Ka Buke Mua a Nepai

He mooolelo o Lehi a me kana wahina o Saria, a me kana mau keikikane eha, i kapaia,—e hoomaka ana ma ka hiapo,—o Lamana, o Lemuala, o Sama, a me Nepai. Ao aku la ke Akua ia Lehi e haalele iho i ka aina o Ierusalema, noka mea, ua wanana aku la ia i na kanaka no ko lakou hana hewa ana; a imi iho la lakou e hoopau i kona ola. Hele aku la oia me kona ohana i ekolu la o ka hele ana i ka waonahele. Lawe ae la o Nepai i kona mau hoahanau, a hoi hou aku la i ka aina o Ierusalema no ka mooolelo o ka poe Iudaio. Ka mooolelo o ka popilikia o lakou. Ka lawe ana o lakou i na kaikamahine a Isamaela i mau wahine na lakou.—Ko lakou lawe ana i ko lakou mau ohua, a hele aku la i ka waonahele. Na popilikia a me na eha o lakou ma ka waonahele. Kahi a lakou i hele aku ai. Hiki aku la lakou i ka moana nui. Kipi mai la ko Nepai mau hoahanau ia ia. Hoohilahila iho la oia ia lakou, a kapili aku la oia i moku. Kapa aku la lakou ia wahi o Momona. Holo aku la lakou mai kela aoao i keia aoao o ka moana nui, i ka aina i hai mua ia’i. O keia no ka mooolelo a Nepai; no ka mea, na’u nei, na Nepai, i kakau i keia mooolelo.

1 [mokuna 1, paukū 1] Owau, o Nepai, ua hanauia mai la e na makua maikai, nolaila, ua aoia mai la au i na mea o ka naauao a pau o ko’u makuakane; a ua ike au i na pilikia he nui i ko’u mau la—aka hoi, ua lokomaikai nui ia mai la au e ka Haku i na la o’u a pau; he oiaio, ua loaa mai la ia’u ka ike nui no ka lokomaikai a me na mea pohihihi o ke Akua, nolaila, ke kakau nei au i mooolelo o na mea a’u i hana’i, i ko’u mau la;

2 He oiaio no, ke hana nei au i mooolelo iloko o ka olelo a ko’u makuakane, o ka ike o ka poe Iudaio a me ka olelo a ko Aigupita poe ka i juiia ma ia olelo.

3 A ua ika au i ka mooolelo a’u e hana nei he oiaio ia; a ke hana nei au ia me ki’u lima iho; a ke kakau nei au ia e liike me ka’u ike.

4 [m 1, p 2] No ka mea, eia kekahi, i ka hoomaka ana o ka makahiki mua o ka noho alii ana o Zedekia, ke alii o Iuda, (ua noho ko’u makuakane o Lehi ma Ierusalema i na la a pau ona;) a i ua makahiki nei hele mai la ne kaula he nui, a wanana aku ana i na kanaka, e mihi lakou e pono ai, a i ole ia e lukuia aku ke kulanakauhale nui o Ierusalema.

5 No ia mea, i ka hele ana aku o ko’u makuakane o Lehi, pule aku la ia i ka Haku, he oiaio, me kona naau a pau, i lokomaikaiia mai kona poe kanaka.

6 [m 1, p 3] Eia kekahi, i kana pule ana i ka Haku, ua hele mai la he kia ahi, a noho iho la malun iho o kekahi pohaku imua ona; a ua ike oia a lohe no hoi i na mea he nui wale; a no na mea ana i ike ai a i lohe ai, ua makau iho la kela a haalulu nui iho la no hoi.

7 [m 1, p 4] Eia kekahi, hoi aku la ia i kona hale iho ma Ierusalema; a moe iho la oia maluna o kona wahi moe; ua uluhia me ka uhane a me na mea ana i ike ai;

8 A i kona uluhia ana pela me ka uhane, ua laweia’ku ia ma ka hihio, a ike aku la oia i ni lani ua weheia, a manao iho la oia ua ike oia i ke Akua e noho ana maluna iho o kona noho alii, i hoopuniia me na anela he lehulehu hiki ole ke heluia, e hoolea ana a e hiilani ana i ko lakou Akua.

9 [m 1, p 5] Eia kekahi, ua ike aku la oia i kekahi mea i puka mai ana maiwaena mai o ka lani, a ike aku la ia ua oi aku kona alohilohi mamua o ko ka la ma ke awakea;

10 A ike aku la no hio oia he umikumamalua mau mea e ae e hahai ana ia ia, a ua oi aku ko lakou lilelile mamua o ko no hoku ma ka aouli;—

11 A iho mai la lakou ilalo, a hele aku la maluna o ka ili o ka honua; a hele mai la o ka mea mua, a ku iho la imua o ko’u makuakane, a haawi mai la ia ia i buke, a kauoho mai la ia ia e heluhelu.

12 [m 1,p 6] Eia kekahi, i kona heluhelu ana, ua hoopihaia oia me ka Uhane o ka Haku,

13 A heluhelu ia, i ka i ana, Auwe, Auwe Ierusalema! No ka mea, ua ike aku la au i kou hana ino loa ana;—he oiaio, ua nui na mea a ko’u makuakane i heluhelu ai a pili ana ia Ierusalema—e lukuia auanei ia, a e lukuia aku he nui wale ona kamaaina olaila, e ka pahi kaua, a e lawe pio ia aku no hoi he nui wale i Babulona.

14 [m 1, p 7] Eia kekahi, i ka wa a ko’u makuakane i heluhelu ai a ike ai i na mea nui a kupaianaha he nui wale, olelo aku la ia i na mea he nui loa ia ka Haku; me neia, Manomano a kupanaha no kau hana E ka Haku, ke Akua mana loa! Ua kiekie kou noho alii ma na lani, a o kou mana, a o kou lokomaikai, a me kou aloha maluna iho ia o ko ka honua nei a pau; a no kou aloha, aole oe e hookuu mai i ka make i ka poe e hele ana iou la!

15 A mamuli o keia ano ka olelo a ko’u makuakane e hiilani ana i kona Akua;—no ka mea, ua hauoli iho la kona uhane, a ua piha iho la kona naau a pau, no na mea ana i ike ai; he oiaio, i na mea a ka Haku i hoike mai ai ia ia.

16 Ano, owau, o Nepai, aole au e kakau ana i ka mooolelo ona mea a pau a ko’u makuakane i kakau ai, no ka mea, ua kakau oia i na mea he nui wale ana i ike ai iloko o na hihio, a iloko o na moe uhane; a ua kakau iho la no hoi oia i na mea he nui loa ana i wanana mai ai, a i olelo mai ai i kana poe keiki, o ia mau mea a pau aole au e kakau ana;

17 Aka, e kakau no au i ka mooolelo o ka’u hana i ko’u mau la. Aia hoi, ke kakau nei au i olelo i hoopokoleia o ka mooolelo o ko’u makuakane, maluna o na papa a’u i hana’i me ko’u mau lima iho; no ia mea, mahope aku o ko’u hoopokole ana i ka mooolelo o ko’u makuakane, alaila, i kakau no au i ka mooolelo o ko’u ola iho.

18 [m 1, p 8] Nolaila, ua makemake au e ike oukou, mahope iho o ka hoike ana o ka Haku ua mau mea kupanaha nei he nui loa i lo’u makuakane, ia Lehi, no ka lukuia ana o Ierusalema, aia hoi, hele aku la oia iwaena o no kanaka, a hoomaka ae la e wanana aku, a e hai aku ia lakou no na mea ana i ike ai a i lohe ai hoi.

19 [m 1, p 9] Eia kekahi, hoomaewaewa mai la ka poe Iudaio ia ia no na mea ana i hoike aku ai no lakou; no ka mea, ua hoike oiaio aku la oia no ka lakou hana hewa ana, a me ka lakou hana hoopailua ana;

20 [m 1, p 10] A lohe ka poe Iudaio i keia mau mea, huhu mai la lakou ia ia; he oiaio, e like me na kaula kahiko, ka poe a lakou i hoolei aku ai, a i hailuku ai, a i pepehi ai; a imi iho la no hoi lakou i kona ola, i lawe aku ia. Aka hoi, e hoike aku no wau, o Nepai, ia oukou aia no ke aloha nui o ka Haku maluna o na mea a pau ana i koho ai, no ko lakou manaoio, e hoolilo mai ia lakou i poe ikaika a hiki i ka mana e ola’i.

1 [mokuna 1, paukū 11] No ka mea, eia kekahi, olelo mai la ka Haku i ko’u makuakane, iloko o ka moe uhane, a i mai la ia ia, Ua Pomaikai no oe e Lehi, no na mea a’u i hana ai; a no ka mea, ua kupaa oe, a ua hai aku oe i keia poe kanaka i na mea a’u i kauoha aku ai ia oe, aia hoi, ke imi nei lakou e lawe aku i kou ola.

2 [m 1, p 12] Eia kekahi, kauoha mai la ka Haku i ko’u makuakane, iloko o ka moe uhane, e lawe aku i kona ohana, a e hele aku iloko o ka waonahele.

3 Eia kekahi, hoolohe io iho la kela i ka olelo a ka Haku, no ia mea, hana no ia e like me ka ka Haku kauoha ia ia.

4 [m 1, p 13] Eia kekahi, hele aku la ia i ka waonahele. A haalele iho la oia i kona hale, a me kona aina hooilina, a me kona gula, a me kona kala, a me kona mau mea maikai, aoli ia i lawe aku kekahi mea me ia, o kona ohana wale no, a me ka ai, a me halelewa, a hele aku la i ka waonahele;

5 A iho mai la oia ma na palena kokoke i ke kahakai o ke Kaiula; a hele aku la oia i ka waonahele ma na palena e kokoke ana i ke Kaiula; a hele aku la no ia i ka waonahele me kona ohana, oia no ko’u makuwahine, o Saria, a me na kaikuaana o’u, o Lamana, o Lemuela, a me Sama.

6 [m 1, p 14] Eia kekahi, ia makou i hele ai i na la ekolu ma ka waonahele, kukulu iho la oia i kona halelewa ma kekahi awawa ma kapa o kekahi muliwai.

7 Eia kekahi, kukulu iho la ia i kuahu pohaku, a kaumaha aku la ia i mohai i ka Haku, a haawi aku la i ke aloha i ka Haku, i ko kakou Akua.

8 A eia kekahi, kapa aku la oia i ka inoa o ka muliwai o Lamana, a ua kahe aku la ia iloko o ke Kaiula; a o ke awawa ma na kapa ia e kokoke ana i ka nuku o ua muliwai la.

9 [m 1, p 15] A ike aku la ko’u makuakane i na wai o ka muliwai i kahe ana ia i ke kumu o ke Kaiula, olelo mai la oia ia Lamana, i ka i ana, Ina e like oe me keia muliwai e kahe mau ana iloko o ke kumu o ka pono a pau.

10 A olelo aku la no hoi oia ia Lemuela: Ina e like oe me keia awawa, he naueue ole, a ku paa mau i ka malama ana i nakauoha a ka Haku.

11 No ka mea, olelo aku la oia pela no ka ai oolea o Lamana laua me Lemuela; no ka mea, he kanaka ike hihio no ia, a ua alakai mai la ia laua mailoko mai o ka aina o Ierusalema, a haalele aku i ko laua aina hooilina, a me ko laua gula, a me ko laua kala, a me ko laua mau mea maikai, e make ma ka waonahele. A, ua hana no oia i keia, wahi a laua, no na manao lapuwale o kona naau.

12 A pela i ohumu ai o Lamana laua me Lemuel—o laua na keiki na mua—e ku e ana i ko laua makuakane. A ua ohumu laua, no ka mea, aole laua i ike i ka hana ana a kela Akua nana laua i hana mai.

13 Aole hoi i manaoio laua e hiki ke lukuia o Ierusalema, kela kulanakauhale nui, e kike me na olelo a na kaula. A ua like laua me ka poe Iudaio, e noho ana me Ierusalema, ka poe i imi ai e lawe aku i ke ola o ko’u makuakane.

14 [m 1, p 16] Eia kekahi, olelo aku la ko’u makuakane ia laua ma ke awawa o Lemuela, me ka mana, i hoopihaia me ka uhane, a haalulu iho la ko laua mau kino imua ona. A hoohilahila aku la oia ia laua, a no ka makau aole i hiki ia laua ke olelo ku e aku ia ia; no ia mea, hana iho la no laua e like me kana kauoha ia laua.

16 [m 1, p 17] Eia kekahi, owau, o Nepai, ua opiopio loa no, ua nui nae ke kino, ua iini ikaika no hoi au e ike i no mea pohihihi o ke Akua, nolaila, ua kahea aku au i ka Haku; eia hoi, ua hele mai la ia io’u la, a ua hoopalupalu mai la i ko’u naau, i manaoio au i na olelo a pau i oleloia mai e ko’u makuakane; nolaila, aole au i ku a aku ia ia e like me o’u mau kaikuaana.

17 A olelo aku la au ia Sama, e hoike aku ana ia ia i na mea a ka Haku i hoike mai ai ia’u, ma kona Uhane Hemolele. [m 1, p 18] A ua manaoio oia i ka’u mau olelo;

18 Aka hoi, aole i hoolohe mai o Lamana laua me Lemuela i ka’u mau olelo: a kaumaha iho la au no ka paakiki o ko laua mau naau, a ua kahea aku la au i ka Haku no laua.

19 [m 1, p 19] Eia kekahi, olelo mai la ka Haku ia’u, i ka i ana: Pomaikai no oe, e Nepai, no kou manaoio, ua imi ikaika mai oe ia’u me ka haahaa o ka naau.

20 A ina e malama pono oe i na kauoha a’u, e hoopomaikaiia oe, a e alakaiia oe i kekahi aina i olelo mua ia’i; he oiaio, he aina a’u i hoomakaukau ai no oukou; he oiaio, he aina makemakeia ia mamua o na aina e ae a pau.

21 A ina e kipi mai kou mau hoahanau ia oe, alaila e hookiia aku lakou mai ke alo aku o ka Haku.

22 A ina e malama pono oe i ka’u mau kauoha, e hooliloia auanei oe i luna a i kumu maluna iho o kou mau hoahanau.

23 No ka mea, aia hoi, i ka la a lakou e kipi mai ai ia’u e hoopai aku no au ia lakou me kekahi poino nui, a e loaa ole ia lakou ka mana maluna iho o kau hua, ke ole lakou e kipi mai no hoi ia’u.

24 A ina e kipi mai lakou ia’u, e lilo auanei lakou la i mea e hahau ai i kau hua, e hooeueu ae ia lakou i ka hoomanao ana ia’u.

1 [mokuna 1, paukū 20] A eia kekahi, hoi hou aku la au, o Nepai, mai ka’u kamailio pu ana me ka Haku, i ka halelewa o ko’u makuakane.

2 A, olelo mai la oia ia’u, i ka i ana mai: Aia hoi, ua moe au i ka moe, a ua kauoha mai la ka Haku ia’u iloko o ua moe la, e hoi hou aku oe a me kou mau kaikuaana i Ierusalema.

3 No ka mea, aia ia Labana ka mooolelo o ka poe Iudaio, a me ke kuauhau o kou poe kupuna, a ua kahakahaia ia mau mea maluna o na papa keleawe.

4 Nolaila, ua kauoha mai la ka Haku ia’u e hele aku oe me kou mau hoahanau i ka hale o Labana; a e imi aku i ka mooolelo, a e lawe mai ia mau mea ilalo nei i ka waonahele.

5 Ano la, ke ohumu nei kou mau kaikuaana, i ka i ana, he mea paakiki ka’u i noi aku ai ia lakou; aka hoi, aole na’u i noi aku ia mea ia lakou, aka he kauoha ia na ka Haku mai.

6 Nolaila, ea, o hele, e ka’u keiki, a e hoopomaikaiia auanei oe e ka Haku, no ka mea, aole oe i ohumu.

7 [m 1, p 21]Eia kekahi, i aku la au, o Nepai, i ko’u makuakane, E hele no au, a e hana iho i na mea a ka Haku i kauoha mai ai, no ka mea, ua ike au aole e haawi ana ka Haku i na kauoha i na keiki a kanaka, ke hoomakaukau ole kela i ala no lakou e hooko pono ai i ka mea ana i kauoha mai ai lakou.

8 [m 1, p 22] A lohe aku la ko’u makuakane i keia mau olelo, olioli nui loa iho la oia, no ka mea, ua ike oia ua hoopomaikaiia mai la au e ka Haku.

9 A hele aku la au, o Nepai, me ko’u mau hoahanau, i ka waonahele me ko makou mau halelewa, e pii aku ai i ka aina o Ierusalema.

10 [m 1, p 23] Eia kekahi, a hiki aku la makou i ka aina o Ierusalema, kukakuka pu ae la au me ko’u mau hoahanau, kekahi me kekahi;

11 A hailona iho la makou e ike i ka mea o makou nana e hele aku i ka hale o Labana. A lilo ka hailona ia Lamana; a hele aku la o Lamana iloko o ka hale o Labana, a kamailio pu me ia, ia ia i noho ai iloko o kona hale.

12 A noi aku la oia ia Labana i na mooolelo i kahakahaia maluna iho o na papa keleawe, maluna olaila ke kuauhau o ko’u makuakane.

13 [m 1, p 24] Eia hoi, huhu iho la o Labana, a kipaku mai la ia ia mawaho, mai kona alo mai; aohe ona makemake e lilo na mooolelo ia ia. No ia mea, olelo mai la oia ia ia, Aia hoi, he powa oe, a e pepehi no au ia oe.

14 Aka, holo mai la o Lamana mawaho, mai kona alo mai, a hai mai la ia makou i na mea a Labana i hana’i. A hoomaka mai la makou e hookaumaha nui loa ia, a kokoke ko’u mau hoahanau e hoi hou i kuu makuakane la i ka waonahele.

15 Aka hoi, i aku la au ia lakou, Ma ke ola o ka Haku, a ma ko kakou ola hoi, aole kakou e hoi aku i ko kakou makuakane la ma ka waonahele, aia a hooko aku kakou i ka mea a ka Haku i kauoha mai ai ia kakou.

16 No ia mea, e ikaika kakou i ka malama ana i na kauoha a ka Haku; nolaila, e iho aku kakou i ka aina hooilina o ko kakou makuakane, no ka mea, aia hoi, ua waiho oia i ke gula a me ke kala, a ia mea waiwai aku ia mea waiwai aku. A ua hana iho la oia ia mau mea a pau, no na kauoha a ka Haku:

18 [m 1, p 25] No ka mea, ua hoole aku la lakou i na olelo a na kaula. Nolaila, ina ua noho ko’u makuakane ma ka aina mahope iho o kona kauohaia ana e holo aku mailoko aku o ka aina, ina ua make no hoi oia. No ia mea, he mea e pono ai nona e holo aku mailoko aku o ka aina.

19 Aia hoi, he mea ku pono i ko ke Akua manao na kakou e loaa’i keia mau mooolelo, i malama pono ai kakou, no ko kakou poe keiki, i ka olelo a ko kakou mau kupuna;

20 A i malama’i no hoi kakou no lakou i na olelo i oleloia mai ai e na waha o na kaula hemolele a pau, na mea i haawiia mai ia lakou e ka uhane a me ka mana o ke Akua, mai ka hoomaka ana o ke ao nei, a hiki loa i keia manawa.

21 [m 1, p 26] Mamuli o ke ano o keia olelo ua ao aku la au i ko’u mau hoahanau, i ikaika lakou i ka malama pono ana i na kauoha a ke Akua.

22 Eia kekahi, iho aku la makou i ko makou aina hooilina, a hoiliili mai la makou i ko makou gula, a me ko makou kala, a me ko makou mau mea maikai.

23 A mahope iho o ko makou hoiliili pu ana i ua mau mea nei, pii hou aku la makou i ka Labana hale.

24 [m 1, p 27] Eia kekahi, hele aku la makou iloko, io Labana la, a koi aku la ia ia e haawi mai ia makou i na mooolelo i kahakahaia maluna iho o na papa keleawe, a no ua mau mea nei e haawi aku no makou ia ia i ko makou gula, a me ko makou kala, a me ko makou mau mea maikai a pau.

25 [m 1, p 28] A ike mai la o Labana i ko makou waiwai, he nui loa ia, kuko iho la oia mamuli o ua waiwai nei, a kipaku mai la oia ia makou, a kena mai la i kana mau kauwa e pepehi ia makou, i loaa ai ia ia ko makou waiwai.

26 A auhee aku la makou imua o na kauwa a Labana, a no ka pilikia haalele iho la makou i ko makou waiwai, a lilo iho la ua waiwai nei iloko o na lima o Labana.

27 [m 1, p 29] Eia kekahi, auhee aku la makou i ka waonahele, aole makou i loaa mai i na kauwa a Labana, a pee aku la makou iloko o ka lua o kekahi pokahu.

28 Eia kekahi, huhu mai la o Lamana ia’u, a i ko’u makuakane no hoi; a pela no hoi o Lemuela, no ka mea, ua hoolohe oia i na olelo a Lamana. No ia mea, olelo mai la o Lamana laua me Lemuela i na olelo hoeha he nui wale ia maua, i ko laua mau kaikaina, a ua hahau mai la laua ia maua me kahi laau.

29 [m 1, p 30] Eia kekahi, i ko laua hahau ana ia maua me kahi laau, aia hoi, hele mai la kekahi anela a ka Haku, a ku ae la imua o laua, a olelo aku la oia ia laua, i ka i ana, No ke aha la olua e hahau nei i ko olua kaikaina i ka laau? Aole anei olua i ike, ua koho aku ka Haku ia ia e lilo i luna maluna o olua, a o keia mea no ka olua hana ino ana? aia hoi, e pii hou aku no oukou i Ierusalema, a e haawi mai ka Haku ia Labana iloko o ko oukou mau lima.

31 A mahope iho o ka hoi ana o ka anela, hoomaka hou iho la o Lamana laua me Lemuela e ohumu, me ka i ana, Pehea la a hiki ai i ka Haku ke haawi mai ia Labana iloko o ko kakou mau lima? Aia hoi, he kanaka koikoi ia, a e hiki ia ia ke kena aku i na kanaka he kanalima, he oiaio, e hiki no ia ia ke pepehi i na kanaka he kanalima; e no ke aha la e hiki ole ai ia ia ke pepehi mai ia kakou?

1 [mokuna 1, paukū 31] A olelo aku la au i ko’u mau kaikuaana, i ka i ana, E pii hou aku kakou i Ierusalema, a e hoomau pono kakou i ka malama ana i na kauoha a ka Haku; no ka mea, ua mana loa oia mamua o ko ka honua nei a pau, a no ke aha la i mana loa ole ai mamua o Labana a me kona poe he kanalima, he oiaio, a mamu o kona mau umi tausani no hoi.

2 Nolaila, e pii kakou, e ikaika kakou e like me Mose;—no ka mea, olelo aku la oia i ke kai o ke Kaiula, a kaawale iho la ia ma o a ma o, a hele mai la ko kakou poe kupuna mawaena ma ka aina maloo, mailoko mai o ka noho pio ana, a hahai mai la ka poe kaua a Parao, a make aku la i ke kai o ke Kaiula.

3 Ano, aia hoi, ua ike oukou he mea oiaio keia; a ua ike no hoi oukou ua olelo mai la kekahi anela ia oukou, a no ke aha la e kanalua nei oukou? E pii kakou; ua hiki i ka Haku ke hoopakele mai ia kakou, e like me ko kakou poe kupuna, a e pepehi aku ia Labana, e like me ko Aigupita poe.

