Ka Buke Kolu a Nepai

A o Helamana no ke keiki a Helamana, oia no ke keiki a Alama, oia no ke keiki a Alama, he mamo a Nepai ke keiki a Lehi, ka mea i hele mai ai mailoko mai o Ierusalema ma ka makahiki mua o ke au ia Zedekia, ke Alii o ka Iuda.

1 [mokuna 1, paukū 1] Ano, eia kekahi hala aku la ka makahiki kanaiwakumamakahi; a he mau haneri makahiki eono ia mai ka wa mai a Lehi i haalele aku ai ia Ierusalema; a o ka makahiki ia e noho ana o Lakoneusa i Lunakanawai Nui a i Kiaaina hoi maluna iho o ka aina.

2 A ua hele aku la o Nepai, ke keiki a Halamana, mailoko aku o ka aina o Zarahemela, me ka haawi ae i kauoha i kana keiki, ia Nepai, oia no kana keikikane-hiapo, no na papa keleawe, a me na mooolelo i malama e ia’i, a me kela mau mea i malama laa ia’i mai ka haalele ana mai o Lehi ia Ierusalema;

3 Alaila hele aku la oia mailoko aku o ka aina, a o kahi ana i hele aku ai, aole kanaka i ike; a na kana keiki o Nepai i malama i na mooolelo ma kona hakahaka, he oiaio, i ka mooolelo o keia lahuikanaka.

4 [m 1, p 2] A eia kekahi, ma ka makamua o ka makahiki kanaiwakumamalua, aia hoi, hoomaka ae la na wanana a ka poe kaula e hooko nui loa ia’i; no ka mea, hoomaka ae la na ouli a me na hana mana nui loa aku e hanaia mawaena o na kanaka.

5 Aka, ua hoomaka kekahi poe e olelo ae, ua hala ka manawa no na olelo e hookoia’i, i oleloia e Samuela ka Lamana.

6 A hoomaka ae la lakou e hauoli maluna iho o ko lakou poe hoahanau, i ka i ana, Aia hoi, ua hala aku la ka manawa, a ua ko ole na olelo a Samuela; nolaila, o ko oukou hauoli a me ko oukou manaoio no ia mea, ua makehewa no ia.

7 A eia kekahi, hoohaunaele nui loa ae la lakou mawaena o ka aina; a hoomaka ae la ka poe manaoio e kaumaha loa, o ko ole mai paha ua mau mea la i oleloia’i.

8 Aka hoi, kiai onipaa iho la lakou no kela la, a me kela po, a me kela la, i lilo ai auanei me he la hookahi la, me he mea la aole no he po, i ike ai lakou aole makehewa ko lakou manaoio ana.

9 [m 1, p 3] Ano, eia kekahi, ua hookaawaleia’e kekahi la e ka poe hoomaloka, i lukuia’i ua poe la a pau, ka poe i manaoio i kela mau mooolelo, ke hiki ole mai ka hoailona i haawiia mai ai e samuela, ke kaula.

10 Ano, eia kekahi, ia Nepai, ke keiki a Nepai, i ike ai i keia hewa o kona poe kanaka, ua kaumaha loa kona naau.

11 A eia kekahi, hele aku la ia mawaho a kulou iho la oia ilalo ma ka lepo, a hea ikaika aku la i kona akua, no kona poe kanaka; he oiaio, no ua poe la e kokoke ana e lukuia no ko lakou manaoio i na mooolelo a ko lakou poe kupuna.

12 A eia kekahi, hea ikaika aku la i ka Haku, a pau ae la ka la; a, aia hoi, pae mai la ka leo o ka Haku io na la, i ka i ana,

13 E hookiekie ae oe i kou poo a e hoolana maikai i kou naau, no ka mea, ua kokoke mai ka manawa, a ma keia po e haawiia aku ka hoailona, a ma ka la apopo e komo ana Owau iloko o ke ao nei, e hoike aku i ko ke ao nei e hooko aku no au i na mea a pau a’u i kauoha aku ai e oleloia’ku e na waha o ko’u poe kaula hemolele.

14 Aia hoi, ke hele mai nei au i ko’u poe ponoi, e hooko i na mea a pau a’u i hoike aku ai i na keiki a kanaka, mai ka hookumuia’na mai o ke ao nei, a e hana i ka makemake o ka Makua, a o ke Keiki a ka Makua no hoi, no’u nei, a o ke Keiki, no kuu io. Aia hoi, ua kokoke mai ka manawa, a i keia po e haawiia aku ai ka hoailona.

15 [m 1, p 4] A eia kekahi, ua ko iho la na olelo i hiki mai ai ia Nepai, me ia i oleloia mai ai: no ka mea hoi, ma ka napoo ana o ka la, aole he poeleele; a hoomaka ae la na kanaka e pihoihoi, no ka mea, aole poeleele i ka wa i hiki mai ai ka po.

16 A ua nui loa ka poe i manaoio ole e ai mamua i na olelo a ka poe kaula, i hina i ka honua, a lilo iho la me he mea la ua make lakou, no ka mea, ike iho la lakou ua hooliloia ka manao kuka o ka luku, a lakou i hooholo ai no ka poe i manoio ma ka olelo a na kaula, i mea ole, no ka mea, ua kokoke mai no ka ouli i haawiia mai ai;

17 A hoomaka e la lakou e hoomaopopo e ike koke ia ke Keiki a ke akua e pono ai; he oiaio, o ka poe kanaka a pau maluna iho o ka ili o ka honua a puni, mai ke komohana a i ka hikina, ma ka aina akau a ma ka aina hema no hoi, no ka pihoihoi nui loa ana, hina iho la lakou i ka honua;

18 No ka mea, ua ike lakou ua hoike mai ka poe kaula no ua mau mea nei no na makahiki he nui wale, a ua kokoke mai ano, ka ouli i haawi e ia mai ai mamua; a hoomaka ae la lakou e makau no ko lakou hewa a me ko lakou hoomaloka.

19 [m 1, p 5] A eia kekahi, aole he poeleele ia po a ao, aka ua malamalama ia me he mea la iwaena konu o ka la. A eia kekahi, puka hou mai la ka la ia kakahiaka ae, e like me kona ano pololei; a ike iho la lakou o ka la no ia a ka Haku e hanauia mai ai, no ka ouli i haawiia mai ai.

20 A ua hiki io mai la no ia, he oiaio, na mea a pau, kela mea keia mea, e like me na olelo a na kaula.

22 A eia kekahi, ma ia hope iho, hoomaka ae la na wahahee ana e hoounaia’e mawaena o na kanaka, e Satana, e hoopaakiki iho i ko lakou mau naau, i mea i manaoio ole ai lakou ma kela mau ouli a mau mea kupahana a lakou i ike ai; aka me keia mau wahahee ana a mau hoopunipuni ana, ua manaoio nae ka nui loa o na kanaka, a ua hoohuliia mai i ka Haku.

23 A eia kekahi, hele aku la o Nepai mawaena o na kanaka, a me na mea e ae he nui wale no hoi, e bapetizo ana i ka mihi, a ma ia mea, ua kala nui ia na hala. A pela i hoomaka hou ai na kanaka e loaa ka maluhia ma ka aina;

24 A, aole no na paio, koe he poe kakaikahi wale no ka poe i hoomaka e hai aku, e hoao ana e hooiaio ma o na palapala hemolele la, aole ia he mea e pono hou ai e malama i ke kanawai o Mose. Ano, ma keia mea kuhi hewa iho la lakou, no ka hoomaopopo ole i na palapala hemolele.

25 Aka eia kekahi, ua hoohuli koke ia lakou, a ua hoomaopopoia lakou no ke kuhi hewa o lakou, no ka mea, ua hoikeia mai la ia lakou aole i ko ke kanawai i keia manawa, a e hookoia ia e pono ai ma kela lihi keia lihi: he oiaio, hiki mai la ka olelo io lakou la e hookoia ia e pono ai; he oiaio, aole e lilo aku kahi huna, aole hoi kahi lihi iki, a pau loa ae la ia i ka hookoia; nolaila, ma keia makahiki hookahi, ua kaiia mai la lakou e ike i ko lakou lalau, a hai mai la no i ko lakou mau hewa.

26 A pela i hala aku ai ka makahiki kanaiwakumamalua, e lawe mai ana i na mea olioli i na kanaka no na hoailona i hiki mai ai, e like me na olelo o ka wanana a ka poe kaula hemolele a pau.

27 [m 1, p 6] A eia kekahi, hala aku la no hoi ka makahiki kanaiwakumamakolu me ka maluhia, koe wale no ko Gadianatona poe powa, ka poe i noh ai ma na mauna, na lakou i hoopilikia i ka aina; no ka mea, no ka ikaika loa o ko lakou mau wahi paa a me ko lakou mau wahi malu, ua hiki ole i na kanaka ke lanakila maluna iho o lakou; nolaila, nui ko lakou pepehi kanaka ana, a luku nui mai la mawaena o na kanaka.

28 A eia kekahi, ma ka makahiki kanaiwakumamaha, hoomaka ae la lakou e mahuahua nui loa aku, no ka mea, ua nui loa na mea ku e o ko Nepai poe i holo aku ai io lakou la, a he mea ia i hookaumaha nui aku ai i kela poe o Nepai e noho ana ma ka aina;

29 A he kumu hoi kekahi no ke kaumaha nui mawaena o ko Lamana poe: no ka mea, he nui na keiki a lakou i ulu ae a hoomaka ae la e mahuahua ikaika ma na makahiki, i ku okoa ai lakou, a ua alakaiia aku e kekahi poe o ko Zorama poe, ma na wahahee ana a lakou, a ma na olelo hoomalimali ana a lakou, e hui me ua poe powa la o Gadianatona;

30 A pela i hoopilikia pu ia’i ko Lamana poe no hoi, a hoomaka ae la e emi iho ma ko lakou manaoio a me ka pono, na ka hewa o ka hanauna hou.

1 [mokuna 1, paukū 7] A eia kekahi, pela i hala aku ai ka makahiki kanaiwakumamalima no hoi, a hoomaka ae la na kanaka e hoopoina i kela mau ouli a me na mea kupanaha a lakou i lohe ai, a hoomaka ae la ke kahaha o lakou e emi iho a e imi ae ma kekahi ouli a me kekahi mea kupanaha mai ka lani mai, a hoomaka ae la lakou e paakiki iho ma ko lakou mau naau, a makapo ma ko lakou hoomaopopo ana, a hoomaka ae la e hoomaloka i na mea a pau a lakou i lohe ai a i ike ai,

2 E noonoo wale ana i kekahi mea lapuwale ma ko lakou mau naau, ua hanaia ia mea e na kanaka, a e ka mana o ka diabolo, e alakai aku a e hoopunipuni i na naau o na kanaka; a pela o Satana i loaa hou ai na naau o na kanaka, a hoopouli iho la oia i ko lakou mau maka, a alakai aku la ia lakou e manaoio, he mea naaupo a lapuwale ke ao ana o Kristo

3 [m 1, p 8] A eia kekahi, hoomaka ae la na kanaka e mahuahua ikaika ma ka hewa a me na mea hoopailua; a, aole lakou manaoio e haawi hou ia mai na hoailona a me na mea kupanaha; a hele ae la o Satana i o a ia nei, e alakai aku ana i na naau o na kanaka, e hoowalewale ana ia lakou a e hookonokono ana ia lakou, i hana lakou i ka hewa nui ma ka aina.

4 A pela i hala aku ai ka makahiki kanaiwakumamaono; a me ka makahiki kanaiwakumamahiku no hoi; a me ka makahiki kanaiwakumamawalu no hoi; a me ka makahiki kanaiwakumamaiwa no hoi;

5 A ua hala aku la na makahiki hookahi haneri no hoi, mai na la mai o Mosia, oia no ke Alii maluna iho o ka poe kanaka o Nepai.

6 A ua hala aku la na makahiki eono haneri a me kumamaiwa, mai ko Lehi haalele ana ia Ierusalema;

7 A ua hala aku la na makahiki eiwa, mai ka wa o ka ouli i haawiia mai ai, i oleloia e ka poe kaula, i hiki mai ai o Kristo iloko o ke ao nei.

8 Ano, hoomaka ae la ko Nepai poe e helu i ko lakou manawa mai keia manawa o ka ouli i haawiia mai ai, oia hoi mai ka hiki ana mai o Kristo; nolaila, ua hala aku la no makahiki eiwa,

9 A, aole i hoi hou mai o Nepai, oia no ka makuakane o Nepai, ka mea nana i malama i na mooolelo, i ka aina o Zarahemela, a ua hiki ole ke loaa ia, ia wahi aku ia wahi aku ma ka aina a puni.

10 [m 1, p 9] A eia kekahi, noho mau iho la na kanaka iloko o ka hewa, me ka nui nae o ka hai olelo ana a me ka wanana ana i hoounaia mai mawaena o lakou; a pela i hala aku ai ka umi makahiki no hoi; a hala aku la no hoi ka makahiki umikumamakahi ma ka hewa.

11 A eia kekahi, ma ka makahiki umikumamakolu, hoomaka ae la na kaua a me na paio mawaena o ka aina a puni; no ka mea, ua lilo iho la ko Gadianatona poe powa i lehulehu, a pepehi nui iho la i na kanaka, a anai nui ae la i na kulanakauhale, a hoolaha ae la i ka make a me ka luku mawaena o ka aina, a ua lilo iho la ia i mea e pono ai no na kanaka a pau, o ko Nepai poe, a me ko Lamana poe no hoi, e lalau ae i na mea kaua e ku e aku ia lakou;

12 Nolaila, o ko Lamana poe a pau i hoohuliia’e i ka Haku, hui pu iho la lakou me ko lakou poe hoahanau, me ko Nepai poe, a ua koiia lakou, no ka maluhia o ko lakou ola ana, a me ko lakou poe wahine a me ka lakou mau keiki, e lalau ae i na mea kaua e ku e aku i ko Gadianatona poe powa; he oiaio, a e malama i ko lakou mau pomaikai, a me ko lakou pono o ko lakou ekalesia, a o ko lakou hoomana ana, a me ko lakou ku okoa ana, a me ko lakou noho kauwa ole ana.

13 A eia kekahi, mamua o ka hala ana o keia makahiki umikumamakolu, ua hooweliweliia ko Nepai poe me ka luku loa ia’na, no keia kaua, i lilo ia i mea eha loa.

14 A eia kekahi, o ua poe la k ko Lamana, ka poe i hui me ko Nepai poe; ua helu pu ia mawaena o ko Nepai poe:

15 A ua laweia’ku ko lakou poino mai o lakou aku, a lilo iho la ko lakou ili i keokeo e like me ko Nepai poe;

16 A lilo iho la ko lakou poe kanaka hou a me ka lakou poe kaikamahine i maikai loa, a ua helu pu ia lakou mawaena o ko Nepai poe, a ua kapaia ko Nepai poe. A pela i pau ai ka makahiki umikumamakolu.

17 [m 1, p 10] A eia kekahi ma ka makamua o ka makahiki umikumamaha, hoomau iho la ke kaua mawaena o ka poe powa a me ka poe kanaka o Nepai, a lilo iho la i mea eha loa; aka hoi, loaa iho la i ka poe kanaka o Nepai ka lanakila iki maluna o ka poe powa, a hooauhee aku la lakou ia lakou la mailoko aku o ko lakou mau aina, i na mauna, a i na wahi malu o lakou la.

18 A pela i pau ai ka makahiki umikumamaha. A ma ka makahiki umikumamalima puka ku e mai la lakou la i ka poe kanaka o Nepai; a no na hewa o ka poe kanaka o Nepai, a me ko lakou paio a ku e ana he nui wale, lanakila nui mai la ko Gadianatona poe maluna iho o lakou.

19 A pela i pau ai ka makahiki umikumamalima, a pela hoi na kanaka i noho ai iloko o na popilikia he nui wale; a kau mai la ka pahikaua o ka luku maluna iho o lakou, a kokoke lakou e hahauia ilalo e ia, a o keia mea no ko lakou hewa.

1 [mokuna 2, paukū 1] Ano, eia kekahi, ma ka makahiki umikumamaono mai ka hiki ana mai o Kristo, loaa mai la ia Lakoneusa, ke kiaaina o ka aina, kekahi episetole mai ka luna a kiaaina hoi o ua poe powa hui nei; a eia na olelo i palapalaia, i ka i ana,

2 E Lakoneusa, e ke kiaaina maikai a kiekie o ka aina, aia hoi, ke palapala aku nei au i keia episetole ia oe, a ke haawi aku nei au ia oe i ka mahalo nui loa no kou naueue ole, a no ka naueue ole o kou poe kanaka, ma ka malama ana i ka mea a oukou i manao ai o ko oukou pono a ku okoa ana; he oiaio, ke ku paa maikai nei oukou, me he mea la ua kokuaia oukou e ka lima o kekahi Akua, ma ka hoomalu ana i ko oukou ku okoa ana, a me ko oukou waiwai, a me ko oukou aina, oia hoi na mea a oukou i kapa iho ai pela.

3 A he mea menemene ia i ko’u manao, e Lakoneusa kiekie e, kou naaupo a me ka haakei me neia, i manao ai ua hiki ia oukou ke ku imua o na kanaka koa he nui wale me neia, ka poe i hoomaluia e au, ka poe e ku nei i keia manawa me ko lakou mau mea kaua, a ke kali nei, me ka iini nui, i ka olelo, e iho ilalo maluna o ko Nepai poe a luku aku ia lakou.

4 A e ike ana au i ko lakou uhane pio ole, ua hoao aku au ia lakou ma kahi o ke kaua, a e ike ana i ko lakou inaina mau loa aku ia oukou , no ka nui o na lawehala a koukou i hana mai ai ia lakou, nolaila, ina e iho ilalo lakou e ku e ia oukou , e luku loa aku no lakou ia oukou;

5 Nolaila, ua palapala aku au i keia episetole, e sela ana ia me ko’u lima iho, e manao ana i kou pomaikai, no kou naueue ole ma ka mea au i manao ai he pololei, a me kou uhane ikaika ma kahi o ke kaua;

6 Nolaila, ke palapala aku nei au ia oe e makemake ana ia oe e haawi mai i ko oukou mau kulanakauhale, i ko oukou mau aina, a me ko oukou mau hooilina, no ko’u poe kanaka, e aho ia mamua o ko lakou hoopai ana ia oukou me ka pahikaua, a i hiki mai ka luku maluna iho o oukou;

7 A i ole ia, ma na olelo e ae, e kuu mai ia oukou iho ia makou, a e hui pu me makou, a e lilo i poe ike i ka makou mau hana malu, a e lilo i poe hoahanau no makou, i like pu oukou me makou; aole i poe kauwa na makou, aka i poe hoahanau no makou, a poe hui ma ko makou waiwai a pau.

8 A, aia hoi, ke hoohiki aku nei au ia oe, ina e hana oukou i keia, me kekahi hoohiki paa, aole oukou e lukuia’na; aka ina aole oukou e hana i keia, ke hoohiki aku nei au ia oe, me ka hoohiki paa, i ka hala ana o ka malama okoa mai ka la apopo aku, e kena aku no au i ko’u poe kaua e iho ilalo e ku e ia oukou, aole lakou e hooki aku i ko lakou lima, aole hoi e hookoe, aka e luku aku no ia oukou, a e hoohaule iho i ka pahikaua maluna iho o oukou, a hiki aku i ka wa e lilo oukou i ole.

9 Aia hoi, owau no o Gidianahi; a owau no ke kiaaina o keia poe hui malu o Gadianatona; a o ua poe hui nei, a me na hana a lakou, ua ike au ua pono; a no ka wa kahiko ia mau mea, a ua haawiia mai mailalo mai ia makou.

10 A ke palapala aku nei au i keia episetole ia oe, e Lakoneusa, a ke lana nei ko’u manao e haawi mai no oukou i ko oukou mau aina, a me ko oukou mau hooilina, me ka hookahe ole i ke koko, i loaa’i i ko’u poe kanaka nei ko lakou mau pono a me ka noho alii ana, ka poe i haalele aku ia oukou, no ko oukou hewa ma ka aua ana mai o lakou aku i ko lakou mau pono e ka noho alii ana; a ina aole oukou e hana i keia, na’u e hoopai aku i na poino o lakou. Owau no o Gidianahi.

11 [m 2, p 2] Ano, eia kekahi, ia Lakoneusa i loaa’i keia episetole, ua kahaha nui loa iho la ia, no ka wiwo ole o Gidianahi, e koi ana i na aina o ko Nepai poe, a me ka hooweliweli ana no hoi i na kanaka, a me ka hoopai ana i na poino o ua poe la i loaa ole ai i ka pono, i ole lakou i hoopoino ia lakou iho, ma ka hele ana i kela poe powa hewa a ino loa.

12 Ano hoi, o ua Lakoneusa nei, ke kiaaina, he kanaka pono ia, a ua hiki ole ke hoomakauia mai e ke koi ana a me na olelo hooweliweli o kahi powa; nolaila, aole oia hoolohe aku i ka episetole o Gidianahi, ke kiaaina o ka poe powa, aka kauoha ae la ia i kona poe kanaka e hea aku i ka Haku no ka ikaika, ma ka manawa a ka poe powa e iho mai ai ilalo, e ku e mai ia lakou;

13 He oiaio, hoouna ae la ia i olelo hoolaha mawaena o na kanaka a pau, na lakou e houluulu mai i ko lakou poe wahine, a me ka lakou poe keiki, i ko lakou mau pua holoholona a me ko lakou mau ohana holoholona, a me ko lakou waiwai a pau, koe wale no ko lakou aina, i kahi hookahi.

14 A kena ae la oia e kukuluia na wahi paa a puni o lakou, a o ka ikaika olaila e nui loa aku ia. A kena ae la ia e hoonohoia na poe kaua, o ko Nepai poe a o ko Lamana poe no hoi, o ka poe a pau i helu pu ia mawaena o ko Nepai poe, i poe kiai a puni, e kiai mai ia lakou, a e hoomalu mai ia lakou i ka poe powa, i ke ao a i ka po;

15 He oiaio, i aku la oia ia lakou, Me ka Haku e ola nei, ina aole oukou e mihi i ko oukou mau hewa a pau, a e hea aku i ka Haku, aole loa lakou e hoopakeleia mai, mailoko mai o na lima o ua poe powa la o Gadianatona.

16 A no ka nui loa a kupanaha hoi o na olelo a me na wanana a Lakoneusa, hiki mai la ka makau maluna iho o ka poe kanaka a pau, a hooikaika iho la lakou ma ko lakou ikaika, e hana aku e like me na olelo a Lakoneusa.

17 [m 2, p 3] A eia kekahi, hoonoho mai la o Lakoneusa i na kapena nui maluna o na poe kaua a pau o ko Nepai, e hoomalu iho ia lakou i ka manawa a ka poe powa e iho mai ai ilalo mailoko mai o ka waonahele e ku e mai ia lakou.

18 Ano o ka mea kiekie loa mawaena o ka poe kapena a pau, a me ke alihi kaua nui hoi o na poe kaua a pau o ko Nepai, ua hoonohoia, a o Gidigidoni kona inoa.

19 Ano, he mea mau mawaena o ko Nepai poe a pau, e wae aku no na kapena nui o lakou, koe wale no na manawa hewa o lakou, i kekahi mea nona ka Uhane o ka hoikeana, a wanana no hoi; nolaila, he kaula nui o ua Gidigidoni nei mawaena o lakou, a o ka Lunakanawai Nui no hoi ia.

20 Ano, i ae la na kanaka ia Gidigidoni, E pule aku i ka Haku, a e pii ae kakou ma na mauna, a iloko o ka waonahele, i hiki ia kakou ke haule iho maluna o ka poe powa a e luku aku ia lakou, ma ko lakou aina iho.

21 Aka, i aku la o Gidigidoni ia lakou, Na ka Haku e hoole mai; no ka mea, ina e pii ku e aku kakou ia lakou, e haawi mai no ka Haku ia kakou iloko o ko lakou mau lima; nolaila, e hoomakaukau aku no kakou ia kakou iho iwaena konu o ko kakou mau aina, a e houluulu aku kakou i ko kakou poe kaua i kahi hookahi, a, aole kakou e hele aku e ku e ia lakou, aka e kali no kakou a hiki i ka wa e hele mai lakou e ku e mai ia kakou; nolaila, me ka Haku e ola nei, ina e hana aku kakou i keia, nana e haawi mai ia lakou iloko o ko kakou mau lima.

22 [m 2, p 4] A, eia kekahi ma ka makahiki umikumamahiku, ma ka hopena o ka makahiki, ua laha aku la ka olelo kakala a Lakoneusa mawaena o ko ili a pau o ka aina, a ua lawe ae la lakou i ko lakou mau lio, a me ko lakou mau hale kaa, a me ko lakou mau bipi, a me na pua holoholona a pau o lakou, a me na ohana holoholona o lakou, a me ko lakou hua liilii, a me ko lakou waiwai a pau, a hele ae la ma na tausani; a ma na umi o na tausani, a hiki i ka wa i hele aku ai lakou a pau i kahi i kohoia’i, e houluulu ai lakou, e hoomalu aku ia lakou iho i ko lakou poe enemi.

23 A o ka aina o Zarahemela a me ka aina Momona no ka aina i kohoia’i; he oiaio, i ka palena aia mawaena o ka aina Momona a me ka aina Neoneo;

24 A ua nui na tausani kanaka i kapaia ko Nepai poe, ka poe i houluulu ia lakou iho i kahi hookahi ma ua aina nei. Ano, na Lakoneusa i kauoha aku ia lakou e houluulu ia lakou iho i kahi hookahi ma ka aina hema, no ka nui loa o ka poino maluna iho o ka aina akau;

25 A hana paa iho la lakou ia lakou iho, e ku e i ko lakou poe enemi; a noho iho la lakou i ka aina hookahi, a i ke kino hookahi, a makau ae la lakou i na olelo i oleloia mai ai e Lakoneusa, a mihi iho la lakou i ko lakou mau hewa; a pule aku la lakou i ka Haku, i ko lakou Akua, nana e hoopakele mai ia lakou, i ka manawa a ko lakou poe enemi e iho mai ai, e kaua mai ia lakou.

26 A kena ae la o Gidigidoni ia lakou e hana i na mea kaua, o kela ano keia ano, i ikaika lakou me na mea kahiko kaua, a me na pale-lima, a me na pale-kaua, mamuli o ke ano o kona ao ana’ku.

1 [mokuna 2, paukū 5] A eia kekahi ma ka hope o ka makahiki umikumamawalu, ua hoomakaukau iho ua poe koa la o na powa, no ke kaua, a hoomaka ae la e iho olalo, a e puka mai mai na puu mai, a mailoko mai o na kuahiwi, a o ka waonahele, a me ko lakou mau wahi paa, a me ko lakou mau wahi malu, a hoomaka ae la e noho ai ma na aina, ma ka aina hema, a ma ka aina akau no hoi, a hoomaka ae la e noho ae ma na aina a pau i haaleleia e ko Nepai poe, a me na kulanakauhale i waiho neoneon ia.

2 Aka hoi, aole holoholona hihiu, aole hoi mea e pepehi ai, ma ua mau aina la i haaleleia’ku e ko Nepai poe, a, aole holoholona hihiu no ka poe powa koe wale no ma ka waonahele.

