Ka Buke a Alama

KE KEIKI A ALAMA.

O ka mooolelo o Alama, oia no ke keiki a Alama ka mua, a o ka Lunakanawai Nui maluna iho o ka poe kanaka o Nepai, a o ke Kahuna Nui hoi maluna iho o ka Ekalesia. A he mooolelo o ke au o na Lunakanawai, a me na kaua a me na paio mawaena o na kanaka. A me kekahi mooolelo hoi o kekahi kaua mawaena o ko Nepai poe a me ko Lamana poe, e like me ka mooolelo o Alama, o ka mua o na Lunakanawai Nui.

MOKUNA 1

1 [mokuna 1, paukū 1] Ano, eia kekahi, ma ka makahiki mua o ke au o na Lunakanawai maluna iho o ka poe kanaka o Nepai, mai keia manawa aku, a ua hele aku la o ke Alii Mosia i ke ala k ko ka honua a pau, ua paio aku la i ka paio maikai, e hele pololei ana imua o ke Akua, e waiho ole ana i kekahi e noho alii ma kona hakahaka; aka hoi, hoonoho paa mai la oia i na kanawai, a ua aeia aku e kona poe kanaka; nolaila ua koiia lakou e kupaa ma na kanawai ana i hana’i.

2 [m 1, p 2] A eia kekahi, ma ka makahiki mua o ke au o Alama ma ka noho hookolokolo, ua laweia mai kekahi kanaka imua ona e hookolokoloia; i kekahi kanaka ua nunui, a ua kaulana oia no kona ikaika nui;

3 A ua hele aku la oia a puni mawaena o na kanaka, e hai ana ia lakou i ka mea ana i kapa ai ka olelo a ke Akua, e hookaumaha ku e ana i ka ekalesia; e hai ana i na kanaka he pono ke lilo kela kahuna keia kahuna a me na kumu i poe mahaloia; a he mea e pono ole ai no lakou e hana me ko lakou mau lima, aka he pono ke hanaiia lakou e na kanaka;

4 A hoike aku la oia i na kanaka e hoolaia na kanaka a pau loa ma ka la hope, aole pono no lakou e makau, aole hoi haalulu, aka no lakou e hooea mai i ko lakou mau poo a e hauoli: no ka mea, ua hana mai la ka Haku i na kanaka a pau, a ua hoolapanai mai la hoi i na kanaka a pau; a ma ka hopena, e loaa i na kanaka a pau ke ola mau loa.

5 A eia kekahi, no ka nui o kona ao ana’ku i ua mau mea nei, ua nui ka poe i manaoio ma kana mau olelo, a no ka nui o lakou i hoomaka ai lakou e hanai ia ia, a haawi aku i kala ia ia;

6 A hoomaka ae la ia e hookiekieia iluna ma ka haaheo o kona naau, a e komo ae i ke kapa kumu kuai nui; he oiaio, a hoomaka ae la hoi e kukulu iho i ekalesia, mamuli o ke ano o kana hai olelo ana.

7 [m 1, p 3] A eia kekahi, ia ia e hele ana e hai aku i ka poe i manaoio i kana olelo, halawai mai la oia me kahi kanaka no ka ekalesia o ke Akua, he oiaio, me kekahi o ko lakou poe kumu; a hoomaka ae la ia e paio ikaika me ia, e hiki ia ia ke alakai aku i ka poe kanaka o ka ekalesia; aka pale ku e aku ke kanaka ia ia, e ao ana ia ia me na olelo a ke Akua.

8 Ano, o Gideona ka inoa o ua kanaka la; a oia no ka mea hana ma ka lima o ke Akua, i ka hoopakele ana i ka poe kanaka o Limai mailoko mai o ka noho luhi ana.

9 Ano, no ko Gideona ku e ana ia ia me na olelo a ke Akua, ua huhu iho la oia ia Gideona, a unuhi ae la oia i kana pahikaua, a hoomaka ae la e hahau mai ia ia. Ano, ua nui loa na makahiki o Gideona, nolaila, aole oia i hiki ke pale aku i kona hahau ana, nolaila, ua pephi loa ia oia ma ka pahikaua;

10 A ua hopuia ke kanaka nana ia i pephi mai e na kanaka o ka ekalesia, a ua kaiia oia imua o Alama, e hookolokoloia aku e like me ka hewa ana i hana’i.

11 A eia kekahi, ku iho la oia imua o Alama, a olelo pale hihia oia nona iho me ka wiwo ole nui.

12 Aka i aku la o Alama ia ia, Aia hoi, eia ka manawa mua i hookumuia’i ka ke kahuna pula wahahee mawaena o keia poe kanaka. A aia hoi, aole oe hewa ma ka wahahee kahuna pule wale no, aka, ua hooikaika oe e hoolanakila ia mea me ka pahikaua; a ina paha e hookomoia ka wahahee kahuna pule mawaena o keia poe kanaka, e lilo auanei ia o ko lakou mea e luku loa ia’i.

13 A ua hookahe aku oe i ke koko o kahi kanaka pono, he oiaio, i kahi kanaka nana i hana i ka pono a nui mawaena o keia poe kanaka; a ina paha e hookuu aku makou ia oe, e ili mai auanei kona koko maluna o makou no ka hoopai ana;

14 Nolaila, ua hoohewaia oe e make, e like me ke kanawai i haawiia mai e Mosia, ko kakou Alii hope; a ua aeia mai ua mau kanawai la e keia poe kanaka; nolaila, he pono no keia poe kanaka e kupaa ma ke kanawai.

15 [m 1, p 4] A eia kekahi, lawe aku la lakou ia ia; a o Nehora kona inoa; a kaikai aku la lakou ia ia maluna iho o ka piko o ka puu o Manati, a malaila oia i ae mai ai, mawaena o na lani a me ka honua, ua ku e na mea ana i ao aku ai i na kanaka i ka olelo a ke Akua; a malaila oia i loaa’i ka make mainoino.

16 Aka hoi, aole o keia i hooki ai i ka mahuahua ana o na wahahee kahuna pule mawaena o ka aina: no ka mea, ua aloha no kekahi poe he nui i na mea lapuwale o ko ke ao nei, a hele aku la lakou e hai aku ana i na ao wahahee ana; a o keia ka lakou i hana’i no ka makemake i ka waiwai a me ka hanohano.

17 Aka hoi, ua aa ole lakou e wahahee, ina i ikea ia, no ka makau i ke kanawai, no ka mea, ua hoopaiia na mea wahahee; nolaila, hookohukohu iho la lakou e hai aku e like me ko lakou manaoio: ano, aole mana o ke kanawai maluna iho o kekahi kanaka no kona manaoio.

18 A ua aa ole lakou e aihue, no ka makau i ke kanawai; no ka mea, ua hoopaiia ua poe la; aole hoi i aa lakou e powa aku, aole hoi e pepehi kanaka: no ka mea, o ka mea nana i pepehi ua hoopaiia oia i ka make.

19 [m 1, p 5] Aka, eia kekahi, o na mea aole no ka ekalesia o ke Akua, hoomaka ae la lakou e hoomaau mai i ka poe no ka ekalesia o ke Akua, ka poe i lawe maluna o lakou i ka inoa o Kristo;

20 He oiaio, hoomaau mai la lakou ia lakou nei, a hoeha mai la ia lakou nei me kela ano keia ano o na olelo, a o keia no ko lakou nei haahaa; no ka haaheo ole o lakou ma ko lakou mau maka iho, a no ko lakou haawi ana i ka olelo a ke Akua, kekahi me kekahi, me ke kala ole a me ke kumu kuai ole.

21 Ano, aia no kekahi kanawai ikaika mawaena o na kanaka o ka ekalesia, i ole e ala’e kekahi kanaka no ka ekalesia, a e hoomaau aku i ka poe aole no ka ekalesia, a i ole hoi he hoomaau mawaena o lakou iho.

22 Aka hoi, ua nui ka poe mawaena o lakou i hoomaka’e e haaheo, a hoomaka ae la e paio ikaika me ko lakou poe enemi, a kui aku a kui mai; he oiaio, na lakou i papai ae kekahi i kekahi me ko lakou mau puupuu lima.

23 Ano, ma ka makahiki lua keia o ke au o Alama, a he mea e popilikia nui ai i ka ekalesia; he oiaio, he mea ia e hoao nui ai me ka ekalesia;

24 No ka mea, ua hoopaakikiia na naau o na mea he nui wale, a ua holoiia iho la ko lakou mau inoa, i hoomanao hou ole ia’i lakou mawaena o ka poe kanaka o ke Akua. A haalele iho la no hoi na mea he nui ia lakou.

25 Ano, he mea hoao nui keia i ka poe i kupaa ma ka manaoio; aka, ua kupaa a naueue ole lakou i ka malama ana i na kauoha a ke Akua, a hoomanawanui lakou me ke ahonui i ka hoomaau i hoahuia’i maluna iho o lakou.

26 [m 1, p 6] A i ka wa a ka poe kahuna i haalele aku ai i ka lakou hana e hai aku i ka olelo a ke Akua i na kanaka, haalele aku la no hoi na kanaka k ka lakou hana e hoolohe i ka olelo a ke Akua. A i ka wa a ke kahuna i hai aku ai ia lakou i ka olelo a ke Akua, hoi hou ai la lakou a pau me ka ikaika i ka lakou mau hana; a aole manao nui ana ke kahuna ia ia iho maluna o kona poe i hoolohe mai; no ka mea, aole maikai ae ka mea hai aku mamua o ka mea hoolohe mai, aole hoi i maikai ae ka mea ao aku mamua o ka mea i aoia mai: a pela lakou i like ai, a hana iho la lakou, kela kanaka keia kanaka e like me kona ikaika;

27 A haawi aku la lakou i ko lakou waiwai kela kanaka keika kanaka e like me ka mea ana i loaa’i, i ka poe hune, a i ka poe nele, a i ka poe mai, a i ka poe pilikia; a aole o lakou i komo ai i ke kapa i nui ke kumu kuai, aka ua maemae a ua maikai nae lakou:

28 A pela lakou i hookupaa’i i na hana a ka ekalesia: a pela lakou i hoomaka ai e loaa hou ai ka malu mau, me ko lakou hoomaauia mai nae.

29 A, ano, no ka naueue ole o ka ekalesia, hoomaka ae la e nui loa ko lakou waiwai; me ka lawa o na mea a pau a lakou i makemake ai; ua lako ma na pua holoholona, a me na ohana holoholona, a me na mea kualuia o kela ano o keia ano, a me ka lako no hoi o na hua liilii, a o ke gula, a o ke kala, a o na mea maikai; a me ka lako o ke kilika a me ka ie milo makalii ia, a me na ano a pau o ka lole manoanoa maikai.

30 A pela lakou ma ko lakou noho pomaikai ana i kipaku ole aku ai i kekahi mea kapa ole, aole hoi i pololi, aole hoi i makewai, aole hoi i mai, aole hoi i hanai ole ia’i; aole o lakou i kau aku ai i ko lakou mau naau ma ka waiwai; nolaila, ua lokomaikai aku lakou i na mea a pau, i ka poe kahiko a i ka poe hou hoi, i ka poe paa a i ka poe paa ole hoi, i ka poe kane a i ka poe wahine hoi, ina mawaho paha o ka ekalesia, ina iloko paha o ka ekalesia, aole a malama ana kekahi mamua o kekahi o ka poe i nele;

31 A pela lakou i hoopomaikaiia’i a i lilo ai i poe waiwai nui ae, mamua o ka poe aole no ko lakou ekalesia.

32 No ka mea, o ka poe aole no ko lakou ekalesia, ua hana aku la lakou ma ka anaana, a i ka hoomana kii oia hoi ka palaualelo, a i ka haanui, a i ka paonioni ana a me ka paio; e komo ana i ke kapa i nui ke kumu kuai; i hookiekieia’i ma ka haaheo o ko lakou mau maka iho; e wahahee ana, e auhue ana, e powa ana, e hana ana i ka moe kolohe, a e pepehi kanaka ana, a me na ano a pau o ka hewa; aka hoi, ua hania’ku ke kanawai maluna o ka poe a pau e ae ana maluna ona, me ia i hiki ai.

33 [m 1, p 7] A eia kekahi, ma ka hana ana i ke kanawai pela maluna iho o lakou, o kela kanaka keia kanaka e loaa ana e like me ka mea ana i hana’i, lilo ae la lakou i poe noho malie ae, a aa ole e hana i kekahi hewa, ina i ikea ia; nolaila, ua nui ka malu mawaena o ka poe kanaka o Nepai, a hiki aku i ka makahiki elima o ke au o na lunakanawai.

MOKUNA 2

1 A eia kekahi, ma ka hoomaka ana o ka makahiki elima o ko lakou au, hoomaka ae la kekahi paio mawaena o na kanaka, no ka mea, o kekaho kanaka, i kapaia o Amaliki; a he kanaka maalea loa oia, he oiaio, he kanaka naauao, ma ka naauao o ko ke ao nei; mamuli no oia o ka aoao o ke kanaka nana i pepehi ia Gideona ma ka pahikaua, ka mea hoi i hoopaiia’i e like me ke kanawai.

2 Ano, ua hoohuli ae la ua Amaliki nei, ma o kona maalea la, i na kanaka he nui wale mamuli ona; a no ka nui loa i hoomaka ai lakou e lilo i ikaika loa; a hoomaka ae la lakou e hooikaika e hoonoho aku ia Amaliki i Alii maluna iho o na kanaka.

3 Ano, he mea keia e makau ai i na kanaka o ka ekalesia, a i ka poe no hoi i alakai ole ia’i mamuli o na olelo hoohuli a Amaliki: no ka mea, ua ike lakou mamuli o ko lakou kanawai he pono ke hooholoia na mea me neia e ka leo o kanaka;

4 Nolaila, ina he mea hiki ia Amaliki ke loaa ka leo o na kanaka, a he kanaka hewa no ia, e hoonele mai nooia ia lakou i ko lakou mau mea i pono ai a i pomaikai ai hoi o ka ekalesia, a ia mea aku ia mea aku, no ka mea, o kona manao no ia e hoopau mai i ka ekalesia o ke Akua.

5 [m 1, p 8] A eia kekahi, houluulu mai la na kanaka ia lakou iho mawaena o ka aina a pau, o kela mea keia mai e like me kona manao, ina paha no Amaliki, ina paha ku e ia ia, ma na aha okoa, ma ka hoopaapaa nui a me na paio kupanaha kekahi me kekahi;

6 A pela lakou i houluulu ai ia lakou iho, e koho aku no ua mau mea nei: a ua waihoia mai imua o na lunakanaw.

7 A eia kekahi, hiki mai la ka leo o na kanaka e ku e ana ia Amiliki, i ole ai oia e lilo i alii maluna iho o na kanaka.

8 Ano, he mea keia i kupu mai ai i ka hauoli nui iloko o na naeu o ka poe i ku e ia ia; aka hookonokono ae la o Amaliki i ka poe i makemake ia ia, e huhu aku i ka poe i makemake ole ia ia.

9 [m 1, p 9] A eia kekahi, houluulu aku la lakou ia lakou iho, a hoolaa iho la ia Amaliki i Alii no lakou.

10 Ano, ia Amaliki i lilo ai i Alii maluna iho o lakou, kena aku la oia e lalau aku lakou i na mea kana e ku e i ko lakou poe hoahanau; a hana iho la oia i keia, e hiki ia ia ke hookauwa mai ia lakou nana.

11 Ano, ua hookoaia ka poe kanaka o Amaliki ma ka inoa o Amaliki, i kapaia’i ko Amaliki poe; a o ka poe i koe ua kapaia ko Nepai poe, a o ko ke Akua poe kanaka:

12 Nolaila, ua ike ko Nepai poe i ka makemake o ko Amaliki, a nolaila, hoomakaukau lakou e halawai pu me lakou la; he oiaio, kahiko mai la lakou ia lakou iho me na pahikaua, a me na pahikaua pokole, a me na kakaka, a me na pua, a me na ala, a me na maa, a me na mea kaua a pau, o kela ano keia ano;

13 A pela lakou i hoomakaukauia’i e halawai me ko Amaliki i ka manawa a lakou e hiki mai ai. A ua waeia na kapena, a me na kapena kiekie ae, a me na kapena kiekie loa, e like me ko lakou helu.

14 [m 1, p 10] Eia kekahi, kahiko iho la o Amaliki i kona poe kanaka me na mea kaua a pau, o kela ano o keia ano; a wae iho la no hoi oia i na luna a me na alihi kaua maluna o kona poe kanaka, e alakai ia lakou e kaua i ko lakou poe hoahanau.

15 A eia kekahi, hiki mai la ko Amaliki poe maluna o ka puu Amanihu, aia no ma ka hikina o ka muliwai o Sidona, e hookahe ana ma ka aina o Zarahemela, a malaila lakou i hoomaka ai e kaua me ko Nepai poe.

16 Ano, o Alama no ka lunakanawai nui, a kiaaina hoi no ka poe kanaka o Nepai, nolaila pii pu aku la oia me kona poe kanaka, he oiaio, me kona poe kapena, a poe kapena nui hoi, he oiaio, ma ke alo o kona poe kaua i ko Amaliki poe e kaua;

17 A hoomaka ae la lakou e hoouka aku i ko Amaliki poe maluna o ka puu ma ka hikina o Sidona. A paio mai la ko Amaliki poe me ko Nepai poe me ka ikaika nui, a haule iho la he nui wale o ko Nepai poe imua o ko Amaliki;

18 Aka hoi, hooikaika mai la ka Haku i ka lima o ko Nepai poe, a luku aku la lakou i ko Amaliki poe me ka luku nui, a hoomaka ae la lakou e hee aku ai imua o lakou nei.

19 A eia kekahi, alualu aku la ko Nepai poe i ko Amaliki a pau ae la kela la, a luku aku la ia lakou me ka luku nui, a pepahiia’ku la o ko Amaliki, he umikumamalua tausani elima haneri kanakolukumamalua; a ua pepehiia mai la o ko Nepai poe, eono tausani elima haneri kanaonokumamalua.

20 [m 1, p 11] A eia kekahi, ia Alama i hiki ole ai ke alualu hou aku i ko Amaliki, kauoha ae la oia i kona poe kanaka e kukulu iho i na halelewa o lakou, ma ke awawa o Gideona, ua kapaia ke awawa mamuli o ua Gideona la i pepehiia’i e ka lima o Nehora me ka pahikaua: a maloko o ua awawa nei ko Nepai poe i kukulu ai i na halelewa o lakou no ka po.

21 A hoouna aku la o Alama i na kiu e hahai aku i ka poe i koe o ko Amaliki poe, e hiki ia ia ke ike no ko lakou mau manao a me ka lakou mau mea e kuka’i, e hiki ia ia ke hoomalu mai ia ia iho ia lakou, e hiki ia ia ke hoopakele mai i kona poe kanaka mai ka lukuia’na mai.

22 Ano, o ka poe ana i hoouna aku ai e hoomaka’kiu aku i ka poe kaua o ko Amaliki, ua kapaia o Zerama, a me Amanora, a me Manati, a me Limera; o lakou no ka poe i hele aku me ko lakou poe kanaka e hoomaka’kiu aku i ka poe kaua o ko Amaliki.

23 Eia kekahi, ma ia la ae, hoi hou mai la lakou i kahi hoomoana o ko Nepai, me ka wikiwiki nui, i kahaha nui ia’i, a i loohia’i me ka makau nui, i ka i ana,

24 Aia hoi, hahai aku la makou i ko Amaliki poe, a me ke kahaha nui o makou, ma ka aina o Minona, maluna’e o ka aina o Zarahemela, i ka ihu i ka aina o Nepai; ike aku la makuoo i ka puali kinikini o ko Lamana poe; a, aia hoi, ua hui pu aku ko Amaliki poe me lakou,

25 A, aia no lakou maluna iho o ko kakou poe hoahanau ma ua aina la; a e auhee ana lakou mamua o lakou la me na pua holoholona o lakou, a me na wahine a lakou, a me na keiki a lakou, i ko kakou kulanakauhale; a ke ole kakou e wikiwiki, e loaa ana ia lakou ko kakou kulanakauhale; a e pepehiia ko kakou poe makua, a me ka kakou poe wahine, a me ka kakou poe keiki.

26 [m 1, p 13] A eia kekahi, lawe aku la ka poe kanaka o Nepai i na halelewa o lakou, a haele aku la mawaho o ke awawa o Gideona i ko lakou kulanakauhale, oia no ke kulanakauhale o Zarahemela.

27 A, aia hoi, me lakou e hele aku ana i kela aoao o ka muliwai Sidona, hiki mai la ko Lamana poe a me ko Amaliki poe, (ua kokoke ka lehulehu o lakou, me he mea la, o na one o ke kai,) maluna o lakou e luku mai ia lakou;

28 Aka hoi, o ko Nepai poe, ua hooikaikaia mai la e ka lima o ka Haku, ua pule ikaika aku ia ia, nana e hoopakele mai ia lakou, mailoko mai o na lima o ko lakou poe enemi; nolaila, hoolohe mai la ka Haku i ko lakou hea ana, a hooikaika mai la ia lakou, a haule iho la ko Lamana poe a me ko Amaliki poe imua o lakou.

29 A eia kekahi, kaua aku la o Alama me Amaliki me ka pahikaua, he maka no he maka; a paio ikaika ae la laua, kekahi i kekahi.

30 [m 1, p 14] Eia kekahi, he kanaka no ke Akua no Alama, a ua piha oia me ka manaoio nui, kahea aku la oia, i ka i ana, E ka Haku, e aloha mai a e hookoe mai i ko’u ola, i lilo ai au i mea hana ma kou mau lima, e hoola a e hoopakele ae i keia poe kanaka.

31 Ano, ia Alama i olelo ai i keia mau olelo, paio hou aku la oia me Amaliki; a ua hooikaikaia mai oia, a pepehi aku la oia ia Amaliki me ka pahikaua.

32 A paio aku la hoi oia me ke Alii o ko Lamana poe; aka hee aku la ke Alii o ko Lamana poe mai ke alo aku o Alama, a hoouna ae la oia i kona poe koa e paio mai me Alama.

33 Aka, paio aku la o Alama, me kona poe koa, me ka poe koa o ke Alii o ko Lamana poe, a, luku aku la a hooauhee aku la oia ia lakou;

34 A pela oia i hooakea ai i ka aina, a me ke kapa, ma ke komohana o ka muliwai Sidona, e hoolei ana i na kino o ko Lamana poe i pepehiia, iloko o na wai o Sidona, i hiki i kona poe kanaka ma ia mea ke loaa kahi akea e hele aku ai i kela aoao, a e paio aku me ko Lamana poe a me ko Amaliki poe, ma ka aoao komohana o ka muliwai Sidona.

35 [m 1, p 15] A eia kekahi, ia lakou a pau i hele aku ai i kela aoao o ka muliwai Sidona, hoomaka ae la ko Lamana poe a me ko Amaliki poe e hee aku imua o lakou, he poe lehulehu loa nae lakou i hiki ole ai ke heluia;

36 A auhee aku la lakou imua o ko Nepai poe, i ka waonahele ma ke komohana a ma ka akau, ma o aku o na palena o ka aina; a alualu aku la ko Nepai poe ia lakou me ko lakou ikaika, a luku aku la ia lakou;

37 He oiaio, ua halawai lakou ma kela lima keia lima, a lukuia, a hooauheeia, a, hoopuehuia lakou ma ke komohana a ma ka akau, a hiki aku lakou i ka waonahele, i kapaia o Heramauna; a oia kahi o ka waonahele i noho ai na holoholona hihiu a hae.

38 A eia kekahi, ua nui ka poe i make ma ka waonahele no na eha o lakou, a ua aiia e ua poe holoholona la, a e na manu hoi o ka lewa; a ua loaa ma la ko lakou mau iwi, a ua hoahuia iho la me ka honua.

MOKUNA 3

1 [mokuna 1, paukū 16] A eia kekahi, o ko Nepai poe ka poe i pepehi ole ia e na mea kaua, i ka wa i pau ai ka poe pepehiia i ke kanuia;—ano, aole i heluia ka poe i pepehiia, no ka nui loa o lakou;—mahope iho o ko lakou hoopau ana i ke kanu ana i ko lakou poe i make, hoi aku la lakou a pau i na aina o lakou, a i na hale o lakou, a i na wahine a lakou, a me na keiki a lakou.

2 Ano, ua pepehiia na wahine a me na keiki he nui me ka pahikaua, a me na pua holoholona o lakou, a me na ohana holoholona o lakou he nui loa no hoi; a ua nui na kihapai hoi o ka hua liilii i hoopauia, no ka mea, ua hahiia ilalo e na puali o kanaka.

3 Ano, o ka poe o ko Lamana poe a me ko Amaliki poe i pepehiia ma ke kapa o ka muliwai Sidona, ua kiolaia’ku iloko o na wai o Sidona; a, aia hoi na iwi o lakou iloko o na hohonu o ke kai, a ua nui loa lakou.

4 A ua ike okoa ia ko Amaliki poe mai ko Nepai poe ae; no ka mea, ua hoailono aku la lakou ia lakou iho me ka ulaula ma ko lakou mau lae, mamuli o ke ano o ko Lamana poe; aka hoi, aole o lakou i koli ai i ko lakou mau poo e like me ko Lamana poe.

5 Ano, ua koliia na poo o ko Lamana poe; a ua kapa ole lakou, koe wale no ka ili, i kaeiia a puni o ko lakou mau puhaka, a me ko lakou aahu pale kaua, i kakooia a puni lakou, a me na kakaka a lakou, a me na pua, a me na ala a lakou, a me na maa a lakou, a ia mea aku, ia mea aku.

6 A ua haulaula na ili o ko Lamana poe e like me ka hoailona i hookauia mai maluna iho o ko lakou poe kupuna, oia no kekahi poino maluna o lakou no ka lakou lawehala a me ko lakou kipi ana i ko lakou mau hoahanau, oia o Nepai, o Iakoba, o Iosepa, a me Sama, he mau kanaka pono a hemolele lakou.

7 A imi mai la ko lakou poe kaikuaana e luku mai ia lakou; nolaila, ua hoomainoinoia lakou; a hookau ae la ka Haku ke Akua i hoailona maluna iho o lakou; he oiaio, maluna iho o Lamana laua me Lemuela, a me na keikikane a Isemaela, a me na wahine a ko Isemaela:

8 A ua hanaia keia, i ike okoa ia ka lakou poe mamo, mai ka poe mamo ae a ko lakou mau hoahanau, e hiki i ka Haku ma ia mea ke hoola mai i kona poe kanaka, i hui pu ole ai lakou a e manaoio ma na mooolelo pololei ole, na mea e lilo ai i mea e luku mai ai ia lakou.

9 [m 1, p 17] A eia kekahi, o ka mea nana i hui pu i kana hua me ka ko Lamana poe, ua lawe mai la oia i ua poino hookahi la maluna o kana hua;

10 Nolaila, o ka mea nana i ae aku e alakaiia’ku e ko Lamana poe, ua kapaia ma kela inoa, a ua hookauia kekahi hoailona maluna ona.

11 A eia kekahi, o ka poe i manaoio ole i ka mooolelo o ko Lamana poe, aka, i manaoio i kela mau mooolelo i laweia mai ai mailoko mai o ka aina o Ierusalema, a ma na mooolelo pololei hoi a ko lakou poe kupuna, ka poe i manaoio i na kauoha a ke Akua, a malama aku ia mau mea, ua kapaia ko Nepai poe, a o ka poe kanaka hoi o Nepai, mai ia manawa aku,

12 A o lakou no ka poe i kakau ai i na mooolelo oiaio o ko lakou poe kanaka, a me ka poe kanaka hoi o ko Lamana.

13 Ano, e hoi hou aku kakou i ko Amaliki poe, no ka mea, ua hookauia’e la i hoailona no hoi maluna iho o lakou; he oiaio, hookau ae la lakou i ka hoailona maluna o lakou iho, he oiaio, he hoailona ulaula ma ko lakou mau lae.

14 Pela i ko ai ka olelo a ke Akua, no ka mea, eia na olelo ana i olelo aku ai ia Nepai: Aia hoi, ua hoomainoino au i ko Lamana poe; a e kau aku ai au i hoailona maluna iho o lakou, i hookaawaleia’i lakou a me ka lakou poe hua mai ou aku a me kau poe hua, mai keia manawa aku a mau loa aku, ke mihi ole lakou i ko lakou mau hewa a e huli mai ia’u, i aloha aku ai ua ia lakou.

15 A eia hou: E kau aku ai au i hoailona maluna o ka mea e hui pu ana i kana hua me kou poe hoahanau, i hoomainoino pu ia’i no hoi lakou.

16 A eia hou: E kau aku ai no au i hoailona maluna o ka mea e kaua mai ana ia oe a i kau poe hua.

17 A ke i hou aku nei au, o ka mea e haalele ae ia oe, aole oia e kapa hou ia kau hua; a e hoopomaikai aku no au ia oe, a pela aku, a me ka mea e kapaia auanei kau hua, ma neia hope aku a mau loa aku: a oia na olelo hoopomaikai a ka Haku ia Nepai, a i kana poe hua.

18 Ano, aole o ko Amaliki poe i ike e hooko ana lakou i na olelo a ke Akua, ia lakou i hoomaka’i e hoailona ia lakou iho ma ko lakou mau lae; aka hoi, ua puka mai la lakou ma ke kipi ana ma ke akea i ke Akua; nolaila, he mea e pono ai e haule ae ka hoomainoino maluna iho o lakou.

19 Ano, ke makemake nei au e ike oukou ua lawe lakou maluna o lakou iho i ka hoomainoino; a pela no o kela kanaka keia kanaka i hoomainoino, i lawe ai maluna iho ona i kona hoohewaia iho.

20 [m 1, p 18] Ano, eia kekahi, aole nui na la mahope iho o ke kaua i kauaia’i ma ka aina o Zarahemela, e ko Lamana a me ko Amaliki poe, hiki mai la kekahi puali koa e, o ko Lamana poe maluna iho o ka poe kanaka o Nepai ma ua wahi hookahi la, kahi a ka poe kaua mua i halawai pu ai me ko Amaliki poe.

21 A eia kekahi, ua hoounaia’ku la kekahi poe koa e kipaku aku ia lakou la mawaho o ko lakouk aina.

22 Ano, ua pilikia iho la o Alama me kahi eha, aole oia i hele e kaua aku i keia manawa i ko Lamana poe;

23 Aka nana i hoouna aku i poe kaua he lehulehu e ku e ia lakou la; a pii aku la lakou a lukuia iho la he nui o ko Lamana poe, a hooauhee aku la i ka poe i koe o lakou mawaho o na palena o ko lakou aina;

24 Alaila, hoi hou ae la lakou, a hoomaka ae la e hookupaa i ka malu ma ka aina, a ua hoopilikia hou ole ia mai no kekahi manawa me ko lakou poe enemi.

25 Ano, ua hanaia iho la ua mau mea a pau, he oiaio, ua hoomakaia ua mau kaua a paio nei, a i hoopauia hoi ma ka makahiki elima o ke au o na Lunakanawai;

26 A i ka makahiki hookahi ua hoounaia’ku na tausani a me na umi tausani o na uhane i ke ao pau ole, e hiki ia lakou ke ohi i ko lakou uku e like me ka lakou hana, ina paha he maikai ia, ina paha he ino ia, e ohi i ka pomaikai mau loa, a i ole ia, i ka poino mau loa, e like me ka uhane a lakou i hoolohe ai a malama, ina paha he uhane maikai, ina paha he ino;

27 No ka mea, e loaa ana i kela kanaka i keia kanaka ka uku o ka mea ana i hoolohe mai a malama, a ua like keia me na olelo a ka uhane o ka wanana; nolaila e like ia me ka oiaio. A pela i pau ai ka makahiki elima o ke au o na Lunakanawai.

MOKUNA 4

1 [mokuna 2, paukū 1] Ano, eia kekahi, ma ka makahiki eono o ke au o na Lunakanawai maluna iho o ka poe kanaka o Nepai, aole no na paio aole hoi na kaua ma ka aina o Zarahemela;

2 Aka, ua hoopilikiaia na kanaka, he oiaio, ua hoopilikia nui loa ia no ka lilo ana o ko lakou poe hoahanau, a no ka lilo ana hoi o na pua a me na ohana holoholona o lakou, a no ka lilo ana o na kihapai o ka hua liilii, i hahiia’i malalo iho o na kapuai a i hoopauia’i e ko Lamana poe,

3 A no ka nui o ko lakou popilikia, he kumu ko kela mea keia mea e uwe ai; a manaoio iho la lakou o ka hoopai ana ia o ke Akua i hoounaia mai maluna o lakou, no ko lakou hewa a me ko lakou mau mea ino; nolaila, ua hoalaia lakou e hoomanao i na mea e pono ia lakou ke hana.

4 A hoomaka ae la lakou e hookupaa nui ae i ka ekalesia; he oiaio, a ua nui ka poe i bapetizoia iloko o na wai o Sidona, a ua huiia mai i ka ekalesia o ke Akua; he oiaio, ua bapetizoia lakou e ka lima o Alama, ka mea i hoolaaia’i i Kahuna Nui maluna o na kanaka o ka ekalesia, e ka lima o kona makuakane o Alama.

5 [m 2, p 2] A eia kekahi, ma ka makahiki ehiku o ke au o na lunakanawai, aia no ua kokoke ekolu tausani elima haneri mea i hui pu ai ia lakou iho i ka ekalesia o ke Akua, a ua bapetizoia. A pela i pau ai ka makahiki ehiku o ke au o na lunakanawai maluna iho o ka poe kanaka o Nepai; a ua maluhia mau ma ia manawa a pau.

6 [m 2, p 3] A eia kekahi, ma ka makahiki ewalu o ke au o na lunakanawai, hoomaka ae la ka poe kanaka o ka ekalesia e mahuahua aku ma ka haaheo, no ko lakou waiwai nui loa, a me ko lakou mau kilika nani, a me ko lakou ie i milo makalii ia, a no ka nui wale o na pua a me na ohana holoholona o lakou, a me ko lakou gula, a me ko lakou kala, a me na mea maikai o na ano a pau, a lakou i loaa mai ai ma ka lakou hana mau; a ma ua mau mea nei a pau ua hookiekieia ae la lakou ma ka haaheo o ko lakou mau maka, no ka mea, hoomaka ae la lakou e komo ai i ke kapa i nui loa ke kumu kuai.

7 Ano, he mea keia e pilikia nui ai ia Alama, he oiaio, a i na mea he nui hoi o ka poe kanaka a Alama i hoolaa’i i poe kumu, a i poe kahuna, a i poe lunakahiko, maluna iho o ka ekalesia; he oiaio, ua nui wale ka poe o lakou i hoeha nui ia, no ka hewa a lakou i ike ai ua hoomaka mawaena o ko lakou poe kanaka.

8 No ka mea, nana aku la lakou a ike iho la me ke kaumaha nui ua hoomaka ae la ka poe kanaka o ka ekalesia e hookiekieia ma ka haaheo o ko lakou mau maka, a e kau aku i ko lakou mau naau maluna o ka waiwai a maluna o na mea lapuwale o ko ke ao nei; a hoomaka ae la lakou e haakei, kekahi i kekahi, a hoomaka ae la lakou e hoomaau aku i ka poe i manaoio ole e like me ka makemake a me ka mea oluolu ia lakou.

9 A pela ma ua makahiki ewalu nei o ke au o na lunakanawai, hoomaka ae la na paio nui mawaena o na kanaka o ka ekalesia; he oiaio, ua nui na paonioni ana, a me ka hakaka, a me ka lokoino, a me ka hoomaau, a me ka haaheo, e oi aku ana mamua o ka haaheo o ka poe i hui ole ia i ka ekalesia o ke Akua.

10 A pela i pau ai ka makahiki ewalu o ke au o na lunakanawai; a o ka hewa o ka ekalesia he mea ia e hina’i i ua poe la i hui ole ia i ka ekalesia; a pela ka ekalesia i hoomaka ae e lohi i kona holo ana.

11 [m 2, p 4] A eia kekahi, i ka hoomaka ana o ka makahiki eiwa, ike aku la o Alama i ka hewa o ka ekalesia, a ike aku la no hoi oia, e hoomaka ana ka hana a ka ekalesia e alakai aku i ua poe hoomaloka la, mai ia hana hewa aku ia hana hewa aku, pela e lawe mai ana i ka lukuia’na o kanaka;

12 He oiaio, ike aku la oia ua nui ka like ole mawaena o na kanaka, o kekahi poe e hookiekie ana ia lakou iho iluna me ko lakou haaheo, e hoowahawaha ana i na mea e ae, e huli ana i ko lakou mau kua i ka poe nele, a kapa ole, a i ka poe i pololi, a i ka poe i makewai, a i ka poe i mai a i pilikia.

13 Ano, he mea nui keia e kanikau ai mawaena o na kanaka, oiai na mea e ae e hoohaahaa ana ia lakou iho, e kokua ana i ka poe ku pono ke kokuaia, meneia, e haawi ana i ko lakou waiwai i ka poe hune a me ka poe nele; a e loaa ana kela ano keia ano o na popilikia, no ko Kristo pono, ka mea e hele mai auanei e like me ka Uhane o ka wanana,

14 E nana ana imua i kela la, pela e loaa mau ana ke kalaia’na o ka lakou mau hala; i hoopihaia’i me ka olioli nui, no ke alahou ana o ka poe i make, e like me ka makemake, a me ka mana, a me ka hoopakele ana o Iesu Kristo mai na apo o ka make mai.

15 [m 2, p 5]Ano, eia kekahi, ua ike o Alama i na popilikia o ka poe hahai haahaa i ke Akua, a me na popilikia i hooiliia maluna iho o lakou e ka poe i koe o kona poe kanaka, a e ike ana i ko lakou like ole a pau, hoomaka ae la oia e hookaumaha nui ia; aka hoi, aole i haalele ka Uhane o ka Haku ia ia.

16 A wae aku la oia i kekahi kanaka naauao, aia no mawaena o ka poe lunakahiko o ka ekalesia, a haawi ae la ia ia i mana e like me ka leo o na kanaka, e hiki ia ia ke loaa ka mana e hooholo i na kanawai e like me na kanawai i haawi e ia mai, a e hookau mai e like me na hala a me na hewa nui o ka kanaka.

17 Ano, o Nepaiha ka inoa o keia kanaka, a ua waeia’e oia i Lunakanawai Nui; a noho iho la oia ma ka noho hookolokolo, e hookolokolo aku a e hoomalu aku i na kanaka.

18 Ano, aole o Alama i haawi aku ia ia i ka oihana o ke Kahuna Nui maluna iho o ka ekalesia, aka aua mai la oia i ka oihana o ke Kahuna Nui ia ia iho; aka, haawi aku la oia i ka noho hookolokolo ia Nepaiha:

19 A o keia kana i hana’i, e hiki ia ia ke hele aku mawaena o kona poe kanaka, a oia hoi mawaena o ka poe kanaka o Nepai, e hiki ia ia ke hai aku i ka olelo a ke Akua ia lakou, e hoeueu aku ia lakou e hoomanao i na mea pono no lakou ke hana, a e hiki ia ia, ma o ka olelo la a ke Akua, ke hoohaahaa i ka haaheo a me ka maalea a pau, a me na paio a pau mawaena o kona poe kanaka, e ike ole ana i kekahi ala e hiki ia ia ke hoola hou ia lakou, ke ole ma ke kaomi ana i ka hoike pololei ana ia lakou.

20 A pela ma ka hoomaka ana o ka makahiki eiwa o ke au o na lunakanawai maluna iho o ka poe kanaka o Nepai, haawi aku la o Alama i ka noho hookolokolo ia Nepaiha, a e hoopaa loa ana ia ia iho i ka Oihana Kahuna Nui o ka aoao hemolele o ke Akua, i ka hoike ana i ka olelo, e like me ka Uhane o ka hoikeana a me ka wanana.

O na olelo a Alama, ke Kahuna Nui, mamuli o ka aoao hemolele o ka Akua, ana i hai aku ai i na kanaka, ma na kulanakauhale a me na kauhale o lakou mawaena o ka aina a puni.

O ka mokuna 5.

MOKUNA 5

1 [mokuna 3, paukū 1] Ano, eia kekahi, hoomaka ae la o Alama e hai aku i ka olelo a ke Akua i na kanaka, i ka aina o Zarahemela ka mua, a mailaila aku mawaena o ka aina a pau.

2 Ano, eia na olelo ana i olelo aku ai i na kanaka iloko o ka ekalesia i kukuluia’i ma ke kulanakauhale o Zarahemela, e like me kona mooolelo ponoi, i ka i ana:

3 Owau o Alama, ua hoolaaia mai au e ko’u makuakane o Alama, i Kahuna Nui maluna iho o ka ekalesia o ke Akua, ia ia ka mana a me ka pono mai ke Akua mai e hana i keia mau mea, aia hoi, ke i aku nei au ia oukou, ua hoomaka ae la oia e kukulu i ekalesia ma ka aina e kokoke ana i na palena o Nepai; he oiaio, o ka aina i kapaia’i ka aina o Moramona; he oiaio, a bapetizo iho la oia i kona poe hoahanau iloko o na wai o Moramona.

4 Aia hoi, ke i aku nei au ia oukou, ua hoopakeleia mai lakou mailoko mai o na lima o ka poe kanaka o ke Alii Noa, e ka loko maikai a me ka mana o ke Akua.

5 A, aia hoi, mahope mai o ia mea, ua laweia mai lakou iloko o ka noho luhi ana e ko Lamana poe, iloko o ka waonahele; he oiaio, ke i aku nei au ia oukou, iloko o ka noho pio ana lakou, a hoopakele hou mai la ka Haku ia lakou mailoko mai o ka noho pio ana ma ka mana o kana olelo; a laweia mai la kakou iloko o keia aina, a maanei kakou i hoomaka ai e kukulu iho i ka ekalesia o ke Akua mawaena hoi o keia aina.

6 [m 3, p 2] Ano hoi, ke i aku nei au ia oukou, e o’u poe hoahanau, ka poe i huiia mai i keia ekalesia, ua hoomanao pono mau anei oukou i ka noho pio ana o ko oukou poe makua? He oiaio, a ua hoomanao pono mau anei oukou i kona aloha a hoomanawanui mai ia lakou? A eia hoi, ua hoomanao pono mau anei oukou, ua hoopakele ae la oia i ko lakou poe uhane mai Gehena aku?

7 Aia hoi, hoololi mai la oia i ko lakou mau naau; he oiaio, hoala mai la oia ia lakou mai ka hiamoe loa ae, a ala ae la lakou i ke Akua. Aia hoi, mawaena o ka pouli lakou; aka hoi, ua hoomalamalamaia mai la ko lakou mau naau e ka malamalama o kana olelo mau loa; he oiaio, ua hoopuniia lakou e na apo o ka make a me na kaulahao o ka po, a e kali ana ka make mau loa ia lakou.

8 Ano, ke ninau nei au ia oukou, e o’u poe hoahanau, ua make anei lakou? Ke i aku nei au ia oukou, Aole, aole o lakou i make.

9 A ke ninau hou nei au, ua uhaiia anei na apo o ka meka, a o na kaulahao o ka po a lakou i hoopuniia’i, ua hookuuia mai anei ia mau mea? Ke i aku nei au ia oukou, Ae, ua hookuuia mai, a hooakeaia’i na uhane o lakou, a memele aku la lakou i ke aloha hoolapanai ana. A ke i aku nei au ia oukou, ua hoolaia lakou.

10 Ano, ke ninau nei au ia oukou, ma na hana hea lakou i hoolaia’i? He oiaio, heaha ko lakou mau kumu i lana’i ka manao no ke ola? Heaha la ke kumu o ko lakou hookuuia’na mai na apo ae o ka make? He oiaio, a o na kaulahao no hoi o ka po?

11 Aia hoi, ua hiki ia’u ke hai aku ia oukou: Aole anei ko’u makuakane, o Alama, i manaoio i na olelo i haiiia mai ma ka waha o Abinadi? A, aole anei oia he kaula hemolele? Aole anei oia i olelo mai i na olelo a ke Akua, a i manaoio hoi ko’u makuakane, o Alama, ia mau mea?

12 A e like me kona manaoio ua hoololi mana loa ia ma kona naau. Aia hoi, ke i aku nei au ia oukou, he oiaio iho la ua mau mea nei a pau.

13 Aia hoi, hai aku la oia i ka olelo i ko oukou poe makua, a ua hoololi mana loa ia no hoi ma ko lakou mau naau; a hoohaahaa iho la lakou ia lakou iho, a paulele aku la lakou i ke Akua oiaio a ola. Aia hoi, ua onipaa iho la lakou a hiki aku i ka hopena; nolaila, ua hoolaia lakou.

14 [m 3, p 3] Ano hoi, ke ninau nei au ia oukou, e o’u poe hoahanau o ka ekalesia, ua hoohanauia anei oukou ma ka uhane e ke Akua? Ua loaa anei ia oukou kona ano like ma ko oukou maka? Ua loaa anei ia oukou ua hoano e mana nei ma ko oukou mau naau?

15 Ke hana nei anei oukou me ka manaoio ma ka hoolapanai ana o ka mea nana oukou i hana mai? Ke nana aku nei anei oukou imua me ka maka o ka manaoio, a e ike keia kino make e hoalaia mai i ka make ole, a o keia palaho e hoalaia mai i ka palaho ole, e ku iho imua o ke Akua, e hookolokoloia e like me na hana i hanaia’i ma ua kino make nei?

16 Ke i aku nei au ia oukou, ua hiki anei ia oukou ke manao wale e hoolohe ana oukou i ka leo o ka Haku, i ka i ana ia oukou, ma ia la, E hele mai oukou io’u nei, e ka poe i hoomaikaiia, no ka mea, aia hoi, o ka oukou mau hana o na hana ia o ka pono maluna iho o ka ili o ka honua?

17 A i ole ia, ke manao wale nei anei oukou ua hiki ia oukou ke wahahee aku i ka Haku ma ua la la, a e i aku, E ka Haku, o ka makou mau hana he mau hana pono ia mau mea maluna iho o ka ili o ka honua, a nana e hoola mai ia oukou?

18 A i ole ia, ua hiki anei ia oukou ke manao wale ua laweia oukou imua o kahi hookolokolo o ke Akua, me ko oukou naau i hoopihaia’i me ka hala a me ka walania; me ka hoomanao i ka oukou mau hala a pau; he oiaio, me ka hoomanao lea i ko oukou mau hewa a pau; he oiaio, me ka hoomanao ua aa aku e ku e i na kanawai o ke Akua?

19 Ke i aku nei au ia oukou, e hiki anei ia oukou ke nana iluna i ke Akua ia la, me ka naau maemae a me na lima lepo ole? Ke i aku nei au ia oukou, e hiki anei ia oukou ke nana iluna, me ke ano like o ke Akua i kahakahaia ma ko oukou maka?

20 Ke i aku nei au ia oukou, e hiki anei ia oukou ke manao e hoolaia oukou, ia oukou i ae aku ai e lilo i poe kauwa na ka diabolo?

21 Ke i aku nei au ia oukou, e ike oukou ia la, aole i hiki ia oukou ke hoolaia; no ka mea, aole e hiki i kekahi kanaka ke hoolaia ke ole kona mau aahu i holoiia a keokeo: he oiaio, e huikalaia no kona mau aahu, a, hoomaemaeia’ku ia mau mea i na kohu a pau, ma o ke koko la o ka mea i oleloia’i e ko kakou poe kupuna, ka mea e hele mai a e hoolapanai mai i kona poe kanaka i ko lakou mau hewa.

22 [m 3, p 4] Ano, ke ninau nei au ia oukou, e o’u poe hoahanau, pehea la auanei ka manao o kekahi poe o oukou, ina e ku auanei oukou imua o kahi hookolokolo o ke Akua, me ko oukou mau aahu i kohuia me ke koko, a me ka paumaele o na ano a pau? Aia hoi, heaha ka mea a keia mau mea e hoike ku e mai ia oukou?

23 Aia hoi, aole anei ua mau mea nei e hoike mai he poe pepehi kanaka oukou, he oiaio, a he poe hewa no hoi oukou ma na hewa o na ano a pau?

24 Aia hoi, e ko’u poe hoahanau, ke kuhi nei anei oukou e hiki i kekahi mea me neia ke loaa kahi e noho ai iloko o ke aupuni o ke Akua, me Aberahama, me Isaaka, a me Iakoba, a me na kaula hemolele a pau, ka poe nona na aahu i huikalaia, a i kina ole, a maemae a keokeo?

25 Ke i aku nei au ia oukou, Aole, ke ole oukou e hoolilo ae i ko kakaou Mea nana i hana i mea wahahee mai kinohi mai, a kuhi paha he mea wahahee oia mai kinohi mai, aole e hiki ia oukou ke kuhi e hiki i kekahi mea me neia ke loaa ke kau wahi iloko o ke aupuni o ka lani, aka, e kiolaia’ku lakou, no ka mea, o lakou no na keiki o ke aupuni o ka diabolo.

26 Ano hoi, ke i aku nei au ia oukou, e o’u poe hoahanau, ina ua loaa ia oukou kekahi ano e o ka naau, a ina manao oukou e memele aku i ka mele o ke aloha hoolapanai ana, ke makemake nei au e ninau, e hiki anei ia oukou ke manao pela ano?

27 Ua hele anei oukou, e malama ana ia oukou iho me ka hewa ole imua o ke Akua? Ua hiki anei ia oukou ke olelo, iloko o oukou iho, ina ua kaheaia mai oukou e make i keia manawa, ua haahaa pono oukou? A ua hoomaemaeia no hoi ko oukou mau aahu a hooliloia i keokeo, ma o ke koko la o Kristo, ka mea e hele mai e hooalapanai mai i kona poe kanaka mai ko lakou mau hewa ae?

28 Aia hoi, ua nele anei oukou i ka haaheo? Ke i aku nei au ia oukou, i ole pela, aole oukou makaukau e halawai pu me ke Akua. Aia hoi, e hoomakaukau koke oukou, no ka mea, ua kokoke mai no ke aupuni o ka lani, aole hoi no kekahi mea me neia ke ola mau loa.

29 Aia hoi, ke i aku nei au, aia mawaena o oukou anei kekahi mea i haalele ole i ka paonioni? Ke i aku nei au ia oukou, aole i makaukau kekahi mea me neia, a ke makemake nei au e hoomakaukau koke oia, no ka mea, ua kokoke mai ka hora, aole oia ike i ka manawa e hiki mai ka hora; no ka mea, aole e loaa kekahi mea me neia me ka hewa ole.

30 [m 3, p 5] A eia hou ka’u e i aku nei ia oukou, aia mawaena o oukou anei kekahi mea nana i hoolilo ae i kona hoahanau i mea e hoomaewaewaia’i, a e hooili ana paha maluna ona i ka hoomaau ana?

31 Auwe kekahi mea me neia, no ka mea, aole oia makaukau, a ua kokoke mai ka manawa e mihi oia e pono ai, i ole, aole e hiki ia ia ke hoolaia;

32 He oiaio, auwe oukou a pau ka poe e hana ana i ka hewa; e mihi, e mihi, no ka mea, ua olelo mai la ka Haku ke Akua ia mea.

33 Aia, ke hoouna mai la oia i olelo kono i na kanaka a pau; no ka mea, ua o ia na lima o ke aloha ia lakou, a ke i ma la oia, E mihi, a e hookipa no au ia oukou;

34 He oiaio, ke i mai la oia, E hele mai io’u nei, a e ai no oukou i ka hua o ka laau o ke ola; he oiaio e ai a e inu no oukou i ka berena a me na wai o ke ola me ke alalai ole ia;

35 He oiaio, e hele mai io’u nei a e hoohua mai i na hana o ka pono, a, aole o oukou e kuaia ilalo a e kiolaia’ku iloko o ke ahi:

36 No ka mea, aia hoi, ua kokoke mai ka manawa o ka mea i hoohua ole mai i na hua pono, a o ka mea i hana ole i na hana o ka pono, he kumu kona e uwe ai a e kanikau ai.

37 E auhea oukou ka poe e hana nei i ka hewa; ka poe i haakeiia ma na mea lapuwale o ko ke ao nei: ka poe i olelo ua ike oukou i na ala o ka pono; aka hoi, ua hele hewa nae, me he hipa la me ke kahu ole, ua kahea nae he kahuhipa mahope o oukou, a e kahea ana i keia manawa mahope o oukou, aka aole oukou e hoolohe i kona leo.

38 Aia hoi, ke i aku nei au ia oukou, ke kahea mai nei ke kahuhipa maikai ia oukou; he oiaio, ma kona inoa iho oia e kahea nei ia oukou, oia no ka inoa o Kristo; a ina aole oukou e hoolohe mai i ka leo o ke kahuhipa maikai, i ka inoa a oukou i kaheaia mai ai, aia hoi, ina no aole oukou na hipa o ke kahuhipa maikai.

39 [m 3, p 6] Ano, aole oukou na hipa o ke kahuhipa maikai, no ka pa hea oukou? Aia hoi, ke i aku nei au ia oukou, o ka diabolo no ko oukou kahuhipa, a no kona pa oukou; ano, owai la ka mea e hiki ia ia ke hoole mai i keia? Aia hoi, ke i aku nei au ia oukou, o ka mea e hoole mai ana i keia, he mea wahahee a he keiki a ka diabolo oia;

40 No ka mea, ke i aku nei au ia oukou, o kela mea maikai keia mea maikai, e hele mai ana ia mai ke Akua mai, a o kela mea ino keia mea ino, e hele mai ana ia mai ka diabolo mai;

41 Nolaila, ea, ina e hoohua mai ana ke kanaka i na hana maikai, e hoolohe ana oia i ka leo o ke kahuhipa maikai, a e hahai ana oia ia ia; aka o ka mea e hoohua mai ana i na hua ino, oia ka i lilo ai i keiki na ka diabolo: no ka mea, e hoolohe ana oia i kona leo, a e hahai ana ia ia.

42 A o ka mea nana e hana i keia, he pono ke loaa kona uku mai ona mai; nolaila, no kona uku e loaa ana ia ia ka make, ma na mea e pili ana i ka pono, ua make oia i na hana maikai a pau.

43 Ano, e o’u poe hoahanau, ke makemake nei au e hoolohe mai oukou ia’u, no ka mea, ke olelo aku nei au ma ka ikaika o ko’u uhane; no ka mea, ua olelo moakaka aku au ia oukou, i hiki ole ai ia oukou ke kuhi hewa, a ua olelo aku e like me na kanawai o ke Akua.

44 No ka mea, ua kaheaia mai au e olelo aku mamuli o keia ano, e like me ka aoao hemolele o ke Akua, aia no iloko o Kristo Iesu; he oiaio, ua kauohaia mai au e ku a e hoike aku i keia poe kanaka, i na mea i oleloia’i e ko kakou poe kupuna, no na mea e hiki mai ana.

45 Aole o keia wale no. Aole anei oukou e manao ana ua ike au i ua mau mea nei no’u iho? Aia hoi, ke hoike aku nei au ia oukou, ua ike au he oiaio keia mau mea a’u i olelo aku ai. A pehea la oukou i manao ai ua ike au i ka oiaio o ua mau mea nei?

46 Aia hoi, ke i aku nei au ia oukou, ua hoikeia mai ia mau mea ia’u e ka Uhane Hemolele o ke Akua. aia hoi, ua hooke ai au a pule aku la i na la he nui, i ike ai au i ua mau mea nei no’u iho. A, ano, ke ike nei au no’u iho he oiaio ia mau mea; no ka mea, ua hoike mai la ka Haku ke Akua ia mau mea ia’u ma kona Uhane Hemolele; a oia no ka Uhane o ka hoikeana iloko o’u.

47 A eia hoi, ke i aku nei au ia oukou, me ia i hoikeia mai pela ia’u, ua oiaio na olelo i oleloia’i e ko kakou poe kupuna, pela io no e like me ka Uhane o ka wanana iloko o’u, oia no hoi ma ka hoike ana o ka Uhane o ke Akua,

48 Ke i aku nei au ia oukou, ua ike au no’u iho o ka mea a’u e olelo aku ai ia oukou no na mea e hiki mai ana, ua oiaio ia; a ke i aku nei au ia oukou, ua ike au e hele mai ana no o Iesu Kristo; he oiaio, o ke Keiki, ka hanau-kahi a ka Makua, piha me ka lokomaikai, a me ke aloha, a me ka oiaio. A, aia hoi, oia no ka mea e hele mai ana e lawe aku i na hala o ko ke ao nei; he oiaio, i na hala o kela kanaka keia kanaka ke manaoio naueue ole ma kona inoa.

49 [m 3, p 7] Ano, ke i aku nei au ia oukou, oia no ka aoao mamuli one i kaheaia’i au; he oiaio, e hai aku i o’u poe hoahanau i alohaia; a i kela mea i keia mea hoi e noho ana ma ka aina; he oiaio, e hai aku i na mea a pau loa, i ka poe kahiko a i ka poe hou no hoi, i ka poe paa a i ka poe paa ole no hoi; he oiaio, ke i aku nei au ia oukou, e ka poe kahiko, a me ka poe oo hoi, a me ka hanauna ea mai ana; he oiaio, e kahea aku ia lakou e mihi a hanau hou lakou e pono ai;

50 He oiaio no, penei wahi a ka Uhane, E mihi oukou, e ko na welau a pau o ka honua, no ka mea, e kokoke ana ke aupuni o ka lani; he oiaio, ke hele mai la ke Keiki a ke Akua ma kona nani, ma kona ikaika, hanohano, mana a noho alii ana. He oiaio, e ko’u poe hoahanau, ke i aku nei au ia oukou, e i mai ana ka Uhane, E nana aku i ka nani o ke Alii o ka honua a pau; a e alohilohi koke mai ai no hoi ke Alii o ka lani mawaena o na keiki a pau a kanaka;

51 A ke i mai nei no hoi ka Uhane ia’u, he oiaio, ke kahea mai ne ia’u me ka leo mana, i ka i ana, E hele aku a e olelo aku i keia poe kanaka, E mihi, no ka mea, ke ole oukou e mihi, aole loa e hiki ia oukou ke loaa ke aupuni o ka lani.