4 [m 1, p 32] Ano, i ka wa a’u i olelo aku ai i keia mau olelo, ua huhu no laua, a ua ohumu no; aka hoi, hahai mai la nae lakou mahope o’u, a hiki aku la makou mawaho o na pa o Ierusalema.

5 A ma ke pa no ia: a koi aku la au ia lakou e pee ae mawaho o na pa. A mahope iho o ko lakou pee ana, kokolo aku la wau, o Nepai, iloko o ke kulanakauhale, a hele aku la i ka hale o Labana.

7 Aka hoi, hele aku la au, a i ko’u hookokoke ana i ko Labana hale, ike aku la au i kekahi kanaka, a ua hina iho la ia i ka honua imua o’u, no ka mea, ua ona oia i ka waina.

9 A ike iho la au i kana pahikaua, a unuhi ae la au ia maloko mai o kona wahi, a o ke au o ia mea he gula maemae no ia, a ua nani loa kona hanaia ana: a ua ike au i ka pahi he kila maikai loa ia.

10 [m 1, p 33] Eia kekahi, ua koiia mai la au e ka uhane e pepehi aku ia Labana: aka nalu iho la au iloko o kuu naau, aole au i hookahe aku i ke koko o kanaka; a emi mai la au me ka makemake ole e pepehi ia ia.

11 A i hou mai la ka uhane ia’u, aia hoi ua haawi mai la ka Haku ia ia iloko o ko’u mau lima; he oiaio, a ua ike aku la no hoi au ua imi kela e lawe aku i ko’u ola iho; he oiaio, aole ona i hoolohe mai i na kauoha a ka Haku; a ua kaili aku la no hoi oia i ko makou waiwai.

12 [m 1, p 34] Eia kekahi, i hou mai la ka uhane ia’u, E pepehi ia ia, no ka mea, ua haawi mai la ka Haku ia ia iloko o kou mau lima.

13 Aia hoi, e luku ana ka Haku i ka poe hewa e hoopuka mai i kana mau hana pono. A e aho ka make ana o ke kanaka hookahi, mamua o ka emi ana a me ka make ana o kekahi lahuikanaka i ka hoomaloka.

14 [m 1, p 35] A, ano, owau, o Nepai, i ka wa a’u i lohe ai i keia mau olelo, hoomanao iho la au i na olelo a ka Haku, ana i olelo mai ai ia’u ma ka waonahele, i ka i ana mai, Ina e malama pono kau poe hua i ka’u mau kauoha, e pomaikai auanei lakou i ka aina i hai mua ia’i.

15 He oiaio, a hoomanao iho la hoi au aole e hiki ia lakou ke malama i na kauoha a ka Haku e like me ke kanawai o Mose, ke ole loaa ia lakou ke kanawai.

17 Eia hou—ua ike au ua haawi mai la ka Haku ia Labana iloko o na lima o’u no keia mea, i loaa mai ia’u na mooolelo, e like me kana mau kauoha.

18 Nolaila, hoolohe aku la au i ka leo o ka uhane, a lalau ia Labana ma kona lauoho, a oki ae la au i kona poo me kana pahi kaua iho.

19 [m 1, p 36] A mahope iho o ko’u oki ana i kona poo me kana pahikaua iho, lalau iho la au i na aahu o Labana a hoaahu mai la i ko’u kino iho; he oiaio, i na mea a pau; a kaei iho la au i kona aahu kaua i ko’u puhaka.

20 A mahope iho o ka’u hana ana i keia, hele aku la au i kahi a ko Labana waihona waiwai. A i ko’u hele ana i ka waihona waiwai o Labana, aia hoi, ike ae la au i ke kauwa a Labana, ia ia na ki o ka waihona waiwai. A kauoha aku la au ia ia ma ka leo o Labana, e hele pu me au iloko o ka waihone waiwai.

21 A manao iho la kela o kana haku o Labana no au, no ka mea, ike mai la oia i na aahu o Labana, a me ka pahikaua no hoi, i kaeiia ma ko’u puhaka.

22 A olelo mai la oia ia’u no na lunakahiko o ka poe Iudaio, ua ike oia ua hele pu kana haku o Labana me lakou i ka po.

24 A olelo aku la no hoi au ia ia,, e halihali ana no au i na mooolelo i kahakahaia maluna o na papa keleawe, i kuu mau kaikuaana la, aia lakou mawaho o na pa.

26 A e manao ana oia no na kaikuaana ma ka ekalesia ka’u olelo ana, a owau io no ua Labana la a’u i pepehi aku ai, nolaila, hahai mai la oia ia’u.

27 A olelo pinepine mai la oia ia’u no na lunakahiko o ka poe Iukaio, ia’u i hele aku ai i kuu mau hoahanau la, mawaho o na pa.

28 [m 1, p 37] Eia kekahi, ia Lamana i ike mai ai ia’u, makau nui loa iho la no ia, a me Lemuela laua me Sama no hoi. A holo aku la lakou mai ko’u alo aku; no ka mea, manao iho la lakou o Labana no ia, a ua pepehiia au e ia, a ua imi oia e lawe aku i ko lakou mau ola no hoi.

29 [m 1, p 38] Eia kekahi, kahea aku la au ia lakou, a hoolohe mai la lakou ia’u;—no ia mea, hooki iho la lakou i ka holo ana mai ko’u alo aku.

30 Eia kekahi, i ka wa a ke kauwa a Labana i ike ai i ko’u mau hoahanau, hoomaka oia e haalulu, a aneane oia e holo aku mai o’u aku, e hoi hou i ke kulanakauhale o Ierusalema.

31 [m 1, p 39] Ano, he kanaka kino nui au, o Nepai, a ua loaa mai ia’u ka ikaika nui, mai ka Haku mai, nolaila, hopu ae la au i ke kauwa a Labana, a hoopaa ia ia, i holo ole aku ai kela.

32 [m 1, p 40] Olelo akula au ia ia, ina e hoolohe mai oia i ka’u mau olelo, ma ka ola o ka Haku a ma ko’u ola no hoi, ina e hoolohe mai oia i ka makou mau olelo, e hoola aku makou ia ia.

33 A olelo aku la au ia ia me ka hoohiki, e makau ole e pono ai; a e lilo oia i kanaka ku okoa e like me makou, ina oia e iho pu i ka waonahele me makou.

34 A olelo aku la no hoi au ia ia, i ka i ana, He oiaio, ua kauoha mai ka Haku ia makou e hana i keia mea, a, aole anei makou e hoomau i ka malama ana i na kauoha a ka Haku? Nolaila, ea, ina e iho pu oe i ka waonahele i kuu makuakane la alaila, ooe pu kekahi me makou.

35 [m 1, p 41] A eia kekahi, lana hou ka manao o Zorama i na olelo a’u i olelo aku ai. A o Zorama ka ino o ua kauwa la; a olelo mai la oia, e iho pu oia i ka waonahele i kuu makuakane la. A ua hoohiki mai la no hoi oia ia makou, e noho pu oia me makou mai ia manawa aku.

36 Ano, ua makemake makou e noho pu oia me makou no keia mea, i ike ole ka poe Iudaio i ko makou holo ana iloko o ka waonahele, o alualu mai lakou ia makou, a e luku mai ia makou.

37 [m 1, p 42] A ia Zorama i hoohiki mai ai ia makou, pau iho la ko makou hopohopo nona.

38 Eia kekahi, lawe aku la makou i na papa keleawe a me ke kauwa a Labana, a hoi hou aku la i ka waonahele, a hele aku la i ka halelewa o ko makou makuakane.

1 [mokuna 1, paukū 43] Eia kekahi, a hiki makou i ka waonahele i ko makou makuakane la, aia hoi, ua hoopihaia oia me ka olioli, a o ko’u makuwahine no hoi, o Saria, ua hauoli mui loa iho la, no ka mea, ua uwe io oia no makou;

2 No ka mea, ua manao iho la oia ua make makou i ka waonahele; a ua hoohewa aku la no hoi oia i ko’u makuakane, me ka olelo ana ia ia, he kanaka hihio ia; i ka i ana, Aia hoi, ua alakai mai la oe ia makou mai ko makou aina hooilina mai, a o ka’u mau keikikane aohe lakou, a ke make nei kaua i ka waonahele.

3 A mamuli o ke ano o keia olelo ua hoohewa aku ko’u makuwahine i ko’u makuakane.

4 [m 1, p 44] Olelo ae la ko’u makuakane, i ka i ana, Ua ike no au he kanaka hihio wau; no ka mea, ina aole au i ike i na mea o ke akua maloko o ka hihio, ina ua ike ole au i ka lokomaikai o ke Akua, a ua noho au ma Ierusalema a make pu me ko’u poe hoahanau.

5 Aka hoi, ua loaa ia’u ka aina i olelo mua ia’i, a ma ia mau mea ke hauoli nei au; he oiaio, a ke ike nei au e hoopakele no ka Haku i ka’u mau keikikane i na lima o Labana, a e lawe hou mai ia lakou io kaua nei i ka waonahele.

6 A mamuli o ke ano o keia olelo, i hooluolu ae ko’u makuakane, o Lehi, i ko’u makuwahine, ia Saria, no makou, ia makou e hele ana i ka waonahele e pii aku i ka aina o Ierusalema, i loaa ka mooolelo o ka poe Iudaio.

7 [m 1, p 45] A ia makou i hoi hou ai i ka halelewa o ko’u makuakane, aia hoi, ua piha laua i ka olioli, a ua hooluoluia ko’u makuwahine:

8 A olelo mai la ioa, i ka i ana, Ano, ke ike io nei au ua kauoha mai la ka Haku i ka’u kane e holo iloko o ka waonahele; he oiaio, a ua ike io no hoi au ua hoomalu mai la ka Haku i ka’u mau keikikane, a ua hoopakele mai la ia lakou i na lima o Labana, a haawi ae la ia lakou i mana i hiki ai ia lakou ke hooko i ka mea a ka Haku i kauoha mai ai ia lakou. A mamuli o keia ano kana olelo.

9 [m 1, p 46] Hauoli nui loa iho la laua, a kaumaha iho la i mohai a me na mohai kuni i ka Haku; a haawi aku la laua i ke aloha i ke Akua o ka Iseraela.

10 A mahope iho o ko laua hoomana aloha ana i ke Akua o ka Iseraela, lawe aku la ko’u makuakane, o Lehi, i na mooolelo i kahakahaia maluna o na papa keleawe, a imi iho la oia ia mau mea mai ka hoomaka ana.

11 A ike iho la oia aia no iloko olaila na buke elima a Mose, ka mooolelo e hoakaka ana no ka hanaia ’na o ke ao nei, a me Akamu laua me Ewa, na kupuna mua o kakou;

12 A he mooolelo no hoi o ka poe Iudaio, mai kinohi a hiki i ka hoomaka ana o ke au ia Zedekia, ke alii o Iuda;

13 A me na wanana no hoi a na kaula hemolele, mai kinohou a hiki i ka hoomaka ana o ke au ia Zedekia; a o na wanana he nui wale i oleloia e ka waha a Ieremia.

14 [m 1, p 47] Eia kekahi, loaa iho la i ko’u makuakane, ia Lehi, maluna iho o na papa keleawe, ke kuauhau o kona poe kupuna; no ia mea, ua ike oia he mamo ia na Iosepa; he oiaio, o na Iosepa la ke keiki a Iakoba, ka mea i kuaiia i Aigupita, a o ka mea hoi i hoolaia e ka lima o ka Haku, i hiki ia ia ke hoola i kona makuakane, ia Iakoba, a me ko kona hale a pau, i ka make ana i ka wi.

15 A ua alakaiia’ku lakou no hoi mailoko mai o ka noho pio ana, a mailoko mai o ka aina o Aigupita, e kela Akua hookahi no, nana i hoola ia lakou.

16 A pela i loaa’i i ko’u makuakane, ia Lehi, ke kuauhau o kona poe kupuna. A he mamo no hoi o Labana no Iosepa, no ia mea, ua malama oia me kona mau makua i na mooolelo.

17 [m 1, p 48] A, i ka wa a ko’u makuakane i ike ai i ua mau mea nei a pau, ua piha iho la ia me ka uhane, a hoomaka iho la e wanana mai no kana poe hua;

18 E hele aku auanei keia mau papa keleawe i na lahuikanaka a pau, me na ohana, na olelo, a me na kanaka o kana hua.

19 Nolaila, i mai la oia aole e popo ana keia mau papa keleawe; aole hoi e ponalonalo ana i ka waiho loihi ana. A ua wanana mai la oia i na mea he nui loa e pili ana i kana poe hua.

20 [m 1, p 49] Eia kekahi, a hiki i keia manawa ua malama pono wau a me ko’u makuakane i na kauoha a ka Haku, ana i kauoha mai ai ia maua.

21 A ua loaa mai ia makou ka mooolelo a ka Haku i kauoha mai ai ia makou, a imi iho la i ua mau mea nei a ike makou he mau mea i makemakeia; he oiaio, he mea maikai loa ia makou, no ka mea, e hiki ia makou ke malama i na kauoha a ka Haku no ka makou poe keiki.

22 No ia mea, he mea pono ia i ko ka Haku manao e halihali pu makou ia mau mea me makou, i ko makou hele ana ma ka waonahele i ka aina i olelo mua ia’i.

1 [mokuna 2, paukū 1] Ano, aole au, o Nepai e kakau ana i ke kuauhau o ko’u poe kupuna ma keia wahi o ko’u mooolelo; aole hoi ma kahi manawa e aku e kakau ai au ia mea maluna o keia mau papa a’u e kakau nei; no ka mea, ua kakauia iloko o ka mooolelo i malamaia e ko’u makuakane; nolaila aole au e kakau ia iloko o keia buke.

3 A ua makemake ole au e kakau i mooolelo loihi o na mea a pau o ko’u makuakane, no ka mea, aole e hiki ke kakauia ia mau mea maluna o keia mau papa, no ka mea, ke makemake nei au i kahi kaawale e kakau ai au no na mea o ke Akua.

4 No ka mea, eia ko’u makemake nui e hiki ia’u ke koi aku i na kanaka e hele mai i ke Akua la o Aberahama, i ke Akua o Isaaka, a i ke Akua o Iakoba,a e hoolaia.

5 Nolaila, o na mea e olioli ai ko ke ao nei, aole au i kakau, aka o na mea e olioli ai ke Akua a me ka poe aole o ko ke ao nei.

6 No ia mea, e haawi aku auanei au i kauoha i ka’u mau hua, i hoopiha ole ai lakou i keia mau papa i na mea e pomaikai ole ai na keiki a kanaka.

1 [mokuna 2, paukū 2] Ano, ke makemake nei au e ike oukou, mahope iho o ka pau ana o ka wanana ana o ko’u makuakane, o Lehi, i na mea e pili ana i kana poe hua, olelo hou mai la ka Haku ia ia, i ka i ana , he mea pono ole nona, no Lehi, e lawe aku i kona ohana wale no i ka waonahele; aka na kana mau keikikane e lawe mai i na kaikamahine i ma wahine na lakou, i hiki ai ia lakou ke hoohua mai i na hua no ka Haku, iloko o ka aina i olelo mua ia’i.

2 [m 2, p 3] Eia kekahi, kauoha mai la ka Haku ia ia, e hoi hou aku au, o Nepai, a me ko’u mau hoahanau i ka aina o Ierusalema, a e lawe mai ia Isemaela a me kona ohana ilalo iloko o ka waonahele.

3 [m 2, p 4] Eia kekahi, hele hou aku la au, o Nepai, me ko’u mau hoahanau iloko o ka waonahele e pii aku i Ierusalema.

4 Pii aku la makou i ka hale o Isemaela, a ua loaa ia makou ka lokomaikai imua o ke alo o Isemaela, a olelo aku la makou ia ia i na olelo a ka Haku.

5 [m 2, p 5] Eia kekahi, hoopalupalu mai la ka Haku i ka naau o Isemaela, a me ko kona hale no hoi, a hele pu lakou me makou ilalo iloko o ka waonahele, i ka halelewa o ko makou makuakane.

6 Eia kekahi, i ko makou hele ana i ka waonahele, aia hoi, kipi mai la o Lamana laua me Lemuela, a me na kaikamahine elua o na kaikamahine a Isemaela, a me na keikikane elua a Isemaela, a me ko lakou mau ohua ia makou; he oiaio, e ku e mai ia’u, o Nepai, a ia Sama, a i ko lakou makuakane ia Isemaela, a me kana wahine, a me kana mau kaikamahine ekolu i koe.

7 [m 2, p 6] Eia kekahi, ma ua ku e ana nei ua makemake lakou e hoi i ka aina o Ierusalema.

8 Ano hoi, ua kaumaha iho la au, o Nepai, no ka paakiki o ko lakou mau naau, nolaila, olelo aku la au ia lakou, i ka i ana, ia Lamana a ia Lemuela, Aia hoi, he mau kaikuaana olua no’u; no ke aha la ka paakiki loa o olua ma ko olua mau naau, a me ka pouli no hoi ma ko olua hoomaopopo ana, i lilo ia i mea pono no olua, na’u, na ko olua kaikaina, e olelo aku ia olua, he oiaio, a e lilo i mea e hoohalike ai no olua?

10 No ke aha hoi olua i hoopoina iho ai i ko olua ike ana i kekahi anela o ka Haku?

11 No ke aha la i hoopoina ai olua i na mea nui a ka Haku i hana mai ai no kakou, i ka hoopakele ana ia kakou mailoko mai o na lima o Labana, a i loaa no hoi ia kakou ka mooolelo?

12 He oiaio, a no ka aha hoi i hoopoina iho ai olua, ua hiki i ka Haku ke hana i na mea a pau, e like me kona makemake, no na keiki a kanaka, ke hana lakou ma ka manaoio iloko ona; nolaila, e hoomau pono kakou ia ia.

13 A ina e hoomau pono kakou ia ia, e loaa auanei ia kakou ka aina i olelo mua ia’i; a e ike auanei oukou, i kekahi manawa aku, i ka hookoia ana o ka olelo a ka Haku, e pili ana i ka lukuia’na o Ierusalema; no ka mea, o na mea a pau a ka Haku i olelo mai ai no Ierusalema e hookoia no ia e pono ai.

14 No ka mea, aia hoi, e hooki koke ana ka Uhane o ka Haku i ka paio ana me lakou; no ka mea, aia hoi, ua hoomalau ae la lakou i ka olelo a na kaula, a ua hoolei aku lakou ia Ieramia iloko o ka halepaahao, a ua imi lakou e kaili ae i ke ola o ko’u makuakane, a ua kipaku mai la lakou ia ia mailoko mai o ka aina.

15 [m 2, p 7] Ano hoi, ke i aku nei au ia oukou, ina e hoi aku oukou i Ierusalema, e make pu no hoi oukou me lakou. Ano, ina e makemake oukou, o pii aku i ka aina, a e hoomanao hoi i ka olelo a’u e olelo nei ia oukou, ina e pii oukou, e make no hoi oukou, no ka mea, pela i koi mai ai ka Uhane o ka Haku ia’u e olelo aku.

16 [m 2, p 8] Eia kekahi, i ka wa a’u, a Nepai, i olelo aku ai i keia mau olelo i ko’u mau hoahanau, ua huhu mai la laua ia’u. Eia kekahi, kau mai la laua i ko laua mau lima maluna iho o’u—no ka mea, aia hoi, nui loa iho la ko laua huhu—a nakii mai la laua ia’u i na kaula, no ka mea, imi iho la laua e lawe aku i ko’u ola, i hiki ai ia laua ke haalele ia’u ma ka waonahele, e aiia e na holoholona hihiu.

17 [m 2, p 9] Aka, eia kekahi, pule aku la wau i ka Haku, i ka i ana, E ka Haku e, e like me ko’u manaoio iloko ou, e hoopakele mai oi ia’u, mai na lima mai o ko’u mau hoahanau, he oiaio, e haawi mai ia’u i ka ikaika e hiki ia’u ke moku i keia mau kaula a’u i paa’i.

18 [m 2, p 10] Eia kekahi, ia’u i olelo aku ai i keia mau olelo, aia hoi, ua hemo wale ae la na kaula mailuna aku o ko’u mau lima, a me ko’u mau kapuai, a ku ae la wau imua o ko’u mau hoahanau, a olelo hou aku la ia laua.

19 [m 2, p 11] Huhu hou mai la laua ia’u, a imi iho la e kau mai i na lima maluna iho o’u. Aka hoi, o kekahi o na kaikamahine a Isemaela, a me kona makuwahine no hoi, a me kekahi o na keikikane a Isemaela, nonoi aku la lakou i ko’u mau hoahanau, a hoopalupalu ae la lakou i ko laua mau naau, a hooki iho la laua i ko laua hooikaika ana e kaili aku i ko’u ola.

20 [m 2, p 12] Eia kekahi, ua kaumaha iho la laua no ko laua hewa, a kulou iho la laua imua o’u me ka nonoi mai ia’u, e kala aku au i ka hewa a laua i hana mai ai ia’u.

21 [m 2, p 13] Eia kekahi, kala aku la no wau ia laua me ka manao ole aku i na mea a pau a laua i hana’i. a hooikaika aku la au ia laua e pule aku i ka Haku, i ko laua Akua, no ke kalaia’na mai. A hana iho la laua pela. A pau ka laua pule ana i ka Haku, alaila, hele hou aku la makou ma ko makou hele ana i ka halelewa o ko makou makuakane.

22 [m 2, p 14] Eia kekahi, hiki aku la makou i ka halelewa o ko makou makuakane. A mahope iho o ko’u hiki ana, a me ko’u mau hoahanau, a me ko ka hale a pau o Isemaela, i ka halelewa o ko’u makuakane, haawi aku la lakou i ke aloha i ka Haku, i ko lakou Akua; a kaumaha aku la lakou i mohai, a me na mohai kuni ia ia.

1 [mokuna 2, paukū 15] Eia kekahi, ua hoiliili mai la makou i na hua a pau o kela ano o keia ano; o ka hua liilii o kela ano o keia ano.

2 Eia kekahi, i ka noho ana o ko’u makuakane i ka waonahele, olelo mai la oia ia makou, i ka i ana, Aia hoi, ua moe au i ka moe, a ua ike iho wau i ka hihio.

3 Aia hoi, no ka mea a’u i ike aik, he kumu no ko’u e hauoli ai i ka Haku no Nepai a no Sama no hoi; no ka mea, he kumu no ko’u e manao ai e hoolaia auanei laua a me na hua a laua he nui wale.

4 Aka hoi, E Lamana a me Lemuela, ke makau nui loa nei au no olua; no ka mea, aia hoi, manao iho la au ua ike au iloko o ko’u moe, i kekahi auakua pouli a eehia.

5 [m 2, p 16] Eia kekahi, ike aku la au i kekahi kanaka ua hoaahuia oia i kekahi aahu keokeo: a hele mai la oia a ku imua o’u.

7 Eia kekahi, i ko’u hahai ana ia ia, ike iho la au aia wau iloko o kahi neoneo, pouli, a eehia.

8 A mahope iho o ko’u hele ana no kekahi mau hora iloko o ka pouli, hoomaka iho la au e pule i ka Haku, nana e aloha mai ia’u, e like me ka nui o kona lokomaikai oluolu.