3 A ua hiki ole i ka poe powa ke ola, koe ma ka waonahele wale no, no ka nele i ka ai ole; no ka mea, ua waiho neoneo ko Nepai poe i ko lakou mau aina, a ua houluulu mai la i na pua holoholona o lakou, a me ko lakou mau ohana holoholona, a me ko lakou waiwai, a ma ke kino hookahi lakou;

4 Nolaila, ua hiki ole i ka poe powa ke hao mai a e loaa ka ai, ke ole pii mai ma ke kaua akea i ko Nepai poe; a ma ke kino hookahi ko Nepai poe, a ua lehulehu loa, a ua hoahu iho la no lakou iho i ka ai, a me na lio, a me na bipi, a me na pua holoholona o kela ano keia ano, i hiki ia lakou ke ola no na makahiki ehiku, a ma ua manawa nei ua lana ko lakou manao e anai loa aku i ka poe powa, mai ka ili o ka aina. A pela i hala aku ai ka makahiki umikumamawalu.

5 [m 2, p 6] A eia kekahi, ma ka makahiki umikumamaiwa, ike iho la o Gidianahi he mea e pono ai nona e pii mai e kaua mai i ko Nepai poe, no ka mea, aole ha ala no lakou e ola’i, ke ole hao mai, a powa, a pepehi kanaka mai.

6 A aa ole lakou e hoopalahalaha ae ia lakou iho ma ka ili o ka aina, e hiki ia lakou ke hooulu ae i ka hua liihi, o hiki aku ko Nepai poe maluna iho o lakou, a luku aku ia lakou; nolaila, kauoha ae la o Gidianahi i na poe kaua ona, ma ua makahiki nei e pii mai lakou e kaua ku e i ko Nepai poe.

7 [m 2, p 7] A eia kekahi, pii mai la lakou e kaua; a ma ka malama eono ia; a, aia hoi, ua nui a weliweli ka la a lakou i pii mai ai e kaua; a ua kakooia lakou mamuli o ke ano o ka poe powa; a he ili keiki hipa ko lakou a puni o ko lakou mau puhaka, a ua hooluuia lakou i ke koko; a ua amuia na poo o lakou; a he pale-poo ko lakou maluna o lakou; a nui a weliweli no ke ano o na poe kaua o Gidianahi, no ko lakou kahikoia’na, a no ko lakou hooluuia’na i ke koko.

8 A eia kekahi, i ka wa a na poe kaua o ko Nepai poe i ike aku ai i ke ano o ka poe kaua o Gidianahi, ua hina iho la lakou a pau i ka honua, a hookiekie ae la i ko lakou hea ana i ka Haku, i ko lakou Akua, nana e hookoe mai ai ia lakou, a e hoopakele mai ia lakou mailoko mai o na lima o ko lakou poe enemi.

9 A eia kekahi, i ka wa a na poe kaua o Gidianahi i ike mai ai i keia, hoomaka ae la lakou e hooho me ka leo nui, no ko lakou olioli; no ka mea, ua kuhi iho la lakou ua hina iho ko Nepai poe me ka makau, no ka weliweli o ko lakou poe kaua;

10 Aka ma keia mea ua kuhi hewa lakou, no ka mea, aole ko Nepai poe i makau aku ia lakou, aka makau iho la lakou i ko lakou akua, a noi aku la ia ia no ka hoomalu ana; nolaila, i ka wa a no poe kaua o Gidianahi i naholo kiki mai ai maluna o lakou nei, ua makaukau lakou nei e halawai me lakou; he oiaio, ma ka ikaika o ka Haku lakou i halwai ai me lakou la;

11 A hoomaka ae la ke kaua iloko o keia malama eono; a nui a weliweli no ke kaua olaila; he oiaiio, a nui a weliweli ka luku olaila, aole i ike e ia mamua ka luku nui me neia mawaena o ka poe kanaka a pau o Lehi, mai ka wa mai ana i haalele ai ia Ierusalema.

12 A me na olelo hooweliweli a me na hoohiki paa a Gidianahi i hana’i, aia ka, lanakila aku nae ko Nepai poe maluna o lakou, a hee aku la lakou la imua o lakou.

13 [m 2, p 8]A eia kekahi, kena ae la o Gidigidoni i kona poe kaua, e alualu aku ia lakou a hiki aku i na palena o ka waonahele, a na lakou e hookoe ole i kekahi mea e haule ana iloko o ko lakou mau lima ma ke ala; a pela lakou i alualu ai ia lakou la, a luku aku la ia lakou la, a hiki i na palena o ka waonahele, oia, a hiki i ka wa a lakou i hooko ai i ke kauoha a Gidigidoni.

14 A eia kekahi, o Gidianahi, ka mea i ku a kaua me ka makau ole, ua alualuia’ku me ia i hee aku ai; a ua maluhiluhi oia no ka nui o kona kaua ana, a loaa aku la ia a pepehiia a make. A oia no ka hopena o Gidianahi, ka powa.

15 [m 2, p 9] A eia kekahi, hoi hou ae la na poe kaua o ko Nepai i ko lakou wahi maluhia. A eia kekahi, hala aku la ua makahiki umikumamaiwa nei, a aole hele hou mai ka poe powa e kaua; aole hoi lakou e hele hou mai ma ka makahiki iwakalua;

16 A ma ka makahiki iwakaluakumamakahi hoi aole lakou pii mai e kaua, aka pii mai la lakou ma kela aoao keia aoao e pua mai a puni ka poe kanaka o Nepai; no ka mea, manao iho la lakou ina e alalai mai lakou la i ka poe kanaka o Nepai, mai ko lakou mau aina ae, a e hoopuni mai ia lakou ma kela aoao keia aoao, a ina e hooki mai lakou la ia lakou mai ko lakou mau pono owaho, alaila, e hiki ia lakou la ke kena mai ia lakou, e hookuu aku ia lakou iho, e like me ko lakou la makemake.

17 Ano, ua hoonoho ae la lakou i luna hou no lakou iho, a o Zemanariha kona inoa; nolaila, na Zemanariha i hooponopono i ua pua ana nei.

18 Aka hoi, he mea pomaikai keia no ko Nepai poe; no ka mea, he mea hiki ole no ka poe powa e pua loihi loa mai me ka hoopilikia mai i ko Nepai poe, no ka nui o ka lakou ai a lakou i hoahu iho ai,

19 A no ka hapa o ka ai mawaena o ka poe powa; no ka mea hoi, aole o lakou mea o ka io wale no e ai ai, a ma ka waonahele lakou i loaa’i ua io nei.

20 A eia kekahi, e kakaikahi ana na holoholona hihiu ma ka waonahele, a kokoke ka poe powa e make no ka pololi.

21 A e hele mau ana ko Nepai poe mawaho ma ke ao a ma ka po, a e haule ana maluna iho o ko lakou poe kaua, a e ooki aku ana ia lakou ma na tausani a ma na umi o na tausani.

22 A pela i lilo ai i mea makemake no ka poe kanaka o Zemanariha, e haalele i ko lakou manao, no ka luku nui ana i hiki mai ai maluna o lakou ma ka po a ma ke ao.

23 [m 2, p 10] A eia kekahi, kena ae la o Zemanariha i kona poe kanaka, e haalele mai lakou i ka pua ana, a e hele aku iloko o na wahi loihi loa aku o ka aina, ma ka akau.

24 Ano, ua ike o Gidigidoni i ko lakou manao, a e ike ana i ko lakou nawaliwali no ka nele i ka ai ole,a me ka luku nui i hanaia mawaena o lakou, nolaila, hoouna ae la oia i kona poe kaua i ka po, a alalai aku la i ke ala a lakou e hee aku ai, a hoonoho iho la i kona poe kaua ma ke ala a lakou i hee aku ai;

25 A o keia ka lakou nei i hana’i i ka po, a hele aku la ma ko lakou ala ma o aku o ka poe powa, a no ia mea, ma ia la ae, i ka wa a ka poe powa i hoomaka’i i ko lakou hele, ua halawai lakou me na poe kaua o ko Nepai, ma ko lakou alo a ma ko lakou hope no hoi.

26 A o ka poe powa ma ka hema, ua alalaiia no hoi lakou i ko lakou mau wahi e hee aku ai. A ua hanaia’ku keia mau mea a pau e ke kauoha o Gidigidoni.

27 A ua nui na tausani i kuu mai ia lakou iho i poe pio i ko Nepai poe; a ua pepehiia ke koe o lakou a make.

28 A ua hopuia ko lakou luna, o Zemanariha, a liia’ku maluna o kahi laau, he oiaio, ma ka welau ona, a make loa ia. A ia lakou i li aku ai ia ia a make loa ia, kua iho la lakou i ka laau i ka honua, a hea aku la me ka leo nui, i ka i ana,

29 Na ka Haku e hoola mai i kona poe kanaka ma ka pono a ma ka hemolele o ka naau, e hiki ia lakou ke kua aku i ka honua i ka poe a pau e imi ana e luku mai ia lakou no ka mana a me na hui pu malu ana, he oiaio me ua kanaka nei i kuaia i ka honua.

30 A hauoli iho la lakou a hea hou aku la me ka leo hookahi, i ka i ana, Na ke Akua o Aberahama, a me ke Akua o Isaaka, a me ke Akua o Iakoba, e hoomalu mai i keia poe kanaka ma ka pono, i ka wa a pau a lakou e hea aku ai ma ka inoa o ko lakou Akua no ka hoomalu ana.

31 A eia kekahi, hooho aku la lakou a pau, me he mea hookahi la, ma ka memele ana a hoolea ana i ko lakou Akua, no ka mea nui ana i hana mai ai no lakou, i ka hoola ana mai ia lakou mai ka haule ana iloko o na lima o ko lakou poe enemi;

32 He oiaio, hea aku la lakou, Hosana i ke Akua Kiekie Loa; a hea aku la lakou, E hoomaikaiia’ku ka inoa o ka Haku, ke Akua Mana Loa, ke Akua Kiekie Loa.

33 A ua pehu ko lakou mau naau me ka olioli, me ka hu ana iwaho o ka waimaka nui, no ka loko maikai nui o ke Akua i ka hoopakele ana ia lakou mailoko mai o na lima o ko lakou poe enemi; a ua ike lakou no ko lakou mihi a me ko lakou haahaa, lakou i hoopakeleia’i i ka luku mau loa ana.

1 Ano hoi, aole kekahi mea ola mawaena o ka poe kanaka a pau o ko Nepai poe, i kanalua iki i na olelo a ka poe kaula hemolele a pau, ka poe i olelo mai; no ka mea, ike iho la lakou he mea e pono ai e hookoia ia mau mea;

2 A ike iho la lakou he mea pono ua hiki mai o Kristo, no ka nui o na hoailona i haawiia mai ai, e like me na olelo a ka poe kaula hemolele, a no na mea i hiki mai ai keia manawa, ua ike lakou he mea e pono ai e hiki mai auanei na mea a pau e like me ka mea i oleloia’i;

3 Nolaila, haalele aku la lakou i ko lakou mau hewa a pau, a me ko lakou mau mea hoopailua, a me ko lakou mau moe kolohe, a hookauwa aku la na ke Akua me ka ikaika loa, i ke ao a i ka po.

4 [m 2, p 11] Ano, eia kekahi, ia lakou i hoopio aku ai i ka poe powa a pau, i pakele ole ai kekahi mea i pepehi ole ia, hahao iho la lakou i ko lakou poe pio iloko o ka halepaahao, a kena ae la e haiia’ku ka olelo a ke Akua ia lakou; a o ka poe a pau i mihi i ko lakou mau hewa a komo iloko o kekahi berita e pepehi kanaka hou ole aku, ua hookuuia’ku;

5 Aka o ka poe a pau i komo ole ai iloko o kekahi berita, a i hoomau ai i na manao pepehi kanaka malu iloko o ko lakou mau naau; he oiaio, o ka poe a pau i loaa e ha mai ana i na olelo hooweliweli e ku e i ko lakou poe hoahanau, ua hoohewaia a hoopaiia’ku mamuli o ke kanawai.

6 A pela lakou i hoopau ai i kela mau hui pu hewa, malu, a ino ana, iloko o ia mea i hanaia’i ka hewa nui, a me na pepehi kanaka he nui.

7 A pela i hala aku ai ka makhiki iwakaluakumamalua, a me ka iwakaluakumamakolu no hoi, a me ka iwakaluakumamaha, a me ka iwakaluakumamalima; a pela ua hala aku la na makahiki he iwakaluakumamalima,

8 A ua nui na mea i ikea, e manaoia paha he nui a kupaianaha ma na maka o kekahi poe; aole nae i hiki ia mau mea a pau ke palapalaia ma keia buke: he oiaio, aole i hiki i ka hapahaneri o na mea i hanaia’i mawaena o na kanaka he nui loa me neia, no na makahiki he iwakaluakumamalima, ke hookomoia iloko o ua buke nei;

9 Aka hoi, aia no na mooolelo i piha’i me na hana a pau a keia poe kanaka; a ua haawiia mai e Nepai he mooolelo pokole a oiaio nae;

10 Nolaila,ua hana au i ka’u mooolelo o keia mau mea mamuli o ka mooolelo a Nepai, i kahakahaia maluna o na papa i kapaia na papa o Nepai.

11 A, aia hoi, ke kakau nei au i ka mooolelo maluna o na papa a’u i hana’i me ko’u mau lima iho.

12 A, aia hoi, owau nei ua kapaia mai o Moramona, i kapaia mamuli o ka aina o Moramona, o ka aina ia kahi a Alama i kukulu mua ai i ka ekalesia mawaena o na kanaka; he oiaio, o ka ekalesia mua ia i kukuluia mawaena o lakou mahope iho o ko lakou lawehala ana.

13 Aia hoi, he haumana no au na Iesu Kristo, ke Keiki a ke Akua. Ua kaheaia mai au e ia e hai aku i kana olelo mawaena o kona poe kanaka, i hiki ia lakou ke loaa ke ola mau loa.

14 A ua lilo i mea e pono ai na’u, e like me ka makemake o ke Akua, i ko ai na pule a ka poe i hala aku la mai anei aku, ka poe hemolele, e like me ko lakou manaoio, e kakau aku i mooolelo o keia mau mea i hanaia;

15 He oiaio, he mooolelo uuku o na mea i hanaia, mai ka wa mai a Lehi i haalele aku ai ia Ierusalema, a hiki wale mai i keia wa e noho nei;

16 Nolaila, ke hana nei au i ka’u mooolelo, mai na mooolelo mai i haawiia mai ai e ua pe la i noho ai mamua o’u nei, a hiki mai i ka hoomaka ana o kuu la;

17 Alaila ke hana nei au i kekahi mooolelo o na mea a’u i ike ai me kuu mau maka ponoi.

18 A ua ike au o ka mooolelo a’u e hana nei, he mooolelo pololei a oiaio ia; aka hoi, ua nui na mea i hiki ole ia makou mamuli o ka makou olelo, ke kakau iho.

19 [m 2, p 12] Ano, ke hoopau aku nei au i ka’u olelo no’u iho, a ke hoomaka nei e kakau iho i ka’u mooolelo o na mea i hana e ia mamua o’u nei,

20 Owau no o Moramona, a he mamo io na Lehi. He kumu no ko’u e hoomaikai aku ai i kuu Akua a i kuu Mea e Ola’i o Iesu Kristo, no kona lawe ana mai i ko makou poe kupuna mailoko mai o ka aina o Ierusalema, (a ua ike ole kekahi mea ia mea, oia wale no a me ua poe la ana i lawe mai ai mailoko mai o ua aina la,) a no kona haawi ana mai ia’u a me kuu poe kanaka i ka ike nui, i ka hoolaia’na o ko makou mau uhane.

21 He oiaio ua hoopomaikai mai oia i ko ka hale o Iakoba, a ua aloha mai oia i na hua a Iosepa.

22 A i ka malama ana o na mamo a Lehi i kana mau kauoha, ua hoalohaloha mai a hoopomaikai mai no hoi oia ia lakou, e like me kana olelo;

23 He oiaio, a e kai hou oiaio mai auanei oia i kekahi koena o na hua a Iosepa, i ka ike i ka Haku, i ko lakou Akua:

24 A he oiaio me ka Haku e ola nei, nana e hiuluulu mai, mai na kihi eha mai o ka honua, i ke koena a pau o na hua a Iakoba, ka poe i hoopuehuia’ku maluna iho o ka ili o ka honua nei a pau;

25 A me ia i hana berita mai ai me ko ka hale a pau o Iakoba; pela io no e ko auanei, ma kona manawa ku pono, ka berita ana i hana berita mai ai me ko ka hale o Iakoba, i ka hoihoi hou ana mai i ko ka hale a pau o Iakoba i ka ike i ka berita, ana i hana berita mai ai ma lakou;

26 Alailae hoomaopopo lakou i ko lakou Mea Hoolapanai, oia no o Iesu Kristo, ke Keiki a ke Akua; alaila e houluuluia lakou mai na kihi eha mai o ka honua nei, i ko lakou aina iho, mailaila aku lakou i hoopuehuia’ku ai, he oiaio, me ka Haku e ole nei, pela io no auanei. Amene.

1 [mokuna 3, paukū 1] Ano, eia kekahi, hoi aku la ka poe kanaka o Nepai i ko lakou mau aina iho, ma ka makahiki iwakaluakumamaono, o kela kanaka keia kanaka, me kona ohua, me kona mau pua a mau ohana holoholona, me kona mau lio a me kona mau bipi, a me na mea a pau a lakou.

2 A eia kekahi, aole i pau ka lakou ai i ka aiia e lakou; nolaila, lawe pu ae la lakou me lakou i na mea a pau a lakou i hoopau ole ai, i ko lakou hua liilii a pau o kela ano o keia ano, a me ko lakou gula, a me ko lakou kala, a me ko lakou mau mea maikai a pau, a hoi aku la lakou i ko lakou mau aina iho a i ko lakou mau hooilina, ma ka akau a ma ka hema, ma ka aina akua a ma ka aina hema no hoi.

3 A haawi ae la lakou i ua poe powa la, ka poe i komo iloko o kekahi berita e noho maluhia ai, o ka poe hui, ka poe e makemake ana e noho he poe Lamana, i ka aina, e like me ko lakou nui, i loaa’i ia lakou, me ka lakou mau hana, na mea e ola’i; a pela lakou i hookupaa’i i ka maluhia ma ka aina a pau.

4 A hoomaka ae la lakou e pomaikai a e mahuahua nui; a hala ae la na makahiki iwakaluakumamaono a me ka hiku, a ua nui no ka pololei ma ka aina; a ua hana iho la lakou i ko lakou mau kanawai mamuli o ka pololei a me ka pono.

5 Ano, aohe mea ma ka aina a puni e keakea mai ai i na kanaka mai ka pomaikai mau ana mai, ke ole lakou haule iloko o ka hala.

6 Ano, na Gidigidoni, a me ka lunakanawai Lakoneusa, a me kela poe i hoonohoia’i i poe luna, i hookupaa i keia maluhia nui ma ka aina.

7 [m 3, p 2] A eia kekahi, ua nui wale na kulanakauhale i kukulu hou ia, a ua nui wale na kulanakauhale kahiko i hana hou ia;

8 A ua nui na alanui i hoomakaukauia, a me na kuamoo i hanaia, e alakai aku ana ia kulanakauhale aku ia kulanakauhale aku, a ia aina aku ia aina aku, a ia wahi aku ia wahi aku.

9 A pela i hala aku ai ka makahiki umikumamawalu, a he maluhia mau ko na kanaka.

10 Aka eia kekahi, ma ka makahiki iwakaluakumamaiwa, hoomaka ae la kekahi mau hoopaapaa ana mawaena o na kanaka; a ua hookiekieia’e iluna kekahi poe i ka haaheo a me na kaena ana, no ko lakou waiwai nui loa, he oiaio, i ka hoomaau nui ana:

11 No ka mea, ua nui loa na mea kalepa ma ka aina, a me na loio no hoi he nui wale, a me na luna.

12 A hoomaka ae la na kanaka e hookoaia ma na papa, e like ma ko lakou waiwai, a me ko lakou pomaikai ma ka hoonaauaoia’na: he oiaio, ua naaupo kekahi poe no ko lakou ilihune, a loaa iho la i kekahi poe ke ao nui ia’na no ko lakou waiwai;

13 Ua hookiekieia kekahi poe iluna ma ka haaheo, a kekahi poe e ae hoi ua haahaa loa; a hoihoi ae kekahi poe i ke kuamuamu no ke kuamuamu, oiai kekahi poe i loaa’i ke kuamuamu, a me ka hoomaauia’na, a me na ano a pau o ka hoopilikiaia’na, aole hoi e huli ae a kuamuamu hou aku, aka ua haahaa a mihi imua o ke Akua;

14 A pela i loaa ai ka noho like ole nui ana ma ka aina a puni, a hoomaka ae la ka ekalesia e hiolo; he oiaio, a ma ka makahiki kanakolu hiolo ka ekalesia ma ka aina a puni, koe wale no mawaena o kekahi poe he kakaikahi o ko Lamana, he poe i hoohuliia i ka manaoio oiaio; a, aole lakou e haalele mai ia mea, no ka mea, ua onipaa, a hoomau, a naueue ole lakou, e ae ana me ka ikaika a pau e malama i na kauoha a ka Haku.

15 Ano, o ke kumu o keia hewa o na kanaka, eia ia, he mana nui ko Satana, i ka hooeueu ana i na kanaka e hana aku i na ano a pau o ka hewa, a i ka hoohaakei ana ia lakou me ka haaheo, e hoowalewale ana ia lakou e imi i ka mana, a me ka noho luna ana, a me ka waiwai, a me na mea lapuwale o ke ao nei.

16 A pela o Satana i alakai aku ai i na naau o na kanaka, e hana aku i na ano a pau o ka hewa; nolaila, he mau makahiki uuka wale no ka lakou i loaa’i ka maluhia.

17 [m 3, p 3] A pela i ka hoomaka ana o ka makahiki kanakolu, ua hookuuia mai na kanaka no kekahi manwa loihi, e haliia i o a ia nei e na hoowalewale o ka diabolo, kahi ana i makemake ai e hali ia lakou, a e hana i kela hewa keia hewa ana i makemake ai ia lakou; a pela ma ka hoomaka ana o keia ke kanakolu makahiki, e noho ana lakou ma ka hewa weliweli.

18 Ano, aole lakou i hana hewa naaupo, no ka mea, ike iho la lakou i ka makemake o ke Akua no lakou: no ka mea, ua aoia’ku ia mea ia lakou; nolaila, kipi hookuli aku la lakou i ke Akua.

19 Ano, ma na la ia o Lakoneusa, ke keiki a Lakoneusa, no ka mea, pani iho la o Lakoneusa i ka hakahaka o kona makuakane a hoomalu iho la i na kanaka ia makahiki.

20 A hoomaka ae la na kanaka e uluhia’i mai ka lani mai, a hoounaia’ku la e ku ana mawaena o na kanaka ma ka aina a puni, e hai ana a e hoike wiwo ole ana no na hewa a me na hala o na kanaka, a e hoike ana ia lakou no ka hoolapanai ana a ka Haku e hana ai auanei no kona poe kanaka; oia hoi ma kekahi mau olelo e ae, o ke alahouana o Kristo; a hoike wiwo ole aku lakou no kona make a me na popilikia.

21 Ano, ua nui loa ka poe o na kanaka i huhu nui loa, no ua poe la nana i hoike mai ai i keia mau mea; a o ua poe huhu la, he poe lunakanawai nui ka nui o lakou, a me kekahi poe i noho e mamua he poe kahuna nui a me na loio; he oiaio, ua huhu mai la ka poe loio a pau, i kela poe nana i hoike mai i keia mau mea.

22 Ano, aole kekahi loio, aole hoi lunakanawai, aole hoi kahuna nui, i hiki ke loaa ka mana e hoohewa aku i kekahi mea e make, ke ole hoailonaia ko lakou hoohewaia’na e ke kiaaina o ka aina.

23 Ano, ua nui wale na mea o ua poe la nana i hoike aku ai no na mea e pili ana ia Kristo, i hoike wiwo ole aku ai, a ua laweia’ku lakou a pepehi malu ia e na lunakanawai, i hiki ole ka ike i ko lakou make i ke kiaaina la o ka aina, a hiki aku i ka wa mahope aku o ko lakou make.

24 Ano hoi, ua ku e keia i na kanawai o ka aina, i pepehiia kekahi kanaka a make, ke ole loaa ia lakou ka mana mai ke kiaaina o ka aina mai;

25 Nolaila, hiki mai la kekahi hoopii i ka aina o Zarahemela, i ke kiaaina la o ka aina, e ku e ana i ua poe lunakanawai nei, ka poe i hoohewa ae ai i na kaula a ka Haku i ka make, aole mamuli o ke kanawai.

26 [m 3, p 4] Ano, eia kekahi, ua hopuia lakou a kaiia’e imua o ka lunakanawai, e hookolokoloia no ka hewa nui a lakou i hana’i, e like me ke kanawai i haawiia mai ai e na kanaka.

27 Ano, eia kekahi, he nui wale na makamaka a me na hahauna ko ua poe lunakanawai la: a o ke koena, he oiaio, aneane pau loa na loio a me na kahuna nui, houluulu ae la ia lakou iho i kahi hookahi, a hui pu iho la me na hanauna o ua poe lunakanawai la, ka poe e hookolokoloia mamuli o ke kanawai;

28 A komo iho lakou iloko o kekahi berita kekahi me kekahi, he oiaio, iloko o ua berita la i haawiia mai ai e ka poe o ka wa kahiko, a o ua berita la ua haawiia mai a lawelaweia mai e ka diabolo, e hui pu e ku e mai i ka pono a pau;

29 Nolaila, hui pu iho la lakou e ku e mai i ka poe kanaka o ka Haku, a komo iho la iloko o kekahi berita e hoopau mai ia lakou, a e hoopakele ae i ua poe la, ka poe i hana i ka pepehi kanaka, mai ke apo ae o ka hoopai ana, ka mea e kokoke ana e lawelaweia’ku mamuli o ke kanawai.

30 A aa ku e mai la lakou i ke kanawai a me na pono o ko lakou aina; a hana berita lakou, kekahi me kekahi, e pepehi mai i ke kiaaina, a e hoonoho i Alii maluna iho o ka aina, i ku okoa ole ai ka aina ma ia hope iho, aka e noho malalo iho o na’Lii.

1 Aka hoi, na’u i hoike aku ia oukou aole lakou i hoonoho i Alii maluna iho o ka aina; aka ma ua makahiki hookahi nei, he oiaio, ka makahiki kanakolu, hoopau ae la lakou ma ka noho hookolokolo, he oiaio, pepehi ae la i ka Lunakanawai Nui o ka aina a make loa.

2 A ua maheleia na kanaka e ku e ana kehahi i kekahi; a hookaawale ae la lakou kekahi mai kekahi ae, iloko o na ohana, kela kanaka keia kanaka mamuli o kona ohana, a me kona hanauna a poe makamaka; a pela lakou i hoopau ai i ka noho aupuni ana o ka aina.

3 A hoonoho ae la kela ohana keia ohana i alii, a luna maluna iho o lakou;a pela lakou i lilo ai i mau ohana, a me na luna o na ohana.

4 Ano hoi,aole kekahi kanaka mawaena o lakou, ke ole he ohana nui kona a me na mea pili a me na makamaka he nui wale; nolaila, lilo iho la ko lakou mau ohana i nui loa.