52 A eia hou ka’u e i aku nei ia oukou, ke i mai la ka Uhane, Aia hoi, ke waiho nei ke koi lipi ma ke kumu o ka laau; nolaila, o kela laau a o keia laau e hua ole mai ana i ka hua maikai, e kuaia ia ilalo, a e kiolaia’ku iloko o ke ahi; he oiaio, he ahi e hiki ole ke hoopauia; a he ahi pio ole. Aia hoi, e hoomanao, ua olelo mai ka Mea Hemolele ia mea.

53 Ano, e o’u poe hoahanau, ke i aku nei au ia oukou, e hiki anei ia oukou ke ku e mai i ua mau mea nei, he oiaio, e hiki anei ia oukou ke waiho wale i keia mau mea, a e hehi aku i ka Mea Hemolele malalo iho o ko oukou mau kapuai; he oiaio, e hiki anei ia oukou ke haakeiia’i ma ka haaheo o ko oukou naau; he oiaio, e hoomau anei ma ke komo ana i ke kapa kumu kuai nui, a e kau ana i ko oukou mau naau maluna o na mea lapuwale o ke ao nei, maluna iho o ko oukou waiwai;

54 He oiaio, e hoomau anei oukou ma ka manao ana ua maikai ae kekahi mamua o kekahi; he oiaio, e hoomau anei oukou ma ka hoomaau ana i ko oukou poe hoahanau, ka poe i hoohaahaa ia lakou iho, a i hele mamuli o ka aoao hemolele o ke Akua, ma o ua mea la lakou i laweia mai ai iloko o keia ekalesia, ua hoomaemaeia e ka Uhane Hemolele: a ke hoohua mai nei lakou i na hana i ku i ka mihi;

55 He oiaio, a e hoomau anei oukou ma ka huli ana’e i ko oukou mau kua i ka poe hune, a me ka poe nele, a ma ka aua ana i ko oukou waiwai mai ia lakou ae?

56 A eia ka mea hope, e ka poe a pau e hoomau ana ma ka oukou hana hewa ana, ke i aku nei au ia oukou, o ua poe nei no ka poe e kuaia ilalo a e kiolaia iloko o ke ahi, ke ole lakou e mihi koke.

57 [m 3, p 8] Ano, ke i aku nei au ia oukou, e ka poe a pau e makemake ana e hahai mai i ka leo o ke kahuhipa maikai, e puka mai oukou mai ka poe hewa mai, a e hookaawaleia’e oukou, a mai hoopa aku i ko lakou mau mea haumia; a, aia hoi, e holoiia auanei ko lakou mau inoa, i helu pu ole ia na inoa o ka poe hewa mawaena o na inoa o ka poe pono, i ko ai ka olelo a ke Akua, i ka i ana, E hui pu ole ia na inoa o ka poe hewa me na inoa o ko’u poe kanaka.

58 No ka mea, e palapalaia na inoa o ka poe pono iloko o ka buke o ke ola; a ia lakou wau e haawi aku ai i hooilina ma ko’u lima akau. Ano, e ko’u poe hoahanau, heaha la ka oukou e olelo ku e mai i keia? Ke i aku nei au ia oukou, ina e olelo ku e mai oukou i keia, he mea ole ia, no ka mea, e hookoia no ka olelo a ke Akua.

59 No ka mea, owai la ke kahuhipa mawaena o oukou nona na hipa he nui wale, i kiai ole ai ia lakou, i komo ole na ilio hae a e ai i kona pua? A, aia hoi, ina e komo kahi ilio hae iloko o kona pua, aole anei oia i hooemu aku ia ia iwaho? He oiaio, a mahope, ina e hiki ia ia, e pepehi aku no oia ia ia.

60 Ano, ke i aku nei au ia oukou, ke kahea mai nei ke kahuhipa maikai mahope o oukou; a ina e hoolohe oukou i kona leo, nana no e lawe mai ia oukou iloko o kona pa, a o kona poe hipa no oukou; a ke kauoha mai nei oia ia oukou aole oukou e ae aku i kahi ilio hae ke komo mawaena o oukou, i make ole ai oukou.

61 [m 3, p 9] Ano, ke kauoha aku nei owau, o Alama, ia oukou ma ka olelo a ka mea nana au i kauoha mai, e malama oukou e hana i na olelo a’u i olelo aku nei ia oukou.

62 Ke olelo aku nei au ma ke kauoha ia oukou, ka poe i huiia mai me ka ekalesia; a i ka poe i hui ole ia me ka ekalesia, ke olelo aku nei au ma ke kono, i ka i ana, e hele mai a e bapetizoia i ka mihi, i lilo oukou i poe hoaai pu hoi i ka hua o ka laau o ke ola.

MOKUNA 6

1 [mokuna 4, paukū 1] A eia kekahi, a pau ae la ka olelo ana’ku a Alama i na kanaka o ka ekalesia, i kukuluia’i ma ke kulanakauhale o Zarahemela, hoolilo iho la oia i na kahuna a me na lunakahiko, ma ke kau aku ana i kona mau lima e like me ka aoao o ke Akua, e noho luna a e kiai maluna o ka ekalesia.

2 A eia kekahi, o na mea i hui ole ia me ka ekalesia, ka poe i mihi i ko lakou mau hewa, ua bapetizoia i ka mihi, a ua hookomoia iloko o ka ekalesia.

3 A eia hoi kekahi, o na mea i huiia me ka ekalesia, ka poe i mihi ole i ko lakou hewa, a hoohaahaa ia lakou iho imua o ke Akua; ke olelo nei au no ka poe i hookiekieia ma ka haaheo o ko lakou mau naau; ua kiolaia’ku ua poe nei, a holoiia iho la na inoa o lakou, i helu pu ole ia ko lakou poe inoa mawaena o ko ka poe pono;

4 A pela lakou i hoomaka ai e hookupaa aku i ka noho pololei ana o ka ekalesia ma ke kulanakauhale o Zarahemela.

5 Ano, ua makemake au e ike oukou ua haawi like ia ka olelo a ke Akua i na mea a pau, aole i hooneleia kekahi i ka pono e hoakoakoa ia lakou iho e hoolohe i ka olelo a ke Akua;

6 Aka hoi, ua kauohaia mai na keiki a ke Akua e hoakoakoa pinepine ia lakou iho, a e hui ma ka hooke ai ana a ma ka pule mana, no ka pomaikai o na uhane o ka poe i ike ole ai i ke Akua.

7 [m 4, p 2] Ano, eia kekahi, ia Alama i hooholo mai ai i ua mau mea hooponopono nei, haalele aku la oia ia lakou, he oiaio, i ka ekalesia ma ke kulanakauhale o Zarahemela, a hele aku la ma ka hikina o ka muliwai o Sidona iloko o ke awawa o Gideona, malaila ua kukuluia kekahi kulanakauhale i kapaia o ke kulanakauhale o Gideona, ma ke awawa i kapia o Gideona, i kapaia’i mamuli o ke kanaka i pepehiia’i e ka lima o Nehora me ka pahikaua.

8 A hele aku la o Alama, a hoomaka ae la e hai aku i ka olelo a ke Akua i ka ekalesia i kukuluia ma ke awawa o Gideona, e like me ka hoike ana o ka oiaio o ka olelo i oleloia’i e kona kupuna, a e like ma ka Uhane o ka wanana iloko ona, e like me ka hoike ana o Iesu Kristo, ke Keiki a ke Akua, ka mea e hele mai ana e hoolapanai i kona poe kanaka mai ko lakou mau hewa ae, a me ka aoao hemolele hoi ana i kapaia’i. A pela ia i palapalaia’i. Amene.

O na olelo a Alama, ana i hai aku ai i ka poe kanaka ma Gideona, mamuli o kona mooolelo iho.

O ka mokuna 7.

MOKUNA 7

1 [mokuna 5, paukū 1] Aia hoi, e ko’u poe kanaka, no ko’u aeia’na e hele mai io oukou nei, nolaila, ke hoao aku nei au e olelo aku ia oukou ma ka’u olelo; he oiaio, ma kuu waha iho, ua ikea eia ka manawa mua na’u e olelo aku ia oukou ma na olelo a ko’u waha ponoi, ua hoopaa loa ia au i ka noho hookolokolo, a no ka nui o ka’u hana i hiki ole ia’u ke hele mai io oukou nei;

2 Aole no hoi au i hiki ke hele mai i keia manawa, ina ua haawi ole ia’ku ka noho hookolokolo ia hai, e noho luna ma kuu hakahaka; a ua ae mai ka Haku ma ke aloha nui i hele mai ai au io oukou nei.

3 A, aia hoi, ua hele mai nei au me na manaolana nui a me na makemake nui, i ike ai au ua hoohaahaa ia oukou iho imua o ke Akua, a ua hoomau aku ma ka noi ana i kona lokomaikai, i ike ai au ia oukou me ka hewa ole imua ona; i ole ai au e ike ia oukou iloko o ka hihia weliweli a ko kakou poe hoahanau i hihia ai ma Zarahemela;

4 Aka, e hoomaikaiia ka inoa o ke Akua, ua haawi mai la oia ia’u e ike, he oiaio, ua haawi mai la ia’u i ka olioli nui loa i ka ike ana ua hookupaa hou ia lakou ma ke ala o kona pono.

5 A ke lana nei au, e like me ka Uhane o ke Akua iloko o’u, he olioli no auanei ko’u maluna o oukou; aole nae au i makemake e hele mai ko’u olioli no oukou, ma o na pilikia a me na kaumaha la me a’u i loaa’i no na hoahanau o Zarahemela: no ka mea, aia hoi, ke hele mai la ko’u olioli no lakou mahope iho o ka auhele ana mawaena o na pilikia a me ke kaumaha nui.

6 [m 5, p 2] Aka hoi, ke lana nei au aole oukou iloko o ka noho hoomaloka nui ana e like me ko oukou poe hoahanau; ke lana nei au aole oukou i hookiekieia iluna ma ka haaheo o ko oukou mau naau: he oiaio, ke lana nei au aole oukou i kau aku i ko oukou mau naau maluna o ka waiwai, a me na mea lapuwale o ko ke ao nei; he oiaio, ke lana nei au aole oukou e hoomana kii ana, aka e hoomana ana oukou i ke Akua oiaio a ola, a e nana ana oukou imua no ke kalaia ana o ka oukou mau hala me ka manaoio mau loa e hiki mai ana.

7 No ka mea, ke i aku nei au ia oukou, ua nui na mea e hiki mai ana; a, aia hoi hookahi mea i oi aku ka nui mamua o ia mau mea a pau: no ka mea, aole e loihi aku ka manawa, e ola ana ka Mea Hoolapanai, a e hele mai ana mawaena o kona poe kanaka.

8 Aia hoi, aole au e i aku nei e hele mai oia mawaena o kakou i kona wa e noho ai ma kona halelewa make; no ka mea, aole i olelo mai ka Uhane pela ia’u. Ano, aole au i ike no ia mea; aka, eia ka’u i ike, he mana ko ka Haku ke Akua e hana i na mea a pau i ku i kana olelo.

9 Aka hoi, ua olelo mai ka Uhane i keia ia’u, i ka i ana: E kahea aku i keia poe kanaka, i ka i ana, e mihi oukou, a e hoomakaukau i ke ala o ka Haku, a e hele ma kona mau kuamoo, he pololei lakou: no ka mea, aia hoi, ua kokoke mai ke aupuni o ka lani, a e hele mai ana ke Keiki a ke Akua maluna iho o ka honua.

10 Aia hoi, e hanauia mai oia e Maria, ma Ierusalema, oia no ka aina o ko kakou poe kupuna, he wahine puupaa oia, he ipu maikai a waeia, e hoomaluia oia, a e hapai ma ka Uhane Hemolele, a e hanau mai i kahi keikikane, he oiaio, o ke Keiki a ke Akua;

11 A e hele aku oia, e loaa ana na eha, a me na pilikia, a me na hoowalewale o kela ano keia ano; a o keia i hookoia’i ka olelo e olelo ana, E lawe no oia maluna one i na eha a me na mai o kona poe kanaka;

12 A e lawe maluna ona i ka make, e hiki ia ia ke hookuu i na apo o ka make e hoopaa ana i kona poe kanaka: a e lawe no maluna ona i na nawaliwali o lakou, e hiki i kona mau naau ke hoopihaia me ke aloha, mamuli o ka io, e hiki ia ia ke ike lea mamuli o ka io e kokua i kona poe kanaka mamuli o na nawaliwali o lakou.

13 Ano, ke ike mai nei ka Uhane i na mea a pau; e popilikia ana nae ke Keiki a ke Akua mamuli o ka io, e hiki ia ia ke lawe maluna ona i na hewa o kona poe kanaka, e hiki ia ia ke holoi mai i ka lakou mau hala, mamuli o ka mana o kona hoopakele ana; ano hoi, oia no ka hoike ana iloko o’u.

14 [m 5, p 3] Ano, ke i aku nei au ia oukou, e mihi oukou e pono ai, a e hanau hou ia: no ka mea, ke i mai nei ka Uhane, Ina aole oukou e hanau hou ia, aole e hiki ia oukou ke loaa ke aupuni o ka lani; nolaila, e hele mai a e bapetizoia i ka mihi, i holoiia oukou i ko oukou mau hala, i loaa’i ia oukou ka manaoio ma ke Keikihipa a ke Akua, oia ka mea e lawe aku ana i na hala o ko ke ao nei, oia hoi ka mea mana e hoola mai a e hoomaemae mai mai na mea pono ole ae a pau;

15 He oiaio, ke i aku nei au ia oukou, e hele mai a e hopohopo ole, a e waiho aku i kela hewa i keia hewa e hoopuni wale ana ia oukou, e nakinaki ana ia oukou ilalo i ka make; oia, e hele a e hele aku, a e hoike aku i ko oukou Akua e ae ana oukou e mihi i ko oukou mau hewa, a e komo iloko o kekahi berita me ia e malama i kana mau kauoha, a e hoike aku ia mea ia ia i keia la, ma ka hele ana iloko o na wai o ka bapetizo;

16 A o ka mea nana e hana i keia, a e malama i na kauoha a ke Akua mai ia manawa aku, oia ke hoomanao auanei ka’u e i aku nei ia ia, he oiaio, e hoomanao no oia ua olelo aku au ia ia, e loaa no auanei ia ia ke ola mau loa, e like me ka hoike ana o ka Uhane Hemolele, e hoike ana iloko o’u.

17 Ano, e o’u poe hoahanau alohaia, ke manaoio nei anei oukou i keia mau mea? Aia hoi, ke i aku nei au ia oukou, Ae, ua ike au ke manaoio nei oukou i ua mau mea nei; a o kuu mea i ike ai e manaoio ana oukou ia mau mea, oia ma o ka hoikeana la o ka Uhane iloko o’u. Ano, no ka ikaika o ko oukou manaoio no ia mea, he oiaio, no ia mau mea a’u i olelo ai, ua nui ko’u hauoli.

18 No ka mea, me a’u i olelo aku ai ia oukou mai kinohi, ua nui ko’u makemake i ole ai oukou iloko o ka hihia e like me ko oukou poe hoahanau, pela wau i ike ai ua ko mai ko’u mau makemake.

19 No ka mea, ke ike nei au aia oukou iloko o ke ala e hele aku ai i ke aupuni o ke Akua; he oiaio, ke ike nei au e hoopololei ana oukou i kona mau kuamoo;

20 Ke ike nei au ua hoikeia mai ia oukou ma ka hoikeana o kana olelo, ua hiki ole ia ia ke hele iloko o na ala kekee; aole hoi aoi e lauwili ae mai ka mea ae, ana i olelo mai ai; aole hoi ona luli iki ae mai ka akau i ka hema, aole hoi mai ka mea i pololei i ka mea i pololei ole; nolaila, o kana hana ana oia hookahi mau loa no ia.

21 Aole oia i noho iloko o na luakini hemolele ole; aole hoi e hiki i ka paumaele, aole hoi i kekahi mea i maemae ole ke hookipaia iloko o ke aupuni o ke Akua; nolaila, ke i akku nei au ia oukou, e hiki mai ana ka manawa, he oiaio, a ma ka la hope no ia, o ka mea i paumaele, e noho no oia iloko o kona paumaele.

22 [m 5, p 4] Ano, e ko’u poe hoahanau aloha, ua olelo aku au i keia mau mea ia oukou, i hiki ia’u ke hoala ia oukou e ike i ka mea pono a oukou e hana aku ai i ke Akua, i hele hewa ole ai oukou imua ona; i hele oukou mamuli o ka aoao hemolele o ke Akua, mamuli o ia mea oukou i loaa’i.

23 Ano, ke makemake nei au e haahaa oukou, a e hoolohe, a akahai; oluolu e noiia mai; piha me ke ahonui a me ka hoomanawanui; e pakiko hoi ma na mea a pau; e molowa ole ma ka malama ana i na kauoha a ke Akua ma na manawa a pau; e noi ana no na mea a oukou e nele ai, no ko ka uhane a no ko ke kino hoi; e aloha mau ana i ke Akua no kela mea keia mea a oukou i loaa’i,

24 A e ike oukou no oukou ka manaoio, o ka manaolana, a me ke aloha, alaila, e lako mau oukou ma na hana pono;

25 A na ka Haku e hoopomaikai ia oukou, a e malama kina ole i ko oukou mau aahu, i laweia oukou mahope e noho ilalo me Aberahama, o Isaaka, a me Iakoba, a me na kaula hemolele, ka poe i ola mai ka hoomaka ana mai o ke ao nei, me ko oukou mau aahu kina ole, e like me ke kina ole o ko lakou mau aahu ma ke aupuni o ka lani, e hele hou ole ae iwaho.

26 [m 5, p 5] Ano, e o’u poe hoahanau aloha, ua olelo aku la au i keia mau mea ia oukou, e like me ka ka Uhane hoike ana mai ia’u; a ke hauoli nui loa nei ko’u uhane, no ka ikaika a malama nui ana o oukou i ka hoolohe mai i ka’u olelo.

27 Ano, e kau mai ka maluhia o ke Akua maluna iho o oukou, a maluna iho o ko oukou mau hale a mau aina, a maluna iho o na pua a me na ohana holoholona o oukou, a me na mea a pau a oukou i loaa’i; o na wahine a me na keiki a oukou, e like me ko oukou manaoio a hana maikai, mai keia manawa aku a mau loa aku. A pela wau e olelo aku nei. Amene.

MOKUNA 8

1 [mokuna 6, paukū 1] Eia kekahi, hoi aku la o Alama mai ka aina o Gideona ae, mahope iho o kona ao ana i na kanaka o Gideona i na mea he nui i hiki ole ai ke palapalaia, a ua hoonohonoho i na mea o ka ekalesia, me kana i hana e ai mamua ma ka aina o Zarahemela; he oiaio, hoi aku la oia i kona hale iho ma Zarahemela e hoomaha ia ia iho i na hana ana i hana’i.

2 A pela i pau ai ka iwa o ka makahiki o ke au o na Lunakanawai maluna iho o ka poe kanaka o Nepai.

3 [m 6, p 2] Eia kekahi, i ka makamua o ka makahiki umi o ke au o na Lunakanawai maluna iho o ka poe kanak o Nepai, haalele aku la o Alama ia wahi, a hele aku la ma o ma ka aina o Meleka, ma ke komohana o ka muliwai o Sidona, ma ke komohana, ma na palena o ka waonahele:

4 A hoomaka ae la oia e ao aku i na kanaka ma ka aina o Meleka, mamuli o ka aoao hemolele o ke Akua ona i kapaia mai ai; a hoomaka ae la oia e ao aku i na kanaka a pau mawaena o ka aina o Meleka a puni.

5 [m 6, p 3] Eia kekahi, hele mai la na kanaka io na la, mawaena o na palena a pau o ka aina ma ka aoao waonahele. A ua bapetizoia lakou mawaena o ka aina a puni;

6 A ia ia i pau ai kana hana ma Meleka, haalele iho la oia ia wahi, a hele aku la i ko na la ekolu hele ana ma ka akau o ka aina o Meleka; a hiki aku la oia i kekahi kulanakauhale i kapaia o Amoniha.

7 Ano, he mea mau ia me ko Nepai poe, e kapa aku i ko lakou mau aina, a i ko lakou mau kulanakauhale, a me ko lakou mau kauhale, he oiaio, i ko lakou mau kauhale uuku hoi a pau, mamuli o ka inoa o ka mea nana i noho mua ma ia mau wahi; a pela hoi ia me ka aina o Amoniha.

8 [m 6, p 4] A eia kekahi, ia Alama i hiki ai i ke kulanakauhale o Amoniha, hoomaia ae la ia e hai aku i ka olelo a ke Akua ia lakou.

9 Ano, ua nui ka mana o Satana maluna iho o na naau o na kanaka o ke kulanakauhale o Amoniha; nolaila, aole lakou i hoolohe i na olelo a Alama.

10 Aka hoi, hana nui iho la o Alama ma ka Uhane, e hakoko ana me ke Akua ma ka pule ikaika, nana e ninini mai i kona Uhane maluna o na kanaka iloko o ke kulanakauhale; a nana hoi e ae mai ia ia e bapetizo aku ia lakou i ka mihi;

11 Hoopaakiki iho la nae lakou i ko lakou mau naau, i ka i ana ia ia, Aia hoi, ua ike makou ooe no Alama; a ua ike makou ooe no ke Kahuna Nui maluna iho o ka ekalesia au i kukulu ai ma na wahi he nui o ka aina, e like me ko oukou mooolelo; aole makou no kou ekalesia, aole makou i manaoio i na mooolelo lapuwale me neia.

12 Ano, ke ike nei makou no ko makou komo ole iloko o kou ekalesia, ua ike makou aole ou mana maluna o makou; a ua haawi aku oe i ka noho hookolokolo ia Nepaiha; nolaila, aole oe ka Lunakanawai Nui maluna o makou.

13 Ano, i ka wa a na kanaka i olelo mai ai i keia, a i ku e mai ai i kana mau olelo a pau, a i hoino mai ai ia ia, a i kuha mai ai maluna iho ona, a i kipaku mai ai ia ia iwaho o ko lakou kulanakauhale, haalele iho la oia ia wahi a hele aku la i ke kulanakauhale i kapaia o Aarona.

14 [m 6, p 5] Eia kekahi, oiai oia e hele ana ilaila, i hookaumahaia ilalo me ka eha o ka naau, e auhele ana mawaena o ka pilikia a kaumaha nui loa o ka naau, no ka hewa o na kanaka iloko o ke kulanakauhale o Amoniha, oiai o Alama i hookaumahaia peia ilalo me ka eha, aia hoi, ikea ae la kekahi anela a ka Haku e ia, a i mai la,

15 Pomaikai ooe, e Alama; nolaila, e ea mai i kou poo a e hauoli, no ka mea, he kumu nui kou e hauoli ai: no ka mea, ua ikaika oe i ka malama ana i na kauoha a ke Akua mai ka wa au i loaa’i kau kauoha mua mai ona mai. Aia hoi, owau no ka mea nana i haawi aku ia mea ia oe;

16 A, aia hoi, ua hoounaia mai au e kauoha aku ia oe e hoi aku i ke kulanakauhale o Amoniha, a e hai hou aku i ka poe kanaka o ua kulanakauhale la; he oiaio, e hai olelo ia lakou. He oiaio, e i aku ia lakou, ke ole lakou e mihi, e luku no ka Haku ke Akua ia lakou.

17 No ka mea hoi, ke kuka nei lakou i keia manawa e hiki ia lakou ke hoopau i ke ku okoa ana o kou poe kanaka, (no ka mea, pela wahi a ka Haku,) he mea ku e ia i na olelo kupaa, a me na kauoha, a me na kanawai ana i haawi mai ai i kona poe kanaka.

18 [m 6, p 6] Ano hoi, mahope iho o ko Alama loaa ana ka olelo mai ka anela a ka Haku mai, hoi koke aku la oia i ka aina o Amoniha. A komo aku la i ke kulanakauhale ma kekahi ala e, he oiaio, ma ke ala ma ka hema o ke kulanakauhale o Amoniha.

19 A i kona komo ana i ke kulanakauhaleua pololi oia, a i aku la oia i kekahi kanaka, E, e haawi mai anei oe i kekahi kauwa haahaa a ke Akua i ai e ai ai?

20 A i aku la ke kanaka ia ia, No Nepai no wau, a ua ike au he kaula hemolele oe no ke Akua, no ka mea, ooe no ke kanaka a kahi anela i i mai ai ma ka hihio, E hookipa oe; nolaila, e hele pu me au iloko o ko’u hale, a e haawi aku no au ia oe i ka’u ai; a ua ike au he mea pomaikai oe ia’u a i ko’u hale.

21 A eia kekahi, hookipa mai la ke kanaka ia ia iloko o kona hale; a ua kapaia ua kanaka nei o Amuleka; a lawe mai la oia i berena a i ia, a kau mai la imua o Alama.

22 [m 6, p 7] Eia kekahi, ai berena iho la o Alama a ua hoopihaia; a hoopomaikai iho la oia ia Amuleka a me kona hale, a aloha aku la oia i ke Akua.

23 A mahope iho o kona ai ana a maona, i aku la oia ia Amuleka, Owau no o Alama, a o ke Kahuna Nui no au maluna o ka ekalesia o ke Akua mawaena o ka aina.

24 A, aia hoi, ua kaheaia mai au e hai aku i ka olelo a ke Akua mawaena o keia poe kanaka a pau, e like me ka Uhane o ka hoike ana a me ka wanana; a ma keia aina no au, aole lakou e hookipa mai ia’u, aka kipaku mai la lakou ia’u iwaho, a, aneane au e huli ae i kuu kua i ua aina nei no ka wa pau ole.

25 Aka hoi, ua kauohaia mai au na’u e huli hou a e wanana aku i ua poe kanaka nei, he oiaio, a e hoike ku e aku ia lakou no ka lakou mau hala.

26 Ano, e Amuleka, no ko hanai ana mai ia’u a hookipa ana mai ia’u iloko, ua pomaikai oe: no ka mea, ua pololi au, no ka mea ua hooke ai au i na la he nui.

27 A noho iho la o Alama i na la he nui me Amuleka, mamua o kona hoomaka ana e hai aku i ka olelo i kanaka.

28 [m 6, p 8] A eia kekahi, mahuahua nui loa aku la na kanaka ma ka lakou hana hewa.

29 A hiki mai la ka olelo ia Alama, i ka i ana, O hele; a e olelo aku hoi i ka’u kauwa o Amuleka, e hele aku a e wanana aku i keia poe kanaka, i ka i ana, E mihi oukou, no ka mea, penei wahi a ka Haku, ke ole oukou e mihi, e hoopai aku au i keia poe kanaka iloko o ko’u inaina; he oiaio, aole au e hoohuli ae i kuu inaina wela.

30 A hele aku la o Alama, a o Amuleka hoi, mawaena o na kanaka e hai aku i na olelo a ke Akua ia lakou; a ua hoopihaia laua me ka Uhane Hemolele;

31 A ia laua ka mana i haawiia mai ai, i hiki ole ai laua ke hoopaaia iloko o na halepaahao; aole hoi he mea hiki i kekahi kanaka ke pepehi mai ia laua; aole nae laua e hana aku me ko laua mana a hiki i ka wa i nakinakiia laua iloko o na mea paa, a i hooleiia iloko o ka halepaahao. Ano, ua hanaia mai la keia i hiki i ka Haku ke hoike mai i kona mana iloko o laua.

32 [m 6, p 9] A eia kekahi, hele aku la laua a hoomaka ae la e hai aku a e wanana aku i na kanaka, e like me ka Uhane a me ka mana a ka Haku i haawi mai ai ia laua.

O na olelo a Alama, a me na olelo hoi a Amuleka, na mea i haiia’ku ai i ka poe kanaka e noho ana iloko o ka aina o Amoniha. A ua hooleiia hoi laua iloko o ka halepaahao, a hoopakeleia e ka mana kupaianaha o ke Akua iloko o laua, e like me ka mooolelo a Alama.

Mai ka mokuna 9 a hiki i ka 14.

MOKUNA 9

1 [mokuna 7, paukū 1] A eia hou: ua kauohaia mai owau, o Alama, e ke Akua i lawe aku ai au ia Amuleka, a e hele aku a e hai olelo hou aku i ua poe kanaka nei, i ka poe kanaka iloko o ke kulanakauhale o Amoniha; a i ka wa a’u i hoomaka ai e hai olelo aku ia lakou, hoomaka ae la lakou e paio mai me a’u, i ka i ana,

2 Owai oe? Ke manao nei anei oe e manaoio makou i ka hoike ana o ke kanaka hookahi, ina e hai mai paha oia ia makou e hala aku ana auanei ka honua?

3 Ano, aole lakou i hoomaopopo i na olelo a lakou i olelo mai ai; no ka mea, aole lakou i ike e hala aku auanei ka honua.

4 A i mai la hoi lakou, Aole makou e manaoio i kau mau olelo, ina paha e wanana mai oe e anaiia mai keia kulanakauhale nui i ka la hookahi.

5 Ano, aole lakou i ike ua hiki i ke Akua ke hana mai i na hana kupanaha me neia, no ka mea, he poe kanaka naau paakiki a ai oolea lakou.

6 A i mai la lakou, Owai la ke Akua, nana i hoouna mai i hookahi kanaka hoike wale no mawaena o keia poe kanaka, e hai mai ia lakou i ka oiaio o na mea nui a kupaianaha me neia?

7 A ku mai la lakou e kau mai i ko lakou mau lima maluna o’u; aka hoi, aole lakou i kau mai. A ku iho la au me ka wiwo ole e hai aku ia lakou, he oiaio, hoike wiwo ole aku la au ia lakou, i ka i ana:

8 Aia hoi, e ka hanauna hewa a kekee, nani wale ko oukou hoopoina ana i na mooolelo a ko oukou poe kupuna; he oiaio, hiki wawe ko oukou hoopoina ana i na kauoha a ke Akua.

9 Aole anei oukou i hoomanao ua kaiia mai ko kakou kupanakane o Lehi mailoko mai o Ierusalema e ka lima o ke Akua? Aole anei oukou i hoomanao ua alakaiia mai lakou a pau e ia mawaena o ka waonahele?

10 A ua hoopoina anei oukou i keia manawa pokole, i ka nui o na manawa ana i hoopakele mai ai i ko kakou poe kupuna, mailoko mai o na lima o ko lakou poe enemi, a i hoola mai ia lakou i ka lukuia’na, e na lima o ko lakou poe hoahanau ponoi?

11 He oiaio, a ina aole kona mana loa, a me kona aloha, a me kona hoomanawanui mai ia kakou, ina ua luku loa ia kakou me kahi ole e pakele ai, mai ke alo aku o ka honua, mamua loa o keia manawa, a hahaoia paha i kahi o ka eha a poino pau ole.

12 Ano, ke i aku nei au ia oukou, ke kauoha mai la oia ia oukou e mihi; a ke ole oukou e mihi, aole loa e hiki ia oukou ke komo iloko o ke aupuni o ke Akua. Aka hoi, aole o keia wale: Ua kauoha mai la oia ia oukou e mihi, i ole ia e luku loa oia ia oukou mailuna aku o ke alo o ka honua nei; he oiaio, e hele mai oia ia oukou ma kona inaina, a ma kona inaina wela aole oia e huli ae.

13 Aia hoi, aole anei oukou e hoomanao i na olelo ana i olelo mai ai ia Lehi, i ka i ana, Ina e malama pono mai oukou i ka’u mau kauoha, e hoopomaikaiia oukou ma ka aina? A eia hou ua oleloia, Ina aole oukou e malama i ka’u mau kauoha, e hookiia’ku oukou mai ke alo aku o ka Haku.

14 [m 7, p 2] Ano, ke makemake nei au e hoomanao oukou, i ko ko Lamana poe malama ole ana i na kauoha a ke Akua, ua hookiia’ku la lakou mai ke alo aku o ka Haku. Ano, ke ike nei kakou ua ko ka olelo a ka Haku ma keia mea, a ua hooiia’ku ko Lamana poe mai kona alo aku, mai ka hoomaka ana mai o ko lakou lawehala ana ma ka aina.

15 Aka hoi, ke i aku nei au ia oukou, e aho no ka hewa ana o lakou i ko oukou ma ka la e hookolokolo ai, ke noho oukou iloko o ko oukou mau hewa: he oiaio, e aho no hoi lakou ia oukou, ma keia ola ana, ke mihi ole oukou,

16 No ka mea, ua nui na olelo hoopomaikai i o ia i ko Lamana poe: no ka mea, no na mooolelo o ko lakou poe kupuna lakou i noho ai i ko lakou noho naaupo ana; nolaila, e aloha ae no ka Haku ia lakou, a e hooloihi ae i ko lakou ola ma ka aina.

17 A ma kekahi manawa e laweia mai lakou e manaoio i kana olelo, a e ike i ka pololei ole o na mooolelo a ko lakou poe kupuna; a e hoolaia he nui wale o lakou, no ka mea, e aloha mai no ka Haku i ka poe a pau i kahea aku i kona inoa.

18 Aka hoi, ke i aku nei au ia oukou, ina e hoomau aku oukou ma ka oukou hana hewa, aole loa e hooloihiia ko oukou mau la ma ka aina, no ka mea, e hoounaia mai auanei ko Lamana poe maluna o oukou; a ke mihi ole oukou, e hele mai lakou i kahi manawa a oukou e ike ole ai, a e hoopaiia oukou me ka luku loa ia’na; a e like ia me ka inaina wela o ka Haku;

19 No ka mea, aole oia e ae mai ia oukou e noho iloko o ka oukou mau hala, e luku mai ai i kona poe kanaka. Ke i aku nei au ia oukou, Aole; ua oi aku ka makemake ona e hookuu mai i ko Lamana poe e luku mai i keia poe kanaka a pau, ka poe i kapaia ka poe kanaka o Nepai, ina he mea e hiki ai ia lakou ke haule iloko o na hewa a me na hala, mahope iho o ka loaa ana ka malamalama a nui me neia, a me ka ike a nui me neia, i haawiia mai ia lakou e ka Haku ko lakou Akua;

20 He oiaio, mahope iho o ka lilo ana i lahui hoopomaikai nui loa ia mai me neia e ka Haku; he oiaio, mahope iho o ka hoopomaikai loa ia’na mamua o na aupuni, o na ohana, o na olelo, a o na lahuikanaka e ae a pau: mahope iho o ka hoikeia’na mai o na mea a pau ia lakou, e like me ko lakou makemake, a me ko lakou manaoio, a me ka lakou pule, o na mea i hala, a me na mea i neia wa, a e hiki mai ana;

21 I alakaiia’i e ka Uhane o ke Akua; i kamailio pu ai me na anela, a i oleloia mai ai e ka leo o ka Haku; a i loaa ai ka haawina o ka wanana, a me ka Uhane o ka hoikeana, a me na haawina he nui hoi: o ka haawina o ka olelo ana ma na olelo e, a me ka haawina o ka hai olelo, a me ka haawina o ka Uhane Hemolele, a me ka haawina o ka unuhi olelo ana;

22 He oiaio, a mahope iho o ko ka hoopakeleia’na mailoko mai o ka aina o Ierusalema e ke Akua, ma ka lima o ka Haku; i hoolaia i ka wi, a i ka mai, a i na eha a pau o kela ano o keia ano; a ua hoomahuahua ikaika ia mai ma ke kaua, i luku ole ia’i lakou; i laweia mai ai mailoko mai o ka noho luhi ana ia manawa aku ia manawa aku, a i malamaia a i hoolaia a hiki i keia manawa; a ua hoomaikaiia lakou a waiwai loa ma kela ano keia ano o na mea a pau.

23 [m 7, p 3] Ano, ke i aku nei au ia oukou, ina e hana hewa keia poe kanaka, ka poe i loaa’i na mea pomaikai a nui loa me neia mai ka lima mai o ka Haku, me ke ku e i ka malamalama a me ka ike a lakou i loaa’i: ke i aku nei au ia oukou, ina peia ka hana; ina e haule lakou iloko o ka hewa, e aho loa no ko Lamana poe ia lakou.

24 No ka mea hoi, ua o ia mai na olelo pomaikai a ka Haku i ko Lamana poe, aka, aole ua mau mea nei ia oukou, ke lawehala oukou: no ka mea, aole anei ka Haku i olelo paa mai a i hooholo naue ole ae, ina e kipi aku oukou ia ia, e luku loa ia auanei oukou mai ke alo aku o ka honua?

25 Ano, no keia mea, i ole ai oukou e lukuia, ua hoouna mai ka Haku i kona anela e ike i na mea he nui o kona poe kanaka, e hai ana ia lakou, e hele aku no lakou a e kahea ikaika aku i keia poe kanaka, i ka i ana, E mihi oukou, no ka mea, ua kokoke mai ke aupuni o ka lani:

26 Aole nui na la ma keia hope aku, e hele mai ke Keiki a ke Akua ma kona nani; a o kona nani o ka nani auanei ia o ka hanaukahi o ka Makua, piha i ka lokomaikai, i ka pololei a oiaio, piha i ke ahonui, i ke aloha, a me ka hoomanawanui, hikiwawe e hoolohe i na kahea ana a kona poe kanaka, a e haawi mai e like me ka lakou pule.

27 A, aia hoi, ke hele mai la oia e hoolapanai mai i ka poe a pau e bapetizoia i ka mihi, ma o ka manaoio la ma kona inoa;

28 Nolaila, ea, e hoomakaukau oukou i ke ala o ka Haku, no ka mea, ua kokoke mai ka manawa e ohi ai na kanaka a pau i ka uku o ka lakou mau hana, e like me ke ano o ka lakou hana: ina he pono ua mau hana la, e ohi auanei lakou i ke ola no ko lakou poe uhane, e like me ka mana a me ka hoopakele ana o Iesu Kristo; a ina he ino ua mau hana la, e ohi no auanei lakou i ka poino no ko lakou poe uhane, e like me ka mana a me ka hoopio ana o ka diabolo.

29 Ano hoi, o ka leo o ka anela keia, e kahea aku ana i na kanaka.

30 Ano, e ko’u poe hoahanau alohaia, no ka mea, o ko’u poe hoahanau oukou, a e alohaia oukou e pono ai, a e hua mai hoi oukou i na hana i ku i ka mihi e pono ai, i ka ike ana ua hoopaakiki loa ia ko oukou mau naau e ku e i ka olelo a ke Akua, a i ka ike ana hoi he poe kanaka lilo a haule oukou.

31 [m 7, p 4] Ano, eia kekahi, i ka wa a’u, a Alama, i olelo aku ai i ua mau olelo nei, aia hoi, huhu iho la na kanaka ia’u, no ka’u i ana’e ia lakou, he poe kanaka naau paakiki a ai oolea lakou;

32 A no ka’u i ana’e hoi ia lakou, he poe kanaka lilo a haule lakou, ua huhu mai lakou ia’u, a imi iho la e kau mai i ko lakou mau lima maluna iho o’u, e hiki ia lakou ke hoolei mai ia’u iloko o ka halepaahao;

33 Aka aole i ae mai la ka Haku ia lakou e lawe mai ia’u ia manawa, a e hoolei mai ia’u iloko o ka halepaahao.

34 [m 7, p 5] A eia kekahi, hele ae la o Amuleka a ku iho la, a hoomaka ae la e hai olelo aku ia lakou no hoi. Ano, aole i palapalaia na olelo a pau a Amuleka; he hapa nae o kana mau olelo ka i palapalaia iloko o keia buke.

MOKUNA 10

1 [mokuna 8, paukū 1] Ano, eia na olelo a Amuleka i hai aku ai i ka poe kanaka iloko o ka aina o Amoniha, i ka i ana:

2 Owau no o Amuleka; a o ke keiki wau a Gidona, oia no ke keiki a Isemaela, oia no kekahi mamo na Aminadi: a ua Aminadi la no nana i hoakaka mai i ke ano o ka palapala ana maluna o ka paia o ka luakini, i kakauia’i e ka lima o ke Akua.

3 A he mamo o Aminadi na Nepai, oia no ke keiki a Lehi, ka mea i hele mai mailoko mai o ka aina o Ierusalema, he mamo oia no na Manase, ke keiki a Iosepa, ka mea i kuaia iloko o Aigupita ma na lima o kona poe hoahanau.

4 A, aia hoi, he kanaka kaulana no hoi au mawaena o ka poe a pau i ike mai ia’u; he oiaio hoi, a ua nui ko’u hanauna a me na makamaka, a ua loaa ia’u ka waiwai nui ma ka’u mau hana mau;

5 Aka hoi, me keia nae a pau, aole au i ike nui i na aoao o ka Haku, a me kona mau mea pohihihi a me kona mana kupanaha. Ua i aku au aole au i ike nui i keia mau mea; aka hoi, ua kuhihewa au, no ka mea, ua ike nui au i kona mau mea pohihihi a me kona mana kupanaha; he oiaio, ma ka hoola ana i na ola o keia poe kanaka;

6 Ua hoopaakiki nae au i kuu naau, no ka mea, ua kaheaia mai au i na manawa he nui, aole au i hoolohe; nolaila, ua ike au no keia mau mea, aole nae au i makemake e ike; nolaila, hele aku la au e kipi ana i ke Akua, ma ka hewa o ko’u naau, a hiki aku i ka la eha o keia malama ehiku nei, oia no iloko o ka makahiki umi i ke au o na Lunakanawai.

7 Me a’u i hele aku ai e ike i kekahi hoahanau pili loa, aia hoi, ikea kekahi anela o ka Haku e au, a i mai la ia, E Amuleka, e hoi aku oe i kou hale iho, no ka mea, nau e hanai i kekahi kaula o ka Haku; he oiaio, he kanaka hemolele, oia no he kanaka i waeia e ke Akua; no ka mea, ua hooke ai oia i na la he nui no na hewa o keia poe kanaka, a ua pololi oia, a nau e hookipa ai ia ia iloko o kou hale a e hanai ia ia, a nana e hoopomaikai ia oe a me kou hale; a e kau mai ka pomaikai o ka Haku maluna ou a me kou hale.

8 [m 8, p 2] A eia kekahi, hoolohe iho la au i ka leo o ka anela, a hoi aku la i ko’u hale. A ia’u i hele aku ai ilaila, loaa iho la ia’u ke kanaka a ka anela i i mai ai ia’u, Nau e hookipa iloko o kou hale; a aia hoi, oia no ua kanaka la mana i olelo ae nei ia oukou no na mea o ke Akua.

9 A i mai la ka anela ia’u, He kanaka hemolele ia; nolaila, ua ike au he kanaka hemolele no ia, no ka mea, ua oleloia e kahi anela o ke Akua.

10 A eia hou, ua ike au o na mea ana i hoike mai ai, he oiaio ia mau mea: no ka mea, ke i aku nei au ia oukou, ma ke ola ana o ka Haku, pela oia i hoouna mai ai i kona anela e hoike mai i ua mau mea nei ia’u; a o keia kana i hana mai ai oiai e noho ana ua Alama nei ma ko’u hale;

11 No ka mea, ua hoopomaikai oia i ko’u hale, ua hoopomaikai mai oia ia’u, i ko’u mau wahine, a i ka’u mau keiki, a i ko’u makuakane, a i ko’u poe hanauna; he oiaio, o ko’u hanauana a pau kana i hoopomaikai ai, a ua kau mai ka pomaikai o ka Haku maluna o makou e like me na olelo ana i olelo mai ai.

12 [m 8, p 3] Ano, ia Amuleka i olelo mai ai i keia mau olelo, hoomaka na kanaka e kahaha, i ka ike ana ua nui ae mamua o ka hoike hookahi, e hoike ana no na mea o lakou i hoohewaia’i, a no na mea hoi e hiki mai ana, e like me ka Uhane o ka wanana iloko o laua;

13 Aka hoi, aia no kekahi poe mawaena o lakou e manao ana e niele ai ia laua, e hiki ia lakou ma ko lakou mau manao maalea ke hoohihia mai ia laua ma ka laua mau olelo, e hiki ia lakou ke loaa ka mea hoike ku e ia laua, e hiki ia lakou ke haawi aku ia laua i ko lakou mau lunakanawai, e hookolokoloia laua e like me ke kanawai, a e pepehiia laua a make, a i ole ia e hooleiia iloko o ka halepaahao, e like me ka hewa i hiki ia lakou ke hoakaka mai, a e hoike ku e mai ia laua.

14 Ano, o ua poe kanaka la ka poe e imi ana e pepehi ia laua, he poe loio lakou, i hoolimalimaia, a i waeia e na kanaka e lawelawe i ke kanawai ma ko lakou wa e hookolokolo ai, a ma na hookolokolo o na hewa o na kanaka, imua o na lunakanawai.

15 Ano, ua aoia ua poe loio nei ma na mea akamai a maalea a pau o na kanaka; a o keia mea e kokua ia lakou e hiki ke lilo i poe noiau ma ka lakou oihana.

16 A eia kekahi, hoomaka ae la lakou e niele ia Amuleka, e hiki ia lakou ma ia mea ke hoolilo ia ia i mea ku e i kana olelo iho, a e hoole aku paha i na olelo ana e olelo ai.

17 [m 8, p 4] Ano, aole lakou i ike ua hiki ia Amuleka ke ike i ko lakou mau manao. Aka ia lakou i hoomaka ai e niele mai ia ia, ike iho la oia i ko lakou mau manao, a i aku la oia ia lakou, Auwa oukou, e ka hanauna ino a kekee; e na loio a me na hookamani: no ka mea, e hoomakaukau ana oukou i na kahua o ka diabolo; no ka mea, e hoomakaukau ana oukou i na pahele a me na hei e pahele ai na mea hemolele o ke Akua;

18 E hoomakaukau ana oukou i na manao e kapae ae i na aoao o ka poe pono, a e hoohaule mai i ka inaina o ke Akua maluna iho o ko oukou mau poo, a hiki i ka luku loa ia’na o keia poe kanaka;

19 He oiaio, pono ka Mosia i olelo mai ai, oia no ko kakou alii hope, ia ia i manao ai e haawi aku i ke aupuni, no ka mea ole ona e hooili ai ia maluna, e kauoha ana e hoomaluia keia poe kanaka e ko lakou mau leo iho; he oiaio, pono kana i olelo mai ai, ina e hiki mai ka manawa na ka leo o keia poe kanaka e koho aku i ka hewa; me neia, ina e hiki mai ka manawa e haule keia poe kanaka iloko o ka hala, alaila, e oo no lakou no ka lukuia’na.

20 Ano, ke i aku nei au ia oukou, ua pono ko ka Haku hookolokolo ana i ka oukou mau hala; ua pono kana kahea ana i kona poe kanaka, me ka leo o kona poe anela, E mihi oukou, e mihi, no ka mea, ua kokoke mai ke aupuni o ka lani.

21 He oiaio, pono kana hea ana, ma ka leo o kona poe anela, E iho aku au mawaena o ko’u poe kanak, me ka pololei a hoopai iloko o ko’u mau lima.

22 He oiaio, a ke i aku nei au ia oukou, ina aole no na pule a ka poe pono, e noho la ma ka aina, e hoopaiia oukou ano me ka luku loa ia’na; aole nae ia e ke kaiakahinalii, me na kanaka ma na la o Noa, aka, e ka wi, e ke ahulau, a e ka pahikaua.

23 Aka, ma o na pule la a ka poe pono oukou i hoolaia’i, ano, ina e hoolei mai oukou i ka poe pono maiwaena ae o oukou, alaila, aole e hooki ka Haku i kona lima, aka e hele mai oia ma kona inaina wela e ku e ia oukou; alaila, e hahauia oukou e ka wi, a e ke ahulau, a e ka pahikaua; a ua kokoke mai ka manawa, ke mihi ole oukou.

24 [m 8, p 5] Ano, eia kekahi, ua huhu nui ak na kanaka ia Amuleka, a kahea mai la lakou me ka i ana: Ke hoino mai nei keia kanaka i ko kakou mau kanawai, a he pololei ia mau mea, a i ko kakou poe loio naauao no hoi a makou i wae ai.

25 Aka, o aku la o Amuleka i kona lima, a kahea ikaika nui ae ia lakou, i ka i ana: E ka hanauna ino a kekee; no ke aha i loaa’i ia Satana ka mana nui me neia maluna o ko oukou mau naau? No ke aha la oukou e hookuu aku ai ia oukou iho i hiki ia ia ke loaa ka mana maluna o oukou, e hoomakapo i ko oukou mau maka, i hoomaopopo ole ai oukou i na olelo i oleloia’i, e like me ka oiaio o ia mau mea?

26 No ka mea hoi, ua hoike ku e anei au i ko oukou mau kanawai? Ke hoomaopopo ole nei oukou; ke i mai mei oukou ua olelo ku e au i ko oukou kanawai; aka aole pela; aka ua olelo aku au ma ka aoao o ko oukou kanawai, i ko oukou hoohewaia’na.

27 A, ano hoi, ke i aku nei au ia oukou, e hoomaka ana ke kahua e hookumuia’i no ka lukuia’na o keia poe kanaka ma ka pono ole o ko oukou poe loio a me ko oukou poe lunakanawai.

28 [m 8, p 6] Ano, eia kekahi, ia Amuleka i olelo mai ai i keia mau olelo, kahea ku e mai la na kanaka ia ia, i ka i ana, Ano, ke ike nei kakou he keiki ua kanaka nei no ka diabolo, no ka mea, ua wahahee mai oia ia kakou; no ka mea, ua olelo ku e mai i ko kakou kanawai. Ano, ke i mai nei oia aole oia i olelo ku e mai ia mea.

29 A eia hou: ua hoino mai i ko kakou poe loio, a me ko kakou poe lunakanawai.

30 A na na loio i hookomo iloko o ko lakou mau naau i hoomanao ai lakou i ua mau mea nei me ke ku e ia ia.

31 A aia kekahi mea mawaena o lakou o Zezeroma kona inoa. Ano o ka mea mua oia e hoohewa’i ia Amuleka laua me Alama, oia no kekahi mea akamai loa mawaena o lakou, ia ia ka hana he nui e hana’i mawaena o na kanaka.

32 Ano, o ka makemake o ua poe loio nei oia no e loaa’i ka uku: a loaa no ia lakou ka uku e like me ko lakou hoolimalima.

MOKUNA 11

1 [mokuna 8, paukū 7] Ano, aia no ma ke kanawai o Mosia o kela kenaka keia kanaka i luna ma ke kanawai; a oia hoi ka poe i waeia i poe lunakanawai, e loaa no ia lakou ka uku e like me ka manawa a lakou i hana’i e hookolokolo i ka poe i laweia’i imua o lakou e hookolokoloia.

2 [m 8. p 8] Ano, ina ua aie kekahi kanaka ia hai, a, aole oia e hookaa i kona mea aie, alaila, ua hoopiiia oia i ka lunakanawai; a na ka lunakanawai i hana aku, a i kena aku i na ilamuku e laweia mai ke kanaka imua ona; a hookolokolo aku oia i ua kanaka la mamuli o ke kanawai a me na hoike i lawe ku e ia mai ia ia, a pela e koiia’i ua kanaka la e hookaa aku i kona aie, a i ole ia, e hookukeia’ku maiwaena aku o na kanaka, me he auhue la a me ka powa.

3 A loaa iho la i ka lunakanawai no kona uku e like me kona manawa: he senine o ke gula no ka la hookahi, a i ole ia, he senuma o ke kala, ua like pu ia me kekahi senine o ke gula; a ua like keia me ke kanawai i haawiia mai ai.

4 Ano, eia na inoa o kela apana o keia apana o ko lakou gula, a o ko lakou kala, e like me ka nui o ia mau mea. A ua haawiia na inoa e ko Nepai poe: no ka mea, aole lakou i helu mamuli o ka poe Iudaio ma Ierusalema; aole hoi lakou i ana mamuli o ke ano o ka poe Iudaio, aka hoololi lakou i ko lakou helu ana a me ko lakou ana ana, mamuli o na manao a me ka noho ana o na kanaka, i kela hanauna i keia hanauna, a hiki aku i ke au o na Lunakanawai; a ua hoonohonohoia ua mau mea nei e ke Alii Mosia.

5 Ano, penei ka helu ana: he senine o ke gula, he seona o ke gula, he suma o ke gula, a he limina o ke gula.

6 He sunuma o ke kala, he amanora o ke kala, he ezaroma o ke kala, a he onati o ke kala.

7 He senuma o ke kala ua like pu ia me kekahi senine o ke gula: a o kela a o keia no kekahi busela o ka bale, a no kekahi busela o kela ano keia ano o na hua liilii.

8 Ano, o ka nui o kekahi seona o ke gula, ua palua ia i ka nui o kekahi senine;

9 A he suma o ke gula, ua palua ia i ka nui o kekahi seona.

10 A ua like ka nui o ka limina o ke gula me ko lakou nei a pau;

11 A ua like ka nui o kahi amanora o ke kala me ko na senuma elua;

12 A ua like ka nui o kekahi ezaroma o ke kala me ko na senuma eha;

13 A ua like ka nui o kekahi onati me ko lakou nei a pau.

14 Ano, eia no ka nui o na mea uuku o ko lakou helu ana:

15 O kahi sebalona he hapalua ia o kahi senuma: nolaila, hookahi sibalona no ka hapalua o ka busela hookahi o ka bale;

16 A o kahi sibaluma he hapalua ia o ka sibalona:

17 A o kahi lea o ka hapalua ia o ka sibaluma.

18 Ano, oia no ko lakou helu, mamuli o ko lakou helu ana.

19 Ano, ua like pu kahi anationa o ke gula me na subalona ekolu.

20 [m 8, p 9] Ano, no ka manao wale no e loaa ka uku, no ka mea, loaa iho la ia lakou ko lakou uku e like me ka lakou hana; nolaila lakou i hookonokono ai i na kanaka e uhauha’i, a i kela ano keia ano o ka haunaele a me ka hewa, i nui aku ai ka lakou hana; e hiki ia lakou ke loaa ke kala e like me na hihia i laweia mai ai imua o lakou: nolaila, hooeueu ae la lakou i na kanaka e ku e ia Alama laua me Amuleka.

21 A hoomaka ua Zezeroma nei e niele ia Amuleka, i ka i ana: Ea, e pane mai anei oe ia’u i mau wahi niele a’u e niele aku ai ia oe? Ano, he kanaka akamai o Zezeroma ma na manao maalea o ka diabolo, i hiki ia ia ke hoopau i ka mea i pono; nolaila, i mai ai oia ia Amuleka, E pane mai anei oe i na niele a’u e ninau aku ai ia oe?

22 A i aku la o Amuleka ia ia, Ae, ina e like ia me ka Uhane o ka Haku iloko o’u; no ka mea, aole au e olelo aku i kekahi mea i ku e i ka Uhane o ka Haku. A i mai la o Zezeroma ia ia, Eia hoi na onati kala eono, a o ua mau mea nei a pau ka’u e haawi aku ai ia oe, ina e hoole mai oe i ke ola ana o ka Mea Kiekie loa.

23 Ano, i aku la o Amuleka, Auwe oe, e ke keiki o Gehena, no ke aha la oe e hoowalewale mai nei ia’u? Aole anei oe i ike e ae ole ana ka poe pono i na hoowalewale me neia?

24 Ke manaoio nei anei oe aole he Akua? Ke i aku nei au ia oe, aole: ua ike oe aia no he Akua, aka ke aloha nui loa aku nei oe i ua kala la mamua ia ia.

25 Ano, ua wahahee mai oe imua o ke Akua ia’u. I mai la oe ia’u, Eia hoi ua mau onati eono nei, he nui ko lakou maikai, na’u e haawi ia oe, i ka wa au i manao ai iloko o kou naau e aua i ua mau mea la ia’u; a o kou makemake wale no na’u e hoole aku i ke Akua oiaio a ola, i loaa’i ia oe ke kumu e hoopoino mai ia’u. A, ano hoi, no keia hewa nui e loaa auanei ia oe kou uku.

26 A i mai la o Zezeroma ia ia, Ke i mai nei anei oe aia no he Akua oiaio a ola?

27 A i aku la o Amuleka, Ae, aia no he Akua oiaio a ola.

28 Ano, i mai la o Zezeroma, He nui aku anei na ’kua mamua o ke Akua hookahi?

29 A pane aku la oia, Aole.

30 Ano, i hou mai la o Zezeroma ia ia, Pehea la oe i ike ai i ua mau mea nei?

31 A i aku la oia, Ua hoike mai la kekahi anela i ua mau mea nei ia’u.

32 A i hou mai la o Zezeroma ia ia, Owau la ka mea e hele mai auanei? O ke Keiki anei ia a ke Akua?

33 A i aku la oia ia ia, Ae.

34 A i hou mai la o Zezeroma, E hoola anei oia i kona poe kanaka iloko o ko lakou mau hala? A i aku la o Amuleka ia ia, Ke i aku nei au ia oe, aole loa, no ka mea, he mea hiki ole ia ia ke hoole mai i kana olelo.

