae la e auhee aku imua o na poe kaua o Corianatuma; a auhee ae la lakou i ka aina o Corihora, a kahili ae la i ka poe kamaaina imua o lakou, i ka poe a pau i hui pu ole me lakou;

28 A kukulu iho la lakou i ko lakou mau halelewa ma ke awawa o Corihora. A kukulu iho la o Corianatuma i kona mau halelewa ma ke awawa o Sura. Ano, ua kokoke ke awawa o Sura i ka puu o Comanora; no ia mea, houluulu mai la o Corianatuma i na poe kaua ona i kahi hookahi, maluna iho o ka puu Comanora, a puhi aku la i ka pu i na poe kaua o Siza, e kono aku ia lakou e hele mai e kaua.

29 A eia kekahi, hele mai la lakou, aka ua hooauhee hou ia’ku; a hele mai la lakou i ka lua o ka manawa; a ua hooauhee hou ia’ku lakou i ka lua o ka manawa. A eia kekahi, hele hou mai la lakou i ke kolu o ka manawa, a lilo iho la ke kaua i eha loa.

30 A eia kekahi, uhau mai la o Siza maluna iho o Corianatuma, a hoeha mai la oia ia ia i na eha hohonu he nui, a no ke kahe ana o ko Corianatuma koko, maule iho la oia, a ua kaikaiia’ku me he mea la ua make oia.

31 Ano, no ka lilo nui ana’ku o na kanaka, na wahine, a me na keiki, ma na aoao elua, kauoha ae la o Siza i kona poe kanaka, i ole ai lakou e alualu ina poe kaua o Corianatuma; nolaila, hoi ae la lakou i ko lakou wahi i hoomoana’i.

1 [mokuna 6, paukū 6] A eia kekahi, ia Corianatuma i pohala aku ai i kona mau eha, hoomaka ae la oia e hoomanao iho i na olelo a Etera i olelo mai ai ia ia;

2 Ike aku la oia ua lukuia e ka pahikaua ano, kokoke elua miliona o kona poe kanaka, a hoomaka ae la oia e kaniuhu ma kona naau; he oiaio, ua lukuia elua miliona o na kanaka ikaika, a me ka lakou poe wahine a me ka lakou poe keiki.

3 Hoomaka ae la oia e mihi i ka ino ana i hana’i; hoomaka ae la oia e hoomanao iho i na olelo i oleloia’i e ka waha o ka poe kaula a pau, a ike oia ia mau mea ua hookoia mai, a hiki i keia manawa, o kela lihi iki keia lihi iki; a kaniuhu kona uhane, a hoole aku la e hooluoluia mai.

4 A eia kekahi, palapala iho la oia i kekahi episetole ia Siza, e noi ana ia ia e hookoe mai i ka poe kanaka, a nana e haawi aku i ke aupuni no ka makemake i na ola o na kanaka.

5 A eia kekahi, ia Siza i loaa’i i kona episetole, palapala mai la oia i kekahi episetole ia Corianatuma, ina e hookuu aku oia ia ia iho, e hiki ia ia la ke pepehi mai ia ia me kana pahikaua iho, alaila e hookoe oia i na ola o na kanaka.

6 A eia kekahi, aole na kanaka i mihi i ko lakou mau hewa; a ua hooeuia ka poe i Corianatuma ma ka inaina aku i ka poe kanaka o Siza; a ua hooeuia ka poe kanaka o Siza ma ka inaina mai i ka poe kanaka o Corianatuma; nolaila, kaua mai la ka poe kanaka o Siza i ka poe kanaka o Corianatuma.

7 A ia Corianatuma i ike ai ua kokoke ia e haule iho, hee hou aku la ia imua o ka poe kanaka o Siza.

8 A eia kekahi, hiki aku la oia i na wai o Ripilianacuma, oia ma ka hoohalike ana, o Nui, o ka mea oi loa aku; nolaila, ia lakou i hiki aku ai i keia mau wai, kukulu iho la lakou i ko lakou mau halelewa; a kukulu iho la no hoi o Siza i kona mau halelewa i kokoke ana ia lakou ; a, nolaila, ia la ae, hoouka ae la lakou i ke kaua.