5 Ano, ua hanaia keia a pau aole nae he mau kaua mawaena o lakou i keia manawa; a hiki mai la keia hewa a pau maluna iho o na kanaka, no ko lakou hookuu ana ia lakou iho i ka mana o Satana;

6 A ua hoopauia’ku na hooponopono ana o ke aupuni, no ka hui malu pu ana o na makamaka a me na hanauna o ua poe la, ka poe i pepehi mai i ka poe kaula.

7 A ma o lakou la i hiki mai ai kekahi paio nui ma ka aina, a o ka poe pono nui ae o na kanaka, ua kokoke lilo nae lakou a pau i poe hewa; he oiaio, he kakaikahi wale no na kanaka pono mawaena o lakou.

8 [m 3, p 5] A pela aole i hala aku na makahiki eono, mahope mai o ka huli ana’e o ka nui loa o na kanaka mai ko lakou pono ae, e like me ka ilio i kona luai iho, a e like hoi me ka puaa i kona haluku ana iloko o ke kiolepo.

9 Ano, houluulu iho la ua poe hui malu nei, ka poe i lawe mai i ka hewa nui me neia maluna iho o na kanaka, ia lakou iho i kahi hookahi, a hoonoho ae la maluna ae o lakou i kekahi kanaka a lakou i kapa aku ai o Iakoba;

10 A kapa ae la lakou ia ia ko lakou Alii; nolaila, lilo iho la oia i Alii maluna iho o ua poe hui hewa nei; a kekahi mea nui ia nana i hoopuka mai i kona leo e ku e i ka poe kaula, ka poe i hoike mai no Iesu.

11 A eia kekahi, aole o lakou ikaika ma ka helu ana e like me na ohana o na kanaka, ka poe i hui pu ia, na na luna nae o lakou i hana iho i na kanawai, o kela mea keia mea e like me kona ohana; aka hoi he poe kanaka pono ole lakou, he poe enemi nae; aka, ua hui pu ia lakou ma ka inaina aku i ua poe la, ka poe i komo iloko o ka berita e hoopau mai i ka noho aupuni ana;

12 Nolaila, e ike ana o Iakoba ua lehulehu loa ko lakou poe enemi mamua o lakou la, a oia no ke Alii o ua poe hui la, nolaila, kena ae la oia i kona poe kanaka e hee aku lakou iloko o na wahi ma ka akua loa o ka aina, a malaila e kukulu iho i aupuni no lakou iho, a hiki i ka wa e huiia’i lakou me na mea haalele ku e, (no ka mea, ua olelo malimali ae la ia ia lakou e nui ana na mea ku e e haalele ana,) a e lilo lakou i ikaika ku pono e kaua mai me na ohana o na kanaka. A hana iho la lakou pela;

13 A no ka wikiwiki o ko lakou hele ana, ua hiki ole ke keakeaia’ku, a hiki i ka wa a lakou i hele loa ai i loaa ole ai lakou i na kanaka. A pela i pau ai ka makahiki kanakolu: a pela hoi ka noho ana o ka poe kanaka o Nepai.

14 [m 3, p 6] A eia kekahi, ma ka makahiki kanakolukumamakahi, ua maheleia lakou ma na ohana, o kela kanaka keia kanaka mamuli o kona ohana, hanauna a poe makamaka; ua hooholo nae lakou i ka ae like, i ole ai lakou e hele e kaua ku e kekahi me kekahi; aka aole lakou i hui pu ia ma ko lakou mau kanawai, a me ko lakou ano o ka hoomalu ana, no ka mea, ua hoonohia ia mau mea mamauli o na manao o kela poe alii a poe luna o lakou. Aka hoonoho iho la lakou i na kanawai ikaika loa, i ole lawehala aku kekahi ohana i kekahi, a no ia mea, loaa iho la ia lakou ka maluhia ma kekahi mau mea ma ka aina; aka hoi, ua hoohuliia’e la ko lakou mau naau mai ka Haku ko lakou Akua ae, a hailuku mai la lakou i ka poe kaula, a hookuke mai ia lakou nei mawaho mai o lakou ae.

15 [m 3, p 7] A eia kekahi, ua ikea o Nepai e na anela, a e ka leo o ka Haku no hoi, nolaila, ua ike aku la i na anela, a he ike maka no ia, a ua haawiia mai ka mana ia ia i ike oia no ka oihana o Kristo, a he ike maka no hoi, no ko lakou hoi wawe ana mai ka pono aku i ko lakou hewa a mau mea hoopailua;

16 Nolaila, i hoehaia no ka paakiki o ko lakou mau naau, a me ka pouli o ko lakou hoomaopopo ana, hele aku la ia mawaena o lakou ma ua makahiki nei, a hoomaka ae la e hoika wiwo ole aku, i ka mihi a me ka kalaia’na o no hala ma o ka manaoio la ma ka Haku o Iesu Kristo.

17 A lawelawe aku la oia i na mea he nui ia lakou; a ua hiki ole ka kanuia ia mau mea a pau loa, a, o kekahi hapa o ia mau mea aole e lawa pono; nolaila, aole palapalaia ia mau mea ma keia buke. A lawelawe aku la o Nepai me ka ikaika a me ka mana nui.

18 [m 3, p 8] A eia kekahi, huhu mai la lakou ia ia, no ka mea, he mana nui loa ae kona mamua o ko lakou, no ka mea, he mea hiki ole ia ia lakou ke hoomaloka mai i kana mau olelo, no ka mea, no ka nui o kona manaoio ma ka Haku o Iesu Kristo, lawelawe mai la na anela ia ia i kela la i kea la:

19 A ma ka inoa o Kristo oia i mahiki aku ai i na daimonio a me na uhane haukae; a hoala ae la no ia i kona kaikaina mai ka make mai, mahope iho o kona hailukuia’na, a pepehiia’na a make loa e na kanaka;

20 A ike mai la na kanaka ia mea, a hoike aku la no ia mea, a ua huhu mai ia ia no kona mana; a hana aku la no hoi oia i na hana mana e ae he nui wale, ma ke alo o na kanaka, ma ka inoa o Iesu.

21 [m 3, p 9] A eia kekahi, hala aku la ka makahiki kanakolukumamakahi, a ua uuku wale no ka poe i hoohuliia mai i ka Haku; aka o ka poe a pau i hoohuliia, hoike oiaio ae la lakou i na kanaka, ua hoolaunaia lakou e ka mana a me ka Uhane o ke Akua, iloko o Iesu Kristo, ia ia lakou i manaoio aku ai.

22 A o ka poe a pau nona na daimonio i mahikiia’ku ai mai o lakou aku la, a i hoolaia’ku i ko lakou mai a me ko lakou nawaliwali, hoike oiaio aku la lakou i na kanaka, ua hanaia mai lakou e ka Uhane o ke Akua, a ua hoolaia; a hoike aku la lakou i na hoailona no hoi, a hana aku la i kekahi mau hana mana mawaena o na kanaka.

23 [m 3, p 10] Pela i hala aku ai ka makahiki kanakolukumamalua no hoi. A hea aku la o Nepai i na kanaka ma ka hoomaka ana o ka makahiki kanakolukumamakolu; a hai aku la oia ia lakou i ka mihi a me ke kalaia’na o na hala.

24 Ano, ke makemake nei au ia oukou e hoomanao hoi, aohe kekahi mea i kaiia’e i ka mihi, i bapetzo ole ia me ka wai;

25 Nolaila, ua hooliloia’ku kekahi poe kanaka e Nepai, i keia oihana, i bapetizoia’ku me ka wai ka poe a pau e hele mai io lakou la, a o keia me he mea hoike la a mea hooiaio imua o ke Akua, a i na kanaka, ua mihi iho la lakou a loaa iho la ke kalaia’na o ko lakou mau hala.

26 A ua nui na mea ma ka hoomaka ana o ua makahiki nei, i bapetizoia i ka mihi; a pela i hala aku ai ka hapa nui o ka makahiki.

1 [mokuna 4, paukū 1] Ano, eia kekahi, e like me ko makou mooolelo, a ua ike makou ua oiaio ko makou mooolelo, no ka mea hoi, na kekahi kanaka pono i kakau iho i ka mooolelo; no ka mea, hana io aku la oia i na hana mana he nui wale ma ka inoa o Iesu; a aole kekahi kanaka i hiki ke hana aku i kekahi hana mana ma ka inoa o Iesu, ke ole oia hoomaemaeia a pau loa mai kona hewa aku.

2 Ano, eia kekahi, ina aole helu hewa ia e ua kanaka nei ma ka helu ana i ko makou manawa, ua hala aku la ka makahiki kanakolukumamakolu,

3 A hoomaka ae la na kanaka e nana aku me ka ikaika nui no ka hoailona i haawiia mai ai e ke kaula Samuela, ka Lamana; he oiaio, no ka manawa e hiki mai ai ka poeleele no na la ekolu maluna iho o ka ili o ka aina.

4 A hoomaka ae la na kanalua nui ana, a me na hoopaapaa ana mawaena o na kanaka, me na hoailona nae he nui wale i haawiia mai.

5 [m 4, p 2] A eia kekahi, ma ka makahiki kanakolukumamaha, ma ka malama mua, ma ka la eha o ia malama, ea mai la kekahi makani ino loa; aole i ike e ia mamua kekahi me ia ma ka aina a puni;

6 A he manawa ino a weliweli no hoi; a he hekili weliweli, a hoohaalulu iho la ia mea i ka honua a puni, me he mea la ua kokoke ia e kaawale ae mawaena;

7 A ua nui loa na uila ikaika, i ike e ole ia mamua kona like ma ka aina a puni.

9 A poho iho la ke kulanakauhale o Moroni iloko o na hohonu o ke kai, a ua make i ke kai na kamaaina ona;

10 A ua kaikaiia’ku ka honua maluna iho o ke kulanakauhale o Moroniha, a ma kahi o ia kulanakauhale, lilo ae la i mauna nui;

12 Aka hoi, ua nui loa aku ka luku nui a me ka weliweli ma ka aina akau: no ka mea, aia hoi, ua hoano e ia ka ili a pau o ka aina, no ka makani ino, a me na puahiohio, a me ka hekili ana, a me ka uila ana, a me ka haalulu nui loa ana o ka honua;

13 A ua wawahiia na alalou, a o na alanui laumania ua hoopauia ka maikai, a ua nui na wahi mania i lilo i apuupuu,

14 A ua nui na kulanakauhale nui a kaulana i poho iho, a ua nui hoi i pau i ke ahi, a ua nui hoi i hoohaaluluia a hiolo iho la na hale olaila i ka honua, a pepehiia’ku kolaila poe a make loa, a waiho neoneo ia na wahi;

15 A ua koe no kekahi mau kulanakauhale, aka ua nui loa ka poino olaila, a ua nui ka poe iloko o ia mau wahi i pepehiia;

16 A o kekahi poe ua kaikaiia’ku ma ka puahiohio; a o kahi o lakou i hele aku ai, aole kekahi kanaka i ike, eia wale no ka lakou i ike ua kaikaiia’ku lakou la;

17 A pela i lilo ai ka ili o ka honua a pau i ino, no na makani ino, a me ka hekili ana, a me ka uila ana, a me ka haalulu ana o ka honua.

18 A, aia hoi, ua nahaha na pohaku iwaena konu; a ua naha ia mau mea maluna iho o ka ili o ka honua a pau, a ua loaa ia mau mea ma na apana nahaha, a ma na nakaka, a ma na mawae, maluna iho o ka ili a pau o ka aina.

19 [m 4, p 3] A eia kekahi, i ka wa i oki ai na hekili, a me na uila, a me ka makani ikaika, a me ka ino, a me na haalulu ana o ka honua—no ka mea hoi, hoomau no ia mau mea ekolu hora paha; a ua iia’e e kekahi poe ua loihi aku ka manawa; aka, ua hanaia nae ua mau mea nui a weliweli nei iloko o na hora ekolu paha; alaila hoi, he pouli maluna iho o ka ili o ka aina.

20 [m 4, p 4] A eia kekahi, he pouli manoanoa maluna iho o ka ili a pau o ka aina, i hiki ai i kolaila, ka poe i haule ole iho ai, ke haha aku i ka mahu o ka pouli;

21 A, ua hiki ole ke hoomalamalama, no ka pouli, aole hoi kukui, aole hoi lamaku; aole hoi i hiki ke hoaia’ku ke ahi me ko lakou puapua wahie a maloo loa, i hiki ole ke loaa kahi malamalama iki;

22 A ua ike ole ia aku kekahi malamalama, aole hoi ahi, aole hoi olinolino iki, aole ka la, aole hoi ka mahina, aole hoi na hoku, no ka mea, pela ka nui o na ohu o ka pouli maluna iho o ka ili o ka aina.

23 [m 4, p 5] A eia kekahi, hoomau iho la ia no na la ekolu, i ike ole ia aku kekahi malamalama; a ua nui no ka pihe ana, a me ka aoa ana, a me ka uwe mau ana mawaena o na kanaka a pau; he oiaio, nui no na uhu ana o na kanaka, no ka pouli a me ka luku nui i hiki mai ai maluna iho o lakou.

24 A ma kekahi wahi ua lohea lakou e hea ana, me ka i ae, E! ina ua mihi kakou mamua o keia la nui a weliweli, alaila, ina ua hookoeia mai ko kakou poe hoahanau, a aole lakou i puhia iloko o kela kulanakauhale nui, o Zarahemela.

25 A ma kekahi wahi e aku ua lohea lakou e hea aku ana a e uwe ana, i ka i ana, Ina ua mihi kakou mamua o keia la nui a weliweli, a ina aole hoi i pepehi a hailuku aku i ka poe kaula, a hookuke aku ia lakou iwaho: alaila, ina ua hookoeia mai la ko kakou poe makuwahine, a me ka kakou poe kaikamahine maikai, a me ka kakou poe keiki, aole i kanuia iloko o kela kulanakauhale nui, o Moroniha; a pela ua nui a weliweli na aoa ana o na kanaka.

1 [mokuna 4, paukū 6] A eia kekahi, ua loheia kekahi leo mawaena o ko ka honua a pau maluna iho o ka ili o keia aina, e hea ana,

2 Auwe, auwe, auwe keia poe kanaka; auwe ko ka honua a pau, ke ole lakou e mihi, no ka mea, ke akaaka la ka diabolo, a ke hauoli la kona poe anela, no ka poe i pepehiia o na keikikane a me na kaikamahine maikai a ko’u poe kanaka; a no ko lakou hewa a mau mea hoopailua i haule ai lakou.

3 Aia hoi, ua puhi au i kela kulanakauhale nui, o Zarahemela me ke ahi, a me kolaila poe.

4 A, aia hoi, na’u i hoopoho iho i kela kulanakauhale nui, o Moroni, iloko o na hohonu o ke kai, a me kolaila poe e make i ke kai.

5 A, aia hoi, ua uhi aku la au i kela kulanakauhale nui, o Moroniha, me ka lepo, a me kolaila poe, e huna iho i ko lakou mau hewa a me ko lakou mea hoopailua mai ko’u maka aku i hele hou ole mai ai ke koko o ka poe kaula a me ka poe hoano, ma neia hope aku, io’u nei e ku e ia lakou.

6 A na’u i hoopoho iho la i ke kulanakauhale o Gilegala, a me kolaila poe, e kanuia iho iloko o ka hohonu o ka honua:

7 He oiaio, a me ke kulanakauhale Oniha, a me kolaila poe, a me ke kulanakauhale o Mokuma, a me kolaila poe, a me ke kulanakauhale o Ierusalema, a me kolaila poe, a na’u i kena aku i na wai e pii mai ma na hakahaka o ia mau wahi, e huna iho i ko lakou hewa a mau mea hoopailua mai ko’u maka aku, i pii hou ole mai ai ke koko o ka poe kaula a me ka poe hoano, ma neia hope aku, io’u nei e ku e ia lakou.

8 A, aia hoi, o ke kulanakauhale o Gadianadi, a me ke kulanakauhale o Gadiomana, a me ke kulanakauhale o Iakoba, a me ke kulanakauhale Gimagimano, na’u ua mau wahi nei i hoopoho iho, a hana aku la i na puu a me na awawa ma na hakahaka o ia mau wahi, a ua kanu iho i kolaila poe iloko o na hohonu o ka honua, e huna iho i ko lakou hewa a mau mea hoopailua mai ko’u maka aku, i pii hou ole mai ai ke koko o ka poe kaula a me ka poe hoano, ma neia hope aku, io’u nei e ku e ia lakou.

9 [m 4, p 7] A, aia hoi, o kela kulanakauhale nui, o Iakobugata, i nohoia’i e na kanaka o ke Alii, o Iakoba, na’u ia i puhi aku i ke ahi, no ko lakou mau hewa a me ka lakou hana ino, e kela ana ia i ka hewa a pau o ka honua a puni, no ko lakou pepehi kanaka malu ana a hui malu pu ana; no ka mea, o lakou no ka i hoopau aku i ka maluhea o ko’u poe kanaka, a me ka noho aupuni ana o ka aina: nolaila, kena ae la au i puhiia’ku lakou, e luku aku ia lakou mai ko’u maka aku, i pii hou ole mai ai ke koko o ka poe kaula a me ka poe hoano, ma neia hope aku, io’u nei e ku e ia lakou.

10 A, aia hoi, o ke kulanakauhale o Lamana, a me ke kulanakauhale o Iosa, a me ke kulanakauhale o Gada, a me ke kulanakauhale o Kisakumena, na’u i kena i puhiia’ku ia mau wahi i ke ahi, a me kolaila poe, no ko lakou hewa ma ka hookuke ana aku i ka poe kaula iwaho, a hailuku ana i ua poe la, a’u i hoouna aku ai e hai ia lakou no ko lakou hewa, a me ko lakou mau mea hoopailua;

11 A no ko lakou hookuku ana aku ia lakou nei a pau iwaho, i ole ai kekahi mea pono iwaena o lakou, hoouna iho la au i ke ahi ilalo a luku aku la ia lakou, i hunaia’ku ai ko lakou hewa a mau mea hoopailua mai ko’u maka aku, i hea ole mai ai io’u nei ke koko o ka poe kaula a me ka poe hoano a’u i hoouna aku ai mawaena o lakou, mai ka lepo mai e ku e ia lakou;

12 A nui wale na luku nui a’u i kena ai e hiki aku maluna iho o keia aina, a maluna o keia poe kanaka, no ko lakou hewa a me ko lakou mau mea hoopailua.

13 [m 4, p 8] E ka poe a pau i hookoeia, no ka oi aku o ko oukou pono mamua o ko lakou, aole anei oukou e hoi hou mai ia’u ano, a e mihi i ko oukou mau hewa, a e hoohuliia’e, i hiki ia’u ke hoola ia oukou?

14 Oiaio, he oiaio ka’u e olelo aku nei ia oukou, ina e hele mai oukou io’u nei, e loaa auanei ia oukou ke ola mau loa. Aia hoi, ua kikooia aku kuu lima aloha ia oukou, a o ka mea e hele mai, na’u ia e hookipa; a pomaikai ka poe i hele mai io’u nei.

15 Aia hoi, owau no o Iesu Kristo, ke Keiki a ke Akua. Na’u i hana i na lani a me ka honua, a me ko lakou mau mea a pau e piha’i. Owau pu me ka Makua mai kinohi mai. Owau no maloko o ka Makua, a o ka Makua maloko o’u: a iloko o’u i hoonani ai ka Makua i kona inoa.

16 Hele ae la au i ko’u poe ponoi, a hookipa ole mai ko’u poe ponoi ia’u. A ua ko iho la na palapala hemolele, no ko’u hiki ana mai.

17 A o ka poe a pau i hookipa mai ia’u, ia lakou wau i haawi aku ai e lilo i poe keiki na ke Akua; a pela no hoi au i ka poe a pau e manaoio mai ma ko’u inoa, no ka mea hoi, ma o’u nei i hiki mai ai ka hoolapanai, a iloko o’u nei i ko ai ke kanawai o Mose.

18 Owau no ka malamalama a me ke ola o ke ao nei. Owau no o Alapa a Omega, ka mua a me ka hope.

19 A mai mohai hou mai ia’u ma neia hope aku i ka hookahe ana i ke koko; he oiaio, e hoopauia’ku ko oukou mau mohai a me ko oukou mau alana kuni, no ka mea, aole au e hookipa mai i kekahi o ko oukou mau mohai a me ko oukou mau alana kuni;

20 A na oukou e haawi mai i mohai ia’u, i ka naau pepe a i ka uhane mihi. A o ka mea e hele mai io’u nei me ka naau pepe a me ka uhane mihi, ia ia wau e bapetizo aku ai me ke ahi e me ka Uhane Hemolele, oia, e like me ko Lamana poe, no ko lakou manaoio mai ia’u, i ka wa o ko lakou hoohuliia’na, i bapetizoia’ku ai me ke ahi a me ka Uhane Hemolele, a ua ike ole lakou ia mea.

21 Aia hoi, ua hele mai au i ko ke ao nei e lawe mai i ka hoolapanai ana i ko ke ao nei, e hoola aku i ko ke ao nei mai ka hewa ae:

22 Nolaila, o ka mea e mihi a e hele mai io’u nei me he keiki uuku la, ia ia wau e hookipa ai: no ka mea, o ka poe me neia ke aupuni o ke Akua. Aia hoi, no ka poe me neia wau i waiho aku ai i kuu ola, a ua lawe hou ae ia mea; nolaila ea, e mihi, a e hele mai io’u nei, e ko na welau o ka honua, a e hoolaia’ku.

1 [mokuna 4, paukū 9] Ano hoi, eia kekahi, lohe ae la na kanaka a pau o ka aina i keia mau olelo; a hoike ae la no ia mea. A mahope mai o keia mau olelo ua hamau ko ka aina no na hora he nui wale;

2 No ka mea, no ka nui o ka pihoihoi o na kanaka, hooki iho la lakou i ka pihe ana a me ka aoa ana no ka make o ko lakou poe hanauna i lukuia; nolaila, ua hamau ko ka aina a puni no na hora he nui.

3 [m 4, p 10] A eia kekahi, pae hou mai la kekahi leo i na kanaka, a lohe ae la na kanaka a pau, a hoike ae la no ia mea, i ka i ana,

4 O oukou, e ka poe kanaka o keia mau kulanakauhale i hiolo, he poe mamo hoi na Iakoba; he oiaio, he poe no ko ka hale o Iseraela, nani na manawa a’u i houluulu ai ia oukou, e like me ka houluulu ana a ka moa i kana ohana keiki malalo iho o kona mau eheu, a ua hanai aku ia oukou.

5 A, eia hou, nani na manawa a’u i makemake ai e houluulu mai ia oukou, e like me ka houluulu ana a ka moa i kana ohana keiki malalo iho o kona mau eheu; he oiaio, o oukou, e ka poe kanaka o ka hale o Iseraela, ka poe i haule; he oiaio, o oukou, e ka poe kanaka o ka hale o Iseraela, ka poe e noho la ma Ierusalema, me he mea la ua haule oukou: he oiaio, nani na manawa a’u i makemake ai e houluulu ia oukou, e like me ka houluulu ana a ka moa i kana ohana keiki, aole nae oukou i makemake mai.

6 E ko ka hale o Iseraela e, ka poe a’u i hookoe aku ai, nani na manawa a’u e houluulu aku ai ia oukou, e like me ka houluulu ana a ka moa i kana ohana keiki malalo iho o kona mau eheu, ina e mihi oukou a e hoi mai ia’u me ka manao paa o ka naau.

7 Aka i ole, e ko ka hale o Iseraela e, e lilo na wahi a oukou i noho ai i neoneo, a hiki aku i ka wa o ka hookoia’na o ka berita i ko oukou poe kupuna.

8 [m 4, p 11] Ano, eia kekahi, mahope iho o ka lohe ana o na kanaka i keia mau olelo, aia hoi, hoomaka ae la lakou e uwe a aoa hou aku, no ka make o ko lakou poe hanauna a me na makamaka.

9 A eia kekahi, pela i hala aku ai na la ekolu. A ma ke kakahiaka ia, a puehu aku la ka pouli mai ka ili aku o ka aina, a oki iho la ka haalulu o ka honua, a oki iho la ka nahaha o na pohaku, a me na uhu weliweli ana, a hala aku la na wawa ino a pau,

10 A pili pu hou ae la ka honua, i ku ia; oki iho la ka pihe ana, a me ka uwe ana, a me ke kupinai ana o ka poe kanaka i hoolaia; a lilo iho la ko lakou uwe ana i olioli, a me ko lakou pihe ana i hiilani ana a i hoalohaloha ana i ka Haku ia Iesu Kristo, ko lakou Mea e Ola’i.

12 A o ka poe o na kanaka i oi aku ka pono, oia ka poe i hoolaia, a o lakou no ka poe i hookipa i na kaula, a hailuku ole ia lakou; a o lakou ka poe i hookahe ole i ke koko o ka poe hoano, oia ka poe i hookoeia;

13 A ua hookoeia lakou, aole i hoopohoia iho a kanuia iho iloko o ka honua; a aole lakou i make i na hohonu o ke kai; a aole hoi lakou i wela i ke ahi, aole hoi i haule kekahi mea maluna iho o lakou a pepe a make; a aole lakou i kaikaiia’ku iloko o ka puahiohio: aole hoi lakou i lanakilaia e ka mahu o ka uahi a o ka pouli.

14 Ano, o ka mea heluhelu, e hoomaopopo mai oia; o ka mea nona na palapala hemolele, e huli iho oia ia mau mea, a nana a ike ina o keia mau make a luku ana a pau ma ke ahi, a ma ka uahi, a ma na makani ino, a ma na puahiohio, a ma ka hamama ana o ka honua i loaa lakou, a me keia mau mea a pau, i ka hooko ana i na wanana a kekahi poe he nui o ka poe kaula.

15 Aia hoi, ke i aku nei au ia oukou, he oiaio, ua nui ka poe i hoike mai no ua mau mea nei ma ka hiki ana mai o Kristo, a ua pepehiia’e a make no ko lakou hoike ana aku no ua mau mea nei;

16 He oiaio, hoike mai la ke kaula Zenosa no ua mau mea nei, a o Zenoka hoi ka i olelo mai no ua mau mea nei, no ka mea, hoike nui mai la laua no makou, ka poe i koe o ka lakou poe hua.

17 Aia hoi, hoike mai la no hoi ko makou kupuna kane o Iakoba no kekahi koena o ka poe hua a Iosepa. A, aia hoi, aole anei makou he koena o ka poe hua a Iosepa? A o keia mau mea i hoike mai ai no makou, aole anei ia mau mea i kakauia maluna iho o na papa keleawe a ko makou kupuna kane Lehi i lawe mai ai mailoko mai o Ierusalema?

18 A eia kekahi, ma ka pau ana o ka makahiki kanakolukumamaha, aia hoi, na’u e hoike aku ia oukou, o ka poe kanaka o Nepai i hookoeia mai, a me ka poe no hoi a pau i kapa e ia mamua o ko Lamana, ka poe i hookoeia mai, ua loaa mai ia lakou na mea lokomaikai nui i hoikeia mai ai ia lakou, a me na mea pomaikai nui i nininiia mai maluna iho o ko lakou mau poo, a i ka wa kokoke mai mahope mai o ka pii ana o Kristo iloko o ka lani, hoike oiaio mai la oia ia ia iho ia lakou;

19 E hoike mai ana i kona kino ia lakou, a e lawelawe mai ana ia lakou; a e haawiia’ku auanei he mooolelo o kana hana ana. Nolaila, no keia wa ke hoopau aku nei au i ka’u mau olelo.