35 [m 8, p 10] Ano, i ae la o Zezeroma i na kanaka, e hoomanao oukou i keia mau mea; no ka mea, i mai la oia aia hookahi Akua wale no; aka, ke i mai nei nae oia e hele mai auanei ke Keiki a ke Akua, aole nae oia e hoola mai i kona poe kanaka, me he mea la no ia nei ka mana e kauoha aku i ke Akua.

36 Ano, i aku la o Amuleka ia ia, Aia hoi, ua wahahee oe, no ka mea, ke i mai nei oe ua olelo aku au me he mea la, no’u ka mana e kauoha aku i ke Akua, no kuu i ana’ku aole oia e hoola i kona poe kanaka iloko o ko lakou mau hala.

37 A ke i hou aku nei au ia oe, aole e hiki ia’u ke hoole aku i kana olelo, a ua i mai oia aole e hiki i kekahi mea paumaele ke loaa ke aupuni o ka lani; nolaila, pehea la oukou e hoolaia’i, ke loaa ole ia oukou ke aupuni o ka lani? Nolaila, aole e hiki ia oukou ke hoolaia iloko o ka oukou mau hala.

38 Ano, i hou mai la o Zezeroma ia ia, O ke Keiki a ke Akua o ka Makua mau loa anei ia?

39 A i aku la o Amuleka ia ia, Ae, o ka Makua mau loa io oia o ka lani a o ka honua, a me na mea a pau i piha’i; oia no ke kumu a o ka welau, o ka mua a o ka hope;

40 A e hele mai auanei oia iloko o ke ao nei e hoolapanai mai i kona poe kanaka; a e lawe oia maluna iho ona i na hala o ka poe i manaoio ma kona inoa; a o lakou nei no ka poe e loaa’i auanei ke ola mau loa, e hele ole mai ana ke ola i kekahi poe e ae;

41 Nolaila, e waiho ana ka poe hewa me he mea la aole hoolapanai ana i hanaia mai, eia wale no ma ka hookuu ana mai i na apo o ka make; no ka mea, e hele mai ana ka la e ala na kanaka a pau mai ka make mai, a e ku imua o ke Akua, a e hookolokoloia e like me ka lakou mau hana.

42 Ano, aia no he make i kapaia he make kino: a e hookuu mai auanei ka make ana o Kristo i na apo o ua make kino nei, i hoalaia’i na mea a pau mai ua make kino nei;

43 O ka uhane o me ke kino e hui pu hou ia auanei, ma kona ano maoli: e hoihoi hou ia ka lala a me ke ami hoi i kona wahi ponoi, e like me kakou e noho nei i keia manawa; a e kaiia e ku imua o ke Akua, e ike ana me kakou e ike nei, a me ka hoomanao hiki wawe i ko kakou mau hewa a pau.

44 Ano, e hiki mai keia hoihoi hou ana i na mea a pau, o ka poe kahiko a me ka poe hou, o ka poe paa a me ka poe paa ole, o ka poe kane a me ka poe wahine, o ka poe hewa a me ka poe pono; a, aole i lilo ae kekahi mea uuku loa me he lauoho la o ko lakou mau poo; aka e hoihoi hou ia na mea a pau i kona wahi ponoi, me ia i keia manawa, ma ke kino, a e kaiia a e hookuia imua o ka noho hookolokolo o Kristo ke Keiki, a me ke Akua ka Makua, a me ka Uhane Hemolele, oia ke Akua mau loa hookahi, e hookolokoloia e like me ka lakou mau hana, ina paha he maikai, ina paha he ino.

45 [m 8, p 11] Ano hoi, ua olelo aku au ia oukou no ka make o ke kino make, a no ke alahouana o ke kino make. Ke i aku nei au ia oe, ua hookiekieia ua kino make nei i kahi kino make ole; oia no mai ka make mai; mai ka make mua mai hoi, i ke ola, i hiki ole ai ia lakou ke make hou; e hui ana ko lakou poe uhane me ko lakou poe kino, e hookaawale hou ole ia; pela ia mea a pau i lilo ai i kino uhane a i make ole, i hiki ole ai ia lakou ke ike hou i ka palaho.

46 [m 8, p 12] Ano, ia Amuleka i pau ai i ua mau olelo nei, hoomaka hou ae la na kanaka e kahaha, a hoomaka hoi o Zezeroma e haalulu. A pela i pau ai na olelo a Amuleka, a o keia na ema a pau a’u i palapala’i.

MOKUNA 12

1 [mokuna 9, paukū 1] Ano, i ko Alama ike ana ua paa o Zezeroma i na olelo a Amuleka, no ka mea, ike aku la oia ua loaa oia ia Amuleka i kona wahahee ana a hoopunipuni ana, e hoopoino ia ia, a e ike ana ua hoomaka oia e haalulu ma ka ike ana i kona hewa, oaka aku la oia i kona waha a hoomaka ae la e olelo aku ia ia, a e hookupaa aku i na olelo a Amuleka, a e hoomaopopo i na mea nui aku, a e wehewehe nui loa aku i na palapala hemolele mamua o ka Amuleka i hana e ai.

2 Ano, o na olelo a Alama i olelo aku ai ia Zezeroma, ua lohea e na kanaka a puni: no ka mea, ua nui loa ka lehulehu o kanaka, a olelo aku la oia penei:

3 Ano, E Zezeroma, i ka ike ana ua loaa oe ma kou wahahee ana a maalea, no ka mea, aole oe i wahahee mai i kanaka wale no, aka ua wahahee aku oe i ke Akua; no ka mea hoi, ke ike mai nei oia i na manao ou a pau; a ke ike mai nei oe ua hoikeia na manao ou ia maua e kona Uhane;

4 A ke ike mai nei oe ua ike mana he manao maalea loa kou manao, ma ko ka maalea o ka diabolo, e wahahee a e hoopunipuni i keia poe kanaka, i hiki ia oe ke hookue mai ia lakou ia maua, e hoino mai ia maua, a e hoolei mai ia maua mawaho.

5 Ano, he manao keia o kou mea ku e, a ua hana mai la oia i kona mana iloko ou. Ano, ke makemake nei au e hoomanao oe i ka’u e olelo aku ai ia oe, o ka’u ia e olelo aku ai i na mea a pau.

6 A, aia hoi, ke olelo aku nei au ia oukou a pau, he pahele keia o ka mea ku e, ana i hoomakaukau ai e hoopahele i ua poe kanaka nei, e hiki ia ia ke lawe ia oukou iloko o ka noho kauwa ana malalo iho ona, e hiki ia ia ke hoopuni ia oukou me kona mau kaulahao a puni, e hiki ia ia ke hoopaa aku ia oukou ilalo i ka make mau loa, e like me ka mana o kona noho pio ana.

7 [m 9, p 2] Ano, ia Alama i olelo mai ai i keia mau olelo, hoomaka ae la o Zezeroma e haalulu nui loa aku, no ka mea, au hoomaopopo nui loa ia, a nui loa aku no ka mana o ke Akua; a ua hoomaopopo no hoi oia he ike ko Alama laua me Amuleka ia ia, no ka mea, ua hoomaopopoia oia ua ike laua i na manao a me na makemake o kona naau: no ka mea, ua haawiia mai ka mana ia laua i hiki ia laua ke ike i keia mau mea, e like me ka Uhane o ka wanana.

8 A hoomaka o Zezeroma e ninau ikaika ia laua, e hiki ia ia ke ike hou no ke aupuni o ke Akua. A i mai la oia ia Alama, Heaha la ke ano o keia mea a Amuleka i olelo mai ai no ke alahouana o ka poe make, i ala’i auanei na mea a pau mai ka make mai, o ka poe pono a me ka poe pono ole, a e kaiia e ku imua o ke Akua, e hookolokoloia e like me ka lakou mau hana?

9 Ano, hoomaka ae la o Alama e hoakaka i ua mau mea nei ia ia, i ka i ana, Ua haawiia mai i na mea he nui e ike i na mea pohihihi o ke Akua; malalo iho nae lakou o kekahi kauoha ikaika, i ole ai lakou e haawi aku e like wale no me ka hapa o kana olelo, ana i haawi mai ai i na keiki a kanaka; e like me ka malama ana a me ka hoolohe ana o lakou ia ia;

10 A nolaila la, o ka mea nana e hoopaakiki i kona naau, oia ke loaa’i ka hapa uuku o ka olelo: a o ka mea nana e hoopaakiki ole i kona naau, ua haawiia ia ia ka hapa nui ae o ka olelo, a hiki i ka wa e haawiia ia ia e ike i na mea pohihihi o ke Akua, a hiki aku ia lakou ke ike paka i ua mau mea nei a pau;

11 A o ka poe nana e hoopaakiki i ko lakou mau naau, ia lakou i haawiia’i ka hapa uuku o ka olelo, a hiki aku lakou i ka ike ole no na mea pohihihi ona: alaila ua lawe pio ia lakou e ka diabolo, a alakaiia e kona makemake ilalo i ka make. Ano, oia no ka mea i manaoia ma na kaulahao o Gehena;

12 A ua olelo akaka mai o Amuleka no ka make, a no ka hookiekieia’na mai ua make nei mai i ka noho make ole ana, a e laweia imua o ka noho hookolokolo o ke Akua, e hookolokoloia e like me ka kakou mau hana.

13 Alaila, ina ua hoopaakikiia ko kakou mau naau, he oiaio, ina ua hoopaakiki kakou i ko kakou mau naau e ku e i kana olelo, i loaa ole ai ia mea iloko o kakou, alaila he weliweli loa ko kakou noho ana, no ka mea, alaila e hoohewaia’i kakou:

14 No ka mea, na ka kakou mau olelo kakou e hoohewa mai, he oiaio, na ka kakou mau hana a pau kakou e hoohewa mai; aole kakou e loaa kina ole ia; a na ko kakou mau manao no hoi kakou e hoohewa; a ma keia noho weliweli loa ana, aole kakou e aa aku e nana ae iluna i ko kakou Akua; a e hauoli no kakou ina ua hiki ia kakou ke kena i na pohakua a me na kuahiwi e haule mai maluna iho o kakou, a e uhi mai ia kakou mai kona alo ae.

15 Aka, ua hiki ole keia; e hele aku kakou e pono ai a e ku imua ona iloko o kona nani, a iloko o kona mana, a iloko o kona ikaika, a hanohano, a hoomalu ana, a e ae aku i ko kakou hilahila mau loa aku, ua pololei kona mau hoopai a pau; a ua pololei hoi oia i kana mau hana a pau, a ua aloha oia i na keiki a kanaka, a ia ia no ka mana a pau e hoola i kela kanaka i keia kanaka e manaoio ana ma kona inoa, a e hoohua mai ana i ka hua ku i ka mihi.

16 [m 9, p 3] Ano hoi, ke i aku nei au ia oukou, alaila e hele mai ana kahi make, oia, he make lua, a he make uhane ia; alaila oia ka manawa o ka mea e make ana iloko o kona mau hewa, ma ka make ana ma ke kino, e make no auanei oia i kahi make uhane; he oiaio, e make no oia ma na mea e pili ana i ka pono;

17 Alaila, oia ka manawa e like ko lakou ehaeha me he loko ahi la a me ke kukae pele, a o kona lapalapa e pii ana ia ia ao aku ia ao aku; alaila oia ka manawa e hoopaaia lakou ilalo i ka make mau loa ana, e like me ka mana a me ka noho pio ana o ka Satana; ua hookauwa aku oia ia lakou e like me kona makemake.

18 Alaila, ke i aku nei au ia oe, me he mea la lakou aole hoolapanai i hanaia’i; me he mea la lakou aole hoolapanai i hanaia’i; no ka mea, aole e hiki ia lakou ke hoolapanaiia mamuli o ko ke Akua hoopono; aole hoi e hiki ia lakou ke make, no ka mea, aole he palaho hou.

19 [m 9, p 4] Ano, eia kekahi, ia Alama i pau ai i ka olelo ana i ua mau olelo nei, hoomaka ae la na kanaka e kahaha nui loa aku;

20 Aka, malaila kekahi mea, o Anationa, he luna nui oia mawaena o lakou, hele mai la oia a i mai la ia ia, Heaha keia au i olelo mai ai, e ala anei ke kanaka mai ka make mai, a e hooliloia mai ua make nei i ka noho make ole ana, i ole ai e hiki i ka uhane ke make?

21 Heaha ke ano o ka palapala hemolele, i ka i ana, Hoonoho iho la ke Akua i na Kerubima, a me ka pahi wakawaka ma ka hikina o ka mahinaai o Edena, o komo ko kakou mau kupuna mua a ai i ka hua o ka laau ola, a ola mau loa aku? A pela kakou i ike ai aole loa he mea hiki ia lakou ke ola mau loa.

22 Ano, i aku la o Alama ia ia, Oia no ka mea a’u i manao iho ai e hoomaopopo. Ano, ke ike nei kakou haule iho la o Adamu ma kona ai ana i ka hua i papaia, e like me ka olelo a ke Akua; a pela kakou i ike ai, ma kona haule ana, lilo iho la na kanaka a pau i poe lilo a haule.

23 Aia hoi, ke i aku nei au ia oukou, ina he mea hiki ia Adamu ke ai i ka hua o ka laau ola ia manawa, ina aole he make, a ua lilo ka olelo i mea ole, e hoolilo ana i ke Akua i mea wahahee: no ka mea, i mai la oia, Ina e ai oe, he oiaio no e make oe.

24 A ke ike nei kakou ke hele mai la ka make maluna o na kanaka, he oiaio, o ka make i oleloia’i e Amuleka, oia no ka make kino; ua haawiia mai nae i kekahi wa i kanaka, e hiki ia ia iloko o ua wa la ke mihi; nolaila, lilo iho la keia ola ana i noho hoao ana; he manawa e hoomakaukau ai e halawai pu me ke Akua; he manawa e hoomakaukau ai no ua noho pau ole ana la, i oleloia’ku ai e maua, oia no mahope aku o ke alahouana o ka poe make.

25 [m 9, p 5] Ano, ina aole no ka manao hoolapanai, i hookumuia’i mai ka hookumuia’na mai o ke ao nei, ina aole loa he alahouana o ka poe make; aka, aia no he kumumanao hoolapanai i hookumuia’i, oia no ke lawe mai auanei i ke alahouana o ka poe make, i oleloia’i.

26 Ano hoi, ina ua hiki i ko kakou mau kupuna mua ke hele aku a ai i ka hua o ka laau ola, ina ua poino mau loa laua, me kahi ole e hoomakaukau ai; a pela e hooliloia’i ke kumumanao hoolapanai i mea ole, a o ka olelo a ke Akua hoi i mea ole, aole ia e ko.

27 Aka hoi, aole ia pela; aka ua hookauia mai i kanaka e make lakou e pono ai; a mahope aku o ka make, e hele aku lakou i ka hookolokolo e pono ai; oia ua hookolokolo hookahi la a maua i olelo aku ai, oia no ka hopena.

28 A mahope iho o ko ke Akua hookau ana i ua mau mea nei e hiki mai ai i kanaka, aia hoi, alaila ike aku la oia, he mea pono e ike ke kanaka no na mea ana i hookau mai ai ia lakou;

29 Nolaila, nana i hoouna mai la i na anela e kamailio pu me lakou, a ma o lakou la na kanaka i ike ai no kona nani.

30 A hoomaka ae la lakou ma ia manawa aku e kahea aku ma kona inoa; nolaila, kamailio mai la ke Akua me na kanaka, a hoike mai la ia lakou i ke kumumanao hoolapanai i hoomakaukauia’i mai ka hookumuia ana mai o ke ao nei; a o keia kana i hoike mai ai ia lakou e like me ko lakou manaoio a mihi, a me ka lakou mau hana hemolele;

31 Nolaila, haawi mai la oia i na kauoha i na kanaka, ua ae e ae la lakou maluna o na kauoha mua ma na mea o ke kino, a e lilo ana me he poe akua la, e ike ana i ka pono mai ka hewa ae, e hoonoho ana ia lakou iho ma kahi e hana’i, a i hoonohoia ma kahi e hana’i e like me na makemake a me na mea oluolu o lakou, ina paha e hana aku i ka ino, a ina paha e hana aku i ka maikai;

32 Nolaila, haawi mai la ke Akua ia lakou i na kauoha, mahope iho o ka hoike ana ia lakou i ke kumumanao hoolapanai, i ole ai lakou e hana i ka ino, o ka hoopai ana no ia mea oia no he make lua ana, he make mau loa ana ia ma na mea e pili ana i ka pono; no ka mea, aole loa he mana ko ke kumumanao hoolapanai maluna o ka poe me neia, no ka mea, aole i hiki ke hoopauia na hana o ka hoopai, e like me ka lokomaikai kiekie loa o ke Akua.

33 Aka, kahea mai la ke Akua i na kanaka, ma ka inoa o kana Keiki, (oia no, ke kumumanao hoolapanai i hookumuia’i,) i ka i ana: Ina oukou e mihi, a hoopaakiki ole i ko oukou mau naau, alaila, e aloha aku au ia oukou, ma o ka’u Keiki hanau-kahi la;

34 Nolaila, o ka mea e mihi ana, a e hoopaakiki ole ana i kona naau, e loaa auanei ia ia ke kuleana ma ke aloha ma o ka’u Keiki hanau-kahi la, i ke kalaia’na o kona mau hala; a o lakou nei no ka poe e komo ae iloko o ko’u maha.

35 A o ka mea nana e hoopakiki i kona naau, a e hana i ka hewa, aia hoi, ua hoohiki au ma ko’u inaina aole loa oia e komo mai iloko o ko’u maha.

36 Ano, e o’u poe hoahanau, aia hoi, ke i aku nei au ia oukou, ina e hoopaakiki oukou i ko oukou mau naau, aole loa oukou e komo ae iloko o ka maha o ka Haku; nolaila, e hoonaukiuki ana ko oukou mau hewa ia ia, a e hoouna mai ana oia i kona inaina maluna iho o oukou me ia ma kona hoonaukiuki mua ia’na, he oiaio, e like me kana olelo ma ka hoonaukiuki hope ia’na, me ia no hoi ma ka mua, i ka make loa ana o ko oukou poe uhane; nolaila, e like me kana olelo, i ka make hope ana, me ia no hoi i ka make mau ana.

37 [m 9, p 6] Ano, e ko’u poe hoahanau, no ko kakou ike ana i ua mau mea nei, a he oiaio no ia mau mea, e mihi kakou, a e hoopaakiki ole i ko kakou mau naau, i hoonaukiuki ole ai kakou i ka Haku, i ko kakou Akua, e huki mai i kona inaina maluna o kakou ma ka lua o kana mau kauoha ana, ana i haawi mai ai ia kakou; aka e komo aku kakou iloko o ka maha o ke Akua, i hoomakaukauia’i e like me kana olelo.

MOKUNA 13

1 A eia hou: e ko’u poe hoahanau, ke makemake nei au e kuhikuhi aku i ko oukou mau naau imua, i ka manawa a ka Haku a ke Akua i haawi mai ai i ua mau kauoha nei i kana poe keiki; a ke makemake nei au e hoomanao oukou ua hoolilo mai ka Haku ke Akua i poe kahuna, mamuli o kona aoao hemolele, oia no mamuli o ka aoao o kana Keiki, e ao aku i ua mau mea nei i na kanaka;

2 A ua hooliloia ua poe kahuna la mamuli o ka aoao o kana Keiki, ma kekahi ano i hiki ai i ka poe kanaka ma o ua mea la, ke ike i ke ano ku pono e nana imua i kana Keiki no ka hoolapanaiia’na.

3 A eia no ke ano o ko lakou hooliloia’na: Ua kaheaia a hoomakaukauia mai mai ka hookumuia’na mai o ke ao nei, e like me ka ike mua ana o ke Akua, no ko lakou manaoio nui loa a me na hana maikai; ma ka mua ua waihoia e koho aku i ka maikai, a i ole ia, i ka ino; nolaila, o lakou ka i koho aku i ka maikai, a e hooikaika ana me ka manaoio nui loa, ua kaheaia lakou me kahi oihana hoano, he oiaio, me kela oihana hoano i hoomakaukauia’i me kekahi hoolapanai hoomakaukau, a mamuli no hoi ia mea, no ka poe e like me ia;

4 A pela lakou i kaheaia’i i ua oihana hoano nei no ko lakou manaoio, oiai na mea e ae i hoomalau ai i ka Uhane o ke Akua no ka paakiki o ko lakou mau naau a me ka pouli o ko lakou hoomaopopo, oiai, ina aole no ia mea, ina ua hiki ia lakou ke loaa ka pomaikai nui e like me ko lakou poe hoahanau.

5 No ka mea, mamua aia pu lakou ma kahi hookahi e ku ana me ko lakou poe hoahanau: pela i hoomakaukauia’i na oihana hoano nei mai ka hookumuia’na mai o ke ao nei no ka poe i hoopaakiki ole i ko lakou mau naau, aia no ia iloko a ma o ke kalahala ana ia o ke Keiki hanau-kahi, oia ka i hoomakaukauia;

6 A pela i kaheaia’i ma ua oihana hoano nei, a hooliloia i ka Oihana Kahuna Kiekie o ka aoao hoano o ke Akua, e ao aku i kana mau kauoha i na keiki a kanaka, e hiki no hoi ia lakou ke komo iloko o kona maha,

7 A o keia Oihana Kahuna Kiekie mamuli ia o ka aoao o kana Keiki, a o ua aoao la mai ka hookumuia’na mai ia o ke ao nei: a ma na olelo e, me ka makamua ole o na la aole hoi hopena no na makahiki, i hoomakaukauia mai ai ia ao aku ia ao aku a mau loa aku, e like me kona ike mua ana ma na mea a pau.

8 Ano, ua hooliloia lakou mamuli o keia ano: Ua kaheaia me kekahi oihana hoano, a hooliloia me kekahi kauoha hoano, a e lawe ana maluna o lakou i ka Oihana Kahuna Kiekie o ka aoao hemolele, a, o keia oihana hoano, a kauoha hoano, a Oihana Kahuna Kiekie, aole makamua aole hoi hopena;

9 Pela lakou i lilo ai i poe Kahuna Kiekie no ka wa pau ole, mamuli o ka aoao o ke Keiki, ka Hanau-Kahi a ka Makua, aole ona makamua o na la aole hoi hopena o na makahiki, a oia ka i piha i ka lokomaikai, i ka pololei a me ka oiaio. A pela io no. Amene.

10 [mokuna 10, paukū 1] Ano, ua olelo aku au no ka aoao hemolele o ua Oihana Kahuna Kiekie nei: a ua nui no ka poe i hooliloia a lilo ae i poe Kahuna Kiekie o ke Akua; a no ko lakou manaoio a mihi nui loa aku, a me ko lakou pono imua o ke Akkua ia mea, e makemake loa ana lakou e mihi a e hana i ka pono mamua o ka make;

11 Nolaila, ua kaheaia lakou mamuli o ua aoao hemolele nei, a ua hoomaemaeia, a ua holoiia mai ko lakou mau aahu i keokeo, ma o ke koko la o ke Keikihipa.

12 Ano, o keia poe, mahope iho o ka hoomaemaeia’na e ka Uhane Hemolele, me ko lakou mau aahu i holoi keokeo ia, a ua maemae a kina ole imua o ke Akua, aole i hiki ia lakou ke nana aku i ka hewa, ke ole me ka hoopailua; a ua nui loa ka poe i hoomaemaeia, a komo aku la iloko o ka maha o ka Haku, o ko lakou Akua.

13 Ano, e ko’u poe hoahanau, ke makemake nei au ia oukou e hoohaahaa ia oukou iho imua o ke Akua, a e hoohua mai i ka hua ku i ka mihi, e hiki no hoi ia oukou ke komo iloko o ua maha la;

14 He oiaio, e hoohaahaa oukou ia oukou iho, me na kanaka ma na la o Melekisedeka, oia no hoi he Kahuna Nui mamuli o keia aoao hookahi a’u e olelo nei, nana hoi i lawe maluna iho ona i ka Oihana Kahuna Kiekie no ka wa pau ole.

15 A oia ua Melekisedeka hookahi nei ia ia i haawi aku ai o Aberahama i ka hapaumi: he oiaio, waahi aku la ko kakou kupuna kane o Aberahama i ka hapaumi, i ka hapaumi o na mea a pau ana i loaa’i.

16 Ano, ua haawi mai i ua mau kauoha nei mamuli o keia ano, i hiki i na kanaka ma o ua mea la ke nana imua ma ke Keiki a ke Akua, he hoailona ia mea o kona aoao, a o kona aoao no hoi ia; a o keia, e hiki ia lakou ke nana imua ia ia no ke kalaia ana o ko lakou mau hala, e hiki ia lakou ke komo iloko o ka maha o ka Haku.

17 [m 10, p 2] Ano, he Alii o ua Melekisedeka nei maluna iho o ka aina o Salema; A ua mahuahua ikaika aku la kona poe kanaka ma ka hewa a me na mea hoopailua; he oiaio, ua hili aku la lakou a pau: ua pihi i kela ano i keia ano a pau o ka hewa:

18 Aka, ua hooikaika o Melekisedeka me ka manaoio ikaika, a loaa iho la ia ia ka Oihana Kahuna Kiekie, e like me ka aoao hemolele o ke Akua, a hai aku la i ka mihi i kona poe kanaka. A, aia hoi, mihi iho la lakou; a hookupaa iho la o Melekisedeka i ka malu ma ka aina i kona mau la; nolaila, ua kapaia oia ke alii o ka malu, no ka mea, o ke Alii oia o Salema; a ua noho alii oia malalo iho o kona makuakane.

19 Ano, ua nui wale ka poe mamua aku ona, a ua nui wale ka poe mahope mai, aka aole kekahi mea nui aku; nolaila, ua olelo nui mai lakou nona.

20 Ano, aohe he mea e pono ai no’u e hai hou aku ia mea; ua lawa ka’u olelo ana, Aia hoi na palapala hemolele imua o oukou; ina e hookapae ae oukou ia mau mea e lilo ai auanei ia mea no ko oukou make iho.

21 [m 10, p 3] Ano, eia kekahi, ia Alama i olelo aku ai i ua mau olelo nei ia lakou, o aku la oia i kona lima ia lakou a hea aku la me ka leo ikaika, i ka i ana, Ano ka wa e mihi ai, no ka mea, ke hookokoke mai nei ka la o ke ola;

22 He oiaio, a ke hai nei ka leo o ka Haku ia mea, ma ka waha o na anela, i na lahuikanaka a pau: he oiaio, ke haiia nei e hiki ia lakou ke loaa’e ka olelo olioli o ka hauoli nui; he oiaio, a ke hoolaha nei oia i ua mau olelo olioli nei mawaena o kona poe kanaka a pau, he oiaio, i ka poe hoopuehu palahalaha ia maluna o ka ili o ka honua; nolaila, ua hiki mai ia mau mea ia kakou.

23 A hoikeia mai ua mau mea la ia kakou ma na olelo maopopo, i hiki ia kakou ke hoomaopopo, i hiki ole ai ia kakou ke kuhihewa; a o keia, no ka mea, he poe aea kakou ma kahi aina e, nolaila kakou i hoopomaikai loa ia’i peia, no ka mea, ua haiia mai ua mau olelo olioli nei ia kakou ma na wahi a pau o ko kakou pawaina.

24 No ka mea, aia hoi, e hai ana na anela ia mea i kekahi poe he nui wale i keia manawa ma ko kakou aina; a o keia no ka manao e hoomakaukau ae i na naau o na keiki a kanaka e hookipa mai i kana olelo, ma ka manawa o kona hiki ana mai iloko o kona nani.

25 Ano, ke kakali wale nei no makou e lohe i ka olelo olioli i haiia mai ia makou, ma ka waha o na anela, no kona hiki ana mai: no ka mea, ke hele mai nei ka manawa, aole makou i ike i ka loihi. O ko’u makemake i ke Akua e hiki mai ia mea ma ko’u la; aka ina he kokoke ina paha he loihi, ma ia mea wau e hauoli ai.

26 A e hoikeia mai auanei ia mea i na kanaka hemolele a hoopono, ma ka waha o na anela, i ka wa o kona hiki ana mai, i ko ai na olelo a ko kakou poe kupuna, e like me ka mea a lakou i olelo mai ai nona, a ua like ia me ka Uhane wanana iloko o lakou.

27 [m 10, p 4] Ano, e o’u poe hoahanau, ke makemake nei au mailoko mai o ko’u naau, he oiaio, me ka uunu nui, a me ka eha, e hoolohe mai oukou i ka’u mau olelo, a e hoolei aku i ko oukou mau hewa, a e hoopanee ole aku i ka la o ko oukou mihi ana:

28 Aka, e hoohaahaa ia oukou iho imua o ka Haku, a e kahea aku ma kona inoa hoano, a e makaala a e pule mau, i hoao ole ia’i oukou mamua o ka mea i hiki ai ia oukou ke hoomanawanui, a pela e alakaiia’i e ka Uhane Hemolele, e lilo ana i haahaa, i akahai, i hoolohe, i ahonui, piha me ke aloha a me ka hoomanawanui;

29 Me ka manaoio ma ka Haku; me ka manaolana e loaa auanei ia oukou ke ola mau loa; me ke aloha o ke Akua i na manawa a pau ma ko oukou mau naau, i hookiekieia’i oukou iluna ma ka la hope, a e komo iloko o kona maha:

30 A na ka Haku e haawi ia oukou i ka mihi, i ole ai oia e hoohaule mai ilalo nei i kona inaina maluna iho o oukou, i ole ai oukou e hoopaa ole ia e na kaulahao o Gehena, i ole ai oukou e loaa ka make lua.

31 A olelo aku la o Alama i na olelo e ae he nui i na kanaka, i palapala ole ia iloko o keia buke.

MOKUNA 14

1 [mokuna 10, paukū 5] A eia kekahi, ia ia i pau ai i kana olelo ana i na kanaka, ua nui wale o lakou i manaoio ma kana mau olelo, a hoomaka ae la e mihi, a e imi i na palapala hemolele;

2 Aka o ka nui loa o lakou ua makemake e pepehi loa ia Alama a me Amuleka: no ka mea, huhu iho la lakou ia Alama, no ke akaka o na olelo ana ia Zezeroma; a i ae la hoi lakou ua wahahee aku la o Amuleka ia lakou, a hoino aku la i ko lakou kanawai, a i ko lakou poe loio a me na lunakanawai hoi.

3 A ua huhu no hoi lakou ia Alama laua me Amuleka; no ko laua hoike maopop ana me ke ku e i ka lakou hana hewa, imi iho la lakou e pepehi malu ia laua.

4 Aole nae lakou i hana; aka, hopu iho la lakou ia laua a hikii iho la me na kaula ikaika, a kai aku la ia laua imua o ka Lunakanawai Nui o ka aina.

5 A hele aku la na kanaka a hoike ku e mai ia laua, e hoike ana ua hoino aku laua i ke kanawai, a me ko lakou poe loio a poe lunakanawai o ka aina, a me na kanaka hoi a pau ma ka aina; a hoike aku la no hoi hookahi Akua wale no, a nana e hoouna mai i kana Keiki mawaena o na kanaka, aka aole oia e hoola ia lakou; a he nui na mea me ia i hoike ku e mai ai na kanaka ia Alama laua me Amuleka. Ano, ua hanaia keia imua o ka Lunakanawai Nui o ka aina.

6 A eia kekahi, ua kahaha o Zezeroma ma na olelo i olelo ia’i; ua ike no hoi oia no ka pouli o na naau ana i hana’i mawaena o na kanaka, ma na olelo wahahee ana; a hoomaka ae la kona Uhane e hoowalaniaia ma ka ike i kona hewa iho; he oiaio, hoomaka oia e hoopuniia a puni e na eha o Gehena.

7 [m 10, p 6] A, eia kekahi, hoomaka ae la oia e kahea aku i na kanaka, i ka i ana: Aia hoi, owau no ka i hewa, a ua kina ole ua mau kanaka nei imua o ke Akua. A hoomaka ae la oia e olelo kokua no laua, ma ia hope aku; aka hoina ae la lakou ia ia, i ka i ana: Ooe anei ka kekahi i uluhia’i no hoi me ka diabolo? A kuha ae la lakou maluna ona, a hoolei aku la ia ia mawaho maiwaena aku o lakou, a me ka poe a pau no hoi i manaoio i na olelo i oleloia’i e Alama a me Amuleka; a hoolei aku la lakou la ia lakou mawaho, a hoouna aku la i na kanaka e nou aku i na pohaku ia lakou.

8 A hoakoakoa pu mai la lakou la i ka lakou poe wahine a poe keiki, a o na mea i manaoio, a i aoia e manaoio i ka olelo a ke Akua, kena aku la lakou la e hooleiia lakou iloko o ke ahi; a lawe mai la no hoi lakou la i na mooolelo a lakou, i piha’i me na palapala hemolele, a hoolei aku la no hoi i ua mau mea nei iloko o ke ahi, i puhiia’i a hoopauia’i ua mau mea la e ke ahi.

9 [m 10, p 7] A eia kekahi, lawe aku la lakou ia Alama laua me Amuleka, a kaikai aku la ia laua i kahi e make ai, e hiki ia laua ke ike i ka make ana o ka poe i puhiia’i e ka ahi.

10 A ia Amuleka i ike ai i na eha o na wahine a me na keiki, ua eha no hoi oia; a i mai la oia ia Alama, Pehea la i hiki ai ia kaua ke ike i keia mea weliweli loa? Nolaila, e o aku kaua i ko kaua mau lima, a e hana me ka mana o ke Akua iloko o kaua, a e hoopakele ia lakou nei i na lapalapa.

11 Aka, i ae la o Alama ia ia, ke koi mai nei ak Uhane e o ole aku au i kuu lima; no ka mea hoi, ke hookipa aku nei ka Haku ia lakou iluna io na la, iloko o ka nani; a ke ae mai nei oia ia lakou e hana i keia mea, a e hana ae na kanaka i keia mea ia lakou, e like me ka paakiki o ko lakou la mau naau, i pololei na hoopai, ana e hana mai ai auanei maluna iho o lakou la ma kona inaina; a e ku auanei ke koko o ka poe hala ole me he hoike ku e la ia lakou, he oiaio, a e kahea ikaika me ka ku e ia lakou ma ka la hope.

12 Ano, i mai la o Amuleka ia Alama, Aia hoi, malia paha i puhi mai no lakou ia kaua no hoi.

13 A i ae la o Alama, Ai no e like me ka makemake o ka Haku. Aka hoi, aole i pau ka kaua hana; nolaila, aole lakou e puhi mai ia kaua.

14 [m 10, p 8] Ano, eia kekahi, i ka wa i pau ai na kino o ka poe i hooleiia iloko o ke ahi, a me na mooolelo i hoolei pu ia me lakou, hele mai la ka Lunakanawai Nui o ka aina, a ku iho la imua o Alama laua me Amuleka, ia laua i paa ai; a papai mai la oia ia laua me kona lima ma na papalina o laua, a i mai la ia laua, Ea, mahope iho o ka mea a olua i ike nei, e hai olelo hou anei olua i keia poe kanaka, e hooleiia mai auanei lakou iloko o kekahi loko ahi a me ke kukae pele?

15 Aia hoi, ke ike nei olua, aole o olua mana e hoopekele aku i ua poe nei, ka poe i hooleiia iloko o ke ahi; aole hoi o ke Akua i hoopakele mai ia lakou, no ko lakou manaoio ana e like me kou. A papai hou mai la ua Lunakanawai la ia laua ma na papalina, a ninau mai la, Heaha ka olua e i mai ai no olua iho?

16 Ano, o ua Lunakanawai nei mamuli ia o ka aoao a me ka manaoio o Nehora, nana i pepehi kau ia Gideona.

17 A eia kekahi, aole ekemu aku o Alama laua me Amuleka ia ia; a papai hou mai la oia ia laua, a haawi aku la ia laua i na ilamuku e hooleiia iloko o ka halepaahao.

18 A ia laua i hooleiia’i iloko o ka halepaahao i na la ekolu, hele mai la na loio he nui, a me na lunakanawai, a me na kahuna, a me na kumu, he poe no ka oihana a Nehora: a komo mai la lakou iloko o ka halepaahao e ike mai ia laua, a nieniele mai la lakou ia laua no na olelo he nui; aka aole laua i ekemu iki aku ia lakou.

19 A eia kekahi, ku iho la ka lunakanawai imua o laua, a i mai la, No ke aha la olua e ekemu ole mai ai i na olelo a keia poe kanaka? Aole anei olua i ike he mana ko’u e haawi aku ai ia olua i na lapalapa? A kauoha mai la oia ia laua e olelo; aka aole loa laua i ekemu aku.

20 [m 10, p 9] A eia kekahi, haalele aku la lakou a hoi aku la, aka haele hou mai la i kakahiaka ae; a papai no hoi ka lunakanawai ia laua ma na papalina o laua. A ua nui no hoi ka poe i hele mai, a i papai mai ia laua, i ka i ana, E ku hou anei olua a e hookolokolo mai i keia poe kanaka, a e hoohewa mai i ko makou kanawai? Ina na olua ua mana nui nei, no ke aha la olua e hoopakele ole ai ia olua iho?

21 A ua nui wale na mea me neia a lakou i olelo mai ai ia laua, e uwi ana na hiho o lakou ia laua, a e kuha ana maluna o laua, a me ka i ana, Pehea la auanei ke ano o ko makou helehelena i ka wa a makou e hoomainoinoia’i?

22 A ua nui na mea me neia, he oiaio, i na mea a pau me neia, he oiaio, i na mea a pau me neia o kela ano o keia ano ka lakouk i olelo mai ai ia laua; a pela lakou i hoomaewaewa mai ai ia laua, no na la he nui. A aua mai la lakou i ka ai ia laua, i pololi laua, a i ka wai hoi, i makewai laua; a kaili mai la no hoi lakou i ko laua mau kapa mai o laua aku, i kapa ole laua; a pela laua i nakinakiia’i me na kaula ikaika, a hoopaaia iloko o ka halepaahao.

23 [m 10, p 10] A eia kekahi, mahope iho o ko laua hooehaia’na mai peia no na la he nui wale, (a ma ka la umikumamalua ia, ma ka malama umi, ma ka makahiki umi o ke au o na Lunakanawai maluna iho o ka poe kanaka o Nepai,) hele mai la ka Lunakanawai Nui maluna iho o ka aina o Amoniha, a me na mea he nui, o ko lakou poe kumu a me ko lakou poe loio, iloko o ka halepaahao, kahi o Alama laua me Amuleka i nakinakiia ai me na kaula.

24 A ku iho la ka Lunakanawai Nui imua o laua, a papai hou mai la ia laua, a i mai la ia laua, Ina ia olua ka mana o ke Akua, e hoopakele ia olua iho i ua mau mea paa nei, alaila, e manaoio makou na ka Haku e hoopau mai i keia poe kanaka, e like me ka olua mau olelo.

25 A eia kekahi, hele mai la lakou a pau a papai mai la ia laua, e olelo ana i ua mau olelo hookahi, a hiki aku i ka mea hope; a i ka wa a ka mea hope i olelo mai ai ia laua, maluna iho o Alama laua me Amuleka ka mana o ke Akua, a ala ae la laua a ku iho la ma ko laua mau wawae;

26 A kahea aku la o Alama, i ka i ana, Pehea la ka loihi o ko maua loaa ana keia mau popilikia nui, e ka Haku? E ka Haku, e haawi mai ia maua i ka ikaika e like me ko maua manaoio iloko o Kristo, i ka hoopakeleia’na; a moku aku la laua i na kaula a laua i nakinakiia’i, a i na kanaka i ike ai ia mea, hoomaka lakou e naholo aku, no ka mea, ua hiki mai ka makau i ka make maluna iho o lakou.

27 [m 10, p 11] A eia kekahi, no ka nui o ko lakou makau, haule iho la lakou i ka honua, aole i loaa ia lakou ka puka mawaho loa o ka halepaahao; naueue ikaika ae la ka honua, a naha iho la na paia o ka halepaahao iwaena, a hiolo iho la ia mau mea i ka honua; a o ka Lunakanawai Nui, a me na loio, a me na kahuna, a me na kumu, ka poe i papai mai ia Alama laua me Amuleka, ua pau loa lakou i ka make ma ka hiolo ana o ia mau mea.

28 A puka mai la o Alama laua me Amuleka mawaho o ka halepaahao, aole laua i eha; no ka mea, ua haawi mai ka Haku i mana ia laua, e like me ko laua manaoio iloko o Kristo. A hele koke mai la laua mawaho o ka halepaahao; a ua hookuuia mai laua i ko laua mau mea i paa ai; a ua hiolo iho la ka halepaahao i ka honua, a ua pau i ka make kela mea keia mea i komo iloko o na paia ona, koe wale no o Alama laua me Amuleka; a hele koke aku la laua iloko o ke kulanakauhale.

29 Ano, ua lohe na kanaka i kekahi nei nui, a holo mai lakou he poe lehulehu loa, e ike i ke kumu o ia mea; a ia lakou i ike ai ia Alama laua me Amuleka e puka mai ana mailoko mai o ka halepaahao, a ua hiolo iho la na paia ona i ka honua, ua loohia iho la lakou me ka makau nui, a auhee aku la mai ke alo aku o Alama laua me Amuleka, me he kao la i auhee aku ai me na keiki ana mai na liona elua aku; a pela lakou i hee aku ai mai ke alo aku o Alama laua me Amuleka.

MOKUNA 15

1 [mokuna 10, paukū 12] A eia kekahi, ua kauohaia mai o Alama laua me Amuleka e hele aku mawaho o ke kulanakauhale; a haalele iho la laua, a hele aku la iloko o ka aina o Sidoma; a, aia hoi, malaila, laua i loaa’i na kanaka a pau, ka poe i haalele iho i ka aina o Amoniha, ka poe i hookukeia mai iwaho a i hailukuia mai, no ko lakou manaoio ana i na olelo a Alama.

2 A hai aku la laua ia lakou i na mea a pau i hanaia mai ai i ka lakou poe wahine a poe keiki, a no laua iho no hoi, a no ko laua mana i ka hoopakeleia’na.

3 A e waiho ana hoi o Zezeroma me ka mai ma Sidoma, me kahi mai kuni wela, no na pilikia nui o kona naau keia mea, no kona hewa, no ka mea, ua manao oia ua make o Alama laua me Amuleka; a ua manao oia ua pepehiia laua, mamuli o kona hewa. A o keia hewa nui, a me kona mau hewa e ae he nui wale, ua hoowalania iho la i kona naau, a eha nui loa iho la ia, me ka hoopakele ole ia mai; nolaila, hoomaka iho la oia e welaia me kahi kuni wela.

4 Ano, ia ia i lohe ai aia o Alama laua me Amuleka ma ka aina o Sidoma, hoomaka ae la kona naau e loaa ka ikaika; a kauoha koke mai oia ia laua, e makemake ana ia laua e hele io na la.

5 [m 10, p 13] A eia kekahi, hele koke aku la laua io na la, e hoolohe ana i ke kauoha i hoounaia mai ia laua; a komo aku la laua iloko o ka hale io Zezeroma la; a loaa iho la oia ia laua maluna o kona wahi moe, ua mai a nawaliwali loa me ka mai kuni wela; a ua eha loa no hoi kona naau, no kona mau hewa; a ia ia i ike ai ia laua, o mai la oia i kona lima, a noi mai la ia laua na laua e hoola mai ia ia.

6 [m 10, p 14] A eia kekahi, i aku la o Alama ia ia, e lalau ana ia ia ma ka lima, Ke manaoio nei anei oe i ka mana o Kristo i ka hoolaia’na?

7 A olelo mai la oia, a i mai la, Ae, ke manaoio nei au i na olelo a pau au i ao mai ai.

8 A i aku la o Alama ia ia, Ina e manaoio ana oe ma ka hoolapanai ana o Kristo, ua hiki ia oe ka hoolaia.

9 A i mai la oia, Ae, ke manaoio nei au e like me kau mau olelo.

10 Alaila, kahea aku la o Alama i ka Haku, i ka i ana, E ka Haku, ko makou Akua, e aloha mai i keia kanaka, a e hoola mai ia ia e like me kona manaoio iloko o Kristo.

11 A ia Alama i olelo aku ai i ua mau olelo nei, lele ae la o Zezeroma ma kona mau wawae, a hoomaka ae la e hele; a ua hanaia keia mea me ke kahaha nui o na kanaka a pau; a kui aku la ka ike o keia mea mawaena o ka aina o Sidoma a puni.

12 A bapetizo aku la o Alama ia Zezeroma i ka Haku; a hoomaka ae la oia ma ia hope aku e hai olelo aku i na kanaka.

13 A kukulu iho la o Alama i kahi ekalesia ma ka aina o Sidoma, a hoolaa iho la i na kahuna a me na kumu ma ka aina, e bapetizo aku i ka Haku i na mea e makemake ana e bapetizoia.

14 [m 10, p 15] A eia kekahi, ua nui loa lakou; no ka mea, hele paapu mai la lakou mai na wahi a pau e kokoke ana ma Sidoma, a ua bapetizoia;

15 Aka o na kanaka e noho ana ma ka aina o Amoniha, ua noho mau lakou ia manawa he poe naau paakiki a ai oolea; aole lakou i mihi i ko lakou hewa, e manao ana no ka diabolo ka mana a pau o Alama laua me Amuleka: no ka mea, no ka aoao o Nehora lakou, a, aole i manaoio i ka mihi ana no ko lakou mau hewa.

16 [m 10, p 16] A eia kekahi, o Alama laua me Amuleka, ua haalele o Amuleka i kona gula a pau, a me ke kala, a me kona mau mea maikai, iloko o ka aina o Amoniha, no ka olelo a ke Akua, ua hookaeia oia e kekahi poe, he poe makamaka lakou nona mamua, a e kona makuakane a me kona hanauna no hoi;

17 Nolaila, mahope iho o ko alama kukulu ana i ka ekalesia ma Sidoma, ua ike i ka oki nui ana, he oiaio, e ike ana ua oki na kanaka ma ka haaheo o ko lakou mau naau, a i hoomaka ae e hoohaahaa ia lakou iho imua o ke Akua, a i hoomaka ae e hoakoakoa ia lakou iho ma ko lakou mau hale laa e hoomana akku i ke Akua imua o ke kuahu, e makaala ana a e pule mau ana, e hiki ia lakou ke hoopakeleia mai mai o Satana aku, a mai ka make aku, a mai ka luku aku.

18 Ano, me a’u i i aku ai, ua ike o Alama i keia mau mea a pau, nolaila, lawe oia ia Amuleka a hele aku la i ka aina o Zarahemela, a lawe ia ia i kona hale iho, a lawelawe ae la ia, ia ma kona mau pilikia, a hooikaika iho la ia ia iloko o ka Haku.

19 A pela i pau ai ka makahiki umi o ke au o na Lunakanawai maluna iho o ka poe kanaka o Nepai.

MOKUNA 16

1 [mokuna 11, paukū 1] A eia kekahi, ma ka makahiki umikumamakahi o ke au o na Lunakanawai maluna iho o ka poe kanaka o Nepai, ma ka le elima o ka lua o ka malama, ua nui ka malu mamua o kela la ma ka aina o Zarahemela; aole kekahi kaua aole hoi paio no kekahi mau makahiki; a hiki aku i ka la elima o ka lua o ka malama, ma ka makahiki umikumamakahi, ua lohea ka hooho o ke kaua mawaena o ka aina;

2 No ka mea, aia hoi, ua hiki mai ka poe koa o ko Lamana poe ma ka aoao waonahele, iloko o na palena o ka aina, iloko hoi o ke kulanakauhale o Amoniha, a hoomaka ae la e pepehi i na kanaka, a e anai i ke kulanakauhale.

3 [m 11, p 2] Ano, eia kekahi, mamua o ka wa i hiki ai i ko Nepai ke loaa ka poe koa a lawa e hooauhee aku ia lakou mawaho o ka aina, ua luku e aku la lakou i na kanaka iloko o ke kulanakauhale o Amoniha, a i kekahi poe hoi e kokoke ana ma na palena o Noa, a ua lawe pio aku i kekahi poe e ae iloko o ka waonahele.

4 [m 11, p 3] Ano, eia kekahi, ua makemake ko Nepai poe e loaa ka poe i lawe pio ia’ku iloko o ka waonahele;

5 Nolaila, o ka mea i waeia i alii koa nui maluna o ka poe koa o ko Nepai poe, (a o Zorama kona inoa, a elua ana mau keikikane, o Lehi laua me Aha:) Ano, o Zorama a me na keiki ana elua, ua ike no o Alama no ke Kahuna Nui maluna iho o ka ekalesia, a ua lohe ia ia ka Uhane o ka wanana, nolaila, hele mai la lakou io na la a noi mai la ia ia e ike, ina e makemake ana ka Haku e hele aku lakou iloko o ka waonahele e imi i ko lakou poe hoahanau, ka poe i lawe pio ia aku e ko Lamana poe.

6 [m 11, p 4] A eia kekahi, ninau aku la o Alama i ka Haku no ia mea. A hoi aku la o Alama a i aku la ia lakou, Aia hoi, e hele ae ko Lamana poe i kela kapa o ka muliwai Sidona ma ka waonahele hema, ma o aku o na palena o ka aina o Manati. A, aia hoi, malaila oukou e halawai pu ai me lakou, ma ka hikina o ka muliwai Sidona, a malaila e haawi mai ka Haku ia oe i kou poe hoahanau, ka poe i lawe pio ia’ku e ko Lamana poe.

7 [m 11, p 5] A eia kekahi, hele ae la o Zorama a me kana mau keiki i kela kapa o ka muliwai Sidona, me ko lakou poe koa, a haele aku la ma o aku o na palena o Manati, iloko o ka waonahele hema, aia no ma ke kapa hikina o ka muliwai o Sidona.

8 A lele aku la lakou maluna iho o ka poe koa o ko Lamana poe, a ua hoopuehuia’ku ko Lamana poe a hooauheeia’ku iloko o ka waonahele; a lawe aku la lakou i ko lakou poe hoahanau, ka poe i lawe pio ia’ku e ko Lamana poe, aole kekahi mea o lakou i lilo o ka poe i lawe pio ia. A ua laweia mai lakou e ko lakou poe hoahanau e noho ma ko lakou mau aina ponoi.

9 A pela i pau ai ka makahiki umikumamakahi o na Lunakanawai, ua hooauheeia’ku ko Lamana poe iwaho o ka aina, a ua lukuia’e ka poe kanaka o Amoniha; he oiaio, ua lukuia kela mea ola keia mea ola o ko Amoniha, a me ko lakou kulanakauhale nui, a lakou i i mai ai ua hiki ole i ke Akua ke anai mai, no ka nui ona.

10 Aka hoi! ma ka la hookahi ua waiho neoneo ia ia; a ua haehaeia na heana e na ilio a me na holoholona hihiu o ka waonahele;

11 Aka hoi, mahope iho o kekahi mau la he nui, ua hoahuia na kino make o lakou maluna iho o ka ili o ka honua, a ua uhiia lakou me ka lepo papau. A no ka nui o ka pilau o lakou, aole i hele aku na kanaka e noho ma ka aina o Amoniha no na makahiki he nui wale. A ua kapaia ia ka neoneo o ko Nehora poe; no ka mea, no ka aoao o Nehora lakou, ka poe i pepehiia; a waiho neoneo ia iho la na aina o lakou.

12 A, aole i hele hou mai ko Lamana poe e kaua ku e mai i ko Nepai poe, a hiki aku i ka makahiki umikumamaha o ke au o na Lunakanawai maluna iho o ka poe kanaka o Nepai. A pela no ma na makahiki ekolu i loaa’i ka poe kanaka o Nepai ka malu mau ma ka aina a pau.

13 [m 11, p 6] A hele aku la o Alama laua me Amuleka e hai ana i ka mihi i na kanaka iloko o ko lakou mau luakini, a iloko o ko lakou mau hale laa, a iloko o ko lakou mau hale halawai, i kukuluia’i mamuli o ke ano o ko ka poe Iudaio.

14 A o ka poe a pau i hoolohe mai i ka laua olelo, ua haawi mau aku laua ia lakou i ka olelo a ke Akua, me ka manao ole i ko ke kanaka helehelena.

15 A pela i hele aku ai o Alama laua me Amuleka, a me na mea e ae no hoi he nui wale, he poe i waeia no ka oihana, e hai aku i ka olelo mawaena o ka aina a puni. A o ke kukuluia’na o ka ekalesia ua lilo ia i mea laha mawaena o ka aina, ma na wahi a puni, mawaena o ko Nepai poe.

16 [m 11, p 7] Aole he noho like ole ana mawaena o lakou, ninini mai la ka Haku i kona Uhane maluna iho o ka ili a pau o ka aina, e hoomakaukau mai i na hoomaopopo o na keiki a kanaka, a e hoomakaukau mai i na naau o lakou e hookipa i ka olelo e aoia’i auanei mawaena o lakou i ka wa o kona hiki ana mai,

17 I hoopaakiki ole ia’i lakou e ku e i kana olelo, i hoomaloka ole ai lakou, a hele aku i ka make, aka i hiki ia lakou ke hookipa i ka olelo me ka olioli, a me he lala la e pakuiia iloko o ke kumuwaina oiaio, e hiki ia lakou ke komo iloko o ka maha o ka Haku, ko lakou Akua.

18 [m 11, p 8] Ano, hai olelo aku la, ua poe kahuna la, ka poe i hele aku mawaena o na kanaka, me ke ku e aku i na wahahee ana, a me na hoopunipuni ana, a me na paonioni ana, a me na paio ana, a me ka hoomauhala, a me na hoino ana, a me ka aihue ana, powa ana, hao ana, pepehi kanaka ana, moe kolohe ana, a me kela ano keia ano o ka makaleho a pau, e hea ana aole no ua mau mea nei e pono ai;

19 E hoike ana i na mea e hiki koke mai ana; he oiaio, e hoike ana i ka hiki mai ana o ke Keiki a ke Akua, i kona mau eha a make, a me ke alahouana no hoi o ka poe make.

20 A ninau mai la kekahi poe he nui o na kanaka no ka wahi a ke Keiki a ke Akua e hele mai ai; a ua aoia mai lakou nana e hoike mai ia ia iho ia lakou mahope iho o kona alahouana; a lohe iho la na kanaka i keia mea me ka olioli a hauoli nui.

21 Ano, mahope iho o ke kukuluia’na o ka ekalesia mawaena o ka aina a puni, a ua loaa ka lanakila maluna iho o ka diabolo, a ua haiia ka olelo a ke Akua ma kona maemae ma ka aina a puni, a e ninini mai ana ka Haku i na mea e pomaikai ai ona maluna iho o na kanaka; pela i pau ai ka makahiki umikumamaha o ke au o na Lunakanawai, maluna iho o ka poe kanaka o Nepai.

He mooolelo o na keiki a Mosia, ka poe i hoole ai i ko lakou mau pono ma ke aupuni, no ka olelo a ke Akua, a pii aku la i ka aina o Nepai, e hai olelo aku i ko Lamana poe. No na eha a me ka hoopakeleia’na o lakou, e like me ka mooolelo a Alama.

Mai ka mokuna 17 a hiki i ka 26.

MOKUNA 17

1 [mokuna 12, paukū 1] Ano, eia kekahi, i ko Alama hele ana mai ka aina o Gideona aku i ka hema, i ka aina o Manati, aia hoi! me ka pihoihoi nui ona, halawai aku la oia me na keiki a Mosia, e hele ana i ka aina o Zarahemela.

2 Ano, me Alama pu mai ua poe keiki nei a Mosia i ka wa i ike mua ia ka anela e ia; nolaila, hauoli nui loa iho la o Alama, e ike i kona mau hoahanau; a o ka mea i hoonui aku ai i kona hauoli, o lakou no kona mau hoahanau iloko o ka Haku i keia manawa hoi, he oiaio, a ua mahuahua ikaika ma ka ike i ka oiaio; no ka mea, he mau kanaka me ka hoomaopopo kupono lakou, a imi molowa ole lakou i na palapala hemolele, i hiki ia lakou ke ike i ka olelo a ke Akua.

3 Aka aole o keia mau mea wale no: ua hoolilo lakou ia lakou iho i ka pule nui, a i ka hooke ai ana, nolaila, ia lakou ka Uhane o ka wanana, a me ka Uhane o ka hoikeana, a i ka wa a lakou e ao aku ai, ao aku lakou me ka ikaika a me ka mana o ke Akua.

4 A ua ao aku lakou i ka olelo a ke Akua no na makahiki he umikumamaha, mawaena o ko Lamana poe, a ua loaa ka pomaikai nui ma ka lawe ana i na mea he nui loa i ka ike i ka oiaio; ma ka mana o ka lakou mau olelo, ua nui loa ka poe i laweia imua o ke kuahu o ke Akua, e kahea aku i kona inoa, a e hai aku i ko lakou mau hewa imua ona.

5 Ano, eia na mea i pili pu me lakou ma ko lakou hele ana, no ka mea, ua loaa ia lakou na pilikia he nui wale; ua hoopilikia nui loa ia lakou, ma ke kino a ma ka naau hoi; me ka pololi, a me ka makewai a luhi, a me ka hana nui hoi ma ka uhane.

