Ka Buke a Enosa

MOKUNA 1

1 [mokuna 1, paukū 1] Aia hoi, ua ike no au, o Enosa, i ko’u makuakane, he kanaka pono ia: no ka mea, ao mai la oia ia’u ma kana olelo iho, a me ka hoopono a me ka hoonaauao o ka Haku. A e hoomaikai mau ia ka inoa o ko’u Akua no ia mea.

2 A e hai aku no au ia oukou no ka hakoko ana o’u imua o ke Akua, mamua o ka loaa ana ia o ke kakaia o ko’u mau hala:

3 Aia hoi, hele aku la ua e alualu aku i n holoholona hihiu ma ka ululaau; a o na olelo a’u i lohe ponepine ai i kuu makuakane e olelo ana no ke ola mau loa, a me ka hauoli o ka poe hoano, ua komo loa iloko o kuu naau.

4 A pololi ae la ki’u uhane; a kukuli iho la au ilalo imua o ko’u Mea nana i hana, a kahea aku la au ia ia ma ka noi a me ka pule ikaika, no ko’u uhane iho; a pau loa ae la ka la ko’u hea ana ia ia; he oiaio, a hiki mai la ka po, e hookiekie mau ana au i kp’u leo iluna, i hiki ai ia i na lani.

5 A pae mai la kekahi leo ia’u, i ka i ana, E enosa, ua kalaia’e la kou mau hala nou, a e pomaikai auanei oe.

6 A, ua ike au, o Enosa, ua hiki ole i ke Akua ke wahahee; nolaila, ua kahiliia’e la ko’u mau hewa.

7 A i aku la au, E ka Haku, pehea la ia i hanaia’i?

8 A i mai la ia ia’u, No kou manaoio iloko o Kristo, au i lohe ole e ai mamua, aole hoi i ike. A e hala ana na makahiki he nui loa mamua o kona hoike ana ia ia iho ma ke kino; nolaila, o hele aku, ua ola oe i kou manaoio.

9 [m 1, p 2] Ano, eia kekahi, ia’u i lohe ai i keia mau olelo, hoomaka ae la ka makemake iloko o’u no ka pomaikai o ko’u poe hoahanau, o ko Nepai poe; nolaila, ninini aku la au i ko’u uhane a pau i ke Akua no lakou.

10 A oiai au e aumeume ana pela ma ka uhane, aia hoi, hiki hou mai la ke leo o ka Haku iloko o ko’u naau, i ka i ana, E hele no au i kou poe hoahanau, e like me ko lakou ikaika ma ka malama ana i ka’u mau kauoha. Ua haawi aku au i keia aina ia lakou; a he aina hoano ia; a e hoomainoino ole ana au ia, ke ole no ka hana hewa; nolaila, e hele aku au i kou poe hoahanau me a’u i olelo aku ai; a e hoohaule au i ko lakou mau lawehala me ke haumaha maluna o ko lakou mau poo iho.

11 A mahope iho o ko’u lohe ana i keia mau olelo, hoomaka ae la ka manaoio o’u e naueue ole i ka Haku; a pule aku la au ia ia me na aumeume loihi no ko’u poe hoahanau, no ko Lamana poe.

12 [m 1, p 3] Eia kekahi, mahope iho o ka’u pule, a hana ana me ka ikaika a pau, i mai la ka Haku ia’u, E ae aku au ia oe e like me kou makemake, no kou manaoio.

13 Ano hoi, eia no ka makemake a’u i makemake aku ai ia ia: Ina paha, e haule aku ko’u poe kanaka, ko Nepai poe, iloko o ka hewa, a ma o kekahi mea la e anaiia’i, a e anai ole ia’i ko Lamana poe, na ka Haku ke Akua e hoola i kekahi mooolelo o ko’u poe kanaka, o ko Nepai poe; ina paha ma o ka mana la o kona lima hemolele ia mea i hoopukaia’ku ai, ma kekahi la aku, i ko Lamana poe, i kaiia mai ai paha lakou i ke ola:

14 No ka mea, ua make hewa ko makou hooikaika ana i keia manawa, i hoihoi hou ai ia lakou i ka manaoio oiaio. A hoohiki ae la lakou ma ko lakou huhu, ina he mea hiki, e hoopau loa lakou i ko makou mau mooolelo i kakauia, a me makou pu kekahi; a, i na mooolelo a pau no hoi o ko makou poe kupuna.