Ka hoike ana o Iesu Kristo ia ia iho i ka poe kanaka o Nepai, i ka wa a na kanaka i akoakoa ai ma kahi hookahi ma ka aina Momona, a lawelawe mai la ia lakou; a ma keia ano oia i hoike aku ai ia lakou.

1 [mokuna 5, paukū 1] Ano, eia kekahi, ua akoakoa na kanaka he lehulehu ma kahi hookahi, o ka poe kanaka o Nepai, a puni o ka luakini ma ka aina o Momona; a e haohao ana a e kahaha ana kekahi me kekahi, a e hoike ana kekahi i kekahi i ka hoololi kupanaha nui ana i hiki mai ai;

2 A e kamailio ana no hoi lakou no keia Iesu Kristo, nona ka hoailona i haawiia mai no kona make.

3 [m 5, p 2] A eia kekahi, oiai lakou e kamailio ana pela kekahi me kekahi, lohe ae la lakou i kekahi leo, me he mea la pae mai la ia mailoko mai o ka lani; a alawa ae la lakou i ko lakou mau maka i o a ia nei, no ka mea, hoomaopopo ole lakou i ka leo a lakou i lohe ai; a, aole ia he leo kalakala, aole hoi he leo nui aka hoi, he leo uuku ia, hou mai la nae ia i ka poe i lohe, iwaena konu, a, aole kekahi wahi o ko lakou kino i hoohaalulu ole ia e ia; he oiaio, hou mai la ia ia lakou iloko loa, a hoowela mai la i na naau o lakou.

5 A lohe hou aku la lakou i ke kolu o ka manawa i ka leo, a hoohakahaka aku la i ko lakou mau pepeiao e lohe ia mea; a malaila na maka o lakou i kahi o ke kupinai; a haka pono aku la i ka lani, kahi a ka leo i pae mai ai:

6 A, aia hoi, i ke kolu o ka manawa hoomaopopo aku la lakou i ka leo a lakou i lohe ai; a i mai la ia ia lakou,

7 E nana mai, i ka’u Keiki punahele, iloko ono a’u i olioli lao ai, iloko one a’u i hoonani ai i ko’u inoa, e hoolohe oukou ia ia.

8 [m 5, p 3] A eia kekahi, me lakou i hoomaopopo ai, leha hou ae la lakou i ko lakou mau maka i ka lani: a, aia hoi, ike aku la lakou i kekahi kanaka e iho mai ana mailoko mai o ka lani; a ua hoaahuia oia i ka aahu keokeo, iho iho la ia a ku iho la mawaena konu o lakou, a alawa ae la na maka o na kanaka a pau ia ia, a aa ole lakou e oaka ae i na waha o lakou, aole hoi kekahi i kekahi, a ike ole iho la i ke ano o ia mea, no ka mea, manao iho la lakou he anela ia i ikea e lakou.

9 [m 5, p 4] A eia kekahi, hohola mai la ia i kona lima, a olelo mai la i na kanaka, i ka i ana:

10 Aia hoi, owau no o Iesu Kristo, ka mea a ka poe kaula i hoike aku ai e hele mai iloko o ke ao nei;

11 A, aia hoi, owau no ka malamalama a me ke ola o ke ao nei; a ua inu iho la au noloko o kela apu awaawa a ka Makua i haawi mai ai ia’u, a ua hoonani aku i ka Makua ma ka lawe ana maluna iho o’u i na hala o ko ke ao nei, a ma ia mea wau i ae aku ai i ka makemake o ka Makua ma na mea a pau, mai kinohi mai.

12 [m 5, p 5] A eia kekahi, ia Iesu i olelo mai ai i ua mau olelo nei, hina iho la ka poe kanaka a pau i ka honua, no ka mea, hoomanao iho la lakou ua wananaia mawaena o lakou, e hoike ana o Kristo ia ia iho ia lakou, mahope iho o kona pii ana i ka lani.

14 E ala, a e hele mai io’u nei, e hiki ia oukou ke hou mai i ko oukou mau lima iloko o ko’u aoao, a e hiki no hoi ia oukou ke haha mai i na wahi o na kui ma ko’u mau lima, a ma ko’u mau wawae, i ike oukou owau no ke Akua o ka Iseraela, a o ke Akua o ko ka honua a pau, a ua pepehiia mai a make no na hala o ko ke ao nei.

15 [m 5, p 7] A eia kekahi, hele aku la na kanaka, a hou aku la i ko lakou mau lima iloko o kona aoao, a haha aku la i na wahi o na kui ma kona mau lima, a ma kona mau wawae; a o keia ka lakou i hana’i, e hele pakahi ana, a hiki i ka wa a lakou a pau i hele aku ai, a ike aku la me ko lakou mau maka iho, a haha aku la me ko lakou mau lima, a ike oiaio iho la, a hoike aku la, oia no ia, ka mea i palapalaia mai e ka poe kaula e hele mai ana.

16 A ia lakou a pau i hele aku ai a ike aku la no lakou iho, hea ae la lakou me ka lokahi o ka manao, i ka i ana,

17 Hosana! E hoomaikaiia’ku ka inoa o ke Akua Kiekie Loa! A hina iho la lakou ma na wawae o Iesu, a hoomana aku la ia ia.

18 [m 5, p 8] A eia kekahi, olelo mai la oia ia Nepai, (no ka mea, aia no o Nepai mawaena o na kanaka,) a kauoha mai la oia ia ia e hele ae.

19 A ala ae la o Nepai a hele aku la, a kulou iho la oia imua o ka Haku, a honi aku la i kona mau wawae.

20 A kauoha mai la ka Haku ia ia, e ala’e oia. A ala ae la ia a ku iho la imua ona.

21 A i mai la ka Haku ia ia, Ke haawi aku nei au ia oe i ka mana nau e bapetizo aku i keia poe kanaka, i ka wa a’u e pii hou ai i ka lani.

22 A hea hou mai la ka Haku i na mea e ae, a i mai la pela no hoi ia lakou; a haawi mai la oia ia lakou i ka mana e bapetizo aku. A i mai la oia ia lakou, ma keia ano oukou e bapetizo aku ai; aole hoi na hoopaapaa mawaena o oukou.

23 He oiaio ka’u e olelo aku nei ia oukou, o ka mea e mihi ana i kona mau hewa ma o ka oukou mau olelo la, a makemake mai e bapetizoia ma kuu inoa, ma keia ano oukou e bapetizo aku ai ia lakou, aia hoi, e iho ilalo no oukou a e ku iloko o ka wai, a ma kuu inoa oukou e bapetizo aku ai ia lakou.

24 Ano hoi, eia na olelo a oukou e olelo aku ai, e hea ana ia lakou ma ka inoa, i ka i ana:

25 Ua loaa ia’u ka mana i haawiia mai e Iesu Kristo, ke bapetizo aku nei au ia oe iloko o ka inoa o ka Makua, a o ke Keiki, a o ka Uhane Hemolele. Amene.

26 Alaila e hookomo iho oukou ia lakou iloko o ka wai, a e puka hou mai mailoko mai o ka wai.

27 A mamuli o keia ano oukou e bapetizo aku ai ma ko’u inoa, no ka mea hoi, he oiaio ka’u e olelo nei ia oukou, o ka Makua, a me ke Keiki, a me ka Uhane Hemolele, hookahi no lakou; a owau no iloko o ka Makua, a o ka Makua iloko o’u, ao ka Makua me a’u nei ua hookahi maua.

28 A e like me ka’u i kauoha aku ai ia oukou, pela oukou e bapetizo aku ai. A aole hoi na hoopaapaa mawaena o oukou, me ia mamua aku nei; aole hoi hoopaapaa ana mawaena o oukou no na mea nui o ko’u ao ana, me ia mamua aku nei;

29 No ka mea, oiaio, he oiaio ka’u e olelo aku nei ia oukou, o ka mea nona ka uhane paio aole no’u nei ia, aka no ka diabolo, oia no ka makua o ka paio, a ke hooeueu la oia i na naau o na kanaka e paio me ka huhu, kekahi me kekahi.

30 Aia hoi, aole keia ko’u ao ana, e hooeueu aku i na naau o na keiki a kanaka me ka huhu, kehahi e ku e i kekahi; aka eia ko’u ao ana, e hoopauia’ku na mea e like me ia.

31 Aia hoi, oiaio, he oiaio ka’u e olelo aku nei ia oukou, na’u e hai aku ia oukou i kuu ao ana.

32 A eia kuu ao ana, a o ke ao ana ia a ka Makua i haawi mai ai ia’u; a ke hoike aku nei au no ka Makua, a ke hoike mai la ka Makua no’u, a ke hoike mai nei ka Uhane Hemolele no ka Makua a me au, a ke hoike aku nei au e kauoha ana ka Makua i na kanaka a pau, me kela wahi keia wahi, e mihi a e manaoio mai ia’u;

33 A o ka mea i manaoio mai ia’u, a i bapetizoia’ku, e hoolaia auanei oia; a o lakou no ka poe e loaa’i ke aupuni o ke Akua.

34 A o ka mea i manaoio ole mai ia’u, a i bapetizo ole ia’ku, e hoohewaia auanei oia.

35 Oiaio, he oiaio ka’u e olelo aku nei au ia oukou, o keia no ko’u ao ana; a ke hoike aku nei au no ia mea mai ka Makua mai; a o ka mea e manaoio ana ia’u, e manaoio ana oia i ka Makua no hoi; a e hoike aku no ka Makua ia ia no’u; no ka mea, e hoalauna oia ia ia me ke ahi a me ka Uhane Hemolele;

36 A pela ka Makua e hoike aku ai no’u; a e hoike aku no ka Uhane Hemolele ia ia no ka Makua a me au; no ka mea, o ka Makua, a me au nei, a me ka Uhane Hemolele, hookahi makou.

37 [m 5, p 9] A ke i hou aku nei au ia oukou, e mihi oukou e pono ai, a e lilo me he keiki uuku la, a e bapetizoia’ku ma ko’u inoa, a i ole ia, aole loa e hiki ia oukou ke loaa keia mau mea.

38 A ke i hou aku nei au ia oukou e mihi oukou e pono ai, a e bapetizoia’ku ma ko’u inoa, a e lilo me he keiki uuku la, a i ole ia, aole loa e hiki ia oukou ke loaa ke aupuni o ke Akua.

39 Oiaio he oiaio ka’u e olelo aku nei ia oukou, o keia no ko’u ao ana; a o ka mea e kukulu ana maluna o keia mea, e kukulu ana oia maluna iho o ko’u pohaku; a e lanakila ole na ipuka o ka po maluna o lakou.

40 A o ka mea nana e hai aku i ka mea i oi aku, a i ole, i ka mea i emi aku i keia, a hookupaa aku ia mea no ko’u ao ana, no ka ino mai ia, a ua kukulu ole ia maluna iho o ko’u pohaku, aka e kukulu ana oia maluna iho o ke kahua one, a e hamama ana na ipuka o ka po e loaa ka poe me ia, i ka wa e hiki mai ka wai, a e nou mai ka makani maluna iho o lakou.

41 Nolaila, e hele aku i keia poe kanaka, a e hai aku i na olelo a’u i olelo aku ai, i ko na welau o ka honua.

1 A eia kekahi, ia Iesu i olelo mai ai i ua mau olelo nei ia Nepai, a i ka poe i heaia, (ano, he umikumamalua ka nui o ka poe i heaia, a i loaa ka mana a me ka oihana e bapetizo,) a, aia hoi, hohola mai la oia i kona lima i na kanaka, a hea mai la ia lakou, i ka i ana, Pomaikai oukou, ina e hoolohe mai oukou i na olelo a ua poe umikumamalua nei, a’u i wae aku ai maiwaena mai o oukou e lawelawe aku ia oukou, a e lilo i poe kauwa na oukou; a ia lakou wau i haawi aku ai i ka mana, na lakou e bapetizo aku ia oukou me ka wai, a mahope aku o ko oukou bapetizoia’na me ka wai, aia hoi, na’u e bapetizo aku ia oukou me ke ahi a me ka Uhane Hemolele; nolaila, pomaikai oukou, ina e manaoio mai oukou ia’u, a e bapetizoia’ku, mahope iho o ko oukou nana ana ia’u, a ike ana ke ola nei wau.

2 A eia hou, pomaikai loa lakou ka poe nana e manaoio mai ma ka oukou mau olelo, no ko oukou hoike ana ua nana mai oukou ia’u, a ua ike oukou ke ola la owau. He oiaio, pomaikai ka poe nana e manaoio auanei i ka oukou mau olelo, a iho ilalo iloko o na hohonu o ka haahaa, a e bapetizoia; no ka mea, e hoolaunaia’ku auanei lakou me ke ahi a me ka Uhane Hemolele, a e loaa auanei ke kalaia’na o ko lakou mau hala.

3 He oiaio, pomaikai ka poe i haahaa ma ka uhane, ka poe i hele mai io’u nei, no ka mea, no lakou ke aupuni o ka lani.

6 A pomaikai ka poe a pau i pololi a makewai no ka pono; no ka mea, e hoomaonaia lakou me ka Uhane Hemolele.

8 A pomaikai ka poe a pau i maemae ma ka naau, no ka mea, e ike lakou i ke Akua.

9 A pomaikai ka poe a pau i uwao, no ka mea, e iia’e lakou he poe keiki na ke Akua.

10 A pomaikai ka poe a pau i hana ino ia mai no ka pono, no ko’u inoa, no ka mea, no lakou ke aupuni o ka lani.

11 A e pomaikai ana no oukou, i ka wa e hoino mai na kanaka ia oukou, a e hoomaau mai no hoi, a no’u nei e olelo wahahee mai ai ia oukou i na mea ino a pau,

12 No ka mea, e loaa ia oukou ka hauoli nui a e olioli nui hoi, no ka mea, he nui ka uku no oukou ma ka lani; pela lakou i hoomaau aku ai i ka poe kaula mamua o oukou.

13 Oiaio, he oiaio ka’u e olelo aku nei ia oukou, ke haawi aku nei au ia oukou e lilo i paakai no ka honua; aka, ina e pau auanei ka kiu o ka paakai, pehea la e liuia’i ka honua? Aohe o ka paakai mea e pono ai ma ia hope, e kiola wale ia iwaho, a e hehiia’i malalo iho o na wawae o kanaka.

14 Oiaio, he oiaio ka’u e olelo aku nei ia oukou, ke haawi aku nei au ia oukou e lilo i malamalama o keia poe kanaka. O ke kulanakauhale i ku ma kahi kiekie, aole ia e nalowale.

15 Aia hoi, ke hoaa aku nei anei na kanaka i kukui a waiho aku ia mea malalo iho o ka poi? Aole, aka ma kahi e kau ai o ke kukui, a e haawi ana ia i ka malamalama i ka poe a pau iloko o ka hale;

16 Nolaila, e hoakaka aku oukou i ko oukou malamalama imua o keia poe kanaka, i ike mai ai lakou i ka oukou hana maikai ana, a i hoonani aku ai i ko oukou Makua i ka lani.

17 Mai manao oukou i hele mai nei au e hoopau i ke kanawai a me ka poe kaula. Aole au i hele mai nei e hoopau, aka e hooko;

18 No ka mea, he oiaio ka’u e olelo aku nei ia oukou, aole i lilo aku kahi huna aole hoi kahi lihi iki mai ke kanawai ae, aka iloko o’u ua hookoia mai ia mea a pau.

19 [m 5, p 10] Aia hoi, ua haawi aku au ia oukou i ke kanawai a me na kauoha a ko’u Makua, i manaoio mai ai oukou ia’u, a i mihi oukou i ko oukou mau hewa, a hele mai io’u nei me ka naau pepe a me ka uhane akahai. Aia hoi, ia oukou na kauoha imua o oukou, a ua ko iho la no ke kanawai;

20 Nolaila, e hele mai oukou io’u nei, a e hoolaia aku oukou; no ka mea, he oiaio ka’u e olelo aku nei ia oukou, ina aole oukou e malama i ka’u mau kauoha, a’u i kauoha aku ai ia oukou i keia manawa, aole loa oukou e komo mai iloko o ke aupuni o ka lani.

21 Ua lohe oukou ua oleloia mai e ka poe o ka wa kahiko, a ua palapalaia no hoi imua o oukou, Mai pepehi kanaka oe; a o ka mea e pepehi i ke kanaka, e lilo ana ia i ka hoohewaia e ke Akua.

22 Aka eia ka’u e olelo aku nei ia oukou, o ka mea e huhu aku i kona hoahanau, e lilo ana ia i kona hoohewa ana. O ka mea e olelo ae i kona hoahanau, E, Raca, e lilo ia i mea no ka aha hookolokolo; a o ka mea e olelo aku, E, ka lapuwale, e lilo ia i mea no ke ahi i Gehena;

23 Nolaila, ina e hele mai oukou io’u nei, a e makemake paha e hele mai io’u nei, a i manao ai he mea ka kou hoahanau e ku e ia oe,

24 E hele aku i kou hoahanau la, a e hoolaulea mua ia i kou hoahanau, alaila, e hele mai io’u nei me ka manao ikaika o ka naau, a na’u oukou e hookipa aku.

25 E hoolaulea koke aku oe i kou hoa ku e, oiai oe me ia ma ke alanui, o hopu aku oia ia oe i kekahi manawa, a e hooleiia’ku oe iloko o ka halepaahao.

26 Oiaio, he oiaio ka’u e olelo aku nei ia oe, aole loa oe e puka e mai iwaho olaila, a pau ae la ka senine hope i ka ukuia e oe. A oiai oe iloko o ka halepaahao, e hiki ani ia oe ke uku aku i hookahi senine? Oiaio, he oiaio ka’u e olelo aku nei ia oukou, aole.

28 Aka eia ka’u e olelo aku nei ia oukou, O ka mea nana ana i ka wahine, e kuko hewa aku ia ia, kolohe no oia ia manawa ma kona naau.

29 Aia hoi, ke haawi aku nei au i kauoha ia oukou, i ae ole aku oukou i kekahi o ua mau mea nei e komo iloko o ko oukou naau;

30 No ka mea, e aho no oukou e hoole ia oukou iho i keia mau mea, ma na mea a oukou e hapai ai i ko oukou kea, mamua o ko oukou hooleiia’na iloko o Gehena.

31 Ua palapalaia, o ka mea hoohemo i kana wahine, e haawi aku oia nana i ka palapala no ka hemo ana.

32 Oiaio, he oiaio ka’u e olelo aku nei ia oukou, o ka mea hoohemo wale i kana wahine, ke ole ia no ka foranicationa, nana no ia e hoomoe kolohe aku; a o ka mea e mare i ua wahine hemo la, ua moe kolohe no ia.

33 [m 5, p 11] A eia hou i palapalaia, Mai hoohiki wahahee oe, aka, e hooko aku oe no ka Haku i kau mea i hoohiki ai.

34 Aka oiaio, he oiaio ka’u e olelo aku nei ia oukou, mai hoohiki iki; aole ma ka lani, no ka mea, o ko ke Akua noho aliii ia;

36 Aole hoi oe e hoohiki ma ke poo, no ka mea, aole e hiki ia oe ke hoolilo i kekahi oho i eleele, aole hoi i keokeo;

37 Aka, penei ka oukou kamailio ana o ka ae, he ae ia; o ka aole, he hoole ia; no ka mea, o ka mea, e hiki mai ana no na mea oi aku i kea, ua ino ia.

39 Aka, eia ka’u e olelo aku nei ia oukou, mai hoopai aku oe i ka ino, aka o ka mea nana oe e papai mai ma ko’u papalina akau, e haliu aku oe ia ia ma kekahi.

40 A ina e kahihi aku kekahi kanaka ia oe ma ke kanawai, a e lawe i kou kapa komo, e ho hou aku no hoi ia ia i kou aahu.

42 O ka mea e noi mai ia oe, e haawi aku nana, a o ka mea e noi e lawe lilo ole i kau mea, mai kaii ae oe.

43 Aia ua palapalaia no hoi, E aloha aku i kou hoalauna, a e inaina aku i kou enemi:

44 Aka hoi, eia ka’u e olelo aku nei ia oukou, e aloha aku i ko oukou poe enemi, e hoomaikai aku hoi i ka poe kuamuamu mai ia oukou, e hana lokomaikai aku hoi i ka poe inaina mai ia oukou, a e pule aku hoi i ka poe hana ino mai ia oukou, a hoomaau mai hoi ia oukou,

45 I lilo ai oukou i poe keiki na ko oukou Makua i ka lani; no ka mea, nana no i hoopuka mai i kona la maluna o ka poe ino a me ka poe maikai;

46 Nolaila, o ua mau mea la o ka wa kahiko, na mea malalo iho o ke kanawai iloko o’u, ua ko a pau loa.

48 Nolaila, ke makemake nei au i hemolele oukou e like me au nei, a me ka hemolele o ko oukou Makua ma ka lani.

1 Oiaio, he oiaio, ka’u e olelo aku nei ua makemake au e hana manawalea aku oukou i ka poe hune; aka e malama ia oukou, aole e hana wale aku i ko oukou manawalea imua o na kanaka, no ka ikeia mai e lakou; o loaa ole ia oukou ka ukuia mai e ko oukou Makua ma ka lani.

2 Nolaila, ia oukou e hana aku ai i ko oukou manawlea ana, mai hookani i ka pu imua o oukou, e like me ka ka poe hookamani e hana’i iloko o na halehalawai, a ma na alanui, i hoomaikaiia mai ai lakou e na kanaka. He oiaio ka’u e olelo aku nei ia oukou, ua loaa ia lakou ko lakou uku.

3 Aka ia oe e hana manawalea aku ai, mai hoike i kou lima hema i ka mea a kou lima akau e hana’i;

4 I nalo hoi kou manawalea ana; a o kou Makua e nana mai ana i kahi nalo, oia ke uku mai ia oe ma ke akea.

5 [m 5, p 12] A i pule aku oe, ea, mai hana oe e like me ka poe hookamani, no ke mea, makemake lakou e pule ku ana ma na halehalawai, a ma na huina alanui, i ikeia mai ai lakou e kanaka. He oiaio ka’u e olelo aku nei ia oukou, ua loaa ia lakou ko lakou uku.

6 Aka ooe, i kau pule ana, e komo ae oe iloko o kou keena mehameha, a ia oe i papani aku ai i kou puka, e pule aku i kou Makua ina no ma kahi nalo; a o kou Makua e ike ana iloko o kahi nalo, oia ke uku mai ia oe ma ke akea.

7 Aka ia oukou e pule aku ai, mai kuawili wale aku i ka olelo, e like me ka poe kanaka e, no ka mea, ke manao nei lakou, no ka nui o ka lakou olelo ana, e hooloheia mai ai lakou.

8 Mai hoohalike me lakou, no ka mea, ua ike ko oukou Makua i na mea e pono ai oukou, mamua o ka oukou noi ana ia ia.

9 Nolaila, penei oukou e pule aku ai: E ko makou Makua iloko o ka lani, e hoanoia kou inoa.

10 E malamaia kou makemake ma ka honua nei, e like me ia i malamaia ma ka lani la.

11 E kala mai oe i kou makou lawehala ana, me makou e kala nei i ka poe i lawehala mai i ka makou.

12 Mai hookuu ia makou iloko o ka hoowalewaleia mai, aka e hoopakele no ia makou i ka ino.

13 No ka mea, nou ke aupuni, a me ka mana, a me ka hoonaniia, a mau loa aku. Amene.

14 No ka mea, ina e kala aku oukou i na hala o kanaka, e kala mai no hoi ko oukou Makua o ka lani i ko oukou;

15 Aka i ole oukou e kala aku i na hala o kanaka, aole no hoi e kala mai ko oukou Makua i ko oukou hala.

16 A eia hou, a i hookeai oukou, mai hoino i ko oukou maka e like me ka poe hookamani, no ka mea, ke hoinoino la lakou i ko lakou maka, i ikeia mai e na kanaka ka lakou hookeai ana. He oiaio ka’u e olelo aku nei ia oukou, ua loaa ia lakou ko lakou uku.

18 I ike ole ia kau hookeai ana e na kanaka, aka, i ikea ia e kou Makua ina no ma kahi nalo; a o kou Makua ke ike i kahi nalo, oia ke uku mai ia oe ma ke akea.

19 [m 5, p 13] Mai hoahu oukou i ka waiwai no oukou iho ma ka honua, kahi i ino ai i ka mu a me ka popo, kahi e wawahi mai ai na aihue e aihue ai,

20 Aka, e hoahu ae oukou i ka waiwai no oukou iho ma ka lani, kahi e ino ole ai i ka mu a me ka popo, kahi e wawahi ole mai na aihue e aihue ai.

21 No ka mea, ma kahi e waiho ai i ko oukou waiwai, malaila pu no hoi ko oukou naau.

22 O ka maka no ko ke kino kukui; nolaila, ina he maikai kou maka, e piha auanei kou kino a pau i ka malamalama.

23 Aka, ina he ino kou maka, e piha auanei kou kino a pau i ka pouli. Nolaila, ina e lilo ka malamalama iloko ou i pouli, nani wale ka nui o ua pouli la!

24 Aole no e hiki i ke kanaka ke malama i na haku elua, no ka mea e inaina ia i kekahi, a e aloha aku hoi i kekahi; a i ole ia, e hoopili aku ia i kekahi me ka hoowahawaha i kekahi. Aole e hiki ia oukou ke malama pu i ke Akua a me ka mamona, (o ka waiwai no ia.).

25 [mokuna 6, paukū 1] Ano, eia kekahi, ia Iesu i olelo mai ai i keia mau olelo, nana mai la oia ma ka poe umikumamalua ana i wae mai ai, a i mai la oia ia lakou, E hoomanao i na olelo a’u i olelo aku ai. No ka mea hoi, o oukou no ka poe a’u i wae aku ai e lawelawe aku i keia poe kanaka. Nolaila, ke i aku nei au ia oukou, mai manao iki oukou no ko oukou ola, i ka oukou mea e ai ai, aole hoi i ka oukou mea e inu ai: aole hoi no ko oukou kino, i ka oukou mea e aahu ai. Aole anei e oi aku ke ola i ka ai, a me ke kino i ke kapa?

26 E nana aku i na manu o ka lewa, no ka mea, aole o lakou lulu hua, aole hoi e oki ai, aole no hoi e hoahu ae iloko o na halepapaa; ke hanai mai la nae ko oukou Makua o ka lani ia lakou. Aole anei e oi aku ko oukou maikai i ko lakou?

27 Owai la ka mea o oukou e hiki ma ka manao nui ana ke hooloihi aku i kona kiekie i hookahi kubita?

28 A heaha hoi ka oukou e manao nui ai i ke kapa? E noonoo i na lilia o ke kula, i ko lakou ulu ana; aole lakou i hana, aole hoi i milo;

29 A ke olelo aku nei nae au ia oukou, o Solomona i kona nani a pau, aole ia i kahiki like ia me kekahi o ia mau mea.

30 Nolaila, ina pela ke Akua e hoonani mai ai ka nahelehele ina no ma ke kula i keia la, a i ka la apopo e hooleiia’i iloko o ka umu, pela no oia e hoaahu mai ia oukou, ina aole o oukou paulele kapekepeke.

31 Nolaila hoi, mai manao iki, me ka i ana, Heaha ka kakou mea e ai ai? A heaha ka kakou mea e inu ai? A heaha ko kakou mea e aahu ai?