9 [m 2, p 17] Eia kekahi, mahope iho o ka’u pule ana i ka Haku, ike aku la au i kekahi aina kula, ua nui a akea hoi.

10 A ike aku la au i kekahi laau, a o kona hua he mea i makemake loa ia e hoopomaikai ai.

11 [m 2, p 18] Eia kekahi, hele aku la au, a ai iho la i kona hua; a ike iho la au ua ono loa ia, mamua o na mea a pau a’u i hoao mua ai. He oiaio, a ua ike au i kona hua he keokeo ia, e oi ana mamua o na mea keokeo a pau a’u i ike ai.

12 A i ko’u ai ana i kona hua, ua hoopiha mai la ia i ko’u naau me ka hauoli nui loa; no ia mea, ua kupu mai ko’u makemake e ai pu no hoi ko’u ohana; no ka mea, ua ike au ua makemakeia oia mamua o na hua e ae a pau.

13 A i ka alawa ana ae o ko’u mau maka i o a ia nei, malia paha e loaa ia’u ko’u mau ohua, ike aku la au i kekahi kahawai, e kahe ana ia, a ua kokoke ia i ka laau nona ka hou a’u i ai ai.

14 A nana aku la au e ike i kona wahi i kahe mai ai; a ike aku la au i ke kumu ona aole mamao aku mai o’u aku; a ma ua kumu la, ike aku la au i ko oukou makuwahine, ia Seria, a me Sama, a me Nepai; a ku iho la lakou me he mea la aole lakou i ike ko lakou wahi e hele ai.

15 [m 2, p 19] Eia kekahi, peahi aku la au ia lakou, a olelo aku la no hoi au ia lakou, me ka leo nui, e hele mai lakou io’u la, a e ai i ka hua i makemakeia mamua o na hua e ae a pau.

16 [m 2, p 20] Eia kekahi, hele mai la lakou io’u la, a ai iho la no hoi i ka hua.

17 A ua makemake au e hele mai no hoi o Lamana a me Lemuela, a e ai no hoi i ka hua; nolaila, alawa ae la au i ko’u mau maka i ke kumu o ke kahawai, malia paha o ike au ia laua.

18 [m 2, p 21] Eia kekahi, ike aku la au ia laua, aole nae laua e hele mai io’u la.

19 A ike aku la au i kekahi kookoo hao; e waiho loihi ana ia ma ke kapa o ke kahawai, a hiki mai i ka laau, kahi a’u i ku ai.

20 A ua ike no hoi au i kekahi ala pololei a ololi, ma ka aoao o ke kookoo hao, a hiki i ka laau kahi a’u e ku ana; a hele no hoi ia ala ma ke kumu o ke kahawai i kekahi aina kula, ua nui a akea, me he honua okoa la ia;

21 A ike aku la au i na lehulehu o kanaka aole pau i ka heluia; e lulumi mai ana he nui wale o lakou, e loaa ia lakou ke ala e hiki mai ai i ka laau, kahi a’u i ku ai.

22 [m 2, p 22] Eia kekahi, hele mai la lakou, a hoomaka ma ke ala e hele ana i ka laau.

23 Eia kekahi, pii mai la he ohu pouli; he oiaio, he ohu nui a pouli, a o ka poe i hoomaka ma ke ala, hili ae la lakou, a auwana aku la, a nalowale iho la lakou.

24 [m 2, p 23] Eia kekahi, ike aku la au i na mea e ae e lulumi mai ana; a hele mai la, a lalau aku la i ka welau o ke kookoo hao; a hooikaika mai la lakou iwaena o ka ohu pouli, a e hoopaa ana i ke kookoo hao, a hiki mai la lakou a ai i ka hua o ka laau.

25 A mahope iho o ko lakou ai ana i ka hua o ka laau, alawa ae la lakou i ko lakou mau maka i o a ia nei, me he mea la ua hilahila lakou.

26 A owau kekahi i alawa’e i ko’u mau maka i o a i o, a ike aku la au ma kela aoao o ke kahawai, i kekahi hale nui a akea; a ku iho la ia me he mea la ma ka lewa, a kiekie maluna o ka honua;

27 A ua piha ia i na kanaka, na mea kahiko a me na mea hou, na kane a me na wahine; a o ke ano o ko lakou kapa he maikai loa ia; a e ku ana lakou e hoomaewaewa mai ana, a e kuhikuhi ana me ko lakou manamana lima i ka poe i hiki mai, a e ai ana i ka hua.

28 A mahope iho o ko lakou hoao ana i ka hua, hilahila iho la lakou, no na mea e hoowahawaha ana ia lakou; a haule aku la lakou i na ala i papaia, a nalowale iho la.

29 [m 2, p 24] Ano hoi, aole au, o Nepai, e olelo aku i na olelo a pau o ko’u makuakane.

30 Aka i pokole ia ma ka palapala ana, aia hoi, ike aku la oia i na lehulehu e ae e hooikaika ana; a hele mai la lakou a lalau ae la i ka welau o ke kookoo hao; a hooikaika ae la lakou imua, e puili mau ana i ke kookoo hao, a hiki mai la lakou, a hina ilalo, a ai iho la i ka hua o ka laau.

31 A ike no hoi oia i na lehulehu e ae e huli ana i ko lakou ala i ua hale nui la a akea.

32 [m 2, p 25] A eia kekahi, ua nui loa ka poe i make i ka hohonu o ke kumuwai; a he nui no hoi i nalowale i kona ike aku, e auwana ana ma na alanui e.

33 A he lehulehu ka poe i komo aku iloko o ua hale ano e la. A mahope iho o ko lakou komo ana iloko o ua hale la, ua kuhikuhi mai la lakou me ka manamana lima, e hoowahawaha mai ana ia’u, a i ka poe no hoi e ai pu ana i ka hua; aka aole o makou manao ia lakou.

34 O na olelo a ko’u makuakane keia: no ka mea, o ka poe i manao ia lakou, ua haule iho la.

36 [m 2, p 26] A mahope iho o ka olelo ana a ko’u makuakane i na olelo a pau o kona moe a o kona hihio, a he nui loa ua mau olelo la, i mai la oia ia makou, no na mea ana i ike ai iloko o ka hihio, ua makau nui loa iho la oia no Lamana laua me Lemuela; he oiaio, ua makau oia o hooleiia’ku laua mai ke alo o ka Haku;

37 A hooikaika aku la oia ia laua, me ke aloha nui e like me ka makua lokomaikai, e hoolohe mai laua i kana mau olelo, i aloha mai paha ka Haku ia laua, aole e hoolei aku ia laua mai ona aku; he oiaio, ao aku la ko’u makuakane ia laua.

38 [m 2, p 27] A mahope iho o kana ao ana ’ku ia laua, a me kana wanana ana ia laua no na mea he nui, kauoha aku oia ia laua e malama pono i na kauoha a ka Haku; a hooki ae la oia i ka olelo ana ia laua.

1 A o keia mau mea a pau a ko’u makuakane i ike ai, a i lohe ai, a i olelo ai, ia ia i noho ai ioko o ka halelewa ma ke awawa o Lemuela; a me na mea e ae no hoi he nui loa, aole i hiki ke kakauia maluna iho o keia mau papa.

2 Ano hoi, ua olelo no au no keia mau papa, aia hoi, aole maluna o ua mau papa nei au i kakau pau loa ai i ka mooolelo o ko’u poe kanaka; no ka mea, o na papa kahi a’u i kakau ai i ka mooolelo a pau o ko’u poe kanaka, ua kapa aku au i ka inoa o Nepai; no ia mea, i kapaia’i ua mau mea la na papa o Nepai, mamuli o ko’u inoa ponoi; a ua kapaia keia mau papa no hoi na papa o Nepai.

3 [m 2, p 28] Aka hoi, ua loaa mai ia’u he kauoha na ka Haku mai, e hana aku au i keia mau papa, no keia mea wale no, i kahakahaia ka mooolelo no ka lawelawe ana o ko’u poe kanaka ma ka oihana kahuna.

4 A maluna o na papa e ae e kahakahaia ka mooolelo o ka noho alii ana o na ’lii, a me na kaua a me na paio o ko’u poe kanaka; nolaila, o ka hapa nui o keia mau papa no ka hana ma ka oihana kahuna ia; a o ka hapa nui o na papa e ae no ka noho alii ana o na ’lii, a me na kaua a me na paio o ko’u poe kanaka no ia.

5 No ia mea, ua kauoha mai la ka Haku ia’u e hana i keia mau papa, no kekahi manao naauao iloko ona: o ua manao la ua ike ole au.

6 Aia ua ike mai la ka Haku i na mea a pau mai kinohi mai; nolaila, e hoomakaukau no oia i ala, e hooko ai i kana mau hana a pau mawaena o na keiki a kanaka; no ka mea, aia hoi, ia ia no ka mana a pau i ka hooko ana i kana mau olelo a pau. A pela no ia. Amene.

1 [mokuna 3, paukū 1] Ano, ke hoomaka nei au, o Nepai, e kakau i mooolelo maluna o keia mau papa, no ka’u hana ana, a me ko’u noho alii ana, a me ka hana ma ka oihana kahuna, nolaila, i ke kakauia ana o ko’u mooolelo iho he pono no’u e olelo uuku no na mea o ko’u makuakane, a me na hoahanau hoi o’u.

2 [m 3, p 2] No ka mea, eia kekahi, a pau aku la ka olelo ana a ko’u makuakane i na olelo o kona moeuhane, a me kona paipai ana ia laua e ikaika loa, olelo mai la oia ia laua no ka poe Iudaio.

3 A mahope aku o ko lakou lukuia ana, he oiaio, o ua kulanakauhale nui la o Ierusalema, (a he nui loa ka poe e lawe pio ia i Babulona, e like me ka manawa ku pono o ka Haku,) e hoihoi hou ia auanei lakou; he oiaio, e lawe hou ia mai mailoko mai o ka noho pio ana; a mahope iho o ko lakou hoi hou ana mailoko mai o ka noho pio ana, e noho hou no auanei lakou ma ko lakou aina hooilina.

4 [m 3, p 3] He oiaio, he mau haneri makahiki eono mai ka wa a ko’u makuakane i haalele ai ia Ierusalema, e hoala mai ana ka Haku ke akua, i kekahi kaula iwaena o ka poe Iudaio; he oiaio, he Mesia, a ma na olelo e ae, he Mea e Ola’i ko ke ao nei.

5 A olelo mai la no hoi oia no na kaula, ua hoike mai la ka nui loa o lakou no ia mau mea, no ua Mesia nei, nona kana olelo ana, a oia ka Mea e hoolapanai i ko ke ao nei.

6 Nolaila, o ko ke ao nei a pau, ua lilo, a ua haule no hoi, a e mau loa aku lakou pela, ke ole lakou e hilinai aku maluna o ua Mea Hoola nei.

7 [m 3, p 4] A olelo no hoi oia no kekahi kaula, nana e hele mai imua o ka Mesia, e hoomakaukau i ke ala o ka Haku;

8 He oiaio, e hele no auanei oia a e kala ma ka waonahele, E hoomakaukau oukou i ke alanui o ka Haku, a e hana i kona mau kuamoo i pololei; no ka mea, ke ku nei kekahi iwaena o oukou, ka mea a oukou i ike ole ai, a ua nui aku kona mana mamua o’u, aole au e pono ke kala ae i ke kaula o kona kamaa. A ua nui ka olelo a ko’u makuakane no ua mea nei.

9 [m 3, p 5] A i mai la ko’u makuakane e bapezito no ia ma Betabara, ma kela aoao o Ioredane; a i mai la no hoi ia e bapetizo no oia me ka wai; he oiaio, e bapetizo auanei ia i ka Mesia me ka wai.

10 A mahope iho o kona bapetizo i ka Mesia me ka wai, e ike no oia a e hoika aku, ua bapetizo aku oia i ke Keikihipa a ke Akua, nana e lawe aku i ka hala o ko ke ao nei.

11 [m 3, p 6] Eia kekahi, a pau ae la ka olelo ana a ko’u makuakane i keia mau olelo, olelo ae la oia i ko’u mau hoahanau no ka euanelio e haiia ana iwaena o ka poe Iudaio; a no ka emi ana no hoi o ka poe Iudaio iloko o ka hoomaloko. A mahope aku o ko lakou pepehi ana i ka Mesia, ka mea e hele mai ana, a mahope aku o kona make ana, e ala no oia mai ka make mai, a e hoike aku ma ka Uhane Hemolele, ia ia iho i ka poe Genetile.

12 [m 3, p 7] He oiaio, ua olelo nui mai la ko’u makuakane no ka poe Genetile, a no ko ka hale o Iseraela, e hoohalikeia auanei lakou me kekahi laau oliva, o kona mau lala i haihaiia auanei, a e hoopuehuia aku maluna o ka ili a pau o ka honua.

13 Nolaila, i mai la ia he mea e pono ai e alakaiia kakou me ka lokahi o ka manao, i ka aina i hai mua ia’i, i ka hooko ana i ka olelo a ka Haku, e hoopuehuia’i kakou maluna o ka ili a pau o ka honua.

14 A mahope aku o ka hoopuehuia’na o ko ka hale o Iseraela, e houluulu hou ia lakou; a mahope aku o ka loaa ana i ka poe Genetile ka euanelio mana a pololei, e pakuiia auanei na lala maoli o ka laau oliva, oia na koena o ko ka hale o Iseraela, a e loaa ia lakou ka ike i ka Mesia oiaio, ko lakou Haku a me ko lakou Mea e Ola’i.

15 A mamuli o ke ano o keia mau olelo wanana aku la kuu makuakane, a olelo ae la i ko’u mau hoahanau; a me na mea e ae no hoi he nui wale, a’u i kakau ole ai iloko o ua buke nei; no ka mea, ua kakau au i na mea i ku pono ia’u o ua mau mea nei iloko o ka’u buke e ae.

16 A ua hanaia keia mau mea a pau a’u i olelo ai, i ka noho ana o ko’u makuakane iloko o ka halelewa, ma ke awawa o Lemuela.

17 [m 3, p 8] Eia kekahi, owau, o Nepai, mahope iho o ko’u lohe ana i na olelo a pau a ko’u makuakane, no na mea ana i ike ai iloko o ka hihio; a me na mea no hoi ana i olelo mai ai ma ka mana o ka Uhane Hemolele; a o ua mana la ua loaa ia ia ma ka manaoio ma ke Keiki a ke Akua; a o ke Keiki a ke Akua o ke Mesia e hele mai ana; ua makemake no hoi wau, o Nepai, e nana, a e lohe, a e ike i keia mau mea, ma ka mana o ka Uhane Hemolele, o ka haawina no ia o ke Akua i ka poe a pau e imi ikaika ana ia ia, i ka wa kahiki no hoi e like me ka wa ana e hoike mai ai ia ia iho i na keiki a kanaka;

18 No ka mea, oia mau no ia, inehinei, a i keia la, a i ka wa pau ole; a ua hoomakaukauia ke ala no na kanaka a pau, mai ka hookumuia ana mai o ke ao nei, ina e mihi lakou a e hele aku io na la;

19 No ka mea, o ka mea e imi ikaika ana e loaa no ia ia; a e weheia na mea pohihihi o ke Akua ia lakou, ma ka mana o ka Uhane Hemolele, i keia manawa no hoi e like me na manawa kahiko; a i na la kahiko no hoi e like me na manawa e hiki mai ana; nolaila, o ka hana a ka Haku oia hookahi mau loa no ia.

20 Nolaila, E hoomanao, e ke kanaka, no kau hana a pau, e hookolokoloia auanei oe.

21 No ia mea, ina ua imi oukou e hana i ka hewa ma na la o ko oukou noho ana ma ka honua, alaila, ua loaa oukou me ka paumaele imua o ka noho hookolokolo o ke Akua; aole loa e hiki i kekahi mea paumaele ke noho pu me ke Akua; nolaila, e hooleiia aku oukou no ka wa pau ole e pono ai.

22 A ke haawi mai nei ka Uhane Hemolele i ka mana ia’u e olelo aku i keia mau mea, aole e hoole aku.

1 [mokuna 3, paukū 9] No ka mea, eia kekahi mahope iho o ko’u ake ana e ike i na mea a ko’u makuakane i ike ai, a e manaoio ana no au ua hiki i ka Haku ke hoike mai ia mau mea ia’u, i ko’u noho ana e nalu ana i kuu naau iho, kailiia aku la au iloko o ka Uhane o ka Haku, i kahi mauna kiekie loa, a’u i ike ole ai mamua, ma kahi a’u i ku ole ai ko’u wawae mamua.

4 I mai la ka Uhane ia’u, Ke manaoio nei anei oe, ua ike kou makuakane i ka laau ana i olelo aku ai?

5 A i aku la au, Ae, ua ike oe ua manaoio au i na olelo a pau a ko’u makuakane.

6 [m 3, p 10] A pau keia mau olelo i ka oleloia e au, hooho aku la ka Uhane me ka leo nui, i ka i ana, Hosana i ka Haku, ke Akua kiekie loa; no ka mea, oia ke Akua maluna o ka honua a pau, he oiaio, maluna iho o na mea a pau loa: a pomaikai no oe, e Nepai, no ka mea, ua manaoio oe i ke Keiki a ke Akua kiekie loa; nolaila, e ike no oe i na mea au i makemake ai.

7 Aia hoi, e haawiia keia mea ia oe i hoailona, mahope iho o kou ike ana i ka laau nana i hoohua mai i ka hua a kou makuakane i hoao ai, e ike no hoi oe i kekahi kanaka e iho mai ana noloko mai o ka lani, a e ike oe ia ia, a mahope aku o kou ike ana ia ia, nau e hoike aku, oia no ke Keiki a ke Akua.

8 [m 3, p 11] Eia kekahi, i mai la ka Uhane ia’u, e nana’ku! a nana aku la au a ike aku la i kahi laau, a ua like ia me ka laau a ko’u makuakane i ike ai; a o ka noni o ua laau nei ua oi loa aku ia, he oiaio, e oi aku ana mamua o na nani a pau; a o kona keokeo ua oi aku ia mamua o ke keokeo o ka hau maemae.

9 [m 3, p 12] Eia kekahi, i ka wa a’u i nana aku ai i ka laau, i aku la au i ka Uhane, Ke ike nei au, ua hoike mai oe ia’u i ka laau i maikai maluna o na mea a pau.

11 I hou aku la au ia ia, E ike i ke ano maopopo o keia mea; no ka mea, ua olelo aku la au ia ia me he kanaka la e olelo ana; no ka mea, ua ike aku la au ma ke ano o ke kanaka ia; aka, ua ike nae au o ka Uhane o ka Haku no ia; a olelo mai la oia ia’u me he kanaka la e olelo pu ana me hai.

12 [m 3, p 13] Eia kekahi, i mai la oia ia’u, E nana! a nana aku la au me he mea la e nana aku ia ia, aole nae au i ike ia ia; no ka mea, ua hala aku la oia mai ko’u alo aku.

13 [m 3, p 14] Eia kekahi, nana aku la au a ike iho la i ke kulanakauhale nui o Ierusalema, a me na kulanakauhale e ae no hoi. A ike aku la au i ke kulanakauhale o Nazareta; a iloko o ke kulanakauhale o Nazareta ike aku la au i kekahi wahine puupaa, a nui loa kona maikai a me kona keokeo.

14 [m 3, p 15] Eia kekahi, ike aku la au i na lani e hamama ana, a iho mai la kekahi anela a ku iho la imua o’u; a i mai la oia ia’u, E Nepai, heaha kau e ike nei?

15 A i aku la au ia ia, He wahine puupaa, nani loa a maikai mamua o na wahine puupaa e ae a pau.

17 I aku la au ia ia, Ua ike au he aloha kona i kana poe keiki; aole nae au i ike i ke ano o na mea a pau.

18 A i mai la oia ia’u, Aia hoi, o ka wahine puupaa au e ike nei, o ka makuwahine ia o ke Keiki a ke Akua, mamuli o ke ano o ke kino.

19 [m 3, p 16] Eia kekahi, ike aku la au ua kailiia aku la oia ma ka Uhane; a mahope iho o kona kailiia ana’ku ma ka Uhane no kekahi manawa, olelo mai la ka anela ia’u, i ka i ana, E nana’ku!

20 A nana aku la au, a ike hou aku la i ka wahine puupaa, e kaikai ana i kahi keiki ma kona mau lima.

21 A i mai la ka anela ia’u, E nana’ku i ke Keikihipa a ke Akua, he oiaio no, i ke Keiki a ka Makua mau loa! Ke ike nei anei oe i ke ano maopopo o ka laau a kou makuakane i ike ai?

22 A pane aku la au ia ia, i ka i ana, Ae, o ke aloha o ke Akua no ia, e ninini ana ia ia iho mawaena o na naau o na keiki a kanaka; nolaila, o ka mea ia e makemakeia maluna o na mea a pau.

23 A olelo mai la oia ia’u, i ka i ana, He oiaio, a o ka mea ia e olioli loa ai ka naau.

24 A pau kana olelo ana i keia mau olelo, i mai la oia ia’u, E nana’ku! A nana aku la au, a ike aku la i ke Keiki a ke Akua e hele aku ana mawaena o na keiki a kanaka, a ike no hoi au i na mea he nui e hina ana ilalo ma kona mau wawae, a hoomana aku ia ia.

25 [m 3, p 17] Eia kekahi, ike aku la au o ke kookoo hao a ko’u makuakane i ike ai, o ka ke Akua olelo no ia, e alakai ana ia me ai ke kumu wai o na wai ola, a i ka laau o ke ola; a o ua wai nei he mea ia e hoohalike ai i ke aloha o ke Akua;

26 A i hou mai la ka anela ia’u, E nana’ku a e ike i ko ke Akua hoohaahaa ana ia ia iho!

27 A nana aku la au a ike aku la i ka Mea Hoola i ko ke ao nei, oia ka mea a ko’u makuakane i olelo mai ai; a ike aku la no hoi au i ke kaula, nana e hoomakaukau i ke ala imua ona. A hele aku la ke Keikihipa a ke Akua a ua bapetizoia e ia; a mahope iho o kona bapetizoia’na ike aku la au i na lani ua hamama, a iho iho la ka Uhane Hemolele mailoko mai o ka lani, a kau maluna one me he manu nunu la.

28 A ua ike aku la au ua hele aku oia e lawelawe ana i na kanaka, ma ka mana a me ka nani nui; a ua hoakoakoaia na lehulehu e hoolohe ia ia; a ike aku la au ua hoolei aku lakou ia ia maiwaena aku o lakou.

29 A ike no hoi au i na mea e ae he umikumamalua e hahai ana ia ia. [m 3, p 18] Eia kekahi, ua kailiia aku lakou iloko o ka Uhane, mai ko’u alo aku, aole au i ike ia lakou.

30 Eia kekahi, olelo hou mai la ka anela ia’u, i ka i ana, E nana’ku! A nana aku la au, a ike aku la au i na lani ua hamama hou, a ike au i na anela e iho mai ana maluna o na keiki a kanaka; a lawelawe ae la lakou ia lakou la.

31 A olelo hou mai la oia ia’u, i ka i ana, E nana’ku! A nana au, a ike aku la i ke Keikihipa a ke Akua e hele aku ana iwaena o na keiki a kanaka. A ike aku la au i na kanaka mai he nui loa, a ua loohia i na mai o na ano a pau, a me na daimonio, a me na uhane haumia; a olelo mai la ka anela, a hoike mai la i keia mau mea a pau ia’u. A ua hoolaia lakou e ka mana o ke Keikihipa a ke Akua; a ua mahikiia’ku na daimonio a me na uhane haumia.