9 A eie kekahi, kaua ae la lakou i kekahi kaua eha loa, a ma ia kaua ana ua eha hou o Corianatuma, a maule iho la oia no ke kahe o ke koko.

10 A eia kekahi, hooikaika aku la na poe kaua o Corianatuma maluna o na poe kaua o Siza, a lanakila ae la lakou maluna o ua poe kaua la, i hooauhee aku ai lakou ia poe kaua imua o lakou; a hee aku lakou i ka hema, a kukulu iho la lakou i ko lakou mau halelewa ma kahi i kapaia o Ogata.

11 A kukulu iho la ka poe kaua o Corianatuma i ko lakou mau halelewa ma ka puu Rama; a oia puu hookahi no kahi a kuu makuakane o Moramona i huna iho ai i na mooolelo laa i ka Haku.

12 [m 6, p 7] A eia kekahi, houluulu ae la lakou i na kanaka a pau, maluna iho o ka ili o ka aina, ka poe i pepehi ole ia, koe o Etera wale no.

13 A ike aku la o Etera i na hana a pau a na kanaka; a ike aku la oia o ka poe kanaka no ka aoao o Corianatuma, ua houluuluia’e i ka poe kaua o Corianatuma; a o ka poe kanaka no ka aoao o Siza, ua houluuluia’ku i ka poe kaua o Siza;

14 Nolaila, e houluulu ana laua i na kanaka, no na makahiki eha, i hiki ia laua ke loaa na mea a pau maluna o ka ili o ka aina, i loaa’i ia laua ka ikaika a pau i hiki ai ia laua ke loaa.

15 A eia kekahi, i ka wa a lakou i houluulu ai, o kela mea keia mea i ka poe kaua ana i makemake ai, me ka lakou poe wahine, a me ka lakou poe keiki; o na kanaka, na wahine, a me na keiki ua kahikoia me na mea kaua, na pale-lima, a me na pale-umauma, a me na pale-poo, a i kahikoia mamuli o ke ano o ke kaua, a hele ae la lakou kekahi e ku e i kekahi, e kaua; a kaua ae la lakou ia la a po, a lanakila ole.

16 A i ka po ana ua maluhiluhi lakou, a hoi ae la i ko lakou mau wahi hoomoana; a mahope iho o ko lakou hoi ana i ko lakou mau wahi hoomoana, hoomaka ae la lakou i ka aoa ana, a me ke kanikau ana, no ka make o ka poe lukuia o ko lakou poe kanaka; a no ka nui o ko lakou kumakena ana, ko lakou aoa ana a kanikau ana, ua nui loa ke kupinai ana.

17 A eia kekahi, ma ia la ae, hele hou ae la lakou i ke kaua, a ua nui a weliweli ia la; aole nae lanakila ae la lakou, a i ka po hou ana, ua nui loa ke kupinai ana o lakou no ko lakou kumakena ana, a me ko lakou aoa ana, a me ko lakou kanikau ana, no ka make o ka poe lukuia o ko lakou poe kanaka.

18 [m 6, p 8] A eia kekahi, palapala hou aku la o Corianatuma i kekahi episetole ia Siza, e noi ana ia ia e hele hou ole mai ai oia e kaua, aka nana e lawe aku i ke aupuni, a e hookoe i na ola o na kanaka.

19 Aka hoi, ua oki ae la ka hooikaika ana o ka Uhane o ka Haku me lakou, a he mana loa ko Satana maluna iho o na naau o na kanaka, no ka mea, ua hookuuia’e lakou i ka paakiki o ko lakou mau naau, a me ka makapo o ko lakou hoomaopopo ana, i hiki ia lakou ke lukuia’e; no ia mea la, hele hou ae la lakou i ke kaua.