32 No ka mea, ua ike ko oukou Makua o ka lani, he pono ke loaa ia oukou ia mau mea a pau.

33 Aka, e imi e oukou mamua i ke aupuni o ke Akua, a me kana pono, a e pau ua mau mea la i ka haawiia mai ia oukou.

34 Nolaila, mai manao iki aku no ka la apopo, no ka mea, na ka la apopo e manao iho no na mea nona iho. Ua lawa ka la no ka ino ona iho.

1 [mokuna 6, paukū 2] Ano, eia kekahi, ia Iesu i olelo mai ai i keia mau olelo, huli hou ae la ia i na kanaka, a oaka ae la i kona waha ia lakou, i ka i ana, Oiaio, he oiaio ka’u e olelo aku nei ia oukou, Mai manao ino aku i manao ino ole ia mai oukou.

2 Noa ka mea, me ka manao a oukou e manao ino aku ai, pela hoi e manao ino ia mai ai oukou; a me ke ana a oukou e ana aku ai, pela no hoi e anaia mai ai ia oukou.

3 A no ke aha oe e nana aku ai i ka pula iki iloko o ka maka o kou hoahanau, aka aole noonoo iki i ke kaola iloko o kou maka iho?

4 A pehea la oe e olelo aku ai i kou hoahanau, E ho mai na’u e unuhi i ka pula iki noloko mai o kou maka; a, aia ka he kaola iloko o kou maka iho?

5 E ka hookamani, e unuhi mua oe i ke kaola mailoko ae o kou maka iho: alaila oe e ike pono ai ke unuhi ae i ka pula iki maloko o ka maka o kou hoahanau.

6 Mai haawi aku i ka mea hoano na na ilio, aole hoi e hoolei aku i ka oukou mau momi imua o na puaa, o hehi lakou ia mau mea ilalo o ko lakou mau wawae, a e kepa mai hoi lakou a e moku oukou.

7 [m 6, p 3] E noi, a e haawiia na oukou; e imi, a e loaa hoi ia oukou: e kikeke, a e weheia no oukou;

8 No ka mea, o kela mea keia mea e noi ana, e haawiia ana nana; a o ka mea e imi ana, e loaa ana ia ia; a i ka mea kikeke, e weheia auanei nona.

9 Owai la ke kanaka o oukou e haawi aku i ka pohaku na kana keiki, ke noi mai ia i berena?

11 Ina paha oukou ka poe hewa i ike i ka haawi aku i na makana maikai na ka oukou poe keiki, he oi nui aku ko oukou Makua ma ka lani ma ka haawi ana mai i na mea maikai na ka poe e noi aku ia ia?

12 Nolaila, o na mea a pau a oukou e makemake ai i hanaia mai ia oukou, e na kanaka, oia ka oukou e hana aku ai ia lakou, no ka mea, pela no ka ke kanawai a me ka ka poe kaula.

13 [m 6, p 4] E komo ae oukou ma ka puka pololei; no ka mea, he akea ka puka, a he palahalaha ke alanui, e hiki aku ai i ka make, a nui wale ka poe komo ilaila;

14 No ka mea, he pololei ka puka, a he ololi hoi ke ala e hiki aku ai i ke ola, a kakaikahi wale ka poe e loaa ia.

15 E malama ia oukou no na kaula hoopunipuni, e hele mai ana io oukou nei me ka aahu hipa, aka, maloko, he poe ilio hihiu hae lakou.

16 Ma ko lakou hua e ike ai oukou ia lakou: ke ohi la anei na kanaka ka huawaina noluna mai o ke kakalaioa, o na fiku hoi noluna mai o ka puakala?

17 Oia hoi, o na laau maikai a pau ke hua mai la na hua maikai; aka, o ka laau ino ke hua mai la no hoi ia i na hua ino.

18 Aole e hiki i ka laau maikai ke hua mai i ka hua ino, aole hoi i ka laau ino ke hua mai i ka hua maikai.

19 O kela laau o keia laau e hua ole mai ana i ka hua maikai, ua kuaia oia ilalo, a ua kiolaia’ku hoi ia iloko o ke ahi.

21 [m 6, p 5] O ka poe e olelo mai ai ia’u, E ka Haku, e ka Haku, aole e pau lakou i ke komo mai iloko o ke aupuni o ka lani: aka o ka mea e hana i ka makemake o ko’u Makua iloko o ka lani.

22 He nui ka poe e olelo mai ana ia’u ia la, E ka Haku, e ka Haku, aole anei makou i wanana aku ma kou inoa? i mahiki aku hoi i na uhane ino ma kou inoa? a i hana aku i na hana mana he nui ma kou inoa?

23 Alaila, e hai aku au ia lakou, Aole au i ike ia oukou, e haele oukou pela mai o’u aku nei, e ka poe hana ino.

24 [m 6, p 6] Nolaila, o ka mea lohe i keia mau olelo a’u, a hana hoi ia mau mea, e hoohalike au ia ia i ke kanaka naauao, nana i kukulu i kona hale maluna o ka pohaku,

25 A haule mai la ka ua a kahe mai la ka wai, a nou mai la ka makani, a pa ma ua hale la; aole nae ia i hiolo; no ka mea, ua hookumuia oia maluna o ka pohaku.

26 A o ke mea lohe i keia mau olelo a’u, a hana ole hoi ia mau mea, e hoohalikeia hoi ia i ke kanaka naaupo, nana i kukulu i kona hale maluna o ke one,

27 A haule mai la ka ua, a kahe mai la ka wai, a nou mai la ka makani, a pa ma ua hale nei; a hioli iho la ia, a nani wale hoi kona hiolo ana.

1 [mokuna 7, paukū 1] Ano, eia kekahi, ia Iesu i hoopau mai ai i keia mau olelo, alawa ae la oia i kona mau maka i o ia nei ma na kanaka, a olelo mai la ia lakou, Aia hoi, ua lohe oukou i na mea a’u i ao aku ai mamua o ko’u pii ana i ko’u Makua la; nolaila, o ka mea e hoomanao ana i keia mau olelo a’u, a hana hoi ia mau mea, oia ka’u e hookiekie ae iluna ma ka la hope.

2 A eia kekahi, ia Iesu i olelo mai ai i keia mau olelo, ike oia e kahaha ana kekahi poe, a haohao iho la i ka mea ana e olelo mai ai no ke kanawai o Mose; no ka mea, hoomaopopo ole iho la lakou i ka olelo, Ua hala aku la na mea kahiko, a ua lilo na mea a pau i hou.

3 A i mai la oia ia lakou, Mai kahaha no ka’u olelo aku ia oukou, Ua hala aku la na mea kahiko, a ua lilo na mea a pau i hou.

4 Aia hoi, ke olelo aku nei au ia oukou, ua ko ke kanawai i haawiia mai ia ia Mose.

5 Aia hoi, owau no ka mea nana i haawi aku i ke kanawai, a owau no hoi ka mea nana i hana berita aku me ko’u poe kanaka, ka Iseraela; nolaila, ua ko ke kanawai iloko o’u, no ka mea, ua hele mai au a hooko i ka kanawai; nolaila, ua pau ai la ia.

6 Aia hoi, aole au e hoopau ana i ka ka poe kaula, no ka mea, o na mea a pau i ko ole iloko o’u, he oiaio, ke olelo aku nei au ia oukou, e ko auanei ia mau mea a pau loa.

7 A no ka’u olelo ana’ku ia oukou, Ua hala aku la na mea kahiko, aole au e hoopau aku ana i na mea i oleloia no na mea e hiki mai ana.

8 No ka mea, o ka berita a’u i hana aku ai me ko’u poe kanaka, aole ia i ko a pau loa; aka o ke kanawai i haawiia mai ai ia Mose, ua pau iloko o’u nei.

9 Aia hoi, owau no ke kanawai, a me ka malamalama; e nana mai oukou ia’u, a e hoomau a hiki i ka hopena, a e ola auanei oukou, no ka mea, e haawi aku no au i ke ola mau loa i ka mea e hoomau ana a hiki i ka hopena.

10 Aia hoi, ua haawi aku au i na kauoha ia oukou; nolaila, e malama i ka’u mau kauoha. A oia no ka kanawai a me ka poe kaula, no ka mea, hoike oiaio mai la lakou no’u.

11 [m 7, p 2] Ano, eia kekahi, ia Iesu i olelo mai ai i keia mau olelo, olelo mai la oia i ua poe umikumamalua la ana i wae mai ai,

12 O oukou no ka’u poe haumana; a he malamalama oukou i keia poe kanaka, he koena lakou no ko ka hale o Iosepa.

13 Aia hoi, eia no ka aina o ko oukou hooilina; a ua haawi mai la ka Makua ia mea ia oukou.

14 Aole i haawi mai ka Makua i kauoha i kekahi manaw ia’u, na’u e hai aku ia mea i ko oukou poe hoahanau ma Ierusalema;

15 Aole no hoi i haawi mai ka Makua i kekahi manawa i kauoha ia’u, na’u e hai aku ia lakou no na ohana e ae o ka hale o Iseraela, ka poe a ka Makua i alakai aku ai mailoko aku o ka aina.

16 Eia ka ka makua i kauoha mai ai ia’u, na’u e hai aku ia lakou, He poe hipa e ae no ka’u;

17 He poe hipa e ae no ka’u; aole no keia pa; he pono hoi no’u e alakai mai ia lakou, a e lohe no auanei lakou i ko’u leo; a hookahi auanei pa hipa, a he kahuhipa hookahi hoi.

18 Ano, no ka ai oolea a me ka hoomaloko, hoomaopopo ole mai la lakou i ka’u olelo; nolaila, ua kauohaia mai au e ka Makua, aole e olelo hou aku no keia mea ia lakou.

19 Aka, he oiaio, ke olelo aku nei au ia oukou, ua kauoha mai la ka Makua ia’u, a ke hai aku nei au ia mea ia oukou, ua hookaawaleia’e oukou maiwaena aku o lakou no ko lakou hewa; nolaila, no ko lakou hewa, ko lakou ike ole no oukou.

20 A he oiaio, ke olelo hou aku nei au ia oukou, ua hookaawale aku ka Makua i na ohana e ae mai o lakou ae; a no ko lakou hewa, ko lakou ike ole no lakou la.

21 A he oiaio ka’u e olelo aku nei ia oukou, o oukou no ka poe a’u i olelo aku ai, He poe hipa e ae no ka’u, aole no keia pa; he pono hoi no’u e alakai mai ia lakou, a e lohe auanei lakou i ko’u leo; a hookahi auanei pa hipa, a me ke kahuhipa hookahi hoi.

22 A hoomaopopo ole mai ia lakou ia’u, no ka mea, manao iho la lakou o ka poe Genetile ia poe; no ka mea, aole lakou i hoomaopopo, e hoohuliia mai auanei ka poe Genetile ma ka lakou hai olelo ana;

23 A aole lakou i hoomaopopo mai ia’u, i ka’u olelo ana, e lohe auanei lakou i ko’u leo; a aole lakou i hoomaopopo mai ia’u, aole e lohe ana ka poe Genetile i kekahi manawa i ko’u leo; aole hoi au e hoike aku ia’u iho ia lakou, ke ole ma ka Uhane Hemolele wale no.

24 Aka hoi, ua lohe oukou i kuu leo, a ike mai no hoi ia’u; a o oukou no ka’u poe hipa, a ua helu pu ia oukou mawaena o ka poe a kuu Makua i haawi mai ai ia’u.

1 [mokuna 7, paukū 3] A oiaio, he oiaio, ka’u e olelo aku nei ia oukou, he poe hipa a ae ka’u, aole no keia aina; aole hoi no ka aina o Ierusalema; aole hoi ma na wahi o ua aina la a puni, kahi a’u i hele ai e lawelawe.

2 No ka mea, o ka poe a’u e olelo nei, o lakou no ka poe i lohe ole i ko’u leo a hiki i keia manawa; aole hoi au i hoike aku ia’u iho ia lakou i kekahi manawa.

3 Aka ua loaa ia’u he kauoha na ka Makua mai, e hele aku auanei au io lakou la, a e lohe auanei lakou i kuu leo, a e helu pu ia mawaena o ka’u poe hipa, i hookahi pa, a e hookahi hoi kahuhipa; nolaila, e hele aku ana au e hoike aku ia’u iho ia lakou.

4 A ke kauoha aku nei au ia oukou, na oukou e palapala iho i keia mau olelo, mahope aku o ko’u hele ana’ku, ina paha ko’u poe kanaka ma Ierusalema, ka poe i ike mai ia’u, a i launa pu me au ma ko’u lawelawe ana, e noi ole i ka Makua ma ko’u inoa, i loaa ai ia lakou ka ike no oukou ma o ka Uhane Hemolele la, a me na ohana e ae no hoi, ka poe i ike ole ia e lakou, alaila e malamaia ua mau olelo nei a oukou e palapala ai, a e hoikeia’ku auanei i ka poe Genetile, a ma o ka piha la o ka poe Genetile, e hiki i ke koena o ka lakou poe hua; ka poe e hoopuehuia’ku auanei maluna o ka ili o ka honua nei, no ko lakou hoomaloka, ke kaiia mai iloko, a ke kaiia mai i ka ike ia’u, i ko lakou Mea Hoolapanai.

5 Alaila, na’u e houluulu mai ia lakou mai na kihi eha mai o ka honua; alaila hoi, na’u e hooko aku i ka berita a ka Makua i hana aku ai i ka poe kanaka a pau o ka hale o Iseraela.

6 [m 7, p 4] A pomaikai ka poe Genetile, no ko lakou manaoio mai ia’u, iloko a ma o ka Uhane Hemolele la, ka mea e hoike ana ia lakou no’u nei a no ka Makua.

7 Aia hoi, no ko lakou manaoio mai ia’u, wahi a ka Makua, a no ka hoomaloka o oukou, e ko ka hale o Iseraela, ma na la mahope e hiki no ka oiaio i ka poe Genetile la, i hoikeia’ku auanei ka nui o keia mau mea ia lakou.

8 Aka auwe, wahi a ka Makua, i ka poe Genetile hoomaloka, no ka mea, me ko lakou hele mai nae maluna o ka ili o keia aina, a hoopuehu aku i ko’u poe kanaka, ke poe o ko ka hale o Iseraela; a hooleiia’ku ko’u poe kanaka o ko ka hale o Iseraela, maiwaena aku o lakou, a hahiia ilalo o na wawae e lakou;

9 A no na lokomaikai o ka Makua i ka poe Genetile, a me na hoopai no hoi o ka makua maluna o ko’u poe kanaka, o ko ka hale o Iseraela, oiaio, he oiaio, ka’u a olelo aku nei ia oukou, mahope aku o keia mau mea a pau, a kuu aku au i ko’u poe kanaka o ko ka hale o Iseraela, e hahauia, a e hoopilikiaia, a e lukuia, a e hooleiia’e maiwaena aku o lakou, a e inainaia e lakou, a e lilo i kuamuamuia a i hua olelo ino mawaena o lakou.

10 A pela ke kauoha mai la ka Makua na’u e olelo aku ia oukou, ma ia la i ka wa e lawehala mai ai ka poe Genetile i ko’u euanelio, a e hoomalau mai i ko’u euanelio mana a pololei, a e hookiekieia iluna ma ka haaheo o ko lakou mau naau, maluna ae o ko na aina a pau, a maluna ae o na kanaka a pau o ka honua a puni, a e hoopihaia me na ano a pau o na wahahee, a o na hoopunipuni, a o na kolohe, a me na ano a pau o na hookamani, a me na pepehi kanaka, a me na hana maalea a na kahuna pule hoopunipuni, a me na moe kolohe, a o na hana hoopailua malu; a ina e hana auanei lakou i ua mau mea la a pau, a e hoomalau mai i ko’u euanelio mana a pololei, aia hoi, wahi a ka Makua, na’u e lawe aku i ko’u euanelio mana a pololei, aia hoi, wahi a ka Makua, na’u e lawe aku i ko’u euanelio mana a pololei maiwaena aku o lakou;

11 Alaila, na’u e hoomanao i ka berita a’u i hana aku ai i ko’u poe kanaka, e ko ka hale o Iseraela, a e lawe no au i ko’u euanelio io lakou nei;

12 A na’u e hoike aku ia oe, e ko ka hale o Iseraela, aole o ka poe Genetile mana auanei maluna o oukou, aka, na’u e hoomanao i ka’u berita ia oukou, e ko ka hale o Iseraela, a e hiki oukou i ka ike i ko’u euanelio mana a pololei.

13 Aka ina e mihi ka poe Genetile, a hoi hou mai io’u nei, wahi a ka Makua, aia hoi, e helu pu ia auanei lakou mawaena o ko’u poe kanaka, e ko ka hale o Iseraela;

14 A, aole au e kuu aku i ko’u poe kanaka, o ko ka hale o Iseraela, e hele aku mawaena o lakou, a e hahi ia lakou ilalo, wahi a ka Makua.

15 Aka ina aole lakou huli mai ia’u, a e hoolohe mai i ko’u leo, e kuu aku no au, he oiaio, e kuu aku au i lo’u poe kanaka, e ko ka hale o Iseraela, i hele aku ai lakou mawaena o lakou la, a e hahi ia lakou la ilalo, a e like auanei lakou me ka paakai i lilo kona liu, aohe ona mea e pono ai ma ia hope, e kiola wale ia iwaho, a e hehiia’i malalo iho o na wawae o ko’u poe kanaka, e ko ka hale o Iseraela.

16 Oiaio, he oiaio, ka’u e olelo aku nei ia oukou, pela ka Makua i kauoha mai ai ia’u, na’u e haawi aku i keia poe kanaka, i keia aina no ko lakou hooilina.

18 E hookiekie auanei kou poe kiai i ko lakou leo; me ka leo auanei lakou e hookani pu ai, no ka mea, e ike auanei lakou he maka no, he maka, i ka wa a ka Haku e hoihoi hou mai ai ia Ziona.

19 E hookani olioli, e olioli pu oukou, e na wahi neoneo o Ierusalema, no ka mea, ua hoomaha mai ka Haku i kona poe kanaka, ua hoolapanai oia ia Ierusalema.

20 Ua hoike ka Haku i kona lima hemolele imua o na maka o na lahuikanaka a pau: a e ike auanei na kukulu a pau o ka honua i ka hoola ana o ko kakou Akua.

1 [mokuna 8, paukū 1] Aia hoi, i ka wa a Iesu i olelo mai ai i ua mau olelo nei, alawa hou ae la oia i o ia nei ma na kanaka, a olelo mai la ia lakou, aia hoi, ua kokoke mai kuu manawa.

2 Ke ike nei au ua nawaliwali oukou, a hiki ole ia oukou ke hoomaopopo mai i ka’u mau olelo a pau i kauohaia mai ai au, e ka Makua, e olelo aku ia oukou i keia manawa;

3 Nolaila, e hele oukou i ko oukou mau wahi, a e hoomanao iho ma na mea a’u i olelo aku ai, a e noi aku i ka Makua, ma ko’u inoa, i hiki ia oukou ke hoomaopopo; a e hoomakaukau i ko oukou mau naau no ka la apopo, a e hele hou mai au io oukou la.

4 Aka, ke hele nei au ano i ka Makua la, a e hoike aku no hoi ia’u iho i na ohana nalowale o Iseraela, no ka mea, aole lakou i nalowale i ka Makua, no ka mea, ua ike oia i kahi ana i lawe aku ai ia lakou.

5 [m 8, p 2] A eia kekahi, ia Iesu i olelo mai ai pela, alawa hou ae la oia i kona mau maka i o ia nei ma na kanaka, a ike akula ua kahe ka waimaka o lakou, a haka pono ae la lakou ia ia, me he mea la e noi aku lakou ia ia e noho iki hou me lakou.

6 A i aku la oia ia lakou, Aia hoi, ua piha na naau o’u me ke aloha aku ia oukou,

7 Ina he poe mai mawaena o oukou, e lawe mai ia lakou ia nei. Ina he poe oopa, makapo, haakue, mumuku, lepera, a me ka poe lolo, a kuli, a me ka poe i hoehaia ma kela ano keia ano, e lawe mai ia lakou ia nei, a na’u lakou e hoola aku, no ka mea, he aloha ko’u no oukou; ua piha na naau o’u me ka lokomaikai;

8 No ka mea, ke ike nei au e makemake ana oukou, na’u e hoike aku ia oukou i ka mea a’u i hana aku ai i ko oukou poe hoahanau ma Ierusalema, no ka mea, ke ike nei au ua lawa ko oukou manaoio, na’u e hoola aku ia oukou.

9 [m 8, p 3] A eia kekahi, ia ia i olelo mai ai pela, hele lokahi aku la na kanaka a pau, me ko lakou poe mai, a me ko lakou poe hoehaia, a me ko lakou poe oopa, a me ko lakou poe makapo, a me ko lakou poe aa, a me ka pe a pau i hoehaia ma kela ano keia ano; a hoola mai la oia ia lakou, i kela mea keia mea i ka laweia’na o lakou io na la;

10 A kulou iho la lakou a pau, o ka poe i hoolaia, a me ka poe ola no hoi, ma kona mau wawae, a hoomana aku la ia ia; a honi iho la ka poe a pau i hiki no ka paapu o na kanaka, i kona mau kapuai, a hoauau iho la i kona mau kapuai me ko lakou waimake.

11 [m 8, p 4] A eia kekahi, kauoha mai la oia e laweia’ku ka lakou poe keiki uuku.

12 A lawe ae la lakou i ka lakou poe keiki uuku, a hoonoho iho la ia lakou ilalo ma ka honua a puni ia, a ku iho la o Iesu iwaena konu; a emi ihope na kanaka a laweia ae la lakou a pau io na la.

13 A eia kekahi, ia lakou a pau i laweia aku ai, a ku iho la no o Iesu mawaena konu, kauoha mai la oia i na kanaka e kukuli iho ilalo ma ka honua.

14 A eia kekahi, ia lakou i kukuli iho ai ilalo ma ka honua, uhu iho la o Iesu iloko ona iho, a i aku la, E ka Makua, ua hoopilikiaia mai au no ka hewa o ka poe kanaka o ka hale o Iseraela.

15 A ia ia i olelo mai ai i ua mau olelo nei, kukuli iho la no hoi oia ma ka honua; a aia hoi, pule aku la oia i ka Makua, a o na mea ana i pule aku ai, ua hiki ole ke palapalaia, a hlike ae la na kanaka, ka poe i lohe ia ia.

16 A mumuli o keia ano lakou e hoike aku ai: Aole i ike e ka maka, aole hoi i lohe e ka pepeiao, mamua, i na mea nui a kupanaha e like me ka makou i ike ai a i lohe ai ia Iesu i olelo aku ai i ka Makua;

17 Aole e hiki i kekahi alelo ke olelo, aole no hoi e hiki ke palapalaia e kekahi kanaka, aole hoi e hiki i na naau o na kanaka ke hoomaopopo i na mea nui a kupanaha, me ka makou i ike ai a i lohe ai no hoi ia Iesu i olelo ai; a ua hiki ole no hoi i kekahi mea ke hoomaopopo i ka olioli i piha mai ai i ko makou mau naau, i ka manawa a makou i lohe ai ia ia e pule ana no makou i ka Makua.

18 [m 8, p 5] A eia kekahi, ia Iesu i hoopau ai i ka pule ana i ka Makua, ala ae la ia; aka, no ka olioli nui o na kanaka, ua ilihia lakou.

19 A eia kekahi, olelo mai la o Iesu ia lakou, a kena mai la ia lakou e ala’e.

20 A ala ae la lakou mai ka honua ae, a i mai la oia ia lakou, Pomaikai oukou no ko oukou manaoio. Ano hoi, ua piha kuu olioli.

21 A ia ia i olelo mai ai i keia mau olelo, uwe iho la ia, a hoike ae la na kanaka no ia mea, a lawe pakahi ae la oia i ka lakou poe keiki, a hoopomaikai iho la ia lakou, a pule aku la i ka Makua no lakou.

23 A olelo mai la ia i na kanaka, a i mai la ia lakou, E nana i ka oukou poe uuku.

24 A ia lakou i nana aku ai e ike, leha ae la lakou i ko lakou mau maka i ka lani, a ike aku la lakou i na lani wehiia, a ike aku la lakou i na anela e iho mai ana mailoko mai o ka lani me he mea la, mawaena o ke ahi; a iho mai la lakou ilalo a hoopuni ae la i ua poe uuku la a puni, a ua hoopuiia lakou me ke ahi; a lawelawe ae la ka poe anela ia lakou,

25 A ike a lohe a hoike ae la na kanaka; a ua ike lakou ua oiaio ko lakou hoike ana, no ka mea, lohe aku la a ike aku la lakou a pau, o kela kanaka keia kanaka nona iho; a elua tausani a me na haneri elima paha ka nui o lakou; a he poe kane, wahine, a me na kamalii lakou.

1 [mokuna 8, paukū 6] A kauoha mai la o Iesu i kana poe haumana na lakou e lawe aku i wahi berena a waina io na la.

2 A oiai lakou e hele aku ana i wahi berena a waina, kauoha mai la oia i na kanaka e noho lakou ilalo ma ka honua.

3 A i ka wa i hiki ai ka poe haumana me ka berena a me ka waina, lalau iho la oia i ka berena, a wawahi ae la a hoopomaikai ae la ia; a haawi mai la i na haumana, a kauoha mai la na lakou e ai.

4 A ia lakou i ai ai, a ua maona, kauoha mai la oia ia lakou e haawi aku i na kanaka.

5 A i ka wa a na kanaka i ai ai a maona, olelo mai la ia i ka poe haumana, Aia hoi, e hooliloia auanei kekahi mea mawaena o oukou, a e haawi aku no au ia ia i ka mana nana e wawahi i ka berena, a e hoopomaikai aku ia, a e haawi aku i ka poe kanaka o ko’u ekalesia, i ka poe a pau e manaoio a e bapetizoia ma ko’u inoa.

6 A o keia ka oukou e malama mau ai, oia, me a’u i hana’i, oia, me a’u i wawahi ai i ka berena, a hoopomaikai ai ia, a haawi ai ia mea ia oukou.

7 A e hana oukou i keia me ka hoomanao mai i ko’u kino, a’u i hoike aku ai ia oukou. A he mea hoike auanei ia i ka Makua, e hoomanao mau ana oukou ia’u. A ina e hoomanao mau mai oukou ia’u, e loaa no ia oukou ko’u Uhane e noho pu me oukou.

8 [m 8, p 7] A eia kekahi, ia ia i olelo mai ai i keia mau olelo, kauoha mai la oia i kana poe haumana na lakou e lawe i ka waina o ke kiaha, a e inu ia mea, a na lakou hoi e haawi aku i na kanaka, e hiki ia lakou ke inu ia mea.

9 A eia kekahi, hana iho la lakou pela, a inu iho la ia mea, a ua hoopihaia; a haawi aku la lakou i na kanaka, a inu iho la lakou, a ua hoopihaia lakou.

10 A i ka wa a ka poe haumana i hana aku ai i keia, olelo mai la o Iesu ia lakou, Pomaikai oukou no keia mea a oukou i hana’i, no ka mea, o keia no ka hookoia ana o ka’u mau kauoha, a e hoike ana keia mea i ka Makua, e ae ana oukou e hana i ka mea a’u i kauoha aku ai ia oukou.

11 A e hana mau oukou i keia i ka poe i mihi a i bapetizoia ma ko’u inoa; a e hana oukou i keia me ka hoomanao i ko’u koko, a’u i hookahe aku ai no oukou, i hoike aku ai oukou i ka Makua, e hoomanao mau ana oukou ia’u. A ina e hoomanao mau mai oukou ia’u, e loaa ia oukou ko’u Uhane e noho pu me oukou.