32 [m 3, p 19] Eia kekahi, olelo hou mai la ka anela ia’u, i ka i ana, E nana’ku! A nana au a ike aku la i ke Keikihipa a ke Akua, a ua laweia ’ku e na kanaka; he oiaio, ua hookolokoloia ke Keiki a ke Akua mau loa e ko ke ao nei; a ua ike au a hoike aku la.

33 A ike aku la wau, o Nepai, ua hookiekieia oia iluna ma ke kea, a pepehiia iho la no na hala o ko ke ao nei.

34 A mahope iho o kona pepehiia ana, ike aku la au i na lehulehu o ka honua, ua hoakoakoaia’e la lakou e kaua aku i na aposetolo a ke Keikihipa; no ka mea, pela i kapaia’i ka poe umikumamalua e ka anela o ka Haku.

35 A akoakoa ae la ka lehulehu o ka honua; a ike aku la au aia lakou iloko o kekahi hale nui a akea, e like me ka hale a kuu makuakane i ike ai! A olelo hou mai la ka anela o ka Haku, i ka i ana, E nana’ku i ko ke ao nei a me ke akamai olaila; he oiaio, E nana ’ku, ua akoakoa pu ae la ko ka hale o Iseraela e kaua aku i na aposetolo he umikumamalua a ke Keikihipa.

36 [m 3, p 20] Eia kekahi, ua ike au a hoike aku la, o ka hale nui a akea, o ka haaheo no ia o ko ke ao nei; a haule iho la ia, a ua nani wale kona haule ana. A olelo hou mai la ka anela o ka Haku ia’u, i ka i ana, Pela auanei ka lukuia ana o na lahuikanaka, na ohana, na olelo, a me na kanaka a pau, e kaua aku ana i na aposetolo he umikumamalua a ke Keikihipa.

1 [mokuna 3, paukū 21] Eia kekahi, i mai la ka anela ia’u, E nana, a e ike aku i kau hua, a me na hua a kou mau hoahanau! A nana aku la au a ike aku la i ka aina i hai mua ia’i; a ike aku la au i na lehulehu o na kanaka, he oiaio, me he mea la i ka helu ana, ua like me na one o ke kai.

2 [m 3, p 22] Eia kekahi, ike aku la au i na lehulehu i houluuluia e kaua, kekahi i kekahi; a ike aku la au i na kaua, a me ka lono o na kaua, a me na luku nui ana me ka pahikaua iwaena o ko’u poe kanaka.

3 [m 3, p 23] Eia kekahi, ike aku la au i na hanauna he nui wale e make ana mamuli o ke ano o na kaua a me na paio ma ka aina; a ike aku la au i na kulanakauhale he nui wale, he oiaio, aole au i helu i ka nui o lakou.

4 [m 3, p 24] Eia kekahi, ike aku la au i ka ohu o ka pouli maluna o ka ili o ka aina i olelo mua ia’i; a ike au i na uila, a lohe au i na hekili, a me na olai, a i kela ano a i keia ano o ka haalulu nui; a ike aku la au ua naha ka honua a me na pohaku; a ike aku la au i na mauna e helelei ana a lilo i mau apana; a ike aku la au i na wahi palahalaha o ka aina, ua hoapuupuuia; a ike aku la au i na kulanakauhale he nui wale, ua poho lakou; a ike aku la au he nui wale o ia mau wahi ua puhiia i ke ahi; a ike aku la au he nui wale o ia mau wahi ua hiolo i ka honua, no ka haalulu ana ona.

5 [m 3, p 25] Eia kekahi, mahope iho o ko’u ike ana i keia mau mea, ike aku la au i ka uahi o ka pouli, ua mao loa ae mai ka ili aku o ka honua; a ike aku la au i na lehulehu o na kanaka ua hina iho la, no ka nui a me ka weliweli o na hoopai ana a ka Haku.

6 A ike aku la au i na lani e hamama ana, a me ke Keikihipa a ke Akua e iho mai ana mailoko mai o ka lani; a iho ilalo oia a hoike aku la ia ia iho ia lakou.

7 A ike no hoi au a hoike aku la, ua haule ka Uhane Hemolele maluna o na mea e ae he umikumamalua; a ua hooliloia lakou e ke Akua, a ua waeia.

8 [m 3, p 26] A olelo mai la ka anela ia’u, i ka i ana; e nana ’ku oe i na haumana he umikumamalua a ke Keikihipa, i kohoia e lawelawe i kau poe hua.

9 A i mai la oia ia’u, Ke hoomanao nei anei oe i na aposetolo he umikumamalua o ke Keikihipa? Aia hoi, o lakou ka poe nana e hookolokolo i na ohana he umikumamalua o ka Iseraela; nolaila, e hookolokoloia auanei na aposetolo he umikumamalua o kau poe hua e lakou; no ka mea, no ko ka hale o Iseraela oukou;

10 A o keia mau aposetolo he umikumamalua au e ike nei, na lakou e hookolokolo auanei i kau poe hua. A, aia hoi, ua aponoia lakou no ka wa pau ole; no ka mea, no ko lakou manaoio i ke Keikihipa a ke Akua, ua hookeokeoia ko lakou mau aahu i kona koko.

11 [m 3, p 27] A i mai la ka anela ia’u, E nana! A nana aku la au, a ike aku la ua make na hanauna ekolu ma ka pono; a ua keokeo ko lakou mau aahu, he oiaio, e like me ke Keikihipa a ke Akua. A i mai la ka anela ia’u, o lakou nei ua hookeokeoia i ke koko o ke Keikihipa no ko lakou manaoio iloko ona.

12 A, ike aku la no hoi owau, o Nepai, i na mea he nui wale o ka ’ha o ka hanauna, ua make ma ka pono.

14 A i mai la ka anela ia’u, E nana ’ku i kau poe hua, a i na hua no hoi a kou mau hoahanau!

15 Eia kekahi, nana ’ku la au a ike aku la i na kanaka o ka’u hua i houluuluia he poe nui loa, e ku e i na hua a ko’u mau hoahanau; a ua houluulu pu ia lakou e kaua.

16 [m 3. p 29] A olelo mai la ka anela ia’u, i ka i ana, E nana aku i ke kumu wai o ka wai lepo a kou makuakane i ike ai; he oiaio, i ke kahawai ana i olelo ai; a o na wahi hohonu ona oia no na wahi hohonu o Gehena;

17 A o na ohu o ka pouli oia no na hoowalewale o ka diabolo, e hoomakapo ana i na maka, a e hoopaakiki ana i na naau o na keiki a kanaka, a e alakai aku ana ia lakou me na alanui akea, i make lakou, a ua nalowale no lakou;

18 A o ka hale nui a akea a kou makuakane i ike ai, oia no manao kiekie a me ka haaheo o na keiki a kanaka. A ua hookaawaleia lakou e kekahi awawa nui a weliweli; oia hoi ka olelo o ka hoopai pololei a ke Akua mau loa, a o ka Mesia, oia ke Keikihipa a ke Akua, a nona ka hoike ana o ka Uhane Hemolele, mai ka hookumuia’na o ke ao nei a hiki loa ia nei, a mai keia manawa aku a mau loa aku.

19 A i ka ka anela olelo ana i keia mau olelo, nana aku la au a ike aku la e paio ana na hua a ko’u mau hoahanau ma ke ku e i ka’u poe hua, e like me ka olelo a ka anela; a no ka haaheo o ka’u poe hua, a me ka hoowalewale ana o ka diabolo, ike aku la au ua lanakila na hua a ko’u mau hoahanau maluna o ka’u poe hua.

20 [m 3, p 30] Eia kekahi, ike aku la au i na kanaka o ka hua a ko’u mau hoahanau, ua lanakila lakou maluna o ka’u poe hua; a hele aku la lakou he poe nui wale maluna o ka ili o ka aina.

21 A ike aku la au ia lakou ua houluulu lehulehu ia; a ike aku la au i na kaua a me na lono o na kaua mawaena o lakou, a me na kaua a me na lono o na kaua ua ike aku au i na hanauna he nui i make.

22 A i mai la ka anela ia’u, Aia hoi, e emi auanei o lakou nei iloko o ka hoomaloka.

23 [m 3, p 31] Eia kekahi, ike aku la au mahope iho o ko lakou emi ana iloko o ka hoomaloka, lilo iho la lakou i haulaula a i poe hoopailuaia, a he poe kanaka ekaeka, piha me ka palaualelo a me kela ano a me keia ano o na mea i hoowahawahaia.

1 [mokuna 3, paukū 32] Eia kekahi, olelo mai la ka anela ia’u, i ka i ana, E nana ’ku! A nana aku la au a ike aku la i na lahuikanaka a me na aupuni he nui wale.

2 A i mai la ka anela ia’u, Ke ike nei oe i ke aha? I aku la au, Ke ike nei au i na lahuikanaka a me na aupuni he nui loa.

3 A i mai la oia ia’u, O lakou nei, oia na lahuikanaka a me na aupuni o ka poe Genetile.

4 [m 3, p 33] Eia kekahi, ike aku la au iwaena o na lahuikanaka o ka poe Genetile i ke kahua o kekahi ekalesia nui.

5 A i mai la ka anela ia’u, E nana aku i ke kahua o kahi ekalesia i ino loa ia maluna iho o na ekalesia e ae a pau, o ka mea ia e pepehi ana i ka poe hoano o ke Akua, he oiaio, a e hoeha ana ia lakou, a e nakii ana ia lakou ilalo, e hooauamo ana ia lakou me kekahi auamo hoa, a e lawe ana ia lakou ilalo ma ka noho pio ana.

6 [m 3, p 34] Eia kekahi, ike aku la au ia ua ekalesia nui a ino loa la; a ike aku la au o ke diabolo oia ke kahua ona.

7 A ike aku la no hoi au i ke gula, a me ke kala, a me ke kilika, a me ka lole ulaula, a me ka lilina i miloia a nani, a me ka lole maikai o kela ano keia ano, a ike aku la au i na wahine hookamakama he nui wale.

8 A olelo mai la ka anela ia’u, i ka i ana, E nana aku i ke gula, a me ke kala, a me ke kilika, a me ka lole ulaula, a me ka lilina i miloia a noni, a me ka lole maikai, a me na wahine hookamakama, oia ka makemake o ua ekalesia nui a ino loa nei:

9 A i mea i loaa’i ia lakou ka olelo hoomaikai a ko ke ao nei, ke luku nei lakou i ka poe hoano o ke Akua, a lawe ia lakou ilalo ma ka noho pio ana.

10 [m 3, p 35] Eia kekahi, nana aku la au a ike aku la i na kai he nui wale; a hookowa ae la lakou i ka poe Genetile mai ka hua aku a ko’u mau hoahanau.

11 Eia kekahi, i mai la ka anela ia’u, E nana ’ku aia no ka inaina o ke Akua maluna o na hua a kou mau hoahanau!

12 A nana aku la au a ike aku la i kekahi kanaka mawaena o ka poe Genetile, ka poe i hookoaia’i mai na hua aku a ko’u mau hoahanau e na kai he nui loa; a ike aku la au i ka Uhane o ke Akua, ua iho mai la ia ilalo a hooikaika iho la maluna o ke kanaka; a holo aku la ia maluna o na kai nui, a hiki aku i na hua a ko’u mau hoahanau, ka poe e noho ana iloko o ka aina i olelo mua ia’i.

13 [m 3, p 36] Eia kekahi, ike aku la au i ka Uhane o ke Akua, e hooikaika ana ia maluna o na mea e ae o ka poe Genetile; a holo aku la lakou mailoko ae o ka noho pio ana, maluna o na kai nui.

14 [m 3, p 37] Eia kekahi, ike aku la au i na kanaka he nui loa o ka poe genetile maluna o ka aina i olelo mua ia’i; a ike aku la au i ka inaina o ke Akua, ua kau ia maluna o na hua a ko’u mau hoahanau; a ua hoopuehuia lakou imua o ka poe Genetile, a ua hahauia.

15 A ike aku la ua i ka Uhane o ka Haku, maluna ia o ka poe Genetile; a hoopomaikaiia no lakou, a loaa iho la ia lakou ka aina i hooilina no lakou; a ike aku la au ua keokeo lakou, a nani loa a maikai, e like me ko’u poe kanaka, mamua o ko lakou pepehiia ana.

16 [m 3, p 38] Eia kekahi, ike aku la owau, o Nepai, i ka poe Genetile, ka poe i hele aku mailoko ae o ka noho pio ana, ua hoohaahaa no lakou ia lakou iho imua o ka Haku; a o ka mana o ka Haku oia pu me lakou;

17 A ike aku la au ua houluuluia ko lakou poe makua Genetile maluna o ke kai, a maluna o ka aina no hoi, e kaua ku e ia lakou;

18 A ike aku la au o ka mana o ke Akua oia pu me lakou; a o ka inaina o ke Akua maluna no hoi ia o ka poe a pau i houluuluia ’ku e kaua ia lakou.

19 A ike aku la wau, o Nepai, ua hoopakeleia aku la ka poe Genetile, ka poe i hele aku mailoko ae o ka noho pio ana, e ka mana o ke Akua, mailoko aku o na lima o na aupuni e ae pau.

20 [m 3, p 39] Eia kekahi, ike aku la au, o Nepai, ua hoopomaikaiia no lakou ma ka aina; a ike aku la au i kekahi buke, a ua halihaliia’ku ia iwaena o lakou.

23 A i mai la oia, Aia hoi, e puka ana no ia mailoko ae o ka waha o kekahi Iudaio: A ike aku la wau, o Nepai, ia buke; a i mai la oia ia’u, O ka buke au e ike nei, he mooolelo ia o ka poe Iudaio, a iloko ona i kakauia na berita a ka Haku, ana i hana’i i ko ka hale o Iseraela; a iloko ona no hoi i kakauia na wanana he nui wale a ka poe kaula hemolele; a he mooolelo ia e like me na mea i kahakahaia maluna iho o na papa keleawe, aka aole nae he nui e like me ko na papa; ua kakauia nae iloko ona na berita a ka Haku, ana i hana aku ai i ko ka hale o Iseraela; nolaila, ua nui ka maikai o ia mau mea i ka poe Genetile.

24 [m 3, p 40] A i mai la ka anela o ka Haku ia’u, Ua ike aku la oe ua puka mai la ka buke mai ka waha mai o kekahi Iudaio; a ia ia i puka mai ai mai ka waha mai o kekahi Iudaio, ua kakauia iloko ona ka euanelio o ka Haku me ka maopopo, ka mea a na aposetolo he umikumamalua i hoike aku ai; a hoike aku la lakou e like me ka oiaio iloko o ke Keikihipa a ke Akua;

25 Nolaila, puka aku la keia mau mea me ka pololei loa mai ka poe Iudaio aku i ka poe Genetile, e like me ka oiaio iloko o ke Akua;

26 A mahope iho o ka puka ana ’ku o ia mau mea o ka lima la o ka poe aposetolo he umikumamalua a ke Keikihipa, mai ka poe Iudaio aku i ka poe Genetile, ke ike nei oe i ke kahua o kekahi ekalesia nui a ino loa, i hoopailua loa ia mamua o na ekalesia e ae a pau; no ka mea, aia hoi, ua lawe aku la lakou mai ka euanelio aku o ke Keikihipa, i na mea he nui i moakaka a maikai loa; a me na berita no hoi he nui a ka Haku, ka lakou i lawe aku ai;

27 A ua hana iho la lakou i keia mau mea a pau, e hiki ia lakou ke hookahuli ae i na aoao pololei o ka Haku; a e hiki ia lakou ke hoomakapo i na maka a ke hoopaakiki i na naau o na keiki a kanaka:

28 Nolaila, ke ike nei oe a mahope iho o ka hele ana ’ku o ka buke mawaena o na lima o ka ekalesia nui a ino loa, ua nui wale na mea moakaka a maikai loa i laweia ’ku mai ka buke aku, oia ka buke o ke Keikihipa a ke Akua;

29 A pau keia mau mea moakaka a maikai loa i ka laweia ’ku, ua puka aku la ia i na lahuikanaka a pau o ka poe Genetile; a mahope iho o kona puka ana ’ku, i na aupuni a pau o ka poe Genetile, he oiaio, i kela aoao o na kai nui au i ike ai me ka poe Genetile i holo aku ai mai ka noho pio ana; ke ike nei oe no ka nui o na mea moakaka a maikai i laweia’ku mailoko aku o ka buke, na mea akaka i ka hoomaopopo ana o na keiki a kanaka, e like me ka moakaka iloko o ke Keikihipa a ke Akua; no keia mau mea i laweia’ku ai mailoko aku o ka euanelio o ke Keikihipa, ua nui loa ka poe i hina, he oiaio, a no ia mea, ua nui loa ko Satana mana maluna iho o lakou;

30 Aka hoi, ke ike nei oe o ka poe Genetile i hele ae mai ka noho pio ana, a ua kookiekieia iluna e ka mana o ke Akua, maluna iho o na lahuikanaka e ae a pau e noho ana ma ka aina i maikai maluna o na aina e ae a pau, oia ka aina a ka Haku ke Akua i hana berita ai me kou makuakane, na kona poe hua e loaa auanei i aina hooilina no lakou, aole no lakou la e luku loa i ke koena o kau poe hua i huiia mawaena o kou mau hoahanau;

31 Aole no hoi e ae aku oia i ka poe Genetile e anai loa i na hua a kou mau hoahanau;

32 Aole hoi e ae aku ka Haku ke Akua e noho mau loa ka poe Genetile iloko o ua noho weliweli ana la o ka pouli, au e ike nei ia lakou iloko, no ka hunaia ana o na mea moakaka a maikai loa o ka euanelio o ka Keikihipa e ua ekalesia ino loa la, au i ike ai e kukuluia’na ia.

33 Nolaila, wahi a ke Keikihipa a ke Akua, e aloha auanei au i ka poe Genetile, ma ka hoopai ana i ke koena o ko ka hale o Iseraela iloko o ka hoopai nui.

34 [m 3, p 41] Eia kekahi, olelo mai la ka anela o ka Haku ia’u, i ka i ana, Aka hoi, wahi a ke Keikihipa a ke Akua, mahope iho o ko’u hoopai ana i ke koena o ko ka hale o Iseraela, a o ua koena nei a’u i olelo ai, oia na hua a kou makuakane; no ia mea, mahope iho o ko’u hoopai ana ia lakou i ka hoopai, a hahauia aku lakou e ka lima o ka poe Genetile; a mahope iho o ko ka poe Genetile hina nui loa ana, no na mea akaka lea a maikai o ka euanelio o ke Keikihipa i hunaia, e ua ekalesia ino loa la, oia ka makuwahine o na wahine hookamakama, wahi a ke Keikihipa; e aloha aku no au i ka poe Genetile i kela la, a no ia mea e hoopuka aku no au ia lakou iloko o ko’u mana iho, he nui o ko’u euanelio i akaka a i maikai, wahi a ke Keikihipa;

35 No ka mea, aia hoi, i mai la ke Keikihipa, e hoike aku auanei au ia’u iho i kau poe hua, a e kakau auanei lakou i na mea he nui a’u e hana aku ai ia lakou, na mea maopopo a maikai; a mahope iho o ka lukuia ana o kau poe hua a me ka emi ana iloko o ka hoomaloko, a o na hua no hoi a kou mau hoahanau; aia hoi, e hunaia auanei keia mau mea, e puka aku i ka poe Genetile, a ma ka haawina a me ka mana o ke Keikihipa e puka aku ai;

36 A iloko o ia mau mea e kakauia’i ko’u euanelio, wahi a ke Keikihipa, a me ko’u pohaku a me ko’u ola;

37 A pomaikai lakou ka poe nana e imi e hoopuka i ko’u Ziona ma ua la la, no ka mea, ia lakou no auanei ka haawina a me ka mana o ka Uhane Hemolele; a ina e hoomau lakou a hiki i ka hopena, e hookiekieia’e auanei lakou ma ka la hope, a e hoolaia i ke aupuni mau loa o ke Keikihipa; a o ka mea nana e hoolaha auanei i ka malu, he oiaio, i na olelo o ka hauoli nui, nani wale auanei lakou maluna o na mauna.

38 [m 3, p 42] Eia kekahi, ike aku la au i ke koena o ka hua a ko’u mau hoahanau, a i ka buke no hoi o ke Keikihipa a ke Akua, ka mea i puka mai, mai ka waha mai o ka Iudaio, a ua hele mai la ia mai ka poe Genetile mai, i ke koena o na hua a ko’u mau hoahanau;

39 A mahope iho o ka puka ana mai o ka buke ia lakou, ike aku la au i na buke e ae, i puka mai ai ma ka mana o ke Keikihipa, mai ka poe Genetile mai ia lakou, i ka hoomaopopoia ana o ka poe Genetile, a me ke koena o na hua a ko’u mau hoahanau, a me ka poe Iudaio no hoi, i hoopue huia’i maluna o ka ili a pau o ka honua, ua oiaio na mooolelo hoike a na kaula a o na aposetolo he umikumamalua a ke Keikihipa.

40 [m 3, p 43] A olelo mai la ka anela ia’u, i ka i ana, E hooiaio auanei keia mau mooolelo hope, au i ike ai mawaena o ka poe Genetile, i ka oiaio o na mea mua, na ka poe aposetolo he umikumamalua a ke Keikihipa mai, a e hoike aku auanei i na mea maopopo a maikai i laweia’ku mai o ua mau mea aku la; a e hoike aku auanei i na ohana, a me na olelo, a me na lahuikanaka, o ke Keikihipa a ke Akua oia ke Keiki a ka Makua mau loa, a o ka Mea e Ola’i no hoi o ko ke ao nei; a he mea e pono ai no na kanaka a pau e hele mai io na la, i ole aole e hiki ia lakou ke hoolaia,

41 A he mea e pono ai e hele mai lakou e like me na olelo e hookupaaia’na e ka waha o ke Keikihipa; a e koikeia’ku auanei na olelo a ke Keikihipa iloko o na mooolelo o kau poe hua, a pela no hoi iloko o na mooolelo o ka poe aposetolo he umikumamalua a ke Keikihipa; no laila, e hookupaaia laua a elua i hookahi; no ka mea, aia no hookahi Akua a hookahi Kahuhipa maluna iho o ka honua a pau;

42 A e hiki mai ana ka manawa e hoike aku ai oia ia ia iho i na lahuikanaka a pau, i ka poe Iudaio, a i ka poe Genetile no hoi; a mahope iho o kona hoike ana ’ku ia ia iho i ka poe Iudaio, a i ka poe Genetile no hoi, alaila, e hoike aku oia ia ia iho i ka poe Genetile, a i ka poe Iudaio no hoi, a e lilo ka poe hope i mua, a o ka poe mua i hope.