6 Ano, eia ko lakou hele ana: Ua haalele iho i ko lakou makuakane ia Mosia, ma ka makahiki mua o ke au o na Lunakanawai; ua hoole aku i ke aupuni a ko lakou makuakane i makemake ai e hooili mai maluna o lakou; a o ka manao no hoi keia o na kanaka;

7 Haalele iho la nae lakou i ka aina o Zarahemela, a lawe aku la i ka lakou mau pahikaua, a me ka lakou mau ihe; a me ka lakou mau kakaka, a me ka lakou mau pua, a me ka lakou mau maa; a o keia mau mea ka lakou i hana’i i hiki ia lakou ke hoomakaukau i ai na lakou iho, oiai ma ka woanahele,

8 A pela lakou i hele aku ai iloko o ka waonahele me ka poe a lakou i wae aku ai, e pii pu aku i ka aina o Nepai, e hai aku i ka olelo a ke Akua i ko Lamana poe.

9 [m 12, p 2] A eia kekahi, haele aku la lakou i na la he nui wale ma ka waonahele, a hooke ai nui loa aku la lakou, i haawi mai ai ka Haku ia lakou i kona Uhane e hele pu me lakou, a e noho pu me lakou, i hiki ia lakou ke lilo i mea hana ma ka lima o ke Akua, e lawe mai, ina he mea hiki ia, i ko lakou poe hoahanau, i ko Lamana poe, i ka ike i ka oiaio; i ka ike i ka ino o na mooolelo o ko lakou poe kupuna, he pololei ole ia mau mea.

10 [m 12, p 3] A eia kekahi, hoalauna mai la ka Haku ia lakou me kona Uhane, a i mai la ia lakou, E hooluoluia; a ua hooluoluia lakou.

11 A i mai la ka Haku ia lakou no hoi, E hele aku mawaena o ko Lamana poe, kou poe hoahanau, a e hookupaa aku i ka’u olelo; aka e ahonui oe ma ka hoomanawanui a me na popilikia, e hiki ia oe ke hoike aku i na kumu hoohalike maikai ia lakou iloko o’u, a e hoolilo aku au ia oe i mea hana ma ko’u mau lima, i ka hoola ana i na uhane he nui wale.

12 [m 12, p 4] A eia kekahi, loaa iho la i na naau o na keikikane a Mosia, a me ka poe a pau no hoi i hele pu me lakou, ka ikaika e hele aku i ko Lamana poe, e hai aku ia lakou i ka olelo a ke Akua.

13 A eia kekahi, ia lakou i hiki ai ma na palena o ka aina o ko Lamana poe, hookaawale aku la lakou ia lakou iho, a haalele aku la kekahi i kekahi, e paulele ana i ka Haku e halawai pu hou ma ka hopena o ko lakou ohi ana: no ka mea, manao iho la lakou ua nui ka hana a lakou i hoomaka’i.

14 A he oiaio iho la ua nui loa io no ia, no ka mea, ua hoomaka lakou e hai aku i ka olelo a ke Akua i kekahi luhuikanaka hihiu, paakiki, a hae; he lahuikanaka e hauoli ana i ka pepehi ana i ko Nepai poe, a i ka powa ana, a hao wale ana ia lakou; a ua kauia na naau o lakou maluna o ka waiwai, oia maluna iho o ke gula a me ke kala, a me na pohaku maikai; imi iho la nae lakou e loaa ua mau mea nei ma ka pepehi kanaka ana a ma ka hao wale ana, i hana ole ai lakou no ua mau mea la me ko lakou mau lima ponoi:

15 A pela iho la he poe kanaka palaualelo loa lakou, a ua nui wale ka poe o lakou i hoomana’i i na kii, a ua haule mai ka hoomainoino o ke Akua maluna iho o lakou no na mooolelo o ko lakou poe kupuna; aka hoi, ua o ia mai nae na olelo hoopomaikai a ka Haku ia lakou, ina lakou e mihi;

16 Nolaila, no keia mea ua hoomaka na keiki a Mosia i ka hana, e hiki paha ia lakou ke lawe mai ia lakou la i ka mihi: e hiki paha ia lakou ke lawe mai ia lakou la e ike i ke kumumanao hoolapanai;

17 Nolaila, hookaawale iho la lakou ia lakou iho kekahi mai kekahi ae, a hele aku la mawaena o lakou la, o kela kanaka keia kanaka oia wale no, e like me ka olelo a me ka mana o ke Akua, i haawiia mai ai ia ia.

18 [m 12, p 5] Ano, o Amona oia no ke pookela mawaena o lakou, a oia no ka i lawelawe ia lakou; a haalele iho la oia ia lakou, mahope iho o kona hoopomaikai ana ia lakou e like me ko lakou mau wahi i ku ai, a ua haawi aku i ka olelo a ke Akua ia lakou, a lawelawe aku la ia lakou mamua o kona hele ana; a pela lakou i hele aku ai i ko lakou hele ana iho mawaena o ka aina.

19 A hele aku la o Amona i ka aina o Isemaela, ua kapaia ka aina mamuli o na keikikane a Isemaela, o lakou no hoi ka i lilo o ko Lamana poe.

20 A me Amona i komo ai i ka aina o Isemaela, hopu mai la ko Lamana poe ia ia a nakinaki ia ia, me lakou i maa ai, i nakinaki ai i ko Nepai poe a pau, ka poe i haule iloko o ko lakou mau lima, a kaikai aku ia lakou a pau imua o ke Alii; a pela i waihoia’i i ka makemake o ke Alii e pepehi ia lakou, a i ole ia, e hoopaa aku ia lakou iloko o ka noho pio ana, a i ole ia, e hoolei aku ia lakou iloko o ka halepaahao, a i ole ia, e hoolei aku ia lakou mawaho o kona aina, e like me kona makemake a me ka lealea;

21 A pela o Amona i kaikaiia’ku ai imua o ke Alii, oia no maluna iho o ka aina o Isemaela; a o Lamoni no kona inoa; a he mamo oia na Isemaela.

22 A ninau mai la ke Alii ia Amona, Ina o kona makemake anei ia, e noho ai ma ka aina mawaena o ko Lamana poe, mawaena o kona poe kanaka?

23 A i aku la o Amona ia ia, Ae, ke makemake nei au e noho mawaena o keia poe kanaka i kekahi manawa; he oiaio, a hiki aku paha i ka la a’u e make ai.

24 [m 12, p 6] A eia kekahi, ua lealea nui ke Alii Lamoni me Amona, a kauoha aku la ia e hookuuia na mea paa ona; a ua makemake oia ia Amona e lawe mai i kekahi o kana mau kaikamahine i wahine nana.

25 Aka, i aku la o Amona ia ia, Aole, aka e lilo au i kauwa nau; nolaila, lilo iho la o Amona i kauwa na ke Alii Lamoni. A eia kekahi, ua hoonohoia oia, mawaena o kekahi poe kauwa e ae, e kiai aku i na pua holoholona o Lamoni, e like me ka aoao o ko Lamana poe.

26 A ia ia ma ka hana a ke Alii i na la ekolu, i kona hele ana’e me na kauwa o ko Lamana poe, me na pua o lakou, i kahi o ka wai, oia ka i kapaia ka wai o Sebusa; (a e hoa ana ko Lamana poe a pau i na pua o lakou ia nei, i loaa’i ia lakou ka wai;)

27 Nolaila, me Amona a me na kauwa a ke Alii i hoa aku ai i na pua o lakou i ua wahi nei o ka wai, aia hoi, ku iho la kekahi poe o ko Lamana poe, ka poe i hele aku me na pua o lakou i ka wai, a hoopuehu ae la i na pua o Amona, a o na kauwa a ke Alii, a hoopuehu ae la lakou la ia lakou, a noholo aku la lakou i na wahi he nui.

28 [m 12, p 7] Ano, hoomaka iho la na kauwa a ke Alii e ohumu, i ka i ana, Ano, e pepehi mai no ke Alii ia kakou, me kana i ko kakou poe hoahanau, no ka hoopuehuia’na o na pua o lakou e ka hana hewa a keia poe kanaka.A hoomaka ae la lakou e uwe nui loa iho la, i ka i ana, Aia hoi, ua hoopuehuia’ku na pua o kakou ano la.

29 Ano, uwe iho la lakou no ko lakou makau i ka pepehiia mai. Ano, ia Amona i ike ai i keia mea, ua pehu kona naau iloko ona, me ka hauole; no ka mea, wahi ana, e hoike aku no au i kuu mana i keia poe, ko’u poe hoakauwa, a i ka mana no iloko o’u, i ka hoihoi hou ana i keia mau pua i ke Alii, e hiki ia’u ke loaa na naau o ua poe nei, o ko’u poe hoakauwa, e hiki ua’u ke alakai mai ia lakou e manaoio mai i ka’u mau olelo.

30 Ano, oia no na manao o Amona, ia ia i ike ai i na pilikia o ka poe ana i kapa ai he poe hoahanau nona.

31 [m 12, p 8] A eia kekahi, hoolana aku la oia ia lakou ma kana mau olelo, me ka i ana, E ko’u poe hoahanau, e hoolana maikai a e hele aku kakou e imi i na pua, e houluulu mai kakou ia lakou, a e hoihoi hou mai i kahi o ka wai; a pela kakou e hoola i na pua no ke Alii, a aole aoia e pepehi mai ia kakou.

32 A eia kekahi, haele aku la lakou e imi i na pua, a hahai mai la lakou ia Amona, a holo kiki aku la lakou, a hoopuni iho la i na pua o ke Alii, a houluulu hou mai la, i kaho o ka wai.

33 A ku hou iho la ua poe kanaka la e hoopuehu mai i na pua o lakou; aka i aku la o amona i kona poe hoahanau, E, e hoopuni oukou i na pua a puni i auhee ole aku ai lakou; a e hele au a e paio aku ma ua poe kanaka nei, ka poe i hoopuehu mai nei i na pua o kakaou.

34 Nolaila, hana iho la lakou me amona i kauoha aku ai ia lakou, a hele aku la ia a ku iho la e paio aku me ua poe la, ka poe i ku ma na wai o Sebusa; aole he kakaikahi lakou ma ka helu;

35 Nolaila, aole lakou i makau ia Amona, no ka mea, ua kuhi lakou ua hiki i kakahi o ko lakou poe kanaka ke pepehi ia ia, e like me ko lakou makemake, no ka mea, aole lakou i ike ua olelo paa mai ka Haku ia Mosia, nana e hoopakele ai i kana mau keiki mailoko mai o ko lakou mau lima; aole hoi lakou i ike i kekahi mea no ka Haku; nolaila, ua hauoli lakou ma ka lukuia’na o ko lakou poe hoahanau; a no keia mea ku iho la lakou e hoopuehu aku i na pua o ke Alii.

36 [m 12, p 9] Aka, ku iho la o Amona a hoomaka ae la e nou aku i na pohaku ia lakou me kona maa; he oiaio, me ka mana ikaika oia i maa aku ai i na pohaku mawaena o lakou: a pela oia i pepehi aku ai i kekahi poe o lakou, a hoomaka ae la lakou e kahaha ma kona mana; aka hoi, ua huhu lakou no ka poe make o ko lakou poe hoahanau, a ua paa ko lakou manao e haule oia; nolaila, e ike ana ua hiki ole ia lakou ke paa oia me ko lakou mau pohaku, hele mai la lakou me na newa e pephi mai ia ia.

37 Aka, o kela kanaka keia kanaka nana i hoaka ae i kona newa e pepehi mai ia Amona, ooki aku la oia i ko lakou mau lima me kana pahikaua; no ka mea, pale aku la oia i ko lakou hahau ana ma ka hahau ana i ko lakou mau lima me ka maka o kana pahikaua, a hoomaka lakou e hakaka, a hoomaka ae la e auhee aku imua ona; he oiaio, aole hoi he kakaikahi o lakou; a nana i hooauhee aku ia lakou ma ka ikaika o kona lima.

38 Ano, ua haule eono o lakou i ka maa, aole oia i pepehi loa i kekahi i ko lakou luna wale no, me kana pahikaua; a ooki aku la oia i na lima a pau o lakou i hoaka ku e mai ia ia, aole o lakou kakaikahi.

39 A ia ia i hooauhee aku ai ia lakou a mamao aku, hoi aku la oia, a hoohainu iho la lakou i na pua o lakou a hoihoi hou aku ia lakou i ke kula o ke Alii, alaila, haele aku la iloko i ke Alii la, e hali ana i na lima i ookiia’ku ai i ka pahikaua a Amona, o ka poe i imi e pepehi mai ia ia; a ua haliia lakou iloko i ke Alii la, i mea hoike no na mea a lakou i hana’i.

MOKUNA 18

1 [mokuna 12, paukū 10] A eia kekahi, kauoha aku la ke Alii Lamoni i kana poe kauwa e ku mai, a e hoike mai no na mea a pau a lakou i ike ai no ia mea.

2 A ia lakou a pau i hoike aku ai no na mea a lakou i ike ai, a ua ike oia i ka malama pono ana o Amona ma ka hoola ana i na pua ona, a no kona mana nui hoi i kona paio ku e aku ana i ua poe la, ka poe i imi e pepehi mai ia, ia, ua kahaha nui loa oia, a i ae la, He oiaio ae la, ua nui ae oia nei mamua o ke kanaka. Aia hoi, aole anei keia ka Uhane Nui nana i hoouna mai i na hoopai nui me neia maluna iho o keia poe kanaka, no ko lakou pepehi kanaka ana?

3 A pane aku la lakou i ke Alii, a i aku la, Ina paha oia ka Uhane Nui, ina paha he kanaka, aole o makou i ike; eia ka makou i ike ai, aole e hiki ia ia ke pepehiia mai e na enemi o ke Alii; aole hoi e hiki ia lakou ke hoopuehu mai i na pua o ke Alii ia ia e hele pu ai me makou, no kona akamai a ikaika nui; nolaila, ua ike makou he hoaaloha oia no ke Alii. Ano, e ke Alii, aole o makou i manaoio na kekahi kanaka ka mana me neia, no ka mea, ua ike makou aole e hiki ia ia ke pepehiia mai.

4 A, ano, i ka wa a ke Alii i lohe ai i ua mau olelo nei, i ae la oia ia lakou, Ano, ke ike nei au oia no ka Uhane Nui; a ua iho iho nei oia i keia manawa e hoola mai i ko oukou mau ole, i pepehi ole aku ai au ia oukou me au i ko oukou poe hoahanau. Ano, o keia no ka Uhane Nui nona i olelo mai ai ko kakou poe kupuna.

5 Ano, oia ka mooolelo o Lamoni, ana i loaa’i mai kona makua mai, aia no he Uhane Nui. Me ko lakou manaoio i kahi Uhane Nui, ua manao iho la nae lakou o ka mea a lakou i hana’i, he pololei ia; aka hoi, hoomaka iho la o Lamoni e makau nui loa, me ka makau no ka manao ua hana hewa paha ia i ka pepehi ana i kana poe kauwa:

6 No ka mea, ua pepehi iho i na mea he nui o lakou, no ka hoopuehu ana o ko lakou poe hoahanau i na pua o lakou ma kahi o ka wai; a pela ae la no ka hoopuehuia’na o na pua o lakou, ua pepehiia iho la lakou.

7 Ano, he mea mau ma ko Lamana poe, e ku ma na wai o Sebusa, e hoopuehu aku i na pua o kanaka, i hiki ia lakou ke hoa aku i kekahi pue he nui i hoopuehuia’i, i ko lakou aina iho, he hana ia e powa ai mawaena o lakou.

8 [m 12, p 11] A eia kekahi, ninau ae la ke Alii Lamoni i kana poe kauwa, i ka i ana, Ai la ihea ua kanaka nei nona keia mana nui?

9 A i aku la lakou ia ia, Aia hoi, e hanai ana oia i kou mau lio. ano, ua kauoha e mai la ke Alii i kana poe kauwa mamua aku o ka wa i hooinu ai i na pua o lakou, na lakou e hoomakaukau i kona mau lio a mau hale kaa, a e alakai aku ia ia i ka aina o Nepai: no ka mea, ua kukalaia he ahaaina nui ma ka aina o Nepai, e ka makuakane o Lamoni, oia no ke Alii maluna iho o ka aina a pau.

10 Ano, i ke Alii Lamoni i lohe ai e hoomakaukau ana o Amona i kona mau lio a me kona mau halekaa, ua pihoihoi nui loa ae oia, no ka malama pono o Amona, i ka i ana, He oiaio, aole kekahi kauwa mawaena o ka’u poe kauwa a pau, nana i malama pono me keia kanaka; no ka mea, ke hoomanao nei oia i ka’u mau kauoha a pau e hana aku ia mau mea.

11 Ano, ke ike lea nei au o keia no ka Uhane Nui; a ua makemake ai ia ia e komo mai iloko io’u nei, aka ke aa ole nei au.

12 [m 12, p 12] A eia kekahi, ia Amona i hoomakaukau ai i na lio a i na halekaa no ke Alii a me kana poe kauwa, hele aku la ia iloko i ke Alii la, a ike aku la oia ua ano e ae la ka helehelena o ke Alii; nolaila, ua kokoke oia e hoi aku mai kona alo aku;

13 A i mai la kekahi o ka ke Alii poe kauwa ia ia, E Rabana, oia ma ka hoohalike ana, e ke Alii nui a mana, e manao ana i ko lakou poe Alii, he poe mana; a pela oia i i mai ai ia ia, E Rabana, ke makemake nei ke Alii ia oe e kali;

14 Nolaila, huli ae la o Amona ia ia iho i ke Alii, a i aku la ia ia, Heaha la kou makemake i hana aku ai au nou, e ke Alii? A aole o ke Alii ekemu mai ia ia i hookahi hora ka loihi, mamuli o ko lakou manawa, no ka mea, aole oia i ike i kana mea e olelo mai ai ia ia.

15 A i hou aku la o Amona ia ia, Heaha kou makemake ia’u? A ekemu ole mai ke Alii ia ia.

16 [m 12, p 13] A eia kekahi, o Amona ua hoopihaia mai me ka Uhane o ke Akua, nolaila, ike iho la oia i na manao o ke Alii. A i aku la oia ia ia, No kou lohe ana anei na’u i paku aku ai i kau poe kauwa a me kou mau pua, a pepehi aku la i ehiku o ko lakou poe hoahanau me ka maa, a me ka pahikaua, a ooki aku la i na lima o na mea e ae, i hiki ke hoomalu i kou mau pua a i kau mau kauwa; aia hoi, o keia anei ke kumu o kou kahaha ana?

17 Ke i aku nei au ia oe, Heaha la ia, i nui ai kou kahaha ana me neia? Aia hoi, he kanaka no au, a o kau kauwa no; nolaila, o ka mea au e makemake mai i pololei, oia ka’u e hana’i.

18 Ano, i ke Alii i lohe ai i keia mau olelo, kahaha hou iho la oia, no ka mea, ike ae la oia ua hiki ia Amona ke hoomaopopo mai i kona mau manao; aka, me keia nae, oaka mai la ke Alii Lamoni i kona waha; a i mai la ia ia, Owai la oe? O kela Uhane Nui anei oe, nana i ike i na mea a pau?

19 Olelo aku la o Amona a i aku la ia ia, Aole ia owau.

20 A i mai la ke Alii, Pehea la oi i ike mai ai i na manao o ko’u naau? Ua hiki ia oe ke olelo wiwo ole mai, a ke hai mai no ua mau mea nei; a e hai mai no hoi, ma ka mana hea oe i pepehi aku ai a i ooki aku ai i na lima o ko’u poe hoahanau, ka poe i hoopuehu mai ai i na pua o’u.

21 Ano, ina e hai mai oe ia’u no ua mau mea nei, o ka mea au i makemake mai ai, oia ka’u e haawi aku ai ia oe; a ina e makemakeia ia, e hoomalu au ia oe me ko’u poe koa; aka, ua ike au ua nui loa aku kou mana mamua o lakou a pau: aka hoi, o ka mea au e makemake mai ai ia’u, na’u ia e haawi aku ia oe.

22 Ano, ua naauao o Amona, a kolohe ole nae, i aku la oia ia Lamoni, E hoolohe mai anei oe i ka’u mau olelo, ina e hai aku au ia oe, i ke ano o ka mana a’u i hana aku ai i ua mau mea nei? A o keia no ka mea a’u i makemake ai ia oe.

23 A olelo mai la ke Alii ia ia, a i mai la, Ae, e manaoio no au i kau mau olelo a pau; a pela oia i puni ai i ke akamai.

24 A hoomaka ae la o Amona e olelo aku ia ia me ka wiwo ole, a i aku la ia ia, Ke manaoio nei anei oe aia no he Akua?

25 A olelo mai la ia, a i mai la ia ia, Aole au i ike i ke ano o ia mea.

26 [m 12, p 14] A alaila, i aku la o Amona, Ke manaoio nei anei oe aia no he Uhane Nui?

27 A i mai la oia, Ae.

28 A i aku la o Amona, Oia no ke Akua. A i hou aku la o Amona ia ia, Ke manaoio nei anei oe na ua Uhane Nui nei, oia no hoi ke Akua, i hana mai ai i na mea a pau, iloko o ka lani a iloko o ka honua?

29 A i mai la oia, Ae, ke manaoio nei au nana i hana mai i na mea a pau iloko o ka honua; aka aole au i ike i na lani.

30 A i aku la o Amona ia ia, O na lani oia kahi a ke Akua i noho ai, a me kona poe anela hemolele a pau.

31 A i mai la ke Alii Lamoni, aia anei ia maluna o ka honua?

32 A i aku la o Amona, Ae, a ke nana mai la oia ilalo nei maluna o na keiki a pau a kanaka; a ua ike oia i na manao a me na makemake a pau o ka naau: no ka mea, ma kona lima i hanaia’i lakou a pau, mai kinohi mai.

33 A i mai la ke Alii Lamoni, Ke manaoio nei au i keia mau mea a pau au i olelo mai ai. Ua hoounaia mai anei oe mai ke Akua mai?

34 I aku la o Amona ia ia, He kanaka no au; a ua hanaia mai ke kanaka i kinohi, mamuli o ke ano like o ke Akua, a ua kaheaia mai au e kona Uhane Hemolele e ao aku i ua mau mea nei i keia poe kanaka, e laweia mai lakou e ike i ka mea i pololei a oiaio;

35 A ke noho nei kekahi hapa o ua Uhane la iloko o’u, e haawi mai ana ia’u i ka ike, a i ka mana hoi, e like me ko’u manaoio a me na makemake iloko o ke Akua.

36 Ano ia Amona i olelo aku ai i ua mau olelo nei, hoomaka ae la oia ma ka hanaia’na o ke ao nei, a me ka hanaia’na hoi o Adamu, a hai aku la ia ia i na mea a pau no ka haule ana o kanaka, a hai aku la a waiho ae la imua ona i na mooolelo a me na palapala hemolele o ka poe kanaka, i oleloia’i e na kaula, a hiki aku i ka wa a ko lakou kupunakane o Lehi i haalele aku ai ia Ierusalema;

37 A hai aku la no hoi oia ia lakou (no ka mea, i ke Alii a i kana poe kauwa ia olelo,) i na holoholo ana a pau o ko lakou poe kupuna ma ka waonahele, a me ko lakou mau pilikia a pau me ka pololi a makewai, a me ko lakou hele, a ia mea aku ia mea aku:

38 A hai aku la no hoi oia ia lakou no na kipi ana o Lamana laua me Lemuela, a me na keikikane a Isemaela, he oiaio, o ko lakou kipi ana a pau oia kana i hai aku ai ia lakou; a hoomaopopo aku la oia i na mooolelo a me na palapala hemolele a pau, mai ka manawa a Lehi i haalele aku ai ia Ierusalema, a hiki aku i keia manawa;

39 Aka, aole o keia wale no; no ka mea, hoomaopopo aku la oia ia lakou i ke kumumanao hoolapanai, i hoomakaukauia’i mai ka hookumuia’na mai o ke ao nei; a hoike mai la no hoi oia ia lakou no ka hiki ana mai o Kristo; a o na hana a pau a ka Haku kana i hoike aku ai ia lakou.

40 [m 12, p 15] A eia kekahi, mahope iho kana olelo ana aku i ua mau mea nei a pau, a wehewehe aku la i ke Alii, ua manoio iho la ke Alii i kana mau olelo a pau.

41 A hoomaka aku la oia e kahea aku i ka Haku, i ka i ana: E ka Haku, e aloha mai oe; e like me kou aloha nui loa au i aloha mai ai i ka poe kanaka o Nepai, pela e aloha mai ai ia’u a me ko’u poe kanaka.

42 Ano, ia ia i olelo mai ai i keia, haule iho la oia i ka honua, me he mea la ua make oia.

43 A eia kekahi, lalau iho la na kauwa ana ia ia a halihali aku la iloko o kana wahine la, a waiho iho la ia ia ma kekahi wahi moe; a moe iho la oia me he mea la ua make oia, no na la elua a me na po elua; a uwe iho la kana wahine, a me kana mau keikikane, a me kana mau kaikamahine maluna iho ona, mamuli o ke ano o ko Lamana poe, e kanikau nui ana no kona make.

MOKUNA 19

1 [mokuna 12, paukū 16] A eia kekahi, mahope iho o na la elua a me na po elua, ua kokoke lakou e lawe aku i kona kino a e waiho aku ia ia iloko o kahi halekupapau a lakou i hana’i no ke kanuia’na o na mea make o lakou.

2 Ano, ua lohe ke Aliiwahine i ke kaulana o Amona, nolaila, hoouna mai la oia a makemake ia ia e hele aku io na la.

3 A eia kekahi, hana iho la o Amona me ka i kauohaia mai ai, a hele aku la iloko i ke Aliiwahine la, a ninau aku la ia ia e ike i ka mea ana i makemake ai nana e hana.

4 A i mai la oia ia ia, Ua hoike mai la na kauwa a ka’u kane ia’u, he kaula oe na kekahi Akua hemolele, a ia oe ka mana e hana i na hana mana he nui ma kona inoa;

5 Nolaila, ina he oiaio keia, ke makemake nei au ia oe e hele iloko a e ike i ka’u kane, no ka mea, ua waihoia oia maluna iho o kona wahi moe no na la elua a no na po elua; a ke olelo mai nei kekahi poe aole one i make, aka, ke olelo mai nei kekahi poe e ae ua make oia, a e pilau ana oia, a he mea e pono ai nona e waihoia iloko o ka halekupapau; aka, ia’u nei ea, aole oia i pilau ia’u.

6 Ano, o keia no ka mea a Amona i makemake ai, no ka mea, ua ike oia malalo iho o ke Alii Lamoni o ka mana o ke Akua; ua ike oia ua hooleiia’ku ka paku pouli o ka hoomaloka mai kona naau aku, a o ka malamalama nana i hoomalamalama i kona naau, oia no ka malamalama o ka nani o ke Akua, oia he malamalama kupanaha o kona lokomaikai; he oiaio, ua hookomo ua malamalama nei i ka hauoli nui iloko o kona uhane, i hoopuehuia’i ke ao pouli, a ua kuniia ka malamalama o ka malamalama mau loa iloko o kona uhane; he oiaio, ua ike oia ua lanakila keia maluna iho o kona kino maoli, a ua kaiia’ku oia iloko o ke Akua;

7 Nolaila, o ka mea a ke Aliiwahine i makemake ai ia ia. oia wale no kona makemake. Nolaila, hele aku la oia iloko e ike i ke Alii, me ke Aliiwahine i makemake ai ia ia; a nana aku la oia i ke Alii, a ua ike oia aole oia i make.

8 A i aku la oia i ke Aliiwahine, Aole oia i make, aka, ke moe nei oia i ke Akua, a i ka la apopo e ala hou oia; nolaila, mai kanu ia ia.

9 A i aku la o Amona ia ia, Ke manaoio nei anei oe i keia? A i mai la oia ia ia, Aole o’u mea hoike, o kau olelo wale no, a me ka olelo a ka maua poe kauwa; ke anaoio nei nae au e ko auanei ia e like me kau olelo.

10 A i aku la o Amona ia ia, Pomaikai ooe, no kou manaoio nui loa; ke i aku nei au ia oe, e ka wahine, aole ka manaoio nui e like me neia mawaena o ka poe kanaka o Nepai a pau.

11 [m 12, p 17] A eia kekahi, kiai iho la oia maluna iho o ka wahi moe o kana kane, mai ia manawa aku, a hiki aku i ua manawa la ma ka la apopo a Amona i hoomaopopo aku ai e ala mai ia.

12 A eia kekahi, ala ae la oia, e like me na olelo a Amona; a ia ia i ala ae ai, o ae la oia i kona lima i ka wahine, a i ae la, E hoomaikaiia ka inoa o ke Akua, a pomaikai oe;

13 No ka mea, he oiaio me oe e ola nei, aia hoi, ua ike au i ko’u Mea Hoolapanai; a e puka mai auanei oia, a e hanauia i kahi wahine, a e hoolapanai mai oia i na kanaka a pau, ka poe i manaoio ma kona inoa. Ano, ia ia i olelo mai ai i keia mau olelo, ua pehu kona naau iloko ona, a haule hou iho la oia me ka olioli; a haule iho la no hoi ka Aliiwahine ilalo, i uluhiaia e ka Uhane.

14 Ano, e ike ana o Amona i ka Uhane o ka Haku i nininiia mai e like me kana mau pule maluna iho o ko Lamana poe, kona poe hoahanau; ka poe i hookumu ai i ka uwe nui ana mawaena o ko Nepai poe, a mawaena o na kanaka a pau o ke Akua, no ka lakou hana hewa ana a me ko lakou mau mooolelo, haule iho la oia ma kona mau kuli, a hoomaka ae la e ninini aku i kona uhane ma ka pule a me ka hoolea aku i ke Akua, no ka mea ana i hana mai ai i kona poe hoahanau; a ua uluhiaia oia no hoi me ka olioli; a pela ua haule iho lakou a pau ekolu i ka honua.

15 Ano, i ka wa a na kauwa a ke Alii i ike ai ua haule iho lakou, hoomaka ae la no hoi lakou e kahea aku i ke Akua, no ka mea, ua hiki mai ka makau o ka Haku maluna iho i lakou no hoi, no ka mea, o lakou no ka poe i ku imua o ke Alii, a hoike aku ia ia, no ka mana nui o Amona.

16 [m 12, p 18] A eia kekahi, hea aku la lakou ma ka inoa o ka Haku, ma ko lakou ikaika, a hiki aku i ka wa i haule lakou a pau i ka honua, koe wale no hookahi wahine o ko Lamana poe, o Abisa kona inoa, ua hoohuliia oia i ka Haku no na makahiki he nui, no kekahi hihio kupaianaha a kona makuakane;

17 Pela oia i hoohuliia’i i ka Haku, me ka hoike e ole aku ia mea mamua; nolaila, ia ia i ike ai ua haule iho na kauwa a Lamoni a pau i ka honua, a me kana hakuwahine no hoi, o ke Aliiwahine, a me ke Alii, a me Amona i moe ilalo ma ka honua, ua ike oia o ka mana o ke Akua no ia; a e manao ana he manawa kupono keia, ma ka hoike ana i na kanaka i na mea i hiki mai mawaena o lakou, ma ko lakou ike ana i keia mea, e hoohuli mai oia ia lakou e manaoio i ka mana o ke Akua, nolaila, holo ae la oia ia hale aku ia hale aku, e hoike ana ia mea i na kanaka;

18 A hoomaka ae la lakou e hoakoakoa ia lakou iho i ka hale o ke Alii. A hele mai la he poe lehulehu loa, a me ke kahaha nui o lakou, ike aku la lakou i ke Alii, a i ke Aliiwahine, a me ka laua poe kauwa, e moe ana iloko ma ka honua, a moe iho la lakou ilaila me he mea la ua make lakou; a ike aku la no hoi lakou ia Amona, a, aia hoi, he Nepai oia.

19 A, ano, hoomaka ae la na kanaka e ohumu mawaena o lakou iho; e olelo ana kekahi poe, He mea ino nui ia i hiki mai maluna iho o lakou, a maluna iho o ke Alii a me ko kona hale, no kona ae ana i ua Nepai la e noho ma ka aina.

20 Aka, papa aku la kekahi poe e ia lakou me ka i ana, Ua lawe ke Alii i keia ino maluna o ko kona hale, no kona pepehi ana i kana poe kauwa, ka poe nona na pua i hoopuehuia’i ma na wai o Sebusa.

21 A ua papaia no hoi lakou e ua poe kanaka la, ka poe i ku ma na wai o Sebusa, a i hoopuehu i na pua a ke Alii, no ka mea, ua huhu lakou ia Amona, no ka nui o ko lakou poe hoahanau ana i pepehi ai ma na wai o Sebusa, oiai e paku ana i na pua a ke Alii.

22 Ano, o kekahi o lakou, o kona hoahanau ua pepehiia me ka pahikaua a Amona, ua huhu nui loa ia Amona, unuhi ae la oia i kana pahikaua a hele aku la e hiki ia ia ke hoohaule ia mea maluna iho o Amona, e pepehi ia ia; a ia ia i hoaka ae ai i ka pahikaua e hahau ia ia, aia hoi! haule iho la oia a make aku la.

23 Ano, ke ike nei kakou ua hiki ole ke pepehiia mai o Amona, no ka mea, ua olelo mai la ka Haku ia Mosia, i kona makuakane, Na’u e hookoe ia ia, a e hanaia auanei ia ia e like me kou manaoio; nolaila, ua hookuu aku o Mosia ia ia i ka Haku.

24 [m 12, p 19] A eia kekahi, i ka wa i ike ai ka lehulehu ua haule ke kanaka a make loa, nana i hoaka ae i kana pahikaua e pepehi ia Amona, hiki mai la ka makau maluna iho o lakou a pau, aole o lakou i aa e o ae i ko lakou mau lima e hoopa mai ia ia, aole hoi i kekahi o ka poe i haule; a hoomaka ae la lakou e kahaha hou mawaena o lakou iho no ke kumu o keia mana nui, a me ke ano o keia mau mea.

25 [m 12, p 20] A eia kekahi, ua nui wale ka poe mawaena o lakou, i olelo ae, o Amona oia no ka Uhane Nui, a olelo ae la kekahi poe e ae ua hoounaia mai oia e ka Uhane Nui;

26 Aka, papa aku la kekahi poe e ia lakou a pau, i ka i ana, He mea ano e oia, he mea i hoounaia mai mai ko Nepai poe mai e hoeha mai ia lakou;

27 A aia kekahi poe i olelo ae, ua hoounaia mai o Amona e ka Uhane Nui e hoopilikia mai ia lakou, no ka lakou hana hewa; a o ka Uhane Nui ia, ka mea i hele pu mau me ko Nepai poe, nana i hoopakele mau ia lakou mailoko aku o ko lakou nei mau lima; a i ae la lakou o ua Uhane Nui nei ia, nana i luku mai i ka nui me neia o ko lakou poe hoahanau, ko Lamana poe;

28 A pela i hoomaka ai ka paio ana e ikaika nui loa ae mawaena o lakou. A oiai lakou e paio ana pela, hele mai la ke kauwawahine nana i hoakoakoa ai i na kanaka; a ia ia i ike ai i ka paio mawaena o na kanaka, ua kaumaha nui loa iho la oia, a kulu kona waimaka.

29 [m 12, p 21] A eia kekahi, hele aku la oia a lalau aku la i ke Aliiwahine ma ka lima, e hiki paha ia ia ke hoala mai ia ia mai ka honua ae; a i kona hoopa ana i kona lima, ala ae la oia a ku iluna ma kona mau wawae, a kahea aku la me ka leo nui, i ka i ana, E Iesu pomaikai, nana i hoola mai ia’u mai kahi Gehena weliweli mai! E ke Akua pomaikai, e aloha mai i keia poe kanaka.

30 A ia ia i olelo mai ai i keia, apo iho la oia i kona mau lima i hoopihaia me ka olioli, e olelo ana i na olelo he nui aole i hoomaopopoia; a ia ia i hana’i i keia, lalau aku la oia i ke Alii, ia Lamoni, ma ka lima, a, aia hoi, ala ae la oia a ku iho la ma kona mau wawae;

31 A e ike ana oia i ka paio ana mawaena o kona poe kanaka, hele koke aku la oia, a hoomaka ae la e papa aku ia lakou, a e ao aku ia lakou i na olelo ana i lohe ai mai ka waha mai o Amona; a o ka poe i lohe i kana mau olelo, manaoio iho la, a ua hoohuliia mai i ka Haku.

32 Aka, ua nui ka poe mawaena o lakou o hoolohe ole ae i kana mau olelo; nolaila, haele aku la lakou.

33 [m 12, p 22] A eia kekahi, ia Amona i ala ae ai; lawelawe iho la no hoi oia ia lakou, a me na kauwa a pau a Lamoni no hoi; a hai aku la lakou i na kanaka i ka mea hookahi: ua hoololiia ko lakou mau naau; i ole lakou e makemake hou e hana aku i ka ino.

34 A, aia hoi, hai aku la kekahi poe he nui i na kanaka ua ike lakou i na anela, a ua kamailio pu me lakou; a pela i haiia mai ia lakou i na mea o ke Akua, a o kona pono.

35 A eia hoi kekahi, ua nui loa ka poe i manaoio i ka lakou mau olelo; a o ka poe a pau i manaoio, ua bapetizoia; a lilo iho la lakou i poe kanaka pono, a kukulu iho la lakou i ekalesia mawaena o lakou:

36 A pela i hoomaka ai ka hana a ka Haku mawaena o ko Lamana poe; a pela ka Haku i hoomaka ai e ninini mai i kona Uhane maluna iho o lakou; a ke ike nei kakou ua o ia kona lima i na kanaka a pau, ka poe e mihi a e manaoio i kona inoa.

MOKUNA 20

1 [mokuna 12, paukū 23] A eia kekahi, ia lakou i kukulu ai i ekalesia ma ia aina, makemake mai la ke Alii Lamoni ia Amona e hele pu aku me ia i ka aina o Nepai, e hiki ia ia ke hoike ae ia ia i kona makuakane.

2 A hiki mai la ka leo o ka Haku io Amona la, i ka i ana, Aole loa oe e pii aku i ka aina o Nepai, no ka mea hoi, e imi no ke Alii i kou ola; aka, ea, nau e hele aku i ka aina o Midoni; no ka mea, aia kou kaikuaana o Aarona, a me Muloki a me Ama hoi iloko o ka halepaahao.

3 [m 12, p 24] Ano, eia kekahi, ia Amona i lohe ai i keia, i aku la oia ia Lamoni, Aia hoi kuu kaikuaana a mau hoahanau iloko o ka halepaahao ma Midoni, a ke hele nei au i hoopakele aku ai au ia lakou.

4 Ano, i mai la o Lamoni ia Amona, ke ike nei au, ma ka ikaika o ka Haku, ua hiki ia oe ke hana i na mea a pau. Aka hoi, naú e hele pu me oe i ka aina o Midoni: no ka mea, o ke Alii o ka aina o Midoni, o Anatiomano kona inoa, he hoaaloha ia no’u; nolaila, ke hele aku nei au i ka aina o Midoni, i hoomalimali aku ai au i ke Alii o ka aina; a e hoolei mai oia i kou mau hoahanau mawaho o ka halepaahao. Ano, i mai la o Lamoni ia ia, Nawai la oe i hai aia o kou mau hoahanau iloko o ka halepaahao?

5 A i aku la o Amona ia ia, Aole na kekahi i hai mai ia’u o ke Akua wale no; a i mai la oia ia’u, E hele aku a e hoopakele aku i kou mau hoahanau, no ka mea, aia no lakou iloko o ka halepaahao ma ka aina o Midoni.

6 Ano, ia Lamoni i lohe ai i keia, kena aku la oia i kana poe kauwa e hoomakaukau i kona mau lio, a me kona mau halekaa.

7 A i mai la oia ia Amona, E, e hele pu au me oe ilalo i ka aina o Midoni, a malaila au e noi aku i ke Alii, nana e hoolei mai i kou mau hoahanau iwaho o ka halepaahao.

8 [m 12, p 25] A eia kekahi, i ka hele ana’e o Amona laua me Lamoni, halawai pu iho la laua me ka makuakane o Lamoni, oia no ke Alii maluna iho o ka aina a pau.

9 A, aia hoi, i ae la ka makuakane o Lamoni ia ia, no ke aha la oe i hele ole mai ai i ka ahaaina, ma kela la nui ia’u i hana’i i kahi ahaaina i ka’u mau keiki, a i ko’u poe kanaka?

10 A i ae la no hoi oia ia ia, E hele ana oe ihea me keia Nepai, oia no kekahi o na mamo a kekahi mea wahahee?

11 A eia kekahi, hai aku la o Lamoni ia ia i kona wahi e hele aku ai, no ka mea, makau iho la oia o huhu mai kela.

12 A hai aku la oia ia ia i ke kumu o kona noho ana ma kona aupuni iho, i hele ole aku ai oia i kona makuakane la, i ka ahaaina ana i hoomakaukau ai.

13 Ano, ia Lamoni i hai aku ai ia ia i ua mau mea nei a pau, Aka hoi, me kona kahaha, ua huhu kona makuakane ia ia, a i mai la, E Lamoni, e hele ana oe e hoopakele aku i keia mau Nepai, he mau mamo lakou a kekahi mea wahahee. Aia hoi, hao wale mai la oia i ko kaua poe kupuna; a, ano la, ua hele mai no hoi kana poe mamo mawaena o kakou, e hiki ia lakou, ma ko lakou maalea a wahahee ana, e hoopunipuni mai ia kakou, e hiki ia lakou ke hao hou wale mai ia kakou i ko kakou waiwai.

14 Ano, kauoha ae la ka makuakane o Lamoni ia ia e pepehi ia Amona me ka pahikaua. A kauoha ae la no hoi oia ia ia, mai hele oia i ka aina o Midoni, aka e hoi pu oia me ia, i ka aina o Isemaela.

15 Aka, i aku la o Lamoni ia ia, Aole au i pepehi aku ia Amona, aole hoi au e hoi hou i ka aina o Isemaela, aka, ke hele nei au i ka aina o Midoni, e hiki ia’u ke hookuu aku i na hoahanau o Amona, no ka mea, ua ike au he mau kanaka pono lakou, a he mau kaula hemolele o ke Akua oiaio.

16 Ano, i ka wa a kona makuakane i lohe ai i keia mau olelo, ua huhu oia ia ia, a unuhi ae la oia i kana pahikaua, e hiki ia ia ke hahau ia ia i ka honua.

17 Aka ku iho la o Amona a i aku la ia ia, Aia hoi, aole loa oe e pepehi mai i kau keiki; e aho nae kona haule ana mamua o kou: no ka mea hoi, ua mihi oia i kona mau hewa; aka, ina e haule oe i keia manawa, iloko o kou huhu, aole e hiki i kou uhane ke hoolaia.

18 A eia hou, he mea pono nou e oki; no ka mea, ina e pepehi mai oe i kau keiki, (he kanaka hala ole no ia,) e kahea aku no kona koko mai ka lepo ae, i ka Haku i kona Akua, no ka hoopai e hiki mai maluna ou; a e lilo aku paha kou uhane.

19 Ano, ia Amona i olelo aku ai i ua mau olelo nei ia ia, pane mai la oia ia ia, i ka i ana, Ua ike au ina e pepehi aku au i ka’u keiki, e hookahe no au i ke koko hala ole; no ka mea, ooe no ka mea nana i imi e hoopau ia ia:

20 A o mai la oia i kona lima e pepehi mai ia Amona. Aka, pale ae la o Amona i kona hahau ana, a hahau iho la no hoi i kona lima i hiki ole ai ia ia ke hana me ia.

21 Ano, i ka wa a ke Alii i ike ai ua hiki ia Amona ke pepehi mai ia ia, hoomaka ae la oia e noi aku ia Amona, e hookoe mai i kona ola.

22 Aka, hoaka ae la o Amona i kana pahikaua, a e aku la ia ia, Aia hoi, e hahau aku no au ia oe, ke ole oe e ae mai ia’u e hooleiia mai ko’u mau hoahanau iwaho o ka halepaahao.

23 Ano, o ke Alii e makau ana ia o lilo aku kona ola, i mai la, Ina e hookoe mai oe ia’u, na’u e haawi aku ia oe i kela mea i keia mea au e noi mai ai, ina paha ia o ka hapalua o ke aupuni.

24 [m 12, p 26] Ano, ia Amona i ike ai ua hana aku ma ke Alii kahiko e like me kona makemake, i aku la oia ia ia, Ina e ae mai oe e hooleiia mai ko’u mau hoahanau mawaho o ka halepaahao, a e noho no hoi o Lamoni ma kona aupuni, aole hoi oe e huhu aku ia ia, aka e ae mai nana e hana e like me na makemake ona, ma na mea ana e manao ai, alaila, no’u e hookoe ia oe; a i ole, na’u e hahau ia oe i ka honua.

25 Ano, ia Amona i olelo aku ai i keia mau olelo, hoomaka ae la ke Alii e hauoli no kona ola.

26 A ia ia i ike ai aole o Amona makemake e pepehi ia ia, a ia ia i ike ai hoi i ke aloha nui ona i kana keiki ia Lamoni, ua kahaha nui loa iho la oia, a olelo mai la, No kou makemake ana i keia mau mea wale no, i hookuu aku ai au i kou mau hoahanau, a i ae aku ai i ka’u keiki Lamoni e noho ma kona aupuni, aia hoi, e ae aku no au ia oe e noho ka’u keiki ma kona aupuni mai keia manawa aku a mau loa aku; aole au a noho alii hou maluna ona ma neia hope aku.

27 A e ae aku no hoi au ia oe e hookuuia’ku kou mau hoahanau mawaho o ka halepaahao, a nau me kou mau hoahanau e hele mai ia’u, ma ko’u aupuni; no ka mea, e makemake nui au e ike ia oe: no ka mea, ua pihoihoi nui ke Alii ma na olelo ana i olelo aku ai, a ma na olelo hoi i oleloia’i e kana kiki Lamoni: nolaila, ua makemake oia e ao ia mau mea.

28 [m 12, p 27] A eia kekahi, hele aku la o Amona laua me Lamoni i ka aina o Midoni. A loaa iho la ia Lamoni ka oluolu ma na maka o ke Alii o ka aina; nolaila, ua laweia mai na hoahanau o Amona mawaho o ka halepaahao.

29 A ia Amona i halawai pu ai me lakou, ua kaumaha nui loa ia, no ka mea hoi, ua kapa ole lakou, a ua pohole nui ko lakou ili, no ka nakinakiia’na me na kaula ikaika. A ua loaa no hoi ia lakou ka pololi, ka makewai, a me kela ano keia ano o ka pilikia a pau; aka hoi, ua hoomanawanui lakou iloko o ko lakou mau eha ana a pau.

30 A me ia i hiki mai ai, o ko lakou puu ia e haule iloko o na lima o kekahi poe kanaka i oi aku ka paakiki a ai oolea; nolaila, aole o lakou la i hoolohe i na olelo a lakou, a ua hoolei mai ia lakou iwaho, a ua hahau mai ia lakou, a i hookuke mai ai ia lakou ia hale aku ia hale aku, a ia wahi aku ia wahi aku, a hiki aku lakou i ka aina o Midoni; a malaila lakou i hopuia’i a i hooleiia’i iloko o ka halepaahao, a i nakinakiia me na kaula ikaika, a hoopaaia iloko o ka halepaahao no na la he nui; a ua hoopakeleia e Lamoni laua me Amona.

He mooolelo o ka hai olelo ana a Aarona laua me Muloki, a me na hoahanau o laua, i ko Lamana poe.

Mai ka mokuna 21 a hiki i ka 26.

MOKUNA 21

1 [mokuna 13, paukū 1] Ano, i ka wa a Amona a me kona mau hoahanau i hookaawale ae ai ia lakou iho ma na palena o ka aina o ko Lamana poe, aia hoi, hele aku la o Aarona i ka aina i kapaia’i e ko Lamana poe, o Ierusalema; e kapa ana ia wahi mamuli o ka aina hanau o ko lakou poe kupuna, a ma o aku ia e pili ana i na palena o Moramona.

2 Ano, o ko Lamana poe, a me ko Amaliki poe, a me ka poe kanaka o Amulona, ua kukulu iho la i kekahi kulanakauhale nui, i kapaia’i o Ierusalema.

3 Ano, ua lawa ka paakiki o ko Lamana poe, o lakou iho, aka, ua paakiki nui ae ko Amaliki, a me ko Amulona; nolaila, ma o lakou la i hoopaakiki iho ai ko Lamana poe i ko lakou mau naau, i mahuahua ikaika’i lakou ma ka hana hewa, a me ko lakou mau mea ino.

4 [m 13, p 2] A eia kekahi, hiki aku la o Aarona i ke kulanakauhale o Ierusalema, a hoomaka mua oia e hai olelo aku i ko Amaliki poe. A hoomaka ae la oia e hai aku ia lakou iloko o ko lakou mau halehalawai, no ka mea, ua kukulu iho la lakou i na halehalewai, mamuli o ka aoao o ko Nehora; no ka mea, ua nui ka poe o ko Amaliki poe a me ko Amulona poe mamuli o ka aoao o ko Nehora.

5 Nolaila, me Aarona i komo aku ai iloko o kekahi o ko lakou mau halehalawai e hai aku i na kanaka, a i kana olelo ana ia lakou, aia hoi, ku iho la kekahi o ko Amaliki, a hoomaka iho la e paio me ia, i ka i ana, Heaha kela mea au i hoike mai ai? Ua ike anei oe i kekahi anela? No ke aha la aole i ikea na anela e makou? Aia hoi, aole anei i like ka maikai o keia poe kanaka me kou poe kanaka?

6 A ke i mai nei no hoi oe, Ina aole makou e mihi, e make no auanei makou. Pehea la oe i ike i ka manao a me ka makemake o ko makou naau? Pehea la oe i ike ai he kumu ko makou e mihi ai? Pehea la oe i ike ai aole makou he poe kanaka pono? Aia hoi, ua kukulu iho makou i na halelaa, a ke hoakoakoa nei makou e hoomana aku i ke Akua. Ke manaoio nei makou e hoola mai no ke Akua i na kanaka a pau.

7 Ano, i aku la o Aarona ia ia, Ke manaoio nei anei oe, e hele mai auanei ke Keiki a ke Akua e hoolapanai mai i na kanaka a pau mai ko lakou mau hala?

8 A i mai la ua kanaka la ia ia, Aole makou manaoio ua ike oe i kekahi mea e like me ia. Aole makou manaoio i keia mau mooolelo lapuwale. aole makou manaoio ua ike oe no na mea e hiki mai ana, aole hoi makou manaoio ua ike kou poe kupuna, a me ko makou poe kupuna no hoi, no na mea a lakou i olelo mai ai, o na mea e hiki mai ana.

9 [m 13, p 3] Ano, hoomaka ae la o Aarona e wehewehe aku i na palapala hemolele ia lakou, no ka hiki ana mai o Kristo, a no ke alahouana no hoi o ka poe make, a, e hiki ole mai ka hoolapanaiia’na o na kanaka a pau, ke ole ia ma o ka make a me na eha ana la o Kristo, a me ke kalahala ana o kona koko.

10 A eia kekahi, me ia i hoomaka ai e hoomaopopo aku i ua mau mea nei ia lakou, ua huhu iho la lakou ia ia, a hoomaka ae la e hoomaewaewa ia ia; a, aole lakou e hoolohe mai i na olelo ana i olelo mai ai;

11 Nolaila, ia ia i ike ai aole lakou i hoolohe mai i kana mau olelo, haalele aku la oia i ko lakou halehalawai, a hele aku la i kekahi kauhale i kapaia o Ani-anati, a malaila i loaa’i o Muloki ia ia e hai ana i ka olelo ia lakou; a me Ama hoi, a me kona mau hoahanau. A paio aku la lakou me na mea he nui no ka olelo.

12 A eia kekahi, ua ike lakou e hoopaakiki ana na kanaka i ko lakou mau naau; nolaila, haalele iho la lakou, a haele aku la iloko o ka aina o Midoni. A hai aku la lakou i ka olelo i na mea he nui, a kakaikahi ka poe i manoio ma ua olelo a lakou i ao aku ai.

13 Aka hoi, o Aarona a me kekahi mau mea o kona poe hoahanau, ua hopuia a hooleiia iloko o ka halepaahao, a o na mea i koe mahuka aku la lakou mailoko aku o ka aina o Midoni, ma na wahi e kokoke ana a puni.

14 A o ka poe i hooleiia’i iloko o ka halepaahao loaa iho la na mea eha he nui wale ia lakou, a ua hoopakeleia lakou e ka lima o Lamoni laua me Amona; a ua hanaiia a hoaahuia.

15 A hele hou aku la lakou e hai i ka olelo; a pela lakou i hoopakeleia mai ai no ka manawa mua mailoko mai o ka halepaahao; a pela lakou i eha ai.

16 A hele aku la lakou i kahi a lakou i alakaiia’i e ka Uhane o ka Haku, e hai ana i ka olelo a ke Akua i kela halehalawai i keia halehalawai o ko Amaliki poe, a iloko o na ahakanaka o ko Lamana poe, kahi i hiki ai ia lakou ke komo.

17 [m 13, p 4] A eia kekahi, hoomaka mai la ka Haku e hoopomaikai mai ia lakou, a lawe mai la lakou i na mea he nui i ka ike i ka oiaio; he oiaio, ua hoomaopopoia kekahi poe he nui no ko lakou mea hewa, a no na mooolelo o ko lakou poe kupuna, i pololei ole.

18 [m 13, p 5] A eia kekahi, hoi hou aku la o Amona laua me Lamoni mai ka aina mai o Midoni, i ka aina o Isemaela, oia no ko lakou aina hooilina.

19 Aole i ae mai o ke Alii Lamoni ia Amona e lawelawe nana, aole hoi e lilo i kauwa nana;

20 Aka, kauoha aku la oia i na halehalawai e kukuluia ma ka aina o Isemaela; a kauoha aku la no hoi ia i kona poe kanaka, oia hoi ka poe kanaka e noho ana malalo iho o kona au, e hoakoakoa ia lakou iho.

21 A hauoli iho la oia maluna o lakou, a ao aku la oia ia lakou i na mea he nui wale. A hai aku la no hoi oia ia lakou, he poe kanaka lakou malalo iho ona, a he poe kanaka ku okoa lakou; ua kaawale lakou mai ka hooluhi hewa ana’e o ke Alii, kona makuakane; no ka mea, ua ae mai kona makua ia ia, e noho alii oia maluna iho o ka poe kanaka iloko o ka aina o Isemaela, a iloko o ka aina a pau a puni.

22 A hai aku la no hoi oia ia lakou, ua hookuuia lakou e hoomana i ka Haku, i ko lakou Akua, e like me ko lakou makemake, ma kela wahi keia wahi a lakou i komo ai, ina iloko ia o ka aina malalo iho o ka noho alii ana o ke Alii Lamoni.

23 A hai olelo aku la o Amona i ka poe kanaka o ke Alii Lamoni. A eia kekahi, ao aku la oia ia lakou i na mea a pau no na mea e pili ana i ka pono. A kauleo aku la oia ia lakou i kale la i keia la, me ka ikaika a pau; a hoolohe mai la lakou i kana olelo, a ua ikaika lakou no ka malama ana i na kauoha a ke Akua.

MOKUNA 22

1 Ano, me Amona e ao mau ana pela i ka poe kanaka o Lamoni, e hoi no kakou i ka mooolelo o Aarona a me kona mau hoahanau; no ka mea, mahope iho o kona hele ana mai ka aina o Midoni aku, ua alakaiia’ku oia e ka Uhane i ka aina o Nepai; i ka hale o ke Alii maluna iho o ka aina a pau, koe wale no ka aina o Isemaela; a oia no ka makuakane o Lamoni.

2 [mokuna 13, paukū 6] A eia kekahi, hele aku la oia iloko io na la, iloko o ko ke Alii hale alii, me kona mau hoahanau, a kulou iho la ia imua o ke Alii, a i aku la ia ia, Aia hoi, e ke Alii, o makou no na hoahanau o Amona, au i hoopakele mai ai mailoko mai o ka halepaahao.

3 A, ano, e ke Alii, ina e hookoe mai oe i ko makou mau ola, e lilo makou i mau kauwa nau. A i mai la ke Alii ia lakou, E ala ae, no ka mea, e ae aku au ia oukou i ko oukou mau ola, a, aole au e ae aku e lilo oukou i mau kauwa na’u; aka, e koi aku au i lawelawe mai ai oukou ia’u; no ka mea, ua anoninoni au ma kekahi mau mea ma ka naau, no ka lokomaikai, a me ka nui o na olelo a kou kaikaina a Amona; a ke makemake nei au e ike i ke kumu o kona pii pu ole mai mai Midoni mai, me oe.

4 A i aku la o Aarona i ke Alii, Aia hoi, ua kahea ka Uhane o ka Haku ia ia i kekahi ala e; ua hele aku la oia i ka aina o Isemaela, e ao aku i ka poe kanaka o Lamoni.

5 Ano, i mai la ke Alii ia lakou, Heaha la keia mea a oukou i olelo mai ai ka Uhane o ka Haku? Aia hoi, o keia no ka mea e anoninoni mai ana ia’u.

6 A, heaha keia hoi a Amona i i mai ai—Ina e mihi oe e hoolaia auanei oe, a ina aole oe e mihi, e hooleiia aku auanei oe ma ka la hope?

7 A olelo aku la o Aarona ia ia, a i aku la ia ia, ke manaoio nei anei oe aia no he Akua? A i ae la ke Alii, Ua ike au ke i mai la ko Amaliki poe aia no he Akua, a ua ae aku au ia lakou e kukulu i na halelaa, i hoakoakoa ai lakou ma kahi hookahi, e hoomana aku ia ia. A ina e olelo mai ana oe ano, aia no he Akua, aia hoi, e manaoio no au.