12 A ke haawi aku nei au ia oukou i kauoha na oukou e hana i keia mau mea. A ina e hana mau oukou i keia mau mea, pomaikai oukou, no ka mea, ua kukuluia oukou maluna o ko’u pohaka.

13 Aka o ka mea mawaena o oukou nana e hana i ka mea oi aku, a i ka mea emi iho paha i ua mau mea nei, ua kukulu ole ia maluna o ko’u pohaku, aka ua kukuluia maluna o ke kahua one; a i ka wa e haule mai ka ua, a e kahe mai ka wai, a e nou mai ka makani, a pa maluna o lakou, e haule auanei lakou, a ua hamama na ipuka o ka po me ka makaukau e loaa lakou:

14 Nolaila, pomaikai oukou ina e malama oukou i ka’u mau kauoha, a ka Makua i kauoha mai ai ia’u, na’u e haawi aku ia oukou.

15 Oiaio, he oiaio ka’u e olelo aku nei ia oukou, e kiai a e pule mau oukou e pono ai, o hoowalewaleia mai oukou e ka diabolo, a e alakaiia aku oukou e ia.

16 A me a’u i pule aku ai mawaena o oukou, pela hoi oukou e pule mai ai iloko o ko’u ekalesia, mawaena o ko’u poe kanaka, ka poe i mihi a i bapetizoia ma kou inoa. Aia hoi, owau no ka malamalama; ua hana au i kumu no oukou e hoohalike mai ai.

17 [m 8, p 8] A eia kekahi, ia Iesu i olelo mai ai i ua mau olelo nei i kana poe haumana, huli hou ae la ia i na kanaka, a i aku la ia lakou,

18 Aia hoi, oiaio, he oiaio ka’u e olelo aku nei ia oukou, e kiai a e pule mau oukou e pono ai, o komo oukou iloko o ka hoowalewale; no ka mea, ke makemake la o Satana e loaa oukou; e hiki ia ia ke kanana ia oukou e like me ka hua palaoa;

20 A o ka mea a oukou e noi aku ai i ka Makua ma ko’u inoa, a ua pono, e manaoio ana i ka loaa ia oukou, aia hoi, e haawiia mai ia ia oukou.

21 E pule mau oukou ma na ohana a oukou i ka Makua ma ko’u inoa, e hoopomaikaiia mai ka oukou poe wahine a me ka oukou poe keiki.

22 A, aia hoi, e halawai pinepine oukou i kahi hookahi, a, mai papa aku i kekahi kanaka i ka hele ana io oukou la, i ka wa a oukou e halawai ai i kahi hookahi, aka e ae aku oukou ia lakou e hele mai io oukou la, a e papa ole aku ia lakou;

23 Aka, na oukou e pule no lakou, a e hoolei ole aku ia lakou mawaho; a ina paha e hele pinepine mai lakou io oukou la, alaila no oukou e pule aku no lakou i ka Makua, ma ko’u inoa;

24 Nolaila la, e hapai ae oukou i ko oukou malamalama iluna i alohi aku ai ia i ko ke ao nei. Aia hoi, owau no ka malamalama no oukou e hapai ae iluna—i ka mea a oukou i ike mai ai i hanaia e au. Aia hoi, ke ike nei oukou ua pule aku la au i ka Makua, a ua ike oukou a pau;

25 A ke ike nei oukou aole au i kauoha aku i kekahi o oukou e hele aku, aka ua kauoha aku au e hele mai oukou io’u nei, i haha mai ai oukou a i ike ai hoi; pela no hoi oukou e hana aku ai i ko ke ao nei; a o ka mea nana e uhai i keia kauoha, e ae ana oia e alakaiia’ku iloko o ka hoowalewale.

26 [m 8, p 9] Ano, eia kekahi, ia Iesu i olelo mai ai i keia mau olelo, huli hou mai la ia i kona mau maka i kana poe haumana ana i wae mai ai, a olelo mai la ia lakou.

27 Aia hoi, oiaio, he oiaio ka’u e olelo aku nei ia oukou, ke haawi aku nei au ia oukou i kekahi kauoha hou, alaila he pono no’u ke hele aku i ko’u Makua, i hooko aku ai au i na kauoha e ae, ana i haawi mai ai ia’u.

28 Ano hoi, eia ke kauoha a’u e haawi aku nei ia oukou, Mai ae aku oukou me ka ike i kekahi mea, e ai i kuu io, a me kuu koko me ka pono ole, i ka wa a oukou e lawelawe aku ai ia mea,

29 No ka mea, o ka mea e ai ana a e inu ana i kuu io a me kuu koko me ka pono ole, e ai ana a e inu ana oia i ka hoohewaia i kona uhane iho; Nolaila, ina ua ike oukou ua pono ole kekahi kanaka e ai a e inu i kuu io a i kuu koko, e papa aku oukou ia ia;

30 Aole nae oukou e hoolei aku ia ia mai o oukou aku, aka na oukou e lawelawe aku ia ia, a e pule aku nona i ka Makua, ma ko’u inoa, a ina paha e mihi oia, a e bapetizoia ma ko’u inoa, alaila no oukou e hookipa ia ia, a e lawelawe aku ia ia i kuu io a me kuu koko;

31 Aka ina e mihi ole oia, aole loa ia e helu pu ia mawaena o ko’u poe kanaka, i anai ole ai oia i ko’u poe kanaka, no ka mea, aia hoi, ua ike au i ka’u poe hipa, a ua heluia lakou;

32 Aole nae oukou e hoolei ia ia mawaho o ko oukou mau halehalawai, aole hoi ko oukou mau wahi e hoomana’i, no ka mea, na oukou e hoomau e lawelawe aku i ka poe me neia; no ka mea, aole oukou i ike anoai e hoi mai lakou a e mihi, a e hele mai io’u nei me ka manao ikaika o ka naau, a na’u auanei e hoola aku ia lakou, a e lilo oukou i poe e lawe mai ai i ke ola io lakou la.

33 Nolaila, e malama i keia mau olelo a’u i kauoha aku ai ia oukou, i komo ole mai ai oukou malalo iho o ka hoohewaia ana, no ka mea, auwe ka mea a ka Makua e hoohewa aku ai.

34 A ke haawi aku nei au i keia mau kauoha, no na hoopaapaa ana iwaena o oukou mamua. A pomaikai oukou ina aole no na hoopaapaa ana mawaena o oukou.

35 Ano, ke hele aku nei au i ka Makua la, no ka mea, he mea pono ai no’u e hele aku i ka Makua la, no ko oukou pomaikai.

36 [m 8, p 10] A eia kekahi, ia Iesu i hoopau ai i keia mau olelo, hoopa pakahi iho la oia me kona lima i kana poe haumana ana i wae mai ai, a pau loa ae la lakou i ka hoopaaia e ia, a olelo mai la ia lakou me ia i hoopa mai ai ia lakou;

37 A lohe ole ae la na kanaka i na olelo ana i olelo mai ai, nolaila, aole lakou hoike no ia mea; aka hoike aku la ka poe haumana, ua haawi mai la oia i ka mana ia lakou e haawi aku i ka Uhane Hemolele. A e hoike aku no au ma neia hope aku he oiaio keia hoike ana.

38 A eia kekahi, ia Iesu i hoopa mai ai ia lakou a pau, hiki mai la kekahi ao a hoomalu mai la i na kanaka, i hiki ole ia lakou ke ike aku ia Iesu.

39 A oiai lakou i hoomaluia, haalele mai la oia ia lakou, a pii aku la iloko o ka lani. A ike aku la ka poe haumana a hoike aku la ua pii hou ae la oia iloko o ka lani.

1 [mokuna 9, paukū 1] Ano, eia kekahi, ia Iesu i pii aku ai iloko o ka lani, puhee aku la na kanaka, a lawe ae la kela kanaka keia kanaka i kana wahine e me kana mau keiki, a hoi aku la i kona wahi iho.

2 A ua kui koke aku ka lono, iwaena o na kanaka, mamua o ka poeleele ana, ua ike na kanaka ia Iesu, a ua lawelawe mai la oia ia lakou, a e hoike mai ana no hoi oia ia ia iho ia la ae i na kanaka;

3 He oiaio, ia po a ao hoi ua kui aku ka lono no Iesu; a no ka nui o ka hoouna ana aku o lakou i na kanaka, ua nui ka poe, he oiaio, ua nui loa ka poe i hana ikaika ia po a ao, i hiki aku ai lakou, ia la ae, i kahi a Iesu e hoike mai ai ia ia iho i na kanaka.

4 [m 9, p 2] A eia kekahi, ma ia la ae, i ka wa a na kanaka i akoakoa ai i kahi hookahi, aia hoi, o Nepai a me kona kaikaina ana i hoala mai ai mai ka make mai, o Timoteo kona inoa, a me kana keiki no hoi, o Iona kona inoa, a Matoni no hoi, a me Matoniha, kona kaikaina, a me Kumena, a me Kumenonahi, a me Ieremia, a me Semanona, a me Iona, a me Zedekia, a me Isaia; ano oia na inoa o ka poe haumana a Iesu i wae mai ai. A eia kekahi, hele aku la lakou a ku iho la mawaena o na kanaka.

5 A, aia hoi, no ka lehulehu loa o na kanaka, kauoha aku la lakou e hookaawaleia aku lakou la ma na poe he umikumamalua.

6 A ao aku la ka poe umikumamalua i na kanaka; a, aia hoi, kauoha aku la lakou i na kanaka e kukuli iho ilalo ma ka ili o ka honua, a e pule aku i ka Makua, ma ka inoa o Iesu.

7 A pule aku la na haumana no hoi i ka Makua, ma ka inoa o Iesu. A eia kekahi, ala ae la lakou a lawelawe aku la i na kanaka.

8 A ia lakou i lawelawe aku ai i ua mau olelo la a Iesu i olelo mai ai—aole e loli iki ana mai na olelo ae a Iesu i olelo mai ai ia lakou—aia hoi, kukuli hou iho la lakou, a pule aku la i ka Makua ma ka inoa o Iesu;

9 A pule aku la lakou no ka mea a lakou i makemake loa ai; a makemake aku la lakou e haawiia mai ai ka Uhane Hemolele ia lakou.

10 A ia lakou i pule aku ai pela, iho iho la lakou ilalo i ke kapa o ka wai, a hahai mai la na kanaka ia lakou.

12 A pii mai la oia mailoko mai o ka wai a hoomaka ae la e bapetizo aku. A bapetizo aku la oia i ua poe la a pau a Iesu i wae mai ai.

13 A eia kekahi, ia lakou a pau i bapetizoia’i, a ua pii mai la mailoko mai o ka wai, haule mai la ka Uhane Hemolele maluna o lakou, a ua hoopihaia mai lakou me ka Uhane Hemolele, a me ke ahi.

14 Aia hoi, ua hoopuniia mai lakou a puni me he ahi la; a iho mai la ia mai ka lani mai, a ike mai la ka lehulehu ia mea, a ke hoike aku la; a iho mai la na anela mailoko mai o ka lani, a lawelawe mai la ia lakou.

15 A eia kekahi, oiai na anela e lawelawe ana i ka poe haumana, aia hoi, hiki mai la o Iesu a ku iho la mawaena konu, a lawelawe mai la ia lakou.

16 A eia kekahi, olelo mai la oia i na kanaka, a kauoha mai la ia lakou e kukuli hou lakou ilalao ma ka honua, a i kana poe haumana no hoi e kukuli iho i lalo ma ka honua.

17 A eia kekahi, ia lakou a pau i kukuli iho ai ilalo ma ka honua, kauoha mai la oia i kana poe haumana e pule lakou.

18 Aia hoi, hoomaka ae la lakou e pule; a pule aku la lakou ia Iesu, e kapa ana ia ia i ko lakou Haku a me ko lakou Akua.

19 [m 9, p 3] A eia kekahi, hele aku la o Iesu maiwaena konu aku o lakou, a hele iki aku la mai o lakou aku, a kulou iho la oia i ka honua, a i ae la ia,

20 E ka Makua, ke hoalohaloha aku nei au ia oe, no kou haawi ana mai i ka Uhane Hemolele i keia poe a’u i wae aku ai; a no ko lakou manaoio ana mai ia’u, ko’u wae ana ia lakou noloko mai o ko ke ao nei.

21 E ka Makua e, ke pule aku nei au ia oe, e haawi mai oe i ka Uhane Hemolele i ka poe a pau e manaoio ana i ka lakou nei mau olelo.

22 E ka Makua e, ua haawi mai oe ia lakou nei i ka Uhane Hemolele, no ko lakou manaoio ana ia’u, a ke ike mai nei oe ua manaoio mai lakou ia’u, no ka mea, ke lohe nei oe ia lakou, a ke pule nei lakou ia’u; a ke pule nei lakou ia’u, no ka mea, owau pu me lakou.

23 Ano, e ka Makua e, ke pule aku nei au ia oe no lakou, a no ka poe a pau no hoi e manaoio ana ma ka lakou nei mau olelo, i manaoio mai ai lakou ia’u, i noho au iloko o lakou me oe, e ka Makua, iloko o’u, i hookahi kakou.

24 [m 9, p 4] A eia kekahi, ia Iesu i pule aku ai pela i ka Makua, hele mai la oia i kana poe haumana la, aia hoi, hoomau iho la lakou, me ka hooki ole, e pule aku ia ia; aole lakou hoonui i na olelo, no ka mea, ua haawiia mai ia lakou ka mea a lakou e pule aku ai, a ua hoopihaia mai lakou me ka makemake.

25 A eia kekahi, hoopomaikai mai la o Iesu ia lakou, me lakou i pule aku ai ia ia, a maliu oluolu mai la kona maka, a alohi mai la ka malamalama o kona maka ia lakou, a, aia, ua keokeo lakou e like me ka maka, a me na aahu no hoi o Iesu; a, aia hoi, oi aku la ke keokeo o ia mau mea mamua o ke keokeo a pau, he oiaio, aole loa he mea ma ka honua nei i like ke keokeo me ke keokeo o ia mau mea.

27 A huli hou ae la oia mai o lakou ae, a hele iki aku la, a kulou iho la oia i ka honua; a pule hou aku la oia i ka Makua, i ka i ana,

28 E ka Makua, ke hoalohaloha aku nei au ia oe no kou hoomaemae ana i ua poe la a’u i wae aku ai, no ko lakou manaoio, a ke pule aku nei au no lakou, a no ka poe no hoi e manaoio ana ma ka lakou nei mau olelo, i hoomaemaeia ai lakou iloko o’u, ma o ka manaoio la i ka lakou nei mau olelo, me lakou nei i hoomaemaeia’i iloko o’u.

29 E ka Makua e, aole au e pule ana no ko ke ao nei, aka no ua poe la au i haawi mai ai ia’u noloko mai o ko ke ao nei, no ko lakou manaoio, i hoomaemaeia mai ai lakou iloko o’u, i noho au iloko o lakou me oe, e ka Makua, iloko o’u, i hookahi kakou, i hoonaniia mai ai au iloko o lakou.

30 [m 9, p 5] A ia Iesu i olelo mai ai i keia mau olelo, hele hou mai la ia i kana poe haumana la, a, aia hoi, e pule onipaa ana lakou, me ka hooki ole, ia ia; a maliu oluolu hou mai la oia ia lakou; aia hoi, ua keokeo lakou, e like me Iesu.

32 A ua hiki ole i ka elelo ke olelo mai i na olelo ana i pule aku ai, aole hoi e hiki ke palapalaia e kanaka na olelo ana i pule aku ai.

33 A lohe ae la ka lehulehu, a ke hoike aku la, a ua weheia na naau o lakou, a hoomaopopo iho la lakou ma ko lakou mau naau i na olelo ana i pule aku ai.

34 Aka hoi, no ka nui a kupaianaha o na olelo ana i pule aku ai, ua hiki ole ke palapalaia ia mau mea, aole hoi e hiki ke ekemuia’ku e kanaka.

35 [m 9, p 6] A eia kekahi, ia Iesu i hoopau ai i kana pule ana, hele hou mai la oia i ka poe haumana la, a i mai la ia lakou, Aole loa au i ike i ka manaoio nui me neia, mawaena o ka poe Iudaio a pau; nolaila, ua hiki ole ia’u ke hoike aku ia lakou i na hana mana nui me neia, no ko lakou manaoio ole.

36 He oiaio ka’u e olelo aku nei ia oukou, aole loa kekahi o lakou i ike i na mea me oukou i ike ai; aole hoi lakou e lohe i na mea nui me oukou i lohe ai.

1 [mokuna 9, paukū 7] A eia kekahi, kauoha mai la oia i ka lehulehu e hooki aku lakou i ka pule, a me kana poe haumana no hoi. A kauoha mai la oia ia lakou e hooki ole lakou i ka pule ma ko lakou mau naau.

2 A kauoha mai la oia ia lakou e ala’e, a e ku iluna ma ko lakou mau wawae. A ala ae la lakou, a ku iho la ma ko lakou mau wawae.

3 A eia kekahi, wawahi berena hou ae la oia, a hoopomaikai iho la ia, a haawi mai la i ka poe haumana e ai.

4 A ia lakou i ai ai, kauoha mai la oia ia lakou e wawahi berena ae lakou, a e haawi aku i na kanaka.

5 A ia lakou i haawi aku ai i na kanaka, haawi mai la no hoi oia ia lakou i waina e inu, a kauoha mai la ia lakou e haawi aku lakou i na kanaka.

6 Ano, aohe he berena, aohe hoi he waina, i laweia mai e ka poe haumana, aole hoi e na kanaka;

7 Aka haawi oiaio mai la nae oia ia lakou i berena e ai ai, a waina hoi e inu ai;

8 A i mai la oia ia lakou, O ka mea e ai ana i keia berena, e ai ana oia i ko’u kino no kona uhane, a o ka mea e inu ana i keia waina, e inu ana ia i ko’u koko no kona uhane, a, aole kona uhane e pololi hou, aole hoi makewai hou, aka e hoopihaia oia.

9 Ano, i ka wa o na kanaka a pau i ai ai a i inu ai, aia hoi, ua hoopihaia lakou me ka Uhane, a hea aku la lakou me ka leo hookahi, a hoonani aku la ia Iesu, a lakou i ike aku ai a i lohe ai no hoi.

10 [m 9, p 8] A eia kekahi, ia lakou a pau i hoonani aku ai ia Iesu, i mai la oia ia lakou, Aia hoi, ke hoopau aku nei au i ke kauoha a ka Makua i kauoha mai ai ia’u no keia poe kanaka, he koena hoi lakou o ko ka hale o Iseraela.

11 Ke hoomanao nei oukou ua olelo aku la au ia oukou; a i aku la, I ka wa e hookoia’i na olelo a Isaia, aia hoi, ua palapalaia ia mau mea, aia no ia mau mea imua o oukou, nolaila e huli ia mau mea.

12 Oiaio, he oiaio ka’u e olelo aku nei ia oukou, i ka wa e hookoia’i ia mau mea, alaila ka hookoia’na o ka berita a ka Makua i hana mai ai i kona poe kanaka, e ko ka hale o Iseraela.

13 Alaila, e houluuluia mai ai na koena, ka poe e hoopuehuia aku auanei ma ka ili o ka honua nei, mai ka hikina mai, a mai ke komohana mai, a mai ka hema mai, a mai ka akau mai; a e laweia mai lakou i ka ike no ka Haku ko lakou Akua, na lakou i hoolapanai mai.

14 A ua kauoha mai la ka Makua ia’u e haawi aku ai au ia oukou i keia aina, no ko oukou hooilina.

15 A ke i aku nei au ia oukou, ina e mihi ole ka poe Genetile, mahope iho o ka pomaikai e loaa’i ia lakou, mahope iho hoi o ko lakou hoopuehu ana aku i ko’u poe kanaka,

16 Alaila, e hele aku oukou ka poe koena o ko ka hale o Iakoba, mawaena o lakou; a mawaena konu auanei oukou o lakou, ka poe nui loa; a mawaena auanei oukou o lakou, me he liona la mawaena o na holoholona o ka ululaau, a me he liona opio la mawaena o na pua hipa, nana, ke hele oia mawaena, e hahi ilalo a haehae aku a liilii, a aole e hiki i kekahi ke hoopakele.

17 E hapaiia kou lima maluna iho o kou poe ku e mai, a e hookiia’ku kou poe enemi a pau.

18 A e houluulu mai au i ko’u poe kanaka i kahi hookahi, me he kanaka la i houluulu ai i kona mau pua palaoa iloko o kahi hehi,

19 No ka mea, e hoolilo aku au i ka poe kanaka, ka poe a ka Makua i hana berita mai ai, he oiaio, e hoolilo aku au i kou pepeiaohao i hao, a e hoolilo aku au i kou mau maiuu wawae i keleawe. A e kui iho oe a liilii na kanaka he nui; a e hoolaa aku i ka lakou loaa no ka Haku, a i ko lakou waiwai i ka Haku o ka honua a pau. Aia hoi, owau no ka mea nana e hana ia mea.

20 [m 9, p 9] A e hiki io mai auanei, wahi a ka Makua, e kau auanei ka pahikaua a ko’u hoopai maluna ae o lakou ma ia la; a ke mihi ole lakou, e haule auanei ia maluna o lakou, wahi a ka Makua, he oiaio, maluna iho o na lahuikanaka a pau o ka poe Genetile.

21 A e hiki io mai auanei, na’u e hookupaa aku i ko’u poe kanaka, e ko ka hale o Iseraela.

22 Aia hoi, e hookupaa aku au i keia poe kanaka ma keia aina, i ka hooko ana i ka berita a’u i hana aku ai me ko oukou kupuna kane o Iakoba; a e lilo auanei ia i Ierusalema hou. A mawaena konu auanei o keia poe kanaka na mana o ka lani; he oiaio, e noho no au iwaena konu o oukou.

23 Aia hoi, owau no ka mea a Mose i olelo mai ai, i ka i ana, E hooku mai auanei ka Haku, ko oukou Akua i kekahi kaula ia oukou e like me au, no ko oukou poe hoahanau, a e hoolohe oukou ia ia ma na mea a pau ana e olelo mai ai ia oukou. A e hiki mai keia, o ka me e hoolohe ole i ua kaula la, e okiia’ku ia, mai kona poe kanaka aku.

24 He oiaio ka’u e olelo aku nei, ua oiaio: a o na kaula a pau mai ia Samuela mai, a me ka poe e hahai ana mahope mai ona, ka poe a pau i olelo mai, ua hoike mai la no’u.

25 Aia hoi, o oukou no na mamo a ka poe kaula; a no ko ka hale o Iseraela oukou; a no ka berita oukou a ka Makua i hana mai ai me ko oukou poe kupuna, me ka i ana ia Aberahama, Ma kau hua, e hoopomaikaiia’ku auanei na ohana a pau o ka honua;

26 Ua hooku mua mai la ka Haku ia’u no oukou, a hoouna mai la ia’u e hoopomaikai aku ia oukou, i ka hoohuli ana mai i kela mea keia mea o oukou mai kona mau hala ae; a o keia, no ka mea, he poe keiki oukou a ka berita.

27 A mahope iho o ko oukou hoopomaikaiia’na, alaila, e hooko ana ka Makua i ka berita ana i hana mai ai me Aberahama, i ka i ana, Ma kau hua e hoopomaikaiia’ku na ohana a pau o ka honua, ma ka ninini ana o ka Uhane Hemolele ma o’u nei maluna iho o ka poe Genetile, a o keia pomaikai maluna iho o ka poe Genetile, e hoolilo no ia mea ia lakou i poe ikaika loa mamua o na mea a pau, ma ka hoopuehu aku ana i ko’u poe kanaka, e ko ka hale o Iseraela;

28 A e lilo auanei lakou i poe hahau i na kanaka o keia aina. Aka hoi, ia lakou e loaa’i kuu euanelio mana a pololei, alaila, ina e hoopaakiki ku e mai lakou i ko lakou mau naau ia’u, e hoihoi hou aku no au i ka lakou mau hala maluna iho o ko lakou mau poo iho, wahi a ka Makua.

29 A e hoomanao no au i ka berita a’u i hana aku ai me ko’u poe kanaka, a ua hana berita aku au me lakou, na’u e houluulu mai ia lakou i kahi hookahi, i ko’u manawa ku pono; i haawi hou aku ai au ia lakou i ka aina o ko lakou poe kupuna, i hooilina no lakou, oia no ka aina o Ierusalema, oia no ka aina pomaikai no lakou no ka wa pau ole, wahi a ka Makua.

30 [m 9, p 10] A eia kekahi, ke hele mai la ka manawa, e haiia’ku ai kuu euanelio mana a pololei ia lakou,

31 A e manaoio mai no lakou ia’u, owau no o Iesu Kristo, ke Keiki a ke Akua, a e pule aku i ka Makua ma ko’u inoa.

32 Alaila e hookiekie no ko lakou poe kiai i ko lakou leo; a me ka leo lakou e hookani pu ai: no ka mea e ike no lakou he maka no, he maka.

33 Alaila, e houluulu hou pu mai no ka Makua ia lakou, a e haawi aku ua lakou ia Ierusalema i aina hooilina no lakou.

34 Alaila e hookani olioli lakou—e olioli pu oukou, e na wahi neoneo o Ierusalema: no ka mea, ua hoomaha ka Makua i kona poe kanaka, ua hoolapanai oia ia Ierusalema.

35 Ua hoike ka Makua i kona lima hemolele ma na maka o na lahuikanaka a pau: a e ike no na kukulu a pau o ka honua i ka hoola ana o ka Makua; a o ka Makua me au hookahi maua.

36 Alaila e hookoia ka mea i palapalaia, E ala, e ala hou a e aahu i kou ikaika, e Ziona; e komo i kou lole nani, e Ierusalema, ke kulanakauhale laa: no ka mea, ma keia wa aku aole e hele hou iloko ou, ka mea i okipoepoe ole ia a me ka haumia.

37 E lulu oe ma oe mai ka lepo; e ku iluna, a e noho ilalo, e Ierusalema; e wehe oe i na mea paa o kou ai, e ke kaikamahine pio o Ziona.

38 No ka mea, penei wahi a ka Haku, ua kuai aku oukou ia oukou iho no ka ole; a e hoolapanaiia auanei oukou me ke kala ole.

39 Oiaio, he oiaio, ka’u e olelo aku nei ia oukou, e ike ko’u poe kanaka i ko’u inoa; he oiaio, ia la la e ike no lakou wau no ka mea e olelo ana.

40 [m 9, p 11] Alaila, e i ae lakou, E, nani wale ma na mauna na wawae o ka mea e lawe mai ana i ka olelo maikai ia lakou, ka mea e hoolaha ana i ka malu: ka mea e lawe mai ana i ka olelo maikai o ka olioli ia lakou, ka mea e hoolaha ana i ke ola; ka mea e olelo ana ia Ziona, ke malama aupuni nei kou Akua?

41 Alaila e laha aku kekahi leo, E haalele oukou, e haalele oukou, e puka aku oukou mawaho olaila, mai hoopa aku i ka mea haumia; e puka aku oukou mailoko aku ona; e huikalaia oukou, e ka poe e halihali ana i na ipu o ka Haku.

42 No ka mea, aole oukou e puka aku me ka holo, aole hoi e hele me ka auhee: no ka mea, e hele no ka Haku imua o oukou; a o ke Akua o ka Iseraela auanei ko oukou kiai hope.