1 [mokuna 3, paukū 44] Eia kekahi, ina e hoolohe mai ka poe Genetile i ke Keikihipa i ua la la ana e hoike aku ai ia ia iho ia lakou i ka olelo, a i ka mana no hoi, ma ka hana io, i ka lawe ana ’ku i ko lakou mau mea e hina’i,

2 A e hoopaakiki ole lakou i ko lakou naau e ku e i ke Keikihipa a ke Akua, alaila, e heluia auanei lakou iwaena o na hua a kou makuakane; he oiaio, e heluia auanei lakou iwaena o ko ka hale o Iseraela; a e lilo lakou o lahui hoopomaikaiia maluna o ka aina i olelo mua ia’i, no ka wa pau ole: aole no e lawe hou ia lakou ilalo iloko o ka noho pio ana; a, aole no e hoopilihua hou ia ko ka hale o Iseraela;

3 A o kela lua nui i eliia’i no lakou e ua ekalesia nui a ino loa la, i hookumuia’i e ka diabolo a me kana poe keiki, i hiki ai ia ia ke alakai aku i na uhane o kanaka ilalo i Gehena; he oiaio, e hoopihaia auanei ua lua nui la, i eliia’i no ka make ana o kanaka, i ka poe nana ia i eli, i ka make loa o lakou, wahi a ke Keikihipa a ke Akua; aole i ka make ana o ka uhane, aka o kona hooleiia’na iloko o kela Gehena pau ole;

4 No ka mea, aia hoi, ua like keia me ka hoopio ana o ka diabolo, a ua like no hoi me ko ke Akua hoopai ana maluna iho o ka poe a pau e hana ana i ka hewa a me na mea hoopailua imua ona.

5 [m 3, p 45] Eia kekahi, olelo mai la ka anela ia’u, ia Nepai, i ka i ana, Ua ike aku la oe ina e mihi ka poe Genetile, alaila, e pomaikai auanei lakou; a ke ike nei no hoi oe no na berita a ka Haku i ko ka hale o Iseraela; a ua lohe aku la no hoi oe, o ka mea aole e mihi, e make io no oia;

6 Nolaila, auwe i ka poe Genetile, ina e hoopaakiki lakou i ko lakou mau naau e ku e i ke Keikihipa a ka Akua;

7 No ka mea, e hiki mai ana ka manawa, wahi a ke Keikihipa a ke Akua, e hana aku no au i kahi hana nui a kupanaha iwaena o na keiki a kanaka; i kahi hana mau loa aku, ma keia lima, a i ole ia, ma kela: i ka hoomaopopo ana ia lakou i ka maluhia a me ke ola mau loa, a i ole ia, i ka hookuu ana ia lakou i ka paakiki o ko lakou mau naau a me ka pouli o ko lakou hoomaopopo ana, i ko lakou laweia ana ilalo iloko o ka noho pio ana, a i ka make ana no hoi, ma ke kino a ma ka uhane, e like me ka hoopio ana o ka diabolo, a’u i olelo ai.

8 [m 3, p 46] Eia kekahi, i ka wa a ka anela i olelo mai ai i keia mau olelo, i mai la oia ia’u, Ke hoomanao nei anei oe i na berita a ka Makua i ko ka hale o Iseraela? I aku la au ia ia, Ae.

9 A i mai la oia ia’u, E nana a e ike i ua ekalesia nui a ino loa la, o ka makuwahine ia o na mea ino loa, o kona kahua o ka diabolo no ia.

10 A i mai la ia ia’u, Aia hoi, elua wale no ekalesia; o kekahi oia ka ekalesia o ke Keikihipa a ke Akua, a o kekahi oia ka ekalesia o ka diabolo; nolaila, o ka mea aole no ka ekalesia o ke Keikihipa a ke Akua, no ua ekalesia nui la ia, oia no ka makuwahine o na mea ino; a o ka wahine hookamakama no ia o ka honua nei a pau.

11 [m 3, p 47] Eia kekahi, nana aku la au a ike aku la i ka wahine hookamakama o ka honua a pau, a noho iho la ia maluna o na wai he nui; a he aupuni kona maluna iho o ka honua a pau, mawaena o na lahuikanaka a pau, a me na ohana, na olelo, a me na kanaka.

12 [m 3, p 48] Eia kekahi, ike aku la au i ka ekalesia o ke Keikihipa a ke Akua, a ua kakaikahi na mea ona, no ka hewa a me ka ino o ka wahine hookamakama, ka mea e noho ana maluna o na wai he nui; aka hoi, ike aku la au i ka ekalesia o ke Keikihipa, oia ka poe hoano o ke Akua, maluna no hoi lakou o ka ili a pau o ka honua; a ua uuku ko lakou aina maluna o ka ili o ka honua, no ka hewa o ka wahine hookamakama nui a’u i ike ai.

13 [m 3, p 49] Eia kekahi, ike aku la au i ka makuwahine nui o na mea ino e houluulu ana i na lehulehu maluna iho o ka ili a pau o ka honua, iwaena o na aupuni o ka poe Genetile, e kaua aku i ke Keikihipa a ke Akua.

14 [m 3, p 50] Eia kekahi, ike aku la au, o Nepai, i ka mana o ke Keikihipa a ke Akua, ua iho iho la ia maluna o ka poe hoano o ka ekalesia o ke Keikihipa, a maluna iho o ka poe kanaka berita a ka Haku, ka poe i hoopuehuia’i maluna iho o ka ili a pau o ka honua; a ua kahikoia lakou me ka pono a me ka mana o ke Akua i ka nani nui.

15 [m 3, p 51] Eia kekahi, ike aku la au ua nininiia’ku la ka inaina o ke Akua maluna iho o ua ekalesia nui la a ino loa, nolaila, ua nui na kaua a me na lono o na kaua iwaena o na lahuikanaka a me na ohana a pau o ka honua,

16 A i ka hoomaka ana o na kaua a me na lono o na kaua mawaena o na lahuikanaka a pau no ka makuwahine o na mea ino, olelo mai la ka anela ia’u, i ka i ana, Aia hoi, o ka inaina o ke Akua maluna ia o ka makuwahine o na wahine hookamakama; a, aia hoi, ke ike nei oe i keia mau mea a pau:

17 A i ka wa e hiki mai ka la e nininiia ’ku ai ka inaina o ke Akua maluna o ka makuwahine o na wahine hookamakama, oia ka ekalesia nui a ino loa o ka honua a pau, a o ke kahua ona oia no ka diabolo, alaila, ma kela la, e hoomaka ka hana a ka Makua, i ka hoomakaukau ana i ke ala no ka hooko ana i kana mau berita, ana i hana mai ai i kona poe kanaka, o ko ka hale o Iseraela.

19 A nana aku la au a ike aku la i kekahi kanaka, a ua hoaahuia oia i ke aahu keokeo;

20 A i mai la ka anela ia’u. E nana i kekahi o ka poe aposetolo he umikumamalua a ke Keikihipa!

21 Aia hoi, e ike auanei oia a e kakau i ke koena o keia mau mea; he oiaio, a me na mea nui no hoi i hanaia’i mamua:

23 Nolaila, o na mea ana e palapala’i, ua pono a ua oiaio; a, aia hoi, ua kakauia ia mau mea iloko o ka buke au i ike ai e puka mai ana mai ka waha mai o ka Iudaio, a i ka manawa o ua mau mea nei i puka mai ai mai ka waha mai o ka Iudaio, a i ka manawa o ka buke i puka mai ai mai ka waha mai o ka Iudaio, ua maopopo na mea i kakauia, a pololei, a maikai loa, a akaka i ka hoomaopopo ana o na kanaka a pau.

24 A, aia hoi, ua nui na mea au i ike ai o na mea a ua aposetolo nei a ke Keikihipa e palapala’i; aia hoi, e ike auanei oe i ke koena;

25 Aka, o na mea au e ike ai, ma neia hope aku, aole nau e kakau; no ka mea, ua wae mai ka Haku ke Akua i ka aposetolo a ke Keikihipa a ke Akua, e kakau oia ia mau mea.

26 A i na kanaka e ae no hoi i hala aku la, ia lakou oia i hoike aku i na mea a pau, a ua kakau iho la lakou ia mau mea; a ua hoopaaia ia mau mea e puka mai ai me ka pololei i ko ka hale o Iseraela, e like me ka oiaio iloko o ke Keikihipa, i ka wa ku pono o ka Haku.

27 [m 3, p 53] A, owau, o Nepai, ua lohe au a ke hoike aku nei no hoi, o Ioane ka inoa o ka aposetolo a ke Keikihipa, e like me ka olelo a ka anela.

28 A ua papaia mai la owau, o Nepai, e palapala ole aku i ke koena o na mea a’u i ike ai a i lohe ai hoi; nolaila, ua lawa no’u na mea a’u i kakau ai, a ua kakau au i ka hapa uuku wale no o na mea a’u i ike ai.

29 A ke hoike aku nei au ua ike aku la au i na mea a ko’u makuakane i ike ai, a ua hoike mai la ka anela o ka Haku ia mau mea ia’u.

30 Ano, ke hoopau nei au i ka’u olelo no na mea a’u i ike ai, i ko’u kaikaiia’na aku iloko o ka Uhane: a ina aole i pau na mea a’u i ike ai i ka palapalaia, o na mea a’u i palapala’i ua oiaio ia. A pela io no. Amene.

1 [mokuna 4, paukū 1] Eia kekahi, a mahope iho o ko’u, ko Nepai, kailiia’na aku i ka Uhane, a ike aku la au i keia mau mea a pau, hoi aku la au i ka halelewa o ko’u makuakane.

2 Eia kekahi, ike aku la au i ko’u mau hoahanau, e hoopaapaa ana lakou kekahi me kekahi, no na mea a ko’u makuakane i olelo ae ai ia lakou;

3 No ka mea, ua olelo io oia i na mea nui he nui ia lakou, he mau mea paakiki ke hoomaopopoia, ke ninau ole ke kanaka i ka Haku; a no ko lakou paakiki ma ko lakou mau naau, nolaila aole lakou i nana aku i ka Haku e like me ka mea e pono ai lakou.

4 Ano, ua kaumaha iho la wau, o Nepai, no ka paakiki o ko lakou mau naau, a no na mea no hoi a’u i ike ai, a i ike maopopo ai no hoi e hooko io ia ana me ka hiki ole ke alo ae, no ka nui o ka hewa o na keiki a kanaka.

5 A kaumaha iho la au no ka nui o ka pilikia o’u, no ka mea, ua manao au ua nui aka ko’u pilikia mamua o na mea a pau, no ka lukuia ana o ko’u poe kanaka, no ka mea, ua ike aku la au i ko lakou hina ana.

6 [m 4, p 2] Eia kekahi, mahope iho o ko’u loaa ana ka ikaika, olelo aku la au i na hoahanau o’u, e ninau aku ana ia lakou i ke kumu o ko lakou hoopaapaa ana.

7 A i mai la lakou, Aia hoi, aole i hiki ia makou ke hoomaopopo i na olelo a ko kakou makuakane i olelo mai ai no na lala maoli o ka laau oliva, a no ka poe Genetile no hoi.

9 A i mai la lakou ia’u, Aole makou i ninau: no ka mea, aole e hoike mai ka Haku i kekahi mea e like me ia ia makou.

10 Aia hoi, i aku la au ia lakou, No ke aha la aole oukou e malama pono i na kauoha a ka Haku? No ke aha la oukou e make, no ka paakiki o ko oukou mau naau?

11 Aole anei oukou e hoomanao i na mea a ka Haku i i mai ai, Ina e hoopaakiki ole oukou i ko oukou mau naau, a e nonoi mai ia’u ma ka manaoio, e manaoio ana e loaa no ia oukou, me ka ikaika i ka malama pono ana i na kauoha a’u, he oiaio, e hoikeia ’ku no ua mau mea nei ia oukou?

12 [m 4, p 3] Aia hoi, ke i aku nei au ia oukou, ua hoohalikeia ko ka hale o Iseraela me kekahi laau oliva, e ka uhane o ka Haku iloko o ko kakou makuakane; a, aia hoi, aole anei kakou i haihaiia mai, mai ko ka hale o Iseraela aku; aole anei he lala kakou o ko ka hale o Iseraela?

13 A, ano, o ke ano o ka mea a ko kakou makuakane i olelo mai ai no ka pakui ana o na lala maoli ma o ka piha ana la o ka poe Genetile, eia ia, ma na la mahope, i ka manawa o ka kakou hua i emi iho ai iloko o ka hoomaloka, no na makahiki he nui loa, a me na hanauna he nui, mahope iho o ka hoike ana mai o ka Mesia ma ke kino i na keiki a kanaka, alaila, e hiki mai ka euanelio mana a pololei o ka Mesia i ka poe Genetile, a mai ka poe Genetile ae i ke koena o ka kakou hua;

14 A ma ia la, e ike no ke koena o ka kakou hua no ko ka hale o Iseraela lakou, a o ko ka Haku poe kanaka berita no hoi lakou; alaila, e ike lakou a e loaa ka ike i ko lakou poe kupuna, a o ka ike no hoi i ka euanelio o ko lakou Mea e Ola’i, o ka euanelio i haiiia mai e ia i ko lakou poe kupuna; nolaila, e loaa no auanei ia lakou ka ike i ko lakou Mea e Ola’i, a me na oihana pololei o kana ao ana, i ike ai lakou i ke ala pono e hele io na la a e hoolaia.

15 Alaila ma kela la, aole anei lakou e hauoli, a e hiilani aku i ko lakou Akua mau loa, ko lakou pohaku a me ko lakou ola? He oiaio, ma ua la la, aole anei e loaa ia lakou ka ikaika, a me ke ola mai ke kumu waina oiaio mai? He oiaio, aole anei lakou e hele mai i ka pa oiaio o ke Akua?

16 Aia hoi, ke ia aku nei au ia oukou, Ae; e hoomanao hou ia lakou mawaena o ko ka hale o Iseraela; e pakuiia auanei lakou, he lala maoli o ka laau oliva, iloko o ka laau oliva oiaio;

17 O ke ano keia o ka olelo a ko kakou makuakane; eia hou kana, aole ia e hiki mai, a, mahope aku o ko lakou hoopuehuia’na e ka poe Genetile;eia no hoi kana, e hele mai auanei ia ma ka aoao o ka poe Genetile, i hiki i ka Haku ke hoike aku i kona mana i ka poe Genetile, no kona hoomalauia’na e ka poe Iudaio, oia hoi ho ka hale o Iseraela;

18 Nolaila, aole i olelo mai ko kakou makuakane no ka kakou hua wale no, aka no ko ka hale o Iseraela a pau no hoi, e kuhikuhi ana i ka berita e hookoia ma na la mahope; oia ka berita a ka Haku i hana mai ai i ko kakou kupuna kane, ia Aberahama, i ka i ana, Ma kau hua e hoopomaikaiia’i na ohana a pau o ka honua.

19 [m 4, p 4] Eia kekahi, olelo nui aku la au, o Nepai, ia lakou no keia mau mea; he oiaio, olelo aku la au ia lakou no ka hoi hou ana o ka poe Iudaio, ma na la mahope;

20 A hai aku la au ia lakou i na olelo a Isaia, ana i olelo mai ai no ka hoi hou ana o ka poe Iudaio, a o ko ka hale o Iseraela; a mahope iho o ko lakou hoi hou ana, aole e hoohoka hou ia lakou, aole no hoi lakou e hoopuehu hou ia. A olelo aku la au i na olelo he nui i ko’u mau hoahanau, a ua hoolauleaia lakou, a hoohaahaa ia lakou iho imua o ka Haku.

21 [m 4, p 5] Eia kekahi, olelo hou mai la lakou ia’u, i ka i ana, Heaha ke ano o keia mea a ko kakou makuakane i ike ai ma ka moe uhane? Heaha ke ano o ka laau ana i ike ai?

23 A i mai la lakou ia’u, Heaha ke ano o ke kookoo hao a ko kakou makuakane i ike ai, e moe ana i ka laau?

24 A i aku la au ia lakou, oia ka olelo a ke Akua; a o ka mea e hoolohe i ka olelo a ke Akua, a e hoopaa mau i ua olelo la, aole loa lakou e make loa aku; aole hoi e hiki i na hoowalewale a me na ihe wela o ka Mea ku e, ke lanakila ae maluna o lakou, i ka hoomakapo ana ia lakou, e alakai aku ai ia lakou i ka make.

25 Nolaila, ua hooikaika aku la au, o Nepai, ia lakou e hoolohe i ka olelo a ka Haku; he oiaio, ua paipai aku la au ia lakou me ka ikaika a pau o ko’u naau, a me ka makaukau a pau a’u i loaa’i, e hoolohe lakou i ka olelo a ke Akua, a e hoomanao e malama pono mau i kana mau kauoha ma na mea a pau.

26 A i mai la lakou ia’u, Heaha ke ano o ka muliwai a ko kakou makuakane i ike ai?

27 A i aku la au ia lakou, O ka wai a ko’u makuakane i ike ai, o ka paumaele ia; a no ka lilo nui o kona manao ma na mea e ae, aole ona i ike i ka lepo o ka wai;

28 A i aku la au ia lakou, he awawa weliweli ia, o ka mea e hookaawale ae i ka poe hewa mai ka laau aku o ke ola, a mai ka poe hoano aku no hoi o ke Akua.

29 A i aku la au ia lakou, he mea ia e hoohalike ai i kela Gehena weliweli a ka anela i olelo mai ai ia’u ua hoomakaukauia no ka poe hewa.

30 A i aku la au ia lakou, ua ike aku la no hoi ko kakou makuakane, e hookaawale ana no hoi ka hoopai pono o ke Akua i ka poe hewa mai ka poe pono ae; a o ke alohilohi olaila ua like me ke alohilohi o kekahi ahi e lapalapa ana, e pii ana iluna i ke Akua, a mau loa aku a mau loa aku, aole ona hopena.

31 [m 4, p 6] A i mai la lakou ia’u, Heaha ke ano o keia mea, ka eha anei o ke kino ma na la o keia noho ana paha, o ka noho hope ana anei o ka uhane mahope aku o ka make ana o ke kino maoli paha? A i ole la, ke olelo mai nei anei oia no na mea o ka honua nei?

32 A i aku la au ia lakou, He mea ia e hoohalike ai i na mea o ke kino a o ka uhane no hoi; no ka mea, e hiki mai auanei ka la e hookolokoloia lakou e pono ai no ka lakou hana, he oiaio, o na hana i hanaia’i e ke kino maoli ma na la o ko lakou noho ana ma ka honua;

33 Nolaila, ina e make lakou iloko o ko lakou hewa, e hooleiia aku no hoi lakou e pono ai, i nele lakou i na mea o ka uhane, e pili ana i ka pono; nolaila e laweia lakou e pono ai e ku imua o ke Akua, e hookolokoloia no ka lakou mau hana; a ina o ka paumaele ka lakou hana, e paumaele no lakou e pono ai: a ina paumaele lakou, aole loa e hiki ia lakou ke noho ma ke aupuni o ke Akua; ina pela, e paumaele no hoi ke aupuni o ke Akua.

34 Aka hoi, ke i aku nei au ia oukou, aole paumaele o ke aupuni o ke Akua, aole e hiki i kekahi mea haumia ke komo iloko o ke aupuni o ke Akua: nolaila, he mea e pono ai i hoomakaukauia’i kahi paumaele no ka mea paumaele.

35 A ua hoomakaukauia kau wahi, he oiaio, oia kela Gehena weliweli a’u i olelo ai, a o ka diabolo oia ke kahua ona; nolaila, aia ma ke aupuni o ke Akua ka noho loa ana o na uhane o kanaka, a i ole malaila, e hooleiia’ku mawaho no kela hoopai pololei ana a’u i olelo ai;

36 Nolaila, ua hookukeia’ku ka poe hewa mai ka poe pono aku, a mai ka laau aku o ke ola, nona ka hua i maikai loa a i makemake loa ia maluna ae o na hua e ae a pau; he oiaio, a o ka haawina nui loa ia mamua o na haawina a pau o ke Akua. A pela ka’u olelo i ko’u mau hoahanau. Amene.

1 [mokuna 5, paukū 1] Eia kekahi, a mahope iho o ka’u olelo ana ’ku i ko’u mau hoahanau, aia hoi, i mai la lakou ia’u, Ua hai mai la oe i na mea paakiki ia makou, i hiki ole ai ia makou ke hoomaopopo.

2 [m 5, p 2] A i aku la au ia lakou, Ua ike au ua olelo aku la au i na mea paakiki i ku e i ka poe hewa, e like me ka oiaio; a ua hoopono au i ka poe pono, a hoike aku la e hookiekieia lakou ma ka la hope; no ia mea e manao ana ka poe hewa he mea paakiki ka oiaio, no ka mea, e hou ana ia iloko loa o lakou.

3 A, ano, e ko’u mau hoahanau, ina ua pono oukou a ua ae e hoolohe i ka oiaio, a e malama pono ia, i hiki ia oukou ke heole me ka pololei imua o ke Akua, alaila, aole oukou e ohumu no ka oiaio, aole hoi e i mai ke olelo mai nei oe i na mea paakiki i ku e ia makou.

4 A kauleo aku la au, o Nepai, i na hoahanau o’u, me ka ikaika, e malama pono i na kauoha a ka Haku.

5 Eia kekahi, ua hoohaahaa lakou ia lakou iho imua o ka Haku; a ua loaa ia’u ka hauoli a me ka lana nui o ka manao no lakou, e hele paha lakou ma na ala o ka pono.

6 Ano, ua oleloia a ua hanaia keia mau mea a pau, i ko ko’u makuakane noho ana i ka halelewa, ma ke awawa ana i kapa’i o Lemuela.

7 [m 5, p 3] Eia kekahi, lawe mai la wau, o Nepai, i kekahi o na kaikamahine a Isemaela i wahine na’u; a lawe ae la no hoi ko’u mau hoahanau i na kaikamahine a Isemaela i mau wahine na lakou; a lawe ae la no hoi o Zarama i ke kaikamahine hanau mua a Isemaela i wahine nana.

8 A pela i hooko ai ko’u makuakane i na kauoha a pau a ka Haku, na kauoha i haawiia mai ia ia. A owau no hoi, o Nepai, ua hoopomaikai nui loa ia mai au e ka Haku.

9 [m 5, p 4] A eia kekahi, olelo mai la ka leo o ka Haku i ko’u makuakane, ma ka po, a kauoha mai la ia ia, e hele aku ma kona hele ana iloko o ka waonahele, ia la ae.

10 Eia kekahi, i ke ala ana’e o ko’u makuakane i kakahiaka, a hele aku la i ka puka o ka halelewa, ike aku la oia ma ka honua me ke kahaha nui, i kekahi mea poepoe, i hanaia me ke akamai; a he keleawe maikai no ia. A iloko o ua mea poepoe nei kekahi mau manamana elua: a e kuhikuhi ana kekahi i ke ala no makou e hele aku ai iloko o ka waonahele.

11 [m 5, p 5] Eia kekahi, ua hoiliili mai la makou i na mea e pono ai no makou e halihali iloko o ka waonahele, a me ke koena o ka makou ai a ka Haku i haawi mai ai ia makou; a ua lawe aku la makou i ka hua o kela ano keia ano, i hiki ia makou ke halihali iloko o ka waonahele.

12 [m 5, p 6] A lawe aku la makou i ko makou mau halelewa, a hele iloko o ka waonahele, i kela aoao o ke kahawai o Lamana.

13 Hele aku la makou no na la eha, ma ka ihu e kokoke ana i ka hema, hikina hema, a kukulu hou iho la makou i ko makou mau halelewa; a kapa aku la makou i ka inoa o ia wahi o Sazera.