8 [m 13, p 7] Ano, ia Aarona i lohe ai i keia, hoomaka ae la kona naau e hauoli, a i aku la oia, Aia hoi, he oiaio, me oe e ola nei, e ke Alii, aia no he Akua.

9 A i ae la ke Alii, O ke Akua anei kela Uhane Nui nana i lawe mai i ko kakou poe kupuna mailoko mai o ka aina o Ierusalema?

10 A i aku la o Aarona ia ia, Ae, oia no ua Uhane Nui la, a ua hana mai la oia i na mea a pau, ma ka lani a ma ka honua no hoi: ke manaoio nei anei oe i keia?

11 A i ae la oia, Ae, ke manaoio nei au na ka Uhane Nui i hana mai i na mea a pau, a ke makemake nei au ia oe e hai mai ia’u no ua mau mea nei a pau, a e manaoio no au i kau mau olelo.

12 [m 13, p 8] A eia kekahi, ia Aarona i ike ai e manaoio ana ke Alii i kana mau olelo, hoomaka ae la oia ma ka hanaiia’na mai o Adamu, e heluhelu ana i na palapala hemolele i ke Alii; no ka hana ana a ke Akua i kanaka mamuli o kona ano like iho, a haawi mai la ke Akua ia ia i na kauoha, a no ka lawehala ana, ua haule ke kanaka.

13 A hoomaopopo aku la o Aarona ia ia i na palapala hemolele, mai ka hanaiia’na mai o Adamu, e waiho ana ka haule o ke kanaka imua ona, a me ko lakou noho kino ana, a me ke kumumanao hoolapanai no hoi, i hoomakaukauia’i mai ka hookumuia’na mai o ke ao nei, ma o Kristo la, no ka poe a pau i manaoio ma kona inoa.

14 A mahope mai o ko ke kanaka haule ana, aole loa i hiki ia ia ke loaa kekahi mea ma ona iho; aka e kalahala ana na eha a me ka make o Kristo no ko lakou mau hewa, ma o ka manaoio a mihi la, a pela aku; a nana e moku i na mea paa o ka make, i lanakila ole ai ka lua, a i aleia’i ka hope awa o ka make iloko o na manaolana o ka nani: a hoomoakaka aku la o Aarona i keia mau mea a pau i ke Alii.

15 A eia kekahi, mahope iho o ka hoomoakaka ana o Aarona i ua mau mea nei ia ia, i mai la ke Alii, Heaha ka’u e hana’i, i loaa mai ai ia’u ua ola mau loa nei au i olelo mai ai? He oiaio, heaha la ka’u e hana’i, i hoohanauia mai ai au e ke Akua, me keia uhane ino i uhukiia iwaho o ko’u naau, a e loaa iho kona Uhane, i hoopihaia’i au me ka olioli, i hoolei ole ia’ku ai au ma ka la hope? Aia hoi, wahi ana, e haawi aku no au i kuu mau mea a pau a’u i loaa’i; he oiaio, e haalele aku au i kuu aupuni, e hiki ia’u ke loaa keia olioli nui.

16 Aka, i aku la o Aarona ia ia, Ina e makemake ana oe i keia mea, ina e kulou iho oe ilalo imua o ke Akua, he oiaio, ina e mihi oe i kou mau hewa a pau, a e kulou iho ilalo imua o ke Akua, a e kahea aku ma kona inoa ma ka manaoio, e manaoio ana e loaa mai ana ia oe, alaila, e loaa no ia oe ka manaolana au i makemake ai.

17 [m 13, p 9] A eia kekahi, ia Aarona i olelo mai ai i keia mau olelo, kulou iho la no ke Alii ilalo imua o ka Haku, ma kona mau kuli; he oiaio, hoomoe ilalo oia ia ia iho ma ka honua, e kahea ikaika ana, me ka i aku,

18 E ke Akua e, ua hai mai o Aarona ia’u aia no he Akua; a ina aia no he Akua; a ina o ke Akua ooe, ea, e hoike mai oe ia oe iho ia’u, a e haawi aku no au i ko’u mau hewa a pau e ike ia oe, a i hoalaia mai ai au mai ka make mai, a e hoolaia ma ka la mahope. A, ano, i ka wa a ke Alii i olelo ae ai i ua mau olelo nei, ua loohia oia me he mea la ua make.

19 [m 13, p 10] A eia kekahi, holo aku la kana poe kauwa, a hai aku la i ke Aliiwahine i na mea a pau i hiki mai ai maluna iho o ke Alii. A komo mai la oia iloko i ke Alii la; a ia ia i ike ai i kela e moe ana me he mea la ua make, a e ku ana no hoi o Aarona a me kona mau hoahanau me he mea la o lakou no ke kumu o kona haule ana, ua huhu oia ia lakou, a kena ae la i kana poe kauwa, oia hoi ka poe kauwa a ke Alii, e hopu ae ia lakou a e pepehi ia lakou.

20 Ano, ua ike na kauwa i ke kumu o ko ke Alii haule ana, nolaila, aole lakou i aa e kau aku i na lima o lakou maluna iho o Aarona a me kona mau hoahanau; a noi aku la lakou i ke Aliiwahine, i ka i ana, No ke aha la oe i kena mai ai ia makou nei e pepehi aku i keia mau kanaka, i ka wa hoi i oi aku ka mana o kekahi o lakou mamua o makou nei a pau? Nolaila, e haule no makou imua o lakou.

21 Ano, i ka wa a ke Aliiwahine i ike ai i ka makau o na kauwa, hoomaka no hoi oia e makau nui loa, o hiki mai kekahi mea ino maluna iho ona. A kena ae la oia i kana poe kauwa e hele aku a e kahea aku i na kanaka, e hiki ia lakou ke pepehi mai ia Aarona a me kona mau hoahanau.

22 Ano, ia Aarona i ike ai i ka manao paa o ke Aliiwahine, a e ike ana no hoi oia i ka paakiki o na naau o na kanaka, makau iho la oia o hoakoakoaia mai na kanaka he lehulehu, a e paio nui, a e haunaele nui auanei mawaena o lakou; nolaila, o aku la oia i kona lima a hoala mai la i ke Alii mai ka honua ae, a i aku la ia ia, E ku: a ku iho la oia ma kona mau wawae, e loaa ana kona ikaika.

23 Ano, ua hanaia keia ma ke alo o ke Aliiwahine, a me na mea he nui o ka poe kauwa. A ia lakou i ike ai ia mea, kahaha nui iho la lakou, a hoomaka ae la e makau. A ku iho la ke Alii imua a hoomaka aku la e lawelawe aku ia lakou. A lawelawe aku la oia ia lakou, a hoohulihia ko kona hale a pau i ka Haku.

24 Ano, ua hoakoakoaia mai no he poe nui loa no ke kauoha a ke Aliiwahine, a hoomaka ae la na ohumu nui ana mawaena o lakou, no Aarona a me kona mau hoahanau.

25 Aka, ku iho la ke Alii mawaena o lakou, a lawelawe aku la ia lakou. A ua hoonanaia lakou ia Aarona, a me ka poe pu me ia.

26 [m 13, p 11] A eia kekahi, i ka wa a ke Alii i ike ai ua hoonaia na kanaka, hooku iho la oia ia Aarona a me kona mau hoahanau mawaena konu o na kanaka, a i hai aku ai lakou i ka olelo ia lakou la.

27 A eia kekahi, hoouna aku la ke Alii i olelo hoolaha mawaena o ka aina a pau, mawaena o kona poe kanaka a pau iloko o kona aina a pau, ka poe e noho ana ma na wahi a pau, e moe ana ma ke kai, ma ka hikina, a ma ke komohana hoi, a i paleia mai ka aina ae o Zarahemela e kekahi wahi paiki loloa o ka waonahele, mai ke kai hikina a hiki wale aku i ke kai komohana, a, a puni ma na kapa o kahakai, a ma na kapa o ka waonahele aia ma ka akau, ma ka aina o Zarahemela, mawaena o na mokuna o Manati, ma ke poo o ka muliwai o Sidona, mai ka hikina aku i ka komohana; a pela i hookaawaleia’i ko Lamana poe a me ko Nepai poe.

28 Ano, o ka poe palaualelo loa o ko Lamana poe noho iho la lakou ma ka waonahele, a noho iloko o na halelewa; a ua hoopalahalahaia lakou mawaena o ka waonahele, ma ke komohana, iloko o ka aina o Nepai: he oiaio, a ma ke komohana no hoi o ka aina o Zarahemela, ma na palena, ma ke kahakai, a ma ke komohana, iloko o ka aina o Nepai, iloko o kahi o ko ko lakou poe kupuna hooilina mua, a pela e moe ana ma kahakai.

29 A ua nui no hoi o ko Lamana poe ma ka hikina ma kahakai, kahi a ko Nepai poe i hooauhee aku ai ia lakou. A pela ua aneane poai puniia koNepai poe e ko Lamana poe; aka hoi, ua loaa iho la i ko Nepai poe na wahi a pau ma ka akau o ka aina, e moe ana ma ka waonahele ma ke poo o ka muliwai Sidona, mai ka hikina a hiki aku i ke komohana, a puni ma ka aoao waonahele; ma ka akau, a hiki wale aku lakou i ka aina a lakou i kapa aku ai o Momona.

30 A moe iho la ia ma ka aina a lakou i kapa aku ai o Neoneo; ma ka akau loa ia a hiki aku iloko o ka aina i piha e mamua i na kanaka, a i lukuia, ua olelo e aku makou no na iwi o lakou, ka mea i loaa’i i ka poe kanaka o Zarahemela; oia no kahi a lakou i pae mua ai.

31 A hele mai la lakou mailaila mai iluna’e iloko o ka waonahele hema. Pela ae la ua kapaia ka aina ma ka akau o Neoneo, a o ka aina ma ka hema ua kapaia o Momona; oia no ka waonahele i hoopihaia me na holoholona hihiu a pau o kela ano o keia ano; o kekahi poe o lakou ua hele mai mai ka aina akau, no ka ai.

32 A, ano, hookahi la a me ka hapalua wale no ka loihi o ka hele ana no kekahi o ko Nepai poe, ma ka palena o ka aina Momona, a me ka aina Neoneo, mai ke kai hikina i ke kai komohana; a pela iho la ua aneane hoopuniia ka aina o Nepai, a me ka aina o Zarahemela, e ke kai; aia no he puali uuku o ka aina mawaena o ka aina ma ka akau, a me ka aina ma ka hema.

33 [m 13, p 12] A eia kekahi, ua noho iho la ko Nepai poe ma ka aina Momona, mae ke kai hikina a hiki aku i ke kai komohana, a pela ko Nepai poe iloko o ko lakou naauao, me ko lakou poe koa kiai a me ko lakou poe kaua, i hoopuni aku ai i ko Lamana poe ma ka hema, i hiki ole ai ia lakou ke loaa hou kahi e noho ai ma ka akau, i hiki ole ai ia lakou ke kawowo aku i ka aina ma ka akau;

34 Nolaila, ua hiki ole i ko Lamana poe ke loaa hou aku na wahi e noho ai, ma ka aina o Nepai wale no, a me ka waonahele a puni. A he mea naauao keia ma ko Nepai poe; no ka mea, he enemi ko Lamana poe ia lakou, i ole ai lakou e loaa ko lakou mau mea pilikia ma kela lima keia lima, a i hiki ia lakou ke loaa no hoi kekahi aina kahi a lakou, e holo aku ai, e like me ko lakou mau makemake.

35 Ano, mahope iho o ka’u olelo ana i keia, ke hoi hou nei au i ka mooolelo o Amona, a me Aarona, o Omanera a me Himani, a me ko lakou mau hoahanau.

MOKUNA 23

1 [mokuna 14, paukū 1] Eia hoi kekahi, hoouna aku la ke Alii o ko Lamana poe i olelo hoolaha mawaena o kona poe kanaka a pau, aole lakou e kau i ko lakou mau lima maluna iho o Amona, a me Aarona, o Omanera, a me Himani, aole hoi maluna o kekahi o ko lakou mau hoahanau, ka poe e hele aku e hai ana i ka olelo a ke Akua, ma kela wahi keia wahi a lakou e noho ai, ma na mokuna a pau o ko lakou aina;

2 He oiaio, hoouna ae la oia i kekahi kauoha mawaena o lakou la, aole lakou la e kau i ko lakou la mau lima maluna iho o lakou e nakinaki ia lakou, aole hoi e hoolei ia lakou iloko o ka halepaahao; aole hoi e kuha lakou la maluna iho o lakou, aole hoi e papai ia lakou, aole hoi e hoolei ae ia lakou mawaho o ko lakou mau halehalawai, aole hoi e hahau ia lakou: aole hoi lakou la e nou ae i na pohaku ia lakou, aka e komo lakou me ke keakea ole ia iloko o na hale o lakou la, a i na luakini hoi, a i na halelaa;

3 A pela e hiki ai ia lakou ke hele aku a hai aku i ka olelo a ike Akua, e like me ko lakou makemake, no ka mea, ua hoohulihia mai ke Alii i ka Haku, a me kona hale a pau: nolaila, hoouna aku la oia i ua olelo hoolaha nei mawaena o ka aina i kona poe kanaka, i alalai ole ia’i ka olelo a ke Akua, aka e hiki ia mea ke holo aku mawaena o ka aina a pau, e hiki i kona poe kanaka ke hoomaopopoia no na mooolelo ino o ko lakou poe kupuna, e hiki ia lakou ke hoomaopopoia he poe hoahanau lakou a pau, a he mea e pono ole ai no lakou a pepehi kanaka, aole hoi e powa, aole hoi e aihue, aole hoi e moe kolohe, aole hoi e hana i kela ano i keia ano o ka hewa.

4 [m 14, p 2] Ano, eia kekahi, i ka wa a ke Alii i hoouna aku ai i ua ole lo hoolaha nei, hele aku la o Aarona a me kona mau hoahanau ia kulanakauhale aku ia kulanakauhale aku, a mai kahi hale hoomana aku i kekahi, e kukulu ana i na ekalesia, a e hoolaa ana i na kahuna a me na kumu a puni ka aina mawaena o ko Lamana poe, e hai aku a e ao aku i ka olelo a ke Akua mawaena o lakou; a pela lakou i hoomaka’i e loaa ka pomaikai nui.

5 A ua laweia mai na tausani i ka ike i ka Haku, he oiaio, ua laweia mai na tausani e manaoio i na mooolelo o ko Nepai poe; a ua aoia lakou i na mooolelo a me na wanana i haawiia mai ai, a hiki wale aku i keia namawa;

6 A me ka oiaio o ka Haku e ola nei, me ia o ka poe i manaoio, o ka poe i laweia mai i ka ike i ka oiaio, ma o ka hai olelo ana la o Amona a me kona poe hoahanau, e like me ka Uhane o ka hoikeana a o ka wanana, a me ka mana o ke Akua, e hana ana i na hana mana iloko o lakou; he oiaio, ke i aku nei au ia oukou, me ka Haku e ola nei, o ka poe o ko Lamana poe i manaoio ai i ka lakou hai olelo ana, a i hoohulihia’i i ka Haku, aole lakou i haule hou aku ma ia hope aku,

7 No ka mea, lilo iho la lakou i poe kanaka pono: waiho iho la lakou ilalo i na mea kaua o ko lakou kipi ana, i ole lakou e kaua ku e hou i ke Akua, aole hoi i kekahi poe o ko lakou poe hoahanau.

8 Ano, eia ka poe i hoohulihia’i i ka Haku:

9 O ka poe kanaka o ko Lamana poe e noho ana ma ka aina o Isemaela,

10 A o ka poe kanaka hoi o ko Lamana poe e noho ana ma ka aina o Midoni,

11 A o ka poe kanaka hoi o ko Lamana poe e noho ana ma ke kulanakauhale o Nepai

12 A o ka poe kanaka hoi o ko Lamana poe e noho ana ma ka aina o Sailoma, a e noho ana ma ka aina o Semalona, a ma ke kulanakauhale o Lemuela, a ma ke kulanakauhale o Siminailona;

13 A oia na inoa o na kulanakauhale o ko Lamana poe i hoohulihia’i i ka Haku; a o lakou nei no ka poe i waiho ilalo i na mea kaua o ko lakou kipi ana, he oiaio, i na mea kaua a pau o lakou; a no ko Lamana poe lakou a pau.

14 Aole i hoohulihia’e ko Amaliki poe, hookahi mea wale no; aole hoi kekahi o ko Amulona poe; aka, hoopaakiki iho la lakou i ko lakou mau naau, a me na naau hoi o ko Lamana poe ma na wahi o ka aina a lakou i noho ai; he oiaio, a me ko ko lakou mau kauhale a pau a me ko ko lakou mau kulanakauhale a pau;

15 Nolaila, ua kakau makou i na inoa o na kulanakauhale a pau o ko Lamana poe, iloko olaila lakou i mihi ai a loaa’i ka ike i ka oiaio, a i hoohulihia’i.

16 [m 14, p 3] Ano, eia kekahi, o ke Alii a me ka poe i hoohulihia’i, ua makemake lakou e loaa kekahi inoa, e hiki ia lakou ma ia mea ke hookoaia’e mai ko lakou poe hoahanau ae; nolaila, kukakuka pu iho la ke Alii me Aarona a me kekahi poe he nui o ko lakou poe kahuna, no ka inoa a lakou e lawe mai ai maluna iho o lakou, i hookoaia’i lakou.

17 A eia kekahi, kapa iho la lakou i ko lakou inoa o ko Anati-Nepai-Lehi; a ua kapaia lakou ma keia inoa, a, aole e kapa hou ia ko Lamana poe.

18 A hoomaka ae la lakou e lilo i poe kanaka ikaika loa ma ka hana: he oiaio, a ua launa pu me ko Nepai poe; nolaila, ua kohu pu lakou me lakou la, a hahai hou ole mai ka hoomainoino o ke Akua ia lakou.

MOKUNA 24

1 [mokuna 14, paukū 4] A eia kekahi, o ko Amaliki poe, a me ko Amulona poe, a me ko Lamana poe e noho ana ma ka aina o Amulona, a ma ka aina o Helama no hoi, a ma ka aina o Ierusalema, a ma ka aina a pau a puni, ka poe i hoohuli ole ia’i, a i lawe ole ai maluna iho o lakou i ka inoa o Anati-Nepai-Lehi, ua hookonokonoia’e e ko Amaliki poe, a e ko Amulona poe, e huhu aku i ko lakou poe hoahanau;

2 A lilo iho la ko lakou inaina ku e ia lakou i mea eha nui loa, a hoomaka ae la lakou e kipi aku i ko lakou Alii, a aole lakou i makemake ia ia i Alii no lakou; nolaila, lalau aku la lakou i na mea kaua e ku e mai i ka poe kanaka o Anati-Nepai-Lehi.

3 [m 14, p 5] Ano, hooili iho la ke Alii i ke aupuni maluna iho o kana keikikane a kapa iho la oia i kona inoa o Anati-Nepai-Lehi.

4 A make aku la ke Alii i ua makahiki hookahi la, a ko Lamana poe i hoomaka ai e hoomakaukau iho no ke kaua ku e mai i ka poe kanaka o ke Akua.

5 Ano, i ka wa a Amona a me kona mau hoahanau, a me ka poe a pau i pii pu me ia, i ike ai i ka hoomakaukau ana o ko Lamana poe e luku mai i ko lakou poe hoahanau, hele ae la lakou i ka aina o Midiana, a malaila o Amona i halawai pu ai me kona mau hoahanau a pau; a mailaila i hele aku ai lakou i ka aina o Isemaela, e hiki ia lakou ke kukakuka pu me Lamoni, a me kona kaikuaana hoi o Anati-Nepai-Lehi, no ka mea lakou e hana ai e hoomalu ia lakou iho i ko Lamana poe.

6 Ano, aole kekahi mea mawaena o ka poe kanaka i hoohulihia’i i ka Haku, nana e lalau aku i na mea kaua e ku e i kona poe hoahanau; aole loa, aole hoi e hoomakaukau aku i kekahi mea no ke kaua; he oiaio, a kauoha mai la no hoi ko lakou Alii ia lakou, i ole ai lakou e hana.

7 Ano, eia na olelo ana i olelo aku ai i na kanaka no ia mea: Ke aloha aku nei au i ko’u Akua, e ko’u poe kanaka i alohaia, ua hoouna mai ko kakou Akua nui ma ka lokomaikai i ko kakou poe hoahanau nei, ko Nepai poe, ia kakou e hai olelo mai ia kakou, a e hoomaopopo mai ia kakou no na mooolelo a ko kakou poe kupuna hewa.

8 A, aia hoi, ke aloha aku nei au i ko’u Akua nui no kona haawi ana mei ia kakou kekahi hapa o kona Uhane e hoopalupalu mai i na naau o kakou, i hoomak’i kakou e hoolauna aku me keia poe hoahanau, me ko Nepai poe;

9 A, aia hoi, ke aloha aku nei hoi au i kuu Akua no ka hoomaopopoia’na o kakou ma keia hoalauna ana no na hala o kakou, a no ka nui o na pephi kanaka ana a kakou i hana’i;

10 A ke aloha aku nei no hoi au i kuu Akua, he oiaio, i kuu Akua nui, no kona ae ana mai ia kakou e mihi i ua mau mea nei, a no kona kala ana mai no hoi ia kakou i ua mau mea nei, i ko kakou mau hala a mau pephi kanaka ana he nui a kakou i hana’i, a lawe ana’ku i ka hewa mai na naau o kakou aku, ma o na hana maikai la a kana Keiki.

11 Ano, aia hoi, e ko’u poe hoahanau, he mea ano hiki ole no kakou (no ka mea, o ka poe lilo loa kakou o na kanaka a pau,) ke mihi i ko kakou mau hewa a pau a me na pepehi kanaka ana he nui loa a kakou i hana’i, a e noi i ke Akua e lawe aku ia mau mea mai na naau o kakou aku, no ka mea, he mea ane hiki ole ka lawa ana o ko kakou mihi imua o ke Akua, i lawe aku ai oia i ko kakou kohu.

12 [m 14, p 6] Ano, e o’u pe hoahanau i aloha loa ia, mahope iho o ko ke Akua lawe ana aku i ko kakou mau kohu, a ua lilo na pahikaua a kakou i uali, mai hookohu hou aku kakou i na pahikaua a kakou ma neia hope aku me ke koko o ko kakou poe hoahanau.

13 Aia hoi, ke i aku nei au ia oukou, Aole, aka e hoopaa kakou i na pahikaua a kakou, i hookohu ole ia’i lakou me ke koko o ko kakou poe hoahanau: no ka mea, malia paha ina e hookohu hou aku kakou i na pahikaua a kakou, aole e hiki ke holoi huali hou ia ua mau mea nei ma o ke koko la o ke Keiki a ke Akua nui, e hookaheia auanei no ke kalahala ana o ko kakou mau hewa.

14 A ua aloha mai ke Akua nui ia kakou, a hoike mai la i ua mau mea nei ia kakou, i make ola ai kakou: he oiaio, a ua hoike mai oia i ua mau mea nei ia kakou mamua o ka hiki ana mai, no ka mea, e aloha mai ana oia i na uhane o kakou e like me kona aloha ana i ka kakou poe keiki; nolaila, ma kona aloha ke hoalauna mai nei oia ia kakou ma o kona poe anela la, i hiki i ka kumumanao hoola ke hoikeia mai ia kakou no hoi e like me ia i na hanauna e hiki mai ana.

15 E, nani wale ke aloha o ko kakou Akua! Ano, aia hoi, he mea ane hiki ole ia kakou ke loaa ka lawe ana’ku o na kohu o kakou mai o kakou aku, a ua hoohualiia na pahikaua a lakou, ea, e huna aku kakou ia mau mea i malama huali ia’i ua mau mea la, me he mea hoike la i ko kakou Akua ma ka la hope, a ma ka la a kakou e laweia mai ai e ku imua ona e hookolokoloia, aole o kakou i hookohu aku i na pahikaua a kakou iloko o ke koko o ko kakou poe hoahanau mahope iho o kona haawi ana i kana olelo ia kakou, a i hoomaemae mai ai ia kakou ma o ua mea la.

16 Ano, e ko’u poe hoahanau, ina e imi mai ko kakou poe hoahanau e luku moa ia kakou, aia hoi, e huna aku kakou i na pahikaua a kakou, he oiaio, e kanu hohonu aku kakou ia mau mea iloko o ka honua, i malama huali ia’i ia mau mea, me he hoike la ma ka la hope aole o kakou i hana aku me ua mau mea la; a ina e luku mai ko kakou poe hoahanau ia kakou, aia hoi, e haele aku no kakou i ko kakou Akua la a e hoolaia’i.

17 [m 14, p 7] Ano, eia kekahi, i ka wa a ke Alii i hoopau ai i keia mau olelo, a i hoakoakoa pu ia mai ai na kanaka a pau, lalau aku la lakou i na pahikaua a lakou, a me na mea kaua a pau i hanaia’i no ka hookahe ana o ko ke kanaka koko, a kanu hohonu iho la lakou ia mau mea iloko o ka honua;

18 A o keia ka lakou i hana’i, he mea ia ma ko lakou manao e hoike aku ai i ke Akua, a i na kanaka hoi, aole lakou e hana hou aku me na mea kaua no ka hookahe ana o ko ke kanaka koko; a o keia ka lakou i hana’i, e hoohiki ana a e hana berita ana me ke Akua, ua makemake loa lakou e haawi aku i ko lakou mau ola iho, mamua o ka hookahe ana i ke koko o ko lakou poe hoahanau; a ua makemake loa lakou e haawi aku i kekahi hoahanau, mamua o ka lawe mai ana mai ona mai; a ua makemake lakou e hana nui me ko lakou mau lima, mamua o ka hoomaunauna ana i na la o lakou ma ka palaualelo;

19 A pela kakou i ike ai i ka wa i hoohuliia mai ai keia poe o Lamana e manaoio a e ike i ka oiaio, ua kupaa lakou, a e hoomanawanui aku a hiki aku i ka make, mamua o ka hana hewa aku; a pela kakou i ike ai, ua kanu iho la lakou i na mea o ka malu, oia hoi ua kanu iho la lakou i na mea kaua, i loaa’i ka malu.

20 [m 14, p 8] A eia kekahi, hoomakaukau iho la ko lakou poe hoahanau, ko Lamana poe, no ke kaua, a pii mai la i ka aina o Nepai, me ka manao e pepehi mai i ke Alii, a e hoonohonoho iho i kekahi mea ma kona hakahaka, a e luku mai no hoi i ka poe kanaka o Anati-Nepai-Lehi mailoko aku o ka aina.

21 Ano i ka wa a ka poe kanaka i ike ai e hele ku e mai ana lakou ia lakou nei, haele aku la lakou nei mawaho e halawai pu me lakou, a hoomoe iho la lakou nei ia lakou iho imua o lakou i ka honua, a hoomaka ae la e kahea aku i ka inoa o ka Haku; a pela iho la ke ano o ko lakou mau kino i ka wa i hoomaka ai ko Lamana poe e haule mai maluna iho o lakou, a hoomaka iho la e pepehi mai ia lakou me ka pahikaua;

22 A pela iho la me ke ku e ole ia’ku, pepehi mai la lakou la i hookahi tausani a me na mea keu elima o lakou nei; a ke ike nei makou ua pomaikai lakou, no ka mea, ua haele aku la lakou e noho pu me ko lakou Akua.

23 Ano, i ka wa a ko Lamana poe i ike ai aole e hee aku ko lakou poe hoahanau mai ka pahikaua aku, aole hoi lakou e huli ae i ka lima akau, aole hoi i ka lima hema, aka e moe no lakou ilalo a make, a hoolea aku i ke Akua i ka wa e make ana malalo iho o ka pahikaua:

24 Ano, i ko Lamana poe i ike ai i keia, hooki ae la lakou i ka pepehi ana ia lakou nei; a ua nui ka poe nona na naau i pehu ai iloko o lakou no ka poe o ko lakou poe hoahanau i haule iho malalo iho o ka pahikaua, no ka mea, mihi iho la lakou no na mea a lakou i hana’i.

25 [m 14, p 9] A eia kekahi, hoolei iho la lakou i na mea kaua o lakou ilalo, aole lakou e lalau hou aku ia mau mea, no ka mea, ua walania iho la lakou no na pephi kanaka a lakou i hana’i; a iho mai la lakou ilalo e like me ko lakou poe hoahanau, e paulele ana i ke aloha o ka poe nona na lima i hooakaia e pepehi mai ia lakou.

26 [m 14, p 10] A eia kekahi, ua hui pu ia me ka poe kanaka o ke Akua ia la kekahi poe he nui ae mamua o ka poe i pepehiia mai; a o ka poe i pepehi mai he poe kanaka pono lakou; nolaila, aole kumu ko makou e kanalua ai no ko lakou hoolaia’na.

27 A, aole kekahi kanaka hewa i pepehiia mawaena o lakou; aka, ua nui ae lakou mamua o ka tausani hookahi i laweia mai i ka ike i ka oiaio; a pela kakou i ike ai e hana ana ka Haku ma na aoao he nui e hoola mai i kona poe kanaka.

28 Ano, o ka nui loa o ua poe la o ko Lamana, ka poe i pepehi ae i ko lakou poe hoahanau, no ko Amaliki poe a me ko Amulona poe lakou, a mamuli o ka aoao o ko Nehora ka nui loa o lakou.

29 Ano, mawaena o ua poe la ka poe i hui pu ai me ka poe kanaka o ka Haku, aole kekahi no ko Amaliki poe, aole hoi no ko Amulona poe, aole hoi no ka aoao o Nehora, aka, he poe mamo io na Lamana laua me Lemuela:

30 A pela ua hiki ia kakou ke ike lea, mahope iho o ka hoomalamalamaia’na o na kanaka e ka Uhane o ke Akua, a ua loaa ka ike nui no na mea e pili ana i ka pono, a, alaila haule aku iloko o ka hewa a me ka hala, ua lilo lakou i poe paakiki loa aku, a pela i lilo ai ko lakou noho ana i ino loa ae, mamua o ko lakou, ina aole lakou i ike e i keia mau mea.

MOKUNA 25

1 [mokuna 14, paukū 11] A, aia hoi kekahi, ua huhu nui loa ae ua poe la o Lamana, no ko lakou pepehi ana i ko lakou poe hoahanau; nolaila, hoohiki iho la lakou e hoopai maluna iho o ko Nepai poe; a, aole lakou i hoao hou e pepehi mai i ka poe kanaka o Anati-Nepai-Lehi ia manawa;

2 Aka, lawe aku la lakou i ko lakou poe koa a hele aku la iloko o na palena o ka aina o Zarahemela, a haule iho la maluna iho o ka poe kanaka e noho ana ma ka aina Amoniha, a luku ae la ia lakou.

3 A mahope iho o ia mea, ua nui na kaua o lakou me ko Nepai poe, a ma ua mau kaua nei ua hooauheeia’ku a pepehiia’ku lakou;

4 A mawaena o ko Lamana poe i pepehiia, ua aneane pau loa ka poe hui a Amulona a me kona poe hoahanau, ka poe kahuna no lakou mamua a Noa, a ua pepehiia lakou e na lima o ko Nepai poe;

5 A o ka poe o lakou i koe ua holo aku iloko o ka waonahele hikina, a ua lalau wale iho i ka mana a noho alii ana maluna iho o ko Lamana poe, a kena ae la i kekahi poe he nui o ko Lamana poe e puhiia ma ke ahi, no ko lakou manaoio:

6 No ka mea, o kekahi poe he nui loa o lakou mahope iho o ka loaa ana ka poino nui a me na mea pilikia he nui wale me neia, hoomaka iho la e hooeueuia e hoomanao iho i na olelo a Aarona me kona poe hoahanau i hai aku ai ia lakou ma ko lakou aina; nolaila, hoomaka ae la lakou e hoomaloka aku i na mooolelo o ko lakou poe kupuna, a e manaoio i ka Haku, a nana i haawi i ka mana nui i ko Nepai poe; a pela hoi ua nui wale o lakou i hoohuliia’i ma ka waonahele.

7 [m 14, p 12] A eia kekahi, kena ae la ua poe luna la, o lakou no ka poe i koe o na keiki a Amulona, e pepehiia lakou nei, he oiaio, o ka poe a pau i manaoio i ua mau mea nei.

8 Ano, no keia luku ana ua hooeueuia kekahi poe he nui loa o ko lakou poe hoahanau me ka huhu; a hoomaka ae la ka paio ma ka waonahele; a hoomaka ae la ko Lamana e imi i ka poe keiki a Amulona a me kona poe hoahanau, a hoomaka ae la e pepehi aku ia lakou, a hee aku la lakou iloko o ka waonahele hikina.

9 A, aia hoi, ua imiia lakou i keia manawa e ko Lamana poe: pela i ko mai ai na olelo a Abinadi, ana i olelo mai ai no na hua a ka poe kauna, ka poe i kena mai i loaa’i ia ia ka make ma ke ahi.

10 No ka mea, i aku la oia ia lakou, O ka mea a oukou e hana mai ai ia’u, he hoailona auanei ia no na mea e hiki mai ana.

11 Ano, o Abinadi no ka mua i loaa’i ka make ma ke ahi, no kona manaoio aku i ke Akua: ano, eia no ke ano o kana olelo, e loaa auanei i kekahi poe he nui ka make ma ke ahi, e like me kana i loaa’i.

12 A i aku la oia i ka poe kahuna a Noa, na ka lakou poe hua e kena aku auanei e pepehiia a make na mea he nui, ma ke ano e like me ia, a e hoopuehuia’ku a e pepehiia’ku lakou, me he hipa la me ke kahu ole i hoaia’ku a i pepehiia’ku e na holoholona hihiu; ano, aia hoi, ua ko mai ua mau olelo nei, no ka mea, ua hoaia’ku lakou e ko Lamana poe, a ua imiia’ku lakou, a ua hahauia’ku lakou.

13 [m 14, p 13] A eia kekahi, i ka wa a ko Lamana poe i ike ai ua hiki ole ia lakou ke lanakila maluna iho o ko Nepai poe, hoi hou aku la lakou i ko lakou aina iho; a ua nui loa ka poe o lakou i hele mai i ka aina o Isemaela a me ka aina o Nepai, a hui pu iho la ia lakou iho i ka poe kanaka o ke Akua, oia ka poe kanaka o Anati-Nepai-Lehi;

14 A kanu iho la hoi lakou i na mea kaua o lakou, e like me ka ko lakou poe hoahanau i hana’i, a hoomaka ae la lakou e lilo i poe kanaka pono; a hele aku la lakou ma na aoao o ka Haku, a malama iho la i kana mau kauoha a me kona mau kanawai,

15 He oiaio, a ua malama iho lakou i ke kanawai o Mose: no ka mea, he mea e pono ai no lakou e malama i ke kanawai o Mose i keia manawa, no ka mea, aole i pau ia i ka hookoia. Aka, me ke kanawai o Mose pu, ua nana nae lakou imua i ka hiki ana mai o Kristo, e manao aua he hoailona ke kanawai o Mose o kona hiki ana mai, a e manaoio ana he mea e pono ai na lakou e malama i kela mau oihana mawaho, a hiki i ka manawa e hoikeia mai oia ia lakou.

16 Ano, aole lakou i manao ua hiki mai ke ola ma o ke kanawai la o Mose; aka, o ke kanawai o Mose he mea ia e hooikaika ai i ko lakou manaoio iloko o Kristo; a pela hoi lakou i hoopaa mai ai i kekahi manaolana, ma o ka manaoio la, i ke ola mau loa, e hilinai ana i ka Uhane o ka wanana, ka mea i olelo mai no ua mau mea la e hiki mai ana.

17 Ano, aia hoi, hauoli nui loa iho la o Amona, a me Aarona, a me Omanera, a me Himani, a me ko lakou poe hoahanau, no ka pomaikai a lakou i loaa’i mawaena o ko Lamana poe, e ike ana ua haawi mai la ka Haku ia lakou e like me ka lakou mau pule, a ua hooko mai nohoi i kana olelo ia lakou ma na mea a pau.

MOKUNA 26

1 [mokuna 14, paukū 14] A, ano, eia na olelo a Amona i kona poe hoahanau, penei ua mau olelo nei: E ko’u poe hoahanau, aia hoi, ke i aku nei au ia oukou, he kumu nui ko kakou e hauoli ai; no ka mea, ua hiki anei ia kakou ke manao, i ka wa a kakou i haalele aku ai i ka aina o Zarahemela; e haawi mai ana ke Akua ia kakou i na mea pomaikai nui me neia?

2 A, ano, ke ninau aku nei au, heaha la na mea pomaikai nui ana i haawi mai ai maluna iho o kakou? E hiki anei ia oukou ke hai mai?

3 Aia hoi, ke pane aku nei au no oukou, no ka mea, aia iloko o ka pouli mamua ko kakou poe hoahanau, ko Lamana poe, he oiaio, iloko o ka lua pouli loa; aka, aia hoi, pehea la ka nui loa o lakou i laweia mai e ike i ka malamalama kupaianaha o ke Akua? A eia no ka pomaikai ana i haawi mai ai maluna iho o kakou, ua hooiloia mai kakou i mau mea hana ma na lima o ke Akua, e hooko i keia hana nui.

4 Aia hoi, ke hauoli nei na tausani o lakou, a ua laweia mai iloko o ka pa o ke Akua.

5 Aia hoi, ua oo ka mahinaai, a pomaikai iho la oukou, no ka mea, na oukou i hookomo aku i ka pahikakiwi, a hoiliili iho la me ko oukou ikaika, he oiaio, a hana aku la oukou a pau ae la ka la; a, e nana aku oukou i ka nui loa o na pua a oukou, a e hoiliiliia auanei lakou iloko o na halepapaa, i helelei liilii ole ai lakou;

6 He oiaio, aole loa o lakou e wiliia ilalo e ka makani ino, ma ka la hope; he oiaio hoi, aole e kupikipikioia’i e na puahiohio; aka, i ka wa e hiki mai ai ka makani ino, e hoiliili pu ia lakou ma ko lakou wahi, e hiki ole ai i ka makani ino ke komo iloko o lakou; he oiaio, aole hoi lakou e puhiia’i me na makani ikaika, i kahi a ka enemi e makemake ai e hali ia lakou.

7 Aka hoi, aia no lakou ma na lima o ka Haku mona ka mahinaai, a nana no lakou; a e hookiekie mai oia ia lakou iluna ma ka la hope.

8 E hoomaikaiia ka inoa o ko kakou Akua; e memele aku kakou i kona nani, he oiaio, e haawi aku kakou i ke aloha i kona inoa hoano, no ka mea, ke hana la oia i ka pono a mau loa aku.

9 No ka mea, ina ua pii ole mai kakou mailoko mai o ka aina o Zarahemela, ina ua walania ano keia poe hoahanau aloha nui ia o kakou, ka poe nana i aloha nui mai me neia ia kakou, me ka inaina ku e mai ia kakou, he oiaio, a he poe malihini no hoi lakou i ke Akua.

10 [m 14, p 15] A eia kekahi, ia Amona i olelo ae i ua mau olelo nei, papa mai la kona kaikuaana o Aarona ia ia, i ka i ana: E Amona, ke makau nei au e kai ana kou olioli ia oe, e kaena aku.

11 Aka, i ae la o Amona ia ia, Aole au e kaena nei ma ko’u ikaika iho, aole hoi ma ko’u naauao iho; aka hoi, ua piha ko’u olioli, he oiaio, ua piha kuu naau me ka olioli, a e hauoli no au iloko o kuu Akua;

12 He oiaio, ke ike nei au he mea ole au; ma ko’u ikaika, ua nawaliwali au; nolaila, aole au e kaena aku no’u iho, aka e kaena aku au no ko’u Akua; no ka mea, ma kona ikaika ua hiki ia’u ke hana aku i na mea a pau; he oiaio, aia hoi, ua nui wale na hana mana nani a kakou i hana aku ai ma keia aina, no ua mau mea nei ea, e hiilani aku kakou i kona inoa no ka wa pau ole.

13 Aia hoi, nani wale ka nui loa o ko kakou poe hoahanau ana i hookuu mai ai, mai na eha o Gehena ae; a ua kaiia mai lakou e memele aku i ke aloha hoolapanai ana; a o keia mea no ka mana o kana olelo iloko o kakou; nolaila, aole anei o kakou he kumu nui e hauoli ai?

14 Ae, he kumu no ko kakou e hoolea aku ia ia, ia ao aku ia ao aku, no ka mea, oia no ke Akua kiekie loa, a ua hookuu mai i ko kakou poe hoahanau mai na kaulahao ae o Gehena.

15 He oiaio, ua hoopuniia lakou a puni me ka pouli a make mau loa; aka hoi, nana no i kai mai ia lakou iloko o kona malamalama mau loa, he oiaio, iloko o ke ola mau loa; a ua hoopuniia lakou a puni me ka lokomaikai keu loa o kona aloha; he oiaio, a o kakou no na mea hana ma kona mau lima, i hana’i i ua hana nui a kupanaha nei;

16 Nolaila, e kaena ae kakou, he oiaio, e kaena ae kakou iloko o ka Haku; he oiaio, e hauoli kakou, no ka mea, ua piha ko kakou olioli; he oiaio, e hoonani aku kakou i ko kakou Akua no ka wa pau ole. Aia hoi, owai la ka mea e hiki ke kaena’e iloko o ka Haku mamua o ka mea ku pono? He oiaio, owai la ka mea e hiki ke olelo oi aku mamua o ka mea pono, no kona mana nui, a no kona aloha, a no kona hoomanawanui i na keiki a kanaka? Aia hoi, ke i aku nei au ia oukou, ua hiki ole ia’u ke olelo aku i ka huna uuku loa a’u i manao ai.

17 Owai la ka mea i manao he aloha nui mai ko ke Akua me neia, i kona kaili ana mai ia kakou mai ko kakou wahi weliweli, hewa, a haumia?

18 Aia hoi, haele aku la kakou iloko o ka inaina, me na olelo weliweli ikaika e hoopau aku i kona ekalesia.

19 Aia hoi, no ke aha la oia i haawi ole mai ai ia kakou i ka make weliweli loa; he oiaio, no ke aha la oia i hookuu ole mai ai i ka pahikaua o kona hoopai e haule mai maluna iho o kakou, e hoolilo mai ia kakou i ka poho mau loa o ka manao?

20 E, me he mea la aneane e hee ana kuu uhane ma ua manao la. Aia hoi, aole oia i hana mai i kona hoopai maluna iho o kakou, aka, ma kona aloha nui ua kai mai ia kakou ma keia aoao o kela awawa mau loa o ka make a me ka poino, i ka hoolaaia’na o ko kakou mau uhane.

21 [m 14, p 16] Ano hoi, e o’u poe hoahanau, owai la ke kanaka ma kona ano maoli, i ike ai i keia mau mea? Ke i aku nei au ia oukou, aole kekahi i ike i ua mau mea nei, ke ole ia ka mea mihi:

22 He oiaio, o ka mea e mihi ana a e hana ana me ka manaoio,a e hoohua ae ana i na hua maikai, a e pule mau ana me ka hooki ole: i na mea e like me neia ua haawiia mai e ike i na mea pohihihi o ke Akua; he oiaio, o ka poe me neia e haawiia mai auanei e hoike aku i na mea i hoike ole ia’ku; he oiaio, a e haawiia mai auanei i ka poe me neia, e kai mai i na tausani o na uhane i ka mihi, oia, e like me ia i haawiia mai ai ia kakou e kai mai i ua poe hoahanau nei o kakou i ka mihi.

23 Ano, ke hoomanao nei anei oukou, e ko’u poe hoahanau, ua olelo aku kakou i ko kakou poe hoahanau ma ka aina o Zarahemela, Ea, ke pii aku nei makou i ka aina o Nepai, e hai olelo aku i ko kakou poe hoahanau, i ko Lamana poe, a hoomauakala mai la lakou ia kakou?

24 No ka mea, i mai la lakou ia kakou, Ke kuhi nei anei oukou ua hiki ia oukou ke kai mai i ko Lamana poe i ka ike i ka oiaio? Ke kuhi nei anei oukou ua hiki ia oukou ke hoomaopopo aku i ko Lamana poe i ka hewa o na mooolelo o ko lakou poe kupuna, he poe kanak ai oolea me lakou la; nona na naau e hauoli ana ma ka hookahe ana i ke koko; nona na la i lilo ai ma ka hana hewa loa; nona na aoao he mau aoao o ka mea lawehala, mai kinohi mai? Ano, e ko’u poe hoahanau, ke hoomanao nei oukou oia no ka lakou olelo.

25 [m 14, p 17] A eia hou ka lakou i olelo mai ai, E, e lalau aku kakou i na mea kaua ia lakou e hiki ia kakou ke hoopau aku ia lakou a me ka lakou hana hewa mailoko aku o ka aina, o kawowo mai lakou maluna iho o kakou a hoopau mai ia kakou.

26 Aka hoi, e ko’u poe hoahanau, haele mai la kakou iloko o ka waonahele, aole me ka manao e hoopau aku i ko kakou poe hoahanau, aka me ka manao e hiki paha ia kakou ke hoola aku i kekahi mau uhane he uuku o lakou.

27 Ano, i ka wa i kaumaha ai ko kakou mau naau, a kokoke kakou e hoi hou, aia hoi, hooluolu mai la ka Haku ia kakou, a i mai la, E hele aku mawaena o kou poe hoahanau, ko Lamana poe, a e haawe me ka hoomanawanui i kou mau popilikia, a na’u e haawi aku ia oe i ka pomaikai.

28 A, ano hoi, ua haele mai la kakou, a hele aku la mawaena o lakou; a ua hoomanawanui iho iloko o na eha o kakou, a ua loaa ia kakou kela mea pilikia keia mea pilikia; he oiaio ae la, ua hele aku mai ia hale aku ia hale aku, e hilinai ana maluna o ke aloha o ko ke ao nei; aole maluna o ke aloha o ko ke ao nei wale no, aka maluna’e o ke aloha o ke Akua.

29 A ua komo aku kakou iloko o na hale o lakou a ao aku la ia lakou, a ua ao aku la kakou ia lakou ma na alanui o lakou; he oiaio, a ua ao aku kakou ia lakou maluna ae o na puu o lakou; a ua komo no hoi kakou iloko o na luakini o lakou, a me na halehalawai o lakou, a ao aku la ia lakou; a ua hooleiia mai kakou mawaho, a hoomaewaewaia mai, a kuhaia mai, a papaiia mai ma ko kakou mau papalina; a ua hailukuia mai kakou, a hopuia mai, a nakinakiia mai me na kaula ikaika, a hahaoia mai iloko o ka halepaahao; a ma o ka mana a naauao la o ke Akua, ua hoopakele hou ia mai kakou;

30 A ua loaa ia kakou kela ano keia ano o ka pilikia, a o keia mau mea a pau, i hiki ia kakou paha ke lilo i poe e hoola i kekahi uhane; a ua manao wale kakou e piha ana ko kakou olioli, ina paha ua hiki ia kakou ke lilo i poe hoola i kekahi poe.

31 [m 14, p 18] Ano, aia hoi, ua hiki ia kakou ke nana aku a ke ike aku i na hua o ka kakou hana; a he kakaikahi anei lakou? Ke i aku nei au ia oukou, aole, ua nui loa aku lakou; he oiaio, a ua hiki ia kakou ke hoike aku no ko lakou oiaio, no ko lakou aloha i na hoahanau o lakou, a ia kakou no hoi.

32 No ka mea, aia hoi, ua makemake loa ka! lakou e mohai aku i na ola o lakou, mamua o ke kaili aku i ke ola o ko lakou poe enemi; a ua kanu hohonu iho la lakou i ko lakou mau mea o ke kaua iloko o ka honua, no ko lakou aloha i ko lakou poe hoahanau.

33 A, aia hoi, ke olelo aku nei au ia oukou, he aloha nui anei me neia mamua ma ka aina a puni? Aia hoi, ke i aku nei au ia oukou, aole, aole hoi mawaena o ko Nepai poe.

34 No ka mea hoi, e lalau no lakou i na mea kaua e ku e i ko lakou poe hoahanau; aole lakou e ae aku e pepehiia mai lakou. Aka hoi, e nana aku i ka nui loa o ua poe nei i waiho aku ilalo i na ola o lakou; a ua ike kakou ua haele aku la lakou i ko lakou Akua la, no ko lakou aloha, a no ko lakou inaina i ke hewa.

35 Ano, aole anei o kakou he kumu e hauoli ai? Ae, ke i aku nei au ia oukou, aole loa he poe kanaka nona ke kumu nui me neia e hauoli ai e like me kakou nei, mai ka makamua mai o ke ao nei; he oiaio, a ua kaiia’ku la kuu olioli ma ke kaena ma ko’u Akua; no ka mea, nona ka mana a pau, ka naauao a pau, a me ka ike maopopo a pau; ke hoomaopopo mai nei oia i na mea a pau, a he Mea aloha, a hiki aku i ka hoola ana, i ka poe e mihi ana a e manaoio ana i kona inoa.

36 Ano, ina he kaena keia, alaila pela au e kaena aku ai; no ka mea, o keia no kuu ola a me kuu malamalama, ko’u olioli a me ko’u hoolaia’na, a me ko’u hoolapanaiia’na mai mai ka poino mau loa mai. He oiaio, hoomaikaiia iho la ka inoa o ko’u Akua, nana i malama mai i keia poe kanaka, he lala lakou o ka laau Iseraela, a ua lilo ae la mai kona kino aku, iloko o kahi aina e; he oiaio, ke i aku nei au, e hoomaikaiia ka inoa o ko’u Akua, nana i malama mai ia kakou, he poe aea iloko o kahi aina e.

37 Ano, e ko’u poe hoahanau, ke ike nei kakou e malama ana ke Akua i kela lahuikanaka i keia lahuikanaka, ma kela aina keia aina a lakou i noho ai; he oiaio, ke helu mai la oia i kona poe kanaka, a, aia no kona mau naau aloha maluna iho o ko ka honua a pau. Ano, oia no ko’u olioli, a me ko’u hoole nui ana’ku; he oiaio, a e aloha aku au i ko’u Akua no ka wa pau ole. Amene.

MOKUNA 27

1 [mokuna 15, paukū 1] Ano, eia kekahi, i ka wa a kela poe o ko Lamana, ka poe i hele aku e kaua ku e aku i ko Nepai poe, i ike ai, mahope iho o na aumeume he nui o lakou e anai mai ia lakou la, ua make hewa ke imi ae i ko lakou anaiia ana, hoi hou aku la lakou i ka aina o Nepai.

2 A eia kekahi, ua huhu nui loa iho la ko Amaliki poe, no ko lakou lilo. A ia lakou i ike ai ua hiki ole ia lakou ke hoopai aku i ko Nepai poe, hoomaka ae la lakou e hookonokono ae i na kanaka ma ka huhu i ko lakou poe hoahanau, ka poe kanaka o Anati-Nepai-Lehi; nolaila, hoomaka hou ae la lakou e luku mai ia lakou nei.

3 Ano, hoole hou aku la ua poe kanaka nei e lalau aku i na mea kaua o lakou, a ae aku la lakou e pepehiia mai e like me na makemake o ko lakou poe enemi.

4 Ano, ia Amona a me kona poe hoahanau i ike ai i ua hana luku nei mawaena o ka poe a lakou i aloha nui aku ai, a mawaena o ka poe i aloha nui mai ia lakou; no ka mea, ua malamaia lakou nei, me he mea la he poe anela lakou nei i hoounaia mai mai ke Akua mai e hoola ia lakou mai ka make mau loa; nolaila, ia Amona a me kona poe hoahanau i ike ai i ua hana luku nui nei, ua haehae ae la lakou me ke aloha, a e ae la i ke Alii,

5 E, e houluulu aku kakou i keia poe kanaka o ka Haku, a e lilo kakou ilalo i ka aina o Zarahemela i ko kakou poe hoahanau, i ko Nepai poe, a e auhee aku mawaho o na lima o ko kakou poe enemi, i luku ole ia mai ai kakou.

6 Aka, i mai la ke Alii ia lakou, Aia hoi, e luku mai ko Nepai poe ia makou, no ka nui o na pepehi kanaka a me na hewa a makou i hana’ku ai ia lakou.

7 A i ae la o Amona, E hele aku no au a e ninau aku i ka Haku, a ina e olelo mai oia ia kakou, e iho aku ilalo i ko kakou poe hoahanau, e hele anei oukou?

8 A i mai la ke Alii ia ia, Ae: ina e i mai ka Haku ia makou e hele, e hele aku no makou ilalo i ko kakou poe hoahanau, a e lilo makou i poe kauwa hooluhi na lakou, a hiki aku i ka wa a makou e hoouku aku ai ia lakou, i na pepehi kanaka a me na hewa a makou i hana aku ai ia lakou.

9 Aka, i ae la o Amona ia ia, He mea ku e i ke kanawai o ko kakou poe hoahanau, ka mea i kauia ai e ko’ makuakane, ka noho kauwa hooluhi ana o kekahi mawaena o lakou; nolaila, e iho kakou ilalo a e hilinai aku i ke aloha o ko kakou poe hoahanau.

10 Aka i mai la ke Alii ia ia, E ninau aku i ka Haku, a ina e olelo mai oia ia makou e hele, e hele no makou; i ole ia e make no makou ma ka aina.

11 [m 15, p 2] A eia kekahi, hele aku la o Amona a ninau aku la i ka Haku, a i mai la ka Haku ia ia,

12 E lawe aku i keia poe kanaka iwaho o keia aina, i make ole ai lakou, no ka mea, ua nui ko Satana mana ma na naau o ko Amaliki poe, ka poe e hookonokono ae nei i ko Lamana poe e huhu ae i ko lakou poe hoahanau, e pepehi ae ia lakou; nolaila, e hele aku oe iwaho o keia aina; a pomaikai iho la keia poe kanaka ma keia hanauna; no ka mea, na’u no lakou e hoola.

13 [m 15, p 3] Ano, eia kekahi, hele aku la o Amona hele aku la o Amona a hai ae la i ke Alii i na olelo a pau a ka Haku i olelo mai ai ia ia.

14 A houluulu pu aku la lakou i ko lakou poe kanaka; he oiaio, i ka poe kanaka a pau o ka Haku, a houluulu pu iho la i na pua a me na ohana holoholona o lakou, a haele aku la mawaho o ka aina, a komo aku la iloko o ka waonahele i hookaawale ae i ka aina o Nepai mai ka aina o Zarahemela ae, a hiki aku la ma o kokoke i na palena o ka aina.

15 [m 15, p 4] A eia kekahi, i ae la o Amona ia lakou, Aia hoi, owau a me ko’u mau hoahanau e hele aku no makou iloko o ka aina o Zarahemela, a e noho oukou maanei a hiki i ka wa a makou e hoi hou mai ai; a e hoao aku makou i na naau o ko makou poe hoahanau, ina paha e ae mai lakou ia oukou e komo ae iloko o ko lakou aina.

16 [m 15, p 5] A eia kekahi, i ko Amona ma hele ana aku iloko o ka aina, halawai pu ae la oia a me kona poe hoahanau me Alama, ma o ma kahi i olelo e ia; a, aia hoi, he halawai hauoli ana neia.

17 Ano, no ka nui loa o ka olioli o Amona ua piha iho la oia; he oiaio, ua aleia oia iloko o ka olioli o kona Akua, i ka hoopau ana i kona ikaika; a haule hou iho la oia i ka honua.

18 Ano aole anei o keia he olioli nui loa? Aia hoi, he olioli keia a kekahi e loaa ole ai ke ole ia he mea mihi oiaio a imi haahaa i ka pomaikai.

19 Ano, o ka olioli o Alama i ka halawai ana me kona poe hoahanau ua nui io no ia, a me ka olioli no hoi o Aarona, a o Omanera, a me Himani; aka hoi o ko lakou olioli aole ia i oi aku mamua o ko lakou ikaika.

20 [m 15, p 6] Ano, eia kekahi, alakai aku la o Alama i kona poe hoahanau i ka aina o Zarahemela, i kona hale iho. A haele aku la lakou a hai ae la i ka lunakanawai nui i na mea a pau a lakou i loaa’i ma ka aina o Nepai, mawaena o ko lakou poe hoahanau, ko Lamana poe.

21 [m 15, p 7] A hoouna aku la ka lunakanawai nui i kekahi olelo hoolaha mawaena o ka aina a pau, e noi ana i ka leo o na kanaka no ka hookomo ana i ko lakou poe hoahanau, ka poe kanaka o Anati-Nepai-Lehi.

22 A hiki mai la ka leo o na kanaka, i ka i ana, Aia hoi, na makou e haawi aku i ka aina Ieresona, aia no ia ma ka hikina ma ke kai, e pili ana i ka aina Momona, a aia no ia ma ka hema o ka aina o Momona; a o ua aina Ieresona nei oia no ka aina a makou e haawi aku ai i ko makou poe hoahanau i hooilina.

23 A, aia hoi, e hoonoho aku makou i ko makou poe koa mawaena o ka aina Ieresona a me ka aina o Nepai, e hiki ia makou ke hoomalu i ko makou poe hoahanau ma ka aina o Ieresona; a o keia mea ka makou e hana’i no ko makou poe hoahanau, no ko lakou makau e lalau aku i na mea kaua e ku e i kok lakou poe hoahanau, o hana lakou i ka hewa: A ua hiki mai ua makau nui nei o lakou, no ko lakou mihi eha a lakou i loaa’i, no ka nui loa o na pepehi kanaka o lakou, a me ka lakou hana hewa weliweli.