20 A eia kekahi, kaua ae la lakou ia la a po, a i ka po ana hiamoe iho la lakou maluna o ka lakou mau pahikaua;

22 A i ka po ana ua ona lakou me ka huhu, e like me ka kanaka i ona me ka waina; a moe hou iho la lakou maluna o na pahikaua a lakou;

23 A ia la ae kaua hou ae la lakou; a i ka po ana ua haule iho la lakou a pau ma ka pahikaua, koe wale no he kanalimakumamalua o ka poe kanaka o Corianatu, a he kanaonokumamaiwa o ka poe kanaka o Siza.

24 A eia kekahi, hiamoe iho la lakou maluna o na pahikaua a lakou ia po, a ia la ae kaua hou ae la lakou, a paio ae la lakou ma ko lakou ikaika, me ka lakou mau pahikaua, a me ko lakou mau pale-lima, ia la a po;

25 A i ka po ana aia no he kanakolukumamalua o ka poe kanaka o Siza, a he iwakaluakumamahiku o ka poe kanaka o Corianatuma.

26 [m 6, p 9] A eia kekahi, ai lakou a hiamoe iho la, a hoomakaukau ae la no ka make i ka la apopo. A he poe kanaka nui a ikaika lakou, ma ka ikaika o kanaka.

27 A eia kekahi, kaua ae la lakou no na hora ekolu, a maule iho la lakou no ke kahe o ke koko.

28 A eia kekahi, i ka wa a ka poe kanaka o Corianatuma i loaa’i ka ikaika pono, i hiki ia lakou ke hele, ua kokoke lakou e hee aku no ko lakou mau ola, aka hoi, ala ae la o Siza, a me kona poe kanaka no hoi, a hoohiki iho la ia ma kona huhu nana e pepehi ia Corianatuma, a i ole ia, e make oia i ka pahikaua;

29 Nolaila, alualu ae la oia ia lakou, a ia la ae loaa lakou ia ia; a kaua hou ae la lakou me ka pahikaua. A eia kekahi, ia lakou a pau i haule iho ai ma ka pahikaua, koe wale no o Corianatuma laua me Siza, aia hoi, ua maule iho la o Siza me ke kahe o ke koko.

30 A eia kekahi, ia Corianatuma i hilinai iho ai maluna o kana pahikaua, i maha uuku ai oia, ooki aku la oia i ke poo o Siza.

31 A eia kekahi, ia ia i ooki aku ai i ke poo o Siza, ala ae la o Siza ma na lima ona a haule iho la; a mahope iho o kona aumeume ana no ka hanu, make aku la ia.

32 A eia kekahi, hina iho la o Corianatuma i ka honua, a lilo iho la me he mea la aole ona ola.

33 A olelo mai la ka Haku ia Etera, a i mai la ia ia, O hele aku. A hele aku la ia, a ike aku la ua ko ae la na olelo a pau a ka Haku; a hoopau aku la oia i kana mooolelo; (a, aole au i kakau iho i ka hapa-haneri,) a huna iho la ia mau mea, ma ke ano i loaa’i ka poe kanaka o Limai ia mau mea.

34 Ano, o na olelo hope i kakauia’i e Etera, eia no ia, Ina paha e makemake ana ka Haku e lawe ola ia’ku owau, a ina paha e loaa ia’u ka makemake o ka Haku ma ka io, he mea ole no ia, ina e hoolaia mai au iloko o ke aupuni o ke Akua. Amene.

© 2008, 2009 Brent Thompson. Limited rights granted as indicated below, except where otherwise indicated.
This work is licensed under the Creative Commons Attribution-Noncommercial-Share Alike 3.0 United States License. To view a copy of this license, visit http://creativecommons.org/licenses/by-nc-sa/3.0/us/ or send a letter to Creative Commons, 171 Second Street, Suite 300, San Francisco, California, 94105, USA.