14 [m 5, p 7] Eia kekahi, lalau aku la makou i ka makou mau kakaka a me na pua, a hele aku la i ka waonahele, e pepehi i ai no na ohana o makou; a mahope iho o ko makou pepehi ana i ai no na ohana o makou, hoi hou aku la makou i ko makou mau ohana i ka waonahele, i kahi o Sazera. A hele hou aku la makou, i ka waonahele ma ka ihu e like me mamua, e hele ana ma na wahi momona loa o ka waonahele, ma na palena kokoke i ke Kaiula.

15 A hele aku la makou no na la he nui, e pepehi ana i ai ma ke ala, me ka makou mau kakaka a me na pua a makou, a me na ala a me na maa a makou;

16 A hahai aku la makou i ka kuhikuhi ana o ka mea poepoe, a ua kuhikuhi ia ia makou ma na wahi momona o ka waonahele.

17 A mahope iho o ko makou hele ana i na la he nui loa, kukulu iho la makou i ko makou mau halelewa no kekahi manawa, i hiki ia makou ke hoomaha hou ia makou iho, a e loaa i ai no ko makou mau ohana.

18 [m 5, p 8] Eia kekahi, i ko’u hele ana’e e pepehi i ai, aia hoi, hai iho la au i ka’u kakaka, i hanaia’i i ke kila maikai: a mahope iho o ka hai ana i ka’u kakaka, aia hoi, huhu mai la ko’u mau hoahanau ia’u, no ka haki ana o ka’u kakaka, no ka mea, aole i loaa ka ai na makou.

19 A hoi hou aku la makou me ka ai ole i ko makou mau ohana. A no ka luhi loa o lakou ma ka hele ana, ua nui ko lakou popilikia no ka nele i ka ai.

20 [m 5, p 9] Eia kekahi, hoomaka iho la o Lamana laua me Lemuela, a me na keikikane a Isemaela, e ohumu nui loa, no ka eha a me na popilikia o lakou ma ka waonahele: a hoomaka iho la no hoi ko’u makuakane e ohumu i ka Haku kona Akua; he oiaio, a ua kaumaha nui loa iho la lakou a pau, a ohumu aku la lakou i ka Haku.

21 [m 5, p 10] Eia kekahi, ua hoopilikia pu ia wau, o Nepai, me ko’u mau hoahanau, no ka haki ana o ka’u kakaka; a ikaika ole iho la ka lakou mau kakaka, a hoomaka iho la ka popilikia nui, he oiaio, i hiki ole ai ia makou ke loaa ka ai.

22 A olelo nui aku la au, o Nepai, i ko’u mau hoahanau, no ko lakou hoopaakiki hou ana i ko lakou mau naau, i ka hoohewa ana i ka Haku i ko lakou Akua.

23 Eia kekahi, hana iho la au i kekahi laau i kakaka, a i kekahi laau pololei i pua; nolaila, kahiko iho la au ia’u iho me ke kakaka a me ka pua, me ka maa, a me na ala. A i aku la au i ko’u makuakane, Ihea la wau e hele aku ai, e loaa ka ai?

24 A ninau aku la oia i ka Haku, no ka mea, ua hoohaahaa iho la lakou ia lakou iho no ka’u olelo; no ka mea, ua olelo aku la au ia lakou i na mea nui ma ka ikaika o ko’u uhane.

25 [m 5, p 11] Eia kekahi, hiki mai la ka leo o ka Haku i ko’u makuakane; a ua ao io ia oia no kona ohumu ana i ka Haku, a ua hoohaahaaia oia ilalo iloko o ke kaumaha nui.

26 A i mai la ka leo o ka Haku ia ia, E nana ’ku oe i ka mea poepoe a e ike i na mea i kakauia’i.

27 A i ka wa a ko’u makuakane i ike ai i na mea i kakauia maluna o ka mea poepoe, makau iho la ia a haalulu nui loa; a me ko’u mau hoahanau no hoi, a me na keikikane a Isemaela a me ka makou mau wahine.

28 [m 5, p 12] A ike aku la owau, o Nepai, i na mea kuhikuhi iloko o ka mea poepoe, ua holo laua e like me ka manaoio, a me ka hoomau pono ana, a malama ana o makou ia laua.

29 A ua kakauia no hoi maluna o laua, he palapala hou, a ua maopopo i ka heluhelu aku, e haawi ana mai ia makou i ka ike i na aoao o ka Haku; a ua kakauia a ua hoololiia i kela manawa i keia manawa, e like me ka manaoio a me ka malama ana o makou ia ia. A pela ke ike nei kakou, ma o na mea uuku la, ua hiki i ka Haku ke hana i na mea nui.

30 [m 5, p 13] Eia kekahi, hele aku la wau, o Nepai, i ka piko o ka mauna, e like me ke kuhikuhi ana i haawiia mai maluna o ka mea poepoe.

31 A pepehi aku la au i na holoholona hihiu, a loaa iho la ka ai no na ohana o makou.

32 A hoi hou aku la au i ko makou mau halelewa, e kaikai ana i na holoholona a’u i pepehi ai; ano la, ia lakou i ike mai ai ua loaa mai ia’u ka ai, nani wale ko lakou hauoli. A hoohaahaa iho la lakou ia lakou iho imua o ka Haku, a haawi aku la i ke aloha ia ia.

33 [m 5, p 14] Eia kekahi, hele hou aku la makou, e hele ana me ke alo aneane like me kinohou: a mahope iho o ko makou hele ana i kekahi mau la he nui, kukulu hou iho la makou i ko makou mau halelewa, i hiki ia makou ke noho no kekahi manawa.

34 [m 5, p 15] Eia kekahi, make iho la o Isemaela, a ua kanuia ma kahi i kapaia’i o Nahoma.

35 A uwe nui iho la na kaikamahine a Isemaela no ka make ana o ko lakou makuakane, a no ko lakou popilikia ma ka waonahele, a ohumu aku la lakou me ke ku e i ko’u makuakane, no kona lawe ana ia lakou mailoko mai o ka aina o Ierusalema, me ka i ana, Ua make iho la ko makou makuakane; he oiaio, a ua hele nui makou ma ka waonahele, a ua loaa ia makou ka popilikia nui, o ka pololi, o ka makewai, a me ka luhi; a mahope iho o keia mau mea eha a pau, e make io auanei makou ma ka waonahele me ka pololi.

36 A pela lakou i ohumu mai ai me ke ku e i ko’u makuakane, a ia’u no hoi; a ua makemake lakou e hoi hou i Ierusalema.

37 A i ae la o Lamana ia Lemuela, a i na keiki a Isemaela no hoi, Aia hoi e pepehi kakou i ko kakou makuakane, a me ko kakou hoahanau o Nepai no hoi, nana i lawe maluna ona e lilo i luna no kakou, a i kumu ao no hoi ia kakou, i kona mau kaikuaana:

38 Ano, ke i mai nei oia ua olelo pu ka Haku me ia, a ua lawelawe ae la na anela ia ia. Aka hoi, ua ike kakou ke wahahee la oia ia kakou; a ke hai mai la oia i keia mau mea ia kakou, a ke hana mai la oia i na mea nui ma kana hana maalea, i hiki ia ia ke hoopunipuni i ko kakou mau maka, e manao ana paha e hiki ia ia ke alakai aku ia kakou i kekahi waonahele e ae; a mahope iho o kona alakai ana ’ku ia kakou, ua manao iho la oia e hoolilo ia ia iho i alii a i luna maluna iho o kakou, i hiki ia ia ke hana me kakou e like me kona manao a me kona makemake. A mamuli o keia ano i hooeueu ai ko’u kaikuaana, o Lamana, i ko lakou mau naau me ka huhu.

39 [m 5, p 16] Eia kekahi, o ka Haku oia pu kekahi me makou, he oiaio, pae mai la ka loe o ka Haku, a olelo mai la i na olelo he nui loa ia lakou, a paipai nui loa mai la ia lakou; a mahope iho o ko lakou paipaiia’na e ka leo o ka Haku, ua pale ae la lakou i ko lakou huhu, a mihi iho la i ko lakou mau hewa, a hoopomaikai hou mai la ka Haku ia makou me ka ai, i ole makou i make.

1 [mokuna 5, paukū 17] Eia kekahi, hele hou aku la makou i ko makou hele ana ma ka waonahele; a aneane hele aku la makou i ka hikina ma ia hope aku. A hele a auhele makou mawaena o ka popilikia nui ma ka waonahele; a hanau mai la ko makou mau wahine i na keiki ma ka waonahele.

2 A no ka nui o na mea pomaikai o ka Haku maluna o makou, oiai makou e noho ana me ka ai i ka io maka ma ka waonahele, ua haawi aku la ko makou mau wahine i waiu a lawa na ka lakou mau keiki, a ua ikaika, he oiaio, e like me na kane; a hoomaka iho la lakou e hoomanawanui ma ko lakou hele ana me ka ohumu ole.

3 A pela ke ike nei kakou e hookoia na kauoha a ke Akua e pono ai. A ina e malama pono na keiki a kanaka i na kauoha a ke Akua, e hanai no oia ia lakou, a e hooikaika ia lakou, a e hoomakaukau i na mea e hiki ai ia lakou ke hooko i ka mea ana i kauoha mai ai lakou; nolaila, ua hoomakaukau mai la oia i na me ai pono ai no makou, oiai makou i noho ai ma ka waonahele.

4 A noho iho la makou no kekahi mau makahiki he nui, he oiaio, he mau makahiki ewalu ma ka waonahele.

5 A hiki makou i ka aina a makou i kapa aku ai o Momona, no ka nui o kolaila hua, a me ka meli o ka nahelehele no hoi; a ua hoomakaukauia mai keia mau mea a pau e ka Haku, i ole makou i make. A ike aku la makou i ke kai, a makou i kapa aku ai o Ireanatuma, ma ka hoohalike ana, o na kai nui ia.

6 [m 5, p 18] Eia kekahi, kukulu iho la makou i ko makou mau halelewa ma kahakai; a ua loaa e ia makou ka popilikia nui, a me ke kaumaha nui, he oiaio, no ka nui i hiki ole ai ia makou ke palapala ia mau mea a pau, aka ua hauoli nui loa nae makou i ko makou hiki ana ma ke kahakai; a kapa aku la makou ia wahi o Momona, no ka nui o kolaila hua.

7 [m 5, p 19] Eia kekahi, mahope iho o ka noho ana o’u, o Nepai, ma ka aina o Momona i na la he nui, hiki mai la ka leo o ka Haku ia’u, i ka i ana, E ala a e hele aku oe i ka mauna. Ala ae la no au a pii aku la i ka mauna, a kahea aku la i ka Haku.

8 [m 5, p 20] Eia kekahi, olelo mai la ka Haku ia’u, i ka i ana, E kapili auanei oe i kahi moku, mamuli o ke ano a’u e hoike aku ai ia oe, na’u e halihali aku i kou poe kanaka i kela aoao o keia kai.

9 A i aku la au, E ka Haku, ihea la kahi a’u e hele aku ai, e loaa’i ia’u i pohaku hao e hoohehee, e hiki ia’u ke hana i na mea paahana e kapili i ka moku, mamuli o ke kumulike au i hoike mai ai ia’u?

10 A hai mai la ka Haku ia’u, kahi a’u e hele aku ai e loaa’i ka pohaku hao, i hiki ia’u ke hana i na mea paahana.

11 [m 5, p 21] Eia kekahi, hana iho la au, o Nepai, i upa makani o na ili holoholona; i mea e puhi ai i ke ahi, a mahope iho o ka’u hana ana i upa makani, i hiki ia’u ke puhi i ke ahi, puke aku la au kekahi pohaku i kekahi, e loaa’i ia’u ke ahi;

12 No ka mea, a hiki i keia manawa aole i ae mai la ka Haku ia makou e hoa nui wale i ke ahi, i ko makou hele ana ma ka waonahele; no ka mea, i mai la ia, E hoolilo aku au i kou ai i ono, i hoomoa ole ai oukou ia;

13 A owau no hoi ko oukou malamalama ma ka waonahele; a e hoomakaukauno wau i ke ala imua o oukou ke malama oukou i ka’u mau kauoha; nolaila, ina e malama pono oukou i ka’u mau kauoha, alaila, e alakaiia oukou i ka aina i hai mua ia’i; a e ike no hoi oukou e alakaiia’na oukou a au.

14 He oiaio, a i mai la no hoi ka Haku, Mahope iho o ko oukou pae ana ma ka aina i hai mua ia’i, e ike oukou Owau no ka Haku, ke Akua; a Owau nei ka Haku, ka Mea nana i hoopakele aku ia oukou mai ka make aku; he oiaio, a ua lawe aku la au ia oukou mailoko mai o ka aina o Ierusalema.

15 Nolaila, ua hooikaika au, o Nepai, e malama pono i na kauoha a ka Haku, a paipai aku la au i ko’u mau hoahanau e hoomau pono, a e hooikaika.

16 [m 5, p 22] Eia kekahi, hana iho la au i na mea paahana o ka hao a’u i hoohehee ai noloko mai o ka pohaku.

17 A i ka wa a ko’u mau hoahanau i ike ai e manao ana au e kapili i kahi moku, hoomaka iho la lakou e ohumu no’u, i ka i ana, He kanaka naaupo ko kakou kaikaina, no ka mea, ke manao nei oia ua hiki ia ia ke kapili i kahi moku: he oiaio, a e manao ana no hoi oia ua hiki ia ia ke holo aku i kela aoao o keia kai nui.

18 A pela ko’u mau hoahanau i hoohewa mai ai ia’u, a e makemake ana lakou e hana ole, no ka mea, aole o lakou i manaoio ua hiki ia’u ke kapili i kahi moku; aole hoi i manaoio lakou ua aoia au e ka Haku.

19 [m 5, p 23] Ua kaumaha nui loa iho la au, o Nepai, no ka paakiki o ko lakou mau naau, a ia lakou i ike mai ai ua kupu ke kaumaha iloko o’u, ua olioli lakou iloko o ko lakou mau naau, a hauoli mai la lakou maluna iho o’u, i ka i ana mai, Ua ike makou aole i hiki ia oe ke kapili i kahi moku, no ka mea, ua ike makou ua nele oe i ka ike; no ia mea, ea, aole e hiki ia oe ke hoopaa i kekahi hana nui e like me ia;

20 A ua like no hoi oe me ko kakou makuakane i alakaiia’ku e na manao lapuwale o kona naau; he oiaio, ua alakai mai la oia ia kakou mailoko mai o ka aina o Ierusalema; a ua hele nui ae la kakou ma ka waonahele no keia mau makahiki he nui; a ua hana ikaika ka kakou mau wahine, i hapai me na keiki; a ua hanau mai la lakou i na keiki me ka waonahele, a loaa iho la na mea pilikia a pau, koe wale no ka make; a ina ua make lakou mamua o ko lakou puka ana mai mailoko mai o Ierusalema, ua aho ia mamua o ko lakou loaa ana keia mau popilikia nui.

21 Aia hoi, ua nui ko kakou mau popilikia i keia mau makahiki he nui ma ka waonahele, oia ua hiki ia kakou ke noho olioli me ko kakou mau mea waiwai, ma ko kakou mau aina hooilina, a me ka noho pomaikai no hoi;

22 A ua ike kakou he poe kanaka pono, ka lahui e noho ana ma ka aina o Ierusalema; no ka mea, ua malama lakou i na kanawai a me ka hooponopono ana o ka Haku, a me na kauoha ana a pau, e like me ke kanawai o Mose; nolaila, ua ike kakou he poe kanaka pono lakou; a ua hoohewa aku la ko kakou makuakane ua lakou, a ua alakai mai la oia ia kakou no ko kakou hoolohe ana i kana mau olelo; he oiaio, a ua ike ko kakou kaikaina me ia. A mamuli o keia ano o ka olelo, ohumu iho la ko’u mau hoahanau a hoohewa mai la ia maua.

23 [m 5, p 24] Eia kekahi, olelo aku la au, o Nepai, ia lakou, i ka i ana, Ke manaoio nei anei oukou, i alakaiia mai ko kakou poe kupuna, o na mamo a Iseraela, mailoko mai o na lima o ko Aigupita poe, ina ua hoolohe ole lakou i na olelo a ka Haku?

24 He oiaio, ke manao nei anei oukou i alakaiia lakou mailoko mai o ka noho luhi ana, ina ua kauoha ole ka Haku ia Mose e alakai ia lakou mailoko ae o ka noho luhi ana?

25 Ano, ua ike oukou e noho luhi ana na mamo a Iseraela; a ua ike oukou ua hookaumahaia’ku ma na hana luhi, kaumaha e hapaiia; nolaila, ua ike oukou he mea i pono ai no lakou i laweia’i lakou mailoko mai o ka noho luhi ana.

26 Ano, ua ike oukou ua kauohaia mai la o Mose e ka Haku e hana i ua hana nui la; a ua ike oukou, ua hookaawaleia’e ke kai o ke Kaiula i o a ia nei, e kana olelo, a hele aku la lakou iwaena ma ka aina maloo.

27 Aka ua ike oukou ua make iho la ko Aigupita poe i ke Kaiula, o lakou no ka poe koa o Parao;

29 He oiaio, a ua ike no hoi oukou ua hahau aku la o Mose i ka pohaku, ma kana olelo, e like me ka mana o ke Akua iloko ona, a puka mai la ka wai, i hiki i na mamo a Iseraela ke kena ko lakou makewai;

30 A ua alakaiia aku la lakou, e hele ana ka Haku ko lakou Akua, ko lakou Mea e Ola’i, imua o lakou, e alakai ana ia lakou me ke ao, a e haawi ana ia lakou i ka malamalama i ka po, a e hana ana no lakou i na mea a pau e pono ai no na kanaka e loaa’i, aka ua hoopaakiki nae lakou i ko lakou naau, a hoopouli iho la i ko lakou hoomaopopo ana, a hoino aku la me ke ku e ia Mose, a me ke ku e i ke Akua ola a oiaio hoi.

31 [m 5, p 25] Eia kekahi, e like me kana olelo, ua luku aku la oia ia lakou; a e like me kana olelo, ua alakai mai la oia ia lakou; a e like me kana olelo ua hana iho la i na mea a pau no lakou: aole i hanaia kekahi mea, ke ole ia ma o kana olelo la.

32 A mahope iho o ko lakou hele ana ma kela aoao o ka muliwai o Ioredane, ua hoolilo mai la oia ia lakou i ikaika, i ke kipaku ana aku i na keiki o ka aina, he oiaio, i ka hoopuehu ana aku ia lakou a make loa.

33 Ano, ke manao nei anei oukou o ka poe keiki o ua aina nei, ka poe i noho iloko o ka aina i olelo mua ia’i, ka poe i kipakuia aku e ko kakou poe kupuna, ea, ke manao nei anei oukou he poe pono lakou? Aia hoi, ke i aku nei au ia oukou, aole.

34 Ke manao nei anei oukou he poe i makemake loa ia ko kakou poe kupuna mamua o lakou, ina he poe pono lakou? Ke i aku nei au ia oukou, aole;

35 Aia hoi, hookahi no io ko na kanaka a pau i ko ka Haku manao: o ka mea pono ua lokomaikaiia mai oia e ke Akua. Aka hoi, ua hoomalau aku la ua lahuikanaka nei i kela olelo i keia olelo a ke Akua, a ua oo lakou ma ka hana hewa; a maluna o lakou ka nui o ko ke Akua inaina; a ua hoohewaia mai la ka aina e ka Haku no lakou, a hoopomaikaiia mai la no ia no ko kakou poe kupuna; he oiaio, no lakou oia i hoohewa mai ai i ua aina la i ko lakou lukuia ana; a ua hoopomaikai mai la oia ia aina i ko kakou poe kupuna, i ka loaa ana mai ia lakou ka mana maluna iho o ua aina la.

36 Aia hoi, ua hana mai la ka Haku i ka honua i wahi e nohoia’i: a ua hana mai la oia i kana poe keiki, i noho lakou malaila.

37 A ke hoala mai la oia i lahuikanaka pono, a ke luku ae la oia i na lahuikanaka o ka poe hewa.

38 A ke alakai nei oia i ka poe pono i na aina maikai, a ke luku ae la oia i ka poe hewa, a no lakou no hoi oia i hoohewa aku ai i ka aina no ka lakou hana.

39 Aia no ke noho alii kiekie nei oia ma ka lani, no ka mea, oia no kona noho alii, a o keia honua oia kona keehana wawae.

40 A ke aloha mai nei oia i ka poe i makemake ia ia i Akua no lakou. Aia hoi, ua aloha mai la oia i ko kakou poe kupuna! A hana berita mai la oia me lakou, he oiaio, me Aberahama, me Isaaka, a me Iakoba: a hoomanao iho la oia i na berita ana i hana’i; nolaila, lawe mai la oia ia lakou mailoko mai o ka aina o Aigupita,

41 A hoopololei mai la oia ia lakou ma ka waonahele me kona laau hahau, no ka mea, hoopaakiki iho la lakou i ko lakou mau naau, he oiaio, e like me oukou nei; a hoopololei mai la ka Haku ia lakou no ka lakou hana hewa. Hoouna mai la oia i na nahesa wela e lele ana iwaena o lakou; a mahope iho o ko lakou nahuia’na, hoomakaukau mai la oia i ala i hiki ai ia lakou ke hoolaia: a o ka nana aku ka lakou hana e hana ai! A no ka pohihihi ole o ke ala, a no ka paakiki ole hoi o ua hana la, ua nui loa ka poe i make.

42 A hoopaakiki iho la lakou i ko lakou mau naau ia manawa aku ia manawa aku, a nuku iho la ia Mose, a i ke Akua no hoi; aka hoi, ua ike oukou ua alakaiia mai la lakou e kona mana ikaika loa, iloko o ka aina i hai mua ia’i.

43 [m 5, p 26] Ano, ea, mahope iho o keia mau mea a pau, ua hiki mai la ka manawa o lakou i lilo ai i poe hewa, he oiaio, kokoke e oo; a, aole au i ike kokoke paha lakou e lukuia i keia la; no ka me, ua ike au e hiki io mai auanei ka la, e lukuia lakou e pono ai, a he uuku wale no e koe, a e alakaiaia lakou la iloko o ka noho pio ana;

44 Nolaila, ua kauoha mai la ka Haku i ko’u makuakane e hele aku ia iloko o ka woanahele; a ua imi iho la ka poe Iudaio e kaili aku i kona ola; he oiaio, a ua imi no hoi oukou e kaili aku i kona ola; nolaila, he poe pepehi kanaka oukou iloko o ko oukou mau naau, a ua like oukou me lakou.

45 Ua wikiwiki oukou i ka hana hewa, aka lohi i ka hoomanao i ka Haku ko oukou Akua. Ua ike oukou i kahi anela, a olelo mai la oia ia oukou; he oiaio, ua lohe oukou i kona leo ia manawa aku ia manwa aku; a ua olelo mai la oia ia oukou ma kahi leo malie, a uuku, aka, ua pau ko oukou hoomaopopo ana, i hiki ole ai ia oukou ke hoomaopopo i kana mau olelo; nolaila, ua olelo mai la oia ia oukou me he leo o ka hekili la, e hoonaue ana i ka honua me he mea la e kaawale ana ia.

46 A ua ike hoi oukou, ua hiki ia ia ma ka mana o kana olelo mana loa, e hoano e i ka honua nei; he oiaio, a ua ike no hoi oukou ua hiki ia ia ma kana olelo e hoomania i na wahi apuupuu, a e hooapuupuu ae i na wahi laumania. E! no ke aha la i paakiki loa ai oukou me neia ma na naau o oukou?