43 Aia hoi, e hana noiau auanei ka’u kauwa, e hapaiia no hoi ia, a e hookiekieia, a e kiekie loa auanei oia.

44 Me kekahi poe he nui i haohao ai ia oe; (ua oi aku ka hoomainoinoia’na o kona maka mamua i kekahi kanaka e ae, a o kona helehelena hoi mamua o ko na keiki a kanaka,)

45 Pela no oia e pipi ai i na lahuikanaka he nui loa; e hoopaa na’lii i ko lakou mau waha ia ia, no ka mea, e ike auanei lakou i ka mea i hai ole ia’ku ia lakou, a e noonoo pono lakou i ka mea a lakou i lohe ole ai.

46 Oiaio, he oiaio ka’u e olelo aku nei, e hiki oiaio mai ua mau mea nei a pau, me ka ka Maku i kauoha mai ai ia’u. Alaila, e ko ai keia berita a ka Makua i hana berita ai me kona poe kanaka; alaila, e hoonoho hou ia o Ierusalema me ko’u poe kanaka, a e lilo auanei ia i aina hooilina no lakou.

1 A he oiaio ka’u e olelo aku nei ia oukou, ke haawi aku nei au ia oukou i hoailona, i ike ai oukou i ka wa e kokoke ai ke ko ana o ia mau mea, na’u e houluulu i ko’u poe kanaka mai ko lakou hoopuehu loihi ia ana, e ko ka hale o Iseraela, a e hookupaa hou aku au i ko’u Ziona mawaena o lakou.

2 Eia ka mea a’u e haawi aku ai ia oukou i hoailona, non ka mea, he oiaio ka’u e olelo aku nei ia oukou, I ka wa a keia mau mea a’u e hai aku nei ia oukou, a me na mea a’u e hai aku ai ma neia hope aku no’u iho, a ma ka mana o ka Uhane Hemolele hoi, ka mea e haawiia mai ia oukou e ka Makua, i ka wa e hoikeia’ku ai ka poe Genetile, i ike lakou no keia lahuikanaka he poe i koe o ko ka hale o Iakoba, a no keia poe kanaka o’u, e hoopuehuia’ku auanei e lakou;

3 Oiaio, he oiaio ka’u e olelo aku nei ia oukou, i ka wa e hoikeia’ku ai keia mau mea ia lakou e ka Makua, a e hoopukaia’i e ka Makua, mai o lakou mai ia oukou,

4 No ka mea, he mea naauao ia i ka Makua e hookupaaia’ku lakou ma keia aina, a e kukuluia i lahuikanaka ku okoa e ka mana o ka Makua, i hiki mai ai keia mau mea mai ia lakou mai i kekahi koena o ka oukou poe hua, i ko ai ka berita a ka Makua, ana i hana berita ai me kona poe kanaka, e ko ka hale o Iseraela;

5 Nolaila, i ka wa a keia mau hana, a me na hana e hanaia’i ma neia hope aku mawaena o oukou, e puka mai ai mai ka poe Genetile mai i ka oukou poe hua, ka poe e emi ana iloko o ka hoomaloka no na lawehala;

6 No ka mea, pela e pono ai i ka Makua e puka mai auanei ia mea mai ka poe Genetile mai, i hoike aku ai oia i kona mana i ka poe Genetile, no keia mea, e hiki i ka poe Genetile, ina hoopaakiki ole lakou i ko lakou mau naau, ke mihi a hele mai io’u nei, a e bapetizoia ma ko’u inoa, a e ike i na kumu oiaio o ko’u ao ana, i helu pu ia’i lakou mawaena o ko’u poe kanaka, e ko ka hale o Iseraela;

7 A i ka wa e hiki mai ai keia mau mea, i hoomaka kau poe hua e ike i keia mau mea, he hoailona auanei ia ia lakou, i ike ai lakou ua hoomakaia ka hana a ka Makua ano, ma ka hooko ana i ka berita ana i hana mai ai i ka poe kanaka no ko ka hale o Iseraela.

8 A i ka wa e hiki mai ai ia la, e hoopaa na’lii i ko lakou mau waha; no ka mea, e ike lakou i ka mea i hai ole ia aku ia lakou; a e noonoo pono lakou i ka mea a lakou i lohe ole ai.

9 No ka mea, ma ia la, no’u nei e hana aku no ka Makua i kekahi hana, a he hana nui a kupaianaha auanei ia mawaena o lakou; a aia auanei kekahi poe mawaena o lakou e manaoio ole ia mea, ina e hai aku kekahi kanaka ia mea ia lakou.

10 Aka hoi, aia ma kuu lima auanei ke ola o ka’u kauwa; nolaila, aole lakou e hoeha aku ia ia, e hoomainoinoia nae oia ma o lakou la. E hoola aku nae au ia ia, no ka mea, e hoike aku au ia lakou ua oi aku ko’u naauao mamua o ka maalea o ka diabolo.

11 [mokuna 9, paukū 12] Nolaila, e hiki mai auanei keia, o ka mea e manaoio ole mai i ka’u mau olelo, owau no o Iesu Kristo no, ka mea a ka Makua e kauoha aku ai ia ia e hoopuka aku i ka poe Genetile, a e haawi aku auanei ia ia i ka mana, nana e hoopuka aku ia mau mea i ka poe Genetile, (a e hanaia auanei ia e like me ka Mose i olelo mai ai,) e hookiia’ku auanei lakou maimaena aku o ko’u poe kanaka, ka poe o ka berita;

12 A o ko’u poe kanaka, ka poe koena o ko ka hale o Iakoba, mawaena auanei lakou o ka poe Genetile, he oiaio, mawaena konu o lakou la, me he liona la mawaena o na holoholona o ka ululaau, me he liona opio la mawaena o na puahipa, nana, ina e hele oia mawaena, e hahi ai ilalo a nahaehae liilii, aole hiki i kekahi ke hoopakele.

13 E hapaiia’ku ko lakou lima maluna iho o ko lakou poe e ku e mai, a e hookiia’ku ko lakou poe enemi a pau.

14 He oiaio, auwe ka poe Genetile, ke mihi ole lakou, no ka mea, e hiki mai auanei keia ma ia la, wahi a ka Makua, e hooki aku au i kou poe lio mailoko aku ou, a e anai aku au i kou mau halekaa,

15 A e hooki aku au i na kulanakauhale o kou aina, a e hoohiolo aku ilalo i kou mau wahi paa a pau;

16 A e hooki aku au i na hoopiopio mailoko aku o kou lima, aole ou poe kilo hou ma ia hope aku:

17 A e hooki aku au i na kii kalaiia ou, a me kou mau kii akua maiwaena konu aku ou; a e hoomana hou ole aku oe i na hana a kou mau lima,

18 A e uhuki aku au i na ululaau maiwaena konu aku ou; pela hoi au e anai aku ai i kou mau kulanakauhale.

19 A e hiki mai auanei keia, o na wahahee, a me na hoopunipuni, a me na paonioni, a me na paio, a me na hana maalea a na kahuna pule hoopunipuni, a me na moe kolohe, e hoopauia’ku auanei ia mau mea.

20 No ka mea, e hiki mai keia, wahi a ka Makua, ma ua la la, o na mea e mihi ole a hele ole mai i ka’u Keiki punahele la, e hooki aku au ia lakou maiwaena aku o ko’u poe kanaka, e ko ka hale o Iseraela;

21 A e hooko aku au i ka hoopai a me ka inaina maluna iho o lakou, me ia maluna iho o ko na aina e, me ka mea a lakou i lohe ole ai.

22 [mokuna 10, paukū 1] Aka, ina e mihi lakou, a e hoolohe mai i ka’u mau olelo, a hoopaakiki ole i ko lakou mau naau, e hookupaa aku au i ko’u ekalesia mawaena o lakou, a e komo mai auanei lakou i ka berita, a e helu pu ia mawaena o kiea, ke koena o Iakoba, ia lakou wau i haawi aku ai i keia aina i hooilina no lakou,

23 A e kokua auanei lakou i kou poe kanaka, ke koena no Iakoba; a me ka poe a pau no hoi o ko ka hale o Iseraela, ka poe e hele mai auanei, i hiki ai ia lakou ke kukulu i kekahi kulanakauhale, e kapaia auanei ia ka Ierusalema Hou;

24 Alaila, e kokua no lakou i ko’u poe kanaka, i houluuluia mai ai lakou, ka poe i hoopuehuia’ku maluna iho o ka ili a pau o ka aina, iloko i ka Ierusalema Hou.

25 Alaila, e iho mai auanei ilalo ka mana o ka lani mawaena o lakou; a owau no hoi kekahi mawaena konu,

26 Alaila, e hoomaka ka hana a ka Makua, ma ua la la i ka wa e haiia’ku ai keia euanelio mawaena o ke koena o keia poe kanaka. He oiaio ka’u e olelo aku nei ia oukou, ma ua la la e hoomaka no ka hana a ka Makua mawaena o ka poe i hoopuehuia’ku a pau o ko’u poe kanaka; he oiaio, o na ohana i nalowale, a ka Makua i alakai aku ai mailoko aku o Ierusalema.

27 He oiaio, e hoomaka auanei no ka hana mawaena o ka poe i hoopuehuia’ku a pau o ko’u poe kanaka, me ka Makua, e hoomakaukau ai i ke ala i hiki ai ia lakou ke hele mai io’u nei, i hiki ia lakou ke kahea mai i ka Makua ma ko’u inoa.

28 He oiaio, alaila e hoomaka no ka hana, me ka Makua, mawaena o na lahuikanaka a pau, i ka hoomakaukau ana i ke ala, e hiki ai i kona poe kanaka ke houluuluia i ka aina o ko lakou hooilina.

29 A e puka aku auanei lakou mai na lahuikanaka a pau aku; a e hele ole aku auanei lakou me ka holo, aole hoi me ka auhee: no ka mea, e hele aku au imua o lakou, wahi a ka Makua, a o ko lakou kiai hope no hoi au.

1 Alaila, e ko ai ka mea i palapalaia. E oli oe, e ka mea pa, ka mea i hanau ole: e oli i ke oli, a e hooho nui aku, e ka mea hapai ole i ke keiki; no ka mea, ua nui aku na keiki a ka mea i neoneo, i na keiki a ka wahine i marieia, wahi a ka Haku.

2 E hoikea aku i kahi o kou halelewa, a e hoopalahalaha hoi lakou i na paku o kou mau wahi e noho ai; mai hoouuku, e hooloihi aku i kou mau kaula, a e hooikaika i kou mau makia;

3 No ka mea, e poha aku auanei oe ma ka lima akau a ma ka lima hema; a e ili mai ka poe Genetile na kau poe hua, a ia lakou no e hoonohoia na kulanakauhale neoneo.

4 Mai makau oe, no ka mea, aole oe e hilahila; mai hoopalaimaka hoi: no ka mea, aole oe e hoohilahilaia: no ka mea, e hoopoina no oe i ka hilahila o kou wa opiopio, a e hoomanao hou ole hoi i ka hoinoia o kou noho wahine kane maka ana.

5 No ka mea, o ka mea nana oe i hana, o kau kane, o ka Haku o na Lehulehu kona inoa; a o kou Hoolapanai, o ka Mea Hemolele ia o ka Iseraela; e kapaia auanei oia, o ke Akua o ka honua a pau.

6 No ka mea, ua hea aku ka Haku ia oe, me he wahine la i haaleleia a kaumaha hoi ma ka uhane, a he wahine hoi o ka wa opiopio, i kou wa i hooleiia’i, wahi a ke Akua ou.

7 No ka manawa uuku, ua haalele aku au ia oe; aka me na lokomaikai he nui loa, e hoiliili aku ai au ia oe.

8 I ka huhu uuku huna no au i ko’u maka ia oe no kekahi minute; aka, me ke aloha mau loa, e lokomaikai aku ai au ia oe, wahi a ka Haku, kou Hoolapanai.

9 No keia mea, o na wai o Noa ia’u, no ka mea, me a’u i hoohiki ai, aole e hoohalana hou na wai o Noa i ka honua, pela no wau i hoohiki ai, aole au e huhu aku ia oe.

10 No ka mea, e lilo auanei na mauna, a e hooneeneeia na puu; aka, aole e lilo aku ko’u lokomaikai mai ou aku, aole hoi e hooneeneeia ka berita a ko’u poe kanaka, wahi a ka Haku, ka mea i aloha mai ia oe.

11 [mokuna 10, paukū 2] E ka mea popilikia i hooleileiia me ka makani ino, aole hoi i hooluoluia! aia hoi, e hoonoho no wau i kou mau pohaku me na pena maikai, a o kou mau kumu me na pohaku sapeiro.

12 A e hana no wau i kou mau puka makani i na agate, a me kou mau pukapa i mau pohaku ula maikai loa, a me kou mau mokuna a pau i pohaku maikai.

13 A e aoia no hoi kau mau keiki a pau e ka Haku; a e nui loa auanei ka maluhia o kau mau keiki.

14 Ma ka pono no oe e hookumuia’i, e mamao aku oe i ka hookaumaha iwale; no ka mea, aole oe e makau ana, a i ka weliweli hoi; no ka mea, aole e hookokoke mai ia ia oe.

15 Aia hoi, e houluulu ku e io mai lakou ia oe, aole ma o’u nei; o ka mea houluulu ku e aku ia oe, e hoohauleia auanei oia nou.

16 Aia hoi, na’u no i hana i ka amara nana e puhi i ka lanahu i ke ahi, a i hoopuka mai ai i mea hana no kana hana; a na’u hoi i hana i ka mea make e make ai.

17 O na mea hoeha a pau i hanaia e ku e ia oe, aole o lakou pomaikai; a o na elelo a pau e ala mai e hoohewa ku e ia oe, nau no ia e hoohewa aku. Oia ka hooilina o na kauwa a ka Haku, a na’u hoi ko lakou pono, wahi a ka Haku.

1 Ano hoi, ke olelo aku nei au ia oukou, he mea e pono ai no oukou e imi i keia mau mea. He oiaio, he kauoha ka’u e haawi aku nei ia oukou, na oukou e imi ikaika i keia mau mea, no ka mea, ua nani na olelo a Isaia.

2 No ka mea, he oiaio, olelo mai la oia no na mea a pau no ko’u poe kanaka o ko ka hale o Iseraela, nolaila, he mea e pono ai nana e olelo aku hoi i ka poe Genetile.

3 a o na mea a pau ana i olelo mai ai, ua hiki mai a e hiki mai ana, e like io me na olelo ana i olelo mai ai.

4 Nolaila, e hoolohe mai i ka’u mau olelo, e kakau i na mea a’u i olelo aku ai ia oukou; a e like me ka manawa a me ka makemake o ka Makua, e hele aku auanei ia mau mea i ka poe Genetile.

5 A o ka mea e hoolohe ana i ka’u mau olelo, a e mihi, a e bapetizoia, oia ke hoolaia. E imi i ka ka poe kaula, no ka mea, ua nui loa na mea e hoike mai ana no ua mau mea nei.

6 [mokuna 10, paukū 3] Ano, eia kekahi, ia Iesu i olelo mai ai i keia mau olelo, i hou mai la oia ia lakou, mahope iho o kona wehewehe ana i na palapala hemolele a pau ia lakou, a lakou i loaa ai, i mai la oia ia lakou, Aka hoi, he mau olelo hemolele e ae ka’u e makemake nei na oukou e palapala, i loaa ole ai ia oukou.

7 A eia kekahi, i mai la oia ia Nepai, E lawe mai i ka mooolelo a oukou i malama’i.

8 A ia Nepai i lawe mai ai i na mooolelo, a waiho iho la ia mau mea imua ona, alawa ae la oia i kona mau maka ma ia mau mea, a i mai la,

9 He oiaio ka’u e olelo aku nei ia oukou, kauoha aku la au i ka’u kauwa Samuela, ka Lamana, nana e hoike aku i keia poe kanaka, ma ka a a ka Makua i hoonani mai ai i kona inoa iloko o’u, ua nui no ka poe hoano e ala ana mai ka make mai, a e ikea e na mea he nui wale, a e lawelawe aku ia lakou. A i mai la oia ia lakou, Aole anei pela?

10 A olelo aku la kana poe haumana ia ia, a i aku la, He oiaio, e ka Haku e, wanana mai la o Samuela e like me ka’u mau olelo, a ua ko mai la ia mau mea a pau.

11 A i mai la o Iesu ia lakou, Heaha la ko oukou mea i palapala ole ai i keia mea, Ua ala mai la na mea hoano he nui a ikea e kekahi poe he nui wale, a lawelawe mai la ia lakou?

13 A eia kekahi, kauoha mai la o Iesu, e palapalaia ia mea; nolaila, ua palapalaia ia mea me ia i kauoha mai ai.

14 [mokuna 11, paukū 1] Ano, eia kekahi, ia Iesu i wehewehe mai ai i na palapala hemolele a pau a lakou i palapala ai i hookahi, kauoha mai la oia ia lakou, e ao aku lakou i na mea ana i wehewehe mai ai ia lakou.

1 A eia kekahi, kauoha mai la oia ia lakou, e palapala iho i na olelo a ka Makua i haawi mai ai ia Malaki, ana e hai mai ai ia lakou. A eia kekahi, mahope iho o ka palapalaia’na o ia mau mea, wehewehe mai la oia ia mau mea. A eia na olelo ana i hai mai ai ia lakou, i ka i ana, peneia wahi a ka Makua ia Malaki, Aia hoi, e hoouna auanei au i ko’u elele, a nana e hoomakaukau i ko’u alanui imua o’u, a e hiki wawe mai auanei ka Haku, a oukou e imi nei i kona luakini, oia ka elele o ka berita, o ka mea a oukou e olioli nei; aia hoi, e hele mai auanei ia, wahi a ka Haku o na Lehulehu.

2 Aka, owai ke hoomanawanui i ka la o kona hiki ana mai? A owai ke ku paa i kona ikeia ana? No ka mea, ua like ia me ke ahi o ka mea hoohehee, a me ka sopa o ka mea hoomaemae.

3 A e noho ia me he mea hoohehee a me ka hoomaemae i ke kala: a e hoomaemae ia i na keiki a Levi, a e holoi ia lakou e like me ke gula a me ke kala, i mohai aku ai lakou i ka mohai iloko o ka pono i ka Haku.

4 Alaila, e oluolu ka mohai ana a ka Iuda a me ka Ierusalema i ka Haku, e like me ia i na la kahiko, a i na makahiki mamua.

5 A e hele aku no au a kokoke io oukou la e hooko i ke kanawai; a e lilo au i hoike hiki wawe e ku e aku i ka poe anaana, a me na moe kolohe, a i na mea hoohiki wahahee, a me ka poe hooluhi hewa i ka mea hoolimalima ma kana uku, a i ka wahinekanemake, a me ke keiki makua ole, a i hoohuli ae i ka malihini, aole hoi makau ia’u, wahi a ka Haku o na Lehulehu.

6 No ka mea, owau no ka Haku, aole au lauwili; nolaila, aole oukou i hoopauia, e na mamo i Iakoba.

7 [mokuna 11, paukū 2] Mai na la mai o ko oukou poe kupuna, ua haalele oukou i ko’u mau kanawai, a ua malama ole ia mau mea. E hoi hou mai oukou io’u nei, ai e hoi hou aku au io oukou la, wahi a ka Haku o na Lehulehu. Aka, olelo mai la oukou, Ma ke aha makou e hoi hou aku ai?

8 [m 11, p 3] E hao anei ke kanaka i ke Akua? Aka, ua hao mai oukou ia’u. Aka, ke ninau mai nei oukou, Ma ke aha ka makou e hao aku ai ia oe? Ma na hapaumi o ka waiwai, a me na mohai.

9 Ua hoopoinoia oukou me ka poino, no ka mea, ua hao mai oukou ia’u, o keia lahuikanaka a pau.

10 E lawe mai na waiwai hapaumi a pau iloko o ka hale ahu waiwai, i ai maloko o ko’u hale, a hoao mai oukou ia’u ma ia mea, wahi a ka Haku o na Lehulehu, i wehe ai paha au i na puka o ka lani, a e ninini iho i ka pomaikai ia oukou, a pau na wahi o oukou, aohe koe.

11 A no oukou au e papa aku ai i ka mea hokai, a e hoopau ole ai ia i ka hua o ko oukou aina; aole hoi e hoohua hewa mai ko oukou humuwaina, i kona hua mamua o ka wa pono ma na mala, wahi a ka Haku o na Lehulehu.

12 A e kapa mai auanei na lahuikanaka a pau ia oukou, he pomaikai, no ka mea, he aina i makemakeia auanei oukou, wahi a ka Haku o na Lehulehu.

13 [m11, p 4] Ua oolea ka oukou mau olelo ku e mai ia’u, wahi a ka Haku. Ke olelo mai nei nae oukou, penei, Heaha ka makou i olelo ku e ai ia oe?

14 Ua olelo oukou, ua make hewa ka malama i ke Akua, a heaha hoi ka pomaikai i ko kakou malama ana i ka mea ana i kauoha mai ai, a i ka hele kaumaha hoi imua o ka Haku o na Lehulehu.

15 A, ano, ke kapa nei kakou i ka poe hookiekie, he pomaikai; he oiaio, ua kukuluia’e iluna ka poe hana ino; he oiaio, ua hoopakeleia hoi ka poe hoao i ka Akua.

16 [m 11, p 5] Alaila, o ka poe makau i ka Haku, kamailio pinepine pu iho la lakou kekahi i kekahi, a haliu mai la ka Haku, a hoolohe mai la; a ua kakauia ka buke hoomanao imua ona no lakou, no ka poe makau i ka Haku, a hoomanao hoi i kona inoa.

17 No’u auanei lakou, wahi a ka Haku o na Lehulehu, i ka la a’u e ahu iho ai i kuu waiwai; a e hoola au ia lakou, e like me ka hoola ana o ke kanaka i kana keiki nana ia i malama.

18 Alaila, e hoi hou mai oukou a e hoomaopop iwaena o ka poe pono a o ka poe hewa, iwaena hoi o ka mea malama i ke Akua, a o ka mea malama ole ia ia.

1 No ka mea, aia! ke hele mai la ka la e enaena ana me he umu ahi la; a o ka poe hookiekie a pau, a me ka poe hana ino a pau, he mauu lakou: a e hoopau ua la la e hiki mai ana ia lakou, wahi a ka Haku o na Lehulehu, a e waiho ole ia i aa no lakou, aole hoi lala.

2 [mokuna 11, paukū 6] Aka, no oukou ka poe weliweli i ko’u inoa, e ala mai no auanei ke Keiki a ka pono me ke ola ma kona mau eheu; a e hele aku oukou, a e ulu ae e like me na bipi keiki i kupaluia.

3 A e hehi iho ilalo oukou i ka poe aia; no ka mea, e lilo lakou i lehu malalo iho o ko oukou mau wawae, i ka la a’u e hana’i i keia, wahi a ka Haku o na Lehulehu.

4 E hoomanao oukou i ke kanawai o Mose, o kuu kauwa, a’u i kauoha aku ai ia ia ma Horeba, no ka Iseraela a pau, me na kanawai a me na olelo hoopono.

5 Aia hoi, e hoouna aku no au ia Elia ke kaula io oukou la, mamua o ka hiki ana o ua la nui weliweli la o ka Haku;

6 A e hoohuli ae oia i ka naau o na makua i na keiki, a me na naau o na keiki i ko lakou mau makua, o hele aku auanei au, a e hahau i ka honua i ka poino.

1 [mokuna 11, paukū 7] Ano, eia kekahi, ia Iesu i hai mai ai i keia mau mea, wehewehe mai la oia ia mau mea i na kanaka, a wehewehe mai la oia i na mea a pau ia lakou, o na mea nui a me na mea uuku no hoi.

2 A i mai la oia, O keia mau olelo hEmolele i loaa ole ai ia oukou, oia ka ka Makua i kauoha mai ai ia’u e haawi aku ia oukou, no ka mea, he mea naauao ia ia, e haawiia’ku ia mau mea nei i na hanauna e hiki mai ana.

3 A wehewehe mai la oia i na mea a pau, oia, mai kinohi a hiki aku i ka wa ana e hele mai ai ma kona nani; he oiaio, o na mea a pau e hiki mai ana maluna iho o ka ili o ka honua, a hiki aku i ka manawa e hehee wale ai na kumu mua me ka wela loa o ke ahi, a e owulu pu ia ka honua me he pepa la, a e hala aku na lani a me ka honua;

4 A hiki loa aku i ka la nui hope, i ka wa e ku ai na kanaka a pau, a me na ohana a pau, a ko na aupuni a me na olelo a pau imua o ke Akua, e hookolokoloia no ka lakou mau hana, ina paha he maikai ia mau mea, ina paha he ino;

5 Ina he maikai ia mau mea, i ke alahouana o ke ola mau loa; a ina he ino ia mau mea, i ke alahouana o ka poino, i kau like ia laua, kekahi ma kekahi lima, a kekahi hoi ma kekahi lima, e like me ke aloha, a me ka pololei, a me ka hemolele iloko o Kristo, mamua oia o ka hoomaka ana o ke ao nei.

6 [mokuna 12, paukū 1] Ano, aole e hiki ke palapalaia ma keia buke, ka hapa-haneri o na mea a Iesu i ao oiaio mai ai i na kanaka;

7 Aka hoi, aia no iloko o na papa a Nepai ka nui loa o na mea ana i ao mai ai i ka poe kanaka;

8 A o keia mau mea ka’u i palapala ai, oia ka hapa uuku o na mea ana i ao mai ai i ka poe kanaka; a ua palapala aku au ia mau mea me ka manao, e lawe hou ia mai ia mau mea i keia poe kanaka, mai ka poe Genetile mai, e like me na olelo a Iesu i olelo mai ai.

9 A ia lakou e loaa’i keia, a he mea e pono ai e loaa mua ai ia ia lakou, e hoao i ko lakou manaoio, a ina paha e manaoio auanei lakou i ua mau mea nei, alaila, e hoikeia’ku auanei na mea nui ae ia lakou.

10 A ina paha aole lakou e manaoio i ua mau mea nei, alaila, e auaia auanei na mea nui ae ia lakou, i ko lakou hoohewaia’na.

11 Aia hoi, ua kokoke au e kakau iho ia mau mea a pau i kahakahaia ai maluna iho o na papa a Nepai, aka, papa mai la ka Haku ia mea, i ka i ana, E hoao aku au i ka manaoio o ko’u poe kanaka;

12 Nolaila, ke kakau nei owau, o Moramona, i na mea i kauohaia mai ai ia’u e ka Haku. Ano, ke hoopau aku nei owau, o Moramona, i ka’u mau olelo, me ka hoomaka e kakau i na mea i kauohaia mai ai ia’u;

13 Nolaila, ke makemake nei au e ike oukou, ua ao oiaio mai la ka Haku i ka poe kanaka, no na la ekolu; a mahope mai o ia wa, hoike pinepine mai la oia ia ia iho ia lakou, a wawahi pinepine ae la i ka berena, a hoopomaikai iho la ia, a haawi mai la ia mea ia lakou.

14 [m 12, p 2] A eia kekahi, ao mai la oia, a lawelawe mai la i na keiki a ka poe kanaka i olelo e ia’i mamua, a wehe mai la ia i na elelo o lakou, a olelo ae la lakou i ko lakou mau makuakane i na mea nui a kupanaha, he oiaio, i na mea oi aku mamua o kana i hoike mai ai i na kanaka, a wehe mai la i ko lakou mau elelo i hiki ai ia lakou ke ekemu ae.