24 Ano hoi, o keia ka makou e hana’i i ko makou poe hoahanau, e hiki ia lakou ke noho ma ka aina o Ieresona; a na makou e paku ia lakou nei mai ko lakou poe enemi aku me ko makou poe koa, ina e haawi mai lakou i kau wahi o ko lakou waiwai e kokua mai ia makou, e hiki ia makou ke malama ola i ko pokou poe koa.

25 [m 15, p 8] Ano, eia kekahi, ia Amona i lohe ai i keia mea, hoi aku la oia i ka poe kanaka o Anati-Nepai-Lehi, a o Alama no hoi kekahi pu me ia, iloko o ka waonahele, i kahi o lakou i kukulu ai i na halelewa o lakou, a hoike aku la ia lakou i keia mau mea a pau. A hai aku la no hoi o Alama i kona hoohuliia ana me Amona, a me Aarona, a me kona poe hoahanau.

26 A hoohauoli nui iho la ia mea ia lakou. A iho aku la lakou ilalo iloko o ka aina o Ieresona, a noho iho la ma ka aina o Ieresona; a ua kapaia’i lakou e ko Nepai ka poe kanaka o Amona: nolaila, ua hookoaia’e e kela inoa ma ia hope aku;

27 A mawaena o ka poe kanaka o Nepai lakou, a ua helu pu ia no hoi lakou maweana o ka poe kanaka no ka ekalesia o ke Akua. A ua kaulana no hoi lakou no ko lakou ikaika i ke Akua, a i na kanaka hoi; no ka mea, ua pono loa lakou a pololei ma na mea a pau; a ua kupaa lakou ma ka manaoio o Kristo, a hiki aku i ka hopena.

28 A ua nana aku la lakou i ka hookahe ana i ke koko o ko lakou poe hoahanau me ka hoopailua nui loa; aole hoi i hiki ia lakou ke koiia mai e lalau aku i na mea kaua e ku e i ko lakou poe hoahanau; aole hoi lakou i nana aku i ka make me ka makau iki, no ko lakou manaolana a ike ia Kristo a me ke alahouana; nolaila, ua aleia ka make ia lakou e ka lanakila o Kristo maluna iho ona;

29 Nolaila, e ae aku lakou e meka ma ke ano hoomainoino a hoopopilikia loa i hiki ke hanaia mai e ko lakou poe hoahanau, mamua o ko lakou lalau ana i ka pahikaua a i ka pahikaua pokole paha e hahau aku ia lakou.

30 A pela iho la he poe kanaka ikaika a alohaia lakou, he poe kanaka i hoomaikai nui loa ia e ka Haku.

MOKUNA 28

1 [mokuna 15, paukū 9] Ano, eia kekahi, mahope iho o ka hoonohoia’na o ka poe kanaka o Amona ma ka aina o Ieresona, a he ekalesia no hoi i kukuluia’i ma ka aina o Ieresona; a i hoonohoia ka poe koa o ko Nepai a puni o ka aina o Ieresona; he oiaio, ma na palena a pau a puni o ka aina o Zarahemela; aia hoi, ua hahai mai la ka poe koa o ko Lamana poe i ko lakou poe hoahanau iloko o ka waonahele.

2 A pela hoi he kaua weliweli; he oiaio, he kaua i ike ole ia’i kona like mamua mawaena o ka poe kanaka a pau ma ka aina, mai ka manawa mai a Lehi i haalele aku ai ia Ierusalema; he oiaio ae la, ua lukuia na umi o na tausani o ko Lamana poe a mokakiia’ku la i o ia nei.

3 He oiaio hoi, he luku weliweli no hoi mawaena o ka poe kanaka o Nepai; ua hooauheeia a hoopuehuia nea ko Lamana poe, a hoi hou aku la ka poe kanaka o Nepai i ko lakou aina.

4 Ano, he manawa keia i lohea ai ka uwe nui a me ke kanikau mawaena o ka aina a pau, mawaena o ka poe kanaka o Nepai a pau;

5 He oiaio, ke kupinai o na wahinekanemake e uwe ana no ka lakou poe kane, a me na makuakane e uwe ana no ka lakou poe keikikane, o ke kaikamahine no ke kaikunane; he oiaio, ke kaikunane no ka makuakane: a pela i loheia’i ke kupinai o ka uwe ana mawaena o lakou a pau: e uwe ana no ko lakou mau mea pili i pepehiia’i.

6 Ano, he oiaio no, he la kaumaha no keia; he oiaio, he manawa luuluu io no, a he manawa hooke ai nui a pule:

7 A pela i pau ai ka makahiki umikumamalima o ka noho luna ana o na Lunakanawai maluna iho o ka poe kanaka o Nepai;

8 A oia no ka mooolelo o Amona a me kona poe hoahanau, o ko lakou hele ana ma ka aina o Nepai, o ko lakou mau eha ma ka aina, o ko lakou mau kaumaha, a me ko lakou mau popilikia, a me ko lakou olioli i hiki ole ke hoomaopopoia’ku a me ka hoo kipaia’na a me ka malu o ka poe hoahanau ma ka aina o Ieresona. Ano, na ka Haku, ka Mea Hoolapanai no na kanaka a pau, e hoopomaikai i ko lakou mau uhane no ka wa pau ole.

9 [m 15, p 10] A o keia no ka mooolelo o na kaua a me na paio mawaena o ko Nepai poe, a me na kaua no hoi mawaena o ko Nepai poe a me ko Lamana poe: a ua pau ae la ka makahiki umikumamalima o ke au o na Lunakanawai;

10 A mai ka makahiki mua a hiki i ka umikumamalima, ua hiki mai ka hoopauia ana o na ola he nui na tausani; he oiaio, ua hiki mai ka hookahi koko weliweli loa ana;

11 A ua waiho haahaa ia na kino o na tausani he nui iloko o ka lepo, oiai e popopo ana na kino o na mea he nui na tausani ma na ahu maluna iho o ka ili o ka honua; he oiaio, a ua nui na tausani e uwe ana no ka make ana o ko lakou mau mea pili, no ka mea, he kumu ko lakou e makau ai, e like me na olelo paa a ka Haku, ua hookuuia lakou la i kahi o ka poino pau ole;

12 Oiai e uwe io ana na tausani o na mea e ae no ka make o ko lakou mau mea pili, e hauoli ana a e kaena ana nae lakou iloko o ka manaolana, a e ike ana no hoi, e like me na olelo paa a ka Haku, ua hookiekieia lakou la e noho ma ka lima akau o ke Akua, i kahi o ka pomaikai pau ole, ia ao aku ia ao aku:

13 A pela kakou e ike nei i ka nui o ka like ole o na kanaka no ka hewa a me ka hala, a me ka mana o ka diabolo, i hiki mai ai ma o na manao maalea la, ana i noonoo ai e hoopahele mai i na naau o na kanaka;

14 A pela kakou e ike nei he mea nui loa ka e pono ai ka hooikaika o na kanaka e hana iloko o na pawaina o ka Haku; a pela no hoi kakou e ike nei i ke kumu nui no ke kaumaha, a no ka hauoli ana no hoi: o ke kaumaha no ka make a me ka luku mawaena o na kanaka, a o ka hauoli hoi no ka malamalama o Kristo i ke ola.

MOKUNA 29

1 [mokuna 15, paukū 11] E, ina he anela au, a i hiki ke loaa ka makemake o kuu naau, e hiki ia’u ke hele aku e olelo aku me ka pu o ke Akua, me kahi leo e hoohaalulu ai i ka honua, a e hea aku i ka mihi i kela lahuikanaka i keia lahuikanaka;

2 He oiaio, ina no ua hai aku au i kela uhane keia uhane, me he mea la me ka leo o ka hekili, i ka mihi a me ke kumumanao hoolapanai, na lakou e mihi a e hele mai i ko kakou Akua la, i ole ai he kaumaha hou maluna iho o ka ili o ka honua a pau.

3 Aka hoi, he kanaka no au, a ke hewa nei au ma kuu makemake ana; no ka mea, e oluolu au e pono ai me na mea a ka Haku i haawi mai ai ia’u.

4 Aole wau e pono e alealeia ma na makemake o’u, ma ke kauoha paa o ke Akua pololei, no ka mea, ua ike au e haawi mai ana oia i na kanaka e like me ko lakou makemake, ina paha i ka make, ina paha i ke ola; he oiaio, ua ike au e haawi mai ana oia i na kanaka, e like me ko lakou ake ana; ina paha i ke ola mau loa ua mau ake nei ina paha i ka make mau loa;

5 He oiaio, a ua ike au ua hiki mai ka pono a me ka hewa imua o na kanaka a pau; a o ka mea i ike ole ai i ka pono mai ka hewa aku ua kina ole oia; aka, o ka mea i ike ai i ka pono a me ka hewa, ia ia i haawiia mai e like me kona mau makemake; ina e makemake ana i ka pono, a i ole ia, i ka hewa paha; i ke ola a i ole ia i ka make paha, i ka olioli a i ole ia i ka walania o ka naau.

6 [m 15, p 12] Ano, i kuu ike ana i ua mau mea nei, no ke aha la au e makemake ai i ka mea nui loa ae mamua o ka hana a’u i kaheaia mai ai e hana?

7 No ke aha la au i makemake ai he anela au, e hiki ia’u ke olelo aku i ko na welau a pau o ka honua?

8 No ka mea, aia hoi, ke haawi mai la ka Haku i na lahuikanaka a pau, o ko lakou lahui a olelo iho, e ao aku i kana olelo, iloko o ka naauao, i na mea a pau ana i manao ai he pono no lakou ke loaa; nolaila, ke ike nei kakou ke ao mai la ka Haku ma ka naauao, e like me ka mea i pono a i oiaio.

9 Ua ike au i ka mea a ka Haku i kauoha mai ai ia’u, ke kaena nei au ma ia mea: aole au i kaena no’u iho, aka ke kaena nei au ma ka mea a ka Haku i kauoha mai ai ia’u; he oiaio, a o keia ka’u e kaena ai, i lilo ai paha au i mea hana ma na lima o ke Akua, e kai mai i kekahi uhane i ka mihi; a o keia no ko’u olioli.

10 A, aia hoi, ia’u i ike ai i na mea he nui o ko’u poe hoahanau e mihi io ana, a e hele mai ana i ka Haku i ko lakou Akua la, alaila, ua hoopihaia ko’u uhane me ka olioli; alaila e hoomanao ana au i ka mea a ka Haku i hana mai ai no’u; he oiaio, i kona hoolohe mai i ka’u pule; he oiaio, alaila e hoomanao ana au i kona lima lokomaikai ana i o mai ai ia’u;

11 He oiaio, a e hoomanao ana no hoi au i ka noho pio ana o ko’u poe makua; no ka mea, ua ike oiaio au na ka Haku lakou i hoopakele mai mailoko mai o ka noho luhi ana, a ma ua mea nei i hoonohonoho ai i kona ekalesia; he oiaio, o ka Haku ke Akua, ke Akua o Aberahama, ke Akua o Isaaka, a o ke Akua o Iakoba, nana i hoopakele mai ia lakou mailoko mai o ka noho luhi ana;

12 He oiaio, ua hoomanao mau au i ka noho pio ana o ko’u poe makua; a o kela Akua hookahi nana i hoopakele mai ia lakou mailoko mai o na lima o ko Aigupita poe, i hoopakele mai ai hoi ia lakou mailoko mai o ka noho luhi ana;

13 He oiaio, a na ua Akua hookahi la i hoonohonoho mai i kona ekalesia mawaena o lakou; he oiaio, a ua kahea mai ua Akua hookahi la ia’u ma kekahi oihana hoano, e hai aku i ka olelo i keia poe kanaka, a ua haawi mai ia’u i ka pomaikai nui, ma ia mea ua piha ko’u olioli;

14 Aole nae au e olioli ana ma ko’u pomaikai iho wale no, aka ua piha nui ae ko’u olioli no ka pomaikai o kko’u poe hoahanau, ka poe i pii aku ai i ka aina o Nepai.

15 Aia hoi, ua hana nui loa iho la lakou, a ua hoohua ae i ka hua a nui; a e nani wale auanei ko lakou uku.

16 Ano, ia’u e noonoo ana i ka pomaikai o ko’u poe hoahanau nei, ua kaiia’ku kuu uhane, me he mea la e kaawale ana ia mai ke kino aku, no ka nui loa o ko’u olioli.

17 [m 15, p 13] A, ano na ke Akua e ae mai i ko’u poe hoahanau nei, e noho lakou ilalok iloko o ke aupuni o ke Akua; he oiaio, a o kela poe a pau no hoi ka poe hua o ka lakou mau hana, i hele hou ole ai lakou iwaho no ke ao pau ole, aka i hoolea aku ai lakou ia ia a mau loa aku. A na ke Akua e ae mai e hanaia mai e like me ka’u mau olelo, me a’u e olelo nei. Amene.

MOKUNA 30

1 [mokuna 16, paukū 1] Aia hoi kekahi, mahope iho o ka hoonohoia’na o ka poe kanaka o Amona ma ka aina o Ieresona, he oiaio, a mahope hoi o ka hooauheeia’na o ko Lamana poe iwaho o ka aina, a o ke kanuia’na hoi o ko lakou poe make e ka poe kanaka o ka aina.

2 Ano, aole i heluia ko lakou poe make, no ka nui loa o lakou; aole hoi i heluia ka poe make o ko Nepai poe. Aka, mahope iho o ke kanu ana o lakou i ko lakou poe make, a mahope hoi o na la o ka hooke ai ana, a uwe ana, a pule ana, (a ma ka makahiki umikumamaono ia o ke au o na Lunakanawai maluna iho o ka poe kanaka o Nepai,) hoomaka ae la ka malu mau mawaena o ka aina a pau,

3 He oiaio, a malama aku la na kanaka i na kauoha a ka Haku; a ua ikaika lakou i ka malama ana i na oihana a ke Akua, e like me ke kanawai o Mose; no ka mea, ua aoia’ku lakou e malama i ke kanawai o Mose, a hiki i ka wa e hookoia’i ia;

4 A pela hoi aole no o na kanaka haunaele iloko o ka makahiki umikumamaono a pau o ke au o na Lunakanawai maluna iho o ka poe kanaka o Nepai.

5 [m 16, p 2] A eia kekahi, ma ka makahiki umikumamahiku o ke au o na Lunakanawai, ua malu mau.

6 Aka, ma ka hopena o ka makahiki umikumamahiku, hele mai la kekahi kanaka iloko o ka aina o Zarahemela; a oia no o Anati-Kristo, no ka mea, hoomaka ae la oia e hai aku i na kanaka me ke ku e i na wanana i olelo e ia mai ai e na kaula, no ka hiki ana mai o Kristo.

7 Ano, aohe kanawai e ku e ana i ko ke kanaka manaoio; no ka mea, e ku e ikaika ana i na kauoha a ke Akua, ke kauia’na o kekahi kanawai e hoonoho like ole ai i na kanaka.

8 No ka mea, penei wahi a ka palapala hemolele, E koho oukou i keia la, i ka oukou mea e malama aku ai.

9 Ano, ina ua makemake kekahi kanaka e malama aku i ke Akua, ua hiki no ia ia, e aho paha e olelo, ina ua manoio oia i ke Akua, ua hiki no ia ia ke malama aku ia ia; aka, ina aole oia i manaoio aku ia ia, aole he kanawai e hoopai aku ia ia.

10 Aka ina i pepehi kanaka oia, ina ua hoopaiia oia i ka make; a ina i powa aku, ina ua hoopaiia no hoi oia; a ina i aihue oia, ina ua hoopaiia no hoi oia: a ina i moe kolohe oia, ina ua hoopaiia no hoi oia; he oiaio, no keia mau hana hewa a pau, ua hoopaiia lakou;

11 No ka mea, aia no he kanawai, i hoopaiia’i na kanaka e like me na hewa o lakou. Aka hoi, aohe kanawai e ku e ana i ko ke kanaka manaoio; nolaila, ua hoopaiia’ku ke kanaka no na hewa wale no ana i hana’i; nolaila, ua like ka noho ana o na kanaka a pau.

12 A o ua Anati-Kristo nei o Korihora kona inoa, (a aohe o ke kanawai kuleana maluna iho ona,) hoomaka ae la oia e hai aku i na kanaka, aole loa no auanei he Kristo. A mamuli i keia ano oia i hai aku ai, i ka i ana:

13 E ka poe hoopaaia malalo iho o kahi manaolana naaupo a lapuwale, no ke aha la oukou e hookaumaha nei ia oukou iho me na mea lapuwale me ia? No ke aha la oukou e nana aku nei no kekahi Kristo? No ka mea, aohe kanaka i hiki ke ike i kekahi mea e hiki mai ana.

14 Aia hoi, o keia mau mea a oukou i kapa aku ai he mau wanana, a oukou i olelo ae ai ua haawiia mai e na kaula hemolele, aia hoi, he mau mooolelo lapuwale ia mau mea o ko oukou poe kupuna.

15 Pehea la oukou i ike ai i ka oiaio o ia mau mea? Aia hoi, aole e hiki ia oukou ke ike i na mea a oukou i nana ole ai; nolaila, aole e hiki ia oukou ke ike aia no auanei he Kristo.

16 Ke nana nei imua oukou a olelo iho, ua ike oukou i ke kalaia’na o ko oukou mau hala. Aka, no ka naau hoopupule keia mea; a o ua pupule nei o ko oukou naau ua hiki mai ia no na mooolelo o ko oukou poe kupuna, na mea e alakai aku ana ia oukou e manaoio i na mea e ole ana.

17 A ua nui na mea e ae me ia ana i olelo ae ai ia lakou, e hai ana ia lakou aole e hiki ke hanaia ke kalahala ana no na hewa o na kanaka, aka ua loaa i kela kanaka i keia kanaka ma keia ola ana, e like me ka hooponopono ana o ka mea hanaia; nolaila, ua pomaikai kela kanaka keia kanaka e like me kona ano akamai, a ua lanakila kela kanaka keia kanaka e like me kona ikaika; a o kela mea keia mea a ke kanaka i hana’i, aole no ia he hewa.

18 A pela oia i hai aku ai ia lakou, e alakai aku ana i na naau o na mea he nui, a ma o na la lakou i hookiekie ae ai i ko lakou mau poo iluna iloko o ka lakou hana hewa; he oiaio, e alakai aku ana i na wahine he nui wale, a me na kanaka no hoi, e moe kolohe; e hai ana ia lakou i ka wa e make ai ke kanaka, o ka pau ae la no ia.

19 [m 16, p 3] Ano, hele aku la o ua kanaka nei i ka aina o Ieresona no hoi, e hai aku i ua mau mea nei mawaena o ka poe kanaka o Amona, o lakou no ka poe kanaka o ko Lamana mamua.

20 Aka hoi, ua naauao nui ae lakou mamua o kekahi poe he nui o ko Nepai poe; a lalau aku la lakou ia ia, a nakii ia ia, a kai aku la ia ia imua o Amona, oia no kekahi Kahuna Nui maluna iho o kela poe kanaka.

21 [m 16, p 4] A, eia kekahi, kauoha ae la ia e halihaliia oia iwaho o ka aina. A hele ae la oia iloko o ka aina o Gideona, a hoomaka ae la e hai aku ia lakou no hoi; a, aole nui kona pomaikai ma ua wahi nei, no ka mea, ua hopuia iho la oia a nakinakiia, a kaikaiia’ku la imua o ke Kahuna Nui, a o ka Lunakanawai Nui hoi maluna iho o ka aina.

22 [m 16, p 5] A, eia kekahi, i aku la ke Kahuna Nui ia ia, No ke aha la oe i hele ai i o ia nei e hookapae ana i na aoao o ka Haku? No ke aha la oe i ao aku ai i keia poe kanaka, aole no auanei he Kristo, e alalai mai i ko lakou hauoli ana? No ke aha la oe i olelo ku e mai ai i na wanana a ka poe kaula hemolele a pau?

23 Ano, o ko ke Kahuna Nui inoa o Gidona ia. A i ae la o Korihora ia ia, No ko’u ao ole aku i na mooolelo lapuwale o ko oukou poe kupuna, a no ko’u ao ole akuk i keia poe kanaka e nakii aku ia lakou iho malalo iho o na kanawai a me na oihana lapuwale i hookauia e na kahuna kahiko, e lalau wale iho ai i ka mana a me ke alii ana maluna iho o lakou, e alai iho ai ia lakou iloko o ka naaupo, i hiki ole ai ia lakou ke ea mai i ko lakou mau poo, aka e hoohaahaaia ilalo e like me kau mau olelo.

24 Ke i mai nei oukou, he poe kanaka paa ole ua poe kanaka nei. Aia hoi, ke i aku nei au, aia no lakou iloko o ka noho luhi ana. Ke i mai nei oukou, he oiaio na mau wanana kahiko la. Aia hoi, ke i aku nei au ia oe, aole oukou i ike he oiaio ia mau mea.

25 Ke i mai nei oukou, he poe kanaka hewa a he poe kanaka haule ua poe kanaka nei, no ka lawehala ana o kekahi kupuna. Aia hoi, ke i aku nei au ia oe, aole i hewa ke keiki no kona mau kupuna.

26 A ke i mai nei no hoi oukou e hiki mai auanei o Kristo. aka hoi, ke i aku nei au ia oe, aole oukou i ike aia no auanei he Kristo. A ke i mai nei no hoi oukou, e pepehiia oia no na hala a ko ke ao nei;

27 A pela oukou e alakai aku nei i keia poe kanaka mamuli o na mooolelo lapuwale o ko oukou poe kupuna, a e like me ko oukou mau makemake iho; a ke hoopaa iho nei oukou ia lakou ilalo, me he mea la iloko o ka noho luhi ana, i hiki ia oukou ke hoopiha ia oukou iho me na hana a ko lakou mau lima, i aa ole ai lakou e nana iluna me ka wiwo ole, a i aa ole ai lakou ke loaa ko lakou mau mea e pono ai a e pomaikai ai;

28 He oiaio, aole lakou i aa aku e hana me ka lakou mau mea ponoi, o huhu mai ka lakou poe kahuna, ke poe i hookau ai i ka auamo ia lakou e like me ko lakou la mau makemake, a ua kai aku ia lakou e manaoio ma o ka lakou mau mooolelo la, a me ko lakou mau moe uhane, a me ko lakou mau manao wale, a me ko lakou mau hihio, a me ko lakou mau mea pohihihi wahahee, ina aole lakou e hana e like me ka lakou mau olelo, e hoohuhu aku lakou i kekahi mea i ike ole ia, a lakou i olelo mai ai o ke Akua oia; he mea aole i nanaia’i, aole hoi i ikeia’i aole mai kinohi mai, aole hoi ma keia hope aku.

29 Ano, i ka wa a ke Kahuna Nui a me ka Lunakanawai Nui i ike ai i ka paakiki o kona naau; he oiaio, ia laua i ike ai e hoino aku no hoi oia i ke Akua, aole o laua e pane aku i kana mau olelo; aka kena ae la laua e nakinakiia oia; a haawi aku la laua ia ia iloko o na lima o na ilamuku, a hoouna aku la ia ia i ka aina Zarahemela, e hiki ke kaiia oia imua o Alama, a me ka Lunakanawai Nui, oia no ke kiaaina maluna iho o ka aina a pau.

30 [m 16, p 6] A eia kekahi, ia ia i kaiia’i imua o Alama laua me ka Lunakanawai Nui, hana mai la no oia ma ke ano hookahi me ia i hana’i ma ka aina o Gideona; he oiaio, kuamuamu iho la no oia.

31 A ku ae la oia iluna me na olelo nui haanou ana imua o Alama, a hoino ku e ae la i na kahuna a me na kumu, e hoohewa ana ia lakou no ke alakai aku ana i na kanaka mamuli o na mooolelo hupo o ko lakou poe kupuna, no ka makemake e hoolealea ma na hana a na kanaka.

32 Ano, i aku la o Alama ia ia, Ke ike nei oe aole makou i hoopiha mai ia makou iho ma na hana a keia poe kanaka; no ka mea hoi, ua hana au mai ka makamua mai o ke au o na Lunakanawai, a hiki i keia manawa me ko’u mau lima ponoi, no kuu ola, me ko’u hele ana he nui wale nae a puni ka aina e hai aku i ke olelo a ke Akua i ko’u poe kanaka.

33 A me na hana he nui wale a’u i hana’i iloko o ka ekalesia, aole loa a’u i loaa’i kekahi senine no ka’u hana; aole hoi kekahi o ko’u poe hoahanau, ke ole iloko o ka noho hookolokolo; alaila, ua loaa ia makou e like me ko ke kanawai no ko makou manawa.

34 Ano, ina aole o makou i loaa’i kekahi mea no na hana a makou iloko o ka ekalesia, heaha la ka pomaikai ia makou e hana iloko o ka ekalesia, ke ole ia e hai aku i ka oiaio, e hiki ia makou ke loaa ka hauoli ana ma ka olioli o ko makou poe hoahanau?

35 No ke aha la oe i olelo mai nei, ke hai olelo aku nei makou i keia poe kanaka i loaa’i ka waiwai, i ka wa au i ike ai nou iho aole i loaa ia makou ka waiwai? A, ano, ke manaoio nei anei oe e hoopunipuni ana makou i keia poe kanaka, ka mea e hookomo ana i ka olioli me neia iloko o ko lakou mau naau?

36 A olelo mai la o Korihora ia ia, Ae.

37 Alaila i aku la o Alama ia ia, Ke manaoio nei anei oe aia he Akua?

38 A i mai la oia, Aole.

39 Ano, i aku la o Alama ia ia, E hoole hou mai anei oe i ke Akua, a e hoole mai hoi i ke Kristo? No ka mea, aia hoi, ke i aku nei au ia oe, ke ike nei au aia no he Akua, a e hiki mai auanei o Kristo.

40 A heaha la kou mea e hoikeike ai aole he Akua, aole hoi e hiki mai ana o Kristo? Ke i aku nei au ia oe, aole ou mea, o kau olelo wale iho no.

41 Aka hoi, ai’u na mea a pau i hoike no ka oiaio o ua mau mea nei; a ia oe no hoi na mea a pau i hoike ia oe no ka oiaio o ua mau mea nei; a e hoole mai anei oe i ua mau mea la? Ke manao nei anei oe he oiaio keia mau mea?

42 Aia hoi, ke ike nei au e manaoio ana oe, aka ua uluhia oe me kahi uhane wahahee, a ua pale ae la oe i ka Uhane o ke Akua i loaa ole ai ia ia kahi e noho ai iloko ou; aka he mana ko ka diabolo maluna ou, a ke kai ae nei oia ia oe i o ia nei, e hana i na mea maalea, e hiki ia ia ke hoopau mai i ka poe keiki a ke Akua.

43 [m 16, p 7] Ano, i mai la o Korihora ia Alama, Ina e hoike mai oe i hoailona ia’u, i hoomaopopoia’i au aia no he Akua, he oiaio, e hoike mai oe ia’u he mana no kona, alaila, e hoomaopopoia au no ka oiaio o kau mau olelo.

44 Aka, i aku la o Alama ia ia, Ua loaa no ia oe na hoailona a lawa; e hoao aku anei oe i kou Akua? E olelo mai nei anei oe, e hoike mai i hoailona ia’u i ka wa ia oe ka hoikeike o lakou nei a pau kou poe hoahanau, a o ka poe kaula hemolele no hoi a pau? Ua waihoia na palapala hemolele imua ou, he oiaio, a ke hoike mai la na mea a pau aia no he Akua; he oiaio, o ka honua, a me na mea a pau maluna iho o ka ili ona, a me kona kaa ana no hoi; he oiaio, a me na hoku a pau no hoi e hele ana me ka pololei, ke hoike mai la aia no he Mea Hana kiekie loa;

45 A ke hele nei nae oe i o ia nei, e alakai aku ana i na naau o keia poe kanaka, e hoike mai ana ia lakou aohe he Akua? A ke hoole nei nae oe me ke ku e i ua mau hoike nei a pau? A i mai la oia, Ae, e hoole no au, ke ole oe e hoike mai i hoailonoa ia’u.

46 [m 16, p 8] Ano, eia kekahi, i aku la o Alama ia ia, Aia hoi, ua eha no au no ka paakiki o kou naau; he oiaio, no kou hoomau ana e hoopale ae i ka Uhane o ka oiaio, i make ai kou uhane.

47 Aka hoi, e aho e make kou uhane, mamua o ka lilo ana ou i mea e kai aku ai i na uhane he nui ilalo i ka make, ma kou wahahee ana a ma kau mau olelo hoomalimali; nolaila, ina e hoole hou mai oe, aia hoi, e hahau ae no ke Akua ia oe, i lilo ae oe i aa, i ole ai oe e hamama hou aku i kou waha ma ia hope aku, i ole ai oe e hoopunipuni hou aku i ua poe kanaka nei.

48 Ano, i mai la o Korihora ia ia, Aole au e hoole aku nei i ke ola ana o kahi Akua, aka, aole au manaoio aia he Akua; a ke i aku nei no hoi au ia oe, aole oe i ike aia he Akua; a ke ole oe e hoike mai i hoailonoa ia’u, aole au e manaoio.

49 Ano, i aku la o Alama ia ia, O keia ka’u e haawi aku ai ia oe i hoailona, e hooliloia oe i aa, e like me ka’u mau olelo; a ke i aku nei au, ma ka inoa o ke Akua, e hooliloia oe i aa, i ole ai oe e ekemu hou ae.

50 Ano, ia Alama i olelo aku ai i ua mau olelo nei, ua hooliloia o Korihora i aa, i hiki ole ia ia ke ekemu ae, e like me na olelo a Alama.

51 Ano, i ka wa a ka Lunakanawai Nui i ike ai i keia mea, o aku la oia i kona lima a palapala aku la ia Korihora me ka i aku: Ua hoomaopopoia anei oe i ka mana o ke Akua? Maluna la owai oe i makemake ai ia Alama e hoike ae ai i kona hoailona? Ua makemake anei oe ia ia e hoopilikia ae i na mea e ae, e hoike aku i hoailona ia oe? Aia hoi, ua hoike aku oia ia oe i hoailona; a, ano, e hoopaapaa hou anei oe?

52 A o mai la o Korihora i kona lima, a palapala iho la, i ka i ana: Ua ike au ua aa wau, no ka mea, ua hiki ole ia’u ke olelo; a ua ike au aohe kekahi mea, i ole ia ka mana o ke Akua, e hiki ai ke hooili mai i keia mea maluna iho o’u; he oiaio, a ua ike no hoi au aia he Akua.

53 Aka hoi, ua hoopunipuni mai ka diabolo ia’u; no ka mea, ikea mai la oia e au ma ke ano o kahi anela, a i mai la ia’u, E hele aku a e hoohuli ae i keia poe kanaka, no ka mea, ua auwana aku la lakou a pau mamuli o kekahi Akua i ike ole ia. A i mai la oia ia’u, Aohe he Akua; he oiaio, a ao mai la oia ia’u i ka’u mau mea e olelo aku ai. A ao aku au i kana mau olelo; a ua ao aku au ia mau mea, no ka mea, e lealea ana ia mau mea i ko ke kino naau; a ao aku la au ia mau mea, a loaa mai ia’u ka pomaikai nui, a manaoio oiaio iho la au he oiaio ia mau mea; a no keia mea, ku e aku la au i ka oiaio, a hiki i ka wa a’u i hooili mai ai ua poino nui nei maluna iho o’u.

54 Ano, ia ia i i mai ai i keia, noi mai la oia na Alama e pule aku i ke Akua i laweia’ku ai ka poino mai ona aku.

55 Aka, i aku la o Alama ia ia, Ina e laweia’ku ua poino nei mai ou aku, e alakai hou ae oe i na naau o keia poe kanaka; nolaila, e like auanei ia ia oe, me ko ka Haku makemake.

56 [m 16, p 9] A eia kekahi, aole i kailiia aku ka poino mailuna aku o Korihora; aka ua hookukeia oia iwaho, a hele ae la oia ia hale aku ia hale aku, e noi ana i ai nana.

57 Ano, ua hoolaha koke ia ka lono no ka mea i loohia’i ia Korihora, mawaena o ka aina a pau; he oiaio, ua hoounaia aku ka olelo hoolaha e ka Lunakanawai Nui, i na kanaka a pau ma ka aina, e kukala ana i ka poe i manaoio i na olelo a Korihora, e mihi lakou e pono ai, o ili mai ia hoopai hookahi maluna iho o lakou.

58 [m 16, p 10] A eia kekahi, ua hoomaopopoia lakou a pau loa no ka hewa o Korihora; nolaila, hoohuli hou ia lakou i ka Haku; a hoopau iho la keia mai i ka hewa mamuli o ke ano o Korihora. A hele ae la o Korihora mai ia hale aku ia hale aku, e noi ana i ai no kona ola.

59 [m 16, p 11] A eia kekahi, i kona hele ana mawaena o kekahi poe kanaka, he oiaio, mawaena o kekahi poe kanaka, ka poe i hookaawale ai ia lakou iho mai ko Nepai poe ae, a kapa iho la ia lakou iho o ko Zorama poe, i alakaiia e kekahi kanaka o Zorama kona inoa; a me ia i hele aku ai mawaena o lakou, aia hoi, ua holoia oia maluna, a hehiia ilalo, a make loa aku la;

60 A pela kakou e ike nei i ka hope o ka mea nana e hookapae ae i na aoao o ka Haku; a pela hoi kakou e ike nei aole ka diabolo e kokua i kana poe keiki ma ka la hope, aka, ke kauo koke ae la ia lakou ilalo i Gehena.

MOKUNA 31

1 [mokuna 16, paukū 12] Ano, eia kekahi, mahope iho o ka make ana o Korihora, ua loaa iho la ia Alama na lono e hookapae ana ko Zorama poe i na aoao o ka Haku, a e alakai ana o Zorama, oia no ko lakou mea alakai, i na naau o na kanaka e kulou iho ilalo i na kii leo ole, a pela aku, hoomaka hou ae la kona naau e hoopailua, no ka hewa o na kanaka;

2 No ka mea, he kumu no ke kaumaha nui ia mea ia Alama, e ike i ka hewa mawaena o kona poe kanaka; nolaila, ua kaumaha nui loa iho la kona naau, no ke kaawale ana o ko Zorama poe mai ko Nepai poe ae.

3 Ano, ua houkuuku ae la ko Zorama poe ia lakou iho iloko o kahi aina a lakou i kapa aku ai o Anationuma, ma ka hikina o ka aina o Zarahemela, e waiho kokoke ana ma ke kahakai, ma ka hema o ka aina o Ieresona, oia no hoi ka i kokoke ma ka waonahele hema, a ua piha ua waonahele nei i ko Lamana poe.

4 Ano, makau nui iho la ko Nepai poe o hoalauna aku ko Zorama poe me ko Lamana poe, a e lilo ia mea i mea e poin nui ai ma ka aoao o ko Nepai poe.

5 Ano, he mea nui ka hai ana o ka olelo e alakai aku i na kanaka e hana i ka mea i pono; he oiaio, ua nui e aku ka mana o ia mea maluna iho o na naau o na kanaka mamua o ka pahikaua, a mamua o kekahi mea e ae, i hiki mai ia lakou: nolaila, manao iho la o Alama he mea e pono ai no lakou e hoao aku i ka mana o ka olelo a ke Akua.

6 Nolaila, lawe aku la oia ia Amona, a me Aarona, a me Omanera; a waiho iho la oia ia Himani iloko o ka ekalesia ma Zarahemela; aka, o na mea mua ekolu kana i lawe pu ai me ia, a me Amuleka laua me Zezeroma no hoi, ma Meleka laua; a lawe pu no hoi oia i na keiki ana elua.

7 Ano, aole oia i lawe pu aku i kana keiki hiapo me ia; a o Helamana no kona inoa; aka o na inoa o laua ana i lawe pu ai me ia, o Sibalona kekahi, a o Korianatona kekahi; a oia na inoa o ua poe la, ka poe i hele pu me ia mawaena o ko Zorama poe, e hai aku ia lakou i ka olelo.

8 [ m 16, p 13] Ano, he poe kuee a haalele ko Zorama poe mai ko Nepai poe ae; nolaila, ua haiia’ku ka olelo a ke Akua ia lakou.

9 Aka ua haule iho la lakou iloko o na kuhihewa nui wale, no ka mea, aole lakou hoolohe e malama i na kauoha a ke Akua, a me na kanawai, e like me ke kanawai o Mose;

10 Aole hoi lakou malama i na hana a ka ekalesia, e hoomau aku ma ka pule a me ka noi aku i ke Akua i kale la i keia la, i komo ole ai lakou iloko o ka hoowalewale;

11 He oiaio, ua kapae ae lakou o na aoao o ka Haku ma na mea he nui; nolaila, no keia kumu hele aku la o Alama a me kona poe hoahanau iloko o ka aina, e hai aku i ka olelo ia lakou.

12 [m 16, p 14] Ano, ia lakou i hiki aku ai iloko o ka aina, aia hoi, me ko lakou kahaha, ike aku la lakou ua kukulu iho ko Zorama poe i na halepule, a e hoakoakoa ana lakou ia lakou iho o kahi hookahi i kekahi la o ka hebedoma, a kapa iho la lakou i ua la la o ka la o ka Haku; a hoomana aku la lakou mamuli o kekahi ano a Alama a me kona poe hoahanau i ike e ole ai mamua;

13 No ka mea, ia lakou kekahi wahi i kukuluia iluna mawaena konu o ko lakou halepule, i kahi i ku ai, a ua kiekie ia maluna ae o ke poo; a ua hiki i ka mea hookahi wale no ke komo maluna ae.

14 Nolaila, o ka mea e makemake ana e hoomana aku, nana no e hele aku a e ku maluna ae olaila, a kikoo aku i kona mau lima i ka lani; a kahea aku me ka leo nui, i ka i ana:

15 Hemolele, hemolele ke Akua; ke manaoio nei makou ooe no ke Akua, ke manaoio makou ua hemolele oe, a he uhane no oe mamua, a he uhane no oe ano, a he uhane no oe a mau loa aku.

16 E ke Akua hemolele, ke manaoio nei makou ua hookaawale mai oe ia makou mai ko makou poe hoahanau ae; aole o makou manaoio iloko o ka mooolelo o ko makou poe hoahanau, ka mea i haawiia mai ai ia lakou ma o ke ano kama lii la o ko lakou poe kupuna; aka, ke manaoio nei makou ua wae mai oe ia makou e lilo i poe keiki hemolele nau; a ua hoike mai no hoi oe ia makou aole no auanei he Kristo;

17 Aka, oia mau no oe i ka la inehinei, i keia la a i ka wa pau ole; a ua wae mai oe ia makou, i hoolaia’i auanei makou, oiai i waeia ka poe a pau a puni makou e hooleiia e kou inaina ilalo i Gehena; no keia hemolele, e ke Akua, ke aloha aku nei makou ia oe; a ke aloha aku nei no hoi makou ia oe no kou wae ana mai ia makou, i ole ai makou e alakaiia’ku mamuli o na mooolelo lapuwale o ko makou poe hoahanau, na mea i paa ai ia lakou ilalo e manaoio ia Kristo, na mea i alakai ai i ko lakou mau naau e auwana mamao aku mai ou aku la, ko makou Akua.

18 A eia hou: ke aluha aku nei makou ia oe, e ke Akua, no ka lilo ana o makou i poe kanaka waeia a hemolele. Amene.

19 [m 16, p 15] Ano, eia kekahi, mahope iho o ka lohe ana o Alama a me kona poe hoahanau, a me kana mau keiki, i keia mau pule, ua kahaha nui loa iho la.

20 No ka mea, aia hoi, hele aku la kela kanaka keia kanaka a pule ae la i na pule oia hookahi no.

21 Ano, ua kapaia ua wahi la e lakou o Rameumapatoma, ma ka hoohalike ana, o ka Awai Hoano ia.

22 Ano, ma ua awai nei lakou i pule ai, o kela kanaka keia kanaka, i ua pule hookahi la i ke Akua, e aloha aku ana i ko lakou Akua no ko lakou waeia’na e ia, a no kona alakai ole aku ia lakou mamuli o ka mooolelo o ko lakou poe hoahanau; a no ka aihue ole ia ana o na naau o lakou e manaoio i na mea e hiki mai ana, a lakou i ike ole ai.

23 [m 16, p 16] Ano, mahope iho o ka mohai ana aku o na kanaka a pau i ke aloha mamuli o keia ano, hoi ae la lakou i ko lakou mau wahi i noho ai, e olelo hou ole ana no ko lakou Akua ma ia hope iho, a hiki aku i ka wa a lakou i akoakoa hou ai i ka Awai Hoano, e mohai aku i ke aloha mamuli o ko lakou ano.

24 Ano, ia Alama i ike ai i keia, ua eha kona naau; no ka mea, ike ae la oia he poe kanaka hewa a paakiki lakou: he oiaio, ike ae la oia ua kauia ko lakou mau naau maluna iho o ke gula, a maluna iho o ke kala, a maluna iho o kela ano o keia ano o ka waiwai nani a pau.

25 He oiaio, a ike ae la no hoi oia ua hookiekieia ko lakou mau naau iluna i ka haanou nui, iloko o ko lakou haaheo.

26 A hookiekie ae la oia i kona leo i ka lani, a hea ae la, i ka i ana: Pehea la ka loihi, e ka Haku, o kou ae ana mai i kau poe kauwa e noho ilalo nei ma ka io, e ike i ka hewa manomano me neia mawaena o na keiki a kanaka.

27 Aia hoi, e ke Akua, ke kahea aku nei lakou ia oe, a ua aleia nae ko lakou mau naau iloko o ko lakou haaheo. Aia hoi, e ke Akua, ke hea aku nei lakou ia oe me ko lakou mau waha, oiai i haakeiia lakou i kiekie, me na mea lapuwale o ko ke ao nei.

28 E nana ae, e ko’u Akua, i ko lakou lole kumu kuai nui, a me ko lakou lauoha owiliia, a me ko lakou mau kupee lima, a me ko lakou mau mea gula e nani ai, a me kela ano keia ano o na mea maikai a lakou i hoonaniia’i; a, aia hoi, ua kauia no ko lakou mau naau maluna iho o ua mau mea nei, a ke hea aku nei nae lakou ia oe, Ke aloha aku nei makou ia oe, e ke Akua, no ka mea, he poe kanaka waeia makou nou, oiai e make ana na mea a ae.

29 He oiaio, a ke i ae nei lakou nau i hoike mai ia lakou; aohe auanei he Kristo.

30 E ka Haku ke Akua, pehea la ka loihi o kou ae ana i ka hewa a me ka hala me neia e noho nei mawaena o keia poe kanaka? E ka Haku, e haawi mai anei oe i ka ikaika ia’u, e hiki ia’u ke haawe i kuu mau nawaliwali? No ka mea, ua nawaliwali au, a ke hoeha mai nei ka hewa me neia mawaena o keia poe kanak i ko’u uhane.

31 E ka Haku, ua kaumaha nui loa ko’u naau: e hooluolu mai anei oe i ko’u uhane iloko o Kristo? E ka Haku, e ae mai anei oe ia’u i loaa’i au ka ikaika, e hiki ia’u ke hoomanawanui me keia mau pilikia e hiki mai ana maluna iho o’u, no ka hewa o keia poe kanaka?

32 E ka Haku, e hooluolu mai anei oe i ko’u uhane, a e haawi mai i ka pomaikai ia’u, a me ko’u poe hoalawehana no hoi eia pu me a’u, he oiaio, ia amona a me Aarona, a me Omanera, a ia Amuleka laua me Zezeroma no hoi, a i ka’u mau keikikane elua no hoi; he oiaio, o lakou nei a pau kau e hooluolu mai ae, ea, e ka Haku? He oiaio, e hooluolu mai oe i ko lakou mau uhane iloko o Krisot, ea?

33 E ae mai anei oe ia lakou e loaa ia lakou ka ikaika, e hiki ia lakou ke haawe aku i ko lakou mau pilikia e hiki mai ana maluna iho o lakou, no na hewa i keia poe kanaka?

34 E ka Haku, e ae mai anei oe ia makou i loaa’i ia makou ka pomaikai i ke kai hou ana ia lakou la iou la, iloko o Kristo?

35 Aia hoi, e ka Haku, ua minamina ko lakou poe uhane, he nui wale o lakou he poe hoahanau no makou, nolaila, e haawi mai oe ia makou, e ka Haku, i ka mana a me ka naauao, e hiki ia makou ke kai hou ae i ua poe nei, ko makou poe hoahanau, iou la.

36 [ m 16, p 17] Ano, eia kekahi, ia Alama i olelo ae ai i ua mau olelo nei, kau iho la oia i kona mau lima maluna iho o lakou a pau me ia. A, aia hoi, me ia i kau iho ai i kona mau lima maluna iho o lakou, ua hoopihaia lakou me ka Uhane Hemolele.

37 A mahope iho o ia mea, hookaawale iho la lakou ia lakou iho kekahi mai kekahi ae; e manao ole ana no lakou iho i ka lakou mea e ai ai, a i ka lakou mea e inu ai, aohe hoi i ko lakou mea e aahu ai.

38 A hoomakaukau mai la ka Haku no lakou i ole ai lakou e makeai, i ole ai hoi lakou e makewai; he oiaio, a haawi mai la no hoi i ikaika ia lakou, i ole ai lakou e loaa kekahi ano o ka pilikia, ke ale ole ia iloko o ka olioli o Kristo. Ano, ua like no keia me ka pule a Alama; a o keia mea no kana pule ana me ka manaoio.

MOKUNA 32

1 [mokuna 16, paukū 18] A, eia kekahi, hele aku la lakou, a hoomaka ae la e hai aku i ka olelo a ke Akua i na kanaka, e komo ana iloko o ko lakou mau halepule, a iloko o ko lakou mau hale; he oiaio, hai aku la no hoi lakou i ka olelo iloko o na alanui o lakou la.

2 A eia kekahi, mahope iho o ka hana nui mawaena o lakou la, hoomaka ae la lakou e loaa ka pomaikai mawaena o ka poe hune o na kanaka; no ka mea, ua hookukeia’e lakou mawaho o ko lakou mau halepule, no ka nani ole o ko lakou kapa;

3 Nolaila, aole lakou i aeia’i e komo iloko o ko lakou mau halepule e hoomana aku i ke Akua, i manaoia’i me he pelapela la; nolaila, ua ilihune lakou; he oiaio, i manaoia’i lakou e ko lakou poe hoahanau me he oka la; nolaila, ua hune lakou ma na mea o ko ke ao nei; a ua hune no hoi ma ka naau.

4 [m 16, p 19] Ano, me Alama e ao ana a e olelo ana i na kanaka maluna o ka puu Onida, hele mai la he poe paapu a nui loa io na la, o lakou no ka poe i oleloia iho nei e makou, o ka poe hune ma ka naau, no ko lakou nele ma na mea o ko ke ao nei.

5 A hele mai la lakou io Alama la; a o ka mea mua loa o lakou, i mai la oia ia ia, Aia hoi, heaha la ka keia poe, ko’u poe hoahanau e hana’i, no ka mea, ua hoowahawahaia lakou e na kanaka a pau, no ko lakou ilikole: he oiaio, a nui loa ae e ko makou poe kahuna; no ka mea, ua hookuke mai lakou ia makou mawaho o ko makou mau halepule, a makou i hana nui loa’i e kukulu, me ko makou mau lima ponoi; a ua hookuke mai lakou ia makou no ko makou ilikole loa, a, aole o makou wahi e hoomana aku ai i ko makou Akua: a, aia hoi, heaha la ka makou e hana’i?

6 Ano, ia Alama i lohe ai i keia, huli koke ae la oia me kona maka ia ia, a ike aku la oia, me ka olioli nui; no ka mea, ua ike oia ua hoohaahaa io ae ko lakou mau pilikia ia lakou, a e makaukau ana lakou e lohe i ka olelo;

7 Nolaila, aole oia e olelo hou ai i ua poe e la, aka, hohola ae la oia i kona lima, a hea aku la i ka poe ana i ike ai, ka poe i mihi io, a i aku la ia lakou,

8 Ke ike nei au, ua haahaa oukou ma ka naau; a ina pela, pomaikai oukou.

9 Aia hoi, ua i mai kou hoahanau, Heaha la ka makou e hana’i? No ka mea, ua hookukeia mai makou mawaho o ko makou mau halepule, i hiki ole ai ia makou ke hoomana aku i ko makou Akua.

10Aia hoi, ke i aku nei au ia oukou, ke manao nei anei oukou ua hiki ole ia oukou ke hoomana aku i ke Akua, ke ole ia iloko o ko oukou mau halepule wale no?

11 A eia hou ka’u e ninau aku ai, ke manao nei anei oukou e hoomana aku oukou i ke Akua i hookahi hoomana ana wale no e pono ai ma ka hebedoma?

12 Ke i aku nei au ia oukou, ua pono ko oukou hookukeia ana’ku mawaho o ko oukou mau halepule, i haahaa oukou, a i aoia’i hoi oukou i ka naauao; no ka mea, he mea e pono ai no oukou e aoia i ka naauao; no ka mea, no ko oukou hookukeia’na iwaho, ua hoowahawahaia oukou e ko oukou poe hoahanau, no ko oukou ilikole loa, ua laweia oukou i ka haahaa o ka naau; no ka mea, ua koiia oukou e lilo i haahaa.

13 A no ko oukou koiia’na e lilo i haahaa, ua pomaikai oukou; no ka mea, o ke kanaka i kekahi manawa ea, ina i koiia oia e lilo i haahaa, e imi ai oia i ka mihi; ano, he oiaio, o ka mea e mihi ana, e loaa no ia ia ke aloha; a o ka mea e loaa ana ke aloha a e hoomau ana i ka hopena, oia ke hoolaia auanei.

14 [m 16, p 20] Ano, me a’u i olelo aku ai ia oukou, no ko oukou koiia’na e lilo i haahaa, ua pomaikai oukou, aole anei oukou i manao ua pomaikai nui ae ka poe i hoohaahaa io ia lakou iho no ka olelo?

15 He oiaio, o ka mea nana e hoohaahaa io ana ia ia iho, a e mihi ana i kona mau hewa, a e hoomau ana i ka hopena oia ke hoopomaikaiia auanei; he oiaio, hoopomaikai nui loa ia mamua o ka poe i koiia e lilo i haahaa, no ko lakou ilikole loa;

16 Nolaila, pomaikai lakou ka poe hoohaahaa ia lakou iho me ke koi ole ia mai e lilo i haahaa; a ma kekahi olelo e, pomaikai ka mea nana i manaoio ai i ka olelo a ke Akua, a i bapetizoia me ka paakiki ole o ka naau; he oiaio, me ke koi ole ia mai e ike i ka olelo, aohe hoi i koiia e ike mamua o ko lakou manaoio ana.

17 He oiaio, ua nui ka poe i olelo mai, Ina e hoike mai oe ia makou i hoailona mai ka lani mai, alaila, e ike oiaio makou; aliala, e manaoio no makou.

18 Ano ke ninau nei au, he manaoio anei keia? Aia hoi, ke i aku nei au ia oukou, aole; no ka mea, ina e ike ana kekahi kanaka i kekahi mea, aohe ona kumu e manaoio ai, no ka mea, e ike ana no oia ia mea;

19 A, ano, pehea la ka oi aku ana o ka poino o ka mea e ike ana i ka makemake o ke Akua, a e hana ole ana, mamua o ka mea e manaoio wale ana no, a i loaa’i paha ke kumu wale no e manaoio ai, a i haule iho ai iloko o ka hala?

20 Ano, no keia mea, e noonoo pono oukou. Aia hoi, ke i aku nei au ia oukou, ua like ia ma kekahi lima, me ia ma kekahi; a e like auanei ia i kela kanaka keia kanaka e like me kana hana.

21 [m 16, p 21] Ano me a’u i olelo aku ai no ka manaoio: O ka manaoio, aole ia he ike lea i na mea; nolaila, ina he manaoio ko oukou, ke manaolana nei oukou no na mea i ike ole ia’i, i oiaio nae.

22 Ano, aia hoi, ke i aku nei au ia oukou ke makemake nei au e hoomanao oukou ua lokomaikai ke Akua i ka poe a pau i manaoio ma kona inoa: nolaila, ke makemake nei oia, o ka mea mua, e manaoio oukou, he oiaio, ma kana olelo.

23 Ano, ke haawi mai la oia i kana olelo ma o na anela la i na kanaka; he oiaio, aole i na kanaka wale, aka, i na wahine no hoi. Ano, aole o keia wale no: o na keiki uuku ua haawiia mai na olelo ia lakou i na manawa he nui wale, i hoohoka aku ai i ka poe naauao a me ka poe i aoia.

24 [m 16, p 22] Ano, e o’u poe hoahanau alohaia, me oukou i makemake mai ai e ike ia’u ka mea a oukou e hana’i no ko oukou hoopilikiaia’na a hookukeia’na; ano, aole au makemake e kuhi mai oukou e manao ana au e hoohewa aku ia oukou, eia wale no, e like me ka mea oiaio;

25 No ka mea, aole au manao ua koiia oukou a pau e hoohaahaa ia oukou iho; no ka mea, ke manaoio oiaio nei au aia no kekahi poe mawaena o oukou e hoohaahaa ana ia lakou iho, ina paha ma kela ano o ka noho ana ma keia ano o ka noho ana.

26 Ano, me a’u i olelo aku ai no ka manaoio—aole ia he ike lea, pela no hoi me ka’u mau olelo nei. Aole e hiki ia oukou ke ike i ka oiaio o ia mau mea i kinohi, i ka ike lea ana, e like me ka manaoio aole ia he ike lea.

27 Aka, ina e ala oukou a e hooeueu ae i na mea ikaika o na naau o oukou, e hoao mai i ka’u mau olelo, a e hana me kekahi huna o ka manaoio; he oiaio, ina e hiki ia oukou ke makemake wale no e manaoio, e kuu aku i keia makemake e hana iloko o oukou, a hiki ia oukou ke manaoio ma ke ano kupono e hookaawale ae i wahi no kau wahi o ka’u mau olelo.

28 Ano, e hoohalike kakou i ka olelo i kekahi hua. [m 16, p 23] Ano, ina e hookaawale ae oukou i wahi, e hiki i kahi hua ke kanuia iloko o kou oukou mau naau, aia hoi, ina he hua oiaio, a he hua maikai, ina aole oukou e kipaku aku ia ma ko oukou manaoio ole, i ku e ai oukou i ka Unahe o ka Haku, aia hoi, e hoomaka no ia e pehu ae iloko o kou oukou mau opu; a ia oukou e ike ai i keia pehu ana, e hoomaka no oukou e nalu iloko o oukou iho, he oiaio, he hua maikai neia, a oia hoi, ua maikai ka olelo, no ka mea, ke hoomaka nei ia e hooakea ae i kuu naau; he oiaio, ke hoomaka nei ia e hoomalamalama mai i kuu hoomaopopo ana; he oiaio, a ke hoomaka nei ia e lilo i ono loa ia’u.

29 Ano, aia hoi, aole anei e hoomahuahua keia i ko oukou manaoio? Ke i aku nei au ia oukou, ae; aole nae ia i ulu ae i ike lea.

30 Aka hoi, i ka pehu ana o ka hua, a i ka omaka ana, a i ka hoomaka ana e ulu, alaila, e pono no oukou ke olelo, ua maikai ka hua; no ka mea hoi, e pehu ana ia, a e omaka ana, a e hoomaka ana e ulu.

31 Ano, aia hoi, ua ike paa anei oukou he hua maikai keia? Ke i aku nei au ia oukou, ae; no ka mea, ke hua mai nei kela hua keia hua i kona ano like;

32 Nolaila, ina e ulu ana kekahi hua, he hua maikai ia, aka, ina e ulu ole ana ia, aia hoi, aole ia he maikai; nolaila, ua hooleiia’ku ia.

33 Ano, aia hoi, no ka hoao ana o oukou ia mea, a kanu iho la i ka hua, a e pehu ana ia, a e omaka ana, a e hoomaka ana e ulu, he mea e pono ai oukou ke ike ua maikai ka hua.

34 Ano, aia hoi, ua lawa anei ko oukou ike? Ae, ua lawa ko oukou ike ma ua mea la, a ua moe ko oukou manaoio; a o keia mea no ko oukou ike ana; no ka mea, ua ike oukou ua hooakea mai ka olelo i ko oukou mau naau, a ua ike no hoi oukou ua omaka ae ia, a e hoomaka ana ko oukou hoomaopopo ana e hoomalamalamaia mai, a e hoomaka ana ko oukou naau e hooakeaia,

35 E! aole anei keia he oiaio? Ke i aku nei au ia oukou, ae; no ka mea, he malamalama ia; a o ka mea i malamalama he maikai ia, no ka mea, ua hiki ke ikeia; nolaila, he pono no oukou ke ike lea he maikai ia. Ano, aia hoi, mahope iho o ko oukou hoao ana i ua malamalama nei, ua lawa anei ko oukou ike?

36 Aia hoi, ke i aku nei au ia oukou, aole; aole no hoi oukou e waiho ae i ko oukou manaoio, no ka mea, ua hana me ko oukou manaoio wale no e kanu iho i ka hua, e hiki ia oukou ke hoao aku, e ike ina he maikai ka hua.