47 Aia hoi, ua walania loa iho la ko’u uhane me ke kaumaha nui loa no oukou, a ua eha no hoi kuu naau: ke makau nei au o hooleiia’ku auanei oukou no ka wa pau ole. Aia hoi, ua piha au i ka uhane o ke Akua, nolaila aole ikaika ma ko’u kino.

48 [m 5, p 27] Ano, ia’u i olelo aku ai i keia mau olelo, huhu mai la lakou ia’u, a ua makemake lakou e hoolei mai ia’u iloko o ka hohonu o ke kai; a i ko lakou hele ana mai e kau mai i na lima maluna o’u, olelo aku la au ia lakou, i ka i ana, Iloko o ka inoa o ke Akua mana loa, ke kauoha aku nei au ia oukou, mai hoopa mai oukou ia’u, no ka mea, ua piha au me ka mana o ke Akua, i ka hoopauia’na o ko’u io; a o ka mea nana e kau mai i ko lakou mau lima maluna iho o’u, e maewale ia me he ohe maloo la; a e lilo ia me he mea ole la imua o ka mana o ke Akua, no ka mea, e hahau mai ke Akua ia ia.

49 [m 5, p 28] Eia kekahi, I aku la au, o Nepai ia lakou, mai ohumu hou lakou i ko lakou makuakane; mai aua hoi i ka hana a lakou mai o’u aku, no ka mea, ua kauoha mai la ke Akua ia’u e kapili i kahi moku.

50 [m 5, p 29] A i aku la au ia lakou, ina ua kauoha mai la ke akua ia’u e hana i na mea a pau, ina ua hiki ia’u ke hana. Ina i kauoha mai oia ia’u e olelo aku i keia kai, e lilo oe i honua, alaila he honua no ia; a ina au i olelo pela, e hanaia no.

51 Ano, ina no ka Haku ka mana nui e like me neia, a ua hanaia na hana mana he nui loa iwaena o na keiki a kanaka, pehea la i hiki ole ai ia ia ke ao mai ia’u, e kapili au i moku?

52 [m 5, p 30] Olelo aku la au, o Nepai, i na mea he nui loa i ko’u mau hoahanau, a hoka iho la lakou, a hiki ole ia lakou ke paio mai ia’u; aole hoi e aa lakou e kau mai i ko lakou mau lima maluna o’u, aole hoi e hoopa mai ia’u me ko lakou mau manamana lima, no na la he nui. Ano, aole lakou e aa e hana i keia, o maewale lakou imua o’u, no ka mana o ka uhane o ke Akua; a pela ia i hana ai maluna o lakou.

53 [m 5, p 31] Eia kekahi, i mai la ka Haku ia’u, E o hou aku oe i kou lima i kou mau hoahanau, aole o lakou e maewale imua ou, aka e hoohikilele au ia lakou, wahi a ka Haku, a e hana au i keia, i ike lakou owau no nei ka Haku, ko lakou Akua.

54 Eia kekahi, o aku la au i ko’u lima i ko’u mau hoahanau, aole o lakou i maewale imua o’u; aka hoohaalulu ae la ka Haku ia lakou, e like me ka olelo ana i olelo mai ai.

55 Ano la, i mai la lakou, Ke ike io nei makou, o ka Haku kekahi pu me oe, no ka mea, ke ike nei makou o ka mana o ka Haku oia ka mea i hoohaalulu ia makou. A moe iho la lakou imua o’u, a kokoke lakou e hoomana ia’u, aka aole au e ae aku ia lakou, i ka i ana, Owau no kou hoahanau, he oiaio, kou kaikaina; no ia mea, e hoomana i ka Haku kou Akua, a e mahalo oe i kou makuakane a me kou makuwahine, e loihi ai kou mau la ma ka aina a ka Haku, a kou Akua, e haawi mai ai ia oe.

1 [mokuna 5, paukū 32] Eia kekahi, hoomana aku la lakou i ka Haku, a hele pu aku la me au; a hana iho la makou i na laau me ka hana akamai. A hoike mai la ka Haku ia’u ia manawa aku ia manawa ’ku, i ke kumu like na’u e hana’i i na laau o ka moku.

2 Ano, aole au, o Nepai, i hana i na laau mamuli o ke ano i aoia e na kanaka, aole hoi au i kapili aku i ka moku mamuli o ke ano o kanaka; aka kapili aku la au ia mamuli o ke ano a ka Haku i hoike mai ai ia’u; nolaila, aole mamuli o ka ke kanaka hana ia.

3 [m 5, p 33] A pii pinepine aku la au, o Nepai, i ka mauna, a pule pinepine aku la au i ka Haku; no ia mea, hoike mai la ka Haku i na mea nui ia’u.

4 [m 5, p 34] Eia kekahi, mahope iho o ko’u hoopaa ana i ka moku, e like me ka olelo a ka Haku, ike ae la ko’u mau hoahanau ua maikai no, a o ka hana ua nani loa; nolaila, hoohaahaa hou lakou ia lakou iho imu o ka Haku.

5 [m 5, p 35] A hiki mai la ka leo o ka Haku i ko’u makuakane, e ku ae makou a e iho aku iloko o ka moku.

6 Eia kekahi, ia la ae, mahope iho o ko makou hoomakaukau ana i na mea a pau, i ka hua, a me ka io nui mai ka waonahele mai, a i ka meli a lako, a i ka ai, e like me ka mea a ka Haku i kauoha mai ai ia makou, iho aku la makou iloko o ka moku, me ko makou ukana a pau a me na hua kanu o makou, a me kela mea keia mea a makou i lawe pu mai ai; o kela mea keia mea o makou e like me na makahiki ona; nolaila, iho iho la makou a pau iloko o ka moku, me ka makou mau wahine a me na keiki a makou.

7 [m 5, p 36] Ano, na ko’u makuakane na keiki kane elua, i hanau ma ka waonahele: ua kapaia ka mua o Iakoba, a o ka muli o Iosepa.

8 Eia kekahi, mahope iho o ko makou iho ana iloko o ka moku, a ua lawe pu me makou na mea ai a me na mea e ae i kauohaia mai ai makou, hemo aku la makou i ke kai, a puhi aku la ka makani ia makou, me ka ihu i ka aina i olelo mua ia’i;

9 A mahope iho o ko makou puhiia’na e ka makani no na la he nui, aia hoi, hoomaka iho la ko’u mau hoahanau, a me na keiki a Isemaela, a me ka lakou mau wahine no hoi, e hoolealea ia lakou iho, a hoomaka lakou e haa, a e memele, a e olelo me na huaolelo ino, he oiaio, a hoopoina iho la lakou i ka mana i lawe mai ai ia lakou malaila; he oiaio, ua hookiekieia’e la me ka wawa nui.

10 A hoomaka iho la au, o Nepai, e makau nui loa o huhu mai auanei ke Akua ia makou, a e hahau mai ia makou, no ka makou hana ino, a e aleia makou i ka hohonu o ke kai; nolaila, hoomaka iho la wau, o Nepai, e olelo aku ia lakou me ka lealea ole; aka hoi, huhu mai la lakou ia’u, i ka i ana, Aole makou e ae aku i ko makou kaikaina e lilo ia i alii maluna o makou.

11 [m 5, p 37] Eia kekahi, lalau mai la o Lamana laua me Lemuela ia’u a nakii mai la ia’u ma na kaula, a hana mai la lakou ia’u me ka lokoino nui; aka hoi, ae mai la ka Haku i keia mea, i hiki ia ia ke hoike mai i kona mana, i ka hooko ana i kana olelo, ana i olelo mai ai no ka poe hewa.

12 [m 5, p 38] Eia kekahi, mahope iho o ko lakou nakinaki ana ia’u, i hiki ole ia’u ke oni, oki iho la ka hana o ka panana, i hoomakaukauia’i e ka Haku;

13 Nolaila, aole lakou i ike kahi a lakou e hookele ai i ka moku, a nou mai la ka makani ino, he oiaio, he makani ino loa a weliweli hoi, a ua puhiia makou ihope maluna o ke kai i na la ekolu, a hoomaka iho la lakou e makau nui loa, o make auanei lakou i ke kai; aole nae lakou e hookuu mai ai’u.

14 A i ka ha o ka la, o ko makou puhiia’na ihope, nou mai la ka makani ino a ikaika loa.

15 [m 5, p 39] A kokoke makou i aleia i ka hohonu o ke kai. A mahope iho o ko makou puhiia’na ihope maluna o ke kai i na la eha, hoomaka iho la ko’u mau hoahanau e ike, maluna o lakou ka hoopai ana o ke Akua, a e make io no lakou, ke mihi ole lakou i ko lakou mau hewa; nolaila, hele mai la lakou io’u la, a hoohemo mai la i na mea paa ma na pulima o’u, aia hoi, ua pehu nui loa iho la laua; a pela no me na opuupuu wawae o’u, a nui loa ka eha o lakou.

16 [m 5, p 40] Aka hoi, nana aku la au i ko’u Akua, a hiilani no au ia ia a pau ka la; aole au i ohumu aku i ka Haku, no ko’u mau pilikia.

17 [m 5, p 41] Ano, o ko’u makuakane, o Lehi, ua olelo aku la oia i na mea he nui loa ia laua, a i na keiki a Isemaela no hoi; aka ha aku la lakou i na olelo hooweliweli he nui i ka mea nana e olelo no’u; a ua nui na makahiki o na makua o’u, a ua nui ke kaumaha i loaa’i ia laua no ka laua mau keiki, a ua hoomoeia laua ilalo me ka mai, maluna o na wahi moe o laua.

18 No ko laua kaumaha, a eha nui, a no ka hana hewa a ko’u mau hoahanau, ua kokoke laua e laweia ’ku mai keia ola ana, e halawai pu me ko laua Akua; he oiaio, kokoke e laweia ko laua oho hina e moe ilalo i ka lepo; he oiaio, e hooleiia ’ku laua i ka lua kai.

19 A o Iakoba a me Iosepa no hoi ua opiopio laua, a he mea e pono ai no laua e loaa ka mea e ikaika ai, a ua kaumaha no hoi no ka popilikia o ko laua makuwahine; a o ka’u wahine no hoi, me ka waimaka a me ka noi ana, a me ka’u mau keiki no hoi, aole i hoopalupalu na naau o ko’u mau hoahanau ma ia mau mea, e hookuu mai ia’u;

20 Aohe mea e ae, o ka mana o ke Akua wale no, e hooweliweli ana ia lakou me ka make, i hiki ke hoopalupalu i ko lakou mau naau; nolaila, ia lakou i ike ai ua kokoke lakou e aleia i ka hohonu o ke kai, mihi iho la lakou i ka mea a lakou i hana’i, a hookuu mai la lakou ia’u.

21 [m 5, p 42] Eia kekahi, mahope iho o ko lakou hookuu ana ia’u, aia hoi, lawe ae la au i ka panana, a hele ae la ia e like me ko’u makemake. A pule aku la au i ka Haku; a mahope iho o ka’u pule ana, malie iho la ka makani, a pau ae la ke kupikipikio o ke kai a ua malie loa.

22 [m 5, p 43] Eia kekahi, hookele aku la au, o Nepai, i ka moku, a holo hou aku la makou i ka aina i olelo mua ia’i.

23 A mahope iho o ko makou holo ana i na la he nui, hiki aku la makou i ka aina i olelo mua ia’i; a pae makou mauka maluna o ka aina, a kukulu iho la makou i na halelewa o makou, a kapa aku la makou ia i ka aina i hai mau ia’i.

24 [m 5, p 44] Eia kekahi, hoomaka iho la makou e mahiai i ka honua, a e kanu i na hua; he oiaio, kanu iho la makou i ko makou hua a pau i ka lepo, a makou i lawe mai ai mai ka aina mai o Ierusalema. A kupu nui loa iho la ia mau mea; nolaila, ua hoopomaikaiia mai la makou me ka lako.

25 [m 5, p 45] Eia kekahi, ike aku la makou ma ka aina i olelo mua ia’i, ma ko makou hele ana i ka waonahele, aia ma ka ululaau na holoholona o kela ano o keia ano, o ka bipi wahine a me ka bipi kane, a me ka hoki, a me ka lio, a me ka kao, a me ka kao hihiu, a me kela ano keia ano o na holoholona hihiu, i ku pono i ke kanaka. A loaa mai la ia makou kela ano keia ano o na mea e hooheheeia, o ke gula, o ke kala, a me ke keleawe.

1 [mokuna 5, paukū 46] Eia kekahi, kauoha mai la ka Haku ia’u, nolaila, hana iho la au i na papa o ka mea i hooheheeia, i hiki ia’u ke kahakaha maluna o lakou i ka mooolelo o ko’u poe kanaka. A maluna iho o na papa a’u i hana’i, kahakaha iho la au i ka mooolelo o ko’u makuakane, a me ko makou hele ana no hoi ma ka waonahele, a me na wanana a ko’u makuakane: a me na wanana no hoi a’u he nui, ua kahakaha au maluna o lakou.

2 Aole au i ike ma ka namawa a’u i olelo aku ai ia mau wanana, e kauohaia’na au e ka Haku e hana i ua mau papa nei: nolaila, o ka mooolelo o ko’u makuakane a me ke kuauhau o kona poe kupuna, a me ka hapa nui o ka hana a makou ma ka waonahele, ua kahakahaia maluna iho o ua mau papa la a’u i olelo mua ai; nolaila, o na mea i hala e mamua o ka’u hana ana i keia mau papa, he oiaio iho la, ua kakau nui ia ia mau mea maluna o na papa mua.

3 [m 5, p 47] A mahope iho o ka’u hana ana i keia mau papa ma o ke kauoha la, loaa mai la ia’u, ia Nepai, he kauoha e kakauia na mea maopopo a maikai loa o ka oihana hai olelo, a o na wanana, maluna iho o keia mau papa; a e malama pono ia na mea i kakauia no ke ao ana aku i ko’u poe kanaka, e noho ana auanei ma ka aina, a no na hana naauao, e ae, ua ikea ua mau hana la e ka Haku;

4 Nolaila, kakau iho la wau, o Nepai, i mooolelo maluna iho o na papa e ae, he mooolelo nui ae ia o na kaua, a me na paio, a me ka lukuia ana o ko’u poe kanaka. A ua hana au i keia a kauoha aku la no hoi i ko’u poe kanaka i na mea e pono ai na lakou e hana, mahope iho o ko’u hele ana aku, a e haawiia aku keia mau papa mai kekahi hanauna aku i kekahi hanauna aku, a mai kekahi kaula aku i kekahi, a hiki i ka wa e loaa’i ia lakou na kauoha e ae a ka Haku.

5 A e kakauia auanei ka mooolelo o ka’u hana ana i keia mau papa i kekahi manawa e aku; alaila hoi, e hana no au e like me ka mea a’u i olelo ai; a ke hana nei au i keia, e malama pono ia na mea laa loa no ka hoonaauaoia ana o ko’u poe kanaka.

6 Aka hoi, aole au a kakau i kekahi mea maluna o na papa, ke manao ole au he mea laa ia. Ano, ina e lalau ana au, ina no ua lalau ka poe o ka wa kahiko. Aole nae au e makemake e hoapono ia’u iho no na kanaka e ae, aka no ka nawaliwali iloko o’u, mamuli o ke kino, ua makemake au e hoakaka no’u iho.

7 No ka mea, o na mea a kekahi poe e manao nui ai he maikai i ke kino a i ka uhane hoi, o kekahi poe e ae ua hoowahawaha lakou, a hehi ilalo o ko lakou mau wawae. He oiaio, hehi no na kanaka i ke Akua io o ka Iseraela, malalo iho o na wawae o lakou; ke i aku nei au, hehi malalo iho o na wawae o lakou; aka ke makemake nei au e olelo ma kahi olelo e. Ke hoowahawaha aku nei lakou ia ia, a hoolohe ole i ka olelo a kona ao ana;

8 Aia hoi, e hele mai ana oia e like me ka olelo a ka anela, i na makahiki eono haneri mai ka manawa a ko’u makuakane i haalele ai ia Ierusalema.

9 A no ka hana ino loa a ko ke ao nei, e hoohewa aku auanei lakou ia ia me he mea ole la; nolaila, e hahau ana lakou ia ia, a e ahonui ana oia ma ia mea; a e pepehi ana lakou ia ia, a e ahonui ana oia ma ia mea. He oiaio, e kuhakuha aku ana no lakou iluna ona, a e ahonui ana oia ma ia mea, no kona lokomaikai aloha a me kona ahonui i na keiki a kanaka.

10 A o ke Akua o ko kakou poe kupuna, ka poe i alakaiia’ku mailoko mai o Aigupita, mailoko mai o ka noho luhi ana, a i malamaia no hoi ma waonahele e ia; he oiaio, ke Akua o Aberahama, a o Isaaka, a me ka Akua o Iakoba, e haawi ana ia ia iho, e like me na olelo a ka anela, me he kanaka la, iloko o na lima o na kanaka hewa, e kaulia’i iluna e like me na olelo a Zenoka, a e kaulia’i ma ke kea e like me na olelo a Neuma, a e kanuia ma kahi hale kupapau e like me na olelo a Zenosa, ana i olelo mai ai no na la pouli ekolu, he hoailona ia e haawiia mai no kona make, i ka poe e noho ana ma na moku puni o ke kai; aka e haawiia me ka maopopo nui i ka poe o ka hale o Iseraela.

11 [m 5, p 48] No ka mea, penei wahi a ke kaula, e hele io mai ke Akua ma ia la i ko ka hale o Iseraela a pau: i kekahi poe me kona leo, no ko lakou pono, i ka hauoli nui ana o lakou a i ka hoolaia’na no hoi; a i kekahi poe e ae me ka hekili a me ka uila o kona mana, ma ka makani ino, ma ke ahi, a ma ka uahi, a ma ka ohu o ka pouli, a ma ka hamama ana o ka honua, a ma na mauna e laweia’ku iluna;

12 A e hiki io mai keia mau mea e pono ai, wahi a ke kaula Zenosa. A e nahaha io no na pohaku o ka honua; a no ka auwe ana o ka honua, e olelo aku auanei na ’lii he nui o na moku puni o ke kai, ma o ka Uhane la o ke Akua maluna o lakou, Ke eha nei ke Akua o na mea a pau.

13 A penei wahi a ke kaula, no ka poe e noho ana ma Ierusalema, e hahauia lakou e na kanaka a pau no ko lakou kau ana i ke Akua o ka Iseraela ma ke kea, a me ka huli ana’e o ko lakou mau naau, a hoomalau ana i na hoailona a me na mea kupanaha, a me ka mana a me ka nani o ke Akua o ka Iseraela;

14 A no ka hoohuli ana’e o lakou i ko lakou mau naau, wahi a ke kaula, a ua hoowahawaha i ka Mea Hemolele o ka Iseraela, e auwana auanei lakou ma ke kino, a e make, a e lilo i mea e hoinoia a e kuamuamuia, a e inainaia iwaena o na lahuikanaka a pau;

15 Aka hoi, i ka wa e hiki mai ai ia la, wahi a ke kaula, i ka huli hou ole ana o lakou i ko lakou naau e ku e i ka Mea Hemolele o ka Iseraela, alaila, e hoomanao oia i na hana berita, ana i hana mai ai i ko lakou poe kupuna;

16 He oiaio, alaila, e hoomanao oia i na mokupuni o ke kai; a e houluulu no au i na lahuikanaka a pau o ko ka hale o Iseraela, mai na kihi eha o ka honua, wahi a ka Haku, e like me na olelo a ke kaula Zenosa;

17 He oiaio, a e ike ko ke ao nei a pau i ka hoola ana o ka Haku, wahi a ke kaula; a e hoopomaikaiia kela lahui kea lahui, kela ohana keia ohana, kela olelo keia olelo, a me na kanaka a pau.

18 [m 5, p 49] Ua palapala au, o Nepai, i keia mau mea i ko’u poe kanaka, i hiki paha ia’u ke koi aku ia lakou e hoomanao i ka Haku, i ko lakou Mea Hoolapanai;

19 Nolaila, ke olelo aku nei au i ko ka hale o Iseraela a pau, ina paha e loaa ia lakou keia mau mea.

20 No ka mea, no’u na hooikaika ana iloko o ka uhane, e hoonawaliwali ana ia’u, a ua ikaika ole ko’u mau ami a pau, no ka poe e noho ana ma Ierusalema; no ka mea, ina ua lokomaikai ole ka Haku ia’u, e hoike mai ana ia’u no lakou, e like me kana i ka poe kaula kahiko, ina ua make pu no hoi au:

21 A ua hoike io oia i ka poe kaula kahiko, i na mea a pau e pili ana ia lakou; a ua hoike no hoi oia i kekahi poe he nui no makou; nolaila, he mea e pono ai i ike makou i na mea e pili ana ia lakou, no ka mea, ua palapalaia maluna o na papa keleawe.

22 [mokuna 6, paukū 1] Ano, eia kekahi, ao aku la au, o Nepai, i ko’u mau hoahanau no ia mau mea. A heluhelu aku la au i na mea he nui wale ia lakou, i kahakahaia maluna o na papa keleawe, i ike no hoi lakou i ka hana ana a ka Haku ma na aina e, mawaena o ka poe o ka wa kahiko.

23 A heluhelu ae la au i na mea he nui loa i palapalaia iloko o ka buke a Mose; aka, i hiki ai’u ke hoohuli nui ae ia lakou e manaoio i ka Haku i ko lakou Mea Hoola, heluhelu ae la au ia lakou i ka mea i palapalaia e Isaia; no ka mea, hoohalike mai ae la au i na palapala hoano a pau ia makou, no ke ao ana a me ka hoonaauao ana ia makou.

24 Nolaila, olelo aku la au ia lakou, i ka i ana, E hoolohe mai oukou i na olelo a ke kaula, oukou kekahi koena o ko ka hale o Iseraela, he lala i haihaiia; e hoolohe oukou i na olelo a ke kaula, i palapalaia i ko ka hale a pau o Iseraela, a e hoohalike ia mau olelo ia oukou iho, i loaa ia oukou ka manaolana e like me na hoahanau o oukou, mailaila oukou i hakiia mai ai; no ka mea, mamuli o keia ano ua palapala mai la ke kaula:

1 E haliu mai a e hoolohe i keia, E ko ka hale o Iakoba, ka poe i kapaia ma ka inoa o Iseraela, a i puka mai ai noloko mai o na wai o Iuda, ka poe hoohiki ma ka inoa o ka Haku, a hookaulana i ka inoa o ke Akua o Iseraela; aole nae lakou e hoohiki ma ka oiaio, aole hoi ma ka pono.

2 Aka hoi, ke kapa nei lakou ia lakou iho no ke kulanakauhale hoano, aka aole lakou i hilinai maluna o ke Akua o ka Iseraerla, oia ka Haku o na Lehulehu: oiaio, o ka Haku o na Lehulehu kona inoa ia.

3 Aia hoi, ua hai aku la au i na mea mua mai kinohi mai; mai ko’u waha i puka aku ai lakou, a hoike aku la au ia mau mea; na’u i hoike hoohikilele i ua mau mea nei.