15 A eia kekahi, mahope mai o kona pii ana iloko o ka lani, i ka lua o ka manawa ana i hoike mai ai ia ia iho ia lakou, a ua hele aku la i ka Makua la, mahope mai o ka hoola ana i ko lakou poe mai a pau, a me ko lakou poe oopa, a o ka hookaakaa ana i na maka o ko lakou poe makapo, a o ka hoohamama ana i na pepeiao o ka poe kuli, a i hana i na ano a pau o ka hoola mawaena o lakou, a hoola ae la i kekahi kanaka mai ka make mai, a hoike mai la i kona mana ia lakou, a pii ae la i ka Makua la,

16 Aia hoi, ia la ae, hoakoakoa mai la na kanaka ia lakou iho i kahi hookahi, a ike aku la lakou a lohe ae la no hoi i ua poe keiki nei; he oiaio, oaka ae la na keiki uuku i ko lakou mau waha, a hai ae la i na mea kupanaha; a o na mea a lakou i hai ae ai ua papaia, i ole ai kekahi kanaka e kakau ia mau mea.

17 A eia kekahi, hoomaka ae la ka poe haumana a Iesu i wae mai ai, ma ia hope iho e bapetizo aku, a e ao aku i ka poe a pau i hele mai io lakou la; a o ka poe a pau i bapetizoia ma ka inoa o Iesu, ua hoopihaia mai me ka Uhane Hemolele.

18 A ua nui no ka poe o lakou i ike a i lohe hoi i na mea hiki ole ke ekeumia, aole hoi ku i ke kanawai ke kakauia aku;

19 A ao aku la lakou, a lawelawe hoi kekahi i kekahi; a hui pu ia ka lakou mau mea a pau mawaena o lakou, e hana ana kela kanaka keia kanaka me ka pololei,

20 A eia kekahi, hana iho la lakou i na mea a pau, me Iesu i kauoha mai ai ia lakou.

20 A o ka poe i bapetizoia ma ka inoa o Iesu, ua kapaia lakou, ka ekalesia o Kristo.

1 [mokuna 12, paukū 3] A eia kekahi, i ka wa e hele ana ka poe haumana i Iesu a e hai ana i na mea a lakou i lohe ai a i ike ai hoi, a e bapetizo ana ma ka inoa o Iesu, hiki mai keia, ua houluuluia mai ka poe haumana i kahi hookahi, a ua hoiia ma ka pule ikaika a me ka hookeai.

2 A hoike hou mai la o Iesu ia ia iho ia lakou, no ka mea, e pule ana lakou i ka Makua, ma kona inoa; a hele mai la o Iesu a ku iho la mawaena konu o lakou, a olelo mai la ia lakou, Heaha ka oukou makemake a’u e haawi aku ai ia oukou?

3 A i aku la lakou ia ia, E ka Haku e, ke makemake nei makou nau e hai mai ia makou i ka inoa a makou e kapa ai i keia ekalesia; no ka mea, aia no na hoopaapaa ana mawaena o na kanaka no keia mea.

4 A i mai la ka Haku ia lakou, Oiaio, he oiaio ka’u e olelo aku nei ia oukou, heaha la ka na kanaka mea e ohumu ai a e hoopaapaa ai no keia mea?

5 Aole anei lakou i heluhelu i na palapala hemolele, e olelo ana, he mea e pono ai no oukou e lawe maluna o oukou i ka inoa o Kristo, oia no hoi ko’u inoa? No ka mea, ma keia inoa oukou e kapaia mai ai ma ka la hope;

6 A o ka mea e lawe ana maluna iho ona i ko’u inoa, a e hoomau ana i ka hopena, oia ke hoolaia ma ka la hope;

7 Nolaila, o kela mea keia mea a oukou e hana’i, e hana oukou ia mea ma kuu inoa; nolaila, e kapa no oukou i ka ekalesia ma ko’u inoa; a e kahea aku oukou i ka makua ma ko’u inoa, nana e hoopomaikai mai i ka ekalesia no’u nei;

8 A pehea la ko’u ekalesia ia, ke kapa ole ia ia ma ko’u inoa? No ka mea, ina e kapaia kekahi ekalesia ma ko Mose inoa, alaila, o ko Mose ekalesia no ia: a, ina e kapaia ia ma ka inoa o kekahi kanaka, alaila, he ekalesia ia no kekahi kanaka: aka, ina e kapaia ia ma ko’u inoa, alaila, o ko’u ekalesia no ia, ina paha e kukuluia lakou maluna o ko’u euanelio.

9 He oiaio ka’u e olelo aku nei ia oukou, ua kukuluia oukou maluna o ko’u euanelio; nolaila, e kapa aku oukou i na mea a oukou e kapa aku ai, ma ko’u inoa; nolaila, ina e hea aku oukou i ka Makua, no ka ekalesia, ina me ko’u inoa ia, alaila, e hoolohe mai no ka Makua i ka oukou;

10 A ina paha e kukuluia ka ekalesia ma ko’u euanelio, alaila, e hoike mai no ka Makua i kana mau hana iho iloko o ka ekalesia;

11 Aka, ina aole kukuluia ia maluna o ko’u euanelio, a ua kukuluia maluna iho o na hana a kanaka, a i ole ia, maluna iho o na hana a ka diabolo, he oiaio ka’u e olelo aku nei ia oukou, he lealea ka lakou ma ka lakou hana no kekahi manawa, a mahope e hiki ana ka hopena, a kuaia lakou ilalo a hooleiia’ku iloko o ke ahi, kahi e hiki ole ai ke hoi mai mailaila mai;

12 No ka mea, e hahai ana ka lakou mau hana ia lakou, no ka mea, no ka lakou mau hana lakou i kuaia’i ilalo; nolaila, e hoomanao i na mea a’u i hai aku ai ia oukou.

13 Aia hoi, ua haawi aku au i ko’u euanelio ia oukou, a eia ka euanelio a’u i haawi aku ai ia oukou, I hele mai au iloko o ke ao nei e hana i ka makemake o ko’u Makua, no ka hoouna ana o ko’u Makua ia’u;

14 A hoouna mai la ko’u Makua ia’u, i hiki ia’u ke kaulia’e maluna o ke kea; a mahope iho o ko’u kaulia’na maluna o ke kea, i hiki ai ia’u ke kauo mai i na kanaka a pau io’u nei; e like me au i hookiekieia’i iluna e ka Makua, e ku imua o’u, e hookolokoloia no ka lakou mau hana, ina paha he maikai ia mau mea, ina paha he ino;

15 A no keia kumu wau i kaulia’i iluna; nolaila, e like me ka mana o ka Makua, e kauo mai auanei au i na kanaka a pau io’u nei, e hookolokoloia’i lakou e like me ka lakou mau hana.

16 [m 12, p 4] A e hiki mai auanei keia, o ka mea e mihi a e bapetizoia ma ko’u inoa, e hoopihaia auanei ia; a ina e hoomau oia a hiki i ka hopena, aia hoi, oia ka’u e hoohewa ole ai imua o ko’u Makua, ma ua la la ia’u e ku ai e hookolokolo i ko ke ao nei.

17 A o ka mea e hoomau ole ana a hiki i ka hopena, oia ke kuaia no hoi ilalo, a hooleiia’ku iloko o ke ahi, kahi e hiki ole ai ia lakou ke hoi mai mailaila mai, no ka hoopai o ka Makua;

18 A oia no ka olelo ana i haawi mai ai i na keiki a kanaka. A no keia kumu ke hooko nei oia i na olelo ana i haawi mai ai, a ke wahahee ole nei oia, aka ke hooko mai nei i kana mau olelo a pau;

19 A, aole e hiki i kekahi mea paumaele ke komo iloko o kona aupuni; nolaila, aohe mea e komo ana i kona maha, ke ole ka poe nana i holoi i ko lakou mau aahu i ko’u koko, no ko lakou manaoio, a me ka mihi i ko lakou mau hewa a pau, a me ko lakou malama pono a hiki i ka hopena.

20 Ano, eia ke kauoha, e mihi oukou, e ko na welau o ka honua, a e hele mai io’u nei, a e bapetizoia ma ko’u inoa, i hoomaemaeia’i oukou ma ka loaa ana ka Uhane Hemolele, i ku kina ole ai oukou imua o’u ma ka la hope.

21 Oiaio, he oiaio ka’u e olelo aku nei ia oukou, oia no ko’u euanelio; a ua ike oukou i na hana na oukou e hana’i ma ko’u ekalesia; no ka mea, o na hana a oukou i ike mai ai ia’u e hana ana, oia no ka oukou hoi e hana’i; no ka mea, o ka mea a oukou i ike mai ai ia’u e hana ana, oia hoi ka oukou e hana’i;

22 Nolaila, ina e hana oukou i keia mau mea, pomaikai oukou, no ka mea e hookiekieia’e oukou iluna ma ka la hope.

23 [mokuna 13, paukū 1] E kakau iho i na mea a oukou i ike ai a i lohe ai, a koe nae ua mau mea la i papaia;

24 E kakau iho i na hana a keia poe kanaka, e like auanei ia me ka mea i kakau e ia no na mea i hala aku;

25 No ka mea hoi, noloko mai, o na buke i kakau e ia, a e kakauia auanei no hoi, e hookolokoloia’i auanei keia poe kanaka, no ka mea, ma o ua mau mea la e ikeia’i auanei ka lakou mau hana e na kanaka.

26 A, aia hoi, ua kakauia na mea a pau e ka Makua; nolaila, noloko mai o na buke e kakauia e hookolokoloia’i auanei ko ke ao nei.

27 A e ike oukou e lilo auanei oukou i poe lunakanawai o keia poe kanaka, e like me ka hoopono a’u e haawi aku ai ia oukou, a he pololei ia; nolaila, ea, heaha la ko oukou ano e pono ai? He oiaio ka’u e olelo aku nei ia oukou, e like me au nei.

28 Ano, ke hele nei au i ka Makua la. A he oiaio ka’u e olelo aku nei ia oukou, o na mea a oukou e noi aku ai i ka Makua, ma ko’u inoa, e haawiia mai ia ia oukou;

29 Nolaila, e noi, a e loaa no ia oukou; e kikeke, a e weheia ia ia oukou: no ka mea, o ka mea e noi ana, e haawiia’na nana, a i ka mea kikeke, e weheia nona.

30 Ano hoi, ua nui ko’u olioli, a hiki i ka piha ana, no oukou a me keia hanauna hoi; he oiaio, a ke hauoli nei no hoi ka Makua, a me na anela hemolele a pau no hoi, no oukou a me keia hanauna: no ka mea, aole i lilo kekahi o lakou.

31 Aia hoi, ke makemake nei au e hoomaopopo oukou; no ka mea, no ka poe e ola nei, i keia manawa, o keia hanauna ka’u e olelo nei; a, aole i lilo kekahi o lakou; a iloko o lakou he piha ko’u o ka olioli.

32 Aka hoi, ua kaumaha au no ka ha o ka hanauna mai keia hanauna aku, no ka mea, ua alakai pio ia’ku lakou e ia, e like hoi me ke keiki no ka make; no ka mea, e kuai lakou ia’u no ke kala, a no ke gula, a no na mea e hoinoia e ka mu, a me na mea hoi a na aihue e hiki ai ke wawahi a ke aihue. A me kela la e hoopai aku au ia lakou, ma ka hoohuli ana i ka lakou mau hana maluna iho o ko lakou mau poo iho.

33 [m 13, p 2] A eia kekahi, ia Iesu i hoopau ai i keia mau olelo, i mai la oia i kana poe haumana, E komo ae oukou ma ka puka pilikia; no ka mea, he pilikea ka puka, a ololi hoi ke ala e hiki aku ai i ke ola, a kakaikahi wale ka poe loaa ia; aka, he akea ka puka, a he palahalaha hoi ke ala e hiki aku ai i ka make, a ua nui wale hoi ka poe e hele iloko olaila, a hiki aku i ka wa e hiki mai ai ka po, ka manawa e hiki ole ai i kekahi kanaka ke hana.

1 [mokuna 13, paukū 3] A eia kekahi, ia Iesu i olelo mai ai i keia mau olelo, olelo pakahi mai la oia i kana poe haumana, me ka i mai ia lakou, Heaha ka oukou e makemake mai nei ia’u mahope aku o ko’u hele ana i ka Makua la?

2 A olelo aku la lakou a pau, koe ekolu, Ke makemake nei makou, mahope iho o ko makou ola ana i ke ola o kanaka, e pau ka makou hana ana, ma ka mea au i kahea mai ai ia makou, e hiki ia makou ke hele emo ole iou la, iloko o kou aupuni.

3 A i mai la oia ia lakou, Pomaikai oukou, no ko oukou noi ana i keia mau mea ia’u; nolaila, mahope iho o ke kanahikukumamalua o ko oukou mau makahiki, e hele mai oukou io’u nei ma ko’u aupuni, a me au nei e loaa ia oukou ka maha.

4 A ia ia i olelo mai ai ia lakou, uli ae la oia i na mea ekolu, a i mai la ia lakou, Heaha la ko oukou makemake na’u e hana aku ia oukou, ia’u e hele aku ai i ka Makua la?

5 A kaumaha iho la lakou ma ko lakou mau naau, no ka mea, aole lakou i aa aku e olelo aku ia ia i ka mea a lakou i makemake ai.

6 A i mai la oia ia lakou, Aia hoi, ua ike au i ko oukou mau manao, a ua makemake oukou i ka mea a Ioane, kuu mea aloha, ka mea i noho pu me a’u ma ka’u oihana, mamua o ko’u kaulia ana e ka poe Iudaio, i makemake mai ai ia’u;

7 Nolaila, pomaikai nui ae oukou, no ka mea, aole loa oukou e hoao i ka make, aka e ola no oukou e ike i na hana a pau a ka Makua, i na keiki a kanaka, a hiki aku i ka wa e pau loa na mea i ka hookoia, e like me ka makemake o ka Makua, i ka wa a’u e hele mai ai iloko o ko’u nani, me na mana o ka lani;

8 A, aole loa oukou e loaa na eha o ka maka; aka, i ka wa a’u e hele mai ai ma ko’u nani, e hoomaluleia oukou ma ka amo ana o ka maka, mai ka palaho i ka palaho ole: alaila, e hoopomaikaiia oukou ma ke aupuni o ko’u Makua.

9 A eia hou, aole e loaa ia oukou ka eha oiai oukou e noho ai ma ka io, aole hoi kaumaha, koe no ka hala o ko ke ao nei wale no: a o keia a pau ka’u e hana’i no ka mea a oukou i makemake mai ai ia’u, no ka mea, ua makemake oukou e kai mai oukou i na uhane o na kanaka io’u nei, oiai ka honua e ku ana;

10 A no keia mea e loaa auanei ia oukou ka piha o ka olioli; a e noho iho ilalo auanei oukou me ke aupuni o ko’u Makua; he oiaio, e piha auanei ko oukou olioli, e like me ka Makua i haawi mai ai ia’u i ka piha o ka olioli; a e like auanei oukou me au nei, a ua like hoi owau nei me ka Makua; a o ka Makua me au nei hookahi maua;

11 A ke hoike aku nei ka Uhane Hemolele no ka Makua a me au nei; a ke haawi nei ka Makua i ka Uhane Hemolele i na keiki a kanaka, no’u nei.

12 [m 13, p 4] A eia kekahi, ia Iesu i olelo mai ai i keia mau olelo, hoopa mai la oia i kela mea i keia mea o lakou me kona manamana lima, koe na mea ekolu wale no, ka poe e kali ana, alaila, hele aku la ia.

13 A, aia hoi, ua hoohamamaia’e la na lani, a ua laweia’ku la lakou iluna iloko o ka lani, a ike ae la a lohe ae la i na mea e hiki ole ai ke pane ae.

14 A ua papaia lakou mai ekemu aku; aole hoi haawiia ia lakou ka mana, e hiki ia lakou ke ekemu aku i na mea a lakou i ike ai a i lohe ai,

15 A ina paha iloko o ke kino iho lakou, iwaho o ke kino paha, aole o lakou i ike; no ka mea, i ka ike ana iho o lakou ua like me ka hoopahaohaoia’na o lakou, i hoomaluleia’i lakou mai keia kino o ka io, i ka noho palaho ole ana, i hiki ia lakou ke ike i na mea o ke Akua.

16 Aka, eia kekahi, lawelawe hou ae la lakou me ka ili o ka honua; aole nae lakou i lawelawe no na mea a lakou i lohe ai a i ike ai, no ke kauoha i haawiia mai ai ia lakou ma ka lani.

17 Ano, ina he palaho paha, a he palaho ole paha, mai ka la aku o ko lakou hoopahaohaoia’na, aole au i ike;

18 Aka, eia ka’u i ike, e like me ka mooolelo i haawiia mai, hele aku la lakou me ka ili o ka aina, a lawelawe ae la i na kanaka a pau, a e hui pu ana i ka poe a pau i manaoio ma ka lakou hai olelo ana i ka ekalesia; e bapetizo ana ia lakou; a o ka poe a pau i bapetizoia, loaa iho la ia lakou ka Uhane Hemolele;

19 A ua hooleiia lakou iloko o ka halepaahao e ka poe i hui ole ia me ka ekalesia. A ua hiki ole i na halepaahao ke hoopaa ia lakou, no ka mea, ua nahahaia ia mau mea iwaena konu,

20 A ua hoohioloia ilalo i ka honua. Aka hahau aku la lakou i ka honua me ka olelo a ke Akua, a ua hoopakeleia lakou ma o kona mana la mawaho o na hohonu o ka honua; a, nolaila, ua hiki ole ia lakou ke eli i na lua lawa ke hoopaa ia lakou.

21 A ekolu ko lakou hooleiia ana iloko o ka umu ahi, a loaa ole ia lakou kekahi eha.

22 A elua ko lakou hooleiia ana iloko o ka lua holoholona hihiu; a, aia ka, paani ae la lakou me na holoholona, e like me ke keiki me kekahi keiki hipa ae waiu, a loaa ole ia lakou kekahi eha.

23 A eia kekahi, pela lakou i hele aku ai mawaena o ka poe kanaka a pau o Nepai, a hai ae la i ka euanelio i Kristo i na kanaka a pau maluna iho o ka ili o ka aina; a ua hoohulihia lakou i ka Haku, a ua hui pu ia me ka ekalesia o Kristo, a pela i hoopomaikaiia’i ka poe kanaka o ua hanauna la, e like me ka olelo a Iesu.

24 Ano, ke hoopau nei owau, o Moromona, i ka’u olelo ana no keia mau mea, no kekahi manawa.

25 Aia hoi, ua kokoke au e kakau i na inoa o ua poe la, ka poe e hoao o e loa ai i ka make; aka papa mai la ka Haku, nolaila, ke kakau ole nei au ia mau mea, no ka mea, ua hunaia ia mau mea mai ko ke ao nei ae.

27 A, aia hoi, mawaena auanei lakou o ka poe Genetile, a e hoomaopopo ole ana ka poe Genetile ia lakou.

28 Mawaena auanei no hoi lakou o ka poe Iudaio, a e hoomaopopo ole ka poe Iudaio ia lakou.

29 [m 13, p 5] A e hiki mai auanei keia, i ka wa a ka Haku e manao ai he pono ma kona naauao, na lakou e lawelawe aku i na ohana hoopuehuia a pau o Iseraela, a i ko na aupuni a pau, a me na ohana, a i na olelo a me na kanaka, a e lawe mai noloko mai o lakou io Iesu la i na uhane he nui wale, i ko ai ko lakou makemake, a no ka mana o ke Akua iloko o lakou i ka hoomaopopo ana aku;

30 A me he mau anela la lakou o ke Akua, a ina e pule aku lakou i ka Makua ma ka inoa o Iesu, ua hiki ia lakou ke hoike mai ia lakou iho i kela kanaka keia kanaka a lakou i makemake ai;

31 Nolaila, e hanaia auanei na hana nui a kupanaha e lakou, mamua o ka la nui e hiki mai ana, i ka wa a na kanaka a pau e ku oiaio ai imua o ka noho hookolokolo o Kristo;

32 He oiaio, mawaena o ka poe Genetile e hanaia auanei he hana nui a kupanaha e lakou, mamua o ua la hookolokolo la.

33 A ina ua loaa ia oukou na palapala hemolele a pau, e hoike ana i ka mooolelo o na hana kupanaha a pau a Kristo, alaila, e ike oukou, e like me na olelo a Kristo, e hiki oiaio mai ua mau mea nei e pono ai.

34 A auwe ka mea nana e hoolohe ole i na olelo a Iesu, a me ka ka poe no hoi ana i wae mai ai a hoouna aku mawaena o lakou, no ka mea, o ka mea e hookipa ole ana i na olelo a Iesu, a me na olelo a ua poe la ana i hoouna ai, e hookipa ole ana lakou ia ia; a nolaila, e hookipa ole oia ia lakou ma ka la hope;

35 A e aho no lakou ina aole lakou i hanauia mai. No ka mea, ke manao nei anei oukou ua hiki ia oukou ke pakele i ka hoopai o ke Akua i hoonaukiukiia, ka mea i hehiia ilalo o na wawe o na kanaka, i hiki mai ai ke ola ma ia mea?

36 [m 13, p 6] Ano hoi, me au i olelo aku ai no ua poe la a ka Haku i wae mai ai, he oiaio, o na mea ekolu, ka poe i laweia’e iluna iloko o na lani, ua ike ole au ina paha ua hoomaemaeia lakou mai ka palaho i ka palaho ole.

37 Aka hoi, mahope mai o ka’u kakau ana, ua ninau aku au i ka Haku, a ua hoiki mai la oia ia’u, he mea e pono ai ke hoomaluleia ko lakou mau kino, i ole ai, e hoao lakou i ka make e pono ai;

38 Nolaila, i ole ai lakou e hoao i ka make, ua hoomaluleia ko lakou mau kino, i ole ai e loaa ia lakou ka eha, aole hoi ke kaumaha, koe wale no no na hala o ko ke ao nei.

39 Ano, aole e like keia hoomaluleia ana me ka mea e hiki mai ana ma ka la hope; aka, ua hoomaluleia mai lakou, a ua hiki ole ia Satana ke loaa ka mana maluna iho o lakou, i hiki ole ai ia ia ke hoowalewale mai ia lakou, a ua hoomaemaeia lakou ma ka io, a ua hemolele lakou, a ua hiki ole i na mana o ka honua nei ke hoopaa ia lakou;

40 A pela lakou e noho ai a hiki aku i ka la hookolokolo o Kristo; a ia la la e loaa ia lakou ka hoomalule nui ana, a e hookipaia’e iloko o ke aupuni o ka Makua, e puka hou ole aku mawaho, aka e noho mau loa pu ai me ke Akua ma na lani.

1 Ano hoi, ke i aku nei au ia oukou, i ka wa i manaoia he pono e ka Haku, ma kona naauao, no keia mau olelo e hiki aku i ka poe Genetile, e like me kana olelo, alaila, e ike oukou o ka berita a ka Makua i hana mai ai me ka poe mamo a Iseraela, no ko lakou hoihoi hou ia ana i ko lakou aina hooilina, e hoomaka ana ia ia manawa e hookoia;

2 A e ike no hoi oukou e hookoia auanei na olelo a pau loa a ka Haku, i oleloia’i e ka poe kaula hemolele; a he mea e pono ole ai no oukou ke olelo, ke hoopanee la ka Haku i kona hiki ana mai i ka poe mamo a Iseraela;

3 A he mea e pono ole ai no oukou ke manao wale iloko o ko oukou mau naau, ua make hewa na olelo i oleloia’i, no ka mea hoi, e hoomanao no ka Haku i kana berita, ana i hana mai ai i kona poe kanaka no ka hale o Iseraela.

4 A ia oukou e ike ai i keia mau olelo e puka mai ana mawaena o oukou, alaila, he mea e pono ole ai ko oukou keehi hou ana ma na hana a ka Haku, no ka mea, aia no ka pahikaua a kona hoopai ma kona lima akau, a, aia hoi, ma ia la, ina e heehi oukou ma kana hana ana, e kena oia e loaa koke oukou ia mea.

5 Auwe ka mea e keehi ana ma na hana ana a ka Haku; he oiaio, auwe ka mea nana e hoole ia Kristo a me kana mau hana;

6 He oiaio, auwe ka mea nana e hoole i na hoike ana a ka Haku, a olelo ae, E hana hou ole ana ka Haku ma o ka hoike ana la, aole hoi ma o ka wanana la, aole hoi ma o na haawina la, aole hoi ma o na olelo e la, aole ma o na hoola ana la, aole hoi ma o ka mana o ka Uhane Hemolele la;

7 He oiaio, auwe ka mea nana e olelo ma ia la, i mea e loaa’i ka waiwai, Aole e hiki ke hanaia kekahi hana mana e Iesu Kristo; no ka mea, o ka mea e hana ana i keia, e lilo auanei ia e like me ke keiki o ka make, ka mea aole nona ke aloha, e like me ka olelo a Kristo.

8 He oiaio, a he mea e pono ole ai no oukou e hoowahawaha hou ae, aole hoi keehi, aole hoi hoomaewaewa ae i ka poe Iudaio, aole hoi kekahi o ke koena o ko ka hale o Iseraela, no ka mea hoi, ke hoomanao nei ka Haku i kana berita ia lakou, a e hana mai oia ia lakou e like me ka mea ana i hoohiki mai ai;

9 Nolaila, he mea e pono ole ai no oukou ke manao ua hiki ia oukou ke hoohuli ae i ka lima akau o ka Haku i ka hema, i hana ole mai ai oia i ka hoopono ma ka hooko ana i ka berita ana i hana mai ai i ko ka hale o Iseraela.

1 [mokuna 14, paukū 1] E haliu mai oukou, e ka poe Genetile, a e hoolohe i na olelo a Iesu Kristo, ke keiki a ke Akua ola, ana i kauoha mai ai ia’u, na’u e olelo aku no oukou, no ka mea, aia hoi, ke kauoha mai nei oia ia’u, i ka i ana,

2 E huli mai oukou, e ka poe Genetile a pau, mai ko oukou mau aoao hewa, a e mihi i ka oukou mau hana ino ana, i ka oukou wahahee ana a hoopunipuni ana, a i ko oukou mau moe kolohe ana, a me ko oukou mau mea ino malu, a me ko oukou mau hoomana kii ana, a i kou oukou mau pepehi kanaka ana, a me ka oukou mau hana maalea a na kahuna pule hoopunipuni, a me ko oukou mau paonioni ana, a me ka oukou mau paio, a mai ka oukou hana hewa a mau mea ino ae, a e hele mai io’u nei, a e bapetizoia ma ko’u inoa, i loaa’i ia oukou ke kalaia’na o ka oukou mau hala, a e hoopihaia me ka Uhane Hemolele, i helu pu ia’i oukou me ko’u poe kanaka, no ko ka hale o Iseraela.

© 2008, 2009 Brent Thompson. Limited rights granted as indicated below, except where otherwise indicated.
This work is licensed under the Creative Commons Attribution-Noncommercial-Share Alike 3.0 United States License. To view a copy of this license, visit http://creativecommons.org/licenses/by-nc-sa/3.0/us/ or send a letter to Creative Commons, 171 Second Street, Suite 300, San Francisco, California, 94105, USA.