37 A, aia hoi, me ka laau e hoomaka ai e ulu, e olelo no oukou, Ea, e hooluolu iho no kakou ia ia me ka malama nui, i komo ai kona aa, i ulu ai ia a e hoohua mai i ka hua ia kakou. Ano hoi, ina e hooluolu iho oukou ia ia me ka malama nui, e komo no kona aa, a e ulu ae, a e hoohua mai i ka hua.

38 [m 16, p 24] aka, ina e malama ole oukou i ka laau, a manao ole i kona hooluolu ana, aia hoi, aole no e komo na aa ona; a i ka wa e hiki mai ai ka wela o ka la a e wela mai ai ia ia, no ke aa ole ona, e mae ana ia, a e uhuki aku ana oukou ia ia, a hoolei aku iwaho.

39 Ano, aole keia no ka maikai ole o ka hua i kanuia; aole no hoi ia mea no ka maikai ole o ka hua ona i ohiia. Aka, no ka panoa o ko oukou lepo, a, aole oukou e hooluolu iho i ka laau, nolaila, ua hiki ole ia oukou ke loaa ka hua ona.

40 A pela hoi, ina aole oukou e hooluolu iho i ka olelo, e nana ana imua me ka maka o ka manaoio i ka hua ona, aole loa e hiki ia oukou ke ohi aku i ka hua o ka laau o ke ola.

41 Aka, ina i hooluolu iho oukou i ka olelo, he oiaio, e hooluolu iho i ka laau me ia i hoomaka ai e ulu, ma ko oukou manaoio me ka ikaika nui, a me ka hoomanawanui, e nana ana imua i ka hua ona, e komo no auanei na aa ona; a, aia hoi, e lilo no auanei ia i laau e ulu ana i ke ola mau loa;

42 A no ko oukou ikaika, a me ko oukou manaoio, a me ko oukou hoomanawanui me ka olelo ma ka hooluolu ana ia ia, i komo ai ilalo na aa ona iloko o oukou, aia hoi, mamuli e ohi no oukou i ka hua ona, ka mea i maikai loa, a i ono loa hoi mamua o na mea ono a pau, a i keokeo loa mamua o na mea i keokeo a pau, he oiaio, a i maemae loa mamua o na mea i maemae a pau; a e ahaaina auanei oukou ma keia hua, a piha ae la oukou, i makeai ole ai oukou, aole hoi e makewai.

43 Alaila, e ko’u poe hoahanau, e ohi no oukou i na uku no ko oukou manaoio, a me ko oukou ikaika, a ahonui, a hoomanawanui, e kali ana no ka laau e hoohua mai i ka hua no oukou.

MOKUNA 33

1 [mokuna 16, paukū 25] Ano, mahope iho o ko Alama olelo ana i neia mau olelo, hoouna mai la lakou ia ia, e makemake ana e ike, ina paha lakou e manaoio i ke Akua hookahi e hiki ia lakou ke loaa ua hua nei ana i olelo ai, a i ke ano o ko lakou kanu ana i ka hua, oia hoi ka olelo, ana i olelo aku ai, ana i i aku ai e kanuia ia e pono ai iloko o ko lakou mau naau; a i ke ano hea hoi lakou e hoomaka ai e hoohana i ko lakou manaoio?

2 A i aku la o Alama ia lakou, Aia hoi, ua i mai oukou ua hiki ole ia oukou ke hoomana aku i ko oukou Akua, no ka mea, ua hookukeia mai oukou mawaho o ko oukou mau halepule. Aka hoi,ke i aku nei au ia oukou, ina e manao ana oukou ua hiki ole ia oukou ke hoomana aku i ke Akua, ke kuhi hewa nui nei oukou, a he mea e pono ai no oukou e imi i na palapala hemolele, ina e manao ana oukou ua ao mai ua mau palapala la i keia mea ia oukou, aole oukou hoomaopopo ia mau mea.

3 Ke hoomanao nei anei oukou i ka heluhelu ana i ka mea a Zenosa, ke kaula o ka wa kahiko, i olelo mai ai no ka pule, a no ka hoomana ana?

4 No ka mea, i mai la oia, Ua lokomaikai oe, e ke Akua, no ka mea, ua lohe oe i ka’u pule, ia’u iloko o ka waonahele; he oiaio, ua lokomaikai oe i ka wa a’u i pule aku ai no ko’u poe enemi, a nau i hoohuli mai ia lakou ia’u;

5 He oiaio, e ke Akua, ua lokomaikai oe ia’u i ka wa a’u i hea aku ai ia oe ma ko’u kihapai; ia’u i hea aku ai ia oe ma kuu pule, a ua lohe oe ia’u.

6 A eia hou, e ke Akua, ia’u i huli ae ai i ko’u hale ua lohe oe ia’u ma ka’u pule.

7 A ia’u i huli ae ai i ko’u keena mehameha, e ka Haku, a pule aku la ia oe, ua lohe oe ia’u;

8 He oiaio, ua lokomaikai oe i ka’u mau keiki ia lakou i hea aku ai ia oe e lohea e oe, aole e na kanaka, a e lohe mai no oe ia lakou;

9 He oiaio, e ke Akua, ua lokomaikai mai oe ia’u a lohea mai ka’u hea ana mawaena konu o na anaina ou;

10 He oiaio, a ua lohe mai no hoi ia’u i ka wa a’u i kipakuia mai ai iwaho, a i hoowahawahaia mai e ko’u poe enemi; he oiaio, ua lohe oe i ka’u hea ana, a huhu ae la i ko’u poe enemi, a ua hoopai ae oe ia lakou iloko o kou inaina, me ka luku koke;

11 A ua lohe mai ia’u no kuu mau popilikia a me ko’u oiaio; a no kau Keiki oe i lokomaikai mai ai peia ia’u; nolaila, e kahea aku no au ia oe iloko o ko’u mau popilikia a pau; no ka mea, aia iloko ou ko’u olioli; no ka mea, ua hoohuli ae la oe i kou mau hoopai mai o’u aku nei, no kau Keiki.

12 [m 16, p 26] Ano, i aku la o Alama ia lakou, Ke manaoio nei anei oukou i ua mau palapala hemolele la i palapalaia e ka poe o ka wa kahiko?

13 Aia hoi, ina pela, alaila e manaoio no oukou i ka mea a Zenosa i olelo mai ai, no ka mea, aia hoi, i mai la oia, Ua hoohuli ae la oe i kou mau hoopai, no kau Keiki.

14 Ano hoi, e ko’u poe hoahanau, ke makemake nei au e ninau aku, ina ua heluhelu oukou i na palapala hemolele? Ina ua heluhelu, pehea la e hiki ai ia oukou ke manaoio ole ma ke keiki a ke Akua?

15 No ka mea, aole ia i palapalaia’i o Zenosa wale no ka i olelo mai ai no ia mau mea, aka o Zenoka hoi kekahi ka i olelo mai ai no ua mau mea nei;

16 No ka mea, aia hoi, i mai la oia, Ua huhu oe, e ka Haku, i keia poe kanaka, no ka mea, aole lakou i hoomaopopo iho i kou mau lokomaikai au i haawi mai ai maluna iho o lakou, no kau Keiki.

17 Ano, e ko’u poe hoahanau, ke ike nei oukou, ua hoike mai ka lua o ke kaula o ka wa kahiko no ke Keiki a ke Akua; a no ka makemake ole o na kanaka e hoomaopopo iho i kana mau olelo, hailukku ae la lakou ia ia a make loa.

18 Aka hoi, aole o keia wale no; aole o laua wale no na mea i olelo mai ai no ke Keiki a ke Akua.

19 Aia hoi, ua oleloia mai nona e Mose; he oiaio hoi, ua hookuia’e he hoailona iluna ma ka waonahele, i hiki i ka mea makemake ke nana’ku i ua mea la a ola. A ua nana’ku kekahi poe he nui wale a ola iho la.

20 Aka, kakaikahi ka poe i hoomaopopo iho i ke ano o ua mau mea nei, a o keia mea no ka paakiki o ko lakou mau naau. Aka ua nui wale na mea no ka paakiki loa aole o lakou nana’ku; nolaila, make aku la lakou. Ano, o ke kumu o ko lakou nana ole ana, no ka manaoio ole o lakou e hoola mai ana ia mea ia lakou.

21 E ko’u poe hoahanau, ina ua hiki ia oukou ke hoolaia, ma ka alawa ana’e o ko oukou mau maka, i hoolaia’i oukou, aole anei oukou e nana koke ae a i ole ia, e makemake loa paha oukou e hoopaakiki iho i ko oukou mau naau iloko o ka hoomaloka a e molowa, i ole ai oukou e alawa ae i ko oukou mau maka, i make ai oukou?

22 Ina pela, e hiki mai ka poino maluna o oukou; aka ina aole pela, alaila e alawa’e oukou i ko oukou mau maka; a e hoomaka e manaoio aku i ke Keiki a ke Akua, ka mea e hele mai a hoolapanai mai i kona poe kanaka, a ka mea hoi e hoomainoinoia auanei a e make i kalahala no ko lakou mau hewa; a e ala hou mai auanei oia mai ka make mai, i mea ia e lawe mai ai i ke alahouana, i ku iho ai auanei na kanaka a pau imua ona, e hookolokoloia, ma ka la hookolokolo hope, e like me ka lakou mau hana.

23 A, ano, e ko’u poe hoahanau, ke makemake nei au ia oukou e kanu iho i keia olelo iloko o ko oukou mau naau, a me ia e hoomaka ai e peho, pela hoi e hooluolu iho ai ia ma ko oukou manaoio. Aia hoi, e lilo ae ia i laau, e ulu ae ana iloko o oukou i ke ola mau loa. Alaila, na ke Akua e ae mai ia oukou i mama ko oukou mau ukana, ma o ka olioli la o kana Keiki. A o keia a pau ua hiki ia oukou ke hana, ke makemake oukou. Amene.

MOKUNA 34

1 [mokuna 16, paukū 27] Ano, eia kekahi, mahope iho o ka olelo ana a Alama i keia mau olelo ia lakou, noho iho la oia ilalo ma ka honua, a ku ae la o Amuleka a hoomaka ae la e ao aku ia lakou, i ka i ana,

2 E ko’u poe hoahanau, ke manao nei au he mea hiki ole ke naaupo oukou no na mea i oleloia mai ai no ka hiki ana mai o Kristo, ka mea i aoia’ku ai e makou oia ke Keiki a ke Akua; he oiaio, ua ike au ua ao nui loa ia’ku ua mau mea nei ia oukou, mamua o ko oukou kue ana a haalele maiwaena aku o makou.

3 A me oukou i makemake ai i ko’u kaikuaana aloha nei, nana e hoike aku ia oukou i ka mea a oukou e hana’i, no ko oukou mau pilikia; a ua olelo aku oia i kekahi mau mea ia oukou e hoomakaukau ai i ko oukou mau naau; he oiaio, a ua kauleo aku oia ia oukou e manaoio, a e hoomanawanui;

4 He oiaio, i loaa’i ia oukou ka manaoio e hiki ke kanu i ka olelo iloko o ko oukou mau naau, i hoao ai oukou i kona maikai;

5 A ua ike maua o ka mea ninau nui iloko o ko oukou mau naau, ina paha iloko o ke Keiki a ke Akua ka olelo, a ina aole paha auanei he Kristo.

6 A ua ike no hoi oukou ua hooiaio ae ko’u kaikuaana ia oukou, ma na mea he nui, aia no ka olelo iloko o Kristo, i ka hoola ana.

7 Ua hea ae ko’u kaikuaana ma na olelo a Zenosa, e hiki mai ana ka hoolapanai ana ma o ke Keiki a ke Akua la, a ma na olelo hoi a Zenoka; a ua hoopii ae oia ia Mose, e hoike mai he oiaio ua mau mea nei.

8 Ano, e hoike no au no’u iho, he oiaio ua mau mea nei. Aia hoi, ke i aku nei au ia oukou, ua ike au e hiki mai auanei o Kristo mawaena o na keiki a kanaka, e lawe maluna iho ona i na lawehala o kona poe kanaka, a e panai aku auanei oia no na hala o ko ke ao nei; no ka mea, ua olelo mai ka Haku ke Akua ia mea;

9 No ka mea, he mea e pono ai e hanaia mai ka mea e kalahala’i; no ka mea, i like me ke kumumanao nui o ke Akua mau loa, e hanaia kahi mea e kalahala a i e pono ai, i ole ia, e make loa na kanaka a pau me ka hiki ole ke pale ae; he oiaio ua paakiki na mea a pau; he oiaio, ua haule na mea a pau, a ua lilo, a e make loa io no, ke ole ma o ke kalahala ana la ka mea e pono ai ke hanaia mai;

10 No ka mea, he mea e pono ai e hanaia he mohai nui a hope, he oiaio, aole he mohai kanaka, aole hoi holoholona, aole hoi o kekahi ano o ka manu; no ka mea, aole loa ia e lilo ana i mohai kanaka; aka, he mohai mana loa a mau loa aku e pono ai.

11 [m 16, p 28] Ano, aole kekahi kanaka e hiki ai ia ia ke mohai aku i kona koko iho, i mea e panai ai no na hala o hai. Ano, ina e pepehi kanaka ana kekahi kanaka, aia hoi, e lawe aku anei ko kakou kanawai, ka mea pololei, i ke ola o kona hoahanau? Ke i au nei au ia oukou, aole.

12 Aka, e koi ana ke kanawai i ke ola o ka mea nana i pepehi ai i ke kanaka; nolaila, aole e hiki i kekahi mea, e emi ana malalo iho o ke kalahala mana loa, ke kala no na hala o ko ke ao nei;

13 Nolaila, he mohai nui a hope e pono ai; a, alaila e hookiia’ku, a he mea hoi e pono ai ke hooki aku i ka hookaheia’na o ke koko; aliala, e hookoia’i ke kanawai o Mose; he oiaio, e ko mai ai ia a pau loa; o kela huna a lihi iki keia huna a lihi iki, aole mea i lilo aku.

14 A, aia hoi, o keia no ke ano a pau o ke kanawai; o kela huna keia huna e kuhikuhi ana i kela mohai nui a hope; a ua mohai nui a hope la o ke Keiki a ke Akua no ia: he oiaio, he mana loa a mau loa;

15 A pela oia e lawe mai ai auanei i ke ola i ka poe a pau e manaoio ma kona inoa; o ke kumu no keia o ua mohai hope nei, e lawe mai ai i na naau o ke aloha, o ka mea ia e lanakila ana maluna o ka hoopai, a e lawe mai ana i na mea i na kanaka i loaa’i ia lakou ka manaoio e mihi ai.

16 A pela e hiki ai i ke aloha ke panai ai i na koi ana o ka hoopai, a i hoopuni ai ia lakou iloko o na lima palekana, oiai ka mea i hana ole aku me ka manaoio e mihi ai, ua waihoia i ke kanawai a pau o na koi ana o ka hoopai; nolaila, i ka mea wale no nona ka manaoio e mihi ai, i laweia mai ai ki kumumanao nui a mau loa o ka hoolapanai.

17 Nolaila, na ke Akua e ae mai ia oukou, e ko’u poe hoahanau, e hoomaka oukou e hana aku me ko oukou manaoio e mihi, i hoomaka ai oukou e hea aku i kona inoa hoano, nana e aloha mai ia oukou;

18 Oia, e hea aku ia ia no ke aloha; no ka mea, ua mana oia e hoola mai;

19 Oia, e hoohaahaa iho oukou ia oukou iho, a e hoomau ma ka pule ia ia:

20 E hea aku ia ia i ka wa o oukou iloko o na kihapai o oukou; he oiaio, maluna iho o na poe holoholona o oukou a pau:

21 E hea aku ia ia iloko o na hale o oukou, he oiaio, maluna iho o ko ko oukou hale, i ke kakahiaka, i ke awakea, a me ke ahiahi;

22 He oiaio, e hea aku ia ia me ke ku e aku i ka mana o ko oukou poe enemi;

23 He oiaio, e kahea aku ia ia me ke ku e i ka diabolo, he enemi no oia i ka pono a pau.

24 E hea aku ia ia maluna iho o na hua o ko oukou mau kihapai, i pomaikai ai oukou ma ia mau mea;

25 E hea aku ia ia maluna iho o na pua holoholona o ko oukou mau kola, i mahuahua ai lakou.

26 Aka, aole o keia mau mea wale; e ninini aku oukou e pono ai i ko oukou mau uhane ma na keena mehameha o oukou, a ma na wahi malu o oukou, a ma ko oukou waonahele;

27 He oiaio, a ia oukou e hea ole aku ai i ka Haku, e hoopihaia ko oukou mau naau, i kaiia’i ma ka pule mau ia ia no ko oukou pomaikai, a no ka pomaikai hoi o ka poe a puni oukou.

28 [m 16, p 29] Ano, aia hoi, e o’u poe hoahanau alohaia, ke i aku nei au ia oukou, mai manao oukou o keia ka pau ana; no ka mea, mahope iho o ka oukou hana ana i keia mau mea a pau, ina e hookuke ae oukou i ka poe nele, a me ka poe kapa ole, a hele ole e ike i na mea mai a pilikia, a haawi ole aku i ko oukou waiwai, ina he lako ko oukou, i ka poe i nele; ke i aku nei au ia oukou, ina aole oukou e hana i kekahi o keia mau mea, aia hoi, ina ua make hewa ka oukou pule, a e hoopomaikai ole ana ia oukou, a me he poe haakamani la oukou i hoole ai i ka manaoio;

29 Ina aole oukou e hoomanao e lokomaikai aku, me he oka la oukou a na mea hoomaemae i hoolei aku ai iwaho, (no ka mea, aohe ia he maikai,) a ua hehiia ilalo o na kapuai o kanaka.

30 [m 16, p 30] Ano, e o’u poe hoahanau, ke makemake nei au mahope iho o ko oukou loaa ana na hoike he nui wale me neia, me ka ike hoi e hoike mai ana na palapala hemolele no keia mau mea, e hele mai a e hua ae i ka hui i ka mihi;

31 He oiaio, ke makemake nei au e hele mai oukou a e hoopaakiki hou ole iho i ko oukou mau naau; no ka mea hoi, ano ka manawa, a me ka la o ko oukou ola; a, nolaila, ina e mihi oukou a hoopaakiki ole i ko oukou naau, e lawe koke ia mai ke kumumanao nui hoolapanai ia oukou.

32 No ka mea, aia hoi, o keia ola ana no ka manawa no na kanaka e hoomakaukau ai e halawai pu me ke Akua; he oiaio hoi, o ka la o keia ola ana oia no ka la no na kanaka e hana’i i na hana a lakou.

33 Ano, me a’u i olelo e ai ia oukou mamua, me oukou i loaa na hoike he nui wale me neia, nolaila, ke noi aku nei au ia oukou, e hoopanee ole aku oukou i ko oukou la e mihi ai a hiki i ka hopena; no ka mea, mahope iho o keia la o ke ola, i haawiia mai ai ia kakou e hoomakaukau ai no ke ao pau ole, aia hoi, ina aole kakou e hoonui ae i ko kakou manawa oiai ma keia ola ana, alaila, ke hele mai la ka po o ka pouli, iloko olaila e hiki ole ai ka hana ke hanaia.

34 Aole e hiki ia oukou ke olelo, ia oukou e laweia mai ai i kela manawa pilikia weliweli, E mihi no au, e hoi no au i ko’u Akua. Aole, aole loa e hiki ia oukou ke olelo ae i keia; no ka mea, o kela uhane hookahi nana i noho ma ko oukou kino i ka manawa a oukou e puka aku ai mai keia ola ana’ku, na ua uhane hookahi la auanei ka mana e noho ai ma ko oukou kino ma kela ao mau loa.

35 No ka mea, aia hoi, ina ua hoopanee ae i ko oukou la e mihi ai, a hiki wale aku i ka make, aia hoi, ua lilo ae oukou malalo iho o ka uhane o ka diabolo, a e hoopaa ana oia ia oukou nona; no ia mea, ua haalele iho ka Uhane o ka Haku ia oukou, aohe ona kuleana iloko o oukou, a no ka diabolo ka mana a pau maluna iho o oukou; a oia no ka noho hope ana o ka poe hewa.

36 A o keia ka’u i ike ai, no ka mea, ua i mai ka Haku, Aole oia e noho ana iloko o na luakini hemolele ole, aka iloko o na naau o ka poe pono oia i noho ai; he oiaio, a ua i mai no hoi oia, e noho no ka poe pono ilalo iloko o kona aupuni, e hele hou ole ai iwaho: aka e hookeokeoia ko lakou mau aahu, ma o ke koko la o ke Keikihipa.

37 [m 16, p 31] Ano, e ko’u poe hoahanau aloha, ke makemake nei au e hoomanao oukou i keia mau mea, a e hana aku oukou i ko oukou ola me ka makau imua o ke Akua, a e hoole hou ole oukou i ka hiki ana mai o Kristo;

38 E paio ku e hou ole aku oukou i ka Uhane Hemolele, aka e hookipa aku oukou ia ia, a lawe ae maluna iho o oukou i ka inoa o Kristo; a e hoohaahaa oukou ia oukou iho i ka lepo, a hoomana aku i ke Akua ma kela wahi keia wahi a oukou e noho ai, iloko o ka uhane a iloko o ka oiaio; a e noho oukou me ke aloha aku i kela la i keia la, no ka nui o na mea aloha a me na mea pomaikai ana i haawi mai ai maluna iho o oukou;

39 He oiaio, a ke kauleo aku nei no hoi au ia oukou, e o’u poe hoahanau, e makaala oukou i ka pule mau, i alakai ole ia aku ai oukou e ka hoowalewale ana o ka diabolo, i ole ai e lanakila oia maluna iho o oukou, i ole ai oukou e lilo i poe kauwa nana ma ka la hope: no ka mea hoi, aole e uku ana oia ia oukou i kekahi mea maikai.

40 Ano, e o’u poe hoahanau aloha, ua makemake au e kauleo aku ia oukou e ahonui, a e hoomanawanui oukou ma kela ano o ka pilikia keia ano o ka pilikia; i ole ai oukou e hoino aku i ka poe nana i hookuke mai ia oukou iwaho no ko oukou ilikole nui, o lilo oukou i poe lawehala e like me lakou;

41 Aka, i ahonui oukou, a hoomanawanui me ua mau popilikia la, me ka manaolana paa e hoomaha auanei oukou i kekahi la mai ko oukou mau popilikia a pau.

MOKUNA 35

1 [mokuna 16, paukū 32] Ano, eia kekahi, mahope iho o ka hoopau ana o Amuleka i keia mau olelo, haalele iho la laua i ka poe kanaka, a hele ae la iloko o ka aina o Ieresona;

2 He oiaio, a o ka poe hoahanau e ae, mahope iho o ka hai ana i ka olelo i ko Zorama poe, hele ae la no hoi iloko o ka aina o Ieresona.

3 A, eia kekahi, mahope iho o ke kuka pu ana o ka poe hanohano ae o ko Zorama poe no na olelo i haiia mai ai ia lakou, ua huhu lakou no ka olelo, no ka mea, e hoopau ana ia i ka lakou oihana; nolaila, aole lakou i hoolohe mai i na olelo.

4 A hoouna ae la lakou a houluulu pu ae la mawaena o ka aina a pau, i na kanaka a pau, a kuka pu iho la me lakou no na olelo i oleloia’i.

5 Ano, aole o na luna o lakou, a me na kahuna a lakou, a me na kumu o lakou, i hoike ae ai i na kanaka no na mea a lakou i makemake ai; nolaila, ike malu iho la lakou i na manao o na kanaka a pau.

6 A eia kekahi, mahope iho o ko lakou loaa ana ua manao o na kanaka a pau, o ka poe i makemake i na olelo i oleloia’i e Alama a me kona mau hoahanau, ua kipakuia iwaho o ka aina; a ua nui loa lakou; a hele mai la no hoi lakou iloko o ka aina o Ieresona.

7 [m 16, p 33] A eia kekahi, lawelawe ae la o Alama a me kona poe hoahanau ia lakou.

8 Ano, ua huhu ko Zorama poe i ka poe kanaka o Amona e noho ana ma Ieresona, a o ka luna nui o ko Zorama poe he kanaka hewa loa ia, hoouna mai la oia i ka poe kanaka la o Amona, e makemake ana ia lakou e kipaku mawaho o ko lakou aina i ka poe a pau i hele mai ai mai o lakou la ae iloko o ko lakou aina.

9 A ha ae la oia i na olelo hooweliweli he nui wale ia lakou. Ano, aole o ka poe kanaka o Amona i makau aku i ka lakou la mau olelo, nolaila, aole lakou i kipaku aku ia lakou, aka, hookipa ae la lakou i ka poe hune a pau o ko Zorama, ka poe i hele mai ia lakou; a hanai ae la ia lakou, a hooaahu ae la ia lakou, a haawi ae la ia lakou i na aina i hooilina no lakou; a kokua ae la lakou ia lakou la e like me ko lakou la nele.

10 Ano, hoonaukiuki keia mea i ko Zorama poe e huhu mai i ka poe kanaka o Amona, a hoomaka iho la lakou e hui pu me ko Lamana poe, a e hookonokono ae i kela poe no hoi e huhu mai ia lakou:

11 A pela i hoomaka ai ko Zorama poe a me ko Lamana poe e hoomakaukau no ke kaua ku e i ka poe kanaka o Amona, a i ka poe kanaka o Nepai.

12 A pela i pau ai ka makahiki umikumamahiku o ke au o na Lunakanawai, maluna iho o ka poe kanaka o Nepai.

13 [m 16, p 34] A haalele iho la ka poe kanaka o Amona i ka aina o Ieresona, a hele mai la iloko i ka aina o Meleka, a hookaawale ae la i wahi ma ka aina o Ieresona no ka poe koa o ko Nepai poe, e hiki ia lakou ke paio me ka poe koa o ko Lamana poe, a me ka poe koa o o Zorama poe; a pela i hoomaka ai kekahi kana mawaena o ko Lamana poe a me ko Nepai poe, ma ka makahiki umikumamawalu o ke au o na Lunakanawai; a e haawiia’ku auanei he mooolelo o ko lakou mau kaua.

14 A hoi aku la o Alama, a me Amona, a me ko laua mau hoahanau, a me na keikikane elua no hoi a Alama, i ka aina o Zarahemela, mahope iho o ko lakou lilo ana i mau mea hana ma na lima o ke Akua i ka lawe ana mai i kekahi poe he nui wale o ko Zorama poe i ka mihi; a o ka poe a pau i laweia i ka mihi, ua kipakuia iwaho o Ieresona, a ua lalau aku lakou i na mea kaua e hoomalu ia lakou iho, a me ka lakou poe wahine, a poe keiki, a me ko lakou mau aina.

15 Ano, o Alama ua eha oia no ka hewa o kona poe kanaka, he oiaio, no na kaua, a no na hookahe koko ana, a me na paio mawaena o lakou; a ua hele no e hai aku i ka olelo, a ua hoounaia e hai aku i ka olelo mawaena o na kanaka a pau ma kela kulanakauhale keia kulanakauhale; a i ka ike ana e hoomaka ana na naau o na kanaka e mahuahua ma ka paakiki, a e hoomaka ana lakou e hoonaukiukiia no ka ikaika o ka olelo, ua kaumaha nui loa kona naau;

16 Nolaila, kena ae la oia e houluulu pu ia kana mau keikikane, e hiki ia ia ke haawi pakahi ae ia lakou i kela mea i keia mea i kana kauoha, no na mea e pili ana i ka pono. A he mooolelo ko makou o kana mau kauoha, ana i haawi mai ai ia lakou, e like me kona mooolelo iho.

O na kauoha a Alama, i kana keiki o Helamana.

Mai ka mokuna 36 a hiki i ka 37.

MOKUNA 36

1 [mokuna 17, paukū 1] E ka’u keiki, e haliu mai ka pepeiao i ka’u mau olelo; no ka mea, hoohiki ae au ia oe, ina e malama oe i na kauoha a ke Akua, e hoopomaikaiia auanei oe ma ka aina.

2 Ke makemake nei au e hana oe me a’u i hana’i, i ka hoomanao ana i ka noho pio ana o ko lakou poe makua; no ka mea, iloko lakou o ka noho luhi ana, a ua hiki ole i kekahi mea ke hoopakele mai ia lakou ke ole ia ke Akua o Aberahama, a o ke Akua o Isaaka, a o ke Akua o Iakoba; a hoopakele oiaio mai la oia ia lakou i ko lakou mau pilikia.

3 Ano, e ka’u keiki, e Helamana, aia hoi, ma kou wa kamalii oe, a nolaila ke noi aku nei au ia oe e hoolohe mai i ka’u mau olelo, a e aoia e au; no ka mea, ua ike no au o ka poe e hilinai aku ana i ke Akua, e kokuaia no lakou iloko o na hoao ana o lakou, a me na pilikia o lakou, a me na eha o lakou, a e hookiekieia iluna auanei ma ka la hope;

4 A, aole o’u makemake e manao oe ke ike nei au no’u iho mamuli o ko ke kino, aka mamuli o ko ka uhane; aole o ka naau kino, aka o ke Akua.

5 Ano hoi, ke i aku nei au ia oe, ina ua hoohanau ole ia au e ke Akua, ina ua ike ole au i ua mau mea nei; aka, ua hoike mai ke Akua, ma ka waha o kana anela hemolele, i ua mau mea nei ia’u, aole no kekahi pono o’u iho,

6 No ka mea, kaahele ae la au me na keikikane a Mosia, e imi ana e hoopau aku i ka ekalesia o ke Akua; aka hoi, hoouna mai la ke Akua i kona anela hemolele e hooki mai ia makou ma ke ala.

7 A, aia hoi, olelo mai la oia ia makou, me he mea la he leo o ka hekili ia, a haalulu iho la ka honua, no ka mea, hiki mai la ka makau o ka Haku maluna iho o makou.

8 Aka hoi, i mai la ka leo ia’u, E ala’e. A ala ae la au a ku iluna, a ike aku la i ka anela.

9 A i mai la oia ia’u, Ina paha e makemake ana oe i ka make nou iho, mai imi hou ma neia hope aku e hoopau aku i ka ekalesia o ke Akua.

10 [m 17, p 2] A eia kekahi, hina iho la au i ka honua; a no na la ekolu a me na po ekolu, ua hiki ole ia’u ke hamama i kuu waha; aole hoi i hiki ia’u ke hoonioni i na lala o’u.

11 A olelo mai la ka anela i na mea e ae, i lohea e ko’u mau hoahanau, aka aole au i lohe ia mau mea; no ka mea, ia’u i lohe ai i na olelo, Ina paha e makemake ana oe i ka make nou iho, mai imi hou e hoopau aku i ka ekalesia o ke Akua, ua loohia au me ka eehia a pihoihoi, o hoopauia mai paha au, a haule iho la au i ka honua, a lohe ole au i na mea hou;

12 Aka ua hoowalaniaia iho au me ka ehaeha mau loa, no ka mea, ua hakukoi nui loa ko’u uhane, a hoowalaniaia me ko’u mau hewa a pau.

13 He oiaio, hoomanao iho la au i ko’u mau hala a hana ino a pau, no keia mau mea ua hoomainoinoia au me na eha o Gehena; he oiaio, ike iho la au ua kipi akku au i kuu Akua, a ua malama ole au i kana mau kauoha hemolele;

14 He oiaio, a ua pepehi loa au i na keiki he nui ana, a he oiaio, ua alakai aku au ia lakou i ka make loa; he oiaio, a no ka nui o ka’u mau hana ino, o ka manao wale ana i ke komo ana ma ke alo o ko’u Akua, he mea ia i hoowalania iho ai i ko’u uhane me ka weliweli hiki ole ke haiia’ku.

15 Manao iho la au, ina ua hiki ia’u ke kipakuia mai a lilo i mea ole o ka uhane a me ke kino pu, i ole au e kaiia’ku e ku ma ke alo o ko’u Akua, e hookolokoloia no ka’u mau hana.

16 Ano, no na la ekolu a me na po ekolu wau i hoowalaniaia mai ai, me na eha o kahi uhane poino loa.

17 [m 17, p 3] A eia kekahi, i ka wa ia’u i hoowalaniaia mai ai me ka ehaeha, oiai au i hoohakukoiia mai ai ma ka hoomanao i ko’u mau hala he nui loa, aia hoi, hoomanao iho la no hoi au i ka hoolohe ana o’u i ko’u makuakane i wanana aku ai i na kanaka, no ka hiki mai ana o kahi Iesu Kristo, he Keiki a ke Akua, e panai ai no na hala o ko ke ao nei.

18 Ano, i ka hopu ana o ko’u naau i ua manao nei, hea aku la au iloko o ko’u naau, E Iesu, e ke Keiki a ke Akua, e aloha mai ia’u, ka mea iloko o ke au awaawa, a i hoopuniia a puni e na kaula mau loa o ka make.

19 Ano hoi, ia’u i manao ai i keia, ua hiki ole ia’u ke hoomanao hou aku i ko’u mau eha; he oiaio, ua hoowalania hou ole ia au e ka hoomanao ana i ko’u mau hala.

20 A nani wale ka olioli a me ka malamalama kupaianaha a’u i ike ai; he oiaio, ua hoopihaia ko’u uhane me ka olioli e oi aku ana e like me ko’u eha i oi aku ai;

21 He oiaio, ke i aku nei au ia oe, e ka’u keiki, aole loa he mea e like ai ka eha a me ka awaawa, me ko’u mau eha. He oiaio, a ke i hou aku nei au ia oe, e ka’u keiki, ma ka lima e, aole loa he mea e like ai ka maikai a me ke ono loa, me ko’u olioli;

22 He oiaio, manao au ua ike au me ko ko kakou kupunakane o Lehi i ike ai, i ke Akua e noho ana maluna iho o kona noho alii, i hoopuniia me na poe anela he lehulehu i hiki ole ke heluia, e himeni ana a e hiilani ana i ko lakou Akua: he oiaio, a iini nui iho la ko’u uhane e hiki ilaila.

23 Aka hoi, loaa hou iho la i ko’u mau lala ko lakou ikaika, a ku ae la au ma ko’u mau wawae, a hoike akuk la i na kanaka ua hoohanauia mai au e ke Akua;

24 He oiaio, a mai ia manawa mai a hiki ia nei, ua hana aku au me ka hooki ole, i hiki ia’u ke kai mai i na uhane i ka mihi; i hiki ia’u ke kai mai ia lakou e hoao i ka olioli nui loa a’u i hoao ai; i hiki ia lakou no hoi ke hoohanauia e ke Akua, a ke hoopihaia me ka Uhane Hemolele.

25 Ano, aia hoi, e ka’u keiki, ke haawi mai nei ka Haku ia’u i ka olioli nui loa i na hua o ka’u hana ana;

26 No ka mea, no ka olelo ana i haawi mai ai ia’u, aia hoi, ua nui no ka poe i hoohanauia e ke Akua, a ua hoao aku me a’u i hoao aku ai, a ua ike he maka no he maka, me a’u i ike ai; nolaila, ke ike la lakou no ua mau mea nei a’u i olelo iho ai, me a’u i ike ai; a o ka ike a’u i loaa’i no ke Akua ia.

27 [m 17, p 4] A ua kokuaia mai au malalo iho o na hoao ana a me na pilikia o kela ano keia ano, he oiaio, a iloko o na eha a pau he nui wale; he oiaio, ua hoopakele mai ke Akua ia’u mai ka halepaahao, a mai na mea paa, a mai ka make mai; he oiaio, a ke paulele nei au ia ia, a e hoopakele no oia ia’u i keia manawa; a ua ike au e hookiekie mai no oia ia’u i keia manawa;

28 A ua ike au e hookiekie mai no oia ia’u iluna ma ka la hope, e noho pu me ia ma ka nani; he oiaio, a e hoolea aku no au ia ia no ka wa pau ole, no ka mea, ua lawe mai la oia i ko kakou poe kupuna mailoko mai o Aigupita, a ua ale oia i ko Aigupita poe iloko o ke Kaiula; a alakai mai la oia ia lakou ma kona mana iloko o ka aina i olelo mia ia’i; he oiaio, ua hoopakele mai la oia ia lakou mailoko mai o ka luhi a me ka noho pio ana, ia manawa aku ia manawa aku;

29 He oiaio, a ua lawe mai la no hoi oia i ko kakou poe kupuna mailoko mai o ka aina o Ierusalema; a ua hoopakele mai no hoi oia ia lakou ma kona mana mau loa, mailoko mai o ka luhi a me ka noho pio ana, ia manawa aku ia manawa aku, a hiki i keia la; a ua hoomanao mau au i ko lakou noho pio ana: he oiaio, a he mea e pono ai nou no hoi e hoomanao mau, me ia’u i hoomanao ai i ko lakou noho pio ana.

30 Aka hoi, e ka’u keiki, aole o keia wale no; no ka mea, he mea pono ai nou e ike, me a’u e ike nei, ina e malama oe i na kauoha a ke Akua, e hoopomaikaiia auanei oe ma ka aina; a he mea e pono ai nou ke ike no hoi, ina aole oe e malama i na kauoha a ke Akua, e hookiia’ku auanei oe mai kona alo aku. Ano ua ku keia i kana olelo.

MOKUNA 37

1 [mokuna 17, paukū 5] Ano, e ka’u keiki Helamana, ke kauoha aku nei au ia oe e lawe oe i na mooolelo i waihoia mai me au;

2 A ke kauoha aku nei au ia oe e kakau iho oe i mooolelo no keia poe kanaka, me a’u i hana’i, maluna iho o na papa o Nepai, a e malama laa i ua mau mea nei a pau a’u i malama ai, e like me a’u i malama ai ia mau mea: no ka mea, no kekahi kumu nui naauao i malamaia’i ia mau mea;

3 A o keia mau papa keleawe i piha’i me keia mau kaha, me na mooolelo o na palapala hemolele maluna iho o ia mau mea, a me ke kuauhau o ko kakou poe kupuna, mai kinohi mai.

4 Aia hoi, ua wananaia mai e ko kakou poe kupuna, e malamaia ua mau mea nei, a e haawiia’ku mai kekahi hanauna aku i kekahi hanauna aku, a e malamaia a e hoolaia e ka lima o ka Haku, a hiki i ka wa e hele aku ia mau mea i na lahuikanaka, a me na ohana, i na olelo, a me na kanaka a pau, i ike ai auanei lakou no na mea pohihihi i kakauia’i maluna olaila.

5 Ano hoi, ina e hookoeia ia mau mea, he mea e pono ai i mau ai ko lakou huali; he oiaio, a e mau ai no ko lakou huali; he oiaio, a me na papa a pau no hoi i piha’i me na palapala hemolele.

6 Ano, e manao paha oe he mea naaupo keia iloko o’u; aka hoi, ke i aku nei au ia oe, ma o na mea uuku a maalea ole la, e laweia mai ai a ko na mea nui; a e hoohoko ana na mea uuku i ka poe naauao ma na manawa he nui.

7 A ke hana la ka Haku ke Akua ma o na hana la e lawe mai ai i kona mau kumumanao nui a mau loa; a ma o na mea uuku loa la e hoohoka ana ka Haku i ka poe naauao, a e lawe mai ana i ke ola o na uhane he nui loa.

8 [m 17, p 6] Ano, a hiki i keia manawa he mea naauao keia i ke akua i malamaia’i ua mau mea nei: no ka mea hoi, ua hooakea mai ua mau mea nei i ka hoomanao ana o keia poe kanaka, he oiaio, a hoomaopopo hoi i na mea he nui i ka hewa o ko lakou mau aoao, a lawe mai la ia lakou i ka ike i ko lakou Akua, i ka hoolaia’na o ko lakou mau uhane.

9 He oiaio, ke i aku nei au ia oe, ina aole no keia mau mea a ua mau mooolelo nei i piha’i, i kakauia’i maluna iho o ua mau papa nei, ina ua hiki ole ia Amona a me kona mau hoahanau ke hoomaopopo aku i na tausani he nui wale o ko Lamana poe, no na mooolelo pololei ole o ko lakou poe kupuna; he oiaio, ua lawe mai ua mau mooolelo nei a me ka lakou mau olelo ia lakou la i ka mihi; oia, ua lawe mai ua mau mooolelo nei ia lakou la i ka ike i ka Haku, ko lakou Akua, a e hauoli iloko o Iesu Kristo, ko lakou Mea Hoolapanai.

10 A owai la ka mea i ike, anoai e lilo ai ua mau mea nei i mea hana i ka lawe ana mai i na tausani he nui wale o lakou, he oiaio, a me na tausani he nui wale hoi o ko kakou poe hoahanau ai oolea, ko Nepai poe, ka poe e hoopaakiki ana ano i ko lakou mau naau iloko o ka hewa a me ka hana ino, i ka ike i ko lakou Mea Hoolapanai?

11 Aole i hoikeia mai kela mau mea pohihihi a pau loa ia’u i keia manawa; nolaila e hooki no au.

12 A e lawa paha ia ke olelo wale no au, ua malamaia ua mau mea nei no kekahi hana naauao, a ua ikea keia hana e ke Akua: no ka mea, ke ao mai la oia ma ka naauao maluna iho o kana mau hana a pau, a ua pololei kona mau ala, a o kana hana ana, oia hookahi mau loa no ia.

13 E hoomanao, e hoomanao, e ka’u keiki Helamana, i ka nui o ka ikaika o na kauoha a ke Akua. A i mai la oia, Ina e malama mai oukou i ka’u mau kauoha, e hoopomaikaiia oukou ma ka aina; aka, ina e malama ole oukou i kana mau kauoha, e hookiia’ku lakou mai kona alo aku.

14 Ano, e hoomanao, e ka’u keiki, ua waiho ke Akua i ua mau mea laa nei ia oe, ana i malama laa mai ai, a, ana e malama ai a e hoola ai no hoi no kekahi hana naauao iloko ona, e hiki ia ia ke hoike ae i kona mana i na hanauna e hiki mai ana.

15 [m 17, p 7] Ano, aia hoi, ke hai aku nei au ia oe ma o ka Uhane la o ka wanana, ina e ae oe maluna o na kauoha a ke Akua, aia hoi, e laweia aku keia mau mea laa mai ou kau, e ka mana o ke Akua, a e hookuuia’ku oe ia Satana, nana e kanana mai ia oe me he opala la imua o ka makani;

16 Aka, ina e malama oe i na kauoha a ke Akua, a e hana aku me keia mau mea laa, e like me ka mea a ka Haku e kauoha mai ai ia oe, (no ka mea, he pono nou e hoopii aku i ka Haku no na mea a pau au e hana aku ai me keia mau mea laa,) aia hoi, aohe he mana o ka honua nei a o ka po e hiki ai ke lawe aku i ua mau mea laa la mai ou aku, no ka mea, ua mana ke Akua i ka hooko ana i kana mau olelo a pau;

17 No ka mea, e hooko mai no oia i na olelo pomaikai a pau ana e haawi mai ai ia oe, no ka mea, ua hooko mai oia i na olelo pomaikai ana i haawi mai ai i ko kakou poe kupuna.

18 No ka mea, olelo pomaikai oia ia lakou nana no e hookoe mai i ua mau mea nei no kekahi hana naauao iloko ona, i hiki ia ia ke hoike ae i kona mana i na hanauna e hiki mai ana.

19 [m 17, p 8] Ano, aia hoi, ua hooko mai oia i kekahi kumumanao i ka hoihoi hou ana i na tausani he nui wale o ko Lamana poe i ka ike i ka oiaio; a ua hoike mai oia i kona mana iloko o lakou, a e hoike mai no oia i kona mana iloko o lakou no hoi, i na hanauna e hiki mai ana; nolaila, e hoolaia’i ua mau mea nei;

20 Nolaila, ke kauoha aku nei au ia oe, e ka’u keiki Helamana, e ikaika oe i ka hooko ana i ka’u mau olelo a pau, a e ikaika hoi oe i ka malama ana i na kauoha a ke Akua, me ia i palapalaia’i.

21 [m 17, p 9] Ano, e olelo aku no au ia oe no kela mau papa he iwakaluakumamaha, nau e malama i ua mau mea la, i hoikeia’ku ai i keia poe kanaka na mea pohihihi a me na hana o ka pouli, a me ka lakou mau hana malu, oia no ka hana malu a kela poe kanaka, ka poe i anaiia’i; he oiaio, e hoikeia’ku ko lakou pepehi kanaka ana a pau, a powa ana, a me ko lakou hao wale ana, a me ka lakou hana ino, a mau mea hoopailua, i keia poe kanaka; he oiaio, a nau e malama i keia mau mea kuhikuhi nei.

22 No ka mea, aia hoi, ike aku la ka Haku ua hoomaka kona poe kanaka e hana iloko o ka pouli, he oiaio, e hana i na mea hoopailua a me na pepehi kanaka malu; nolaila, i mai la ka Haku, Ina aole lakou e mihi, e anai loa ia lakou mai ka ili aku o ka honua.

23 A i mai la ka Haku, E hoomakaukau no au no ka’u kauwa o Gazelema, he pohaku, he mea ia e alohi aku ma ka pouli i malamalama, e hiki ia’u ke hoike aku i ko’u poe kanaka, ka poe e malama ana ia’u, e hiki ia’u ke hoike ia lakou i na hana a ko lakou poe hoahanau; he oiaio, i ka lakou mau hana malu, i ka lakou mau hana o ka pouli, a me ka lakou hana ino a mau mea hoopailua.

24 Ano, e ka’u keiki, ua hoomakaukauia ua mau mea kuhikuhi nei, i ko ai ka olelo a ke Akua, ana i olelo mai ai, i ka i ana:

25 E hoopuka aku no au noloko mai o ka pouli i ka malamalama, i ka lakou mau hana malu a me ko lakou mau mea hoopailua a pau; a ke mihi ole lakou, e anai loa aku au ia lakou mai ka ili aku o ka honua; a e hoopuka aku no au i ka malamalama i ko lakou mau mea malu a mau mea hoopailua a pau, i kela lahuikanaka i keia lahuikanaka, ka poe e noho ana auanei ma ka aina.

26 Ano, e ka’u keiki, ke ike nei kaua aole lakou i mihi; nolaila, ua anaiia mai lakou, a pela ma keia mea ua ko ka olelo a ke Akua; he oiaio, o ka lakou hana malu ino ua hoopukaia mai noloko mai o ka pouli, a ua hoikeia mai ia kakou.

27 [m 17, p 10] Ano, e ka’u keiki, ke kauoha aku nei au ia oe e aua oe i ka lakou mau hoohiki a pau, a me ka lakou mau berita, a me ka lakou ae like ana iloko o ko lakou mau hana ino malu; he oiaio, a me ko lakou mau hoailona a me ko lakou mau mea ano e, nau e aua mai i keia poe kanaka, i ike ole ai lakou ia mau mea, o haule iho paha lakou iloko o ka pouli no hoi, a e anaiia mai auanei.

28 No ka mea, aia hoi, aia no he olelo hoopoino maluna iho o keia aina a pau, e hiki mai ai ka anai ana maluna iho o kela poe a pau e hana ana i ka pouli, e like me ka mana o ke Akua, ia lakou e oo loa ai; nolaila, ke makemake nei au i ole anaiia mai ai keia poe kanaka.

29 Nolaila, e aua oe i keia mau mea i kukakuka malu ia o ka lakou mau hoohiki a me ka lakou mau berita, mai keia poe kanaka ae, a o ka lakou hana ino, a me ka lakou pepehi kanaka ana, a me ka lakou mau mea hoopailua, kau wale no ia e hoike aku ai ia lakou; a nau e ao akku ia lakou e hoowahawaha aku i ka hana ino e like me ia, a me na mea hoopailua a pepehi kanaka ana; a nau no hoi e ao aku ia lakou, ua anaiia mau ua poe kanaka nei no ka lakou hana ino, a mau mea hoopailua, a me ko lakou pepehi kanaka ana.

30 No ka mea, aia hoi, pepehi aku la lakou i na kaula a pau o ka Haku a make loa, ka poe i hele ae ai mawaena o lakou e hai aku ia lakou no ka lakou mau hana ino; a hea ae la ke koko o ka poe a lakou i pepehi iho ai, i ka Haku; i ko lakou Akua, no ka hoopai maluna iho o ka poe nana lakou i pepehi: a pela i hiki mai ai na hoopai o ke Akua maluna iho o ua poe nei i hana i ka pouli a me ka hui pu malu ana;

31 He oiaio, a e hoopoinoia ka aina ia wa aku ia wa aku i ua poe la e hana ana i ka pouli a me na hui pu palu ana, ma ka anaiia’na, ke mihi ole lakou mamua o ko lakou oo loa ana.

32 [m 17, p 11] Ano, e ka’u keiki, e hoomanao oe i na olelo a’u i olelo aku ai ia oe: mai waiho aku i kela mau mea kuka malu ia i keia poe kanaka, aka e ao aku ia lakou i ka inaina mau loa i ka hewa a me ka ino;

33 E hai aku ia lakou i ka mihi, a me ka manaoio i ka Haku, ia Iesu Kristo; e ao aku ia lakou e hoohaahaa ia lakou iho, a e akahai a haahaa ma ka naau; e ao aku ia lakou e pale aku i kela hoowalewale i keia hoowalewale o ka diabolo, me ko lakou manaoio ma ka Haku o Iesu Kristo;

34 E ao aku ia lakou mai hoopalaleha i na hana maikai, aka e akahai a e haahaa ma ka naau: no ka mea, o ka poe me neia e loaa no ia lakou ka maha i ko lakou mau uhane.

35 E hoomanao, e ka’u keiki, a e aoia ka naauao i kou wa opio: he oiaio, e ao ma kou wa opio e malama i na kauoha a ke Akua;

36 He oiaio, a e hea akku i ke Akua no kou kokuaia mai a pau; he oiaio, e hana aku oe i ka hana ana a pau i ka Haku, a i kela wahi keia wahi au e hele aku ai, e hele oe iloko o ka Haku: he oiaio, e kauia kou mau manao a pau i ka Haku; he oiaio, e kauia na kuko o kou naau maluna iho o ka Haku no ka wa pau ole;

37 E kuka oe me ka Haku i na mea a pau au e hana’i, a e kuhikuhi mai no oia ia oe no ka maikai; he oiaio, ia oe e moe ai ilalo i ka po, e moe ilalo i ka Haku, nana e kiai mai maluna iho ou i kou hiamoe ana; a ia oe a ala ai i ke kakahiaka. e piha kou naau me ke aloha aku i ke Akua: a ina e hana oe i keia mau mea, e hookiekieia auanei oe iluna ma ka la hope.

38 [m 17, p 12] A, ano, e ka’u keiki, he mea ka’u e olelo aku ai ia oe no ka mea a ko kakou poe kupuna i kapa ai he mea poepoe, a he mea kuhikuhi; no ka mea, kapa aku la ko kakou poe kupuna ia mea Liahona, oia no ma ka hoohalike ana, he panana; a na ka Haku ia i hoomakaukau.

39 Aia hoi, aole e hiki i kekahi kanaka ke hana mamuli o ke ano o ka hana akamai me ia. Aia hoi, ua hoomakaukauia ia e hoike mai i ko kakou poe kupuna i ka ihu a lakou e hele aku ai ma ka waonahele;

40 A hana aku la ia no lakou e like me ko lakou manaoio i ke Akua: nolaila, ina he manaoio ko lakou e manaoio ai ua hiki i ke Akua ke kauoha mai i kela manamana e kuhikuhi i ke ala a lakou e hele aku ai, aia hoi, ua hanaia ia; nolaila, ua loaa ia lakou keia hana mana, a me na hana mana e ae he nui i hanaia mai ai e ka lima o ke Akua, ia la aku ia la aku;

41 Aka hoi, no ka hanaia ana o kela mau hana mana ma na mea uuku, ua hoike mai la o nae ia mea i na hana kupaianaha ia lakou. Ua hoopalaleha lakou, a hoopoina iho la e hana me ko lakou manaoio a ikaika, alaila, ua oki iho la kela mau hana kupaianaha, a, aole lakou i holo ma ko lakou hele ana;

42 Nolaila, noho iho la lakou me ka waonahele, a aole o lakou hele ma ke ala polilei, a ua hoopilikiaia mai me ka pololi a me ka makewai, no ka lawehala ana.

43 [m 17, p 13] Ano, e ka’u keiki, ke makemake nei au e hoomaopopo oe, aole o keia mau mea me ke aka ole; no ka mea, me ko kakou poe kupuna i hoopalaleha ai e malama aku i ua panana nei, (ano, no ko ke kino keia mau mea,) aole o lakou pomaikai; pela no hoi ia me na mea o ko ka uhane,

44 No ka mea, aia hoi, ua like ka paakiki ole o ka malama ana aku i ka olelo a Kristo, ka mea e kuhikuhi mai i ke ala pololei i ka pomaikai mau loa, me ia no ko kakou poe kupuna e malama aku ai i ua panana nei, nana i kuhikuhi mai ia lakou i ke ala pololei i ka aina i olelo mua ia’i.

45 Ano, ke i aku nei au, aole anei he hoailona ma keia mea? No ka mea, e like me ka oiaio o ka lawe ana o keia mea kuhikuhi i ko kakou poe kupuna, ma ka hahai ana i kona ihu, i ka aina i olelo mua ia’i, pela no hoi me na olelo a Kristo ke hahai aku kakou i ka ihu o ia mau olelo, e halihali aku ai ia kakou ma o loa aku o keia awawa o ke kaumaha, iloko o kahi aina i olelo mua ia’i, i oi loa aku ka pomaikai.

46 [m 17, p 14] E ka’u keiki, mai hoopalaleha kaua no ka paakiki ole o ke ala; no ka mea, pela no ia me ko kakou poe kupuna; no ka mea, pela no ia i hoomakaukauia’i no lakou, ina e nana lakou, e hiki ia lakou ke ola; pela no hoi ia me kakou. Ua hoomakaukauia ke ala, a ina e nana aku kakou, e hiki ia kakou ke ola o ka wa pau ole.

47 Ano, e ka’u keiki, e makaala oe e malama i ua mau mea laa nei; he oiaio, e makaala e nana aku oe i ke Akua a e ola. E hele aku i keia poe kanaka, a e hai aku i ka olelo, a e kuoo. E ka’u keiki e, aloha.

O na kauoha a Alama i kana keiki Sibalona.

O ka mokuna 38.

MOKUNA 38

1 [mokuna 18, paukū 1] E ka’u keiki, e haliu mai ka pepeiao i ka’u mau olelo: no ka mea, ke i aku nei au ia oe, me a’u i i aku ai ia Helemana, ina e malama oe i na kauoha a ke Akua, e hoopomaikaiia auanei oe ma ka aina; a ina e malama ole oe i na kauoha a ke Akua, e hooleiia’ku oe mai kona alo aku.

2 Ano, e ka’u keiki, ke lana nei ko’u manao e loaa auanei ia’u ka olioli nui iloko ou, no kou naueue ole a hoomau pono i ke Akua; no ka mea, me oe i hoomaka ai i kou wa kamalii, e nana aku i ka Haku, i kou Akua, pela au i manaolana’i e hoomau oe i ka malama ana i kana mau kauoha: no ka mea, ua pomaikai ka mea e hoomau pono ana a hiki i ka hopena.

3 Ke i aku nei au ia oe, e ka’u keiki, ua loaa mai ia’u ka olioli nui iloko o’u ano, no kou hoomau pono ana, a me kou ikaika, a me kou ahonui, a me kou hoomanawanui mawaena o ka poe kanaka o ko Zorama.

4 No ka mea, ua ike au iloko o na mea paa oe; he oiaio, a ua ike no hoi au ua hailukuia no oe no ka olelo; a ua hoomanawanui oe i keia mau mea a pau me ke ahonui, no ka mea, o ka Haku no kekahi pu me oe: a ke ike nei oe ano ua hoopakele mai no ka Haku ia oe.

5 [m 18, p 2] Ano, e ka’u keiki Sibalona, ke makemake nei au e hoomanao oe e like me ka nui o kou paulele ana aku i ke Akua, pela ka nui o kou hoopakeleia’na mai mailoko mai o kou mau hoaoia’na, a me kou popilikia, a me kou mau eha; a e hookiekieia mai auanei oe ma ka la hope.

6 Ano, e ka’u keiki, aole au makemake e manao oe ke ike nei au i keia mau mea ma o’u iho, aka, o ka Uhane o ke Akua no ia iloko o’u, nana i hoike mai i keia mau mea ia’u: no ka mea, ina aole au i hoohanauia mai e ka Akua, ina ua ike ole au i keia mau mea.

7 Aka hoi, hoouna mai la ka Haku, ma kona aloha nui, i kona anela e hai mai ia’u, e hooki aku i ka hana luku mawaena o kona poe kanaka; he oiaio, a ua ike au i kekahi anela he maka no he maka; a olelo pu oia me au, a o kona leo me he hekili la ia, a hoohaalulu iho la ia i ka honua a pau.

8 [m 18, p 3] A eia kekahi, he mau la ekolu a he mau po ekolu wau iloko o ka eha awaawa a walania loa o ka uhane; a, aole loa au i loaa’i ke kalaia’na o ko’u mau hala, a hiki i ka wa a’u i hea aku ai i ka Haku, ia Iesu Kristo, e aloha mai ia’u. Aka hoi, kahea aku la au ia ia, a loaa iho la ia’u ka maluhia i ko’u uhane.

9 Ano, e ka’u keiki, ua hai aku au i keia ia oe, i aoia’i oe i ka naauao, i aoia’i oe e au aole kekahi ala e ae, aole hoi kekahi hana e ae, ma o ua mea la i hiki ai i ke kanaka ke hoolaia, iloko a ma o Kristo la wale no. Aia hoi, oia no ke ola a me ka malamalama o ko ke ao nei. Aia hoi, oia no ka olelo o ka oiaio a me ka pono.