4 A hana iho la au ia, no ka mea, ua ike mua au ua paakiki oe, a o kou ai he olona hao, a o kou lae he keleawe;

5 A ua hai aku la au ia oi, mai kinohi mai; mamua o ka hiki ana mai hoike aku la au ia mau mea ia oi, no ka mea, o olelo auanei oe, Na kuu kii i hana i keia mau mea, a na kuu kiikalaiia, a na kuu kiihooheheeia lakou i kauoha mai.

6 Ua ike oe a lohe hoi i keia a pau; aole anei oukou e hai aku? A ua hoike au ia oe i na mea hou mai ia manawa, he oiaio, i na mea hoi i hunaia, aole hoi oe i ike ia lakou.

7 Ua hanaia lakou i keia manawa, aole mai kinohou mai; mamua o ka la au i lohe ole ai ia mau mea, ua haiia lakou ia oe, o olelo auanei oe, Aia, ua ike no wau ia mau mea.

8 Oiaio, aole oe i lohe; he oiaio, aole hoi i ike; he oiaio, mai ia manawa mai, aole i hoohakahakaia kou pepeiao: no ka mea, ike mua no au e hana no oe me ka hoopunipuni nui loa, a mai ka opu mai ua kapaia oe he Lawehala.

9 [m 6, p 2] Aka hoi, no ko’u inoa no wau e hoopanee aku ai i ko’u inaina, a no kuu nani e hoomanawanui au ia oe, i hooki ole aku ai au ia oe.

10 No ka mea, aka hoi, ua hoohehee maemae au ia oe; ua koho aku au ia oe ma ka umu o ka popilikia.

11 No’u iho, he oiaio, no’u iho, e hana aku ai au i keia; no ka mea, aole au e ae aku e hoohaumiaia ko’u inoa, a, aole au e haawi aku i ko’u nani ia hai.

12 [m 6, p 3] E hoolohe mai oe ia’u, e ka Iakoba, a me ka Iseraela hoi ko’u mea i heaia; no ka mea, owau no ia; owau ka mua, a owau no hoi ka hope.

13 Na ko’u lima no hoi i hookumu i ka honua, a na kuu lima akau i ana aku i na lani: hea aku no au ia lakou, a ku pu mai la no lakou.

14 E hoakoakoa ia oukou iho a pau, a e hoolohe; owai ka mea iwaena o lakou i hai aku ai i keia mau mea ia lakou? Ua aloha ka Haku ia ia, oiaio, a e hooko oia i kana olelo, ana i hai aku ai ma o lakou la; a e hana no oia i kona makemake maluna o Babulona, a e kau no kona lima maluna o ko Kaledea.

15 Penei hoi, wahi a ka Haku: Owau no ka Haku, oiaio, ua olelo aku la au, oia ua hea aku no au ia ia, e kukala, a na’u no ia i lawe mai nei, a e hoopomaikai no oia i kona hele ana.

16 [m 6, p 4] E hookokoke ma oukou io’u nei: mai kinohi mai, aole au i olelo malu; mai kona wa i haiia’i, ua olelo aku au; a ua hoouna mai ia’u o ka Haku ke Akua, a me kona uhane.

17 A penei wahi a ka Haku kou Hoolapanai, ka Mea Hemolele o Iseraela: ua hoouna aku au ia ia, ka Haku kou Akua, ka mea e ao ana’ku ia oe i ka mea e pono ai, ka mea e alakai ana ia oe ma kahi e pono ai oe ke hele, ua hana’ku oia ia.

18 Ina i hoolohe mai oe i ka’u kauoha! ina ua like kou malu me ka muliwai, a o kou pono hoi me na ani o ke kai:

19 Ina ua like no hoi kau hua me ke one; a me na keiki o kou opu me kona iliili: aole e hookiia’ku kona inoa, aole hoi e hookaaia’ku imua o’u.

20 [m 6, p 5] O haele oukou o Babulona, e holo oukou mai ko Kaledea aku, me ka leo o ka oli e hai aku, e hookaulana aku i keia, e hoolaha i ke kukulu o ka honua; e i aku oukou, ua hoolapanai ka Haku i kana kauwa ia Iakoba.

21 Aole lakou i makewai: alakai ae la oia ia lakou mawaena o na waonahele: hookahe oia i ka wai mailoko mai o ka pohaku no lakou: wawahi no hoi oia i ka pohaku, a huai mai la ka wai.

22 Ua hana iho la oia i keia a pau, a nui ae hoi, aole nae he maluhia no ka poe hewa, wahi a ka Haku.

1 [mokuna 6, paukū 6] Eia hou: e hoolohe mai, E ko ka hale o Iseraela, o oukou a pau i haihaiia a i kipakuia ’ku, no ka hewa o na kahu o ko’u poe kanaka; he oiaio, o oukou a pau i haihaiia ’ku a i hoopuehuia i o a i o, o ko’u poe kanaka, E ko ka hale o Iseraela. E haliu mai ia’u, E na moku puni, a e hoolohe hoi oukou, e na lahuikanaka, ma kahi mamao aku; ua hea mai la ka Haku ia’u mai ka opu mai; mai ka opu mai hoi o ko’u makuahine ua hai oia i ko’u inoa.

2 A ua hana mai la oia i ko’u waha e like me ka pahikaua oi; ma ke aka o kona lima ua huna mai oia ia’u, a ua hana mai oia ia’u a like me ka pua i anaiia: ua huna mai oia ia’u iloko o kona aapua;

3 A olelo mai la ia’u, Ooe no ka’u kauwa, E ka Iseraela e, iloko ou e hoonaniia’i au.

4 Alaila, i i iho la au, ua hana make hewa au, no ka ole wau i hoopau ai i ko’u ikaika me ka make hewa; he oiaio, me ka Haku ko’u aponoia, a me ko’u Akua hoi ha’u hana ana.

5 [m 6, p 7] Ano, wahi a ka Haku, ka mea i hana mai ia’u mai ka opu mai i kauwa nana, i mea e hoihoi mai i ka Iakoba ia ia: Ina i hoakoakoa ole ia ka Iseraela, e nani io nae au ma na maka o ka Haku, a o ko’u Akua ko’u ikaika no ia.

6 A i mai la oia, he mea uuku ia e lilo oe i kauwa na’u e hoala mai i na ohana o ka Iakoba, a e hoihoi i ka poe i malamaia o ka Iseraela. E haawi aku no hoi au ia oe i malamalama no ka poe Genetile, i lilo oe i mea hoola no’u i na kukulu o ka honua.

7 Penei wahi a ka Haku, ka Hoolapanai o ka Iseraela, kona Mea Hemolele hoi, i ka mea i hoowahawahaia e kanaka, i ka mea a na lahuikanaka i hoopailua ai, i ke kauwa a na mea e noho alii ana, e ike aku na moi a e ku iluna, e hoomana aku no hoi na ’lii, no ka Haku, ka mea oiaio.

8 Penai wahi a ka Haku, i ka manawa aloha ua hoolohe au ia oe, E na moku puni o ke kai, a i kahi la hoola ua kokua au ia oe: a e malama no au ia oe, a e haawi aku ia oe i ka’u kauwa i berita no na kanaka, e hookupaa ika honua, e hooili aku i na hooilina neoneo:

9 I hiki ia oe ke olelo aku i ka poe i paa, E hele iwaho; a i ka poe e noho ana ma ka pouli, E hoike ia oukou iho. E ai no lakou ma na alanui, a ma na wahi kiekie a pau ka lakou ai.

10 Aole lakou e pololi, aole e makewai, aole hoi e hahau mai ka wela a me ka la ia lakou: no ka mea, o ka mea e aloha ia lakou nana lakou e alakai, he oiaio, ma na waipuna e alakai oia ia lakou.

11 A e hoolilo aku no au i ko’u mau kuahiwi a pau, a e hookiekieia auanei ko’u mau alanui.

12 Alaila, E ko ka hale o Iseraela, aia hoi, e hele mai no keia poe mai kahi loihi aku; aia hoi, o keia poe mai ke kukulu akau a mai ke komohana mai; a o keia poe hoi mai ka aina o Sinima mai.

13 [m 6, p 8] E oli, E na lani; a e hauoli hoi, E ka honua; no ka mea, e hookupaaia na wawae o ka poe ma ka hikina; e poha mai i ka ole ana, E na mauna: no ka mea, aole lakou e hahau hou ia: no ka mea, ua hooluolu mai la ka Haku i kona poe kanaka, a e aloha mai no ia i kona poe i hoopilikiaia.

14 Aka hoi, ua olelo mai o Ziona, ua haalele ka Haku ia’u; a ua hoopoina ko’u Haku io’u nei; aka e hoike mai no ia aole one i hoopoina.

15 No ka mea, e hiki anei i ka wahine ka hoopoina i kana keiki omowaiu, i ole ia e aloha aku i ke keikikane o kona opu? Oiaio, e hiki no ia lakou ke hoopoina, aka aole au e hoopoina ia oe, E ko ka hale o Iseraela.

16 Aia hoi, ua kahakaha au ia oe ma na poho lima o’u; ua mau loa kou mau papohaku ma ko’u alo.

17 E wikiwiki no kau poe keiki e ku e i ka poe nana oe i pepehi; a o ka poe i hooneoneo ia oe, e puka aku no lakou mai ou aku.

18 [m 6, p 9] E alawa ae oe i kou mau maka mao, a mao, a e nana hoi: ka akoakoa mai nei lakou nei a pau, a e hele mai auanei lakou iou la. A me au e ola nei, wahi a ka Haku, e aahu io no oe ia lakou a pau me he hakiko la, a e kakoo hoi ia lakou e like me ka wahine mare.

19 No ka mea, o kou mau wahi mehameha a neoneo, a me ka aina o kou lukuia ana, e pilikia ana no ia no ka nui o ka poe e noho ana; e loihi lilo loa ka poe i ale ia oe.

20 O na keiki au e loaa’i auanei, mahope iho o ka lilo ana o ka poe mua, e olelo hou no lakou i kou mau pepeiao, Ua pilikia loa au i keia wahi: e haawi mai ia’u i wahi e noho ai au.

21 Alaila, e olelo iho oe ma kou naau, nawai la i hoohanau mai i keia poe na’u, ua nele au i ka’u mau keiki a mehameha, he pio no, a e kuewa ana i o a i o? A nawai la i hoonui mai i keia poe? Aia hoi, ua waiho wale ia au; mahea hoi lakou nei?

22 Ke olelo mai nei ka Haku, ke Akua penei, Aia hoi, e hapai no au i ko’u lima i ka pe Genetile, a e kau no au i ko’u hae i na lahuikanaka: a e lawe mai lakou i kau poe keikikane ma ko lakou mau lima, a e kaikaiia kau poe kaikamahine ma ko lakou mau poohiwi.

23 A e lilo na ’lii i poe makuakane hanai nou, a o na ’lii wahine a lakou i poe makuwahine hanai nou: a e kulou no lakou ilalo ia oe me na maka o lakou i ka honua, a e palu iho i ka lep o kou mau wawae; a e ike auanei oe, Owau no ka Haku: no ka mea, o ka poe e kali ia’u, aole lakou e hilahila.

24 No ka mea, e kailiia’ku anei ka waiwai pio mai ka poe ikaika aku, e hoopakeleia anei na pio i lawe pono ia?

25 Aka penei wahi a ka Haku, e kailiia aku no na pio o ka poe ikaika, a e hoopakeleia ka waiwai i pio mai ka poe weliweli mai: no ka mea, e paio aku au i ka mea paio pu me oe, a e hoola no au i kau poe keiki.

26 A e hanai au i ka poe i hooluhi aku ia oe i ko lakou io iho; a e ona auanei lakou i ko lakou koko iho, e like me ka waina ono: a e ike no na mea io a pau, Owau no ka Haku, o kou Mea e Ola’i, a me kou Hoolapanai, ka Mea Mana hoi o ka Iakoba.

1 [mokuna 7, paukū 1] Eia kekahi, mahope iho o ko’u heluhelu ana i keia mau mea i kahakahaia ma na papa keleawe, hele mai la ko’u mau hoahanau io’u nei, a i mai la ia’u, Heaha la ke ano o keia mau mea au i heluhelu ai? Aia hoi, e hoomaopopoia anei keia mau mea e like me ko ka uhane, e hiki mai ana mamuli o ko ka uhane, aole mamuli o ko ke kino?

2 A i aku la au, o Nepai, ia lakou, Aia hoi, ua hoikeia mai la ia mau mea i ke kaula e ka leo o ka Uhane: no ka mea, ua hoikeia mai ma ka uhane na mea a pau i ka poe kaula, e hiki mai ana auanei maluna o na keiki a kanaka mamuli o ko ke kino.

3 Nolaila, o na mea a’u i heluhelu ai, he mau mea e pili ana i na mea o ke kino a me na mea hoi o ka uhane: no ka mea, eia kahi mea akaka, e hoopuehuia’e ko ka hale o Iseraela ma neia hope aku, maluna iho o ka ili o ka honua a pau, a iwaena no hoi o na lahuikanaka a pau,

4 Aia hoi, ua nalowale iho la he nui loa i keia manawa, i ike ole ia e ka poe e noho ana ma Ierusalema. Oiaio, ua alakaiia ’ku la ka nui o na ohana a pau; a ua hoopuehuia ma o, a ma o, maluna o na mokupuni o ke kai: a o kahi a lakou i noho ai, aole kekahi o kakou i ike, eia wale no, ua ike kakou ua alakaiia ’ku lakou.

5 A mahope mai o ke alakaiia ana ’ku o lakou, ua wananaia mai la keia mau mea no lakou, a no ka poe a pau e hoopuehuia a e hoohokaia ma neia hope aku, no ka Mea Hemolele o ka Iseraela; no ka mea, e hoopaakiki no lakou i ko lakou mau naau e ku e ia ia; no ia mea, e hoopuehuia’e lakou iwaena o na lahuikanaka a pau, a e inainaia e na kanak a pau.

6 Aka hoi, mahope iho o ka hanaiia’na o lakou e ka poe Genetile, a i hapai ka Haku i kona lima maluna iho o ka poe Genetile, a i kau ia lakou iluna i hae, a i hiia ka lakou poe keikikane ma ko lakou la mau lima, a i kaikaiia ka lakou poe kaikimahine maluna o ko lakou la mau poohiwi, aia hoi, o keia mau mea i oleloia, no ke kino ia: no ka mea, pela io no ka berita a ka Haku i ko kakou poe kupuna kane; a e pili ana ia ia kakou ma na la e hiki mai ana, a me ko kakou poe hoahanau no hoi o ko ka hale o Iseraela.

7 A eia no hoi kekahi ano, e hiki mai ana ka manawa, mahope aku o ka hoopuehuia’na aku, a me ka hoohokaia’na o ko ka hale o Iseraela a pau, e hoala no ka Haku, ke Akua, i kekahi aupuni ikaika, mawaena o ka poe Genetile, he oiaio, maluna iho o ka ili o keia aina, a e hoopuehuia auanei ka kakou poe hua e lakou.

8 [m 7, p 2] A mahope aku o ka hoopuehuia’na o ka kakou poe hua, e hoomaka no ka Haku, ke Akua, e hana i kahi hana kupanaha, iwaena o ka poe Genetile, i kahi hana e pomaikai loa ai auanei ka kakou poe hua; nolaila, ua hoohalikeia ia i ko lakou hanaiia’na e ka poe Genetile, a i ke kaikaiia ana ma ko lakou mau lima, a maluna o ko lakou mau poohiwi.

9 A he hana no hoi ia e pomaikai ai ka poe Genetile: aole ka poe Genetile wale no, aka ko ka hale a pau o Iseraela, i ka hoomaopopo ana ’ku i na berita a ka Makua o ka lani ia Aberahama, i ka i ana, Ma kau hua e hoopomaikaiia’i na lahuikanaka a pau o ka honua.

10 A ke makemake nei au, e ko’u mau hoahanau, e ike oukou ua hiki ole i na lahuikanaka a pau o ka honua nei ke hoopomaikaiia, ke ole hoike mai oia i kona lima imua o na maka o na lahuikanaka.

11 Nolaila, e hoomaka no ka Haku, ke Akua, e hoike aku i kona lima imua o na lahuikanaka a pau, i ka lawe ana mai i kana mau berita a me kona euanelio, i ka poe o ka hale o Iseraela.

12 Nolaila, e lawe hou no oia ia lakou noloko mai o ka noho pio ana, a e houluuluia lakou i ko lakou aina hooilina: a e laweia mai noloko mai o ka pouli, a noloko mai o ka poeleele: a e ike auanei lakou, o ka Haku oia ko lakou Mea e Ola’i, a me ko lakou Mea Hoolapanai, ka Mea Mana o ka Iseraela.

13 A o ke koko o ua ekalesia nui a ino loa la, oia ka wahine hookamakama o ka honua nei a pau, e huli auanei ia maluna o ko lakou mau poo iho, no ka mea, e kaua no lakou mawaena o lakou iho, a e haule ka pahikaua o ko lakou lima maluna o ko lakou mau poo iho, a e ona auanei lakou i ko lakou koko iho.

14 A o na lahuikanaka a pau e kaua aku ia oe, e ko ka hale o Iseraela, e hookueia auanei lakou kekahi i kekahi, a e haule no lakou iloko o ka lua, a lakou i eli ai e hoopahele i ka poe kanaka a ke Akua. [m 7, p 3] A e lukuia ka poe a pau e kaua aku ia Ziona. A o ua wahine hookamakama nui la, nana i hookakuli i na aoao pololei o ka Haku, he oiaio, o ua ekalesia nui a ino loa la, e hiolo auanei ia i ka lepo, a e nani wale ka hiolo ana ona.

15 No ka mea, aia hoi, wahi a ke kaula, e hiki wawe ana ka manawa, aole o Satana mana hou maluna o na naau o na keiki a kanaka: no ka mea, e hiki koke mai ana ka la, o ka poe hookiekie a pau a me ka poe hana ino, me he mauu la lakou; a ke hele mai la ka la e hoopauia’i lakou i ke ahi.

16 No ka mea, e hiki wawe ana ka manawa, e nininiia aku ko ke Akua inaina nui, maluna iho o na keiki a pau a kanaka: no ka mea, aole oia e ae aku i ka poe hewa e luku ae i ka poe pono.

17 Nolaila, e hoola no oia i ka poe pono ma kona mana, ina ma ka haawi ana mai i kona inaina nui, a e hoolaia ka poe pono, he oiaio, i ka lukuia’na o ko lakou poe enemi e ke ahi. No ia mea la, aole e pono no ka poe pono e makau ai: no ka mea, penei wahi a ke kaula, e hoolaia no lakou ina paha me he mea la ma o ke ahi la.

18 Aia hoi, e o’u mau hoahanau, ke i aku nei au ia oukou, e hiki koke mai no auanei keia mau mea e pono ai; he oiaio, o ke koko, a me ke ahi, a me ka ohu o ka uahi; e hiki io mai ia maluna o ka ili o ka honua nei; a ke hele mai la ia i na kanaka ma ke kino, ina e hoopaakiki lakou i ko lakou naau e ku e i ka Mea Hemolele o ka Iseraela;

19 No ka mea, aia hoi, aole e lukuia ka poe pono; no ka mea, ke hele io mai la ka manawa, e hookiia’ku ka poe a pau e kaua aku ana ia Ziona.

20 A e hoomakaukau io no ka Haku i ala no kona poe kanaka, i ka hooko ana i na olelo a Mose, ana i olelo mai ai, i ka i ana: E hooku auanei ka Haku ko oukou Akua i kekahi kaula ia oukou, e like me au, oia ka oukou e hoolohe ai ma na mea a pau ana e olelo mai ai ia oukou. A e hiki mai ka manawa o ka poe a pau i hoolohe ole i ua kaula la e okiia lakou mai ka poe kanaka ’ku.

21 [m 7, p 4] Ano, ke hai aku nei au, o Nepai, ia oukou, o keia kaula a Mose i olelo mai ai, oia ka Mea Hemolele o ka Iseraela; nolaila, e hoopai no oia ma ka pono;

22 A o ka poe pono aole o lakou mea e makau ai, no ka mea, o lakou ka poe e hoohoka ole ia. Aka, o ke aupuni o ka diabolo ka mea e kukuluia ana mawaena o na keiki a kanaka, a ua kukuluia ua aupuni la mawaena o ka poe ma ke kino:

23 No ka mea, e hiki koke ana ka manawa, o na ekalesia a pau i kukuluia i loaa’i ka waiwai, a me ka poe i kukuluia i loaa’i ka mana maluna o ke kino, a me ka poe i kukuluia e lilo i mea mahaloia imua o na maka o ko ke ao nei, a me ka poe e imi ana i na kuko o ke kino a me na mea o ko ke ao nei, a e hana i kela ano o ka hewa i keia ano o ka hewa; he oiaio, o ka poe a pau no ke aupuni o ka diabolo, oia ka poe e pono e makau ai, a e haalulu, a e naueue; he oiaio, o lakou no ka poe e hoohaahaaia ilalo ma ka lepo: o lakou no ka poe e wela ana me he mauu la: a ua like keia me na olelo a ke kaula.

24 A ke hele koke mai la ka manawa, e alakaiia iluna ka poe pono e like me ne bipi keiki i kupaluia, a e noho alii ka Mea Hemolele o ka Iseraela me ka lanakila, a me ka ikaika, a me ka mana, a me ka nani nui.

25 A ke houluulu mai la oia i kana poe keiki mai na kihi eha o ka honua; a ke helu mai la oia i kana poe hipa, a ua ike no lakou ia ia; a e lilo auanei i hookahi ohana hipa a i hookahi kahuhipa: a e hanai oia i kana poe hipa, a iloko one e loaa’i ia lakou ka ai.

26 A no ka pono o kona poe kanaka, ua mana ole o Satana; nolaila, aole e hiki ke hookuuia oia no na makahiki he nui wale; no ka mea, aole ona mana maluna o na naau o na kanaka, no ka mea, e noho ana lakou ma ka pono, a e noho alii ana ka Mea Hemolele o ka Iseraela.

27 Ano, aia hoi, ke i aku nei au, o Nepai, ia oukou, e hiki io mai ana no keia mau mea a pau ma ke kino.

28 Aka, aia hoi, e noho maluhia auanei na lahuikanaka a pau, na ohana, na olelo, a me na kanaka, iloko o ka Mea Hemolele o ka Iseraela, ina e mihi lakou.

29 [m 7, p 5] Ano, ke hooki nei au, o Nepai; no ka mea, aole au i aa e olelo hou aku i keia manawa, no keia mau mea.

30 Nolaila, e o’u mau hoahanau, ke makemake nei au e hoomanao oukou, he oiaio na mea i kahakahaia maluna o na papa keleawe; a ke hoike mai nei ia mau mea, he mea pono no ke kanaka e hoolohe aku i na kauoha a ke Akua.

31 Nolaila, aole pono no oukou e manao, owau nei a me kuu makuakane na mea wale no i hoike, a i ao aku no hoi i keia mau mea. Nolaila, ina e hoolohe pono oukou i na kauoha, a e hoomau pono i ka hopena, e hoolaia oukou ma ka la hope. A pela io no ia. Amene.

© 2008, 2009 Brent Thompson. Limited rights granted as indicated below, except where otherwise indicated.
This work is licensed under the Creative Commons Attribution-Noncommercial-Share Alike 3.0 United States License. To view a copy of this license, visit http://creativecommons.org/licenses/by-nc-sa/3.0/us/ or send a letter to Creative Commons, 171 Second Street, Suite 300, San Francisco, California, 94105, USA.