15 [m 1, p 4] Nolaila, e ike ana au ua hiki i ka Haku ke Akua ke malama i ko makou mau mooolelo, ua kahea mau au ia ia; no ka mea, ua i mai la oia ia’u, O ka mea ua e noi mai ai ma ka manaoio, e manaoio ana i ka loaa ana ma ka inoa o Kristo, e loaa no ia ia oe.

16 A he manaoio ko’u, a kahea aku la au i ke Akua nana e malama i na mooolelo; a hana berita mai la oia ia’u, nana e hoopuka aku ia mau mea i ko Lamana poe, i kona wa ku pono.

17 A ua ike au, o Enosa, e like auanei ia me ka berita ana i hana mai ai; nolaila, ua maha kuu uhane.

18 A i mai la ka Haku ia’u, Ua noi mai kou mau makua a me na kupuna hoi ia’u i keia mea; a e hanaia auanei ia mea ia lakou e like me ko lkaou manaoio, no ka mea, ua like ko lakou manaoio me ko’u.

19 [m 1, p 5] Eia kekahi, kaahele aku la au, o Enosa, iwaena o ka poe kanaka o Nepai, e wanana ana no na mea e hiki mai ana, a e hoike aku ana no na mea a’u i lohe ai a i ike ai hoi.

20 A ke hoike aku nei au ua imi ikaika ka poe kanaka o Nepai e hoihoi hou mai i ko Lamana poe i ka manaoio oiaio i ke Akua. Aka, make hewa ka makou hana; ua paa ko lakou inaina, a ua alakaiia’ku lakou e ko lakou ano ino, i lilo lakou i lahuikanaka hihiu, a hae, a puni koko; piha me ka hoomana kii, a me ka pelapela; e ai ana i na holoholona hihiu, e noho ana ma na halelewa, a e auwana ana a puni iloko o ka waonahele, me ke kaei ili pokole a puni i ko lakou puhaka, a ua koleia ko lakou mau poo: a o ko lakou akamai aia no ma ke kakaka, a ma ka pahikaua pokole, a me ke koi lipi. A he nui loa na me o lakou ua ai i ka io maka wale no; a e imi mau ana lakou e pepehi mai ia makou.

21 [m 1, p 6] Eia kekahi, mahiai aku la ka poe kanaka o Nepai i ka aina, a loaa mai la kela ano keia ano o na hui liilii, a o na hua laau, a me na pua o na mea wawae eha, a me na pua o na holoholona a pau, o kela ano keia ano, a o na kao, a o na kao hihiu, a me na lio he aui loa.

22 A ua lehulehu na kaula mawaena o makou. A o na kanaka he poe ai oolea lakou, he paakiki ke hoomaopopo.

23 Aole o kekahi mea o ka paipai ikaika wale no, e hai ana a e wanana ana no na kaua, a me na paio, a me na poino, a e olelo mau ana ia lakou no ka make, a me ka mau loa ana o kela ao aku, a me na hoopai a me ka mana o ke Akua; a o keia mau mea a pau e hooeueu ana ia lakou, i noho ai lakou me ka makau i ka Haku. Ke i aku nei au, aohe kekahi mea ke ole keia mau mea, a me ka olelo aku me ka maopopo loa, i hoola ia lakou mai ka iho koke ana i ka make. A mamuli o keia ano a’u e kakau iho nei no lakou.

24 A ike aku la au i na kaua mawaena o ko Nepai poe a me ko Lamana poe, ma na la o’u.

25 [m 1, p 7] Eia kekahi, hiki mai ka wa elemakule o’u, a ua hala na makahiki hookahi haneri kanahikukumamaiwa mai ka manawa a ko makou kupunakane, a Lehi, i haalele aku ai ia Ierusalema.

26 A ua ike au a iho koke ana au i ko’u lua kupapau; a ua hooikaikaia au e ka mana o ke Akua i hai olelo aku ai a i wanana aku ai au i keia lahuikanaka, a i hai aku ai i ka olelo e like me ka oiaio iloko o Kristo. A ua hai aku au ia mea, ma na la a pau o’u, a ua hauoli loa au ma ia mea, mamua o ko ke ao nei.

27 A e hele koke ana au i kahi o’u e maha’i, oia pu no me ko’u Mea Hoolapanai; no ka mea, ua ike au iloko ona e maha’i wau: a ke hauoli nei au i ka la o ko’u palaho e hookomo ai i ka palaho ole, a e ku imua ona: alaila, e ike au i kona maka me ka olioli, a e i mai oia ia’u, E hele mai io’u nei, e ka mea pomaikai, aia no he wahi i hoomakaukauia’i nou ma na hale o ko’u Makua. Amene.