10 Ano, me oe i hoomaka ai e ao aku i ka olelo, pela no au e makemake nei e hoomau oe e ao aku; a ke makemake nei au e ikaika a e pakiko oe ma na mea a pau.

11 E makaala, i ole ai oe e hookiekieia iluna i ka haaheo: he oiaio, e makaala i ole ai oe e kaena aku iloko o kou naauao iho, aole hoi no kou ikaika nui;

12 E hana me ka wiwo ole, aole nae me ka hookaumaha; a e makaala no hoi e kaulawaha’i oe i kou mau kuko, i piha oe me ke aloha; e makaala e haalele oe i ka noho wale ana;

13 Mai pule oe me ka ko Zorama poe i pule ai, no ka mea, ua ike oe e pule ana lakou e lohea e na kanaka, a e hoomaikaiia no ko lakou naauao.

14 Mai olelo, E ke Akua, ke aloha aku nei au ia oe no ka oi aku o makou mamua o ko makou poe hoahanau; aka, e aho e olelo aku, E ka Haku, e kala mai i kuu pono ole, a e hoomanao ae oe i ko’u poe hoahanau i ke aloha; he oiaio, e hai aku i kou pono ole imua o ke Akua i na manawa a pau.

15 A na ka Haku e hoopomaikai mai i kou uhane, a e hookipa aku ia oe ma ka la hope iloko o kona aupuni, e noho ilalo me ka maluhia. Ano, e hele, e ka’u keiki, a e ao aku i ka olelo i keia poe kanaka. E kuoo. e ka’u keiki e, aloha.

O na kauoha a Alama i kana keiki Corianatona.

Mai ka mokuna 39 a hiki i ka 42.

MOKUNA 39

1 [mokuna 19, paukū 1] Ano, e ka’u keiki, he mau olelo he nui akku ka’u e olelo aku ai ia oe, mamua o ka’u i olelo akuk ai i kou kaikuaana: no ka mea hoi, aole anei oe i ike i ka naueue ole o kou kaikuaana, o kona hoomau pono ana, a me kona ikaika i ka malama ana i na kauoha a ke Akua? Aole anei oia i hana i ke kumu maikai nou e hoohalike ai?

2 No ka mea, aole oe i hoolohe nui mei i ka’u mau olelo e like me kou kaikuaana, mawaena o ko Zorama poe. Ano, eia no ka’u i ku e ai ia oe; hele ae la no oe e kaena ana i kou ikaika, a i kou naauao.

3 Aole o keia wale no, e ka’u keiki. Hana iho la oe i ka mea i hoeha mai ia’u; no ka mea, haalele mai la oe i kau hai olelo ana, a hele ae la iloko o ka aina o Sirona, mawaena o na palena o ko Lamana poe, mamuli o ka wahine hookamakama, o Isabela;

4 He oiaio, aihue ae la kela i na naau o na mea he nui wale; aka, aole ia he mea e hoaponoia’i nou, e ka’u keiki. O ka malama ana i kau oihana i waihoia’i ia oe kou mai i pono ai.

5 Aole anei oe i ike, e ka’u keiki, he mau mea i hoopailuaia keia mau mea ma ka maka o ka Haku; he oiaio, i hoopailua loa ia’i mamua o na hewa a pau, koe wale no ka hookahe ana i ke koko, hala ole, a me ka hoole ana i ka Uhane Hemolele?

6 No ka mea, aia hoi, ina e hoole aku oe i ka Uhane Hemolele ia ia i noho ai iloko ou, a ua ike oe e hoole ana oe ia ia; aia hoi, he hala keia e kala ole ia’na; he oiaio, o ka mea e pepehi kanaka ana me ke ku e i ka malamalama a me ka ike o ke Akua, he mea paakiki nona e loaa’i ke kalaia’na; he oiaio, ke i aku nei au ia oe, e ka’u keiki, aole ia he mea oluolu nona e loaa’i ke kalaia’na.

7 Ano, e ka’u keiki, ua makemake au i ke Akua ina ua hewa ole oe i ka hewa nui me neia. Aole au e olelo loihi ma kou mau hewa, e hoowalania i kou uhane, ina aole ia no kou pono.

8 Aka hoi, ua hiki ole ia oe ke huna i kou mau hewa mai ke Akua ae; a ke mihi ole oe, e ku no ia mau mea me he hoike la e ku e ia oe ma ka la hope.

9 [m 19, p 2] Ano, e ka’u keiki, ua makemake au e mihi oi, a e haalele aku i kou mau hewa, a e hele hou ole aku mamuli o na kuko o kou mau maka, aka e alalai ia oe iho ma keia mau mea a pau; no ka mea, ke hana ole oe i keia, aole loa e hiki ia oe ke loaa ke aupuni o ke Akua. E hoomanao, a e lawe ia mea maluna iho ou, a e alalai ia oe iho ma ua mau mea nei.

10 A ke kauoha aku nei au ia oe e lawe maluna iho ou e aoia e kou mau kaikuaana ma kau mau mea e hana’i; no ka mea hoi, ma kou wa opio oe, a ua ku pono oe e hooikaikaia e kou mau kaikuaana. A e hoolohe aku oe i ka laua olelo ao;

11 Mai ae aku oe e alakaiia’ku e kekahi mea lapuwale a naaupo; Mai ae aku i ka diabolo e alakai hou aku i kou naau, mamuli o kela mau wahine hookamakama ino. E nana iho oe, e ka’u keiki, i ka hala nui au i lawe mai ai maluna iho o ko Zorama poe: no ka mea, ia lakou i ike ai i kau hana, aole lakou i manaoio mai i ka’u mau olelo.

12 Ano, ke i mai nei ka Uhane o ka Haku ia’u, E kauoha aku oe i kau mau keiki e hana pono, o alakai aku lakou i na naau o na kanaka he nui i ka make loa: nolaila, ke kauoha aku nei au ia oe, e ka’u keiki, iloko o ka makau i ke Akua, i haalele aku ai oe i kau mau hana hewa;

13 I huli ai oe i ka Haku me kou naau, a ikaika, a mana a pau; i alakai ole ai oe i na naau o na mea e ae, e hana i ka hewa; aka, e aho e hoi aku ia lakou, a e hai aku i kou mau hewa, a e hoomanao i ka hana pono ole au i hana’i;

14 Mai imi aku i ka waiwai, aole hoi i na mea lapuwale o ko ke ao nei; no ka mea hoi, aole e hiki ia oe ke hali pu ia mau mea me oe.

15 [m 19, p 3] Ano, e ka’u keiki, ke makemake nei au e olelo aku i kekahi mau mea ia oe no ka hiki ana mai o Kristo. Aia hoi, ke i aku nei au ia oe, oia no ka mea e hele oiaio mai auanei, e lawe aku i na hala o ko ke ao nei; he oiaio, ke hele mai la oia e hai aku i na mea olioli o ke ola mau loa i kona poe kanaka.

16 Ano, e ka’u keiki, o keia no ka oihana ou i kaheaia’i, e hai aku i keia mau mea olioli i keia poe kanaka, e hoomakaukau i ko lakou mau naau; oia hoi, i hiki mai ke ola ia lakou, e hiki ia lakou ke hoomakaukau i na naau o ka lakou poe keiki e hoolohe i ka olelo, i ka wa o kona hiki ana mai.

17 [m 19, p 4] Ano, e hooluolu aku au i kou naau ma keia mea. Aia hoi, ke haohao nei oe no ka ikeia’na o keia mau mea i ka manawa loihi me neia mamua o ka hiki ana mai. Aia hoi, ke i aku nei au ia oe, aole anei i like ka maikai o kekahi uhane i keia manawa i ke Akua, me kekahi uhane i ka manawa o kona hiki ana mai?

18 Aole anei o ke kumumanao hoolapanai he mea e pono ai ke hoikeia mai i keia poe kanaka, e like me ia i ka lakou poe keiki?

19 Aole anei i like ka oluolu i keia manawa no ka Haku e hoouna mai i kona anela e hai mai i keia mau mea olioli ia kakou, me ia i ka kakou poe keiki; a me ia hoi mahope iho o kona hiki ana mai?

MOKUNA 40

1 Ano, e ka’u keiki, eia hou kekahi a’u e olelo aku nei ia oe; no ka mea, ke ike nei au ua hoohihiaia kou naau no ke alahouana o ka poe make.

2 Aia hoi, ke i aku nei au ia oe, aole he alahouana; a i ole ia, e olelo au ma na olelo e ae, aole e hookomo ana keia make i ka make ole; aole e hookomo ana keia palaho i ka palaho ole, a hiki aku i ka wa mahope iho o ka hiki ana mai o Kristo.

3 Aia hoi, ke lawe mai la oia i ke alahouana o ka poe make. Aka hoi, e ka’u keiki, aole o ke alahouana i keia manawa. Ano, he mea pohihihi ka’u e wehewehe ana ia oe; aka hoi, ua nui na mea pohihihi, i auaia’i i ike ole kekahi ia mau mea, o ke Akua wale no koe. Aka, ke hoike aku nei au i kekahi mea, a’u i ninau molowa ole ai i ke Akua, i ike au; oia keia, no ke alahouana.

4 Aia hoi, aia no he manawa e waeia i puka mai ai auanei na mea a pau mai ka make mai. Ano, o ka manawa e hiki mai ana ua manawa la, aole o kekahi mea i ike; aka, o ke Akua ka i ike i ka manawa i waeia’i.

5 Ano, ina paha he manawa mua, a he manawa lua, a he manawa kolu, e puka mai ai na kanaka mai ka make mai, he mea pili ole ia; no ka mea, o ke Akua ka i ike i keia mau mea a pau; a ua lawa ia’u e ike he oiaio keia; ua waeia he manawa e ala’i na mea a pau mai ka make mai.

6 Ano, aia no he wa e pono ai mawaena o ka manawa o ka make, a me ka manawa o ke alahouana.

7 [mokuna 19, paukū 5] Ano, ke makemake nei au e ninau, heaha la ka mea i hanaia mai ai i na uhane o na kanaka, mai ka manawa o ka make, a hiki i ka manawa i waeia’i no ke alahouana?

8 Ano, ina paha he nui aku na manawa mamua o ka manawa hookahi i waeia no na kanaka e ala’i, he mea pili ole ia; no ka mea, aole e make ana na mea a pau i ka manawa hookahi: a he mea pili ole keia; o na manawa a pau ua like ia me ka la hookahi, me ke Akua; a ua anaia mai ka manawa i na kanaka wale no;

9 Nolaila, ua waeia he manawa i na kanaka, e ala’i lakou mai ka make mai; a aia no he wa mawaena o ka manawa o ka make a me ke alahouana. Ano, no keia wa o ka manawa, o ka mea i hanaia mai ai i na uhane o na kanaka, oia ka mea a’u i ninau molowa ole ai i ka Haku e ike; a o keia no ka mea a’u i ike ai.

10 A i ka hiki ana mai o ka manawa ia lakou a pau e ala’i, alaila, e ike no lakou ua ike o ke Akua i na manawa a pau i waeia i na kanaka.

11 Ano, no ka noho ana o ka uhane mawaena o ka make a me ke alahouana—Aia hoi, ua hoikeia mai ia’u, e kekahi anela, ua laweia’ku na uhane o na kanaka a pau, i ka wa a lakou i haalele ai i keia kino make; he oiaio, o na uhana o na kanaka a pau, ina he maikai lakou ina he hewa paha, ua laweia’ku i kela Akua nana i haawi mai ia lakou i ke ola.

12 Alaila, e hiki mai keia, o na uhane o ka poe i pono, ua hookipaia iloko o kahi o ka pomaikai, i kapaia o paradaiso; he wahi maha; he wahi maluhia, kahi o lakou e noho hoomaha ai mai ko lakou mau pilikia ae a pau, a mai ke kaumaha ae a pau, a me ka luuluu, a me ia mea aku ia mea aku.

13 [m 19, p 6] Alaila, e hiki mai keia, o na uhane o ka poe hewa, he oiaio, o ka poe i ino; no ka mea hoi, aole o lakou wahi kuleana, aole hoi wahi liki iki o ka Uhane o ka Haku; no ka mea, ua koho aku lakou i na hana ino, mamua o na hana maikai; nolaila, komo ae la ka uhane o ka diabolo iloko o lakou, a loaa iho la ko lakou hale; a e hooleiia’ku ua poe nei iloko o ka pouli mawaho; ilaila ka uwe ana, a me ke kumakena ana, a me ka uwi ana o na niho; a o keia mau mea no ko lakou mau hala iho; i alakai pio ia’i e ka makemake o ka diabolo.

14 Ano, oia no ka noho ana o na uhane o ka poe hewa; he oiaio, iloko o ka pouli, e mama weliweli, hopohopo ana no ka ukiuki wela o ka inaina o ke Akua maluna iho o lakou; pela lakou i noho ai ma keia wahi, a o ka poe pono hoi iloko o paradaiso, a hiki aku i ka manawa o ko lakou alahouana.

15 Ano, ua manao kekahi poe he ala mua ana keia wahi o ka pomaikai, a me keia wahi o ka poino o ka uhane, mamua o ke alahouana. He oiaio, ke ae aku nei au ua hiki i keia ke kapaia he alahouana; o ke ala ana o ka uhane, a me ko lakou waihoia’na i ka pomaikai, a i ole ia, i ka poino, e like me na olelo i oleloia’i.

16 A eia hou, ua oleloia ia, aia no he ala mua ana; he alahouana o ka poe a pau i noho ai mamua, a me ka poe e noho la, a me ka poe e noho ana auanei, a hiki aku i ke alahouana o Kristo mai ka make mai.

17 [m 19, p 7] Ano, aole o kakou manao o keia ala mua ana i oleloia mai ai ma keia ano, o ke alahouana o na uhane ia, a me ko lakou waihoia’na i ka pomaikai, a i ole ia, i ka poino. Aole e hiki ia oe ke manao o keia no ka mea i manaoia.

18 Aia hoi, ke i aku nei au ia oe, aole; aka, o ka mea i manaoia oia no ka hui hou ana o ka uhane me ke kino o ka poe mai na la o Adamu, a hiki wale aku i ke alahouana o Kristo.

19 Ano, ina paha e hui hou ia na uhane a me na kino o kela poe a pau i oleloia ae nei, ma ka manawa hookahi, o ka poe hewa pu me ka poe pono, aole au e olelo aku nei: ua lawa ka’u e i aku nei e puka mai lakou a pau; ma na olelo e ae, e hiki mai ana ko lakou alahouana mamua o ke alahouana o ka poe e make ana mahope iho o ke alahouana o Kristo.

20 Ano, e ka’u keiki, aole au e i aku nei e hiki mai ana ko lakou alahouana ma ke alahouana o Kristo; aka hoi, ke haawi aku nei au ia me he manao la no’u, ua hui hou ia na uhane a me na kino o ka poe pono, ma ke alahouana o Kristo, a me kona pii ana i ka lani.

21 Aka, ina paha ma kona alahouana, ina paha mahope aku, aole au e i aku; aka, o keia ka’u e i aku nei, aia no he wa mawaena o ka make a me ke alahouana o ke kino, a he noho ana o ka uhane iloko o ka pomaikai, a i ole ia, iloko o ka poino, a hiki aku i ka manawa i waeia e ke Akua e puka mai ka poe make, a e hui hou ia, o ka uhane pu me ke kino, a e kaiia e ku iho imua o ke Akua, a e hookolokoloia e like me ka lakou mau hana;

22 He oiaio, e lawe mai ana keia i ka hoihoi hou ana o kela mau mea i oleloia’i e na waha o ka poe kaula.

23 E hoihoi hou ia ka uhane i ke kino, a o ke kino i ka uhane; he oiaio, a o kela lala keia lala, a o kela ami keia ami, e hoihoi hou ia auanei ia i kona kino; he oiaio, aole e lilo kekahi lauoho o ke poo, aka e hoihoi hou ia na mea a pau i ko lakou wahi ponoi a maikai.

24 Ano, e ka’u keiki, o keia no ka hoihoi hou ana i oleloia’i e na waha o ka poe kaula:

25 A, alaila, e alohi aku auanei ka poe pono iloko o ke aupuni o ke Akua.

26 Aka hoi, e hele mai ana kekahi make weliweli maluna iho o ka poe hewa; no ka mea, e make ana lakou ma na mea e pili ana i na mea o ka pono; no ka mea, ua paumaele lakou, aole e hiki i kekahi mea paumaele ke loaa’e ke aupuni o ke Akua; aka, ua hooleiia’ku lakou, a waihoia e ai i na hua o ka lakou mau hana a me na mea a lakou i hana ai, he ino ia mau mea; a ke inu la lakou i ka maku o kekahi apu awaawa.

MOKUNA 41

1 [mokuna 19, paukū 8] Ano, e ka’u keiki, he mau mea ka’u e olelo aku ai no ka hoihoi hou ana i olelo e ia’i; no ka mea, aia hoi, ua hookapae ae kekahi poe i na palapala hemolele, a hele auwana loa aku no ia mea. A ke ike nei au ua hoohihiaia kou naau no hoi, no keia mea. Aka hoi, e hoomaopopo aku no au ia mea ia oe.

2 Ke i aku nei au ia oe, e ka’u keiki, he mea e pono ai ke kumumanao o ka hoihoi hou ana me ka pololei o ke Akua; no ka mea, he mea e pono ai e hoihoi hou ia na mea a pau i ko lakou ano ponoi. Aia hoi, he mea e pono ai a e pololei ai hoi, e like me ka mana a me ke alahouana o Kristo, e hoihoi hou ia ka uhane o kanaka i kona kino, a e hoihoi hou ia kela apana keia apana o ke kino i kona wahi iho.

3 A he mea e pono ai me ka pololei o ke Akua, e hookolokoloia auanei na kanaka e like me ka lakou mau hana; a ina he maikai ka lakou mau hana ma keia ola ana, a ua maikai na makemake o ko lakou mau naau, e hoihoi hou ia lakou no hoi, ma ka la hope, i ka mea i maikai;

4 A ina he ino ka lakou mau hana, e hoihoi hou ia auanei ia mau mea ia ia no ka ino; nolaila, e hoihoi hou ia na mea a pau i ko lakou ano ponoi; o kela mea keia mea i kona wahi maoli; o ka make e hoalaia i ka make ole; o ka palaho i ka palaho ole; e hoalaia i ka pomaikai pau ole, e noho ma ke aupuni o ke Akua, a i ole ia, i ka poino pau ole, e noho ma ke aupuni o ka diabolo, kekahi ma kekahi lima, a kekahi ma kekahi lima;

5 O kekahi mea e hoalaia i ka pomaikai, e like me kona mau makemake i ka pomaikai; a i ka maikai, e like me kona mau makemake i ka maikai: a o kekahi hoi i ka ino, e like me kona mau makemake i ka ino; no ka mea, me ia i makemake ai e hana ino a pau ae la ka la, pela no oia e loaa’i kona uku o ka ino, i ka wa e hiki mai ai ka po.

6 A pela no ia ma kekahi lima iho. Ina ua mihi oia i kona mau hewa, a makemake ae la i ka pono a hiki aku i ka hopena o kona mau la, pela no oia e hooukuia’i i ka pono.

7 O lakou nei no ka poe i hoolapanaiia e ka Haku; he oiaio, o lakou nei no ka poe i unuhiia’e a i hoopakeleia’e mai kela po pau ole ae o ka pouli; a pela lakou e ku ai a i ole e hina; no ka mea, aia hoi, na lakou e wae ai no lakou iho, e hana i ka maikai, a i ole ia, e hana i ka ino.

8 Ano, ua hiki ole ke hoololiia na kanawai o ke Akua; nolaila, ua hoomakaukauia ka ala, i hiki i ka mea makemake, ke hele iloko olaila a e hoolaia mai.

9 Ano, aia hoi, e ka’u keiki, mai aa aku i kekahi lawehala hou i kou Akua ma keia mau kumumanao o ke ao ana, au i aa ai mamua aku nei e lawehala’i.

10 Mai noho a manao, no ka oleloia ana no ka hoihoi hou ana, e hoihoi hou ia auanei oe mai ka hewa i ka pomaikai. Aia hoi, ke i aku nei au ia oe, aole loa ka hewa he pomaikai.

11 [m 19, p 9] Ano, e ka’u keiki, o na kanaka a pau i noho ai iloko o ka noho maoli ana, oia hoi iloko o ka noho kino ana, aia no lakou iloko o ke au awaawa, a iloko o na mea paa o ka hewa; a ua nele lakou i ke Akua ma ke ao nei, a ua hele ku e aku lakou i ke ano o ke Akua; nolaila, aia no lakou me kahi ku e i ke ano o ka pomaikai.

12 Ano, aia hoi, o keia anei ke ano o ka huaolelo hoihoihouana, e lawe i kekahi mea no kahi ku pono, a e waiho ia ia iloko o kahi ku pono ole, a i ole ia, e waiho aku ia ia iloko o kahi ku e i kona ano maoli?

13 E ka’u keiki, aole loa ia pela; aka eia ke ano o ka hoihoihouana, e hoihoi hou aku i ka ino no ka ino, i ko ke kino no ko ke kino, i ko ka diabolo no ko ka diabolo; i ka maikai no ka mea i maikai; i ka pono no ka mea i pono; i ka pololei no ka mea i pololei; i ke aloha no ka mea i aloha;

14 Nolaila, e ka’u keiki, e makaala e aloha aku oe i kou poe hoahanau; e hana me ka pololei, e hooponopono me ka pono, a e hana mau i ka maikai; a ina e hana aku oe i keia mau mea a pau, alaila, e loaa no ia oe kou uku; he oiaio, a e hoihoi hou ia auanei ke aloha ia oe; e hoihoi hou ia auanei ka pololei ia oe; e hoihoi hou ia auanei ka hoopono pololei ia oe; a e hoouku hou ia auanei ka maikai ia oe;

15 No ka mea, o ka mea au e hoouna aku ai e hoi hou mai ia ia oe, a e papani hou ia: nolaila, e hoohewa nui loa ana ka huaolelo hoihoihouana i ka lawehala, a, aole loa e hoapono iki ana ia ia.

MOKUNA 42

1 [mokuna 19, paukū 10] Ano, e ka’u keiki, ke ike nei au aia no kekahi mea e ae e hoohihia ana i kou naau, i hiki ole ai ia oe ke hoomaopopo, oia no ka pololei o ke Akua, ma ka hoopai ana i ka mea lawehala: no ka mea, ke hoao nei oe e manao he mea pololei ole i waihoia’i ka mea lawehala i kahi o ka poino.

2 Ano hoi, e ka’u keiki, e wehewehe aku no au i keia mea ia oe: no ka mea, aia hoi, mahope iho o ke kipaku ana mai o ka Haku ke Akua i ko kakou mau kupuna mua mailoko mai o ka mahinaai o Edena, e mahi i ka honua, i kahi o laua i laweia mai ai; he oiaio, kauo ae la oia i ke kanaka mawaho, a hoonoho iho la oia ma ka hikina o ka mahinaai o Edena, o Kerubima, a me kekahi pahi wakawaka e ka ana i o ia nei, i malamaia i ka laau o ke ola.

3 Ano, ke ike nei kaua ua lilo ke kanaka e like me ke Akua, e ike ana i ka pono a me ka hewa; a o kikoo aku oia i kona lima, a e lalau hoi i ko ka laau o ke ola, a e ai iho a ola mau loa, hoonoho iho la ka Haku ke Akua i Kerubima a me ka pahi wakawaka, i ole ai oia e ai i ka hua;

4 a pela kakou i ike ai, ua haawiia mai he manawa i kanaka, e mihi, he oiaio, he manawa hoao, he manawa e mihi a e malama i ka Akua.

5 No ka mea, ina ua o koke aku o Adamu i kona lima, a ai iho la i ko ka laau o ke ola, ina ua ola mau loa oia, e like me ka olelo a ke Akua, me ka wa ole e mihi ai; he oiaio, a ina ua ko ole no hoi ka olelo a ke Akua, a hooliloia’e ke kumumanao o ka hoolapanai i mea ole.

6 Aka hoi, ua haawiia mai i ke kanaka e make; nolaila, me lakou i hookiia mai ai mai ka laau o ke ola aku, pela lakou e hookiia mai ai mai ka ili aku i ka honua a lilo iho la ke kanaka i mea lilo no ka wa pau ole; he oiaio, lilo iho la lakou i kanaka haule.

7 [m 19, p 11] Ano, ke ike nei oe ma keia mea, ua hookiia mai ko kakou mau kupuna mua ma ko ke kino a ma ko ka uhane no hoi mai ke alo aku o ka Haku; a pela kakou i ike ai ua lilo iho la laua i mau mea hahai mamuli o ko laua makemake iho.

8 Ano hoi, aole ia he mea e pono ai i hoopakeleia mai ai ke kanaka mai keia make kino ana ae, no ka mea, he mea ia e hoopau ai i ke kumumanao nui o ka pomaikai:

9 Nolaila, me ka hiki ole loa o ka uhane ke make, a ua hooili mai ka haule ana i ka make uhane maluna iho o na kanaka a pau, a me ka make kino no hoi; peneia, ua hookiia mai lakou mai ke alo aku o ka Haku; he mea e pono ai i hoopakeleia mai ai na kanaka mai keia make uhane ana aku;

10 Nolaila, me lakou i lilo ai i ko ke kino, i makaleho, a i ko ka diabolo, ma ke ano maoli, ua lilo iho la keia noho hoao ana i wahi no lakou e hoomakaukau ai: lilo iho la ia i wahi hoomakaukau.

11 Ano, e hoomanao, e ka’u keiki, ina aole no ke kumumanao hoolapanai, (a ina aole ia,) e poino ana na uhane o lakou, i ka wa o lakou e make ai, i hookiia mai ai mai ke alo aku o ka Haku.

12 Ano, aohe mea e hoopakele mai ai i na kanaka mai keia noho haule ana ae, a ke kanaka i lawe mai ai maluna ona iho, no kona hookuli ana;

13 Nolaila, mamuli o ka pololei, aole e hiki i ke kumumanao hoolapanai ke hookoia mai ai, eia wale no ma ka mihi ana o na kanaka ma keia noho hoao ana; he oiaio, ma ua wahi hoomakaukau nei; no ka mea, i ole ai keia mau mea, ua hiki ole i ke aloha ke hana ke ole hoopau aku ia i ka hana o ka hoopai. Ano, ua hiki ole i ka hana o ka hoopai ke hoopauia: ina pela, pau ae la ko ke Akua noho Akua ana.

14 [m 19, p 12] A pela kakou i ike ai ua haule iho la na kanaka a pau, a ua paa lakou iloko o ka hoopai; he oiaio, ka hoopai o ke Akua, ka mea i waiho ai ia lakou no ka wa pau ole e hookiia’ku ai mai kona alo aku.

15 Ano, aole e hiki i ke kumumanao o ke aloha ke laweia mai, ke ole hanaia kekahi mea e kalahala’i: nolaila, e kalahala ana ke akua, oia iho, no na hala o ko ke ao nei, i lawe mai ai i ke kumumanao o ke aloha, e hoomalielie aku i na koi ana o ka hoopai, i hemolele ke Akua, i pololei oia, a he Akua aloha no hoi.

16 Ano, ua hiki ole i ka mihi ke hele mai i na kanaka la, ke ole kekahi hoopai ana, he mea mau loa no hoi ia, e like me ke ola o ka uhane, e hookau ku e ia i ke kumumanao o ka pomaikai, he mea mau loa no hoi ia e like me ke ola o ka uhane.

17 Ano, pehea la e hiki ai i ke kanaka ke mihi, ke ole oia e hana hewa? Pehea la e hiki ai ia ia ke hana hewa, ina aole he kanawai, a pehea la he kanawai, ke ole he hoopai ana?

18 Ano, ua hookauia mai kekahi hoopai ana, a ua haawiia mai he kanawai pololei, ka mea i lawe mai i kanaka i ka walania o ka naau.

19 Ano, ina ua haawi ole ia mai kekahi kanawai,—Ina e pepehi kanaka aku kekahi kanaka e maki oia,—e makau anei oia e make oia ina oia e pepehi kanaka?

20 A eia hoi kekahi, ina aole i haawiia mai kekahi kanawai e ku e ana i ka hewa, ina aole makau na kanaka ke hana hewa.

21 A ina aole i haawiia mai kekahi kanawai ke hana hewa na kanaka, heaha ka mea i hiki ai i ka hoopai ke hana, a me ke aloha no hoi: no ka mea, aole o laua kuleana maluna iho o ke kanaka?

22 Aka, ua haawiia mai ke kanawai, a he hoopai ana ka i hookauia mai, a ua aeia mai ka mihi ana; a e koi ana ke aloha i keia mihi: i ole ia, e koi ana ka hoopai i ke kanaka, a e hooko aku ana i ke kanawai, a e hooili ana ke kanawai i ka hoopai ana; ina aole pela, e hoopauia na hana o ka hoopono, a e pau ko ke Akua noho Akua ana.

23 Aka, aole e pau ana ko ke Akua noho Akua ana, a e koi ana ke aloha i ka poe mihi io, a e hele mai ana ke aloha ma o ke kalahala ana la; a e lawe mai ana ke kalahala ana i ke alahouana o ka poe make: a e lawe hou mai ana ke alahouana o ka poe make i na kanaka imua o ke alo o ke Akua; a pela lakou e hoihoi hou ia’ku ai imua o kona alo, e hookolokoloia e like me ka lakou mau hana; e like me ke kanawai a me ka hoopai,

24 No ka mea hoi, e hana ana ka hoopai i na koi ana ona a pau, a e koi ana ke aloha i kona mau mea a pau; a pela hoi, aole e hoolaia kekahi mea koe wale no ka poe mihi io.

25 [m 19, p 13] Ka! ke manao nei anei oe ua hiki i ke aloha ke hao i ka hoopai? Ke i aku nei au ia oe, aole; aole i kekahi lihi iki. Ina pela, e pau ko ke Akua noho Akua ana.

26 A pela ke lawe mai la ke Akua i kana mau hana nui a mau loa, i hoomakaukauia’i mai ka hookumuia ana mai o ke ao nei. A pela e hiki mai ana ke ola mau loa a me ka hoolapanai ana o ke kanaka, a me ko lakou make mau loa a me ka poino no hoi;

27 Nolaila, e ka’u keiki, o ka mea e makemake ana e hele mai, ua hiki ke hele mai, a e inu i na wai i ke ola me ke alalai ole ia mai; a o ka mea e makemake ole ana e hele mai, aole e koiia ua mea la e hele mai; aka ma ka la hope, e hoihoi hou ia ia ia ia, e like me kana mau hana.

28 Ina ua makemake oia e hana aku i ka ino, a ua mihi ole oia ma kona mau la, aia hoi, e hanaia’ku ka ino ia ia, e like me ka hoihoi hou ana o ke Akua.

29 Ano, e ka’u keiki, ke makemake nei au e ae ole aku oe i keia mau mea e hookaumaha hou mai ia oe ma neia hope aku, a e ae aku i kou mau hewa wale no e hookaumaha ia oe, me kela kaumaha, ka mea e lawe mai ia oe ilalo i ka mihi.

30 E ka’u keiki, ke makemake nei au e hoole hou ole oe i ka pololei o ke Akua ma neia hope aku. Mai hoao e hoapono ia oe iho ma keia mea, no kou mau hewa, ma ka hoole ana i ka pololei o ke Akua, aka e ae aku oe i ka pololei o ke Akua, a me kona aloha, a me kona hoomanawanui, e noho lanakila iloko o kou naau; aka e ae aku oe ia mea e hooiho mai ia oe ilalo i ka lepo i ka haahaa.

31 Ano, e ka’u keiki, ua kaheaia oe e ke Akua e hai aku i ka olelo i keia poe kanaka. Ano, e ka’u keiki, e hele aku oe, e hai aku i ka olelo me ka oiaio a me ke kuoo, e hiki ia oe ke kai mai i na uhane i ka mihi, i loaa’i ke kumumanao o ke aloha ke kuleana maluna iho o lakou. A na ke Akua e haawi mai ia oe e like me ka’u mau olelo. Amene.

MOKUNA 43

1 [mokuna 20, paukū 1] A eia kekahi, hele aku la na keiki a Alama mawaena o no kanaka, e hai aku i ka olelo ia lakou. A o Alama no hoi, aole e hiki ia ia ke hoomaha, a hele aku la no hoi oia.

2 Ano, aole makou e olelo hou no ka lakou hai ana, eia wale no, hai aku la lakou i ka olelo, a i ka oiaio, e like me ka Uhane o ka wanana a me ka hoikeana; a hai aku la no lakou mamuli o ka aoao hemolele o ke Akua, o lakou i kaheaia mai ai.

3 [m 20, p 2] Ano, ke hoi hou nei au i ka mooolelo o na kaua mawaena o ko Nepai poe a me ko Lamana poe, ma ka makahiki umikumamawalu o ke au o na Lunakanawai.

4 No ka mea, eia hoi kekahi, lilo iho la ko Zorama poe i ko Lamana poe; nolaila, i ka hoomaka ana o ka makahiki umikumamawalu; ike aku la ka poe kanaka o ko Nepai poe e hele mai ana ko Lamana poe maluna iho o lakou; nolaila, hoomakaukau no lakou i na mea no ke kaua; he oiaio, houluulu iho la lakou i ko lakou poe koa iloko o ka aina i Ieresona.

5 A eia kekahi, hele mai la ko Lamana poe me na tausani o lakou; a hele mai la lakou iloko o ka aina o Anationuma, oia no ka aina o ko Zorama poe; a he kanaka o Zerahemana ka inoa, oia no ko lakou alihi kaua.

6 Ano, he poe opuino a puni koko loa ko Amaliki poe mamua o ko Lamana poe, ma ko lakou ano iho, nolaila hoonoho iho la o Zerahemana i na luna papa nui maluna iho o ko Lamana poe, a o ko Amaliki poe a me ko Zorama poe lakou a pau.

7 Ano, o keia kana i hana’i, e hiki ia ia ke hoomau i ko lakou inaina i ko Nepai poe; e hiki ia ia ke lawe mai ia lakou malalo iho ona, e hooko iho i kona mau manao;

8 No ka mea hoi, o koona mau manao e hookonokono ae i ko Lamana poe e huhu ku e aku i ko Nepai poe; o keia kana i hana’i i hiki ai ia ia ke loaa ka mana nui maluna iho o lakou; i hiki ai no hoi ia ia ke loaa ka mana maluna iho o ko Nepai poe ma ke kai ana ia lakou iloko o ka noho luhi ana, a pela aku.

9 Ano, o ka manao no ia o ko Nepai poe e kokua i na aina o lakou iho, a me na hale o lakou, a me na wahine a lakou, a me na keiki a lakou, e hiki ia lakou ke hoopakele ia lakou la mai na lima o ko lakou poe enemi, eia hoi kekahi, e hiki ia lakou ke hookoe i ko lakou mau mea e pono ai a me ko lakou mau mea e pomaikai ai; he oiaio, a me ko lakou noho kauwa ole ana no hoi, e hiki ia lakou ke hoomana aku i ke Akua e like me ko lakou mau makemake;

10 No ka mea, ike iho la lakou ina e haule iho lakou iloko o na lima o ko Lamana poe, o ka mea nana e hoomana aku i ke Akua, iloko o ka uhane a iloko o ka oiaio, i ke Akua oiaio a ola, e pepehi mai ko Lamana ia ia;

11 He oiaio, a ike iho la no hoi lakou i ka inaina nui loa o ko Lamana poe i ko lakou poe hoahanau, i ka poe kanaka o Anati-Nepai-Lehi; o ka poe i kapaia ka poe kanaka o Amona; a, aole lakou lalau iho i na mea kaua; he oiaio, ua komo iho la lakou iloko o kahi berita, a, aole lakou e uhai ae ia mea; nolaila, ina e haule iho lakou iloko o na lema o ko Lamana poe, e anaiia’i lakou.

12 Aole nae e ae aku ko Nepai poe e anaiia mai lakou; nolaila haawi ae la lakou i na aina ia lakou la no ko lakou la hooilina.

13 A haawi mai la ko Amona poe i ko Nepai poe i kekahi mahele nui o ko lakou waiwai, e kokua i ko lakou poe koa; a pela i koiia ai ko Nepai poe, o lakou wale no, e ku e aku i ko Lamana poe, he huina lakou o ko Lamana a o ko Lemuela, a me na mamo a Isemaela, a o ka poe a pau i haalelel mai ai i ko Nepai poe, o ko Amaliki poe a me ko Zorama poe, a me na mamo a ka poe kahuna a Noa.

14 Ano, ua kokoke like ka nui o kela poe mamo, me ko Nepai poe; a pela i koiia mai ai ko Nepai poe e paio aku me ko lakou poe hoahanau, a hiki aku i ka hookahe ana i ke koko.

15 [m 20, p 3] Eia kekahi, i ka houluulu ana o ka poe koa o ko Lamana poe ma ka aina o Anationuma, aia hoi, ua hoomakaukauia ka poe koa o ko Nepai poe e halawai pu me lakou ma ka aina o Ieresona.

16 Ano, o ka alihi kaua o ko Nepai poe, oia hoi ke kanaka i hoonohoia’i i luna koa nui maluna iho o ko Nepai poe; ano na ka luna koa nui e hoomalu i ka poe koa a pau o ko Nepai poe; a o Moroni no kona inoa;

17 A na Moroni ka hoomalu ana a ma ka hooponopono ana a pau i na kaua o lakou. A he iwakaluakumamalima wale no ona makahiki i ka wa i hoonohoia mai ai oia i luna koa nui maluna iho o ka poe koa o ko Nepai poe.

18 [m 20, p 4] Eia kekahi, halawai aku la oia me ko Lamana poe ma na palena o Ieresona, a ua kahikoia kona poe kanaka me na pahikaua, a me na pahikaua pokole, a me kale ano keia ano o na mea kaua a pau.

19 A i ka wa a ka poe koa o ko Lamana poe i ike ai i ka poe kanaka o Nepai, i hoomakaukauia e Moroni me na pale umauma, a me na pale lima; he oiaio, a me na pale no hoi a hoomalu i na poo o lakou; a ua kahikoia no hoi lakou me ke kapa manoanoa.

20 Ano, aole i hoomakaukauia ka poe koa o Zerahemana me kekahi mea me neia. O ko lakou wale no na pahikaua a lakou, a me na pahikaua pokole a lakou, na kakaka a lakou a me na pua a lakou, ka lakou mau ala a me na maa a lakou; aka, ua olohelohe lakou, koe wale no he ili i kaeiia a puni o ko lakou puhaka; he oiaio, ua olohelohe lakou a pau, koe wale no ko Zorama poe a me ko Amaliki poe.

21 Aka aole o lakou kahikoia me na pale umauma, aole hoi me na pale lima; nolaila, ua makau nui iho la lakou i ka poe koa o ko Nepai, no ko lakou nei mau mea i kahikoia’i, me ka oi loa aku nae o ko lakou la nui mamua o ko ko Nepai poe.

22 [m 20, p 5] Aia hoi kekahi, aole lakou i aa e hele ku e mai i ko Nepai poe ma na palena o Ieresona: nolaila, haele aku la lakou iwaho o ka aina o Anationuma, iloko o ka waonahele, me ka hele aku a puni ma ka waonahele, ma o ma ke poo o ka muliwai Sidona, e hiki ia lakou ke komo iloko o ka aina o Manati, a e loaa ka aina; no ka mea, aole lakou i manao e ike ka poe koa o Moroni i kahi a lakou i hele aku ai.

23 Aka i ka wa a lakou i haele aku ai, hoouna aku la o Moroni i na kiu iloko o ka waonahele, e hoomaka’kiu ia lakou; a e ike ana no hoi o Moroni no na wanana a Alama, hoouna ae la oia i kekahi mau kanaka io na la, e makemake ana i kela e ninau aku i ka Haku i kahi a ka poe koa o ko Nepai poe e hele aku ai, e hoomalu aku ia lakou iho i ko Lamana poe.

24 A eia kekahi, hiki mai la ka olelo a ka Haku ia Alama, a hai aku la o Alama i na elele o Moroni, e hele ana ka poe koa o ko Lamana poe mawaho ma ka waonahele, e hiki ia lakou ke hele mai iloko o ka aina o Manati, e hiki ia lakou ke hoouka mai maluna iho o ka poe nawaliwali ae o na kanaka. A hele aku la ua mau elele la a hai aku la i ka olelo ia Moroni.

25 [m 20, p 6] Ano, e waiho ana o Moroni i kekaho mahele o kona poe koa ma ka aina o Ieresona, o komo mai kekahi poe o ko Lamana poe iloko o kela aina a e loaa’i ke kulanakauhale, a lawe ae la oia i ka mahele i koe o kona poe koa, a hele aku la iloko o ka aina o Manati.

26 A kauoha ae la oia i na kanaka a pau ma kela mokuna o ka aina, e houluulu ia lakou iho e kaua aku i ko Lamana poe, e hoomalu i ko lakou mau aina a me ko lakou aupuni, i ko lakou mau mea e pono ai a me ko lakou ku okoa ana; nolaila, ua hoomakaukauia lakou no ka wa a ko Lamana poe e hele mai ai.

27 A eia kekahi, kena ae la o Moroni i kona poe koa e pee iloko o ke awawa aia ia e kokoke ana i ke kapa o ka muliwai Sidona, ma ke komohana o ka muliwai Sidona ma ka waonahele.

28 A hoonoho iho la o Moroni i na kiu a puni, e hiki ia ia ke ike i ka wa a ka poe koa o ko Lamana poe e hele mai ai.

29 [m 20, p 7] Ano, e ike ana o Moroni i ka manao o ko Lamana poe, o ko lakou manao ia e pepehi mai i ko lakou poe hoahanau, a i ole ia, e hoopio mai ia lakou a lawe ia lakou iloko o ka noho luhi ana, e hiki ia lakou ke kukulu i aupuni no lakou iho, maluna iho o ka aina a puni;

30 A e ike ana no hoi oia e makemake wale ana no o ko Nepai poe e hookoe i ko lakou mau aina, a me ko lakou ku okoa ana a me ko lakou ekalesia, nolaila, aole oia i manao he hewa kona hoomalu ana ia lakou ma ka hana maalea; nolaila ike iho la oia, ma o kona poe kiu la, i ke ala a ko Lamana poe e hele aku ai.

31 Nolaila, mahele ae la oia i kona poe koa, a kai ae la i kekahi poe ma o aku iloko o ke awawa, a huna iho la ia lakou ma ka hikina, a ma ka hema o ka puu Ripala;

32 A o ka poe i koe huna iho la oia iloko o ke awawa komohana, ma ke komohana o ka muliwai Sidona, a pela aku iloko o na palena o ka aina Manati.

33 A pela oia i hoonoho ai i kona poe koa e like me kona makemake, a ua makaukau oia e halawai pu me lakou.

34 [m 20, p 8] A eia kekahi, pii mai la ko Lamana poe ma ka akau o ka puu, ma kahi a kekahi hapa o ka poe koa o Moroni i pee ai.

35 A i ka wa a ko Lamana poe i maalo ae ai i ka puu Ripala, a komo iloko o ke awawa, a i hoomaka ai e hele aku i kela kapa o ka muliwai Sidona, o ka poe koa i pee ai ma ka hema o ka puu, i alakaiia e kekahi kanaka o Lehi kona inoa; a alakai aku la oia i kona poe koa a hoopuni ae la i ko Lamana poe a puni, ma ka hikina, ma ko lakou hope.

36 [m 20, p 9] A eia kekahi, i ko Lamana poe i ike ai i ko Nepai poe e hele mai ana maluna o lakou ma ko lakou hope, huli ae la lakou, a hoomaka ae la e paio mai me ka poe koa o Lehi;

37 A hoomaka ae la ka hana o ka make, ma na aoao elua; aka ua oi aku ka weliweli ma ka aoao o ko Lamana poe; no ka mea, ua waiho olohelohe ia lakou i ka hahau ikaika ana o ko Nepai poe, me ka lakou mau pahikaua a me ka lakou mau pahikaua pokole, aneane lawe ana i ka make ma keal hahau ana keia hahau ana;

38 Oiai ma keia aoao, he kakaikahi ka haule o kanaka mawaena o ko Nepai poe, ma ka lakou la mau pahikaua, a me ke kahi ana o ke koko; ua paleia lakou ma na wahi o ke ola i noho nui ai o ke kino, oia hoi, o na wahi o ke ola i noho nui ai ua maluhea mai ka hahau ana ae o ko Lamana poe, ma ko lakou mau pale umauma, a me ko lakou mau pale lima, a me ko lakou mau pale poo; a pela ko Nepai poe i hana’i i ka hana o ka make mawaena o ko Lamana poe.

39 Eia kekahi, makau iho la ko Lamana poe no ka luku mawaena o lakou, a hoomaka ae la lakou e hee aku i ka muliwai o Sidona.

40 A ua alualuia lakou e Lehi a me kona poe kanaka, a ua hooauheeia lakou e Lehi iloko o na wai o Sidona; a hala aku la lakou ma kela kapa o na wai o Sidona. A aua iho la o Lehi i kona poe koa ma ke kapa o ka muliwai Sidona, i hele ole ai lakou i kela kapa.

41 [m 20, p 10] A eia kekahi, halawai ae la o Moroni a me kona poe koa me ko Lamana poe ma ke awawa, ma kela kapa o ka muliwai Sidona, a hoomaka ae la e lele maluna o lakou, a e pepehi ia lakou.

42 A hee hou aku la ko Lamana poe imua o lakou, i ka aina o Manati; a ua halawai hou lakou me ka poe koa o Moroni.

43 Ano i keia manawa, kaua nui loa iho la ko Lamana poe; he oiaio, aole i ike e ia mamua ke kaua ana o ko Lamana poe me ka makau ole a me ka ikaika nui loa me neia; aole loa, aole mai kinohi mai;

44 A ua hooeueuia lakou e ko Zorama poe a me ko Amaliki poe ko lakou poe luna papa nui a poe kapena, a e Zerahemana, oia no ko lakou luna koa nui, a o ko lakou alihi kaua a mea hoomalu hoi; he oiaio, kaua mai la lakou e like me na deragona; a ua pepehi loa ia kekahi poe o ko Nepai poe e ko lakou mau lima; he oiaio, no ka mea, hahau mai lakou a moku loa i na pale poo he nui o lakou; a hou mai la no hoi i na pale umauma he nui o lakou; a moku mai no hoi lakou i na lima he nui o lakou; a pela ko Lamana poe i hahau mai ai ma ko lakou huhu wela.

45 Aka hoi, ua hooeueuia ko Nepai poe e ke kumu maikai nui ae; no ka mea, aole o lakou e kaua ana no ka noho alii ana aole hoi no ka mana; aka, e kaua ana lakou no ko lakou mau wahi i noho ai, a me ko lakou ku okoa ana, a me ka lakou poe wahine, a me ka lakou poe keiki, a me ko lakou mau mea a pau loa; he oiaio, no ko lakou mau oihana o ka hoomana, a me ko lakou ekalesia;

46 A e hana ana lakou i ka mea a lakou i manao ai he pono imua o ko lakou Akua; no ka mea, u i mai ka Haku ia lakou, a i ko lakou poe kupuna no hoi, Ina aole oukou hewa ma ka hihia mua, aole hoi ma ka lua, aole loa oukou e hookuu aku ia oukou iho e pepehiia mai e na lima o ko oukou poe enemi.

47 A eia hou, ua i mai ka Haku, Na oukou e hoomalu aku i ko oukou mau ohua, a hiki aku i ka hookahe koko ana; nolaila, no keia mea e paio ana ko Nepai poe me ko Lamana poe, e hoomalu ia lakou iho, a me ko lakou mau ohana, a me ko lakou mau aina, a me ko lakou mau aupuni, a me ko lakou mau mea e pono ai, a me ko lakou hoomana ana.

48 [m 20, p 11] A eia kekahi, i ka wa a ka poe kanaka o Moroni i ike ai i ka ikaika a me ka huhu o ko Lamana poe, aneane e emi aku ana lakou a hee aku mai o lakou la aku. A e ike ana o Moroni i ko lakou manao, hoouna ae la oia a hooeueu ae la i ko lakou mau naau me keia mau manao; he oiaio, me na manao no ko lakou mau aina, a me ko lakou ku okoa ana, he oiaio, me ko lakou ku okoa ana mai ka noho luhi ana ae.

49 A eia kekahi, huli ae la lakou i ko Lamana poe, a kahea aku la lakou me ka leo hookahi i ka Haku i ko lakou Akua, no ko lakou noho kauwa ole ana, a me ko lakou ku okoa ana mai ka noho luhi ana ae.

50 A hoomaka ae la lakou e ku e i ko Lamana poe me ka mana; a ma kela hora hookahi a lakou i hea aku ai i ka Haku no ko lakou noho kauwa ole ana, hoomaka ae la ko Lamana poe e hee kau imua o lakou; a hee aku la lakou a hiki wale aku i na wai o Sidona.

51 Ano, ua nui loa aku ka nui o ko Lamana poe; he oiaio, ua nui loa aku mamua o ka palua ana o ka nui o ko Nepai poe; aka, ua hooauheeia nae lakou a houluuluia ma kahi hookahi, iloko o ke awawa, ma ke kapa, ma ka muliwai Sidona;

52 Nolaila, hoopuni iho la ka poe koa o Moroni ia lakou a puni: he oiaio, ma na kapa elua o ka muliwai; no ka mea, aia hoi ma ka hikina ka poe kanaka o Lehi;

53 Nolaila, ia Zerahemana i ike ai i ka poe kanaka o Lehi ma ka hikina o ka muliwai Sidona, a me na poe koa o Moroni ma ke komohana o ka muliwai o Sidona, a ua hoopuniia lakou a puni e ko Nepai poe, ua pauhia lakou me ka weliweli.

54 Ano, ia Moroni i ike ai i ko lakou weliweli, kena aku la oia i kona poe kanaka e hooki lakou i ko lakou hookahe ana i ke koko.

MOKUNA 44

1 [mokuna 20, paukū 12] A eia kekahi, hooki aku la lakou a nee uuku ae la mai o lakou ae. A i aku la o Moroni ia Zerahemana, E nana mai oe, e Zerahemana e, aole maku i makemake e lilo i poe kanaka puni koko. Ke ike nei oukou eia no oukou iloko o ko makou mau lima, aole nae makou makemake e luku aku ia oukou

2 Aia hoi, aole makou i hele mai iwaho nei e kaua aku ia oukou e hiki ia makou ke hookahe aku i ko oukou koko, i loaa’i ia makou ka mana; aole hoi makou i makemake e kai i kekahi mea i ka auamo o ka luhi. Aka, o keia no ke kumu io o ko oukou hele ana mai e ku e mai ia makou; he oiaio, a ua huhu oukou ia makou no ko makou hoomana ana.

3 Aka, ano, ke ike nei oukou eia pu no ka Haku me makou; a ke ike nei oukou ua haawi mai oia ia oukou iloko o ko Makou mau lima. Ano, ke makemake nei au e hoomaopopo oukou ua hanaia mai keia ia makou no ko makou hoomana ana a no ko makou manaoio iloko o Kristo. Ano, ke ike nei oukou ua hiki ole ia oukou ke hoopau mai i ko makou manaoio nei.

4 Ano, ke ike nei oukou o keia no ka manaoio oiaio o ke Akua; he oiaio, ke ike nei oukou e kokua mai no ka Akua, a e malama mai, a e hoola mai ia makou, i na manawa a pau a makou e hoomana pono ia ia, a i ko makou manaoio, a i ko makou hoomana ana; aole loa e ae mai ka Haku e anaiia makou; ke ole haule iho makou iloko o ka hala, a hoole aku i ko makou manaoio.

5 Ano, e Zerahemana e, ke kauoha aku nei au ia oe, ma ka inoa o kela Akua mana loa, nana i hooikaika mai i ko makou mau lima, i loaa’i ia makou ka mana maluna iho o oukou ma ko makou manaoio, ma ko makou haipule ana, a ma ko makou mau oihana o ka hoomana ana, a ma ko makou ekalesia, a ma ka hana laa i hooiliia mai ai maluna o makou e malama i ka makou poe wahine a me ka makou mau keiki, ma kela noho kauwa ole ana, ka mea e hoopaa ana ia makou i ko makou mau aina a i ko makou aupuni; he oiaio, a ma ke kokua ana no hoi o ka olelo laa a ke Akua, ma o ua mea la i loaa’i ia makou ko makou pomaikai a pau; a ma na mea a pau i maikai loa ia makou;

6 He oiaio, aole o keia wale no; ke kauoha aku nei au ia oukou ma na makemake a pau o oukou i ke ola, e haawi mai oukou i ko oukou mau mea kaua ia makou, a, aole makou e imi i ko oukou koko, aka e hookoe aku makou i ko oukou mau ola, ina e hele aku oukou, a e hele hou ole mai e kaua mai ia makou.

7 Ano, ina e hana ole oukou i keia mea, eia hoi oukou iloko o ko makou mau lima, a e kena aku au i ko’u poe kanaka e haule iho lakou maluna o oukou, a e hoeha ia oukou i na eha o ka make ma ko oukou poe kino, i anai loa ia’i oukou; alaila, e ike kakou i ka poe e loaa auanei ka mana maluna iho o keia poe kanaka; he oiaio, e ike kakou i ka poe e kaiia auanei iloko o ka noho luhi ana.

8 [m 20, p 13] Ano, eia kekahi, ia Zerahemana i lohe ai i keia mau olelo, hele mai la oia a haawi mai la i kana pahikaua, a me kana pahikaua pokole, a me kana kakaka iloko o na lima o Moroni, a i mai la ia ia, Aia hoi, eia no ko makou mau mea kaua; e haawi aku no makou ia mau mea ia oukou, a aole makou e ae e hoohiki aku ia oukou i ka hoohiki a makou i ike ai e uhaiia auanei e makou, a e ka makou mau keiki no hoi; aka, e lawe aku i ko makou mau mea kaua, a e ae mai ia makou e haele aku iloko o ka waonahele; A e ole ia, e aua makou i ka makou mau phaikaua, a e make makou, a i ole ia, e lanakila.

9 aia hoi, aole makou no ko oukou manaoio; aole makou manaoio na ke Akua i haawi mai ia makou iloko o ko oukou mau lima; aka, ke manaoio nei makou o ko oukou maalea no ka mea i hoola mai ai ia oukou i ka makou mau pahikaua. Aia hoi, o ko oukou mau pale umauma, a me ko oukou mau pale lima, oia na mea i hoola mai ai ia oukou.

10 Ano, ia Zerahemana i hoopau ai i kana olelo ana i keia mau hua olelo, hoihoi hou aku la o Moroni i ka pahikaua, a me na mea kaua ana i loaa’i, ia Zerahemana, i ka i ana, Aia hoi, e kaua kakou a pau ke kaua.

11 Ano, aole e hiki ia’u ke hoole i na olelo a’u i olelo aku ao; nolaila, me ka Haku e ola nei, aole loa oukou e haele, ke ole haele oukou me ka hoohiki, i hele hou ole mai ai oukou e ku e mai ia makou e kaua. Ano, eia no oukou ma ko makou mau lima, a e hookahe no makou i ko oukou koko ma ka honua, a i ole ia, e ae mai oukou i na mea a’u i olelo aku ai.

12 Ano, ia Moroni i olelo aku ai i keia mau hua olelo, hoopaa iho la o Zerahemana i kana pahikaua, a ua huhu oia ia Moroni, a holo kiki mai la ia e hiki ia ia ke pepehi mai ia Moroni; aka, ia ia i hoaka ai i kana pahikaua, aia hoi, hahau aku la kekahi o ko Moroni poe koa ia mea i ka honua; a haki aku la ia mea ma ke au; a hahau aku la no hoi oia ia Zerahemana, a oki i ka ili o kona poo, a haule iho la ia mea i ka honua. A emi aku la o Zerahemana mai ko lakou alo aku, mawaena o kona poe koa.

13 [m 20, p 14] A eia kekahi, o ke koa e ku pu ana, nana i oki aku ai i ka ili poo o Zerahemana, lalau iho la oia i ka ili poo mai ka honua ae, ma ka lauoha, a kau ae la ia mea ma ka welau o kana pahikaua, a o aku la ia mea ia lakou, i ka i ana ia lakou me ka leo nui,

14 Me keia ili poo i haule iho ai i ka honua nei, oia no hoi ka ili poo o ko oukou alii, pela no oukou e haule iho ia i ka honua nei, ke ole haawi mai oukou i ko oukou mau mea kaua, a e haele aku, me kekahi berita o ka malu.

15 [m 20, p 15] Ano, aia no kekahi poe he nui wale, ia lakou i lohe ai i keia mau hua olelo, a ike mai la no hoi i ka ili poo i kauia’i ma ka pahikaua, loohia iho la lakou me ka makau, a hele mai la na me ahe nui wale a hoolei mai la i na mea kaua ma na wawae o Moroni, a komo iho iloko o ka berita o ka malu, A o ka poe a pau nana i hana iho i ka berita, ua hookuuia e lakou e haele aku iloko o ka waonahele.

16 [m 20, p 16] Ano, eia kekahi, ua ukiuki nui loa iho la o Zerahemana, a hookonokono ae la oia i ke koena o kona poe koa e huhu, e paio ikaika nui loa mai i ko Nepai poe.

17 Ano, ua huhu o Moroni, no ka paakiki o ko Lamana poe; nolai